TA 16

Nukae Nye Nusi Le Vevie Ŋutɔŋutɔ?

GBEÐEKA ŋutsu aɖe ɖi tsa va Yesu gbɔ. Enya be nunyala gã aɖee Yesu nye, eyata wòva gblɔ nɛ be: ‘Nufiala, gblɔ na nɔvinye be wòatsɔ nusiwo le esi la ƒe ɖewo nam.’ Ŋutsu sia susui be ele be ye nɔvia ƒe nuwo dometɔ aɖewo nasu ye si.

Ne wòe nye Yesu ɖe, anye ne nya kae nàgblɔ?— Yesu kpɔe be kuxi aɖe le fu ɖem na ŋutsu sia. Gake menye kuxia enye be nane si le nɔvia si lae hiãe o. Ŋutsua ƒe kuxi enye be menya nusi le vevie ŋutɔŋutɔ le agbe me o.

Na míabu nusia ŋu kpɔ. Nukae wòle be wòanye nu vevitɔ na mí? Fefenu dzeaniwo, awu yeyewo, alo nusiawo tɔgbe yea?— Ao, nu bubu aɖe li si le vevie kura wu. Eye esiae nye nusi Yesu di be yeafia mí. Eyata egblɔ ŋutinya aɖe ku ɖe ŋutsu aɖe si ŋlɔ Mawu be ŋu. Àdi be yease ŋutinya sia?—

Ŋutsu kesinɔtɔ aɖe nɔ anyi. Anyigbawo kple avawo, alo nuɖuɖudzraɖoƒe gãwo, nɔ esi. Nuku siwo wòƒã la wɔ nyuie ŋutɔ. Teƒe megale eƒe avawo me be wòaƒo nukuawo katã nu ƒu ɖo o. Eyata nukae wòbe yeawɔ? Egblɔ le eɖokui me be: ‘Magbã nye avawo ahatu gãtɔwo. Eye maƒo nye nukuwo kple nye nu nyuiwo katã nu ƒu ɖe ava yeye siawo me.’

Kesinɔtɔa susui be esiae nye nusi me nunya le si wòle be yeawɔ. Esusui be yedze aɖaŋu ŋutɔ be yete ŋu ƒo nu geɖewo nu ƒu. Egblɔ le eɖokui me be: ‘Medzra nu nyui geɖewo ɖo. Woanɔ anyi nam ƒe geɖe. Eyata azɔ mate ŋu agbɔ ɖe eme. Maɖu nu, ano nu, ahakpɔ dzidzɔ.’ Gake nane gblẽ le kesinɔtɔa ƒe tamesusu ŋu. Ènya nusi gblẽ le eŋua?— Enɔ tame bum le eya ŋutɔ ɖeɖeko kple eya ŋutɔ ƒe dzidzɔkpɔkpɔ ŋuti. Eŋlɔ Mawu be.

Eyata Mawu ƒo nu na kesinɔtɔa. Egblɔ nɛ be: ‘Wò ame tsibome. Èle kuku ge le zã sia me. Ke nusiwo nèdzra ɖo la, ameka tɔ woatrɔ azu mahã?’ Ðe kesinɔtɔa agate ŋu azã nu mawo le eƒe ku megbea?— Kura o, ame bubu tɔ ko zu ge woala. Yesu gblɔ be: ‘Ale amesi le nu nyuiwo dzram ɖo na eɖokui eye kesinɔnu mele esi le Mawu gbɔ o la le enye si.’—Luka 12:13-21.

Ðe nàdi be yeanɔ abe kesinɔtɔ ma enea?— Eƒe taɖodzinu vevitɔ le agbe me koe nye be yeakpɔ ŋutilãmenuwo. Emae nye vodada si wòwɔ. Edina ɣesiaɣi be nu gã nu gãwo nasu ye si. Gake ‘kesinɔnu mele esi le Mawu gbɔ o.’

Egbea ame geɖe le abe kesinɔtɔ ma ene. Wodia nu gãwo ɣesiaɣi. Gake esia ate ŋu akplɔ ame ade kuxi gãwo me. Le kpɔɖeŋu me, fefenuwo le asiwò ɖe, alo?— Nukawoe nye fefenu siwo le asiwò dometɔ aɖewo? Yɔ wo nam.— Ekema ne eva eme be bɔl aɖe le xɔ̃wò aɖe si, alo aŋevidzĩ, alo fefenu bubu aɖe, si mele wò ya asiwò o ɖe? Ðe wòanyo be nàdze agbagba ɖesiaɖe be dziwòlawo naƒle ɖe na wòa?—

Le ɣeyiɣi aɖe me adze abe fefenu aɖe le vevie ŋutɔ na wò ene. Gake nukae dzɔna le ɣeyiɣi kpui aɖe megbe?— Edoa xoxo. Ate ŋu akaka, eye emegbe màgadii azɔ o. Le nyateƒe me la, nane le asiwò si le vevie kura wu fefenu xɔasi ɖesiaɖe. Ènya nusi wònyea?—

Eyae nye wò agbe. Wò agbe le vevie ŋutɔ elabena agbe manɔmee la, màte ŋu awɔ naneke o. Gake ɖe menye nusi dzea Mawu ŋu wɔwɔ dzie wò agbe nɔ te ɖo oa?— Eyata mègana míanɔ abe kesinɔtɔ bometsila ma si ŋlɔ Mawu be la ene o.

Menye ɖeviwo koe nye amesiwo wɔa bometsinuwo abe kesinɔtɔ ma ene o. Ame tsitsi geɖe hã wɔa nu nenema. Ɣesiaɣi wo dometɔ aɖewo dia nu gã siwo wu esiwo le wo si. Nuɖuɖu si asu na wo ate ŋu anɔ wo si na ŋkekea, avɔ nanɔ wo si woata, eye nɔƒe hã nanɔ wo si be woanɔ. Gake woganɔa nu bubuwo dim kpee. Wonɔa awu gbogbo aɖewo dim. Eye wonɔa aƒe siwo lolo wu dim. Nusiawo katã hiã ga geɖe. Eyata wowɔa dɔ sesĩe ɣeyiɣi didi be woakpɔ ga geɖe. Eye ga geɖe alesinu wokpɔ la, geɖe wue wogadinɛ ɖe edzi.

Ame tsitsi aɖewo tsia dzi ɖe gadidi ŋu ale gbegbe be womegakpɔa vovo nɔa woƒe ƒomea gbɔ o. Eye nenema ke womekpɔa vovo ɖe Mawu hã ŋu o. Ðe woƒe ga ate ŋu ana agbe woa?— Ao, mate ŋui o. Ðe woate ŋu azã woƒe ga le ku megbea?— Kura o. Womate ŋui o elabena ame kukuwo mate ŋu agawɔ naneke kura o.—Nyagblɔla 9:5, 10.

Ðe wòfia be menyo be ga nanɔ ame si oa?— Mefia nenema o. Ne ga le mía si la, míate ŋu aƒle nuɖuɖu kple awu. Biblia gblɔ be ga kpɔa ame ta. (Nyagblɔla 7:12) Gake ne míezu galɔ̃lawo la, ekema agblẽ nu le mía ŋu. Míaɖi kesinɔtɔ bometsila ma si ƒo nunɔamesiwo nu ƒu na eɖokui gake kesinɔnu aɖeke mele esi le Mawu gbɔ o la.

Nukae wòfia be kesinɔnu nanɔ ame si le Mawu gbɔ?— Efia be míatsɔ Mawu aɖo nɔƒe gbãtɔ le míaƒe agbe me. Ame aɖewo gblɔna be yewoxɔ Mawu dzi se. Wobu be edzixɔxɔse koe nye nusi hiã. Gake ɖe kesinɔnu le wo si le Mawu gbɔ ŋutɔŋutɔa?— Ao, ɖeko woɖi kesinɔtɔ ma si ŋlɔ Mawu be.

Yesu meŋlɔ Fofoa si le dziƒo be kpɔ ɣeaɖekeɣi o. Medze agbagba be yeadi ga geɖe o. Eye ŋutilãmenu geɖe hã menɔ esi o. Yesu nya nusi le vevie ŋutɔŋutɔ le agbe me. Ènya nusi wònyea?— Eyae nye be woanye kesinɔtɔ le Mawu gbɔ.

Gblɔe nam, aleke míawɔ azu kesinɔtɔwo le Mawu gbɔ?— Míate ŋu azu kesinɔtɔwo le Mawu gbɔ ne míewɔa nusiwo dzea eŋu. Yesu gblɔ be: “Nye la mewɔa nusi dzea eŋu ɖaa.” (Yohanes 8:29) Edzɔa dzi na Mawu nenye be míewɔ nusiwo wòdi tso mía si be míawɔ. Azɔ gblɔe nam, nukawoe nye nusiwo nàte ŋu awɔ be wò nu nadze Mawu ŋu?— Ẽ, àte ŋu axlẽ Biblia, ade Kristotɔwo ƒe kpekpewo, ado gbe ɖa na Mawu, eye àte ŋu akpe ɖe amewo ŋu woasrɔ̃ nu tso eyama ŋu. Nusiawoe nye nusiwo le vevie ŋutɔŋutɔ le agbe me.

Esi Yesu nye kesinɔtɔ le Mawu gbɔ ta la, Yehowa kpɔ eta. Etsɔ teƒeɖoɖo si nye agbe mavɔ nɔnɔ na Yesu. Ne míawo hã míeɖi Yesu la, Yehowa alɔ̃ mí eye wòakpɔ mía ta. Eyata neva eme be míaɖi Yesu, ke menye abe kesinɔtɔ si ŋlɔ Mawu be la gbeɖe o.

Mawunyakpukpui aɖewo siwo fia nukpɔsusu nyuitɔ si wòle be wòanɔ mía si ɖe ŋutilãmenuwo ŋu enye si: Lododowo 23:4; 28:20; Timoteo I, 6:6-10; kple Hebritɔwo 13:5.

[Nɔnɔmetata si le axa 87]

Nukae nye ŋutsu sia ƒe kuxi?

[Nɔnɔmetata si le axa 88]

Nuka ŋu bumee kesinɔtɔ sia le?

[Nɔnɔmetata si le axa 89]

Nukae le asiwò si xɔ asi kura wu fefenuwo?

[Nɔnɔmetata siwo le axa 91]

Nukawo wɔmee ɖevi sia le siwo le vevie ŋutɔŋutɔ?