Nya Veviawo Nadze Ƒã

NUKAWOE nye nuƒo me nya veviwo? Menye nuƒoa ƒe akpa siwo nya se siwo ŋu woka fee vie ye o. Woawoe nye susu vevi siwo me wodzro yi ŋgɔe. Wonye susu siwo hiã hafi nàte ŋu aɖo wò taɖodzinu gbɔ.

Nu vevi si ana wò nya veviawo nadze ƒã enye alesi nàtia nusiwo ŋu nàƒo nu le la nyuie ahana woanɔ ɖoɖo nyui nu. Numekukuwɔwɔ na nuƒo wɔnɛ be wokena ɖe nyatakaka gbogbo aɖewo ŋu wu agbɔsɔsɔ si woate ŋu azã. Aleke nàwɔ anya esiwo nàzã?

Gbã, bu wò nyaselawo ŋu. Ðe womenya nu boo tso wò nyatia ŋu oa, alo wonya nu geɖe tso eŋu xoxoa? Ðe wo dometɔ akpa gãtɔ lɔ̃ ɖe nusi Biblia gblɔ tso eŋu dzia, alo wo dometɔ aɖewo dina be yewoake ɖi le eŋua? Kuxi kawoe wodoa goe le gbesiagbegbenɔnɔ me esi wole agbagba dzem be yewoawɔ ɖe nusi Biblia gblɔ tso nyatia ŋu dzi? Evelia, kpɔ egbɔ be yekpɔ taɖodzinu si le nuƒoa ŋu na nyasela mawo le nyati si nèɖo be yeazã me la dze sii nyuie. Zã mɔfiame eve siawo nàtsɔ atia nuƒoa me nyawo mee eye nàgblẽ nusiwo sɔ pɛpɛpɛ ko ɖi na zazã.

Ne wona nuƒogbalẽ wò si dzi tanya kple nya veviawo le xoxo la, ke ele be nusi nàgblɔ nanɔ te ɖe wo me nyawo dzi tututu. Ke hã ne mɔfiame siwo míegblɔ va yi le susu me na wò esime nèle dzadzram ɖo ɖe nya veviawo dometɔ ɖesiaɖe ŋu la, ana asixɔxɔ si le wò nuƒoa ŋu adze bliboe wu. Ne nuƒogbalẽ mele eŋu o la, ke wò ŋutɔe atia nya veviawo.

Ne wò nya veviawo me kɔ ɖe susu me na wò nyuie eye nèɖo numeɖeɖewo ɖe wo te la, nuƒoa ƒoƒo anɔ bɔbɔe na wò. Anɔ eme be wò nyaselawo hã akpɔ viɖe geɖe tso eme.

Mɔ Vovovo Siwo nu Nàte Ŋu Aɖo Wò Nuƒoa me Nyawo Ðo. Àte ŋu azã mɔnu vovovowo le nuƒoa ŋutɔ me nyawo ɖoɖo me. Ne mɔnu siawo va ma wò la, àkpɔe be yeate ŋu azã geɖe wòasɔ, eye esia aku ɖe wò taɖodzinu ŋu.

Mɔnu si zazã le bɔbɔe enye nuƒoa mama ɖe nyatiwo nu. (Nya veviawo dometɔ ɖesiaɖe hiã elabena awɔ akpa aɖe bene wò nyaselawo nase nya bliboa gɔme alo akpe ɖe ŋuwò nàɖo wò nuƒoa ƒe taɖodzinu gbɔ.) Mɔnu bubu enye ɖoɖo si nu nuwo dzɔ ɖo le ɣeyiɣikɔntabubu nu. (Le kpɔɖeŋu me, nusiwo dzɔ do ŋgɔ na Tsiɖɔɖɔa ava gbã, eyome nusiwo dzɔ do ŋgɔ na Yerusalem ƒe tsɔtsrɔ̃ le ƒe 70 M.Ŋ. me hã nava, eye emegbe nusiwo le dzɔdzɔm le mía ŋutɔwo míaƒe ŋkekea me nakplɔe ɖo.) Mɔnu etɔ̃lia enye nuwɔna kple emetsonu. (Àte ŋu agblɔ nuwɔna la gbã, emetsonua nakplɔe ɖo, alo nàgblɔ emetsonua gbã, nuwɔna la nava ɖe eyome. Le kpɔɖeŋu me, àte ŋu adze egɔme kple nudzɔdzɔ yeye aɖe, esi nye emetsonu la, eye eyome nàfia nusi na wòdzɔ alo nuwɔna la.) Mɔnu enelia enye nusiwo tsi tre ɖe wo nɔewo ŋu tsɔtsɔ sɔ kple wo nɔewo. (Àte ŋu atsɔ nyui asɔ kple vɔ̃, alo atsɔ nu deamedzi asɔ kple nu madeamedzi.) Ɣeaɖewoɣi woate ŋu azã mɔnu vovovo le nuƒo ɖeka me.

Esime wogblɔ alakpanutsotsowo ɖe Stefano ŋu na Yudatɔwo ƒe Sanhedrin la, Stefano ƒo nuƒo ʋãme aɖe si nɔ te ɖe ɣeyiɣikɔntabubu ƒe ɖoɖo si nu nuwo dzɔ ɖo dzi. Ne èle exlẽm le Dɔwɔwɔwo 7:2-53 la, de dzesii be taɖodzinu aɖe nɔ esi le nya vevi siwo wòtia me. Stefano na eme kɔ gbã be nya si gblɔm yele la nye ŋutinya si ŋu yeƒe nyaselawo mate ŋu asẽ nu le o. Eyome eɖee fia be togbɔ be Yosef nɔviwo gbee hã la, Mawu zãe tsɔ xɔ amewo ɖe agbe. Emegbe ena wòdze ƒã be Yudatɔwo gbe toɖoɖo Mose, amesi zãm Mawu nɔ. Eye wòƒo eta kple gbetete ɖe edzi be gbɔgbɔ si tɔgbe Yudatɔ siwo nɔ anyi do ŋgɔ ɖe fia la kee amesiwo na wowu Yesu Kristo hã ɖe fia.

Nya Veviawo Nagasɔ Gbɔ Fũ O. Nya vevi ʋɛ aɖewo koe hiã le tanya, alo nuƒo, ɖesiaɖe me dzodzro me. Le wo dometɔ akpa gãtɔ gome la, womewua atɔ̃ o. Enɔa alea nuƒoa ɖanye esi axɔ aɖabaƒoƒo 5, alo 10, alo 30, alo esi wu nenema o. Mègadze agbagba be yeana nya veviwo nadze taŋtaŋ o. Nukpɔsusu vovovo ʋɛ aɖewo koe wò nyaselawo ate ŋu alé ɖe susu me le nuƒo ɖeka me. Eye alesi nuƒoa didii la, nenemae wòle be woate gbe ɖe nya veviawo dzi wòasẽ ŋu eye woana woadze ƒãe.

Nya veviwo ƒe agbɔsɔsɔ kae nèɖazã o, kpɔ egbɔ be yeƒo nu tso wo dometɔ ɖesiaɖe ŋu nyuie. Na ɣeyiɣi si sɔ nyaselawo be woabu nya veviawo dometɔ ɖesiaɖe ŋu bene wòatsi susu me na wo nyuie.

Ele be wò nuƒoa nanye esi gɔme woate ŋu ase bɔbɔe. Esia menɔa te ɖe nyawo ƒe agbɔsɔsɔ dzi ɣesiaɣi o. Ne èƒo wò nyawo nu ƒu ɖe tanya sue ʋɛ aɖewo ko te nyuie eye nèdzro wo me ɖekaɖekae la, amewo ƒe susu akplɔ nuƒoa ɖo bɔbɔe eye madzo le woƒe susu me hã bɔbɔe o.

Na Wò Nya Veviawo Nadze Ƒã. Ne èɖo wò nuƒoa ɖe ɖoɖo nyui nu la, masesẽ be nàte gbe ɖe nya veviawo ƒe vevienyenye dzi le nuƒoa me o.

Mɔ vevi si dzi nàto ana nya vevi aɖe nadze ƒã enye be nàɖe kpeɖodzinyawo, mawunyakpukpuiwo, kple nyatakaka bubuwo ɖe go le mɔ si ahe susu ayi susu vevitɔa dzi eye wòado ŋusẽe nu. Ele be numeɖeɖe bubu siwo mehiã fũ o la katã nakɔ nya vevia me, aɖo kpe edzi, alo ado ŋusẽe. Mègatsɔ nya bubu siwo mesɔ kplii o de eme le esi wonya se ta ko o. Le numeɖeɖe siwo mehiã fũ o me dzodzro me la, na kadodo si le wo kple nya vevi si dzi dem wole dome la nadze ƒã. Mègagblẽe ɖe nyaselawo si be woawo ŋutɔ nanɔ kadodoa dim o. Àte ŋu ana kadodoa nadze to nya vevi siwo ɖe susu vevitɔa ɖe go la gbugbɔgagblɔ alo nya veviawo me nyawo gbugbɔgagblɔ kpuie edziedzi me.

Nuƒola aɖewo nana nya veviawo dzena ƒã to xexlẽdzesi nana wo me. Togbɔ be esia nye mɔ si dzi woate ŋu ato ana nya veviawo nadze ƒã dometɔ ɖeka hã la, mele be woaxɔ ɖe nuƒoa me nyawo siwo sɔ tiatia kple nyawo ɖoɖo nyuie be egɔme nanya se teƒe o.

Àte ŋu atiae be yeayɔ nya vevia do ŋgɔ hafi agblɔ eƒe kpeɖodzinyawo. Esia ana nyaselawo nakpɔ nya siwo akplɔe ɖo ƒe vevienyenye eye aganye gbetete ɖe nya vevi ma dzi. Àte ŋu agado ŋusẽ nya vevi ma to alesi nàgbugbɔ agblɔe kpuie le emedzodzro keŋ vɔ megbe.

Le Gbeadzi. Gɔmeɖose siwo me míedzro va yi mese ɖe dutoƒonuƒowo ko dzi o, ke eku ɖe gbeadzisubɔsubɔdɔa me dzeɖoɖowo hã ŋu. Ne èle dzadzram ɖo la, bu nu vevi ɖesiaɖe si le susu me na amewo le miaƒe nutoa me ŋu. Tia tanya si aʋu mɔ be nàte ŋu afia alesi mɔkpɔkpɔ si le Biblia me akpɔ egbɔe. Tia nya veviwo, ate ŋu anye abe eve ene, siwo dzi nànɔ te ɖo atsɔ adzro emee. Di mawunyakpukpui siwo nàzã atsɔ aɖo kpe nya vevi mawo dzii. Eyome bu alesi nàdze dzeɖoɖoa gɔmee ŋu. Dzadzraɖo alea na wote ŋu ɖea dzi ɖi trɔna ɖe nɔnɔmewo ŋu bɔbɔe alesi sɔ le dzeɖoɖo me. Akpe ɖe ŋuwò hã be nàgblɔ nya aɖe si dzi aƒemenɔlawo aɖo ŋkui.