Ame Kawo Ƒomevie Nàdi Be Yeadze Xɔlɔ̃e?

1, 2. (a) Nɔnɔme sesẽ kawoe ate ŋu adze ŋgɔ Kristotɔwo le ame siwo dome wole ta? (b) Nu ka tae ame siwo ƒomevi Yeremiya dze xɔlɔ̃e nyanya aɖe vi na mí?

NU KAE nàwɔ ne wò dɔwɔhatiwo, aƒelikawo, alo sukuhatiwo kpe wò be nàva Kristmas kplɔ̃ɖoƒe? Ke ne wò dɔtɔ di tso asiwò be nàda alakpa alo awɔ nane si mele se nu o ya ɖe? Alo tsɔe be dziɖuɖua bia tso asiwò be nàkpɔ gome le dɔwɔna aɖe si de nu dunyahehe me la me. Ðikeke mele eme o be wò dzitsinya maɖe mɔ na wò be nàwɔ nu siawo dometɔ aɖeke o, ne esia ana woaɖu fewu le ŋuwò alo awɔ fu wò gɔ̃ hã.

² Abe ale si míele eme dzro gee ene la, Yeremiya hã to nɔnɔme sesẽ siawo tɔgbi me. Aɖe vi na wò be nànya ame siwo ƒomevi Yeremiya do goe kple ame siwo dome wònɔ le eƒe subɔsubɔdɔa wɔɣi. Wo dometɔ aɖewo dze agbagba be yewoaɖe dzi le eƒo wòadzudzɔ eƒe subɔsubɔdɔa wɔwɔ. Togbɔ be nɔnɔmeawo bia be Yeremiya nanɔ wo dome hã la, mena wozu exɔlɔ̃wo o. Gake anyo be nàde dzesii be Yeremiya dze xɔlɔ̃ ame aɖewo, siwo kpe ɖe eŋu hede dzi ƒo nɛ wòyi edzi wɔ nuteƒe. Ɛ̃, àte ŋu asrɔ̃ nu vevi aɖe tso ame siwo ƒomevi Yeremiya dze xɔlɔ̃e la me.

 3. Nu kae Zedekiya di tso Yeremiya si, gake aleke Yeremiya wɔ nui?

³ Hafi woatsrɔ̃ Yerusalem la, Fia Zedekiya va Yeremiya gbɔ zi gbɔ zi geɖe. Nu ka tae? Fia la di be yease nya nyui aɖe tso yeƒe fiaɖuƒea ƒe etsɔme ŋu. Edi be Yeremiya nagblɔ nya ɖi be Mawu aɖe Yuda tso eƒe futɔwo si me. Zedekiya dɔ amewo ɖe Yeremiya gbɔ wova ɖe kuku nɛ be: “Bia gbe Yehowa na mí, elabena Babel fia Nebukadnezar le aʋa wɔm kpli mí; ɖewohĩ Yehowa awɔ na mí ɖe eƒe nukunuwo katã nu, eye [Babel fia aho] adzo tso mía ŋu.” (Yer. 21:2) Mɔfiame si Mawu na fia lae nye be wòana ta Babilontɔwo, gake medi be yeasee o. Agbalẽnyala aɖe tsɔ Zedekiya sɔ kple “dɔnɔ aɖe si dea kɔdzi edziedzi, gake ne ɖɔkta na atikee la, medina be yeanoe o.” Ke aleke Yeremiya wɔ nui? Ne ɖe wòdi nya vivi aɖe gblɔ na Zedekiya la, anye ne eƒe nu dzɔ dzi nɛ. Ke nu ka tae Yeremiya melũ tome nɛ ko ne wòadzudzɔ fuɖeɖe nɛ o? Nya la koe nye be, Yehowa bia tso esi be wòagblɔe ɖi be Yerusalem atsrɔ̃.—Xlẽ Yeremiya 32:1-5.

 4. Nyametsotso kae dzea ŋgɔ mí ku ɖe ame siwo dome míenɔna ŋu?

⁴ Ðewohĩ nɔnɔme siwo me tom nèle sɔ kple Yeremiya tɔ le mɔ aɖe nu. Ele eme baa be ènɔa wò aƒelikawo, dɔwɔhatiwo, alo sukuhatiwo dome zi geɖe. Gake esi womedi be yewoaɖo to Mawu ƒe mɔfiamewo kaka ahayi wo dzi wɔ ge o ɖe, ɖe nàlɔ̃ adze xɔlɔ̃ woa? Yeremiya mate ŋu aƒo asa na Zedekiya keŋkeŋ o, elabena togbɔ be egbe toɖoɖo Mawu hã la, eya koe kpɔtɔ nye fia. Ke hã, Yeremiya meɖe mɔ fiaa ƒe nukpɔsusu totrowo kpɔ ŋusẽ ɖe edzi o, eye medze agbagba be yeawɔ nu wòadze eŋu hã o. Ne ɖe Yeremiya wɔ ɖe Zedekiya ƒe didiwo dzi la, anye ne ena nunana kple mɔnukpɔkpɔ geɖewoe. Gake Yeremiya meɖe mɔ nyaƒoɖeamenu kple tetekpɔ siawo na wòdze xɔlɔ̃ Zedekiya o. Nu ka tae? Yeremiya medi be yeawɔ nu si to vovo na nu si Yehowa di tso ye si o. Ele be Yeremiya ƒe kpɔɖeŋu nyui sia naʋã mí míadzro mía ɖokui me kpɔ be ɖe ame siwo míedzea xɔlɔ̃e la dea dzi ƒo na mí be míawɔ nuteƒe na Mawu hã. Màte ŋu aƒo asa na ame siwo mesubɔa Mawu o la keŋkeŋ o—ènɔa wo dome le dɔme, alo suku, alo wonye wò aƒelikawo. (1 Kor. 5:9, 10) Gake ènyae be ne yedze xɔlɔ̃ wo la, woate ŋu ana mia kple Mawu dome xɔlɔ̃dzedzea me nagblẽ.

5, 6. Nu kae ame aɖewo wɔ kple susu be yewoana Yeremiya nazi ɖoɖoe?

⁵ Menye Zedekiya ɖeka koe di be yeakpɔ ŋusẽ gbegblẽ ɖe Yeremiya dzi o. Nunɔla si ŋkɔe nye Pasxur “ƒo” Yeremiya, ɖewohĩ ena woƒoe zi 39. (Yer. 20:2; 5 Mose 25:3) Yuda-megã aɖewo hã ƒo Yeremiya ɣeaɖeɣi helée de ‘tomegaxɔ’ me. Nɔnɔmeawo va sesẽ na nyagblɔɖilaa le gaxɔa me ale gbegbe be esusui be yele kuku ge atsi afi ma. (Xlẽ Yeremiya 37:3, 15, 16.) Esi woɖe Yeremiya le gaxɔa me eteƒe medidi o la, amegã bubuwo ƒo nya ɖe Zedekiya nu be wòawui. Wobe ele dzi ɖem le Yudatɔwo ƒe aʋawɔlawo ƒo. Eya ta wotsɔ nyagblɔɖilaa de vudo si me ba le la me be wòaku. (Yer. 38:1-4) Míenya be ame aɖewo va xɔ na Yeremiya ale be meku o. Ke hã, nudzɔdzɔ siawo ɖee fia be ame siwo si wòle be xɔse nanɔe nye ema tso ɖe Mawu ƒe nyagblɔɖilaa ŋu le esi womexɔ eƒe nyaawo dzi se o ta.

⁶ Menye fia kple eŋumewo koe tsi tsitre ɖe Yeremiya ŋu o. Gbe ɖeka la, ŋutsu aɖewo tso Yeremiya ŋutɔ de Anatot—míagblɔ ko be eƒe aƒelikawoe nye ema—va do ŋɔdzi nɛ be ne medzudzɔ nyagbɔgblɔɖi o la, yewoawui. (Yer. 11:21) Esi Yeremiya ƒe nyawo mevivi wo nu o tae wova do ŋɔdzi nɛ be wòamia nu. Gake Yeremiya di be yeanye Yehowa xɔlɔ̃ tsɔ wu be yeawɔ nu wòadze wo ŋu ne woadze xɔ̃ ye. Dukɔa me vi bubuwo tee kpɔ be yewoawɔ nuvevii gɔ̃ hã. Esi Yeremiya wɔ kɔkuti de kɔ be yeatsɔ afia nu Yudatɔwo be ele be woabɔbɔ ɖe Babilon fia te ne woatsi agbe la, aʋatsonyagblɔɖila Xananya ɖe kɔkutia le Yeremiya ƒe kɔ heŋee. Eya ŋutɔ be Yehowa gblɔ nya ɖi to ye dzi be: “Maŋe Babel fia ƒe kɔkuti.” Gake ƒea mewu enu hafi Xananya ku o, eye míenya nyagblɔɖila si ƒe nyawo va eme. (Yer. 28:1-11, 17) Esi wotsrɔ̃ Yerusalem abe ale si Yeremiya gblɔe ɖii ene megbe la, Yoxanan kple aʋafia bubuwo gbe toɖoɖo se si Mawu de na wo be woagadzo le Yuda o. Wogblɔ na Yeremiya be: “Alakpa dam nèle; menye Yehowa, mía Mawu, ye ɖo wò ɖa gblɔ bena: Migayi Egipte ɖanye amedzro le afi ma o.” Wokplɔ Yeremiya kple Barux yi Egipte akpasesẽe hedo dziku na Yehowa ɖe edzi.—Yer. 42:1–43:7.

 7. Kuxi kae nèdoa goe si tɔa gbe wò nuteƒewɔwɔ na Yehowa?

⁷ Xɔsemanɔsitɔwo kple tsitretsiɖeŋulawo domee Yeremiya nɔ ƒe geɖe. Tɔ vie nàgade ŋugble tso ale si wònɔ agbee ŋu kpɔ. Ele bɔbɔe be wòadze xɔlɔ̃ ame siwo medea bubu Mawu alo eƒe Nyaa ŋu o. Woawo sɔŋ domee wònɔ. Ke egbea ya ɖe? Ðewohĩ wò hã ènɔa ame siwo ƒomevi dome Yeremiya nɔ la dome ɣeaɖewoɣi. Woɖatsia tsitre ɖe ŋuwò loo alo wɔa nu ɖe ŋuwò nyuie o, ɖe nàdi be yeadze xɔlɔ̃ woa? Ðe nunya anɔ eme be nàde ha kple ame siwo metsɔa ɖeke le Mawu ƒe nyagblɔɖiwo me oa? Ne ɖe Yeremiya li egbea ɖe, ɖe wòadze xɔlɔ̃ ame siwo menɔa agbe ɖe Mawu ƒe Nyaa me nyateƒea nu o eye woɖoa ŋu ɖe amegbetɔwo ŋua? (2 Kron. 19:2) Mawu na Yeremiya nya afɔku si le ŋuɖoɖo ɖe amegbetɔwo ŋu le esi teƒe be woaɖo ŋu ɖe Mawu ŋu me. (Xlẽ Yeremiya 17:5, 6.) Nu kae nye wò susu le nya sia ŋu?

 8. Ƒo nu tso kuxi siwo ate ŋu adze ŋgɔ Kristotɔwo le miaƒe nutoa me ŋu.

⁸ Kristotɔ aɖewo dina be yewoade ha kplikplikpli kple yewoƒe asisiwo ale be yewoƒe dɔwɔɖuia nakpɔ dzidzedze. Gake ɖe nu sia makplɔ Kristotɔ ade ha gbegblẽ dede kple afɔku aɖewo, abe nya madzetowo gbɔgblɔ alo aha tsu nono ene, me oa? Susu ma tae Kristotɔ aɖewo ƒoa asa na hadede si mesɔ o, ne esia ana be viɖe alo ŋutilãmenu aɖewo nato wo ŋu gɔ̃ hã. Ate ŋu adzɔ hã be míanɔ ale si míaƒe dɔtɔ alo dɔwɔhatiwo meɖia anukware o teƒe kpɔm. Gake míenyae be mele be Kristotɔwo naɖe mɔ ame siwo dome wole nakpɔ ŋusẽ gbegblẽ ɖe wo dzi o. Enye nyateƒe be nyametsotso nyuiwo wɔwɔ le nɔnɔme siawo tɔgbi me menɔa bɔbɔe ɣesiaɣi o. Eya ta enyo ŋutɔ be amewo, abe Yeremiya ene, gblẽ kpɔɖeŋu nyui ɖi na mí be míasrɔ̃. Ewɔ nyametsotso siwo na wòlé dzitsinya nyui me ɖe asi eye woa kple Mawu dome megblẽ o.

 9. Afɔku kae le amehawo yome nɔnɔ me?

⁹ Tiatia si Yeremiya wɔ kple ale si wòɖo tame kplikpaa be yemadze amehawo yome o la na etɔ Yudatɔwo ɖu fewu le eŋu. (Yer. 18:18) Ke hã, elɔ̃ faa be yeato vovo tso ye ŋɔlimetɔ siwo ‘dze nu si wɔm amewo le yome’ la gbɔ. (Yer. 8:5, 6) Yeremiya lɔ̃ faa be yeaɖe ye ɖokui ɖa le amewo dome ne ‘ye ɖeka yeanɔ aga’ ɣeaɖewoɣi gɔ̃ hã. Esia dze eŋu wu hadede kple ame siwo akpɔ ŋusẽ gbegblẽ ɖe edzi. (Xlẽ Yeremiya 9:4, 5; 15:17.) Ke wò ya ɖe? Abe ale si wònɔ le Yeremiya ŋɔli ene la, ame siwo mewɔa nuteƒe na Mawu o yomee ame geɖe nɔna egbea. Yeremiya ƒe kpɔɖeŋua ɖee fia be tso gbe aɖe gbe ke la, Yehowa subɔlawo ɖɔa ŋu ɖo le ame siwo woadze xɔlɔ̃e ŋu. Gake esia mefia be xɔlɔ̃ aɖeke menɔ Yeremiya si o. Ame aɖewo ʋli eta hena kpekpeɖeŋui. Ame kawoe? Wo nyanya aɖe vi geɖe na wò.

10, 11. (a) Dzidzenu kawo dzie Yeremiya nɔ te ɖo tia exɔlɔ̃wo? (b) Ame kawoe nye Yeremiya xɔlɔ̃wo, eye biabia kawo mee míadzro ku ɖe wo ŋu?

¹⁰ Ame kawo ƒomevie Yeremiya dze xɔlɔ̃e? Enuenu la, Yehowa na wòbu fɔ ame vɔ̃ɖiwo, alakpanuwɔlawo, ame madzɔmadzɔwo, ŋutasẽlawo, ŋɔdzomenuwɔlawo, kple agbe gbegblẽ nɔlawo—si nye ame siwo wɔ gbɔgbɔmehasi esi wogblẽ tadedeagu vavãtɔ ɖi hedze legbawo yome. Exlɔ̃ nu etɔ Yudatɔwo be: “Mia dome ame sia ame netrɔ tso eƒe mɔ vɔ̃wo dzi, eye miɖɔ miaƒe zɔzɔme kple miaƒe nuwɔnawo ɖo.” (Yer. 18:11) Le Yerusalem ƒe tsɔtsrɔ̃ vɔ megbe gɔ̃ hã la, Yeremiya kafu Mawu ɖe eƒe “amenuveve,” “eƒe nublanuikpɔkpɔ,” kple eƒe ‘nuteƒewɔwɔ’ ta. (Kony. 3:22-24) Ɛ̃, ame siwo wɔa nuteƒe na Yehowa koe Yeremiya di be woanye ye xɔlɔ̃wo.—Xlẽ Yeremiya 17:7.

¹¹ Mesesẽ be míanya Yeremiya xɔlɔ̃wo, alo eƒe zɔhɛ kplikplikpliwo o. Wo dometɔ aɖewo, abe Ebed-Melex, Barux, Seraya, kple Safan viwo ene, nɔ eŋu kplikplikpli. Ðewohĩ àbia be: ‘Ame kawo ƒomevie ame siawo nye? Aleke wode ha kple Yeremiyae? Nu kae ɖee fia be wonye xɔlɔ̃ nyuiwo? Eye aleke wokpe ɖe Yeremiya ŋu wòlé nuteƒewɔwɔ me ɖe asi?’ Mina míadzro nya siawo me kpɔ, ne míakpɔe ɖa be nu kae míate ŋu asrɔ̃ tso eme hã.

12. (a) Go kawo mee Yeremiya kple Barux, siwo ƒe nɔnɔmetata dze le axa 58 lia, sɔ kple wo nɔewo le? (b) Ame kae nye Seraya, eye nu kae míenya tso eŋu?

¹² Edze ƒãa be Neriya vi Barux ye nye Yeremiya xɔlɔ̃ vevitɔ. Yeremiya ka ɖe edzi ale gbegbe be egblɔ Yehowa ƒe gbedeasiwo nɛ wòŋlɔ, eye emegbe edɔe wòxlẽ agbalẽa na amehawo kple Yuda-megãwo. (Yer. 36:4-8, 14, 15) Abe Yeremiya ene la, Barux hã xɔ Yehowa dzi se heka ɖe edzi be eƒe nyawo ava eme. Wo ame evea siaa woto xaxaɣiwo me le ƒe 18 siwo do ŋgɔ na Yuda tsɔtsrɔ̃ me. Wozã ɣeyiɣi geɖe tsɔ wɔ Mawu ƒe dɔ ɖekae. Woto nɔnɔme sesẽwo me, eye eva hiã be woaɣla wo ɖokui be woƒe futɔwo ƒe asi nagasu wo dzi o. Azɔ hã, Yehowa ŋutɔ de dzi ƒo na wo dometɔ ɖe sia ɖe tẽe. Agbalẽŋlɔlawo ƒe ƒome xɔŋkɔ aɖe si le Yuda mee Barux anya tso. Woyɔe le Ŋɔŋlɔawo me be “agbalẽŋlɔla,” eye nɔviaŋutsu Seraya nye fiasã me ame ŋkuta aɖe. Abe Barux ene la, Seraya hã va kpe ɖe Yeremiya ŋu wona amewo se Yehowa ƒe nyagblɔɖinyawo. (Yer. 36:32; 51:59-64) Ðikeke mele eme o be ale si Neriya vi eve siawo lɔ̃ faa wɔ dɔ kple Yeremiya le ɣeyiɣi sesẽ mawo me la do ŋusẽ nyagblɔɖilaa hede dzi ƒo nɛ ŋutɔ. Nenema kee nuteƒewɔla siwo mia kpli wo miawɔ dɔ ɖekae le Yehowa subɔsubɔ me ate ŋu ado ŋusẽ wò hã ahade dzi ƒo na wòe.

13. Abe ale si wòdze le nɔnɔmetata si le axa 63 me ene la, aleke Ebed-Melex ɖee fia be xɔlɔ̃ nyui aɖee yenye na Yeremiya?

¹³ Yeremiya xɔlɔ̃ vevi bubue nye Ebed-Melex. Esi amegãwo do dziku ɖe Yeremiya ŋu helée de vudo si me ba le me be wòaku la, amedzrovi sia si tso Etiopia ye wɔ nu dzinɔameƒotɔe va xɔ nɛ. Fia ƒe aƒedzikpɔlawo dometɔ ɖekae wònye. Ebed-Melex te ɖe fia Zedekiya ŋu esime wòbɔbɔ nɔ Benyamin-gboa nu, le dutoƒo. Etsɔ dzinɔameƒo bia Zedekiya be wòaɖe mɔ na ye yeayi aɖaɖe Yeremiya le vudoa me. Ebed-Melex ɖe ame 30 kpe ɖe eɖokui ŋu hena dɔ sia wɔwɔ kple susu be ne eva dzɔ be Yeremiya ƒe futɔwo ho ɖe yewo ŋu la, yewoate ŋu anɔ te ɖe wo nu. (Yer. 38:7-13) Míenya ale si tututu Ebed-Melex kple Yeremiya dome nɔ kplikplikplii ya o. Gake esi wònye wo ame evea siaa wolɔ̃ Yehowa ta la, esɔ be míaƒo nya ta be tsi metoa wo dome o. Ebed-Melex nya be Yehowa ƒe nyagblɔɖilae Yeremiya nye. Egblɔ be nu si amegãwo wɔ la nye “nu manyomanyo,” eye wòdi vevie be yeawɔ nu si le eteƒe, ne esia ana woaxɔ dɔ le esi gɔ̃ hã. Ame nyui aɖe ŋutɔe Ebed-Melex nye vavã. Yehowa ŋutɔ do ŋugbe nɛ be: “Maɖe wò [le gbe si gbe afɔku ava Yerusalem dzi] . . . elabena èɖo dzi ɖe ŋunye.” (Xlẽ Yeremiya 39:15-18.) Nya nyui kae nye esi! Ðe menye ame siawo tɔgbie nàdi be yeadze xɔlɔ̃e oa?

14. Nu kae míenya tso Safan ƒomea kple woƒe hadede kple Yeremiya ŋu?

¹⁴ Safan viŋutsu etɔ̃ kple tɔgbuiayɔvi ɖeka hã nye Yeremiya xɔlɔ̃ bubuwo. Ame ŋkutawo ƒe ƒome mee wotso, elabena Safan nye Fia Yosiya ƒe agbalẽŋlɔla kpɔ. Zi gbãtɔ si Yeremiya ƒe futɔwo di be yewoawui la, “Axikam, Safan vi, [ye] kpe ɖe Yeremya ŋu, eye metsɔe de asi na dukɔ la [o].” (Yer. 26:24) Nɔviŋutsu aɖe nɔ Axikam si, si ŋkɔe nye Gemarya. Esi Barux xlẽ Mawu ƒe ʋɔnudrɔ̃gbedeasia le dutoƒo la, Gemarya viŋutsu Mixaya see eye wòyi ɖaka eta na fofoa kple amegã bubuwo. Esi wokpɔe be Yoyakim ate ŋu ado dziku ta la, woɖo aɖaŋu na Yeremiya kple Barux be woaɣla wo ɖokui. Esi fia la se agbalẽa me nyawo eye wòdo dziku la, Gemarya hã nɔ ame siwo ɖe kuku nɛ be wòagatɔ dzo agbalẽa o la dome. (Yer. 36:9-25) Emegbe Yeremiya dɔ Safan vi bubu, si ŋkɔe nye Eleasa, wòtsɔ lɛta si me nyagblɔɖinyawo le la yi na Yudatɔ siwo le aboyo me le Babilon. (Yer. 29:1-3) Eya ta le Safan ƒe ƒomea ɖeɖe dzaa me la, ame ene sɔŋ ye nye ema na kpekpeɖeŋu Mawu ƒe nyagblɔɖila la. Kpɔ ale si gbegbe Yeremiya akpɔ ŋudzedze ɖe ŋutsu mawo ŋui ɖa! Menye nuɖuɖu, aha, alo fefe aɖee doa dzidzɔ na wo katã tae wozu xɔlɔ̃ veviwo o. Woƒe xɔlɔ̃dzedzea nɔ te ɖe nu bubu aɖe si de ŋgɔ wu ema dzi.

15. Kpɔɖeŋu nyui kae Yeremiya ɖo ɖi le ame siwo wòadze xɔlɔ̃e tiatia me?

¹⁵ Togbɔ be Yeremiya nɔ ame nyuiwo kple ame baɖawo siaa dome hã la, àte ŋu asrɔ̃ nu vevi aɖe tso ame siwo wòtia be woanye ye xɔlɔ̃wo la me. Fia la, amegã geɖewo, aʋatsonyagblɔɖilawo, kple aʋafiawo siaa ƒo nya ɖe enu be wòatɔ tsi eƒe gbedeasia. Gake Yeremiya mena ta o. Ale si wòtɔ afɔ to sesĩe la na ame mawo lé fui, gake esia meɖe fu na Yeremiya o, elabena medi be ame mawo ƒomevi nanye ye xɔlɔ̃wo o. Yehowae nye exɔlɔ̃ vevitɔ kekeake. Yeremiya lɔ̃ faa be yeakpe fu tsɔ wu be yeagbe nuteƒewɔwɔ na Mawu. (Xlẽ Konyifahawo 3:52-59.) Eye abe ale si míekpɔe ene la, ame aɖewo hã na kpekpeɖeŋui ale be wòyi edzi subɔ Yehowa nuteƒewɔwɔtɔe.

16, 17. (a) Kpekpeɖeŋu kae Yehowa subɔla ate ŋu akpɔ tso xɔlɔ̃ vavã gbɔ? (b) Dukɔ ka mee nèɖale o, afi kae nàte ŋu akpɔ xɔlɔ̃ nyuiwo le adze?

¹⁶ Nu si na Ebed-Melex nye xɔlɔ̃ nyui ye nye eƒe xɔse kple ŋuɖoɖo ɖe Yehowa ŋu. Dzi nɔ ŋutsu sia ƒo wòɖe afɔ si hiã tsɔ xɔ Yeremiya ɖe agbe. Barux hã lɔ̃ faa zã ɣeyiɣi geɖe tsɔ na kpekpeɖeŋu Yeremiya le Yehowa ƒe gbedeasia gbɔgblɔ me. Míate ŋu akpɔ xɔlɔ̃ nyui siawo tɔgbi le Kristo hamea me egbea hã. Nɔvinyɔnu Cameron, si xɔ ƒe 20 eye wònye gbesiagbe mɔɖela la kpɔ ŋudzedze ɖe ŋusẽ nyui si nɔvinyɔnu mɔɖela bubu, si ŋkɔe nye Kara, kpɔ ɖe edzi la ŋu ŋutɔ. Cameron gblɔ be: “Kara to eƒe nuƒoƒo kple nuwɔnawo dzi de dzi ƒo nam be mana Yehowa naxɔ nɔƒe gbãtɔ le nye agbe me.” Togbɔ be nɔvinyɔnu siawo le adzɔge tso wo nɔewo gbɔ hã la, Kara ƒoa ka na Cameron alo ŋlɔa lɛta nɛ edziedzi be yeabia eƒe agbe ta eye yewoade dzi ƒo na yewo nɔewo. Cameron gblɔ tso eŋu be: “Enya nɔnɔme siwo katã me tom míaƒe ƒomea le. Enya be nɔvinyenyɔnu dze aglã hegbe nyateƒea, eye be esia tena ɖe dzinye ŋutɔ. Megblẽm ɖi le nɔnɔme siawo me o, eye ne menye eƒe ŋusẽdoame ye o la, nyemenya afi si manɔ fifia o. Ale si gbegbe wòkpe ɖe ŋunyee la wu gbɔgblɔ nam.”

¹⁷ Àte ŋu akpɔ xɔlɔ̃ nyuiwo adze le Kristo hamea me, le hawòtiwo kple ame siwo menye hawòtiwo o siaa dome. Xɔse, mɔkpɔkpɔ, kple lɔlɔ̃ si le asiwò na Yehowa kee le nɔviwòŋutsu kple nɔviwònyɔnuwo si, eye dzidzenu si nu nènɔa agbe ɖo nue woawo hã wonɔa agbe ɖo. Azɔ hã, woawo hã wotoa kuxi siwo me nètona la dometɔ aɖewo me. Àte ŋu awɔ dɔ kpli wo aduadu le Kristotɔwo ƒe subɔsubɔdɔa me. Woate ŋu ade dzi ƒo na wò le nɔnɔme sesẽwo me, eye wò hã àte ŋu ade dzi ƒo na wo. Woakpɔ dzidzɔ kpli wo ne èle dzidzɔ kpɔm le Yehowa subɔsubɔ me. Gawu la, mia kpli wo dome xɔlɔ̃dzedzea ate ŋu anɔ anyi yi ɖe mavɔmavɔ me.—Lod. 17:17; 18:24; 27:9.

18. Nu kae wòle be míasrɔ̃ tso Yeremiya gbɔ ku ɖe ame siwo míadze xɔlɔ̃e ŋu?

¹⁸ Nu si míate ŋu asrɔ̃ tso Yeremiya gbɔ le xɔlɔ̃dzedze ƒe nyawo me la dze ƒãa. Nyateƒenya sia nenɔ susu me na wò be: Ne èdze xɔlɔ̃ ame siwo ƒe dzixɔse mewɔ ɖeka kple Biblia ƒe nufiafiawo o la, woakpɔ ŋusẽ gbegblẽ ɖe wò xɔse dzi. Gɔmeɖose sia nue Yeremiya nɔ agbe ɖo, eye ele be míawo hã míabu esia nya vevii egbea. Yeremiya lɔ̃ faa be yeato vovo le ye ŋɔlimetɔwo dome ale be yeate ŋu awɔ dɔ si Yehowa de ye si la nuteƒewɔwɔtɔe ahaxɔ eƒe yayrawo. Ðe menye nenemae wòle be míawo hã míawɔe egbea oa? Le Yeremiya gome la, ame siwo ɖe xɔse fia eye wokpe ɖe eŋu le eƒe dɔa wɔwɔ me koe wòdze xɔlɔ̃e. Nyateƒee, Kristotɔ wɔnuteƒe siwo katã li egbea ate ŋu asrɔ̃ Yeremiya ƒe kpɔɖeŋu nyui sia ahatia woƒe zɔhɛwo le nunya me!—Lod. 13:20; 22:17.