Xexeme Yeye Si Ŋugbe Mawu Do

BIBLIA, si nye Mawu ƒe Nya si woŋlɔ, na mɔkpɔkpɔ mí esi wògblɔ be: “Míele dziƒo yeye kple anyigba yeye, siwo me dzɔdzɔenyenye anɔ la, lalam le eƒe ŋugbedodo la nu.”—Petro II, 3:13.

Nukae nye “dziƒo yeye” la? Biblia zãa dziƒo tsɔ tsia tre ɖi na dziɖuɖu. (Dɔwɔwɔwo 7:49) “Dziƒo yeye” lae nye dziɖuɖu yeye si aɖu anyigba dzi. Enye yeye elabena axɔ ɖe egbegbe dziɖuɖuwo teƒe; eganye afɔɖeɖe yeye hã le Mawu ƒe tameɖoɖo me vava me. Eyae nye Fiaɖuƒe si Yesu fia mí be míado gbe ɖa abia. (Mateo 6:10) Esi wònye Mawu, amesi le dziƒo, ye Ðoe Anyi ta la, woyɔnɛ be “dziƒofiaɖuƒe.”—Mateo 7:21.

Nukae nye “anyigba yeye” la? Menye anyigba bubue o, elabena Biblia gblɔe eme kɔ kɔte be amewo anɔ anyigba dzi tegbee. “Anyigba yeye” lae nye amegbetɔƒomea ƒe habɔbɔ yeye aɖe. Anye yeye elabena woatsrɔ̃ ame vɔ̃ɖiwo ɖa. (Lododowo 2:21, 22) Amesiwo katã anɔ agbe ɣemaɣi ade bubu Wɔla la ŋu, aɖo toe, ahanɔ agbe wòawɔ ɖeka kple eƒe nudidiwo. (Psalmo 22:28) Wole amewo kpem tso dukɔwo katã me fifia be woasrɔ̃ nudidi siawo eye be woatrɔ woƒe agbe wòasɔ ɖe wo nu. Èle ema wɔma?

Le Mawu ƒe xexe yeyea me la, amesiame alɔ̃ ɖe Eƒe dziɖulanyenye dzi ahade bubu eŋu. Ðe lɔlɔ̃ na Mawu ʋãa wò nèɖoa toea? (Yohanes I, 5:3) Ðe ema dzena le wò nuwɔnawo me le aƒewòme? le dɔwɔƒe alo suku? kple le alesi nèle wò agbea zãmee mea?

Le xexe yeye ma me la, amegbetɔƒomea katã awɔ ɖeka le Mawu vavã la subɔsubɔ me. Èdea ta agu na dziƒo kple anyigba Wɔlaa? Ðe wò tadedeagu na ɖekawɔwɔ vavã le mia kple hati tadeagula siwo tso dukɔ ɖesiaɖe, ameƒomevi ɖesiaɖe, kple gbegbɔgblɔ ɖesiaɖe dolawo domea?—Psalmo 86:9, 10; Yesaya 2:2-4; Zefanya 3:9.

[Aɖaka si le axa 17]

Mawu Si Do Nusiawo Ŋugbe

Eyae nye dziƒo kple Anyigba la Wɔla. Eyae nye amesi Yesu Kristo yɔ be “Mawu vavã ɖeka la.”​—Yohanes 17:3.

Ameƒomea me tɔ akpa gãtɔ dea ta agu na mawu siwo woa ŋutɔwo wɔ. Ame miliɔn geɖe dea ta agu na nɔnɔmewɔwɔ siwo me agbe mele o. Ame bubuwo hã kafua amegbetɔwo ƒe nuɖoanyiwo, xexemenunya, alo woa ŋutɔwo ƒe nudzodzrowo. Amesiwo gblɔna be yewozãa Biblia la kura gɔ̃ hã dometɔ kpa gãtɔ medea bubu amesi Biblia yɔ be ‘Mawu vavã’ la ƒe ŋkɔ ŋu o.​—Mose V, 4:35.

Wɔla la gblɔ tso eɖokui ŋu be: “Nyee nye Yehowa, ŋkɔnyee.” (Yesaya 42:5, 8) Ŋkɔ sia dze abe zi 7,000 ene le Biblia me le gbe gbãtɔ siwo me woŋlɔe ɖo me. Yesu Kristo fia eyomedzelawo be woado gbe ɖa be: “Mía Fofo, si le dziƒowo! Wò ŋkɔ ŋuti nakɔ!”​—Mateo 6:9.

Ameka ƒomevie Mawu vavã la nye? Egblɔ tso eɖokui ŋu be yenye “nublanuikpɔla kple amenuve Mawu, amesi gbɔa dzi blewu, eye eƒe amenuveve kple nuteƒewɔwɔ sɔ gbɔ” eye be yenye amesi hea to na amesiwo ɖonɛ koŋ daa yeƒe sewo dzi la godoo. (Mose II, 34:6, 7) Alesi wòwɔ nu kple ameƒomea va yi le ŋutinya me ɖee fia be nya ma si wògblɔ tso eɖokui ŋu la nye nyateƒe matrɔmatrɔ.

Ele be woakɔ ŋkɔ ma kple amesi tɔ ŋkɔa siaa ŋu, alo abui be ele kɔkɔe. Esi wònye Wɔla kple Xexeame Katã ƒe Dziɖulagã ta la, edze be míaɖo toe ahade ta agu na eya ɖeɖeko. Èwɔa nusiawoa?

[Aɖaka/Nɔnɔmetata si le axa 18]

Tɔtrɔ Kawoe “Dziƒo Yeye Kple Anyigba Yeye” la Ahe Vɛ?

Woatrɔ anyigbaa wòazu Paradiso Luka 23:43

[Aɖaka/Nɔnɔmetata siwo le axa 19]

Àna Wòaɖe Vi na Wòa?

Mawu mate ŋu aka aʋatso o!—Tito 1:2.

Yehowa gblɔ be: “Nye nya . . . magbugbɔ va gbɔnye ƒuƒlu o, negbe ɖeko wòawɔ nye lɔlɔ̃nu, eye wòawɔ nusi gbe meɖoe ɖo la hafi.”—Yesaya 55:11.

Yehowa le “dziƒo yeye kple anyigba yeye” la wɔm xoxo. Dziƒodziɖuɖua dze dɔ gɔme xoxo. Woɖo “anyigba yeye” la hã gɔme anyi xoxo.

Esi Nyaɖeɖefia ƒo nu tso nu wɔnuku siwo “dziƒo yeye kple anyigba yeye” la ahe vɛ na ameƒomea ŋu vɔ la, eyɔ Mawu, Xexeame Katã ƒe Dziɖulagã la ŋutɔ ƒe nyawo, hegblɔ be: “Kpɔ ɖa, mewɔ nuwo katã yeye!” Egblɔ hã be: “Ŋlɔe, elabena nya siawo nye nya vavãwo kple nyateƒenyawo.”—Nyaɖeɖefia 21:1, 5.

Biabia vevitɔ enye, Ðe míele tɔtrɔ siwo hiã la wɔm ale be woabu mí be míedze anɔ ‘anyigba yeyea’ dzi le ‘dziƒo yeyea’ tea?