Enɔ Ŋudzɔ, Eye Wòlala

1, 2. Dɔ sesẽ kae dze ŋgɔ Eliya, eye aleke woa kple Axab woto vovoe?

ELIYA di vevie be yeaɖe ye ɖokui ɖe aga ahado gbe ɖa na ye Fofo si le dziƒo. Gake ɖeko ameha siwo ƒo xlãe la kpɔ eteƒe nyagblɔɖila vavã sia na dzo ge tso dziƒoe nye ema, eye ɖikeke mele eme o be wo dometɔ geɖewo di be yewoate ɖe eŋu akafui eye eya hã nalɔ̃ yewo ƒe nya. Hafi Eliya nalia Karmel To kɔkɔa aɖado gbe ɖa na Yehowa Mawu la, dɔ sesẽ aɖe dze ŋgɔe. Ele nɛ be wòaɖaƒo nu kple Fia Axab.

² Ame eve siawo to vovo ale gbegbe. Axab, si tsɔ fiawu dzeani aɖe ɖo atsyɔ̃ na eɖokui kpeɖii la, nye ŋuklẽla kple xɔsegbela si mekana ɖe nu si wòawɔ dzi o. Eliya do nyagblɔɖilawo ƒe awu, si nye awu tsɛ si womeɖo atsyɔ̃ na o, eye anɔ eme be enye lãgbalẽwu, alo awu si wotsɔ kposɔfu alo gbɔ̃fu lɔ̃. Enye dzinɔameƒotɔ, fɔmaɖila kple ame si si xɔse sẽŋu le. Nu si dzɔ le ŋkeke ma, si yina enu wu ge, dzi la ɖe ame si ƒomevi wo dometɔ ɖe sia ɖe nye la fia kɔtɛ.

3, 4. (a) Nu ka tae wònye ŋkeke vɔ̃ na Axab kple Baal subɔla bubuawo? (b) Biabia kawo mee míadzro?

³ Ŋkeke vɔ̃e wònye na Axab kple Baal subɔla bubuawo. Woʋu go subɔsubɔ si Fia Axab kple Fiasrɔ̃ Izebel do ɖe ŋgɔ le Israel to ewo fiaɖuƒea me la be enye alakpasubɔsubɔ. Woɖee fia be Baal nye alakpamawu. Esi Baal ƒe nyagblɔɖilawo nɔ koko ƒom nɛ, nɔ kpo tim henɔ wo ɖokuiwo sim ŋkubiãtɔe be wòado dzo teti hã la, mawu ma si me agbe mele o la mete ŋui o. Baal mete ŋu kpɔ nyagblɔɖila 450 mawo ta tso ku si wodze na la me o. Gake alakpamawu ma gado kpo nu le nu bubu aɖe hã me, eye eteƒe madidi o woaklo nu le esia hã dzi keŋkeŋ. Ƒe etɔ̃ kple edzivɔe nye ema Baal ƒe nyagblɔɖilawo le koko ƒom na woƒe mawua be wòana kuɖiɖi si va woƒe anyigbaa dzi la nu natso, gake Baal mete ŋui o. Eteƒe madidi o, Yehowa ŋutɔ atsi kuɖiɖia nu atsɔ aɖee afia be yee nye Mawu vavã la.—1 Fia. 16:30–17:1; 18:1-40.

⁴ Gake ɣekaɣie Yehowa awɔ esia? Hafi ɣemaɣi naɖo la, aleke Eliya awɔ nui? Eye nu kae míate ŋu asrɔ̃ tso ŋutsu xɔsetɔ sia gbɔ? Na míakpɔe ɖa esime míele eƒe nuŋlɔɖia me dzrom.—Xlẽ 1 Fiawo 18:41-46.

 5. Nu kae Eliya gblɔ na Axab be wòawɔ, eye ɖe nane ɖee fia be Axab srɔ̃ nane tso nu siwo dzɔ le ŋkekea me la mea?

⁵ Eliya te ɖe Axab ŋu hegblɔ nɛ be: “Yi nàɖu nu, eye nàno nu, elabena mese tsidzadza ƒe nuwɔwɔ.” Ðe fia vɔ̃ɖi sia srɔ̃ nane tso nu siwo dzɔ le ŋkekea me la mea? Nuŋlɔɖia megblɔ nya aɖeke tso esia ŋu o, gake fia la megblɔ nya aɖeke si fia be etrɔ dzi me o, eye mebia tso nyagblɔɖilaa si hã be wòakpe ɖe ye ŋu yeate ɖe Yehowa ŋu ahabia tsɔtsɔke o. Ðeko Axab ‘yi, be yeaɖu nu, eye yeano nu.’ (1 Fia. 18:41, 42) Nu kae Eliya ya wɔ?

6, 7. Nu kae Eliya do gbe ɖa bia, eye nu ka tae?

⁶ ‘Ke Eliya yi Karmel To la tame, eye wòdze klo ɖe anyigba hetsɔ mo de ata me.’ Esime Axab yi eƒe ƒodo gbɔ kpɔ ge la, Eliya ya zã mɔnukpɔkpɔ ma yi gbe do ge ɖa na Fofoa si le dziƒo. De dzesi ɖokuibɔbɔ ƒe nɔnɔme si me Eliya nɔ—edze klo ɖe anyigba hebɔbɔ ta ale gbegbe be eƒe mo de eƒe klowo tɔ ge kloe. Nu ka wɔm Eliya nɔ? Mehiã be míasusu naneke agblɔ o. Biblia gblɔ na mí le Yakobo 5:18 be Eliya do gbe ɖa be kuɖiɖia nu natso. Anɔ eme be esia ŋutie wònɔ gbe dom ɖa le le Karmel To la dzi.

⁷ Yehowa gblɔ do ŋgɔ be: “Mana tsi nadza ɖe anyigba dzi.” (1 Fia. 18:1) Eya ta Eliya do gbe ɖa be Yehowa ƒe lɔlɔ̃nu si wòɖe gblɔ la nava eme, abe ale si ko Yesu hã va fia eyomedzelawo ƒe akpe ɖeka aɖewo megbe be woawɔe ene.—Mat. 6:9, 10.

 8. Nu kae Eliya ƒe kpɔɖeŋua fia mí ku ɖe gbedodoɖa ŋu?

⁸ Eliya ƒe kpɔɖeŋua fia nu geɖe mí tso gbedodoɖa ŋu. Nu si nɔ vevie na Eliya wue nye be Mawu ƒe lɔlɔ̃nu nava eme. Ne míele gbe dom ɖa la, anyo be míaɖo ŋku edzi be: “Nu sia nu si míabia wòawɔ ɖeka kple [Mawu ƒe] lɔlɔ̃nu la, aɖo to mí.” (1 Yoh. 5:14) Eya ta eme kɔ ƒãa be ehiã be míanya nu si nye Mawu ƒe lɔlɔ̃nu hafi ate ŋu ado gbe ɖa wòadze eŋu—esia nye susu vevi aɖe si tae wòle be míanɔ Biblia srɔ̃m gbe sia gbe ɖo. Ðikeke mele eme o be Eliya di vevie be kuɖiɖia nu natso, elabena eƒe dukɔa me tɔwo le fu kpem ŋutɔ. Anɔ eme be eƒe dzi yɔ fũu kple akpedada le nukunu si teƒe wòkpɔ Yehowa wɔ gbe ma gbe la ta. Nenema kee wòle be míaƒe gbedodoɖawo naɖe akpedada ƒe nɔnɔme kple dzitsitsi ɖe ame bubuwo ƒe nyonyo ŋu afia.—Xlẽ 2 Korintotɔwo 1:11; Filipitɔwo 4:6.

 9. Nu kae Eliya bia tso eƒe subɔvia si be wòawɔ, eye Eliya ƒe nɔnɔme nyui eve kawo mee míadzro?

⁹ Eliya ka ɖe edzi be Yehowa atsi kuɖiɖia nu, gake menya ɣeyiɣi si wòle ewɔ ge o. Ke nu kae nyagblɔɖilaa nɔ wɔwɔm le ɣeyiɣi si me wònɔ lalam? De dzesi nya si nuŋlɔɖia gblɔ: “[Egblɔ] na eƒe ɖekakpui bena: ‘Lia to la, eye nàkpɔ ƒu gome ɖa!’ Eye wòyi ɖakpɔe ɖa hegblɔ bena: ‘Naneke meli o.’ Eɖo ŋu bena: ‘Yi zi gbɔ zi adre.’” (1 Fia. 18:43) Nufiame eve ya teti le kpɔɖeŋu si Eliya ɖo ɖi la me na mí. Gbã la, de dzesi kakaɖedzi si nɔ nyagblɔɖilaa si. Eyome nàde dzesi ale si wònɔ ŋudzɔe hã.

10, 11. (a) Mɔ ka nue Eliya ɖee fia le be yeka ɖe Yehowa ƒe ŋugbedodoa dzi? (b) Nu ka tae kakaɖedzi ma tɔgbi ate ŋu anɔ míawo hã si?

¹⁰ Esi Eliya ka ɖe edzi be Yehowa awɔ eƒe ŋugbedodoa dzi ta la, edi vevie be yeakpɔ dzesi aɖe si afia be Yehowa le eƒe nyaa dzi wɔ ge. Eya ta edɔ eƒe subɔvia ɖo ɖe toa ƒe teƒe kɔkɔ aɖe be wòaɖakpɔ ƒu gome ɖa be tsi ɖo hã. Eƒe subɔvia trɔ gbɔ kple dziɖeleameƒonya sia be: “Naneke meli o.” Yame kɔ, eye edze ƒãa be alilikpo dodo aɖeke mele dziŋgɔlia o. Ède dzesi nane si wɔ nuku le nya sia ŋua? Ðo ŋku edzi be ɖeko Eliya gblɔ na Fia Axab be, “Mese tsidzadza ƒe nuwɔwɔ,” teti koe nye ema. Aleke wɔ nyagblɔɖilaa gblɔ nya ma, evɔ alilikpo dodo aɖeke menɔ dziŋgɔlia o?

¹¹ Ŋugbe si Yehowa do la nɔ nyanya na Eliya. Esi wònye Yehowa ƒe nyagblɔɖila kple eteƒenɔla ta la, eka ɖe edzi be yeƒe Mawu la awɔ eƒe ŋugbedodoa dzi. Kakaɖedzi nɔ Eliya si ale gbegbe be ɖeko wòwɔ nɛ abe ɖe wònɔ tsidzadza ƒe nuwɔwɔ sem xoxo ene. Esia ɖo ŋku nya si Biblia gblɔ tso Mose ŋu dzi na mí, be: “Eyi edzi nɔ te sesĩe, abe ɖe wònɔ Ame si womekpɔna o la kpɔm ene.” Ðe wò hã èbua Mawu ame ŋutɔŋutɔe nenema? Mawu na kpeɖodzi geɖe siwo akpe ɖe mía ŋu míaka ɖe eyama kple eƒe ŋugbedodowo dzi la mí.—Heb. 11:1, 27.

12. Aleke Eliya ɖee fia be yele ŋudzɔ, eye aleke wòwɔ nui esi eƒe subɔvia gblɔ nɛ be yekpɔ alilikpo sue aɖe?

¹² Azɔ hã, de dzesi ale si gbegbe Eliya nɔ ŋudzɔe. Edɔ eƒe subɔvia ɖa, menye zi ɖeka alo zi eve o, ke boŋ zi adre sɔŋ! Míate ŋu akpɔ ale si yiyi kple gbɔgbɔ ma ate ɖeɖi subɔvia ŋui la ɖaa le susu me, gake Eliya ya kpɔtɔ nɔ mɔ kpɔm na dzesi aɖe kokoko, eye mena ta o. Mlɔeba esi subɔvia yi zi adrelia la, eva ka nya ta be: “Kpɔ ɖa, alilikpovi aɖe le abe ame ƒe asi ene, tso ƒu gome gbɔna.” Ðe nàte ŋu akpɔ ale si subɔvia ado eƒe abɔ ɖa atsɔ eƒe asiƒome anɔ sɔsɔm kple alilikpo sue si gbɔna tso Ƒu Gã la gome la le susu mea? Ðewohĩ subɔvia mebu alilikpo si wòkpɔ la ɖe ɖeke me o. Gake Eliya ya mebui nu tsɛe kura o. Eya ta edɔ dɔ kpata aɖe eƒe subɔvia be: “Yi ɖagblɔ na Axab bena: ‘Tsi lãwo ɖe tasiaɖam ŋu, eye nàdzo, ne tsi megasika wò ɖi o.’”—1 Fia. 18:44.

13, 14. (a) Aleke míate ŋu asrɔ̃ Eliya ƒe ŋudzɔnɔnɔae? (b) Susu kawo tae wòle be míawɔ nu kpata?

¹³ Le esia hã me la, Eliya gaɖo kpɔɖeŋu nyui aɖe ɖi na mí. Míawo hã míele agbe le ɣeyiɣi si me eteƒe madidi o Mawu aɖe afɔ be yeƒe tameɖoɖo si yeɖe gblɔ la nava eme. Eliya kpɔ mɔ na kuɖiɖi ƒe nuwuwu; Mawu subɔla siwo li egbea hã le mɔ kpɔm na xexemenuɖoanyi sia ƒe nuwuwu. (1 Yoh. 2:17) Ele be míayi edzi anɔ ŋudzɔ va se ɖe esime Yehowa Mawu ɖe afɔ, abe ale si Eliya wɔe ene. Mawu ŋutɔ ƒe Vi, Yesu, xlɔ̃ nu eyomedzelawo be: “Eya ta minɔ ŋudzɔ, elabena mienya ŋkeke si dzi miaƒe Aƒetɔ la ava o.” (Mat. 24:42) Ðe Yesu ƒe nya sia fia be eyomedzelawo manya naneke kura tso ɣeyiɣi si me nuwuwua ava la ŋu oa? Ao, elabena egblɔ nya geɖe tso ale si xexea me anɔ ne nuwuwua le aƒe tum la ŋu. Mí katã míele “nuɖoanyi sia ƒe nuwuɣi la” ƒe dzesi si ŋu wòƒo nu tsoe tsitotsito la teƒe kpɔm.—Xlẽ Mateo 24:3-7.

¹⁴ Dzesi ma ƒe akpa ɖe sia ɖe na kpeɖodzi sẽŋu si ŋu kakaɖedzi le. Ðe kakaɖedzi le kpeɖodzi mawo ŋu ale gbegbe be woaʋã mí míawɔ nu kpata le subɔsubɔdɔwɔwɔ na Yehowa mea? Alilikpo sue si dze le ƒu gome koe na Eliya ka ɖe edzi be ɣeyiɣia de na Yehowa be wòaɖe afɔ. Ðe nyagblɔɖila wɔnuteƒe la ƒe mɔkpɔkpɔa zu dzodzroa?

15, 16. Nu kawoe dzɔ kpatakpata kplɔ wo nɔewo ɖo, eye nu ka ŋue Eliya anya bu tso Axab ŋu?

¹⁵ Nuŋlɔɖia gblɔ na mí be: “Eye wòva me bena, alilikpo xe dziƒo enumake tsiɖitsiɖi, ya le ƒoƒom, eye tsi gã aɖe dza. Tete Axab ɖo tasiaɖam heyi Yezreel.” (1 Fia. 18:45) Ðeko nuwo dzɔ kplɔ wo nɔewo ɖo kpatakpata. Esime Eliya ƒe subɔvia nɔ nyagblɔɖilaa ƒe gbedeasia gblɔm na Axab la, alilikpo sue ma keke ɖe enu hexɔ dziŋgɔlia katã, si na yame xe litii. Ya sesẽ aɖe ƒo, eye tsi gã aɖe dza ɖe Israel nyigba la dzi mlɔeba, si wɔe be ƒe etɔ̃ kple afã ƒe kuɖiɖia nu tso. Anyigba si ƒu kplakplakpla la no tsia ƒiaƒiaƒia. Esi tsia va nɔ dzadzam sesĩe la, Kison tɔʋu la yɔ gbagba, eye ɖikeke mele eme o be eklɔ Baal ƒe nyagblɔɖila siwo wowu la ƒe ʋu ɖa. Esia nye mɔnukpɔkpɔ na Israel vi siwo tra mɔ la hã be woakɔ wo ɖokuiwo ŋu tso Baal subɔsubɔ ƒe ɖiƒoƒo si me woƒo wo ɖokuiwo ɖo la me le anyigba la dzi.

¹⁶ Kakaɖedzitɔe la, Eliya kpɔ mɔ be woawɔe nenema! Ðewohĩ ebu ale si ŋkekea me nudzɔdzɔ wɔnukuawo awɔ dɔ ɖe Axab dzii ŋu. Ðe Axab atrɔ dzi me ahakɔ eɖokui ŋu tso Baal subɔsubɔ ƒe ɖiƒoƒoa mea? Nu siwo dzɔ le ŋkekea me la ɖe susu vevi siwo tae wòle be wòawɔ tɔtrɔ mawo ɖo la fia. Míate ŋu anya tame si bum Axab nɔ le gaƒoƒo ma me ya o. Ðeko nuŋlɔɖia gblɔ na mí be fia la ‘ɖo tasiaɖam heyina Yezreel.’ Ðe wòsrɔ̃ nane tso nu siwo dzɔ mea? Ðe wòɖoe be yeawɔ tɔtrɔa? Nu siwo va dzɔ kplɔe ɖo la ɖee fia be menɔ nenema o. Gake ŋkekea mewu enu na Axab kple Eliya siaa haɖe o.

17, 18. (a) Nu kae dzɔ esi Eliya dze mɔ yina Yezreel? (b) Nu kae wɔ nuku le du si Eliya ƒu tso Karmel yi Yezreel la ŋu? (Kpɔ etenuŋɔŋlɔa hã.)

¹⁷ Yehowa ƒe nyagblɔɖilaa hã dze mɔ si tututu Axab to la dzi. Mɔ legbee aɖe si wòazɔ to tsidzadza kple viviti me la dze ŋgɔe azɔ. Gake nu wɔnuku aɖe dzɔ.

¹⁸ “Yehowa ƒe asi va Eliya dzi, eye wòbla ali dzi heƒu du dze Axab ŋgɔ va se ɖe Yezreel.” (1 Fia. 18:46) “Yehowa ƒe asi” nɔ Eliya dzi le nukumɔ aɖe nu vavã. Yezreel gbɔ didi abe kilometa 30 ene, eye menye sɔhɛ hãe Eliya nye o.a Wò ŋutɔ kpɔe ɖa le susu me be nyagblɔɖilaa lé eƒe awu ʋlayaa ƒe agɔmegbɔ hetsɔ sa ɖe ali ale be yeate ŋu avo aƒu du nyuie, eye wòde afɔ du me to mɔ ma si dzi ba le la dzi—enɔ du ƒum sesĩe ale gbegbe be wòva tu fia ƒe tasiaɖam la, to eŋu hegblẽe ɖe megbe ʋĩi!

19. (a) Ŋusẽ kple ŋutete si Mawu na Eliya la ɖoa ŋku nyagblɔɖi kawo dzi na mí? (b) Kakaɖedzi kae nɔ Eliya si esime wònɔ dua ƒum ɖo ta Yezreel?

¹⁹ Yayra ka gbegbee nye esi wònye na Eliya! Nudzɔdzɔ dodzidzɔname aɖe ŋutɔe wònye nɛ be wòase le eɖokui me be ŋusẽ, dzo yeye kple ŋutete tɔxɛ ɖo ye me, ɖewohĩ wu ale si wònɔ nɛ le eƒe sɔhɛme gɔ̃ hã. Esia ɖo ŋku kakaɖedzinya siwo le nyagblɔɖiwo me ku ɖe lãmesẽ deblibo kple dzo yeye si agaɖo nuteƒewɔlawo me le anyigba dzi Paradisoa me la dzi na mí. (Xlẽ Yesaya 35:6; Luka 23:43) Esi Eliya nɔ dua ƒum to mɔ ma si dzi ba le dzi la, eka ɖe edzi be ye Fofo Yehowa, Mawu vavã ɖeka la, kpɔ ŋudzedze ɖe ye ŋu!

20. Nu kae míate ŋu awɔ be Yehowa nayra mí?

²⁰ Yehowa dina vevie be yeayra mí. Viɖe gãe eƒe yayrawo nye na mí, eya ta mina míaʋli vevie be eƒe yayrawo nasu mía si. Abe Eliya ene la, ele be míanɔ ŋudzɔ ahanɔ ŋku lém ɖe kpeɖodzi sẽŋu siwo ɖenɛ fiana be eteƒe madidi o, Yehowa aɖe afɔ be eƒe lɔlɔ̃nu nava eme le míaƒe ɣeyiɣi vɔ̃ sia si me nuwɔwɔ kpata hiã le la me. Abe Eliya ene la, kpeɖodzi sẽŋuwo li siwo tae wòle be míaka ɖe Yehowa, “Mawu nuteƒetɔ” la dzi bliboe ɖo.—Ps. 31:6.