Èle Dzadzraɖoɖi na Yehowa ƒe Ŋkekea?

“Yehowa ƒe ŋkeke gã la tu aƒe, etu aƒe, eye wòle du dzi ŋutɔ.” —ZEFANYA 1:14.

 1. Aleke Ŋɔŋlɔawo ƒo nu tso Yehowa ƒe ŋkekea ŋui?

YEHOWA ƒe “ŋkeke gã dziŋɔ la” ava nuɖoanyi vɔ̃ɖi sia dzi kpuie. Ŋɔŋlɔawo gblɔ be Yehowa ƒe ŋkekea anye aʋawɔgbe, vivitidogbe, dɔmedzoedogbe, hiãgbe, xaxagbe, kpẽkugbe, kple aƒedoɖigbe. Gake amewo atsi agbe elabena “woaɖe amesiame, si ayɔ Yehowa ŋkɔ la.” (Yoel 3:3-5; Amos 5:18-20) Ẽ, Mawu atsrɔ̃ eƒe futɔwo ɣemaɣi eye wòaɖe eƒe amewo.

 2. Nukata wòle be nuwɔwɔ kpata ƒe susu nanɔ mía si le Yehowa ƒe ŋkekea ŋu?

² Mawu ƒe nyagblɔɖilawo tsɔ nuwɔwɔ kpata ƒe vevienyenye gblɔ Yehowa ƒe ŋkekea ŋu nyae. Le kpɔɖeŋu me, Zefanya ŋlɔ be: “Yehowa ƒe ŋkeke gã la tu aƒe, etu aƒe, eye wòle du dzi ŋutɔ.” (Zefanya 1:14) Nuwɔwɔ kpata hiã egbea wu elabena esusɔ vie ko Mawu ƒe Ametsrɔ̃la Gãtɔ, Fia Yesu Kristo, ‘nata eƒe yi ɖe ali eye wòaho le nyateƒe, ɖokuibɔbɔ, kple dzɔdzɔenyenye me.’ (Psalmo 45:4, 5) Èle dzadzraɖoɖi na ŋkeke ma?

Wokpɔ Mɔ na Nu Gãwo

 3. Mɔkpɔkpɔ kawoe nɔ Tesalonika Kristotɔ aɖewo si, eye susu eve kawo tae wowɔ vodada?

³ Mɔkpɔkpɔwo nɔ ame geɖe si le Yehowa ƒe ŋkekea ŋu gake womeva eme o. Kristotɔ gbãtɔ aɖewo siwo nɔ Tesalonika gblɔ be, ‘Yehowa ƒe ŋkeke la ɖo!’ (Tesalonikatɔwo II, 2:2) Gake susu vevi eve nɔ anyi siwo tae megogo ɣemaɣi o ɖo. Apostolo Paulo gblɔ wo dometɔ ɖeka be: “Ne wole gbɔgblɔm be, ŋutifafa kple anyinɔnɔ dedie li la, tete gbegblẽ ava lili wo.” (Tesalonikatɔwo I, 5:1-6) Mía ŋutɔwo míele nya mawo me vava lalam le “nuwuɣi” sia me. (Daniel 12:4) Kpeɖodzi bubu aɖe hã si afia be Yehowa ƒe ŋkekea ɖo la menɔ Tesalonikatɔawo si o, elabena Paulo gblɔ na wo be: “Mava o, negbe ɖeko megbedede tso Mawu gbɔ lava gbã.” (Tesalonikatɔwo II, 2:3) Esime Paulo ŋlɔ nya mawo (le ƒe 51 M.Ŋ. lɔƒo) la, “megbedede” tso Kristotɔnyenye vavãtɔ gbɔ medo keŋkeŋ o. Egbea la, ebɔ ɖe Kristodukɔa me míele kpɔkpɔm. Gake togbɔ be Tesalonikatɔ amesiamina nuteƒewɔla mawo siwo subɔ Mawu nuteƒewɔwɔtɔe yiɖase ku me ƒe mɔkpɔkpɔwo meva eme o hã la, wova xɔ teƒeɖoɖo le dziƒo mlɔeba. (Nyaɖeɖefia 2:10) Ne míelé nuteƒewɔwɔ me ɖe asi esi míele Yehowa ƒe ŋkekea lalam la, woaɖo eteƒe na míawo hã.

 4. (a) Nuka ŋue woyɔ Yehowa ƒe ŋkekea tɔ ɖo le Tesalonikatɔwo II, 2:1, 2? (b) Susu kawoe nɔ amesiwo woyɔna be Sɔlemeha ƒe Agbalẽnyalagãwo si le Kristo ƒe tɔtrɔgbɔ kple eŋu nyawo ŋuti?

⁴ Biblia yɔ “Yehowa ƒe ŋkeke gã la” tɔ ɖe “mía Aƒetɔ Yesu Kristo ƒe [anyinɔnɔ, NW]” ŋu. (Tesalonikatɔwo II, 2:1, 2) Susu vovovowo nɔ amesiwo woyɔna be Sɔlemeha ƒe Agbalẽnyalagãwo si le Kristo ƒe tɔtrɔgbɔ, eƒe anyinɔnɔ, kple eƒe Ƒe Akpe Ðeka Dziɖuɖua ŋu. (Nyaɖeɖefia 20:4) Le ƒe alafa evelia M.Ŋ. me la, mɔkpɔkpɔwo nɔ Papias si tso Hierapolis si be anyigba la awɔ nu nukutɔe le Kristo ƒe Ƒe Akpe Ðeka Dziɖuɖua me. Justin Martyr ƒo nu tso Yesu ƒe anyinɔnɔ ŋu zi geɖe eye wòkpɔ mɔ be Yerusalem si woagaɖo anyi mee Eƒe Fiaɖuƒea ƒe ta anɔ. Irenæus si tso Lyons fia nu be ne wotsrɔ̃ Roma-fiaɖuƒea vɔ la, Yesu ado woakpɔ, abla Satana, eye wòanɔ anyigba dzi Yerusalem aɖu fia.

 5. Nya kawoe agbalẽnyalagã aɖewo gblɔ le Kristo ƒe “Vava Zi Evelia” kple eƒe Ƒe Akpe Ðeka Dziɖuɖua ŋu?

⁵ Ŋutinyaŋlɔla Philip Schaff gblɔ be “dzixɔse si ɖe dzesi wu” le ɣeyiɣi si do ŋgɔ na Nikaea ƒe Aɖaŋuɖotakpekpea le ƒe 325 M.Ŋ. me enye “dzixɔse be Kristo si le ŋutikɔkɔe me kpakple ame kɔkɔe siwo wofɔ ɖe tsitre anɔ anyigba dzi aɖu dzi woakpɔ ƒe akpe ɖeka hafi amewo katã ƒe tsitretsitsi kple ʋɔnudɔdrɔ̃ nava.” A Dictionary of the Bible si James Hastings ŋlɔ gblɔ be: “Tertullian, Irenæus, kple Hippolytus kpɔ mɔ na [Yesu Kristo] ƒe Vava kokoko; gake nu bubu ŋue míaƒe tamesusu trɔna ɖo le Alexandria Agbalẽnyalagãwo gbɔ. . . . Esi Augustine tsɔ Sɔlemeha ƒe aʋawɔɣiwo sɔ kple Ƒe Akpe Ðeka Dziɖuɖua ta la, wotutu Vava Zi Evelia yi etsɔme ʋĩ.”

Yehowa ƒe Ŋkekea Kple Yesu ƒe Anyinɔnɔ

 6. Nukatae mele be míaƒo nya ta be Yehowa ƒe ŋkekea gbɔ didi ʋĩ o?

⁶ Nukpɔsusu totrowo na dzi ɖe le amewo ƒo, gake migana míasusu be Yehowa ƒe ŋkekea le ŋgɔgbe ʋĩ o. Yesu ƒe anyinɔnɔ makpɔmakpɔ si wotsɔ sɔ ɖe enu le Ŋɔŋlɔawo me la dze egɔme xoxo. Gbetakpɔxɔ kple Yehowa Ðasefowo ƒe agbalẽ bubu siwo kpe ɖe eŋu la naa Ŋɔŋlɔawo me kpeɖodzi zi geɖe be Kristo ƒe anyinɔnɔ dze egɔme le ƒe 1914 me.a Ekema nya kae Yesu gblɔ le eƒe anyinɔnɔ ŋu?

 7. (a) Nukawoe nye Yesu ƒe anyinɔnɔ kple nuɖoanyiawo ƒe nuwuwu ŋuti dzesia ƒe nudzɔdzɔ aɖewo? (b) Aleke míawɔ akpɔ ɖeɖe?

⁷ Amewo ɖo dze le Yesu ƒe anyinɔnɔ ŋu vevie do ŋgɔ teti na eƒe ku. Esi eƒe apostolo siwo nye Petro, Yakobo, Yohanes, kple Andrea se wògblɔ Yerusalem ƒe tsɔtsrɔ̃ ɖi megbe la, wobia be: “Ɣekaɣie nusiawo ava? Eye ka enye wò [anyinɔnɔ, NW] kple xexeame ƒe nuwuwu la ƒe dzesi?” (Mateo 24:1-3; Marko 13:3, 4) Le eŋuɖoɖo me la, Yesu gblɔe ɖi be aʋawɔwɔ, dɔwuame, anyigbaʋuʋu, kple yeƒe anyinɔnɔ kpakple nuɖoanyiawo ƒe nuwuwu ƒe ‘dzesia’ ƒe akpa bubuwo adzɔ. Egagblɔ be: “Amesi ke lado dzi vaseɖe nuwuwu la, eya lakpɔ ɖeɖe.” (Mateo 24:13) Ne míedo dzi nuteƒewɔwɔtɔe yiɖase agbe si míele fifia ƒe nuwuwu alo yiɖase nuɖoanyi vɔ̃ɖi sia ƒe nuwuwu la, míakpɔ ɖeɖe.

 8. Nukae wogblɔ be woawɔ do ŋgɔ na Yudatɔwo ƒe nuɖoanyia ƒe nuwuwu, eye nuka wɔm wole le nusia ŋu egbea?

⁸ Hafi nuwuwua nava la, nuwɔna vevi ɖedzesi aɖe ava eme le Yesu ƒe anyinɔɣi. Egblɔ le eŋu be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.” (Mateo 24:14, míawoe te gbe ɖe edzi.) Hafi Romatɔwo natsrɔ̃ Yerusalem eye Yudatɔwo ƒe nuɖoanyia nawu enu le ƒe 70 M.Ŋ. me la, Paulo gblɔ be “woɖe gbeƒã na nuwɔwɔwo katã le dziƒo te.” (Kolosetɔwo 1:23) Gake egbea la, Yehowa Ðasefowo le gbeƒãɖeɖedɔ si keke ta wu sã la wɔm “le xexe blibo la katã me.” Le ƒe ʋee siwo va yi me la, Mawu ʋu mɔa be woaɖi ɖase gã aɖe le Ɣedzeƒe Europa. Esi agbalẽtaƒewo kple dɔwɔƒe bubuwo le Yehowa ƒe habɔbɔa si le xexeame katã ta la, wole dzadzraɖoɖi be woadzi dɔwɔnawo ɖe edzi le ‘anyigbamamã siwo me womewɔ dɔ le kpɔ o’ gɔ̃ hã me. (Romatɔwo 15:22, 23) Ðe wò dzi ʋãa wò be nàwɔ tɔwò sinu aɖi ɖase hafi nuwuwua nava? Ne eʋãa wò la, Mawu ate ŋu ado ŋusẽ wò be nàkpɔ gome le dɔ si dze ŋgɔ mí me nyuie.—Filipitɔwo 4:13; Timoteo II, 4:17.

 9. Nya kae Yesu gblɔ si woŋlɔ ɖe Mateo 24:36?

⁹ Fiaɖuƒe gbeƒãɖeɖedɔ si wogblɔ ɖi kple Yesu ƒe anyinɔnɔ ƒe dzesia ƒe akpa bubuawo le eme vam fifi laa. Eyata nuɖoanyi vɔ̃ɖi sia ƒe nuwuwu gogo. Nyateƒee, Yesu gblɔ be: “Le ŋkeke ma kple gaƒoƒo ma ŋuti la, ame aɖeke menyae o; mawudɔla, siwo le dziƒowo, kple Vi la hã menyae o, negbe Fofonye ɖeka ko.” (Mateo 24:4-14, 36) Gake Yesu ƒe nyagblɔɖia ate ŋu akpe ɖe mía ŋu be míanɔ dzadzraɖoɖi na “ŋkeke ma kple gaƒoƒo ma.”

Wonɔ Dzadzraɖoɖi

10. Aleke míewɔ nya be míate ŋu anɔ ŋudzɔ le gbɔgbɔ me?

¹⁰ Be míatsi agbe le Yehowa ƒe ŋkeke gã la dzi la, ele be míanɔ ŋudzɔ le gbɔgbɔ me ahanɔ te sesĩe na tadedeagu vavãtɔ. (Korintotɔwo I, 16:13) Míenya be míate ŋu ado dzi nenema elabena ƒome vɔ̃mawu aɖe te ŋu wɔe eye wotsi agbe le Tɔɖɔɖɔ si tsrɔ̃ ame vɔ̃ɖiwo le ƒe 2370 D.M.Ŋ. me la me. Esi Yesu tsɔ ɣeyiɣi ma nɔ sɔsɔm kple eƒe anyinɔnɔ la, egblɔ be: “Sigbe alesi Noa ƒe ŋkekewo nɔ la, nenema ke lanye Amegbetɔvi la ƒe [anyinɔnɔ, NW]. Elabena alesi wowɔ le ŋkeke, si dze ŋgɔ na tɔɖɔɖɔ me, wole nu ɖum, eye wole nu nom, wole srɔ̃ ɖem, eye wole wo tsɔm na, bena woaɖe, vaseɖe ŋkeke, si dzi Noa yi ɖe aɖakaʋua me, eye womedze sii o, vaseɖe esime tɔɖɔɖɔ va, eye wòkplɔ wo katã yii la, nenema ke lanye Amegbetɔvi la ƒe [anyinɔnɔ, NW].”—Mateo 24:37-39.

11. Nukae Noa wɔ togbɔ be ŋutasesẽ nɔ anyi le eƒe ŋkekea me gake?

¹¹ Noa kple eƒe ƒomea nɔ xexe sẽŋuta me abe alesi míawo hã míele emee ene. Mawudɔla maɖoto siwo nye ‘Mawu vavã la ƒe viwo’ do amegbetɔŋutilã va ɖe nyɔnuwo hedzi vi ŋkɔgbegblẽxɔla siwo nye Nefilimwo—ŋutasẽla siwo ɖikeke mele eme o be wona ŋutasesẽ gadzi ɖe edzi. (Mose I, 6:1, 2, 4; Petro I, 3:19, 20) Gake ‘Noa zɔ kple Mawu vavã la’ le xɔse me. “Enye ame dzɔdzɔe kple ame maɖifɔ le eŋɔlimetɔwo dome”—dzidzime vɔ̃ɖi siwo nɔ anyi le eƒe ŋkekea me. (Mose I, 6:9-11) Ne míeɖo ŋu ɖe Mawu ŋu le gbedodoɖa me la, míawo hã míate ŋu awɔe nenema ke le xexe vɔ̃ɖi sẽŋuta sia me esi míele Yehowa ƒe ŋkekea lalam.

12. (a) Dɔ kae Noa wɔ kpe ɖe aɖakaʋua kpakpa ŋu? (b) Aleke amewo xɔ Noa ƒe gbeƒãɖeɖe lae, eye nukawoe do tso eme na wo?

¹² Wonya Noa nyuie be ekpa aɖakaʋu hena agbeɖeɖe le Tɔɖɔɖɔa me. Enye “dzɔdzɔenyenye ƒe gbeƒãɖela” hã, gake eŋɔlimetɔwo ‘mede dzesi’ gbedasi si Mawu de esi ‘o.’ Woɖu nu no nu, woɖe srɔ̃, wodzi viwo, eye wonɔ agbe si dze wo ŋu vaseɖe esime Tɔɖɔɖɔa kplɔ wo katã yii. (Petro II, 2:5; Mose I, 6:14) Womedi be yewoase nya aɖeke tso nya dzɔdzɔe gbɔgblɔ kple agbenyuinɔnɔ ŋu o, abe alesi dzidzime vɔ̃ɖi si li egbea gbe be yewomase nya si gblɔm Yehowa Ðasefowo le le “dzimetɔtrɔ yi Mawu gbɔ,” Kristo dzixɔse, dzɔdzɔenyenye, kple “ʋɔnudɔdrɔ̃, si le vava ge” ŋu o ene. (Dɔwɔwɔwo 20:20, 21; 24:24, 25) Nuŋlɔɖi aɖeke meli si fia ame xexlẽme si nɔ anyigba dzi esime Noa nɔ gbeƒã ɖem Mawu ƒe gbedasia o. Gake kakaɖedzi le nu ɖeka ŋu, eyae nye be anyigbadzinɔlawo ƒe xexlẽme dzi ɖe kpɔtɔ zi ɖeka le ƒe 2370 D.M.Ŋ. me! Tɔɖɔɖɔa tsrɔ̃ ame vɔ̃ɖiwo ɖa, amesiwo dzra ɖo ɖe Mawu ƒe nuwɔna ma ŋu koe wògblẽ ɖi—Noa kple eƒemetɔ adre bubuawo.—Mose I, 7:19-23; Petro II, 3:5, 6.

13. Ʋɔnudrɔ̃nya ka dzie Noa ka ɖo vevie, eye aleke wòwɔ nu wòsɔ ɖe enui?

¹³ Mawu megblɔ ŋkeke kple gaƒoƒo si dzi tututu Tɔɖɔɖɔa ava na Noa ƒe geɖe do ŋgɔ o. Gake esi Noa xɔ ƒe 480 la, Yehowa gblɔ be: “Nye gbɔgbɔ maganɔ amewo me boo o, elabena ŋutilã wonye le woƒe vodada me, eye woƒe agbe me ŋkekewo nanye ƒe alafa ɖeka kple blave!” (Mose I, 6:3) Noa ka ɖe Mawu ƒe ʋɔnudrɔ̃nya sia dzi. Esi wòxɔ ƒe 500 megbe la, “edzi Sem, Xam kple Yafet,” eye kɔnu siwo nɔ anyi ɣemaɣi ɖee fia be viaŋutsuawo xɔ ƒe 50 vaseɖe 60 hafi ɖe srɔ̃. Esi wogblɔ na Noa be wòakpa aɖakaʋu ne woatsɔ aɖe wo le Tɔɖɔɖɔa me la, edze ƒã be ŋutsuvi mawo kple wo srɔ̃wo kpe ɖe eŋu wowɔ dɔa. Anɔ eme be aɖakaʋua kpakpa do go ɖe subɔsubɔdɔ si Noa wɔ esi wònye “dzɔdzɔenyenye ƒe gbeƒãɖela” la nu, si na vovo menɔ eŋu kura le ƒe 40 vaseɖe 50 siwo do ŋgɔ na Tɔɖɔɖɔa me o. (Mose I, 5:32; 6:13-22) Le ƒe mawo katã me la, eya kple eƒe ƒomea wɔ nu le xɔse me. Esi míele gbeƒã ɖem nyanyuia la, mina míawo hã míaɖe xɔse afia eye míalala Yehowa ƒe ŋkekea.—Hebritɔwo 11:7.

14. Nya kae Yehowa gblɔ na Noa azɔ, eye nukatae?

¹⁴ Esi aɖakaʋua kpakpa nɔ enu wum la, ɖewohĩ Noa susui be Tɔɖɔɖɔa ɖo vɔ togbɔ be menya ɣeyiɣi si tututu wòava o gake. Mlɔeba Yehowa gblɔ nɛ be: “Esusɔ ŋkeke adre mana tsi nadza ɖe anyigba dzi ŋkeke blane kple zã hã blane.” (Mose I, 7:4) Ɣeyiɣi ma sɔ gbɔ be Noa kple eƒe ƒomea tsɔ kplɔ lã ƒomeviwo katã yi aɖakaʋua me eye woa ŋutɔwo hã ge ɖe eme hafi Tɔɖɔɖɔa va. Mehiã be míanya ŋkeke kple gaƒoƒo si dzi nuɖoanyi sia ƒe tsɔtsrɔ̃ adze egɔme o; wometsɔ lãwo ƒe agbetsitsi de mía si o, eye amegbetɔ siwo ate ŋu atsi agbe la le gegem ɖe kpɔɖeŋuɖakaʋu si nye Mawu ƒe amewo ƒe gbɔgbɔ me paradiso me xoxo.

“Minɔ Ŋudzɔ”

15. (a) Aleke nàɖe Yesu ƒe nya siwo le Mateo 24:40-44 me le wò ŋutɔ wò nyagbewo me? (b) Dɔ kae ɣeyiɣi si dzi tututu Yesu ahe Mawu ƒe hlɔ̃biabia vɛ manyamanya wɔna ɖe mía dzi?

¹⁵ Yesu gblɔ le eƒe anyinɔnɔ ŋu be: “Ekema ame eve woanɔ [dɔ wɔm le] abɔ me; woaxɔ ɖeka, eye woagblẽ ɖeka ɖi; nyɔnu eve woanɔ teƒo [anɔ nu tum]; woaxɔ ɖeka, eye woagblẽ ɖeka ɖi. Eyaŋuti minɔ ŋudzɔ, elabena mienya ŋkeke ka dzi mia Aƒetɔ la ava o. Ke minya esia bena, ɖe wònye aƒeatɔ anya zã ƒe ŋudzɔɣi, si me fiafitɔ ava la, anye ne anɔ ŋudzɔ, eye mana mɔe bena, wòadze kpɔ age ɖe eƒe aƒe me o. Eyaŋuti miawo hã misu te; elabena Amegbetɔvi la ava le gaƒoƒo, si ŋuti miebu o la me.” (Mateo 24:40-44; Luka 17:34, 35) Ɣeyiɣi si dzi tututu Yesu ava he Mawu ƒe hlɔ̃biabia vɛ si mele nyanya na mí o la na míenɔa ŋudzɔ eye wònaa mɔnukpɔkpɔ mí gbesiagbe be míaɖee afia be ɖokuitɔmadimadie míetsɔ le Yehowa subɔm.

16. Nukae adzɔ ɖe amesiwo ‘woagblẽ ɖi’ kple amesiwo “woaxɔ” dzi?

¹⁶ Amesiwo nya nyateƒea gake ɖokuitɔdidi ƒe agbenɔnɔ va vu tsyɔ wo dzi la anɔ amesiwo ‘woagblẽ ɖi’ atsrɔ̃ kpe ɖe ame vɔ̃ɖiwo ŋu la dome. Neva eme be míanɔ amesiwo “woaxɔ” dome, amesiwo tsɔ wo ɖokui na Yehowa bliboe eye wokpɔa ŋudzedze ɖe gbɔgbɔ me mɔnuɖoɖo siwo wònana to “dɔla nuteƒewɔla kple aɖaŋudzela” dzi ŋu nyateƒetɔe. (Mateo 24:45-47) Mina míatsɔ “lɔlɔ̃, si tso dzi dzadzɛ kple dzitsinya nyui kpakple xɔse, si me alakpa aɖeke mele o la me” asubɔ Mawu yiɖase nuwuwu.—Timoteo I, 1:5.

Dɔwɔwɔ Kɔkɔewo Le Vevie

17. (a) Nya kae wogblɔ ɖi le Petro II, 3:10? (b) Dɔwɔwɔ kple nuwɔna siwo ƒe dzi Petro II, 3:11 de ƒo dometɔ aɖewoe nye kawo?

¹⁷ Apostolo Petro ŋlɔ be: “[Yehowa] ƒe ŋkeke le vava ge abe fiafitɔ ene, le esime dziƒowo ava yi kple gbeɖeɖe; ke gɔmedzenuwo labi, eye woalólo le dzo me, eye anyigba kple eme dɔwɔwɔwo lafiã keŋ.” (Petro II, 3:10) Kpɔɖeŋu dziƒo kple anyigba la manɔ te ɖe Mawu ƒe dɔmedzoe heliheli ƒe dzobibi la nu o. Eyata Petro gagblɔ be: “Azɔ esi woalólo nusiawo katã la, ameka ƒomeviwo wòle na mi be, mianye le anyinɔnɔ kɔkɔe kple mawusosroɖa me.” (Petro II, 3:11) Dɔwɔwɔ kple nuwɔna siawo ƒe ɖewoe nye Kristotɔwo ƒe kpekpewo dede ɣesiaɣi, nyuiwɔwɔ na ame bubuwo, kple gomekpɔkpɔ le gbeƒãɖeɖe nyanyuia me alesi dze.—Mateo 24:14; Hebritɔwo 10:24, 25; 13:16.

18. Ne míeva le xexeame lɔ̃m la, ke nukae wòle be míawɔ?

¹⁸ “Anyinɔnɔ kɔkɔe kple mawusosroɖa” bia be ‘míadzra mía ɖokui ɖo ɖimaƒomaƒoe tso xexeame.’ (Yakobo 1:27) Ke ne xexe sia me ƒe nu va le dzi lém na mí ɖe? Anye be wole míablem de afɔku me le Mawu gbɔ to modzakaɖeɖe makɔmakɔwo didi alo haƒoƒo kple hadzidzi siwo dea xexe sia ƒe mawumavɔ̃mavɔ̃ ƒe gbɔgbɔ dzi la me. (Korintotɔwo II, 6:14-18) Ne nenemae la, ke mina míabia kpekpeɖeŋu Mawu le gbedodoɖa me bene míagatsrɔ̃ kple xexe sia o, ke boŋ Amegbetɔvi la nakpɔ ŋudzedze ɖe mía ŋu. (Luka 21:34-36; Yohanes I, 2:15-17) Ne míeɖe adzɔgbe na Mawu la, míadi godoo be míadze agbagba ɖesiaɖe atu ƒomedodo kplikplikpli ɖo kpakplii ahalée ɖe te ale be míanɔ dzadzraɖoɖi na Yehowa ƒe ŋkeke gã dziŋɔ la.

19. Nukatae Fiaɖuƒe gbeƒãɖelawo ƒe ha gã aɖe ate ŋu akpɔ mɔ be yewoatsi agbe le nuɖoanyi vɔ̃ɖi sia ƒe nuwuwu?

¹⁹ Mawuvɔ̃la Noa kple eƒe ƒomea to Tɔɖɔɖɔ si tsrɔ̃ blemaxexe la me. Ame dzɔdzɔewo tsi agbe le Yudatɔwo ƒe nuɖoanyia ƒe nuwuwu me le ƒe 70 M.Ŋ. me. Le kpɔɖeŋu me, apostolo Yohanes kpɔtɔ nɔ Mawu subɔsubɔdɔa wɔm vevie le ƒe 96-98 M.Ŋ. me lɔƒo esime wòŋlɔ Nyaɖeɖefia ƒe agbalẽa, eƒe Nyanyuigbalẽ nuŋlɔɖia, kple lɛta etɔ̃ siwo tso gbɔgbɔ me. Anɔ eme be ame akpe geɖe siwo xɔ xɔse vavãtɔ le ƒe 33 M.Ŋ. ƒe Pentekoste dzi la dometɔ geɖe tsi agbe le Yudatɔwo ƒe nuɖoanyia ƒe nuwuwu me. (Dɔwɔwɔwo 1:15; 2:41, 47; 4:4) Egbea la, Fiaɖuƒe gbeƒãɖelawo ƒe ha gã aɖe ate ŋu akpɔ mɔ be yewoatsi agbe le nuɖoanyi vɔ̃ɖi sia ƒe nuwuwu.

20. Nukata wòle be míanye ‘dzɔdzɔenyenye gbeƒãɖela’ veviedonulawo?

²⁰ Esi ɖeɖekpɔkpɔ age ɖe xexe yeyea me le mía ŋgɔ la, mina míanye ‘dzɔdzɔenyenye gbeƒãɖela’ veviedonulawo. Mɔnukpɔkpɔ ka gbegbee nye si wònye be míasubɔ Mawu le ŋkeke mamlɛ siawo me! Eye dzidzɔ kae nye si wònye be míafia mɔ amewo ayi egbegbe “aɖakaʋu” si nye gbɔgbɔ me paradiso si me Mawu ƒe amewo le la gbɔe! Ame miliɔn geɖe siwo le eme fifia neyi edzi woawɔ nuteƒe, woanɔ ŋudzɔ le gbɔgbɔ me, eye woanɔ dzadzraɖoɖi na Yehowa ƒe ŋkeke gã la. Gake nukae akpe ɖe mí katã ŋu be míanɔ ŋudzɔ?

[Etenuŋɔŋlɔ]

Aleke Nàɖo Wo Ŋui?

◻ Mɔkpɔkpɔ kawoe nɔ ame aɖewo si le Yehowa ƒe ŋkekea kple Kristo ƒe anyinɔnɔ ŋu?

◻ Nukatae míate ŋu agblɔ be Noa kple eƒe ƒomea nɔ dzadzraɖoɖi na Tɔɖɔɖɔa?

◻ Nukae adzɔ ɖe amesiwo ‘anɔ ŋudzɔ’ kple amesiwo manɔe o dzi?

◻ Nukata dɔwɔwɔ kɔkɔewo le vevie, vevietɔ esi Yehowa ƒe ŋkeke gã la ɖo vɔ?