Ðe Gbɔgbɔ Makumaku aɖe Le Mewòa?

ÐE AGBE gale ku megbea? Biabia sia tɔtɔ ameƒomea ƒe akpe geɖe. Le ƒe siwo va yi me la, amewo bu nyaa ŋu kpɔ le teƒe ɖesiaɖe eye dzixɔse vovovowo va su wo si.

Le xexeame godoo, si ŋu Polynesia si le Pacifik-nuto me kpe ɖo la, ame geɖe xɔe se be “gbɔgbɔ” aɖe le ame me si yia edzi nɔa agbe ne ame ku. Ðe nane le ame me si dona le ŋutilãa me ne eku eye wòyia edzi nɔa agbe nyateƒea? Nukae nye gbɔgbɔ si le ame gbagbe me? Nukae dzɔna ɖe edzi ne míeku? Mawu ƒe Nya, Biblia, si tso gbɔgbɔ me la na biabia siawo ƒe ŋuɖoɖo siwo nye nyateƒe eye wonaa dzidzeme ame la mí.

Nukae Nye Gbɔgbɔ La?

Nya si gɔme woɖe le Biblia me be “gbɔgbɔ” fia “yagbɔgbɔ” ko. Gake nya sia yi ŋgɔ wu ya gbɔgbɔ dzro ko. Le kpɔɖeŋu me Biblia-ŋlɔla Yakobo gblɔ be: “Ŋutilã gbɔgbɔ manɔmee nye nu kuku.” (Yakobo 2:26) Eyata, gbɔgbɔ lae nye nusi dea agbe ŋutilã la me.

Agbegbɔgbɔ sia mate ŋu anye yagbɔgbɔ, alo ya, si toa dzitodzitoawo me la dzaa ko o. Nukatae? Elabena ne yagbɔgbɔa tɔ la, agbe ganɔa lãmenugbagbeviawo me hena ɣeyiɣi kpui aɖe—“hena aɖabaƒoƒo geɖe” abe alesi The World Book Encyclopedia gblɔe ene. Susu sia tae agbagba siwo wodzena be woaɖo ƒuƒu ɖe amea me ne wòagbɔ agbe ate ŋu adze edzi ɖo, eye woate ŋu aɖe ame bubu ƒe ŋutinu ade ame bubu me. Gake ne agbegbɔgbɔa nya do le amea ƒe lãmenugbagbeviwo me ko la, agbagba ɖesiaɖe si woadze be woagbɔ agbee madze edzi o. Ya ɖesiaɖe si le xexeame mate ŋu ade agbe lãmenugbagbevi ɖeka pɛ gɔ̃ hã me o. Eyata gbɔgbɔ lae nye agbegbɔgbɔ makpɔmakpɔ—si nye agbeŋusẽ si naa lãmenugbagbeviawo nɔa agbe. Yagbɔgbɔe léa agbegbɔgbɔ sia ɖe te.—Hiob 34:14, 15.

Amegbetɔwo ɖeɖeko mee gbɔgbɔ ma lea? Biblia kpe ɖe mía ŋu míese nya sia gɔme nyuie. Fia nyanu Salomo ŋlɔ bena: “Ðe ame aɖe nyae be, amegbetɔviwo ƒe gbɔgbɔ yia dzi, eye lãwo ƒe gbɔgbɔ yia anyi me loo?” (Nyagblɔla 3:21) Eyata wogblɔ be gbɔgbɔ le lãwo kple amegbetɔwo siaa si. Aleke wòanɔ nenemae?

Míate ŋu atsɔ gbɔgbɔa, alo agbegbɔgbɔa asɔ kple elektrikŋusẽ si naa mɔ̃ aɖe alo dɔwɔnu aɖe wɔa dɔ. Wote ŋu zãa elektrikŋusẽ si ŋku mekpɔna o la tsɔ wɔa dɔ vovovowo, aleke ke mɔ̃ si wòle ŋusẽ namee ɖale o. Le kpɔɖeŋu me, ate ŋu ana elektrikgamle naxɔ dzo, ana kɔmpiuta nawɔ dɔ le nyatakakawo ŋu ahabu akɔntawo, eye nɔnɔmetatawo nadze le television dzi eye amewo naƒo nu wòaɖi le edzi. Ke hã medzɔna gbeɖe be elektrikŋusẽa natrɔ azu mɔ̃ si wòle ŋusẽ namee ahadze woakpɔ o. Ŋusẽ koe wòkpɔtɔ nyena. Nenema ke agbegbɔgbɔa metrɔna zua nusiwo me wòdea agbee hedzena wokpɔna o. Amenyenye kple tamebubuŋutete aɖeke mele esi o. “Gbɔgbɔ ɖekae le” amegbetɔwo kple lãwo siaa si. (Nyagblɔla 3:19) Eyata ne ame ku la, eƒe gbɔgbɔ mezua gbɔgbɔmenuwɔwɔ heyia edzi nɔa agbe le teƒe bubu o.

Ekema nɔnɔme ka mee ame kukuwo nɔna? Eye nukae dzɔna ɖe gbɔgbɔa dzi ne ame ku?

‘Anyi Ke Nàgatrɔ Azu!’

Esi ame gbãtɔ, Adam, ɖoe koŋ da le Mawu ƒe se dzi la, Yehowa gblɔ nɛ be: “Fifia ate wò, hafi [nàkpɔ abolo aɖu, vaseɖe esime nàgatrɔ azu anyi, elabena eya mee woɖe wò tsoe. Anyi nènye, eye anyi ke nàgatrɔ] azu!” (Mose I, 3:19) Afikae Adam nɔ hafi Yehowa tsɔ anyi wɔ eyamae? Menɔ afi aɖeke o! Nya la koe nye be menye naneke nɔ teƒe aɖeke o. Eyata esi Yehowa Mawu gblɔ be Adam ‘agatrɔ azu anyi’ la, nusi wòwɔnɛ enye be Adam aku. Adam matrɔ ava nɔ agbe le gbɔgbɔmexexe me o. Ne eku la, agbe maganɔ eme o, maganɔ afi aɖeke o. Eƒe tohehee nye ku—si nye agbemanɔmanɔ—menye tɔtrɔ yi xexe bubu me o.—Romatɔwo 6:23.

Ke ame bubu siwo hã ku ɖe? Wona nɔnɔme si me ame kukuwo le me kɔ nyuie le Nyagblɔla 9:5, 10, afisi míexlẽ le be: “Kukuawo menya naneke o, . . . nuwɔwɔ alo tamebubu, sidzedze alo nunya mele tsieƒe afisi yi ge nala o.” Eyata ku enye agbemanɔmanɔ. Hakpala la ŋlɔ be ne ame ku la, “eƒe gbɔgbɔ nu tsona, egbugbɔna yia eƒe anyi gbɔ; gbemagbe eƒe tameɖoɖowo nu yina.—Psalmo 146:4.

Edze ƒã be ame kukuwo menya naneke o, womagate ŋu awɔ naneke o. Womenya naneke o. Womate ŋu akpɔ wò, ase wò nuƒo, alo aƒo nu na wò o. Womate ŋu akpe ɖe ŋuwò alo awɔ nu vevi wò o. Mehiã kura be nàvɔ̃ ame kukuwo o. Gake aleke gbɔgbɔa ‘dona le amea mee’ ne eku?

Gbɔgbɔ la ‘Gbugbɔna Yia Nyateƒe Mawu la Gbɔ’

Biblia gblɔ be ne ame ku la, ‘gbɔgbɔ la gbugbɔna yia nyateƒe Mawu, si tsɔe na la gbɔ.’ (Nyagblɔla 12:7) Ðe esia fia be gbɔgbɔa toa yame ŋutɔŋutɔ ɖadona ɖe Mawu ŋkumea? Kura o! Mɔ si nu Biblia zã nya ‘gbugbɔ’ ɖo mebia zɔzɔ tso teƒe aɖe ayi bubu ŋutɔŋutɔ o. Le kpɔɖeŋu me, wogblɔ na Israel-vi nuteƒemawɔlawo be: “Mitrɔ ɖe ŋunye, ekema nye hã matrɔ ɖe mia ŋu, Yehowa Zebaot ye gblɔe!” (Maleaxi 3:7) Israel-viwo ƒe ‘tɔtrɔ’ ɖe Yehowa ŋu fia be woagbugbɔ le mɔ vɔ̃wo dzi agatrɔ ɖe Mawu ƒe mɔ dzɔdzɔeawo ŋu ake. Eye Yehowa ƒe ‘tɔtrɔ’ ɖe Israel-viwo ŋu fia be wòagakpɔ ŋudzedze ɖe eƒe amewo ŋu ake. Le nya evea siaa me la, ‘tɔtrɔ’ ku ɖe nɔnɔme ŋu, menye dzodzo le anyigba ƒe teƒe aɖe ayi bubu o.

Nenema ke ne ame ku la, naneke medzona le anyigbaa dzi yia Mawu gbɔ ŋutɔŋutɔ le dziƒonuto me ne gbɔgbɔ la ‘gbugbɔ’ yi Mawu gbɔ o. Ðo ŋku edzi be, gbɔgbɔ lae nye agbegbɔgbɔa. Ne agbegbɔgbɔa nya do le amea me ko la, Mawu si koe ŋutete le be wòagbugbɔe ade amea me. Eyata gbɔgbɔ la ‘gbugbɔna yia nyateƒe Mawu la gbɔ’ le susu sia nu be fifia la, Mawu ɖeɖeko sie agbe si ame ma agava nɔ le etsɔme ƒe mɔkpɔkpɔ ɖesiaɖe le.

Le kpɔɖeŋu me, de ŋugble le nusi Ŋɔŋlɔawo gblɔ tso Yesu ƒe ku ŋu ŋuti kpɔ. Nyanyuiŋlɔla Luka gblɔ be: “Yesu do ɣli kple gbe sesĩe [gblɔ] bena: Fofo, asiwò me metsɔ nye gbɔgbɔ la de; ke esi wògblɔ esia la, etsɔ gbɔgbɔ la na.” (Luka 23:46) Esi Yesu ƒe gbɔgbɔ do le eme la, medze mɔ ŋutɔŋutɔ yi dziƒo o. Ŋkeke etɔ̃ megbee wofɔ Yesu ɖe tsitre tso ame kukuwo dome. Eye ŋkeke 40 sɔŋ va yi hafi wòyi dziƒo. (Dɔwɔwɔwo 1:3, 9) Gake esi Yesu nɔ kukum la, egblẽ eƒe gbɔgbɔ ɖe Fofoa si me kple dzideƒo, eye wòka ɖe Yehowa ƒe ŋutete dzi bliboe be agbɔ agbe ye.

Ẽ, Mawu koe ate ŋu agbɔ agbe ame. (Psalmo 104:30) Mɔkpɔkpɔ gã ka gbegbee nye si esia ʋu ɖi na mí!

Mɔkpɔkpɔ si Ŋu Kakaɖedzi Le

Biblia gblɔ be: “Gaƒoƒo gbɔna, le esi me amesiwo katã le [ŋkuɖodziyɔdowo, New World Translation] me la, woase [Yesu ƒe gbe ahado go].” (Yohanes 5:28, 29) Ẽ, Yesu Kristo do ŋugbe be woafɔ amesiwo katã le Yehowa ƒe susu me ɖe tsitre, alo woagbɔ agbe wo. Le esi teƒe be woaɖe gbeƒã nublanuitɔe be amewo ku la, amesiwo wogbɔ agbee ŋuti nyatakaka dodzidzɔnamewoe míase. Dzidzɔ ka gbegbee nye si wòanye be woado dzaa na lɔlɔ̃tɔwo tso yɔdo me!

Àdi be yeanya nu geɖe tso alesi nàwɔ mɔkpɔkpɔ sia si Mawu na naɖe vi na wò ŋua? Míekpe wò be nàzã adrɛs si le egɔme aŋlɔ agbalẽ abia agbalẽ gbadza si nye Ame Kukuwo ƒe Gbɔgbɔwo—Ðe Woate Ŋu Akpe Ðe Ŋuwò alo Awɔ Nuvevi Wòa? Woli Nyateƒea? ƒe ɖeka.

Biblia ƒe kpukpui siwo katã woyɔ la tso Eʋegbe Biblia me, negbe ne wofia asi bubu aɖe ko.