Ðoɖo Hena Yehowa Ƒe Lɔlɔ̃nu Wɔwɔ

LE XEXEA me godoo la, mawusubɔsubɔ, dunyahehe, asitsatsa, kple hadome habɔbɔ geɖewo li, eye ɖoɖo siwo nu wole kple woƒe taɖodzinuwo le vovovo. Gake habɔbɔ ɖeka aɖe ya to vovo kura na wo katã. Abe ale si Mawu ƒe Nya la ɖee fia kɔtɛ ene la, habɔbɔ ma ye nye Yehowa Ðasefowo.

² Dzidzɔtɔe la, wò hã èva zu Yehowa ƒe habɔbɔa me tɔ. Esi wò ŋutɔ nèva kpɔ nu si Mawu ƒe lɔlɔ̃nu nye dze sii nyuie ta la, èle eƒe lɔlɔ̃nu wɔm. (Ps. 143:10; Rom. 12:2) Ènye subɔla dovevienu si le subɔsubɔm kple nɔviwo ƒe habɔbɔ lɔ̃ame si le xexea me katã. (2 Kor. 6:4; 1 Pet. 2:17; 5:9) Abe ale si Mawu ƒe Nyaa do ŋugbee ene la, yayra geɖe kple dzidzɔ manyagblɔwo sua asiwò le subɔsubɔdɔ sia me. (Lod. 10:22; Marko 10:30) Esi nèle Yehowa ƒe lɔlɔ̃nu wɔm nuteƒewɔwɔtɔe fifia ta la, efia be èle hehe xɔm be etsɔme mavɔ wɔnuku aɖe nava su asiwò.—1 Tim. 6:18, 19; 1 Yoh. 2:17.

³ Habɔbɔ tɔxɛ aɖe le mía Wɔla Gã la si le xexea me katã, si zɔna ɖe teokrasiɖoɖowo nu. Esia fia be Yehowa ŋutɔe nye habɔbɔa ƒe Ta, eye eyae fiaa mɔe. Míeka ɖe eyama dzi bliboe. Eyae nye míaƒe Ʋɔnudrɔ̃la, míaƒe Senala kple míaƒe Fia. (Yes. 33:22) Esi wònye Mawu si wɔa nu ɖe ɖoɖo nu ta la, ewɔ ɖoɖo nyui siwo dzi míazɔ ɖo be míawo hã ‘míanye eƒe hadɔwɔlawo’ ahasubɔ le ɖekawɔwɔ me kple eƒe tameɖoɖo.—2 Kor. 6:1, 2.

⁴ Esi nuɖoanyi sia ƒe nuwuwu le aƒe tum kabakaba la, míele ŋgɔ yim le Kristo Yesu, Fia, si Mawu ɖo la ƒe kpɔkplɔ te. (Yes. 55:4; Nyaɖ. 6:2; 11:15) Yesu ŋutɔ gblɔe ɖi be dɔ siwo ye yomedzelawo awɔ la alolo wu dɔ si yewɔ le yeƒe anyigba dzi subɔsubɔdɔa wɔɣi. (Yoh. 14:12) Esia nye nyateƒe, elabena ɣeyiɣi si Yesu yomedzelawo atsɔ awɔ dɔae la adidi wu, woƒe xexlẽme anɔ dzidzim ɖe edzi, eye woawɔ dɔa le anyigbamama si lolo wu sãsãsã la me. Woaɖe gbeƒã Fiaɖuƒe ŋuti nya nyui la wòaɖo anyigba ƒe seƒe ke.—Mat. 24:14; 28:19, 20; Dɔw. 1:8.

⁵ Nya sia le eme vam xoxo. Gake abe ale si Yesu gblɔe eme kɔ ƒãa ene la, nya nyui gbeƒãɖeɖedɔa awu enu le Yehowa ƒe ɣeyiɣi ɖoɖi dzi. Kpeɖodzi siwo katã le Mawu ƒe Nyagblɔɖinyaa me la ɖee fia be Yehowa ƒe ŋkeke gã dziŋɔ la tu aƒe ŋutɔ.—Yoel 2:31; Zef. 1:14-18; 2:2, 3; 1 Pet. 4:7.

⁶ Esi míekpɔ nu si Yehowa ƒe lɔlɔ̃nu nye dze sii kɔtɛ le gaƒoƒo mamlɛ sia me ta la, ehiã be míado vevie nu geɖe wu le nu si Mawu di tso mía si la wɔwɔ me. Eya ta ehiã be míanya nu tso ale si Mawu ƒe habɔbɔa wɔa dɔe ŋu nyuie ale be míanɔ zɔ ɖem kplii le ɖekawɔwɔ blibo me. Ŋɔŋlɔawo me se, gɔmeɖose, ɖoɖo, mɔfiame kple nufiafia siwo le Mawu ƒe Nya, si tso gbɔgbɔ me la, me dzie wotu ɖoɖo siwo dzi habɔbɔa zɔna ɖo la ɖo.—Ps. 19:7-9.

⁷ Esi Yehowa ƒe amewo léa Biblia me mɔfiame siawo me ɖe asi hewɔa wo dzi ta la, wonɔa anyi le ŋutifafa me hewɔa dɔ le ɖekawɔwɔ me. (Ps. 133:1; Yes. 60:17; Rom. 14:19) Nu kae na ɖekawɔwɔ sẽŋu le mía nɔviwo dome le afi sia afi? Eyae nye lɔlɔ̃. Elabena míedo lɔlɔ̃, eye lɔlɔ̃e ʋãa mí le nu sia nu si míewɔna me. (Yoh. 13:34, 35; Kol. 3:14) Mɔ sia si dzea Mawu ŋu la dzie míeto le zɔzɔm aduadu kple Yehowa ƒe habɔbɔa ƒe akpa si le dziƒo.

⁸ Nyagblɔɖila Yesaya, Ezekiel kple Daniel kpɔ Yehowa ƒe habɔbɔa ƒe akpa si le dziƒo la le ŋutega vovovowo me. (Yes., ta 6; Eze., ta 1; Dan. 7:9, 10) Nenema kee apostolo Yohanes hã kpɔ ɖoɖo si nu nuwo le le dziƒo la le ŋutega me eye wòŋlɔe ɖe Nyaɖeɖefia ƒe agbalẽa me, si wɔe be míawo hã míekpɔ ale si nuwo le le dziƒo la le mɔ sue aɖe nu. Ekpɔ Yehowa wònɔ ŋutikɔkɔe fiazikpui aɖe dzi eye mawudɔlawo ƒo xlãe nɔ gbɔgblɔm be: “Kɔkɔe, kɔkɔe, kɔkɔe nye Yehowa Mawu, Ŋusẽkatãtɔ la, ame si nɔ anyi, eye wòli, eye wògbɔna.” (Nyaɖ. 4:8) Azɔ hã, Yohanes kpɔ ‘alẽvi aɖe wòle tsitre ɖe fiazikpui la titina’; eyae nye Yesu Kristo, Mawu ƒe Alẽvi la.—Nyaɖ. 5:6, 13, 14; Yoh. 1:29.

⁹ Esi wokpɔ Yehowa le ŋutega sia me wòbɔbɔ nɔ fiazikpui dzi la, eɖee fia be eyae nye habɔbɔ sia ƒe Ta. Biblia gblɔ tso eyama kple eƒe nɔƒe kɔkɔ la ŋu le 1 Kronika 29:11, 12 be: “Oo Yehowa, tɔwòe nye gãnyenye, ŋusẽ, atsyɔ̃, nyonyo kple bubu; elabena nu sia nu si le dziƒowo kple anyigba dzi la, tɔwòe. Oo Yehowa, tɔwòe nye fiaɖuƒe, wòe ɖo kpo ɖe nuwo katã dzi. Kesinɔnu kple ŋutikɔkɔe tso gbɔwò, eye nèɖu nuwo katã dzi, asiwò me ŋusẽ kple ŋutete le, eye gbɔwò wòtsona be ame nazu gã, eye wòe naa ŋusẽ amewo katã.”

¹⁰ Esi Yesu Kristo nye Yehowa ƒe hadɔwɔla ta la, ele nɔƒe kɔkɔ aɖe le dziƒo, eye wona ŋusẽ geɖe eyama. Le nyateƒe me la, Mawu ‘tsɔ nuwo katã de eƒe afɔ te, eye wòɖoe tatɔ ɖe nuwo katã dzi na hame la.’ (Ef. 1:22) Apostolo Paulo gblɔ le Yesu ŋu be: “Mawu doe ɖe dzi wòle ɖoƒe si kɔ wu, eye wòlɔ̃ faa tsɔ ŋkɔ si ƒo ŋkɔ bubuwo katã ta la nɛ, ale be ame siwo le dziƒo kple ame siwo le anyigba dzi kpakple ame siwo le anyigba te la, nadze klo le Yesu ƒe ŋkɔ me, eye aɖe sia aɖe naʋu eme be Yesu Kristoe nye Aƒetɔ la, hena Mawu Fofo la ƒe kafukafu.” (Flp. 2:9-11) Eya ta míate ŋu aka ɖe edzi bliboe be Yesu Kristo akplɔ mí le dzɔdzɔenyenye me.

¹¹ Nyagblɔɖila Daniel kpɔ Ame Si Li Tso Gbe Aɖe Gbe Ʋĩi Ke la le Eƒe fiazikpui dzi eye mawudɔla “akpe teƒe akpewo le esubɔm, eye . . . akpe ewo teƒe akpe ewo le tsitre ɖe eŋkume.” (Dan. 7:10) Biblia gblɔ le mawudɔlawo ƒe dziƒoʋakɔ siawo ŋu be “gbɔgbɔwoe wo katã wonye hena subɔsubɔdɔ kɔkɔe wɔwɔ, eye wodɔa wo ɖa be woasubɔ ame siwo anyi ɖeɖekpɔkpɔ dome la.” (Heb. 1:14) Woda gbɔgbɔmenuwɔwɔ siawo katã ɖe ‘fianyenye, aƒetɔnyenye, dziɖulanyenye, kple ŋusẽtɔnyenye’ ƒe ɖoƒe vovovowo.—Kol. 1:16.

¹² Ne míegbɔ dzi ɖi de ŋugble le Yehowa ƒe habɔbɔa ƒe akpa si le dziƒo la me tɔwo ƒe ɖoƒe vovovoawo ŋu la, ale si Yesaya wɔ nui esime ‘wòkpɔ Yehowa le ŋutega me wòbɔbɔ nɔ fiazikpui gã aɖe dzi le dzi boo’ eye ‘serafiwo le etame’ la me akɔ na mí. Yesaya gblɔ be: “Aléle! Meku, elabena nuyi makɔmakɔtɔe menye, eye dukɔ si ƒe nuyi mekɔ o domee mele; elabena nye ŋkuwo kpɔ Fia la, aʋakɔwo ƒe Yehowa ŋutɔ!” Le nyateƒe me la, esi Yesaya kpɔ ale si gbegbe Yehowa ƒe habɔbɔa keke tae kple ale si wòle dɔ dzii la, dzidzi ƒoe wòkpɔ eɖokui tsɛe. Nukpɔkpɔ sia wɔ dɔ ɖe Yesaya dzi ale gbegbe be esi yɔyɔ aɖe tso dziƒo be woawɔ dɔ tɔxɛ si nye be woaɖe gbeƒã Yehowa ƒe ʋɔnudɔdrɔ̃wo la, egblɔ enumake be: “Nyee nye esi! Dɔm!”—Yes. 6:1-5, 8.

¹³ Yehowa ƒe habɔbɔa nyanya kple ŋudzedzekpɔkpɔ ɖe eŋu ʋãa Eƒe amewo nenema ke egbea. Esi habɔbɔa le ŋgɔ yim ta la, míedzea agbagba be míaɖe zɔ aduadu kplii. Míedzea agbagba be míaɖee afia be míeka ɖe Yehowa ƒe habɔbɔa dzi.

¹⁴ Le Ezekiel ƒe nyagblɔɖia ƒe ta 1 me la, ekpɔ Yehowa le ŋutega me wòle dziƒotasiaɖam gã nyadri aɖe dom. Tasiaɖam gã nyadri sia tsi tre ɖi na Yehowa ƒe habɔbɔa ƒe akpa si ŋku mekpɔna o. Edoa tasiaɖam sia le gɔmesesea nu be efiaa mɔe lɔlɔ̃tɔe eye wòzãnɛ le ɖekawɔwɔ me kple eƒe tameɖoɖo.—Ps. 103:20.

¹⁵ Le tasiaɖamfɔawo me la, afɔ bubu aɖe gale wo dometɔ ɖe sia ɖe me si keke abe afɔawo ŋutɔ ke ene hetso ga wo nɔewo me. Alea koe wòanɔ hafi woate ŋu agblɔ be tasiaɖamfɔawo ‘zɔna ɖe woƒe go eneawo me.’ (Eze. 1:17) Afɔawo tea ŋu trɔa woƒe mɔ kpata. Ke hã, menye ɖe tasiaɖam sia le zɔzɔm le eɖokui si nunyala aɖeke ƒe mɔfiafia manɔmee o. Yehowa meɖea mɔ eƒe habɔbɔa ɖoa ta afi sia afi si ko wòadi be yeayi o. Ezekiel 1:20 gblɔ be: “Woyia afi si gbɔgbɔ la di be woayi.” Eya ta Yehowa ŋutɔe toa eƒe gbɔgbɔa dzi fiaa mɔ eƒe habɔbɔa ɖoa ta afi sia afi si eya ŋutɔ di. Nya si wòle be míabia mía ɖokui ye nye be, ‘Ðe mezɔna kplii aduadua?’

¹⁶ Zɔzɔ aduadu kple Yehowa ƒe habɔbɔa bia nu geɖe wu kpekpeawo dede kple gomekpɔkpɔ le gbeadzisubɔsubɔdɔa me ko. Nu si wòbia koŋ be míazɔ kplii aduadue nye ŋgɔyiyiwɔwɔ kple tsitsi le gbɔgbɔ me. Esia bia be ‘míakpɔ nu siwo le vevie wu la adze sii’ eye míanɔ gbɔgbɔmenuɖuɖu yeyewo ɖum ahanɔ tɔtrɔm ɖe gbɔgbɔmenumekɔkɔ yeyewo ŋu. (Fil. 1:10; 4:8, 9; Yoh. 17:3) Ele be míaɖo ŋku edzi hã be hafi nuwo nazɔ nyuie le habɔbɔ aɖe me la, ehiã be woawɔ nu aduadu le ɖoɖo nyui nu. Esia fia be ele vevie be míawɔ gbɔgbɔ kple ŋutilã me nu nyui siwo Yehowa tsɔ de mía si hena eƒe dɔa wɔwɔ ade goe la ŋu dɔ nyuie. Ne míeyi edzi le zɔzɔm aduadu kple Yehowa ƒe dziƒotasiaɖam sia la, míaƒe agbenɔnɔ wɔa ɖeka kple gbedeasi si míeɖea gbeƒãe.

¹⁷ To Yehowa ƒe habɔbɔa ƒe kpekpeɖeŋu me la, míele ŋgɔ yim le Mawu ƒe lɔlɔ̃nu wɔwɔ me. Ðo ŋku edzi be Yehowae nye dziƒotasiaɖam sia Dola. Eya ta zɔzɔ aduadu kple dziƒotasiaɖam la fia be míedea bubu Yehowa ŋu eye míeka ɖe eyama dzi be enye míaƒe Agakpe. (Ps. 18:31) Biblia do ŋugbe be: “Yehowa ana ŋusẽ eƒe dukɔ la. Yehowa atsɔ ŋutifafa ayra eƒe dukɔ la.” (Ps. 29:11) Esi míenye Yehowa ƒe habɔbɔa me tɔwo egbea ta la, edoa ŋusẽ mí, eye míenɔa ŋutifafa si wòtsɔ yraa eƒe ame siwo le ɖoɖo nu la me. Ɛ̃, ɖikeke mele eme o be Yehowa ayi edzi anɔ mía yram geɖe esi míele eƒe lɔlɔ̃nu wɔm fifia heyi ɖe mavɔmavɔ me.