Ðe Mawu Xɔa Nɔƒe Gbãtɔ Le Wò Ƒomea Mea?

“[Lɔ̃ Yehowa], wò Mawu la, kple wò dzi blibo.”—MARKO 12:29, 30.

 1. Aleke gbegbe wòle vevie be míalɔ̃ Yehowae?

AGBALẼFIALA aɖe bia Yesu be: “Seawo katã dome la kae nye gbãtɔ mahã?” Le esi Yesu nagblɔ eya ŋutɔ ƒe nukpɔsusu teƒe la, eyɔ nya tso Mawu ƒe Nya la me le Mose V, 6:4, 5 boŋ tsɔ ɖo eŋui. Egblɔ be: “Gbãtɔ enye: Israel, ɖo to, [Yehowa], míaƒe Mawu la, [Yehowa] ɖeka wònye. Eye nalɔ̃ [Yehowa], wò Mawu la, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.”—Marko 12:28-30.

 2. (a) Tsitretsiɖeŋu kae wòhiã be Yesu nadze ŋgɔe? (b) Nukae ate ŋu ana be Yehowa ŋu dzedze nasesẽ ɣeaɖewoɣi?

² Wɔwɔ ɖe nusi Yesu yɔ be se gbãtɔ—vevitɔ kekeake—dzi bia be míawɔ nusi dzea Yehowa ŋu ɣesiaɣi. Yesu wɔ nu alea, togbɔ be ɣeaɖeɣi apostolo Petro meda asi ɖe nusi Yesu di be yeawɔ dzi o, eye ɣebubuɣi hã eya ŋutɔ ƒe ƒometɔ kplikplikpliwo melɔ̃ ɖe edzi o hã. (Mateo 16:21-23; Marko 3:21; Yohanes 8:29) Aleke nàwɔ ne èɖo nɔnɔme ma tɔgbe me? Mítsɔe be wò ƒometɔwo di be nàdzudzɔ Biblia sɔsrɔ̃ kple hadede kple Yehowa Ðasefowo. Ðe nàto nusi adze Mawu ŋu wɔwɔ me ana eyama naxɔ nɔƒe gbãtɔa? Ðe nènaa Mawu xɔa nɔƒe gbãtɔ ne wò ƒometɔwo atsi tre ɖe agbagba siwo dzem nèle be yeasubɔe la ŋu gɔ̃ hã?

Ƒometɔwo ƒe Tsitretsiɖeŋu ƒe Mɔ̃ La

 3. (a) Nukawoe ate ŋu ado tso Yesu ƒe nufiafia me na ƒomea? (b) Aleke ƒomea me tɔwo ate ŋu aɖe amesi wolɔ̃ wu fiae?

³ Yesu mebu fu siwo woakpe ne ƒomea me tɔ bubuwo tsi tre ɖe ƒometɔ si xɔ eƒe nufiafiawo ŋu la nu tsɛe o. Yesu gblɔ be: “Ame ƒe ketɔwo anye ye ŋutɔ ƒemetɔwo.” Gake togbɔ be adzɔ nublanuitɔe nenema hã la, Yesu fia amesi le be wòaxɔ nɔƒe gbãtɔ esi wògblɔ be: “Amesi ke lɔ̃a fofo alo dada wum la, eya medzem o; eye amesi ke lɔ̃a viŋutsu alo vinyɔnu wum la, eya medzem o.” (Mateo 10:34-37, NW) Míetsɔa Yehowa Mawu ɖoa nɔƒe gbãtɔ ne míewɔ Via, Yesu Kristo, amesi nye ‘Mawu ƒe amenyenye ƒe nɔnɔme ŋutɔŋutɔ’ la ƒe nufiafiawo dzi.—Hebritɔwo 1:3; Yohanes 14:9.

 4. (a) Nukae Yesu gblɔ be ehiã bene woanye ye yomedzela? (b) Gɔmesese ka nue Kristotɔwo alé fu woƒe ƒometɔwo le?

⁴ Ɣebubuɣi esi Yesu nɔ nu ƒom tso nusi eyomedzela nyenye bia ŋutɔŋutɔ ŋu la, egblɔ be: “Ne ame aɖe va gbɔnye, eye melé fu fofoa kple dadaa kple srɔ̃a kple viawo kple nɔviaŋutsuwo kple nɔvianyɔnuwo o, ẽ, ye ŋutɔ ƒe agbe gɔ̃ hã o la, mate ŋu anye nye nusrɔ̃la o.” (Luka 14:26) Edze ƒã be menye ɖe Yesu le gbɔgblɔm be ye yomedzelawo nalé fu woƒe ƒometɔwo ŋutɔŋutɔ o, elabena ede se be amewo nalɔ̃ woƒe futɔwo gɔ̃ hã. (Mateo 5:44) Yesu ƒe nya siawo fia boŋ be ye yomedzelawo ƒe lɔlɔ̃ na woƒe ƒometɔwo megawu woƒe lɔlɔ̃ na Mawu o. (Tsɔe sɔ kple Mateo 6:24.) Le gɔmesese ma nu la, Biblia gblɔ be Yakob ‘lé fu’ Lea eye wòlɔ̃ Raxel, si fia be melɔ̃ Lea de alesi wòlɔ̃ nɔvianyɔnu Raxel nu o. (Mose I, 29:30-32) Yesu gblɔ be ele be míalé fu mía ŋutɔwo míaƒe “agbe,” alo luʋɔ gɔ̃ hã, alo míagalɔ̃e wu Yehowa o!

 5. Aleke Satana zãa ƒomeɖoɖoa ayetɔe ɖe mɔ gbegblẽ nu?

⁵ Esi Yehowa ye nye Wɔla kple Agbenala ta la, edze na esubɔlawo ƒe ɖokuitsɔtsɔna bliboe. (Nyaɖeɖefia 4:11) Apostolo Paulo ŋlɔ be: “Medzea klo na . . . Fofo, amesi gbɔ ƒome sia ƒome, si le dziƒo kple anyigba dzi la, kpɔa eƒe ŋkɔ tsonɛ.” (Efesotɔwo 3:14, 15) Yehowa ɖo ƒomeɖoɖoa anyi le mɔ wɔnuku aɖe ŋutɔ nu be ƒometɔwo ƒe dɔme natrɔ ɖe wo nɔewo ŋu. (Fiawo I, 3:25, 26; Tesalonikatɔwo I, 2:7) Gake Satana Abosam tsɔ ayedzedze zãa ƒometɔwo ƒe lɔlɔ̃ na wo nɔewo sia, si me didi be woadze ame ƒe lɔlɔ̃tɔwo ŋu hã le, ɖe mɔ gbegblẽ nu. Eƒlɔa dzo ɖe ƒometɔwo ƒe tsitretsiɖeŋu te, eye tenɔnɔ sesĩe na Biblia ƒe nyateƒea sesẽna na ame geɖe ne wodze ŋgɔ kuxi sia.—Nyaɖeɖefia 12:9, 12.

Tenɔnɔ Ðe Kuxia Nu

 6, 7. (a) Aleke míawɔ akpe ɖe míaƒe ƒomea me tɔwo ŋu be woanya Biblia sɔsrɔ̃ kple hadede kple Kristotɔwo ƒe vevienyenye? (b) Aleke míawɔ aɖee fia be míelɔ̃ míaƒe ƒomea me tɔwo vavã?

⁶ Ne wozi dziwò be nàtia Mawu ŋu dzedze alo ƒometɔ aɖe ŋu dzedze la, nukae nàwɔ? Ðe nàsusui be Mawu mele mɔ kpɔm be míasrɔ̃ yeƒe Nya la eye míawɔ eƒe gɔmeɖosewo dzi o ne ahe mamã va ƒomea mea? Gake bu eŋu kpɔ. Ne èna ta eye nèdzudzɔ Biblia sɔsrɔ̃ alo hadede kple Yehowa Ðasefowo la, aleke wò lɔlɔ̃tɔwo awɔ ava nya be agbe kple ku ƒe nyae Biblia me sidzedze vavãtɔ nye?—Yohanes 17:3; Tesalonikatɔwo II, 1:6-8.

⁷ Míate ŋu awɔ nya sia ƒe kpɔɖeŋu ale: Ðewohĩ wò ƒometɔ aɖe nye ahanoxe. Ðe wò ɖekematsɔmatsɔ le eƒe ahanonoa me alo mɔɖeɖe le eŋu aɖe vi ŋutɔŋutɔ aɖe nɛa? Ðe wòanyo wu be, bene ŋutifafa nanɔ anyi ta la, nàna ta eye màwɔ naneke le eƒe kuxia ŋu oa? Ao, míexɔe se be àlɔ̃ ɖe edzi be nu nyuitɔ si nàwɔ ye nye be nàdze agbagba akpe ɖe eŋu be wòaɖu eƒe ahanonoa dzi, nenye eya tae wòakpɔ dziku ɖe ŋuwò alo ado ŋɔdzi na wò hã. (Lododowo 29:25) Nenema ke ne èlɔ̃ wò ƒometɔwo nyateƒe la, màna ta le agbagba siwo woadze be nàdzudzɔ Biblia sɔsrɔ̃ me o. (Dɔwɔwɔwo 5:29) Ne ènɔ te sesĩe ko hafi nàte ŋu akpe ɖe wo ŋu be woanya be agbenɔnɔ ɖe Kristo ƒe nufiafiawo nu nye agbekpɔkpɔ ŋutɔŋutɔ na mí.

 8. Aleke alesi Yesu wɔ Mawu ƒe lɔlɔ̃nu le nuteƒewɔwɔ me ɖea vi na míi?

⁸ Nana be Mawu naxɔ nɔƒe gbãtɔ ate ŋu asesẽ ŋutɔ ɣeaɖewoɣi. Gake ɖo ŋku edzi be Satana na hã be Mawu ƒe lɔlɔ̃nu wɔwɔ nye nu sesẽ na Yesu. Ke hã Yesu mena ta gbeɖe o; edo dzi le fuwɔametia ŋuti vevesese helĩhelĩ gɔ̃ hã me le mía ta. Biblia gblɔ be: “Yesu Kristo [nye mía] xɔla.” “[Eku] ɖe mía ta.” (Tito 3:6; Tesalonikatɔwo I, 5:10) Ðe míedaa akpe be Yesu mena ta esi wotsi tre ɖe eŋu oa? Esi wòdo dzi ku vɔsaku ta la, agbe mavɔ nɔnɔ le dzɔdzɔenyenye ŋutifafaxexe yeye me ƒe mɔkpɔkpɔ le mía si ne míeɖee fia be míexɔ eƒe ʋu si wòkɔ ɖi la dzi se.—Yohanes 3:16, 36; Nyaɖeɖefia 21:3, 4.

Teƒeɖoɖo Nyui aɖe si Nàte Ŋu Akpɔ

 9. (a) Aleke Kristotɔwo ate ŋu akpɔ gome le wo nɔewo xɔxɔ ɖe agbe mee? (b) Aleke nuwo nɔ le ƒome si me Timoteo tso me?

⁹ Ènya be ye hã yeate ŋu akpɔ gome le ame bubuwo, si me wò ƒometɔ siwo nèlɔ̃na vevie hã le la ɖeɖe mea? Apostolo Paulo xlɔ̃ nu Timoteo be: “Nɔ nusiawo [siwo wofia wo] la dzi; elabena ne èwɔ esia la, àxɔ ɖokuiwò kple amesiwo ɖoa to wò la, ɖe agbe.” (Timoteo I, 4:16) Aƒe si me mã le mawusubɔsubɔ gome mee Timoteo nɔ, elabena fofoa si nye Helatɔ la nye dzimaxɔsetɔ. (Dɔwɔwɔwo 16:1; Timoteo II, 1:5; 3:14) Togbɔ be míenya ne Timoteo fofo va zu xɔsetɔ o hã la, anɔ eme be míabui be eva zui le ŋusẽ si srɔ̃a Eunike, kple Timoteo, ƒe nuteƒewɔwɔgbenɔnɔ kpɔ ɖe edzi la ta.

10. Nukae Kristotɔwo ate ŋu awɔ wòaɖe vi na wo srɔ̃ dzimaxɔsetɔwo?

¹⁰ Ŋɔŋlɔawo fia be srɔ̃ŋutsu kple srɔ̃nyɔnu siwo léa Biblia ƒe nyateƒea me ɖe asi goŋgoŋ la ƒe nuwɔna ate ŋu axɔ wo srɔ̃ siwo menye Kristotɔwo o ɖe agbe to alesi woakpe ɖe wo ŋu be woazu xɔsetɔwo me. Apostolo Paulo ŋlɔ be: “Ne nyɔnu, si mexɔ se o la, le nɔvi aɖe si, eye wòdze nyɔnua ŋu bena, yeanɔ egbɔ la, negagbee o. Eye ne ŋutsu, si mexɔ se o la, le nyɔnu aɖe si, eye wòdze ŋutsua ŋu be, yeanɔ egbɔ la, negagbe ŋutsu la o. Elabena wò nyɔnu, aleke nènyae bena, àte ŋu axɔ srɔ̃wò ɖe agbe mahã? Alo wò ŋutsu, aleke nènyae bena, àte ŋu axɔ srɔ̃wò ɖe agbe mahã?” (Korintotɔwo I, 7:12, 13, 16) Apostolo Petro ƒo nu tso alesi srɔ̃nyɔnuwo ate ŋu aɖe wo srɔ̃ŋutsuwo ŋu esi wòde dzi ƒo na wo be: “Mi nyɔnuwo la, mibɔbɔ mia ɖokui na mia ŋutɔwo mia srɔ̃wo, bena ne ame aɖewo meɖo to nya la o la, nyɔnuwo ƒe agbenɔnɔ nya aɖeke magblɔ la naɖe wo.”—Petro I, 3:1.

11, 12. (a) Teƒeɖoɖo kae Kristotɔ akpe geɖe xɔ, eye nukae wowɔ tsɔ xɔe? (b) Gblɔ ƒometɔ aɖe si woɖo eteƒe na le eƒe dzidodo nuteƒewɔwɔtɔe ta la ƒe nuteƒekpɔkpɔ aɖe.

¹¹ Le nyitsɔ laa ƒe siawo me la, ame akpe geɖe va zu Yehowa Ðasefowo le tsitretsitsi ɖe woƒe ƒometɔ Ðasefowo ƒe Kristotɔwo ƒe dɔwɔna ŋuti ɣleti alo ƒe geɖe gɔ̃ hã megbe. Teƒeɖoɖo kae nye si esia nye na Kristotɔ siwo nɔ te sesĩe, eye yayra kae nye si wònye na amesiwo nye tsitretsiɖeŋulawo tsã la! Kristotɔ hamemegã aɖe si xɔ ƒe 74 la tsɔ avigbe gblɔ be: “Medaa akpe na srɔ̃nye kple vinyewo be wolé nyateƒea me ɖe asi goŋgoŋ le ƒe siwo me metsi tre ɖe wo ŋu me.” Egblɔ be yetsɔ dzimesesẽ gbe na ye srɔ̃ be megagblɔ Biblia ƒe nya aɖeke gɔ̃ hã na ye o ƒe etɔ̃ sɔŋ. Egblɔ be: “Gake enya ɣeyiɣi nyuitɔ si wòate ɖe ŋunye, eye wònɔa gbeƒã ɖem nam ne ele ami sim ɖe afɔ nam. Aleke gbegbe meda akpee nye si be mena ta le nye tsitretsiɖeŋua me o!”

¹² Srɔ̃ŋutsu bubu si hã tsi tre ɖe eƒe ƒomea ŋu ŋlɔ be: ‘Nyee nye srɔ̃nye ƒe futɔ vɔ̃ɖitɔ kekeake tsã elabena le eƒe nyateƒea xɔxɔ vɔ megbe la, medoa ŋɔdzi nɛ, eye míewɔa dzre gbesiagbe; efia be nyee dia gea ɣesiaɣi. Gake dzodzroe; srɔ̃nye ku ɖe Biblia ŋu goŋgoŋ. Metsɔ ƒe 12 kpe aʋa kple nyateƒea kpakple srɔ̃nye kple vinye. Nye nuwɔna ɖesiaɖe ɖe wo ame evea ŋu sɔ kple Abosam tɔ.’ Mlɔeba ŋutsua va dze ŋkuléle ɖe eƒe agbe ŋu gɔme. Eɖe eme be: ‘Mekpɔ alesi menɔ fu ɖem na woe. Mexlẽ Biblia la, eye eƒe mɔfiamewo na be mezu Ðasefo xɔnyɔnyrɔ̃ fifia.’ Bu teƒeɖoɖo gã si nyɔnua kpɔ ŋu kpɔ, ẽ, esi eƒe kpekpeɖeŋu ‘ɖe srɔ̃a’ le esi wòdo dzi nuteƒewɔwɔtɔe le eƒe tsitretsitsi ɖe eŋu ƒe 12 sɔŋ me ta!

Nusɔsrɔ̃ tso Yesu Gbɔ

13. (a) Nukae nye nufiame vevitɔ si wòle be srɔ̃ŋutsuwo kple srɔ̃nyɔnuwo nasrɔ̃ tso Yesu ƒe agbenɔnɔ me? (b) Aleke Yesu ƒe kpɔɖeŋua ate ŋu aɖe vi na amesiwo ɖokuibɔbɔ ɖe Mawu ƒe lɔlɔ̃nu te sesẽna na lae?

¹³ Nufiame vevitɔ si wòle be srɔ̃ŋutsuwo kple srɔ̃nyɔnuwo nasrɔ̃ tso Yesu ƒe agbenɔnɔ mee nye toɖoɖo Mawu. Yesu gblɔ be: “Mewɔa nusi dzea eŋu ɖaa.” “Nyemedia nye ŋutɔ nye lɔlɔ̃nu o, ke boŋ amesi dɔm la ƒe lɔlɔ̃nu ko.” (Yohanes 5:30; 8:29) Ɣeaɖeɣi esi Yesu kpɔ be Mawu ƒe lɔlɔ̃nu ƒe akpa aɖe sesẽ ŋutɔ na ye gɔ̃ hã la, eɖo to. Edo gbe ɖa be: “Ne èlɔ̃ la, tsɔ kplu sia yii le gbɔnye.” Gake egblɔ kpee enumake be: “Gake menye nye lɔlɔ̃nu o, ke boŋ tɔwò woawɔ.” (Luka 22:42) Yesu mebia tso Mawu si be wòatrɔ Eƒe lɔlɔ̃nu o; to alesi wòbɔbɔ eɖokui be yeawɔ nusianu si nye Mawu ƒe lɔlɔ̃nu na ye me la, eɖee fia be yelɔ̃ Mawu vavã. (Yohanes I, 5:3) Nusi nye Mawu ƒe lɔlɔ̃nu dada ɖe nɔƒe gbãtɔ, abe alesi Yesu wɔe ene, hiã ale gbegbe na dzidzedzekpɔkpɔ menye le trenɔnɔ me ɖeɖeko o ke le srɔ̃ɖegbenɔnɔ kple ƒomegbenɔnɔ hã me. Bu nusita wòle alea la ŋu kpɔ.

14. Aleke Kristotɔ aɖewo bua nu ŋui si mesɔ o?

¹⁴ Abe alesi míekpɔe va yi ene la, ne xɔsetɔwo da Mawu ɖe nɔƒe gbãtɔ la, wodina be yewoanɔ anyi kple yewo srɔ̃ dzimaxɔsetɔwo eye zi geɖe la, wote ŋu kpena ɖe wo ŋu be wova dzena na agbekpɔkpɔ. Ne xɔsetɔwoe srɔ̃tɔ eveawo nye hã la, woƒe srɔ̃ɖeɖea maɖo blibodede gbɔ kura o. Le nuvɔ̃ ƒe nɔnɔmewo ta la, menye ɣesiaɣie srɔ̃ŋutsuwo kple srɔ̃nyɔnuwo bua wo nɔewo ŋu lɔlɔ̃tɔe o. (Romatɔwo 7:19, 20; Korintotɔwo I, 7:28) Ame aɖewo wɔnɛ kakaka va dina be yewoaɖe ame bubu togbɔ be Ŋɔŋlɔawo me gɔmeɖose aɖeke mele wo si be woagbe wo nɔewo o hã. (Mateo 19:9; Hebritɔwo 13:4) Wobunɛ be esiae anyo na yewo wu, eye be nusi nye Mawu ƒe lɔlɔ̃nu na srɔ̃ŋutsu kple srɔ̃nyɔnuwo be woanɔ wo nɔewo gbɔ la sesẽ akpa. (Maleaxi 2:16; Mateo 19:5, 6) Ðikekemanɔmee la, amegbetɔ ƒe nuŋububue esia hã nye ke menye Mawu tɔ o.

15. Nukatae Mawu tsɔtsɔ ɖo nɔƒe gbãtɔ kpɔa ame ta?

¹⁵ Ametakpɔkpɔ kae nye si wònye be míada Mawu ɖe nɔƒe gbãtɔ! Srɔ̃tɔ siwo wɔnɛ alea la adze agbagba anɔ wo nɔewo gbɔ eye woatsɔ aɖaŋuɖoɖo si tso Mawu ƒe Nya la me akpɔ woƒe kuxiwo gbɔe. Esia wɔwɔ xea mɔ ɖe dzigbagbã ƒomevi vovovo siwo vana ne wogbe eƒe lɔlɔ̃nu wɔwɔ la nu. (Psalmo 19:8-12) Esia ƒe kpɔɖeŋu aɖe dze le ɖekakpui kple ɖetugbi srɔ̃tɔ aɖewo siwo va ɖoe be yewoawɔ ɖe Biblia ƒe aɖaŋuɖoɖo dzi esi wòsusɔ vie wogbe wo nɔewo kloe la ƒe nya me. Esi nyɔnua trɔ kpɔ megbe nɔ ŋugble dem le dzidzɔ siwo wòva le kpɔkpɔm le eƒe srɔ̃ɖeɖea me ŋu la, egblɔ be: “Ele be manɔ anyi afa avi ne mebu alesi anye ne nye ɖeɖe manɔ anyi aklã le srɔ̃nye gbɔ ƒe gbogbo siawo ŋu. Ke medoa gbe ɖa tsɔ daa akpe na Yehowa Mawu ɖe eƒe aɖaŋuɖoɖo kple mɔfiame siwo gate mí ƒo ƒui ɖeka le srɔ̃ɖeɖe vivi sia me ta.”

Srɔ̃ŋutsuwo Kple Srɔ̃nyɔnuwo—Misrɔ̃ Kristo!

16. Kpɔɖeŋu kae Yesu ɖo ɖi na srɔ̃ŋutsuwo kple srɔ̃nyɔnuwo siaa?

¹⁶ Yesu, amesi da Mawu ɖe nɔƒe gbãtɔ ɣesiaɣi la, ɖo kpɔɖeŋu nyui aɖe ɖi na srɔ̃ŋutsuwo kple srɔ̃nyɔnuwo siaa, eye anyo be woalé ŋku ɖe eŋu nyuie. Wode dzi ƒo na srɔ̃ŋutsuwo be woasrɔ̃ mɔ si nu Yesu zã eƒe tanyenye tufafatɔe ɖe Kristo-hamea dzii. (Efesotɔwo 5:23) Eye Kristotɔ srɔ̃nyɔnuwo ate ŋu asrɔ̃ nu tso Yesu ƒe ɖokuibɔbɔ ɖe Mawu te si ŋu kpɔtsotso aɖeke mele o la me.—Korintotɔwo I, 11:3.

17, 18. Mɔ kawo nue Yesu ɖo kpɔɖeŋu nyui ɖi na srɔ̃ŋutsuwo le?

¹⁷ Biblia de se be: “Mi ŋutsuwo la, milɔ̃ mia ŋutɔwo mia srɔ̃wo, abe alesi Kristo hã lɔ̃ hame la, eye wòtsɔ ye ŋutɔ ɖokui hena ɖe eta la ene.” (Efesotɔwo 5:25) Mɔ vevi aɖe si nu Yesu ɖe eƒe lɔlɔ̃ fia eyomedzelawo ƒe hamea le lae nye alesi wònye wo xɔlɔ̃ kplikplikpli. Yesu gblɔ be: “Meyɔ mi be xɔlɔ̃wo, elabena nusiwo katã mese tso Fofonye gbɔ la, mena mienya wo.” (Yohanes 15:15) Bu ɣeyiɣi gbogbo si Yesu tsɔ nɔ eƒe nusrɔ̃lawo gbɔe nɔ nu ƒom na wo la ŋu kpɔ—dze gbogbo siwo wòɖo kple wo—kple alesi wòka ɖe wo dzii la ŋu kpɔ! Ðe esia menye kpɔɖeŋu nyui ŋutɔ aɖe na srɔ̃ŋutsuwo oa?

¹⁸ Yesu tsɔ ɖe le eƒe nusrɔ̃lawo me vavã eye lɔlɔ̃ deto akuakua nɔ eme na wo. (Yohanes 13:1) Ne eƒe nufiafiawo me mekɔ na wo o la, egbɔa dzi blewu ɖea nuwo me na wo ne woawo ɖeɖe woli. (Mateo 13:36-43) Srɔ̃ŋutsuwo, ɖe srɔ̃wò ƒe gbɔgbɔmenyonyo nɔa vevie na wò nenema kea? Ðe nèkpɔa vovo ɖe eŋu, eye nèkpɔa egbɔ be le mi ame evea ƒe susu kple dzi me la, Biblia me nyateƒeawo me kɔ na mia? Yesu kplɔ eƒe apostoloawo ɖe eɖokui ŋu le subɔsubɔdɔa me, ɖewohĩ ena hehe wo dometɔ ɖesiaɖe ɖekaɖekae. Ðe nèkplɔa srɔ̃wò ɖe ɖokuiwò ŋu le gbeadzisubɔsubɔdɔa me, eye miewɔa aƒeme yi aƒeme sasrãkpɔwo kple Biblia-nusɔsrɔ̃wo ɖekaea?

19. Aleke alesi Yesu kpɔ eƒe apostolowo ƒe gbɔdzɔgbɔdzɔ siwo kpɔtɔ nɔ wo me gbɔe la nye kpɔɖeŋu na srɔ̃ŋutsuwoe?

¹⁹ Nuwɔwɔ ɖe eƒe apostolowo ƒe blibomademadewo ŋu me koŋ ye Yesu ɖo kpɔɖeŋu nyui aɖe na srɔ̃ŋutsuwo le. Le eƒe fiẽnuɖuɖu mamlea kple eƒe apostoloawo me la, ede dzesi hoʋiʋligbɔgbɔ aɖe si kpɔtɔ nɔ wo me. Ðe wònyra ɖe wo dzi adãtɔea? Ao, ɖe wòklɔ afɔ na wo dometɔ ɖesiaɖe ɖokuibɔbɔtɔe boŋ. (Marko 9:33-37; 10:35-45; Yohanes 13:2-17) Ðe nègbɔa dzi ɖi na srɔ̃wò nenemaa? Le esi nànɔ nu ƒom le gbɔdzɔgbɔdzɔ aɖe si nɔa dzedzem le eŋu enuenu ŋu teƒe la, ɖe nètsɔa dzigbɔɖi dzea agbagba be yeakpe ɖe eŋu eye to kpɔɖeŋu si nèɖona dzi la, nèɖoa eƒe dzi gbɔa? Srɔ̃nyɔnuwo axɔ nublanuikpɔkpɔname lɔlɔ̃tɔe sia, abe alesi apostoloawo hã va wɔe mlɔeba ene.

20. Nukae mele be Kristotɔ srɔ̃nyɔnuwo naŋlɔ be gbeɖe o, eye ameka ƒe kpɔɖeŋu dzie woɖo ŋkui na wo?

²⁰ Ele be srɔ̃nyɔnuwo hã nasrɔ̃ Yesu, amesi meŋlɔ be ɣeaɖekeɣi kpɔ be “Kristo ƒe ta enye Mawu” o la. Ebɔbɔa eɖokui ɖe Fofoa si le dziƒo te ɣesiaɣi. Nenema ke mele be srɔ̃nyɔnuwo naŋlɔ be o be “nyɔnu ƒe ta enye ŋutsu,” ẽ, be yewo srɔ̃e nye ta na yewo. (Korintotɔwo I, 11:3; Efesotɔwo 5:23) Apostolo Petro xlɔ̃ nu Kristotɔ srɔ̃nyɔnuwo be woasrɔ̃ blema “nyɔnu kɔkɔewo,” vevietɔ Sara, amesi “ɖoa to Abraham, eye wòyɔnɛ be aƒetɔ” la ƒe kpɔɖeŋu.—Petro I, 3:5, 6.

21. Nukatae Abraham kple Sara ƒe srɔ̃ɖeɖe kpɔ dzidzedze gake Lot kple srɔ̃a tɔ ya medze edzi o?

²¹ Edze ƒã be Sara tsɔ aƒe si me dzidzeme le le du si me kesinɔnuwo bɔ ɖo me nɔnɔ sa vɔe va nɔ agbadɔ me le dzronyigba dzi. Nukatae? Agbenɔnɔ mae dzɔ dzi nɛ wu taea? Manye nenemae kura o. Esi srɔ̃a gblɔ nɛ be wòayi taea? Ðikekemanɔmee la, eya hã le eme, elabena Sara lɔ̃ Abraham le mawumenɔnɔme siwo le esi ta. (Mose I, 18:12) Gake nu vevi si ta koŋ ye wòyi kple srɔ̃a ye nye eƒe lɔlɔ̃ na Yehowa kple eƒe didi si tso dzi me be yeawɔ ɖe Mawu ƒe mɔfiafia dzi. (Mose I, 12:1) Toɖoɖo Mawu doa dzidzɔ nɛ. Gake Lot srɔ̃ ya metsɔ dzo ɖe Mawu ƒe lɔlɔ̃nu wɔwɔ ŋu o eye le esia ta etsɔ nudzodzro trɔ kpɔ nusiwo wògblẽ ɖe megbe ɖe woƒe nɔƒe si nye Sodom. (Mose I, 19:15, 25, 26; Luka 17:32) Aleke srɔ̃ɖeɖe ma va wu enu nublanuitɔe nye si—le eƒe tomaɖomaɖo Mawu ta!

22. (a) Ðokuimedzodzro kae nunya anɔ eme be ƒomea me tɔwo nawɔ? (b) Nuka mee míadzro le míaƒe nusɔsrɔ̃ si kplɔe ɖo me?

²² Eyata srɔ̃ŋutsu alo srɔ̃nyɔnu, ehiã vevie be nàbia ɖokuiwò se be, ‘Ðe Mawu xɔa nɔƒe gbãtɔ le míaƒe ƒomea mea? Ðe medzea agbagba le nyateƒe me be mawɔ wɔƒe si Mawu nama? Ðe medzea agbagba ŋutɔŋutɔ be malɔ̃ srɔ̃nye eye makpe ɖe eŋu be ƒomedodo nyui nava ɖo wo kple Yehowa dome alo be wòayi edzi anɔ wo kplii domea?’ Vi le ƒome akpa gãtɔ me. Míadzro dzilawo ƒe wɔƒe kple alesi wòhiã be wo ame evea kple wo viwo natsɔ Mawu aɖo nɔƒe gbãtɔ la me ɖe nya sia yome.

Èɖo Ŋku Wo Dzia?

◻ Nukawoe ate ŋu ado tso Yesu ƒe nufiafia me na ƒomea?

◻ Teƒeɖoɖo kae Kristotɔ akpe geɖe siwo nɔ te sesĩe la xɔ?

◻ Nukae akpe ɖe srɔ̃tɔwo ŋu be woatsri agbegbegblẽnɔnɔ kple srɔ̃gbegbe?

◻ Nukae srɔ̃ŋutsuwo ate ŋu asrɔ̃ tso Yesu ƒe kpɔɖeŋu me?

◻ Aleke srɔ̃nyɔnuwo ate ŋu ana dzidzɔ nanɔ woƒe srɔ̃ɖeɖe me?

[Nɔnɔmetata si le axa 10]

Aleke Sara ƒe nuwɔna na eƒe srɔ̃ɖeɖe kpɔ dzidzedzee?