Xexe si Me Nu Dzɔdzɔe Wɔwɔ Le Menye Drɔ̃e Aɖe Ko O!

“AMERIKA-DZIÐUÐUMEGÃ Daniel Webster gblɔ be: “Dzɔdzɔenyenye nye nu gã si dim amegbetɔ le le anyigba dzi.” Eye Biblia gblɔ be: “Yehowa lɔ̃a nya dzɔdzɔe.” (Psalmo 37:28) Esi wowɔ atsu kple asi gbãtɔa ɖe Mawu ƒe nɔnɔme nu ta la, mawumenɔnɔmewo nɔ wo si, eye nudzɔdzɔewɔwɔ ƒe susu hã nɔ wo me.—Mose I, 1:26, 27.

Ŋɔŋlɔawo ƒo nu tso ‘Dukɔwo me tɔ siwo si se mele o gake wowɔa nusi nye se la’ hã ŋu. Eyata “[wofia bena], woŋlɔ se la ƒe dɔwɔwɔ ɖe woƒe dziwo me . . . eye woƒe dzitsinya hã ɖia ɖase hekpena ɖe eŋu, eye woƒe tamebubuwo nɔa wo nɔewo nu tsom, alo wonɔa wo nɔewo nu ɖem hã.” (Romatɔwo 2:14, 15) Ẽ, wona dzitsinya ƒe ŋutete amegbetɔwo tso dzɔdzɔme—nu nyui kple nu vɔ̃ ƒe seselelãme si le dzi me. Edze ƒã be didi be woawɔ nu dzɔdzɔe le amegbetɔ me tso dzɔdzɔme.

Nusi gado ƒome kplikplikpli kple alesi amegbetɔ di nudzɔdzɔewɔwɔ enye eƒe dzidzɔkpɔkpɔ didi, elabena Psalmo 106:3 gblɔ be: “Woayra amesiwo léa se la me ɖe asi, eye wowɔa nu dzɔdzɔe ɣeawo katã ɣi!” Gake nukatae amegbetɔ mete ŋu he xexe dzɔdzɔe vɛ o?

Nukatae Amegbetɔ Do Kpo Nu?

Susu vevi si ta amegbetɔ mete ŋu na nudzɔdzɔewɔwɔ le xexeame o la tso blibomademade si ƒe dome míenyi tso mía dzila gbãtɔ, Adam kple Xawa gbɔ. Biblia gblɔ be: “To ame ɖeka dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo kata dzi yi, esi wo katã wɔ nuvɔ̃ ŋuti la.” (Romatɔwo 5:12) Nuvɔ̃e nye blibomademadea. Togbɔ be vodada menɔ Adam kple Xawa ŋu esi wowɔ wo o hã la, woɖoe dze aglã ɖe Mawu ŋu eye alea wova wɔ wo ɖokui nuvɔ̃wɔlawoe. (Mose I, 2:16, 17; 3:1-6) Nuvɔ̃ ƒe dzodzro gbegblẽwoe nye domenyinu siwo wogblẽ ɖi na wo viwo le nusia wɔwɔ ta.

Ðe menye nuvɔ̃ ƒe dzodzrowo gbɔe ŋukeklẽ kple nazãbubu siwo nye nɔnɔme siwo nɔa ame ŋu la tsona oa? Eye ɖe nɔnɔme siawo menana wowɔa nu madzɔmadzɔ le xexeame oa? Ẽ, ŋukeklẽ gbɔe wòtsona be woɖonɛ koŋ gblẽa nutowo me hetea amewo ɖe anyi le ganyawo gome! Nazãbubu tututue le megbe na gbevovodolawo dome dzrehehewo kple numadzɔmadzɔwɔwɔ ɖe ameƒomevi bubuwo ŋu. Nɔnɔme mawo hãe ʋãa amewo be wodaa adzo, wobaa ame, eye wowɔa nusiwo wɔa nuvevi ame bubuwo.

Zi geɖe tame nyui siwo míeɖona be míawɔ se dzi ahawɔ nu nyui la medzea edzi o le míaƒe dzodzro vɔ̃wo ta. Apostolo Paulo ŋutɔ ʋu eme be: “Menye nu nyui, si melɔ̃na la, mewɔna o, ke nuvɔ̃, si nyemelɔ̃na o la, eya ke mewɔna boŋ.” Egagblɔ le avuwɔwɔa ŋu be: “Mekpɔa dzidzɔ le Mawu ƒe se la ŋuti le ememe la gome; ke mekpɔ se bubu, si le aʋa wɔm kple se, si le nye nyasã me la, le nye ŋutinuwo me, eye wòlém aboyo le nuvɔ̃ ƒe se, si le nye ŋutinuwo me la me.” (Romatɔwo 7:19-23) Anɔ eme be míawo hã míele avu ma wɔm egbea. Susu ma tae numadzɔmadzɔwɔwɔ dzɔna enuenu nenema gbegbe ɖo.

Alesi amegbetɔ ɖua dzi hã wɔe be numadzɔmadzɔwɔwɔ le xexeame. Se kple amesiwo kpɔa egbɔ be wowɔ wo dzi la le dukɔ ɖesiaɖe me. Eye le nyateƒe me la, ʋɔnudrɔ̃lawo kple ʋɔnudrɔ̃ƒewo li. Nyateƒee, dzɔdzɔenyenyelɔ̃la aɖewo dze agbagba be yewoaʋli amegbetɔ ƒe gomenɔamesiwo ta ahakpɔ egbɔ be wowɔ nu dzɔdzɔe ɖe amesiame ŋu. Gake woƒe agbagbadzedzewo ƒe akpa gãtɔ zu dzodzro koe. Nukatae? Yeremya 10:23 tsɔ nu vovovo siwo na wodo kpo nu la ƒo ƒu gblɔ be: “Yehowa, menyae be, amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” Esi amegbetɔ te eɖokui ɖa tso Mawu gbɔ ta la, mate ŋu aɖo dzɔdzɔenyenye kple xexe dzɔdzɔe anyi gbeɖe o.—Lododowo 14:12; Nyagblɔla 8:9.

Satana Abosam nye mɔxenu gã aɖe na agbagba si dzem amegbetɔ le ɖe xexe si me nudzɔdzɔewɔwɔ le ɖoɖo anyi ŋu. Biblia gblɔe kɔte be mawudɔla dzeaglã si nye Satana lae nye “amewula” kple “aʋatsokala” xoxo la eye be “xexeme blibo la katã le vɔ̃ɖitɔ la [si] me.” (Yohanes 8:44; Yohanes I, 5:19) Apostolo Paulo gblɔ be enye “xexe sia me mawu.” (Korintotɔwo II, 4:3, 4) Esi Satana lé fu dzɔdzɔenyenye ta la, ewɔa nusianu si wòate ŋui tsɔ ƒlɔa dzo ɖe nuvɔ̃ɖiwɔwɔ te. Zi alesi wòle xexeame dzi ɖum ko la, ameƒomea akpɔtɔ anye kluvi na numadzɔmadzɔwɔwɔ ƒomevi ɖesiaɖe kple wo me tsonuwo.

Ðe nusiawo katã fia be numadzɔmadzɔwɔwɔ magbe ameƒomea dome nɔnɔ oa? Ðe xexe si me nudzɔdzɔewɔwɔ le mate ŋu ava gbeɖe oa?

Xexe si Me Nudzɔdzɔewɔwɔ Le Ava—Alekee?

Hafi mɔkpɔkpɔ na xexe dzɔdzɔe nava nye nu ŋutɔŋutɔ la, ele be ameƒomea nadi kpekpeɖeŋu tso amesi ate ŋu aho numadzɔmadzɔwɔwɔ ƒe ke ɖa. Gake amekae ate ŋu aɖe nuvɔ̃ ɖa ahatsrɔ̃ Satana kple eƒe dziɖuɖu ɖa? Edze ƒã be amegbetɔ alo amegbetɔ ƒe habɔbɔ aɖeke meli si ate ŋu awɔ dɔ dziŋɔ ma o. Yehowa Mawu koe ate ŋui! Biblia gblɔ le eŋu be: “Agakpe wònye, eƒe nuwɔwɔ de blibo; elabena eƒe mɔwo katã dzɔ. Mawu nyateƒetɔ wònye, eye alakpa mele eme o, nuteƒewɔla kple dzɔdzɔetɔ wònye.” (Mose V, 32:4) Eye esi Yehowa “lɔ̃a nya dzɔdzɔe” ta la, edi be ameƒomea nase agbe ƒe vivi le dzɔdzɔenyenye ƒe xexe me.—Psalmo 37:28.

Esi apostolo Petro nɔ nu ƒom tso ɖoɖo si Mawu wɔ be yeahe xexe dzɔdzɔe vɛ ŋuti la, egblɔ be: “Míele dziƒo yeye kple anyigba yeye, siwo me dzɔdzɔenyenye anɔ la, lalam le eƒe ŋugbedodo la nu.” (Petro II, 3:13) Menye dziƒo si míekpɔna lae “dziƒo yeye” la nye o. Mawu wɔ dziƒo si míekpɔna la wòde blibo, wònyea ŋutikɔkɔe nɛ. (Psalmo 8:4; 19:2, 3) “Dziƒo yeye” la nye dziɖuɖu yeye si aɖu anyigba la dzi. Amegbetɔ ƒe dziɖuɖuwoe fifi “dziƒo” nye. Eteƒe magadidi o, le Mawu ƒe Harmagedon ʋa me la, ‘dziƒo yeyea’—eƒe dziƒo Fiaɖuƒea, alo dziɖuɖua ava xɔ ɖe wo teƒe. (Nyaɖeɖefia 16:14-16) Yesu Kristoe nye Fiaɖuƒe ma ƒe Fia. Ne dziɖuɖu sia tsrɔ̃ amegbetɔ ƒe dziɖuɖu ɖa keŋkeŋ vɔ la, aɖu dzi vaseɖe mavɔmavɔ me.—Daniel 2:44.

Ke nukae nye “anyigba yeye” la? Menye ɣletinyigba yeye wònye o, elabena Mawu wɔ anyigba la wòsɔ pɛpɛpɛ be amegbetɔ nate ŋu anɔ edzi, eye eƒe lɔlɔ̃nue wònye be wòanɔ anyi tegbee. (Psalmo 104:5) Amewo ƒe ha yeye ye “anyigba yeye” la nye. (Mose I, 11:1; Psalmo 96:1) Amesiwo tsɔ wo ɖokui wɔ nuɖoanyi vɔ̃ɖi sia ƒe akpa aɖee nye “anyigba” si woatsrɔ̃. (Petro II, 3:7) Amesiwo anye “anyigba yeye” si axɔ ɖe wo teƒe la anye Mawu subɔla nyateƒetɔ siwo léa fu vɔ̃ɖinyenye eye wolɔ̃a dzɔdzɔenyenye kple sedziwɔwɔ. (Psalmo 37:10, 11) Ke Satana ƒe xexeame nu yi enye ema.

Gake nukae le Satana lalam? Apostolo Yohanes gblɔe ɖi be: “[Kristo Yesu lé] ʋɔ driba, da xoxo, si nye Abosam kple Satana la, eye wòblae ƒe akpe ɖeka. Eye wotsɔe ƒu gbe ɖe aʋli me, eye wotu nu ɖe enu, eye wotre enu, bena ne wòagable dukɔwo o.” (Nyaɖeɖefia 20:1-3) Satana si wode gae la magate ŋu akpɔ ŋusẽ ɖe ameƒomea dzi o abe alesi ŋusẽ meganɔa gamenɔla si wode gaxɔ doviviti me ŋu o ene. Gbɔdzɔe ka gbegbee nye si wòanye na ameƒomea, le esi nusia adzɔ do ŋgɔ na xexe dzɔdzɔea ƒe vava ta! Eye woatsrɔ̃ Satana ɖa gbidigbidi le ƒe akpe ɖeka la ƒe nuwuwu.—Nyaɖeɖefia 20:7-10.

Ke nuvɔ̃ si ƒe dome míenyi ya ɖe? Yehowa tsɔ nusi dzi woanɔ te ɖo aɖe nuvɔ̃ ɖa la na xoxo. “Amegbetɔvi la [Yesu Kristo va] . . . bena yeatsɔ eƒe agbe la ana [tafe, NW] ɖe ame geɖewo ƒe xɔxɔ ta.” (Mateo 20:28) Nya “tafe” fia ga si woxɔna hafi ɖea asi le gamenɔlawo ŋu. Yesu tsɔ eƒe amegbetɔ ƒe agbe deblibo na tafee be yeaxɔ ameƒomea.—Korintotɔwo II, 5:14; Petro I, 1:18, 19.

Yesu ƒe tafevɔsa ate ŋu aɖe vi na mí fifia gɔ̃ hã. Ne míetsɔ edzixɔxɔse wɔ dɔe la, tenɔnɔ nyui ate ŋu anɔ mía si le Mawu ŋkume. (Dɔwɔwɔwo 10:43; Korintotɔwo I, 6:11) Le Mawu Fiaɖuƒea ƒe dziɖuɖu te la, tafea ana woaɖe ameƒomea tso nuvɔ̃ me keŋkeŋ. Biblia ƒe agbalẽ mamlɛtɔ ɖɔ kpɔɖeŋu ƒe “agbetsitɔsisi aɖe” si le dodom tso Mawu ƒe fiazikpui me, eye kpɔɖeŋu ƒe atikutsetsetiwo le eƒe gowo ŋu eye woƒe aŋgbawo “nye dɔyɔgbe na dukɔwo.” (Nyaɖeɖefia 22:1, 2) Nusi Biblia ɖɔ le afisia tsi tre ɖi na mɔnuɖoɖo wɔnuku si Wɔla la wɔ be yeato Yesu ƒe tafevɔsa dzi agaxɔ ameƒomea tso nuvɔ̃ me. Mɔnuɖoɖo sia ŋudɔ wɔwɔ bliboe ana ablɔɖe amegbetɔ siwo ɖoa to la tso nuvɔ̃ kple ku me.

Agbenɔnɔ le Xexe Dzɔdzɔea Me

Bu alesi agbenɔnɔ anɔ le Fiaɖuƒedziɖuɖua me ŋu kpɔ. Nuvlowɔwɔ kple ŋutasesẽ azu gbaɖegbenyawo. (Lododowo 2:21, 22) Amebaba le ganya gome nu ayi. (Psalmo 37:6; 72:12, 13; Yesaya 65:21-23) Woaɖe hadome, ŋutigbalẽ, to, kple gbevovodolawo dome vovototodeameme ɖesiaɖe ɖa. (Dɔwɔwɔwo 10:34, 35) Aʋawɔwɔ kple aʋawɔnuwo maganɔ anyi o. (Psalmo 46:9) Woagbɔ agbe ame miliɔn geɖe woava nɔ xexe si me numadzɔmadzɔwɔwɔ mele o me. (Dɔwɔwɔwo 24:15) Lãmesẽ nyui deblibo asu amesiame si. (Hiob 33:25; Nyaɖeɖefia 21:3, 4) Biblia na kakaɖedzi mí be, ‘Yesu Kristo ana woawɔ nu dzɔdzɔe le nyateƒe me.’—Yesaya 42:3.

Fifia la, woate ŋu awɔ nu madzɔmadzɔ ɖe mía ŋu, gake megadzɔ gbeɖe be míawɔ nu madzɔmadzɔ ɖe eteƒe o. (Mixa 6:8) Ne wòahiã be míado dzi le numadzɔmadzɔwɔwɔ ta hã la, mina etsɔme mɔkpɔkpɔ nyui nanɔ mía si. Xexe si me nudzɔdzɔewɔwɔ le si ŋugbe wodo la ava zu nu ŋutɔŋutɔ kpuie. (Timoteo II, 3:1-5; Petro II, 3:11-13) Mawu Ŋusẽkatãtɔ lae gblɔe, eye ‘ava eme.’ (Yesaya 55:10, 11) Fifiae wòle be míasrɔ̃ nusi Mawu di tso mía si atsɔ adzra ɖo ɖe agbe nɔnɔ le xexe dzɔdzɔe ma me ŋu.—Yohanes 17:3; Timoteo II, 3:16, 17.

[Nɔnɔmetata si le axa 7]

Woaɖe numadzɔmadzɔwɔwɔ ɖesiaɖe ɖa le Mawu ƒe xexe yeye si ƒe ŋugbe wòdo la me