Xlẽ Mawu Ƒe Nya La Eye Nàsubɔe Le Nyateƒe Me
“Yehowa, fia wò mɔm, ne mazɔ le wò nyateƒe la me.”—PSALMO 86:11.
1. Nya kae magazine sia ƒe tata gbãtɔ gblɔ le nyateƒe ŋutɔŋutɔ ŋu?
YEHOWA naa kekeli kple nyateƒe mí. (Psalmo 43:3) Ena ŋutete mí hã be míaxlẽ eƒe Nya, Biblia la, eye míasrɔ̃ nyateƒe la. Magazine sia ƒe tata gbãtɔ—July 1879 tɔ—gblɔ be: “Aʋatso ƒe gbe wuwlui damawo ƒo xlã nyateƒe, si le abe seƒoƒo sue aɖe si le agbe le gbedadaƒo ene la hevu tsyɔe kloe. Ne àkpɔe la, ke ele be nànɔ ŋudzɔ ɣesiaɣi. Hafi nàkpɔ eƒe anidzedze la, ke ele be nàgá aʋatso ƒe gbe wuwlui kple nyaɖekameléleɖeasi ƒe ŋuveawo ɖa le eŋu hafi. Ne èdi be wòanye ye tɔ la, ke ele be nàbɔbɔ ahoe. Mègana nyateƒea ƒe seƒoƒo ɖeka nasɔ gbɔ na wò o. Ne ɖe ɖeka sɔ gbɔ la, anye ne womawɔ bubuwo akpe ɖe eŋu o. Yi edzi nanɔ ehom, eye nàdi bubuwo akpee.” Mawu ƒe Nya la xexlẽ kple esɔsrɔ̃ naa sidzedze vavãtɔ sua mía si eye míezɔna le eƒe nyateƒe la me.—Psalmo 86:11.
2. Nukae dzɔ esime Ezra kple ame bubuwo xlẽ Mawu ƒe Se la na Yudatɔwo le blema Yerusalem?
2 Esi wogbugbɔ Yerusalem-gliawo tso le ƒe 455 D.M.Ŋ. me la, nunɔla Ezra kple ame bubuwo xlẽ Mawu ƒe Sea na Yudatɔwo. Agbadɔŋkekenyui dodzidzɔname aɖe kplɔ esia ɖo, woʋu nuvɔ̃wo me, eye woƒo eta kple ‘nubabla aɖe.’ (Nexemya 8:1–10:1) Míexlẽ be: “Woxlẽ Mawu ƒe segbalẽ la eme kɔ, eye woɖe eme, ale be wose nusi woxlẽ la gɔme.” (Nexemya 8:8) Ame aɖewo gblɔ be Yudatɔwo mese Hebrigbe tututu o eye be wogbugbɔe gblɔ ɖe Aramgbe me na wo. Gake menye gbea gbɔgblɔ eme nakɔ dzro ko fiam mawunyakpukpui la le o. Ezra kple ame bubuwo ɖe Sea me ale be dukɔa nate ŋu ase eƒe gɔmeɖosewo gɔme ahatsɔ wo awɔ dɔe. Kristotɔwo ƒe agbalẽwo kple kpekpewo hã na Mawu ƒe Nya la ‘me kɔna.’ Nenema ke hamemegã siwo woɖo, amesiwo “nya nufiafia” la, hã wɔna.—Timoteo I, 3:1, 2; Timoteo II, 2:24.
Viɖe Mavɔwo
3. Viɖe siwo wokpɔ tso Biblia xexlẽ me dometɔ aɖewo ɖe?
3 Ne Kristotɔwo ƒe ƒomewo xlẽ Biblia ɖekae la, anɔ eme godoo be woakpɔ viɖe mavɔwo. Wova nyaa Mawu ƒe sewo nyuie eye wosrɔ̃a nyateƒe si ku ɖe nufiafiawo, nyagblɔɖinyawo, kple nyati bubuwo ŋu. Ne woxlẽ Biblia ƒe akpa ɖe vɔ la, ƒomea ƒe ta ate ŋu abia be: Ŋusẽ kae wòle be esia nakpɔ ɖe mía dzi? Mɔ ka nue esia do ƒome kple Biblia ƒe nufiafia bubuwo le? Aleke míate ŋu azã nya vevi siawo le gbeƒãɖeɖe nyanyuia mee? Sidzedze geɖe wu sua ƒomea si ne wole Biblia xlẽm eye wozã Watch Tower Publications Index alo nyadiƒe bubuwo tsɔ wɔ numekukui. Woate ŋu awɔ numekuku le Insight on the Scriptures ƒe babla eveawo me wòaɖe vi na wo.
4. Aleke wogblɔ na Yosua be wòawɔ mɔfiame si woŋlɔ ɖe Yosua 1:8 la dzii?
4 Gɔmeɖose siwo tso Ŋɔŋlɔawo me ate ŋu afia mɔ mí le agbe me. Tsɔ kpe ɖe eŋu la, “ŋɔŋlɔ kɔkɔeawo” xexlẽ kple wo sɔsrɔ̃ ‘ate ŋu ana nunya mí hena ɖeɖekpɔkpɔ.’ (Timoteo II, 3:15) Ne míena Mawu ƒe Nya fia mɔ mí la, míayi edzi azɔ le eƒe nyateƒe la me eye míaƒe didi dzɔdzɔeawo ava eme. (Psalmo 26:3; 119:130) Gake ele be míadi gɔmesese abe alesi Yosua si va xɔ ɖe Mose teƒe wɔe ene. Wogblɔ nɛ be megaɖe nu le “segbalẽ” la ŋu o, eye ele be wòaxlẽe zã kple keli. (Yosua 1:8) Esi wogblɔ na Yosua be megaɖe nu le “segbalẽ” la ŋu o la, efia be mele be wòadzudzɔ nya siwo naa nu me kɔna siwo le eme la gbɔgblɔ na ame bubuwo o. Sea xexlẽ zã kple keli fia be ele be Yosua nade ŋugble le eŋu, ele be wòasrɔ̃e. Apostolo Paulo ƒoe ɖe Timoteo nu nenema ke be ‘wòabu eŋu’—wòade ŋugble le—eƒe agbenɔnɔ, subɔsubɔdɔ, kple nufiafia ŋu. Esi Timoteo nye Kristotɔ hamemegã ta la, ele be wòaɖɔ ŋu ɖo vevie be eƒe agbenɔnɔ nanye kpɔɖeŋu eye be wòafia Ŋɔŋlɔawo me nyateƒea.—Timoteo I, 4:15.
5. Nukae hiã hafi míakpɔ Mawu ƒe nyateƒe la?
5 Mawu ƒe nyateƒea xɔ asi wu nusianu. Edidi bia be woaku eme, woaku kutri le Ŋɔŋlɔawo me kuku me. Ne míezu Nufiala Gãtɔ la ƒe nusrɔ̃vi siwo le abe ɖeviwo ene ko hafi nunya asu mía si eye míava se Yehowa vɔvɔ̃ bubutɔe gɔme. (Lododowo 1:7; Yesaya 30:20, 21) Le nyateƒe me la, ele be míatsɔ Ŋɔŋlɔawo aɖo kpe nyawo dzii. (Petro I, 2:1, 2) Yudatɔ siwo nɔ Beroia “ɖɔ ʋu wu amesiwo le Tesalonika, woawo la woxɔ nya la kple dzi faa, eye wole ŋɔŋlɔawo me dzrom gbesiagbe be, nusiawo [siwo Paulo gblɔ la] le eme hã.” Wokafu Beroiatɔwo ɖe esia wɔwɔ ta eye womeka mo na wo o.—Dɔwɔwɔwo 17:10, 11.
6. Nukata Yesu te ŋu ɖee fia be Ŋɔŋlɔawo me dzodzro meɖe vi na Yudatɔ aɖewo o?
6 Yesu gblɔ na Yudatɔ aɖewo be: “Miele ŋɔŋlɔawo me dzrom tsitotsito; elabena miesusu bena, miekpɔa agbe mavɔ le wo me, eye woamawo nye nusiwo le ɖase ɖim le ŋutinye; eye mielɔ̃ be, miava gbɔnye, bena miakpɔ agbe o.” (Yohanes 5:39, 40) Wotsɔ susu nyui dzro Ŋɔŋlɔawo mee—be woate ŋu afia mɔ yewo ne yewoakpɔ agbe. Le nyateƒe me la, Mesia ŋuti nyagblɔɖi siwo fia asi Yesu be eya dzie míato akpɔ agbe la le Ŋɔŋlɔawo me. Gake Yudatɔwo gbee. Eyata Ŋɔŋlɔawo me dzodzro meɖe vi aɖeke na wo o.
7. Nukae hiã hafi míase Biblia gɔme ɖe edzi, eye nukatae?
7 Hafi míase Biblia gɔme ɖe edzi la, míehiã Mawu ƒe gbɔgbɔ, alo dɔwɔŋusẽ, ƒe mɔfiafia. “Gbɔgbɔ la dzroa nuwo katã me kpɔna keke Mawu ƒe nu gogloawo me ke” be wòaɖe woƒe gɔmesese ɖe go. (Korintotɔwo I, 2:10) Wogblɔ na Kristotɔ siwo nɔ Tesalonika be ‘woado nuwo katã kpɔ’ le nyagblɔɖi siwo katã wose me. (Tesalonikatɔwo I, 5:20, 21) Esime Paulo ŋlɔ agbalẽ na Tesalonikatɔwo (le ƒe 50 M.Ŋ. me lɔƒo) la, Mateo ƒe Nyanyui la koe nye Hela Ŋɔŋlɔawo ƒe akpa si woŋlɔ ɖi xoxo. Eyata anɔ eme be Tesalonikatɔwo kple Beroiatɔwo ate ŋu ado nuwo katã kpɔ, to Hebri Ŋɔŋlɔ siwo gɔme woɖe ɖe Helagbe me wònye Septuagint la me dzodzro me. Ehiã be woaxlẽ Ŋɔŋlɔawo ahasrɔ̃e, eye nenemae wòle be míawo hã míawɔ.
Ele Vevie na Mí Katã
8. Nukata wòle be Biblia me sidzedze geɖe wu nanɔ hamemegã siwo woɖo la si?
8 Ele be Biblia me sidzedze geɖe wu nanɔ hamemegã siwo woɖo la si. Ele be ‘woanya nufiafia’ eye ele be ‘woalé nyateƒenya la me ɖe asi.’ Wogblɔ na dzikpɔla Timoteo be ‘wòawɔ nyateƒenya la ŋudɔ pɛpɛpɛ.’ (Timoteo I, 3:2; Tito 1:9; Timoteo II, 2:15) Dadaa Eunike kple mamaa Loide fia ŋɔŋlɔ kɔkɔeawoe tso vidzĩme, eye woƒã ‘xɔse alakpamanɔmee’ ɖe eme, togbɔ be fofoa nye dzimaxɔsetɔ hã. (Timoteo II, 1:5; 3:15) Ele be vifofo xɔsetɔwo nanyi wo viwo “le [Yehowa, NW] ƒe hehe kple nuxɔxlɔ̃ la me,” eye vevietɔ ele be “vi xɔsetɔ, siwo nu wometso be, wowɔa nu vlo alo womeɖoa to o la” nanɔ hamemegã siwo nye vifofowo si. (Efesotɔwo 6:4; Tito 1:6) Ekema nɔnɔme ka ke me míele o, ele be míabu alesi wòhiã be míaxlẽ Mawu ƒe Nya la, míasrɔ̃e, eye míatsɔe awɔ dɔe la nu vevii.
9. Nukata wòle be nàwɔ ɖeka kple hati Kristotɔwo asrɔ̃ Biblia?
9 Ele be míawɔ ɖeka kple haxɔsetɔwo hã asrɔ̃ Biblia. Paulo di be Tesalonika Kristotɔwo nadzro yeƒe aɖaŋuɖoɖoa me kple wo nɔewo. (Tesalonikatɔwo I, 4:18) Mɔ nyui aɖeke meli si dzi míato ase nyateƒea gɔme nyuie wu be míawɔ ɖeka kple nusrɔ̃la veviedola bubuwo adzro Ŋɔŋlɔawo me o. Lododo sia nye nyateƒe be: “Alesi wotsɔa ga nyrea gae la, nenema ame nyrea nɔviae.” (Lododowo 27:17) Dɔwɔnu si wotsɔ ga wɔ ate ŋu alé ɣebia ne womezãnɛ henyrenɛ o. Nenema ke wòhiã be míakpe ta edziedzi anyre mía nɔewo to sidzedze si míekpɔ tso Mawu ƒe Nya la me nyateƒea xexlẽ, esɔsrɔ̃, kple ŋugbledede le eŋu me la gbɔgblɔ na mía nɔewo me. (Hebritɔwo 10:24, 25) Tsɔ kpe ɖe eŋu la, esiae nye mɔ ɖeka si dzi míato akpɔ viɖe tso gbɔgbɔmekekeli ƒe keklẽwo me.—Psalmo 97:11; Lododowo 4:18.
10. Nukae wòfia be woazɔ le nyateƒe la me?
10 Ne míele Ŋɔŋlɔawo srɔ̃m la, míate ŋu ado gbe ɖa na Mawu wòasɔ abe alesi hakpala la wɔ ene be: “Ðo wò kekeli kple wò nyateƒe ɖa, ne woakplɔm.” (Psalmo 43:3) Ne míedi be Mawu nakpɔ ŋudzedze ɖe mía ŋu la, ele be míazɔ le eƒe nyateƒe la me. (Yohanes III, 3, 4) Esia bia be míawɔ ɖe eƒe nudidiwo dzi eye míasubɔe le nuteƒewɔwɔ kple anukwareɖiɖi me. (Psalmo 25:4, 5; Yohanes 4:23, 24) Ele be míasubɔ Yehowa le nyateƒe si woɖe fia le eƒe Nya la me eye wona eme kɔ le “dɔla nuteƒewɔla kple aɖaŋudzela” ƒe agbalẽwo me la me. (Mateo 24:45-47) Esia bia be Ŋɔŋlɔawo me sidzedze vavãtɔ nasu mía si. Ke aleke wòle be míaxlẽ Mawu ƒe Nya la ahasrɔ̃e? Ðe wòle be míadze exexlẽ gɔme tso Mose ƒe Agbalẽ Gbãtɔ ta 1, kpukpui 1, axlẽ agbalẽ 66-awo katã ɖe ɖoɖo nua? Ẽ, ele be Kristotɔ ɖesiaɖe si si Biblia bliboa le le wo degbe me la naxlẽe tso Mose ƒe Agbalẽ Gbãtɔ vaseɖe Nyaɖeɖefia. Eye ele be taɖodzinu si míatsɔ xlẽ Biblia kple Kristotɔwo ƒe agbalẽwo nanye be míadzi Ŋɔŋlɔawo me nyateƒe gbogbo si Mawu tsɔ na mí to “dɔla nuteƒewɔla” dzi la gɔmesese ɖe edzi.
Xlẽ Mawu ƒe Nya la Wòaɖi Sesĩe
11, 12. Nukata wòɖea vi be woaxlẽ Biblia le kpekpewo me wòaɖi sesĩe?
11 Ne míawo ɖeɖe ye li la, ɖewohĩ míaxlẽ nu ɖe tame. Gake le blemaɣeyiɣiwo me la, ame ŋutɔ xlẽa nu wòɖina sesĩe. Eyata esi Etiopiatɔ aƒedzikpɔla la nɔ eƒe tasiaɖam me yina la, nyanyuigblɔla Filipo se wònɔ Yesaya ƒe nyagblɔɖia xlẽm. (Dɔwɔwɔwo 8:27-30) Hebrigbe me nya si gɔme woɖe be “xlẽ nu” la gɔmee nye “yɔ nu.” Eyata mele be dzi naɖe le amesiwo mate ŋu axlẽ nu ɖe tame ahase nusi xlẽm wole gɔme o la ƒo be woayɔ nya ɖesiaɖe wòaɖi sesĩe o. Nu vevitɔe nye be míasrɔ̃ nyateƒea to Mawu ƒe Nya si woŋlɔ ɖi la xexlẽ me.
12 Eɖea vi be woaxlẽ Biblia le Kristotɔwo ƒe kpekpewo me wòaɖi sesĩe. Apostolo Paulo ƒoe ɖe eƒe hadɔwɔla Timoteo nu be: “Nɔ [agbalẽxexlẽ le dutoƒo, NW] kple nuxɔxlɔ̃ kple nufiafia dzi.” (Timoteo I, 4:13) Paulo gblɔ na Kolosetɔwo be: “Ne miexlẽ agbalẽ la vɔ la, miwɔe be, woaxlẽe le Laodikea hame hã, eye ne miawo hã miaxlẽ Laodikeatɔwo tɔ.” (Kolosetɔwo 4:16) Eye Nyaɖeɖefia 1:3 gblɔ be: “Woayra amesi le nyagblɔɖi sia ƒe nyawo xlẽm [sesĩe, NW] kple amesiwo le wo sem, eye wole nusiwo woŋlɔ ɖe eme la, dzram ɖo; elabena ɣeyiɣi la tu aƒe.” Eyata ele be dutoƒonuƒola naxlẽ mawunyakpukpuiwo tso Biblia me atsɔ aɖo kpe nya si gblɔm wòle na hamea dzi.
Tanyawo Zazã ƒe Nusrɔ̃mɔnu
13. Nukae nye Biblia me nyateƒewo sɔsrɔ̃ ƒe mɔnu si na woyia ŋgɔ wu, eye nukae ate ŋu akpe ɖe mía ŋu be míake ɖe mawunyakpukpuiwo ŋu?
13 Nusɔsrɔ̃ tso tanyawo ŋue nye mɔ nyuitɔ kekeake si dzi woato asrɔ̃ Ŋɔŋlɔawo me nyateƒea ayi ŋgɔe. Afisi Biblia me nyawo dze le siwo woɖo ɖe ŋɔŋlɔdzesiwo ƒe ɖoɖo nu le agbalẽ, ta, kple kpukpui si me wòdze le nu la na mawunyakpukpui siwo ku ɖe tanya aɖe ŋu kpɔkpɔ nɔa bɔbɔe. Eye woate ŋu atsɔ ŋɔŋlɔ siawo awɔ ɖeka kple wo nɔewo elabena Biblia la Ŋlɔla metsi tre ɖe eɖokui ŋu o. Etsɔ eƒe gbɔgbɔ kɔkɔe ʋã ŋutsu 40 wotsɔ ƒe alafa 16 sɔŋ ŋlɔ Biblia lae, eye wokpɔe ɣeyiɣi didi aɖee nye sia be tanyawo zazãe nye nyateƒea sɔsrɔ̃ ƒe mɔnu si nyo wu.
14. Nukata wòle be míasrɔ̃ Hebri kple Kristotɔwo ƒe Hela Ŋɔŋlɔawo ɖekae?
14 Ele be míaƒe ŋudzedzekpɔkpɔ ɖe Biblia me nyateƒea ŋu naʋã mí míaxlẽ Kristotɔwo ƒe Hela Ŋɔŋlɔawo kple Hebri Ŋɔŋlɔawo siaa ahasrɔ̃ wo. Esia aɖe alesi Hela Ŋɔŋlɔawo do ƒome kple Mawu ƒe tameɖoɖoe afia eye wòana Hebri Ŋɔŋlɔwo me nyagblɔɖiwo me nakɔ. (Romatɔwo 16:25-27; Efesotɔwo 3:4-6; Kolosetɔwo 1:26) New World Translation of the Holy Scriptures la kpena ɖe ame ŋu geɖe le go sia me. Mawusubɔla ɖeadzɔgbe siwo wɔ Biblia gbãtɔ me nyawo kple nɔnɔme si me woŋlɔ wo le kpakple eƒe alobalowo ŋuti sidzedze si dzi ɖe edzi ŋudɔ lae trɔ asi le ŋu. Biblia-srɔ̃gbalẽ siwo Yehowa na mí to “dɔla nuteƒewɔla kple aɖaŋudzela” dzi la hã le vevie ŋutɔ.
15. Aleke nàɖo kpe edzii be esɔ be míayɔ nya tso Biblia ƒe teƒe vovovowo?
15 Ðewohĩ ame aɖewo agblɔ be, ‘Míeyɔa Biblia me nya akpe geɖe ɖe miaƒe agbalẽwo me, gake nukata míeyɔa nya siawo tsoa teƒe vovovowo?’ Wotoa nyayɔyɔ tso Biblia ƒe agbalẽ 66-awo ƒe akpa vovovowo me hea susu yia ɖaseɖiɖi geɖe dzi tsɔ ɖoa kpe nufiafia aɖe ƒe nyateƒenyenye dzi le agbalẽawo me. Yesu ŋutɔ zã nufiamɔnu sia. Le eƒe Todzimawunya me la, eyɔ nya tso Hebri Ŋɔŋlɔawo me zi 21 sɔŋ. Le nuƒo ma me la, eyɔ nya tso Mose ƒe Agbalẽ Evelia me zi etɔ̃, eve tso Mose ƒe Agbalẽ Etɔ̃lia me, ɖeka tso Mose ƒe Agbalẽ Enelia me, ade tso Mose ƒe Agbalẽ Atɔ̃lia me, ɖeka tso Fiawo ƒe Agbalẽ Evelia me, ene tso Psalmowo me, etɔ̃ tso Yesaya, eye ɖeka tso Yeremya. Ðe Yesu to esia wɔwɔ me ‘dze agbagba be yeagblɔ nya sia nya koa’? Ao, elabena ‘efia nu wo abe amesi si ŋusẽ le ene, eye menye abe agbalẽfialawo ene o.’ Edzɔ nenema elabena Yesu tsɔ Mawu ƒe Nya si woŋlɔ ɖi ƒe ŋusẽ ɖo kpe eƒe nufiafia dzii. (Mateo 7:29) Nenema ke apostolo Paulo hã wɔ.
16. Ŋɔŋlɔ kawoe Paulo yɔ le Romatɔwo 15:7-13?
16 Le mawunyakpukpui si dze le Romatɔwo 15:7-13 me la, Paulo yɔ nya tso Hebri Ŋɔŋlɔawo ƒe akpa etɔ̃ me—Se la, Nyagblɔɖilawo, kple Psalmowo me. Eɖee fia be Yudatɔwo kple Trɔ̃subɔlawo siaa akafu Mawu, eye ele be Kristotɔwo naxɔ dukɔwo katã me tɔwo. Paulo gblɔ be: “Mixɔ mia nɔewo, abe alesi Kristo hã xɔ mi ene hena Mawu ƒe kafukafu. Elabena mele egblɔm bena, Yesu Kristo zu subɔla na aʋatsotso le Mawu ƒe nyateƒe ŋuti, bene wòali ke ŋugbedodo, siwo wodo na fofoawo la; eye bena trɔ̃subɔlawo kafu Mawu le eƒe nublanuikpɔkpɔ ŋuti, abe alesi woŋlɔ ɖi [le Psalmo 18:50] ene bena: ‘Esiaŋuti makafu wò le trɔ̃subɔlawo dome, eye wò ŋkɔ la madzi kafukafuha na.’ Eye wògagblɔ [le Mose V, 32:43] be: ‘Dzi nedzɔ mi trɔ̃subɔlawo hekpe ɖe eƒe dukɔ ŋuti.’ Eye wògagblɔ [le Psalmo 117:1] bena: ‘Mikafu Aƒetɔ la, mi trɔ̃subɔlawo katã! Mido vivi ɖe eŋuti, mi dukɔwo katã!’ Eye Yesaya [11:1, 10] gagblɔ bena: ‘Isai ƒe kè kple amesi atsi tre, bene yeaɖu fia ɖe xexemedukɔwo dzi la, ava; eyama xexemedukɔwo lakpɔ mɔ na.’ Ke mɔkpɔkpɔ ƒe Mawu la natsɔ dzidzɔ kple ŋutifafa katã ayɔ mi taŋ le xɔxɔse me, bene miakpɔ mɔkpɔkpɔ sɔ gbɔ fũ le [gbɔgbɔ] kɔkɔe ƒe ŋusẽ me.” Paulo to tanya zazã ƒe mɔnu sia dzi ɖe alesi woyɔa mawunyakpukpuiwo tsɔ ɖoa kpe Biblia me nyateƒewo dzii fia.
17. Blematɔwo ƒe nuwɔna kae sɔ kple alesi Kristotɔwo yɔa nya tso Biblia bliboa ƒe teƒe vovovowo?
17 Apostolo Petro yɔ nya tso agbalẽ ewo siwo le Se la, Nyagblɔɖilawo, kple Psalmowo me zi 34 ɖe eƒe lɛta gbãtɔ si tso gbɔgbɔ me la me. Petro yɔ nya tso agbalẽ etɔ̃ me zi ade le eƒe agbalẽ evelia me. Mateo ƒe Nyanyuia yɔ nya tso Mose ƒe Agbalẽ Gbãtɔ vaseɖe Maleaxi zi 122. Le Hela Ŋɔŋlɔawo ƒe agbalẽ 27-awo me la, woyɔ nya tso Mose ƒe Agbalẽ Gbãtɔ vaseɖe Maleaxi tẽ zi 320 eye wofia asi nya bubu alafa geɖe le Hebri Ŋɔŋlɔawo me. Le ɖekawɔwɔ me kple alesi Yesu wɔe eƒe apostolowo srɔ̃ la, ne egbegbe Kristotɔwo le nu srɔ̃m tso tanya aɖe ŋu le Ŋɔŋlɔawo me la, woyɔa nya tso Biblia bliboa ƒe teƒe vovovowo. Esia sɔ vevietɔ le ‘ŋkeke mamle’ siawo me, esime Hebri kple Hela Ŋɔŋlɔawo me nya akpa gãtɔ le eme vam. (Timoteo II, 3:1) “Dɔla nuteƒewɔla” la zãa Biblia alea le eƒe agbalẽwo me, gake metsɔa nya bubuwo kpea Mawu ƒe Nya la alo ɖea ɖewo le eme gbeɖe o.—Lododowo 30:5, 6; Nyaɖeɖefia 22:18, 19.
Zɔ le Nyateƒea me Ɣesiaɣi
18. Nukata wòle be ‘míazɔ le nyateƒe la me’?
18 Mele be míaɖe nya aɖeke le Biblia me o, elabena Kristotɔwo ƒe nufiafia siwo le Mawu ƒe Nya la me katãe nye “nyateƒe la” alo “nyanyuie la ƒe nyateƒe.” Wɔwɔ ɖe nyateƒe sia dzi—‘zɔzɔ’ le eme—le vevie hena ɖeɖekpɔkpɔ. (Galatiatɔwo 2:5; Yohanes II, 4; Timoteo I, 2:3, 4) Esi Kristotɔnyenye nye “nyateƒemɔ” ta la, to kpekpe ɖe ame bubuwo ŋu le eme dɔwo dodo ɖe ŋgɔ me la, míeva zua “hadɔwɔlawo na nyateƒe la.”—Petro II, 2:2; Yohanes III, 8.
19. Aleke míate ŋu ‘ayi edzi azɔ le nyateƒe la mee’?
19 Ne ‘míayi edzi azɔ le nyateƒea me’ la, ke ele be míaxlẽ Biblia eye míawɔ gbɔgbɔmekpekpeɖeŋu si Mawu naa mí to “dɔla nuteƒewɔla” dzi la ŋudɔ. (Yohanes III, 4) Mina míawɔ esia ɖe mía ŋutɔwo míaƒe nyonyo ta ale be míate ŋu afia nu ame bubuwo tso Yehowa Mawu, Yesu Kristo, kple Mawu ƒe tameɖoɖo ŋu. Eye mina míada akpe be Yehowa ƒe gbɔgbɔ kpena ɖe mía ŋu míesena eƒe Nya la gɔme eye míete ŋu subɔnɛ le nyateƒe me.
Aleke Nàɖo Wo Ŋui?
◻ Biblia xexlẽ ƒe viɖe siwo nɔa anyi ɖaa la dometɔ aɖewo ɖe?
◻ Nukata wòle be míawɔ ɖeka kple haxɔsetɔwo asrɔ̃ Biblia?
◻ Nukata wòsɔ be míayɔ nya tso Biblia bliboa ƒe teƒe vovovowo?
◻ Nukae wòfia be ‘míazɔ le nyateƒe la me,’ eye aleke míate ŋu awɔe?
[Nɔnɔmetata si le axa 17]
Dzilawo, mifia Ŋɔŋlɔawo mia viwo
[Nɔnɔmetata si le axa 18]
Le Yesu ƒe Todzimawunya me la, eyɔ nya tso Hebri Ŋɔŋlɔawo ƒe akpa vovovowo