Mawu ƒe Nya si tso Gbɔgbɔ me la Taʋiʋli Nuteƒewɔwɔtɔe

“Míegbea ŋukpenanu ɣaɣlawo boŋ, eye míezɔna le aɖaŋu vɔ̃ me o, eye míebaɖa mawunya hã o.” —KORINTOTƆWO II, 4:2.

 1. (a) Nukae va hiã ale be míate ŋu awɔ dɔ si ŋu woƒo nu tsoe le Mateo 24:14 kple 28:19, 20 la awu nu? (b) Amewo ƒe gbegbɔgblɔ neni mee Biblia nɔ esime ŋkeke mamlɛawo dze egɔme?

YESU KRISTO gblɔe ɖi le eƒe nyagblɔɖi xɔŋkɔ si ku ɖe eƒe anyinɔnɔ le fiaɖuƒeŋusẽ me kple nuɖoanyi xoxoa ƒe nuwuwu ŋu me be: “Woaɖe gbeƒã fiaɖuƒeŋutinya nyui sia afia amewo le xexe blibo la katã me, bena wòanye ɖaseɖiɖi na dukɔwo katã, eye ekema nuwuwu aɖo.” Egblɔ na eyomedzelawo hã be: “Miheyi ɖawɔ dukɔwo katã ne woanye nusrɔ̃lawo, . . . miafia wo bena, woawɔ nusiwo katã meɖo na mi la.” (Mateo 24:14; 28:19, 20) Nyagblɔɖi mawo me vava bia be woawɔ dɔ geɖe le Biblia gɔmeɖeɖe kple etata me, le nusi wòfia la fiafia amewo me, kple le kpekpeɖeŋu nana wo be woatsɔe awɔ dɔe le woƒe agbenɔnɔ me la me. Mɔnukpɔkpɔ ka gbegbee nye si wònye be míakpɔ gome le dɔ sia me! Kaka ƒe 1914 naɖo la, wota Biblia alo eƒe akpa aɖe ɖe gbegbɔgblɔ 570 me xoxo. Gake tso ɣemaɣi la, woɖe egɔme ɖe gbegbɔgblɔ geɖe kple gbetagbe gbogbo aɖewo me kpee, eye wona gɔmeɖeɖe siwo wu ɖeka va le gbegbɔgblɔ geɖe me.a

 2. Nukpɔsusu vovovo kawoe kpɔ ŋusẽ ɖe Biblia gɔmeɖelawo kple etalawo ƒe dɔa dzi?

² Enye dɔ sesẽ na gbegɔmeɖela ɖesiaɖe be wòaɖe nyawo gɔme tso gbe aɖe me ayi bubu me ale be exlẽlawo kple eselawo nate ŋu ase egɔme. Biblia-gɔmeɖela aɖewo na wònɔ susu me na wo vevie le woƒe dɔa wɔwɔ me be Mawu ƒe Nyae nya si gɔme ɖem yewole la nye. Alesi dɔ sia wɔwɔ na ame srɔ̃a nu geɖe la koe dzɔa dzi na ame bubuwo ya. Ðewohĩ woabu Biblia me nyawo be wonye blemadekɔnu nyui dzro aɖe ko. Le ame aɖewo gome la, mawusubɔsubɔe nye woƒe dɔwɔɖui, eye agbalẽ si me woŋlɔ ɖo be yewoe ɖe egɔme alo tae la tata nye nusi wowɔna tsɔ kpɔa wo ɖokui dzii. Edze ƒã be susu si wotsɔ wɔa dɔae la kpɔa ŋusẽ ɖe alesi wowɔnɛ dzi.

 3. Aleke Xexeme Yeye ƒe Biblia Gɔmeɖeɖe ƒe Kɔmiti la bu eƒe dɔae?

³ Nya sia si Xexeme Yeye ƒe Biblia Gɔmeɖeɖe ƒe Kɔmiti gblɔ la ɖe dzesi be: “Ŋɔŋlɔ Kɔkɔeawo gɔmeɖeɖe fia Yehowa Mawu ƒe susuwo kple nyawo gɔmeɖeɖe ɖe gbe bubu me . . . Nya si na wobua tame ŋutɔe esia nye. Agbalẽ sia gɔmeɖela siwo vɔ̃a Mawu, Ŋɔŋlɔ Kɔkɔeawo Ŋlɔla, helɔ̃nɛ la kpɔnɛ be agba le yewo dzi be yewoaɖe eƒe susuwo kple nyagbɔgblɔwo gɔme pɛpɛpɛ alesi woate ŋui. Wokpɔnɛ hã be exlẽla siwo nɔa te ɖe Mawu Dziƒoʋĩtɔ la ƒe Nya si tso gbɔgbɔ me ƒe gɔmeɖeɖe aɖe dzi be yewoakpɔ ɖeɖe mavɔ̃ la ƒe agba le yewo dzi. Agbanɔamedzi ƒe seselelãme vevi siae nɔ kɔmiti sia si me tɔwo siwo tsɔ wo ɖokui na ƒe geɖe la me wotsɔ ɖe New World Translation of the Holy Scriptures la gɔmee.” Kɔmiti la ƒe taɖodzinue nye be Biblia gɔmeɖeɖe aɖe nanɔ anyi si me kɔ eye egɔme nya se eye wòasɔ kple Hebri kple Hela gbe me tɔ gbãtɔwo ale gbegbe be wòanye nusi dzi woanɔ te ɖo atsi ɖe edzi le sidzedze vavãtɔ me.

Nukae Dzɔ ɖe Mawu ƒe Ŋkɔ Dzi?

 4. Aleke gbegbe Mawu ƒe ŋkɔa le vevie le Biblia mee?

⁴ Biblia ƒe taɖodzinu veviawo dometɔ ɖekae nye be wòakpe ɖe amewo ŋu woava nya Mawu vavã la. (Mose II, 20:2-7; 34:1-7; Yesaya 52:6) Yesu Kristo fia eyomedzelawo be woado gbe ɖa be Fofoa ƒe ŋkɔ “ŋuti nakɔ,” woawɔe kɔkɔe, alo woabui nu kɔkɔe. (Mateo 6:9) Mawu na wode eya ŋutɔ ƒe ŋkɔ Biblia me wòwu zi gbɔ zi 7,000. Edi be amewo nanya ŋkɔ ma kple Amesi tɔ ŋkɔa ƒe nɔnɔmewo.—Maleaxi 1:11.

 5. Aleke gbegɔmeɖela vovovowo ɖe Mawu ƒe ŋkɔa gɔmee?

⁵ Biblia-gɔmeɖela geɖe de bubu Mawu ƒe ŋkɔa ŋu anukwaretɔe eye wozãe ɣesiaɣi le woƒe nugɔmeɖeɖewo me. Gbegɔmeɖela aɖewo zãa Yahweh. Ame bubuwo yɔa Mawu ƒe ŋkɔa ɖe gbe si woa ŋutɔwo dona me gake wòsɔ kple alesi wòdze le Hebrigbe me nuŋɔŋlɔa me, si ate ŋu anye eyɔyɔ si wonya nyuie le ezazã ɣeyiɣi didi aɖe ta. New World Translation of the Holy Scriptures zã Yehowa zi 7,210 le eƒe kpukpuiawo ŋutɔ me.

 6. (a) Le ƒe siwo va yi nyitsɔ laa me la, nukae gbegɔmeɖelawo wɔ le teƒe siwo Mawu ƒe ŋkɔa dze le ŋu? (b) Aleke gbegbee nuwɔna sia keke tae?

⁶ Le ƒe siwo va yi nyitsɔ laa me la, togbɔ be Biblia-gɔmeɖelawo yia edzi ŋlɔa trɔ̃wo abe Baal kple Molex ene ƒe ŋkɔwo hã la, wova le Mawu vavã la ƒe ŋkɔa ɖem ɖa tso eƒe Nya si tso gbɔgbɔ me la ƒe gɔmeɖeɖewo me geɖe wu. (Mose II, 3:15; Yeremya 32:35) Le teƒe aɖewo abe Mateo 6:9 kple Yohanes 17:6, 26 ene la, Albaniagbe me gɔmeɖeɖe aɖe si womã wòde teƒe geɖe la ɖe Helagbe me nyagbɔgblɔ si wozã na “wò ŋkɔ” (si nye, Mawu ƒe ŋkɔ) gɔme ko be “wò,” abe ɖe womeƒo nu tso ŋkɔ aɖeke ŋu le mawunyakpukpui mawo me o ene. Le Psalmo 83:18 (kpukpui 19 le Eʋegbe Biblia me) la, The New English Bible kple Today’s English Version ɖe Mawu ŋutɔ ƒe ŋkɔ kple nusianu si fia be ŋkɔ le Mawu si ɖa le eme. Togbɔ be Mawu ƒe ŋkɔa dze le Hebri Ŋɔŋlɔawo ƒe gɔmeɖeɖe xoxowo me le gbegbɔgblɔ akpa gãtɔ me hã la, woɖenɛ ɖa le gɔmeɖeɖe yeyewo me zi geɖe alo wodenɛ axadzinuŋɔŋlɔwo ko me. Aleae wòle le Eŋlisigbe, kpakple gbegbɔgblɔ geɖe me le Europa, Afrika, Anyiehe Amerika, India, kple Pasifik-ƒukpowo dzi.

 7. (a) Nuka wɔm Afrika Biblia aɖewo gɔmeɖelawo le ɖe Mawu ƒe ŋkɔa ŋu? (b) Aleke nèbu le nusia ŋu?

⁷ Amesiwo ɖe Biblia gɔme ɖe Afrika-gbegbɔgblɔ aɖewo me la wɔ nusi yi ŋgɔ wu ema. Le esi teƒe be woatsɔ Ŋɔŋlɔawo me dzesideŋkɔ aɖe, abe Mawu alo Aƒetɔ ene, aɖo Mawu ƒe ŋkɔa teƒe la, wodea ŋkɔ siwo tso wo gbɔ mawusubɔsubɔdzixɔsewo me la eme. Le The New Testament and Psalms in Zulu (1986 tɔ) me la, wotsɔ ŋkɔ (uMvelinqangi) si Zulutɔwo nya be enye ‘blematɔgbui gã aɖe si wosubɔna to amegbetɔ tɔgbuiwo dzi’ la ƒe ŋkɔ ɖɔa li dzesideŋkɔ si nye Mawu (uNkulunkulu) le teƒe geɖe. Nyati aɖe si le magazine si nye The Bible Translator, October 1992 tɔ, me la ka nya ta be esi wonɔ dɔ wɔm tso Chichewa Biblia si woava yɔ be Buku Loyera ŋu la, gbegɔmeɖelawo tsɔ ŋkɔ Chauta ɖo Yehowa teƒe. Nyatia ɖe eme be Chauta nye “Mawu si wonya nyuie hedea ta agu na xoxoxo.” Ke hã amesiawo subɔa nusiwo woxɔ se be wonye ame kukuwo ƒe gbɔgbɔwo la hã. Ðe wònye nyateƒe be ne amewo ƒoa koko na “Ŋusẽkatãtɔ” aɖe ko la, ke ŋkɔ ɖesiaɖe si woanya yɔ na “Ŋusẽkatãtɔ” ma ko la, esɔ nyuie woatsɔ aɖo ŋkɔ Yehowa teƒe, eɖanye nuka ke wowɔna le woƒe tadedeagu me oa? Kura o! (Yesaya 42:8; Korintotɔwo I, 10:20) Ŋkɔ aɖe tsɔtsɔ ɖo Mawu ƒe ŋkɔ teƒe si awɔe be amewo nabu be yewoƒe blemadzixɔsewo nyo la mekpena ɖe wo ŋu be woate ɖe Mawu vavã la ŋu o.

 8. Nukata Mawu ƒe tameɖoɖo be yeana woanya yeƒe ŋkɔ la metrɔ o?

⁸ Esiawo katã metrɔ Yehowa ƒe tameɖoɖo be yeana woanya yeƒe ŋkɔ la alo do kplamatsee o. Biblia geɖe gali siwo me wode Mawu ƒe ŋkɔe le gbe siwo wodona le Europa, Afrika, Amerika-nyigbawo, Ɣedzeƒe, kple ƒukpowo dzi me. Yehowa Ðasefo siwo wu ame 5,400,000 hã li le dukɔ kple anyigbamamã 233 me, amesiwo tsɔa gaƒoƒo biliɔn ɖeka kple edzivɔ ƒoa nu tso Mawu vavã la ƒe ŋkɔ kple eƒe tameɖoɖo ŋu na ame bubuwo ƒe sia ƒe. Wotaa Bibliawo hemãa wo—esiwo me wozã Mawu ƒe ŋkɔa le—ɖe gbe siwo anyigbadzinɔla siwo ade 3,600,000,000 dona me, si ƒe ɖewoe nye Eŋlisigbe, Chinagbe, Russiagbe, Spaingbe, Portugalgbe, Fransegbe, kple Netherlandsgbe. Wotaa Biblia-srɔ̃gbalẽwo ɖe gbegbɔgblɔ siwo anyigbadzinɔla akpa gãtɔ dona me. Eteƒe madidi o Mawu ŋutɔ aɖe afɔ atsɔ ana nya si wògblɔ be dukɔwo ‘adze sii be yee nye Yehowa’ la nava eme ɖikekemanɔŋui.—Xezekiel 38:23.

Ne Wotsɔ Ame Ŋutɔ ƒe Dzixɔsewo Ðe Nu Gɔmee

 9. Aleke Biblia ɖee fiae be agba gã aɖe le amesiwo wɔa Mawu ƒe Nya la ŋudɔ dzi?

⁹ Agba gã aɖe le amesiwo ɖea Mawu ƒe Nya la gɔme kpakple amesiwo fianɛ dzi. Apostolo Paulo gblɔ le eya kple ehatiwo ƒe subɔsubɔdɔ ŋu be: “Míegbea ŋukpenanu ɣaɣlawo boŋ, eye míezɔna le aɖaŋu vɔ̃ me o, eye míebaɖa mawunya hã o, hafi boŋ míetsɔa nyateƒe ƒe ɖeɖefia ɖea mía ɖokui fiaa amewo katã ƒe dzitsinya le Mawu ƒe ŋku me.” (Korintotɔwo II, 4:2) Be woabaɖa nu fia be woatsɔ nu bubu alo nu manyomanyo aɖe atsakae wòatɔtɔ. Apostolo Paulo menɔ abe Israel ƒe kplɔla mawɔnuteƒe siwo nɔ anyi le Yeremya ƒe ŋkekeawo me, amesiwo Yehowa ka mo na le esi wogblɔ woawo ŋutɔ ƒe susuwo ɖe nya si Mawu gblɔ teƒe ta ene o. (Yeremya 23:16, 22) Gake nukae dzɔ le egbeɣeyiɣiwo me?

10. (a) Aleke seselelãme siwo menye nuteƒewɔwɔ na Mawu o kpɔ ŋusẽ ɖe gbegɔmeɖela aɖewo dzi le egbeɣeyiɣiawo mee? (b) Dɔ kae wova nɔ wɔwɔm si mesɔ o?

¹⁰ Le Xexemeʋa II wɔɣi la, mawunyaŋununyalawo kple osɔfowo ƒe kɔmiti aɖe wɔ ɖeka kple Nazi-dziɖuɖua le Germany wota “Nubabla Yeye” si ŋu wogbugbɔtrɔ asi le si me woɖe afisi woƒo nu nyuie tso Yudatɔwo ŋu le kple nusianu si fia be Yudatɔwo mee Yesu Kristo dzɔ tso la ɖa le. Nyitsɔ laa la, gbegɔmeɖela siwo wɔ dɔ le The New Testament and Psalms: An Inclusive Version ŋu la hã trɔ ɖe nu bubu ŋu, eye wodze agbagba be yewoaɖe nusianu si fia be Kristo ƒe ku ŋuti fɔbubua le Yudatɔwo dzi la ɖa le eme. Gbegɔmeɖela mawo bui hã be adzɔ dzi na exlẽla siwo hea zazɛ̃nya le nyɔnunyenye ŋu ne yewoƒo nu tso Mawu ŋu be enye Tɔ-Kple-Nɔ, ke menye Fofo o, kple ne woagblɔ be Yesu nye Mawu ƒe Vi, ke menye Viaŋutsu o (le Eŋlisigbe me). (Mateo 11:27) Wonɔ esia wɔwɔ dzi va ɖe srɔ̃nyɔnuwo ƒe ɖokuibɔbɔ na wo srɔ̃wo kple ɖeviwo ƒe toɖoɖo wo dzilawo ƒe gɔmeɖosea ɖa. (Kolosetɔwo 3:18, 20) Edze ƒã be gbegɔmeɖela mawo meɖoe abe alesi Paulo ɖoe kplikpaa be ‘yemabaɖa Mawu ƒe nya la o’ ene o. Wova ŋlɔ nusi nye gbegɔmeɖela ƒe dɔ la be hezu eŋlɔlawo, eye wonɔ agbalẽ siwo gblẽ ŋkɔ nyui si le Biblia ŋu tam tsɔ nɔ woa ŋutɔwo ƒe nukpɔsusuwo dzi dem.

11. Aleke Kristodukɔa ƒe nufiafiawo tsi tre ɖe nya si Biblia gblɔ le luʋɔ kple ku ŋui?

¹¹ Kristodukɔa ƒe sɔlemehawo katã fiaa nu be gbɔgbɔe amegbetɔ ƒe luʋɔ nye, be edona le ŋutilãa me le ku me, eye be mekuna o. Gake Biblia-gɔmeɖeɖe xoxo siwo li le gbegbɔgblɔ akpa gãtɔ me gblɔe kɔte be luʋɔwoe amegbetɔwo nye, be lãwo nye luʋɔwo, eye be luʋɔ la kuna. (Mose I, 12:5; 36:6; Mose IV, 31:28; Yakobo 5:20) Nya sia tɔtɔ osɔfowo.

12. Mɔ ka nue gɔmeɖeɖe aɖewo siwo do nyitsɔ laa tsyɔ nu Biblia ƒe nyateƒewo dzi le?

¹² Fifia gɔmeɖeɖe yeye aɖewo tsyɔ nu nyateƒea dzi. Alekee? Wogbea Hebrigbe me ŋkɔnya neʹphesh (luʋɔ) gɔmeɖeɖe tẽ le mawunyakpukpui aɖewo me. Le Mose I, 2:7 la, wote ŋu gblɔna be ame gbãtɔ la “te agbenɔnɔ” (le esi teƒe be woagblɔ be eva “zu luʋɔ gbagbe”). Alo le lãwo ƒe agbenɔnɔ gome la, ɖewohĩ woagblɔ be wonye “nuwɔwɔ” tsɔ wu be woagblɔ be wonye “luʋɔ.” (Mose I, 1:21) Le mawunyakpukpui aɖewo abe Xezekiel 18:4, 20 ene me la, wote ŋu gblɔna be “amesi” alo “ame ma” ye aku (ɖe “luʋɔ” teƒe). Ðewohĩ nya siawo ŋɔŋlɔ asɔ na gbegɔmeɖela la. Gake vi kae wòɖena na amesi le nyateƒea dim anukwaretɔe si ƒe susu trɔ ɖe Kristodukɔa ƒe nufiafia siwo metso Ŋɔŋlɔawo me o ŋu xoxo?b

13. Mɔ ka nue Biblia-gɔmeɖeɖe aɖewo ɣla Mawu ƒe tameɖoɖo na anyigba lae?

¹³ Esi gbegɔmeɖelawo—alo mawunyaŋununyala siwo toa woƒe dɔwo me—dzea agbagba be yewoaɖo kpe yewoƒe dzixɔse be ame nyuiwo katã yia dziƒo dzi ta la, woawo hã ate kpɔ be yewoaɣla nya si Biblia gblɔ tso Mawu ƒe tameɖoɖo na anyigba ŋu. Nya siwo le Psalmo 37:11 le gɔmeɖeɖe geɖe me xlẽ be ɖokuibɔbɔlawo anyi “anyigba la” dome. Woate ŋu aɖe nya (ʼeʹrets) si wozã le Hebrigbe me kpukpuia me la gɔme be “anyigba.” Gake Today’s English Version (si gɔme woɖe yi gbegbɔgblɔ bubu geɖe me) ya trɔe gblɔ kura. Togbɔ be woɖe Helagbe me nya ge gɔme le gɔmeɖeɖe sia me be “anyigba” zi 17 le Mateo ƒe Nyanyuigbalẽa me hã la, wotsɔ nyagbɔgblɔ si nye “nusi ƒe ŋugbe Mawu do” ɖo “anyigba” teƒe le Mateo 5:5. Hameviwo bunɛ be dziƒoe esia nye. Wometo nyateƒea na wo be, le Yesu Kristo ƒe Todzimawunyaa me la, egblɔ be ame fafawo, amesiwo fa tu, alo ɖokuibɔbɔlawo, ‘anyi anyigba dome’ o.

14. Ðokuitɔdidi ƒe susu kae dze le Biblia-gɔmeɖeɖe aɖewo me?

¹⁴ Edze ƒã be woŋlɔ nyawo le Ŋɔŋlɔawo ƒe gɔmeɖeɖe aɖewo me bene wòana mawunyagblɔlawo ƒe fetu nakpe nyuie. Ele eme baa be Biblia gblɔ be: “Dɔtsɔla dze eƒe fetu” ya. (Timoteo I, 5:18) Gake esi Biblia gblɔ le Timoteo I, 5:17 be hamemegã siwo kpɔa ha la dzi nyuie la, “edze be woatsɔ bubu teƒe eve abu wo” la, bubu si wo dometɔ aɖewo kpɔ be esɔ be yewoayɔ la ku ɖe ga ŋu. (Tsɔe sɔ kple Petro I, 5:2.) Eyata The New English Bible gblɔ be “ele be woaxe fetu teƒe eve” na hamemegã siawo, eye Contemporary English Version gblɔ be “wodze be woaxe fetu na wo zi gbɔ zi eve.”

Mawu ƒe Nya la Taʋiʋli Nuteƒewɔwɔtɔe

15. Aleke míawɔ anya Biblia-gɔmeɖeɖe siwo wòle be míazã?

¹⁵ Nukae esiawo katã fia na Biblia-xlẽla kple amesiwo zãa Biblia tsɔ fiaa nu ame bubuwo? Le gbe siwo wodona wu dometɔ akpa gãtɔ me la, Biblia-gɔmeɖeɖe geɖe li siwo me woate ŋu atia ɖe tsoe. Zã nugɔmesese nàtsɔ atia Biblia si nàzã. (Lododowo 19:8) Ne gɔmeɖeɖe aɖe meɖe amesi Mawu nye fia le anukwareɖiɖi me o—ne woɖe eƒe ŋkɔa ɖa le eƒe Nya si tso gbɔgbɔ me la me le susu ka ke ta o—la, ɖe wòate ŋu anye be gbegɔmeɖelaawo trɔ kpukpui aɖewo hã le Biblia ƒe akpa bubuwoa? Ne mèka ɖe gɔmeɖeɖe aɖe ƒe nyonyo dzi o la, dze agbagba nàtsɔe asɔ kple gɔmeɖeɖe xoxowo. Ne Mawu ƒe Nya la fialae nènye la, ke zã gɔmeɖeɖe siwo me nyawo sɔ ɖe Hebri kple Hela gbe me nuŋɔŋlɔ gbãtɔawo nu.

16. Aleke mía dometɔ ɖesiaɖe míate ŋu aɖe míaƒe nuteƒewɔwɔ afia le Mawu ƒe Nya si tso gbɔgbɔ me la zazã me?

¹⁶ Ele be mía dometɔ ɖesiaɖe nawɔ nuteƒe na Mawu ƒe Nya la. Míate ŋu aɖe míaƒe nuteƒewɔwɔ afia ne míetsɔ ɖe le emenyawo me vevie ale be, ne anya wɔ la, míadi ɣeyiɣi axlẽ Biblia gbesiagbe. (Psalmo 1:1-3) Míagate ŋu awɔe to nya siwo wògblɔ ŋudɔwɔwɔ bliboe le míaƒe agbenɔnɔ me, ahazã eƒe gɔmeɖosewo kple kpɔɖeŋuwo atsɔ awɔ nyametsotso nyuiwo. (Romatɔwo 12:2; Hebritɔwo 5:14) Míaɖee afia be míeʋlia Mawu ƒe Nya la ta nuteƒewɔwɔtɔe ne míeɖea gbeƒãe na ame bubuwo veviedodotɔe. Míaɖee afia hã ne mí amesiwo nye efialawo míezãa Biblia nyuie, eye míetroa emenyawo alo kekenɛ ɖe enu be wòasɔ ɖe míaƒe nukpɔsusuwo nu gbeɖe o. (Timoteo II, 2:15) Nya si Mawu gblɔ ɖi ava eme godoo. Ewɔa eƒe Nya dzi nuteƒewɔwɔtɔe. Mina míatsɔ nuteƒewɔwɔ aʋli etae.

[Etenuŋɔŋlɔwo]

Èɖo Ŋku Wo Dzia?

◻ Nukpɔsusu kawoe kpɔ ŋusẽ ɖe Biblia gɔmeɖelawo ƒe dɔ dzi le egbeɣeyiɣiwo me?

◻ Nukata alesi wole gbe gɔme ɖem egbea metɔtɔ Mawu ƒe tameɖoɖo ku ɖe eya ŋutɔ ƒe ŋkɔa ŋu o?

◻ Aleke gɔmeɖeɖe aɖewo ɣlaa Biblia ƒe nyateƒe siwo ku ɖe luʋɔ, ku, kple anyigba ŋui?

◻ Mɔ kawo nue míate ŋu aɖee afia le be míeʋlia Mawu ƒe Nya la ta nuteƒewɔwɔtɔe?

[Nɔnɔmetata si le axa 16]

Biblia-gɔmeɖeɖe kae wòle be nàzã?