‘Nyadziwɔla’ Kpɔdzidzɔwo
“Mitsɔ dɔmefafa xɔ nya, si wodo ɖe mia me, si ate ŋu aɖe mia luʋɔwo la. Ke mizu nyadziwɔlawo, eye menye nyasela, siwo blea wo ɖokui ɖeɖeko o!”—YAKOBO 1:21, 22.
1. Aleke wòle be míabu míaƒe ƒe 1996 ƒe mawunyakpukpui lae?
“MIZU NYADZIWƆLAWO.” Gbedasi sẽŋu aɖe le nya kpui sia me. “Yakobo ƒe Agbalẽ” mee woɖee tsoe le Biblia me, eye míaŋlɔe ɖe Fiaɖuƒe Akpatawo me wòanye Yehowa Ðasefowo ƒe ƒea ƒe mawunyakpukpui le ƒe 1996 la katã me.
2, 3. Nukata wòsɔ be Yakobo naŋlɔ agbalẽ si tɔ eƒe ŋkɔ?
2 Yakobo si nye Aƒetɔ Yesu dadavi la xɔ ŋkɔ le Kristo-hame gbãtɔ me. Ɣeaɖeɣi le Yesu ƒe tsitretsitsi megbe la, mía Aƒetɔ la ɖe eɖokui fia Yakobo, eye emegbe apostolo mamleawo katã. (Korintotɔwo I, 15:7) Emegbe esi woɖe apostolo Petro le gaxɔ me nukutɔe la, egblɔ na Kristotɔwo ƒe ƒuƒoƒo aɖe si kpe ta be: “Mika nusiawo ta na Yakobo kple nɔviawo.” (Dɔwɔwɔwo 12:17) Edze abe togbɔ be Yakobo ŋutɔ menye apostolo o hã la, enɔ zi me le dziɖuha ƒe kpekpe me le Yerusalem esime apostoloawo kple hamemegãwo tso nya me be mehiã be Trɔ̃subɔla-zu-Yudatɔwo natso aʋa o ene. Yakobo ƒo nya ta eye woɖo nyametsotso si dzi gbɔgbɔ kɔkɔea ɖo kpee la ɖe hameawo katã.—Dɔwɔwɔwo 15:1-29.
3 Edze kɔte be kpekpeme nɔ Yakobo ƒe ame tsitsi ƒe susua ŋu. Gake egblɔ ɖokuibɔbɔtɔe be “Mawu kple Aƒetɔ Yesu Kristo ƒe dɔla” ko yenye. (Yakobo 1:1) Aɖaŋuɖoɖo nyui kple dzideƒo gbogbo aɖe le eƒe agbalẽ si tso gbɔgbɔ me la me na Kristotɔwo egbea. Ewu enu anye ƒe ene hafi Romatɔwo nɔ Aʋafia Cestius Gallus te dze Yerusalem dzi zi gbãtɔ, esi “woɖe gbeƒã” nyanyuia “na nuwɔwɔwo katã le dziƒo te” ɣemaɣi megbe. (Kolosetɔwo 1:23) Ɣeyiɣi sesẽe wònye ɣemaɣi, eye Yehowa subɔlawo nya nyuie be esusɔ vie ko wòahe Eƒe ʋɔnudɔdrɔ̃ va Yuda-dukɔa dzi.
4. Nukae ɖee fia be Kristotɔ gbãtɔwo ka ɖe Mawu ƒe Nya dzi vevie?
4 Hebri Ŋɔŋlɔ bliboa kple Hela Ŋɔŋlɔawo ƒe akpa gãtɔ nɔ Kristotɔ mawo si xoxo. Abe alesi Kristotɔ Biblia-ŋlɔlawo ƒe nyayɔyɔ geɖe tso ŋɔŋlɔ gbãtɔ ma me ɖee fia ene la, edze ƒã be woka ɖe Mawu ƒe Nya la dzi vevie. Nenema ke wòle be míawo hã míasrɔ̃ Mawu ƒe Nyae vevie egbea ahawɔ eŋudɔ le míaƒe agbenɔnɔ me. Bene míado dzi la, míehiã gbɔgbɔ me ŋusẽdodo kple dzideƒo si Ŋɔŋlɔ Kɔkɔeawo nana la.—Psalmo 119:97; Timoteo I, 4:13.
5. Nukata míehiã mɔfiame tɔxɛ egbea, eye afikae míakpɔe le?
5 Egbea ameƒomea le “xaxa gã . . . esi meva kpɔ tso xexeame ƒe gɔmedzedze vaseɖe egbegbe o, eye megale vava ge akpɔ o” la ƒe agbo nu tututu. (Mateo 24:21) Mawu ƒe mɔfiame xɔxɔ dzie míaƒe agbetsitsi nɔ te ɖo. Aleke míawɔ akpɔe? To Mawu ƒe Nya si tso gbɔgbɔ me ƒe nufiafiawo xɔxɔ ɖe míaƒe dzime mee. Esia ana ‘míazu nyadziwɔlawo,’ abe Yehowa subɔla nuteƒewɔla siwo nɔ anyi le blema ene. Ele be míaxlẽ Mawu ƒe Nya la asrɔ̃e veviedodotɔe ahazãe wòanye kafukafu na Yehowa.—Timoteo II, 2:15; 3:16, 17.
Dzidodo Dzidzɔtɔe
6. Nukata wòle be míakpɔ dzidzɔ le tenɔnɔ ɖe tetekpɔwo nu me?
6 Yakobo yɔ dzidzɔ si nye Mawu ƒe gbɔgbɔ ƒe kutsetse evelia tsɔ ʋu eƒe agbalẽa nui. Eŋlɔe be: “Nɔvinyewo, ne miege ɖe tetekpɔ bubu ƒomeviwo me la, mibui dzidzɔ sɔŋ, esi mienyae bena, miaƒe xɔse ƒe dodokpɔ wɔa dzidodo. Ke dzidodo la nakpɔ eƒe dɔwɔwɔ blibo, bena mianye ame blibowo keŋkeŋ, eye naneke nagahiã mi o.” (Yakobo 1:2-4; Galatiatɔwo 5:22, 23) Aleke wɔ woagblɔ be enye “dzidzɔ sɔŋ” be woage ɖe tetekpɔ geɖe me? Yesu gɔ̃ hã gblɔ le eƒe Todzimawunya me be: “Woayra mi, ne woadzu mi, eye woati mia yome, eye woaka aʋatso agblɔ nya vɔ̃ bubu ƒomeviwo katã ɖe mia ŋuti le tanye. Dzi nadzɔ mi, eye mitso aseye; elabena miaƒe fetu sɔ gbɔ le dziƒo.” (Mateo 5:11, 12) Enyea dzidzɔ blibo be míakpɔ alesi Yehowa le míaƒe agbagbadzedzewo yramee esi míele ʋiʋlim sesĩe ɖo ta agbe mavɔ ƒe taɖodzinu la gbɔ.—Yohanes 17:3; Timoteo II, 4:7, 8; Hebritɔwo 11:8-10, 26, 35.
7. (a) Aleke woate ŋu akpe ɖe mía ŋu be míado dzii? (b) Abe Hiob ene la, aleke woate ŋu aɖo eteƒe na míi?
7 Yesu ŋutɔ hã do dzi “le dzidzɔ, si woɖo ɖi nɛ la ta.” (Hebritɔwo 12:1, 2) Ne míaƒe ŋku le Yesu ƒe dzideƒo ƒe kpɔɖeŋua dzi vevie la, míawo hã míate ŋu ado dzi! Yakobo gblɔ le eƒe agbalẽa ƒe nuwuwu be Yehowa ɖoa eteƒe na nuteƒewɔlawo geɖe. Yakobo gblɔ be: “Kpɔ ɖa, míeyɔa amesiwo doa dzi keŋ la be yayratɔwo. Miese Hiob ƒe dzidodo, eye miekpɔ Aƒetɔ la ƒe nuwuwu bena, Aƒetɔ la yɔ fũ kple dɔmetɔtrɔ kple nublanuikpɔkpɔ.” (Yakobo 5:11) Miɖo ŋku alesi woɖo Hiob ƒe nuteƒewɔwɔ teƒe nɛ esime wona eƒe lãme sẽ eye wòse vivi blibo kple eƒe lɔlɔ̃tɔwo le dzidzɔ me la dzi. Dzidodo nuteƒewɔwɔtɔe ate ŋu ahe dzidzɔ ma tɔgbe vɛ na wò hã le Mawu ƒe xexe yeye ƒe Paradiso si ŋugbe wòdo la me, wòanye dzidzɔ si le Yehowa subɔsubɔ me fifia taƒoƒo.
Nunya Didi
8. Aleke míawɔ akpɔ nunya vavãtɔ si wɔa dɔ, eye akpa kae gbedodoɖa wɔna le esia me?
8 Mawu ƒe Nya si míasrɔ̃ vevie kpakple eŋudɔwɔwɔ nyuie ana mawumenunya mí, si akpe ɖe mía ŋu míado dzi le tetekpɔwo me le Satana ƒe nuɖoanyi gbegblẽ sia si le kudɔ ƒom la me. Aleke míate ŋu aka ɖe edzi be míake ɖe nunya sia ŋu? Yakobo gblɔ na mí be: “Ne mia dometɔ aɖe le nunya hiãm la, neɖe kuku na Mawu, si na amewo katã faa, eye medoa ŋukpe ame o la, eye wòatsɔe anɛ. Ke neɖe kuku le xɔse me, eye megake ɖi aɖeke o; elabena amesi le ɖi kem la, eɖi ƒutsotsoe, si ya ƒona yina gbɔna la.” (Yakobo 1:5, 6) Ele be míado gbe ɖa vevie kple kakaɖedzi maʋãmaʋã be Yehowa ase míaƒe kukuɖeɖewo eye be aɖo wo ŋu le eya ŋutɔ ƒe ɣeyiɣi kple mɔ nyuitɔ dzi.
9. Aleke Yakobo ƒo nu tso mawumenunya kple eŋudɔwɔwɔ ŋui?
9 Mawumenunya nye nunana tso Yehowa gbɔ. Yakobo ƒo nu tso nunana sia ŋu be: “Nunana nyuiwo katã kple nunana blibowo katã la dziƒo wotso, tso kekeliwo ƒe Fofo la gbɔ, amesi gbɔ liɖɔɖɔ alo tɔtrɔ ƒe vɔvɔlidodo aɖeke meli o.” Emegbe Yakobo ƒo nu tso viɖe siwo le nunya vavãtɔ ƒe amesisusu me ŋu le eƒe agbalẽa me be: “Amekae nye nunyala kple nugɔmesela le mia dome mahã? Eya netsɔ agbenɔnɔ nyui fia eƒe dɔwɔwɔwo le nunya ƒe dɔmefafa me. . . . Nunya, si tso dziƒo la, gbã la eŋuti kɔna, emegbe la eƒe dɔme fana, efaa tu, elɔ̃na wogbea nya nɛ, nublanuikpɔkpɔ kple kutsetse nyuiwo yɔe fũ, medea vovo amewo dome o, alakpa mele eme o.”—Yakobo 1:17; 3:13-17.
10. Aleke alakpasubɔsubɔ to vovo na subɔsubɔ vavãtɔe?
10 Le alakpasubɔsubɔ ƒe xexemefiaɖuƒea me, eɖanye le Kristodukɔa alo dukɔ bubuwo me o, enye kɔnu na hameviwo zi geɖe be woadzi ha aɖewo, ase gbedodoɖa gbugbɔgagblɔwo, eye ɖewohĩ woase mawunya aɖe. Womedea dzi aɖeke ƒo be woaɖe gbeƒã mɔkpɔkpɔgbedasi o, elabena etsɔme mɔkpɔkpɔ nyui aɖeke mele subɔsubɔha akpa gãtɔ si o. Womeƒoa nu tso Mawu ƒe Mesia Fiaɖuƒea ƒe mɔkpɔkpɔ wɔnukua ŋu gbeɖe o alo wosea egɔme bubui kura. Yehowa gblɔ le Kristodukɔa me tɔwo ŋu le nyagblɔɖi me be: “Nye dukɔ wɔ vɔ̃ ƒomevi eve: wogblẽ nye, amesi nye tsi gbagbe vudo la ɖi, be woaɖe tsido na woawo ŋutɔ ɖokui, tsido, siwo gɔme ŋɔ, tsi mate ŋu anɔ wo me o.” (Yeremya 2:13) Nyateƒe ƒe tsi aɖeke mele wo si o. Dziƒonunya mele wo si o.
11, 12. (a) Aleke wòle be Mawu ƒe nunya naʋã míi? (b) Nuka ŋue Mawu ƒe nunya xlɔ̃ nu mí le?
11 Aleke wòheto vovo le Yehowa Ðasefowo dome enye si! Le ŋusẽ gã si Mawu na wo me, wotsɔ Eƒe Fiaɖuƒe si gbɔna ŋuti nyanyuia le anyigba dzi yɔm. Mawu ƒe Nya dzie nunya si woɖea gbeƒãe la nɔ te ɖo sesĩe. (Tsɔe sɔ kple Lododowo 1:20; Yesaya 40:29-31.) Le nyateƒe me la, wowɔa sidzedze vavãtɔ kple gɔmesese ŋudɔ nyuie le gbeƒãɖeɖe mía Mawu kple Wɔla la ƒe tameɖoɖo wɔnukuawo me. Ele be wòanye míaƒe didi be “[Mawu ƒe] lɔlɔ̃nu ƒe sidzedze nayɔ” hamea me tɔwo katã “fũ le gbɔgbɔ ƒe nunya kple gɔmesese katã me.” (Kolosetɔwo 1:9) Ne gɔmeɖoanyi sia li la, aʋã ame tsitsiwo kple ɖeviawo siaa be “[woazu] nyadziwɔlawo.”
12 “Nunya, si tso dziƒo” xlɔ̃ nu mí le nuvɔ̃ siwo ate ŋu ana Mawu makpɔ ŋudzedze ɖe mía ŋu o ŋuti. Yakobo gblɔ be: “Nɔvinye lɔlɔ̃tɔwo, minya esia: Amesiame naɖe abla le nusese me, nanɔ blewu le nuƒoƒo me, nanɔ blewu hã le dziku me; elabena ame ƒe dziku mewɔa Mawu ƒe nu dzɔdzɔe o.” Ẽ, ele be míaɖe abla, míadi vevie be míase Mawu ƒe aɖaŋuɖoɖo ahawɔ eŋudɔ. Gake ele be míanɔ ŋudzɔ ɖe “ŋutinu sue” ma si nye aɖe la ŋudɔmawɔmawɔ nyuie ŋu. Aɖe ate ŋu ato adegbeƒoƒo, ameŋunya manyomanyo, alo ɖokuiŋudzenyawo gbɔgblɔ me atɔ dzo “ave gã” aɖe, le kpɔɖeŋunyagbɔgblɔ nu. Eyata ele be míatu ʋuɖɔɖɔ kple ɖokuidziɖuɖu ɖo le míaƒe hadedewo katã me.—Yakobo 1:19, 20; 3:5.
13. Nukata wòle vevie be míaxɔ ‘nya si wodo ɖe mía me’ la?
13 Yakobo ŋlɔe be: “Eyata miɖe ɖiƒoƒo katã kple vɔ̃ɖinyenye geɖe fũ la ɖi, eye mitsɔ dɔmefafa xɔ nya, si wodo ɖe mia me, si ate ŋu aɖe mia luʋɔwo la.” (Yakobo 1:21) Esusɔ vie ko xexeme klẽŋu sia kple eƒe tɔnye-ko-nenyo, ŋutilãmenudidi ƒe adegbeƒoƒo, kple agbevlonɔnɔ nu nayi. “Ke amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” (Yohanes I, 2:15-17) Eyata aleke gbegbe wòle vevie enye si be míaxɔ ‘nya si wodo ɖe mía me’ la! Nunya si tso Mawu ƒe Nya me to vovo sã na xexeme sia si le kumɔ dzi la ƒe vɔ̃ɖinyenye. Míedi vɔ̃ɖinyenye ma ƒe ɖeke o. (Petro I, 2:1, 2) Ele be míaƒã nyateƒea lɔlɔ̃ kple xɔse sẽŋu ɖe míaƒe dziwo me ale be míaɖoe kplikpaa be míatra le Yehowa ƒe mɔ dzɔdzɔeawo dzi gbeɖe o. Gake ɖe Mawu ƒe Nya la sese ɖeɖe sɔ gbɔa?
“Nyadziwɔlawo” Zuzu
14. Aleke míawɔ anye ‘nyaselawo’ kple ‘edziwɔlawo?’
14 Míexlẽ le Yakobo 1:22 be: “Mizu nyadziwɔlawo, eye menye nyasela, siwo blea wo ɖokui ɖeɖeko o!” “Mizu nyadziwɔlawo”! Wote gbe ɖe nyati sia dzi le Yakobo ƒe agbalẽa me nyateƒe. Ele be míaɖo to, emegbe míawɔ nu “nenema pɛ.” (Mose I, 6:22) Ame geɖe gblɔna egbea be mawunya sese alo subɔsubɔkɔnu aɖewo wɔwɔ ɣeaɖewoɣi sɔ gbɔ, eye womegawɔa naneke wu ema o. Ðewohĩ woabui be ne yewonya nɔ ‘agbe nyui’ le yewoƒe dzidzenuwo nu ko evɔ. Gake Yesu Kristo gblɔ be: “Ne ame aɖe lɔ̃ bena, yeanɔ yonyeme la, negbe nu le eya ŋutɔ ɖokui gbɔ, ne wòatsɔ eƒe [fuwɔameti, NW] la, eye wòadze yonyeme.” (Mateo 16:24) Edze kɔte be ɖokuitsɔtsɔsavɔ ƒe nuwɔna kple dzidodo le Yesu ƒe kpɔɖeŋu sɔsrɔ̃ le Mawu ƒe lɔlɔ̃nu wɔwɔ me nye nusi wodi tso Kristotɔ vavãwo si. Le woawo gome la, Mawu ƒe lɔlɔ̃nu egbea sɔ kple ƒe alafa gbãtɔ me tɔ esime Yesu si wofɔ ɖe tsitre de se be: “Miheyi ɖawɔ dukɔwo katã me nɔlawo ne woanye nusrɔ̃lawo.” (Mateo 28:19, NW) Aleke nèle dɔ sia wɔmee?
15. (a) Kpɔɖeŋu kae Yakobo wɔ le alesi míate ŋu ava nye ‘nyadziwɔla’ kpɔdzidzɔwoe ŋu? (b) Nukata subɔsubɔ wɔwɔ abe kɔnu ko ene ɖeɖe mesɔ gbɔ o?
15 Ne míeyi edzi dzro Mawu ƒe Nya la me la, ate ŋu anɔ abe ahuhɔ̃e ene aɖe amesiwo tututu míenye afia. Yakobo gblɔ be: “Amesi kpɔ se blibo, si nye ablɔɖese la me, eye wònɔ edzi la, eya menye nyasela, si ŋlɔa nu be o, ke boŋ dɔ ƒe wɔla, eye woayra eyama le eƒe nuwɔwɔ me.” (Yakobo 1:23-25) Ẽ, anye ‘nyadziwɔla’ kpɔdzidzɔ. Hekpe ɖe eŋu la, ele vevie be míanye míaƒe Kristotɔ ƒe agbenɔnɔ ƒe akpa ɖesiaɖe ‘dzi wɔlawo.’ Mele be míable mía ɖokui gbeɖe abu be subɔsubɔ abe kɔnu wɔwɔ ene ɖeɖe sɔ gbɔ o. Yakobo xlɔ̃ nu mí be míawɔ tadedeagu vavãtɔ ƒe akpa aɖewo siwo ɖewohĩ Kristotɔ dovevienuwo gɔ̃ hã agblẽ ɖi la dzi. Eŋlɔe be: “Mawusubɔsubɔ, si ŋuti kɔ, eye ɖiƒoƒo aɖeke mele eŋu le Mawu Fofo la ŋku me o la, enye si bene, woakpɔ tsyɔ̃eviwo kple ahosiwo ta le woƒe xaxa me, eye woadzra ame ɖokui ɖo ɖi maƒomaƒoe tso xexeame.”—Yakobo 1:27.
16. Mɔ kawo nue Abraham zu ‘Yehowa xɔlɔ̃’ le, eye aleke míawɔ Wòazu mía xɔlɔ̃?
16 Gbɔgblɔ ko be ‘Mexɔ Mawu dzi se’ mesɔ gbɔ o. Abe alesi Yakobo 2:19 de dzesii ene la: “Wò la èxɔnɛ sena bena, Mawu ɖekae li; èwɔe nyuie, gbɔgbɔ vɔ̃wo hã xɔnɛ sena, eye wodzona nyanyanya.” Yakobo te gbe ɖe edzi be “xɔse hã, ne dɔwɔwɔwo mele eŋu o la, enye nu kuku le eɖokui me,” eye wòhe susu yi Abraham dzi be: “Xɔse wɔ dɔ kpe ɖe eƒe dɔwɔwɔwo ŋu, eye wotsɔ dɔwɔwɔwo wɔ xɔse la blibo.” (Yakobo 2:17, 20-22) Abraham ƒe dɔwɔwɔwo ƒe ɖewoe nye gbɔdzɔe nana eƒe ƒometɔwo, amedzrowɔwɔ, dzadzraɖo ɖe Isak tsɔtsɔ sa vɔe ŋu, kple ‘gbeƒãɖeɖe’ Mawu ƒe ŋugbedodo le “du, si gɔmeɖoɖoanyi li na” si nye etsɔme Mesia Fiaɖuƒea ŋuti dzixɔse maʋãmaʋã ŋu le ‘gaglãgbe.’ (Mose I, 14:16; 18:1-5; 22:1-18; Hebritɔwo 11:8-10, 13, 14; 13:2) Eyata ‘wova yɔ’ Abraham wòsɔ be ‘Yehowa xɔlɔ̃.’ (Yakobo 2:23) Woate ŋu abu míawo hã ‘Yehowa xɔlɔ̃woe’ ne míeɖea gbeƒã míaƒe xɔse kple mɔkpɔkpɔ ɖe eƒe dzɔdzɔenyenye Fiaɖuƒe si gbɔna la me.
17. (a) Nukata ‘wotso dzɔdzɔenyenye ƒe afia’ na Raxab, eye aleke woɖo eteƒe nɛ? (b) Ame gbogbo siwo va ‘zu nyadziwɔla’ kawo ƒe ŋkɔwoe Biblia yɔ? (d) Aleke woɖo eteƒe na Hiob, eye nukatae?
17 Nyateƒee, “wotsɔ dɔwɔwɔwo tso afia na” amesiwo zu “nyadziwɔlawo” ke “menye xɔse ɖeɖekoe o.” (Yakobo 2:24) Raxab nye amesi tsɔ dɔwɔwɔwo kpe ɖe eƒe xɔse ŋu le “nya” si wòse le Yehowa ƒe nutsuwɔwɔwo ŋu ta. Etsɔ Israel-vi ŋkutsalawo ɣla eye wòkpe ɖe wo ŋu wosi, emegbe eƒo fofoa ƒemetɔwo nu ƒu hena wo takpɔkpɔ. Aleke gbegbe dzi adzɔe le tsitretsitsia me enye si ne wòse be yeƒe xɔse si dzi yetsɔ dɔwɔwɔwo ɖo kpee la na yezu Mesia la mama! (Yosua 2:11; 6:25; Mateo 1:5) Hebritɔwo ta 11 yɔ ame gbogbo bubu aɖewo siwo ‘zu nyadziwɔlawo’ le woƒe xɔse ɖeɖefia me, eye woaɖo eteƒe na wo geɖe. Mele be míaŋlɔ Hiob hã be o, amesi gblɔ le tetekpɔ sesẽ me be: “Woakafu Yehowa ŋkɔ!” Abe alesi míede dzesii xoxo ene la, eƒe xɔse kple dɔwɔwɔwo na woɖo eteƒe nɛ geɖe. (Hiob 1:21; 31:6; 42:10; Yakobo 5:11) Nenema ke míaƒe dzidodo le esi míenye “nyadziwɔlawo” ta ana Yehowa nakpɔ ŋudzedze ɖe mía ŋu.
18, 19. Aleke nɔvi siwo wote ɖe anyi ɣeyiɣi didi la wɔ ‘zu nyadziwɔlawoe,’ eye yayra kawoe woƒe dɔwɔwɔwo he vɛ?
18 Amesiwo do dzi geɖe le ƒeawo me dometɔ aɖewoe nye mía nɔvi siwo le Ɣedzeƒe Europa. Fifia si woɖe mɔxenu geɖe ɖa la, amesiawo ‘zu nyadziwɔlawo’ le woƒe nɔnɔme yeyea me nyateƒe. Dutanyanyuigblɔlawo kple mɔɖela siwo tso dukɔ siwo ɖe liƒo kple wo me ʋu yi be woakpe asi ɖe nufiafia, kple ɖoɖowɔwɔ ŋu. Finland-lɔdzedɔwɔƒea kple Gbetakpɔxɔ Habɔbɔa ƒe alɔdzedɔwɔƒe bubu siwo tsɔ afima la ɖo xɔtula bibiwo ɖa, eye xexeame katã ƒe nɔviwo ƒe habɔbɔa dzɔ ga wotsɔ tu alɔdzedɔwɔƒe kple Fiaɖuƒe Akpata yeyewoe.—Tsɔe sɔ kple Korintotɔwo II, 8:14, 15.
19 Aleke gbegbe nɔvi mawo siwo wote ɖe anyi ɣeyiɣi didi la hã tsɔ dzo ɖe dɔa ŋu le gbeadzi enye si! Le kpɔɖeŋunyagbɔgblɔ nu la, wole ‘dɔ wɔm sesĩe hele agbagba dzem vevie’ be yewoawɔ mɔnukpɔkpɔ siwo menɔ anyi le ‘ɣeyiɣi sesẽawo’ me o ŋudɔ. (Timoteo I, 4:10; Timoteo II, 4:2) Le kpɔɖeŋu me, le April si va yi me le Albania, afisi ameteteɖeanyi ŋutasesẽtɔe nu sẽ le ŋutɔ va yi la, ŋkeke etɔ̃ pɛ ko wotsɔ mã Fiaɖuƒe Ŋuti Nya si ƒe tanyae nye “Nukata Fukpekpe Le Xexeame Alea Gbegbe Ðo?” siwo katã woɖo ɖe wo. Esia nye tɔtrɔyi nyui aɖe si wowɔ le Yesu ƒe ku ƒe Ŋkuɖodzi si ame 3,491 de la megbe—wowu woƒe gbeƒãɖela 538 zi geɖe.
20. Nukae nyitsɔ laa ƒe Ŋkuɖodzivalawo ƒe xexlẽme ɖe fia, eye aleke míate ŋu akpe ɖe ame geɖe ŋui?
20 Dukɔ bubuwo hã kpɔ xexlẽme ɖedzesi aɖe kpe ɖe Ŋkuɖodzivalawo ƒe xexlẽme ŋu, si dzi ɖe edzi le nyitsɔ laa ƒewo me wu 10,000,000. Esi Ŋkuɖodzia vava kple eteƒe kpɔkpɔ do ŋusẽ ame yeyewo le teƒe geɖe ta la, ‘wova le nyadziwɔlawo zum.’ Ðe míate ŋu ade dzi ƒo na ame yeye siwo le ha dem kpli mí dometɔ geɖe be woadze na mɔnukpɔkpɔ ma?
21. Le ɖekawɔwɔ me kple míaƒe ƒea ƒe mawunyakpukpuia la, nukae wòle be míawɔ, eye kple taɖodzinu ka?
21 Abe ƒe alafa gbãtɔ me Kristotɔ dovevienu mawo, kple ame bubu geɖe tso ɣemaɣi dzi ene la, mina míaɖoe kplikpaa aʋli sesĩe ati agbe mavɔ ƒe ‘taɖodzinu la yome,’ eɖanye Dziƒofiaɖuƒea me alo ete le anyigba dzie wòanye o. (Filipitɔwo 3:12-14) Viɖe le agbagba ɖesiaɖe si míadze be míaƒe asi nasu taɖodzinu ma dzi la me. Menye fifiae nye ɣeyiɣi si míazu nyaselawo ɖeɖeko o, ke enye ɣeyiɣi si ƒo bubu ɖesiaɖe ta si me ‘míasẽ ŋu awɔ dɔ’ le. (Xagai 2:4; Hebritɔwo 6:11, 12) Esi míexɔ ‘nya si wodo ɖe mía me’ ta la, mina míanye ‘nyadziwɔla kpɔdzidzɔwo’ fifia eye míayi edzi ɖaa tegbee.
Aleke Nàɖo Wo Ŋui?
◻ Aleke míate ŋu ado dzi kple dzidzɔe?
◻ Nukae nye “nunya, si tso dziƒo” la, eye aleke míate ŋu adii?
◻ Nukata wòle be ‘míazu nyadziwɔlawo, ke menye nyaselawo ɖeɖeko o’?
◻ Nyatakaka kawoe le be wòaʋã mí be míazu “nyadziwɔlawo”?
[Nɔnɔmetata si le axa 17]
Mina míawo hã míaʋu míaƒe dzi na Mawu ƒe nufiafia
[Nɔnɔmetata si le axa 18]
Woɖo Hiob ƒe nuteƒewɔwɔ teƒe nɛ esi wogaɖoe te wòkpɔ dzidzɔ blibo le agbe me kple lɔlɔ̃tɔwo