Naneke Meli Si Nyo Wu Nyateƒea O

Abe Alesi G.N. Van Der Bijl Gblɔe Ene

Le June 1941 me la, wotsɔm de asi na Adzamekpovitɔwo eye wokplɔm yi Sachsenhausen fuwɔamegakpɔ si te ɖe Berlin, Germany ŋu me. Menye gamenɔla 38190 lia le afima vaseɖe kuzɔli vɔ̃ɖi la me le April 1945 me. Gake hafi maƒo nu tso nudzɔdzɔ mawo ŋu la, mina magblɔ alesi mewɔ va zu gamenɔla na mi.

ESI Xexemeʋa l dze egɔme le ƒe 1914 me eteƒe medidi o ye wodzim le Rotterdam, Netherlands. Papa wɔa dɔ le ketekeɖoƒea, eye míaƒe aƒe sue la te ɖe ketekemɔa ŋu. Le aʋa la ƒe nuwuwu lɔƒo le ƒe 1918 me la, mekpɔa keteke geɖe siwo wobe wotsɔa dɔnɔwo la wova yina kple du. Ðikeke mele eme o be asrafo abixɔlawo sɔŋ ye le wo me wotsɔ tso aʋagbedzi va yina.

Esime mexɔ ƒe 12 la, medzudzɔ suku be madi dɔ awɔ. Le ƒe enyi megbe mekpɔ dɔ va zu nuɖala kple amewo gbɔ kpɔla le meli aɖe si tsɔa amewo la me, eye mezɔa tɔ dzi le ƒe ene siwo kplɔe ɖo me yina gbɔna le Netherlands kple United States dome.

Esi míeva ɖi go ɖe New York melidzeƒea le ƒe 1939 ƒe dzomeŋɔli la, amewo nɔ vɔvɔ̃m be xexemeʋa bubu agadzɔ. Eyata esi ŋutsu aɖe va ɖo míaƒe melia eye wòtsɔ agbalẽ si nye Government si ƒo nu tso dziɖuɖu dzɔdzɔe ŋu nam la, mexɔe kple dzidzɔ. Esi megbɔ va Rotterdam la, meva nɔ dɔ dim le godzi, le esi dɔ wɔwɔ le tɔ dzi meganɔ dedie o ta. Le September 1 dzi la, Germany va dze Poland dzi eye dukɔwo ƒo wo ɖokui ɖe Xexemeʋa ll me.

Biblia me Nyateƒea Sɔsrɔ̃

Kwasiɖagbe ŋdi aɖe le March 1940 me la, meyi ɖasrã nɔvinyeŋutsu kple srɔ̃a kpɔ eye Yehowa Ðasefo aɖe va ƒo ʋɔ na mí. Megblɔ nɛ be Government-gbalẽa le asinye xoxo eye mebia nyae tso dziƒo kple amesiwo ayi afima ŋu. Ena ŋuɖoɖo si me kɔ eye susu le eme lam ale be megblɔ na ɖokuinye be ‘Nyateƒea lae nye sia.’ Metsɔ nye adrɛs nɛ eye mekpee be wòava gbɔnye le aƒenyeme.

Le sasrãkpɔ zi atɔ̃ pɛ siwo me míedzro Biblia me wòde to le megbe la, meva nɔ Ðasefoa kplɔm ɖo le aƒeme yi aƒeme gbeƒãɖeɖedɔa me. Esi míeɖo anyigbamamãa me la, efia afisi madze egɔme tsoe lam, ale mewɔ dɔ le ɖokuinye si. Nenemae wona ame yeye geɖe dze gbeƒãɖeɖe gɔme le ŋkeke mawo. Woɖo aɖaŋu nam be, bene woagakpɔm le ablɔdzi o la, makpɔ egbɔ ɣesiaɣi be mele xɔdomemɔ dzi hafi ana agbalẽ. Ŋuɖɔɖo hiã ŋutɔ le aʋa la ƒe gɔmedzeɣi.

Le kwasiɖa etɔ̃ megbe le May 10, 1940 dzi la, Germany ƒe asrafowo dze Netherlands dzi, eye le May 29 lia dzi la, Reich ƒe dudzikpɔla Seyss-Inquart ɖe gbeƒã be woxe mɔ ɖe Yehowa Ðasefowo ƒe habɔbɔa nu. Ƒuƒoƒo suewo mee míekpena le eye míeɖɔa ŋu ɖo be míagakɔ nu le míaƒe kpekpewo wɔƒewo dzi o. Dzikpɔla mɔzɔlawo ƒe sasrãkpɔwo koŋue doa ŋusẽ mí.

Atamatsunolae menye eye esi medo sigarɛt ɖe Ðasefo si srɔ̃ nu kplim gbɔ eye mekpɔ be menoa atama o la, megblɔ be: “Nyemate ŋu adzudzɔ atamanono geɖe o!” Gake le ema megbe kpuie esi menɔ zɔzɔm le ablɔdzi la, megblɔ be, ‘Ne Ðasefoe mebe mava zu la, ke medi be mazu Ðasefo akukua.’ Eyata nyemagano atama gbeɖe o.

Nyateƒea ƒe Akpa Dzi Nɔnɔ

Le June 1940 me si ade ɣleti etɔ̃ kloe tso esime medo go Ðasefoa le nɔvinyeŋutsua ƒeme la, meɖe adzɔgbe na Yehowa hexɔ nyɔnyrɔ. Ɣleti ʋee aɖewo megbe si nye October 1940 me la, mege ɖe ɣeyiɣiawo katã ƒe subɔsubɔdɔa me va zu mɔɖela. Ɣemaɣi la, wona nusi woyɔna be mɔɖelawo ƒe awudziwui lam. Kotoku geɖe nɔ eŋu wodea agbalẽ gãwo kple agbalẽ viwo eme, eye woate ŋu adoe ɖe dziwui edzitɔ gɔme.

Tso esime Germanytɔwo va xɔ dukɔa la, woɖoe koŋ doa afɔ na Yehowa Ðasefowo heléa wo. Gbeɖeka ŋdi le February 1941 me la, menɔ gbeadzi kple Ðasefo bubu ʋee aɖewo. Esi wonɔ dɔ wɔm le aƒe aɖewo ƒe akpa ɖeka la, nye hã menɔ dɔ wɔm le akpa kemɛ be mava do go wo. Le ɣeyiɣi aɖe megbe la, meyi be makpɔ be nukae lé wo ɖi hã eye medo go ŋutsu aɖe si biam be, “Ðe agbalẽ sue siawo le wò hã asiwòa?”

Meɖo eŋu be, “Ẽ.” Elém enumake eye wòkplɔm yi kpovitɔwo ƒe dɔwɔƒee. Wosikam ɖi ade kwasiɖa ene kloe. Kpovitɔ akpa gãtɔ kɔa ŋkume ɖe ame. Zi alesi wometsɔ ame de asi na Adzamekpovitɔwo haɖe o la, ate ŋu ana woaɖe asi le eŋu ne enya de asi atamkanya si le agbalẽ dzi te be yemagamã Biblia-srɔ̃gbalẽ o ko. Esi wogblɔ nam be made asi agbalẽ ma tɔgbe te la, meɖo eŋu be: “Ne mietsɔ gulden miliɔn ɖeka alo eve nam hã la, nyemade asi ete akpɔ o.”

Esi menɔ wo gbɔ ɣeyiɣi aɖe megbe la, wotsɔm de asi na Adzamekpovitɔwo. Emegbe wokplɔm yi Sachsenhausen fuwɔamegakpɔ me le Germany.

Agbenɔnɔ le Sachsenhausen

Esi meva ɖo le June 1941 me la, Ðasefo 150—akpa gãtɔ nye Germanytɔ—nɔ Sachsenhausen xoxo. Wokplɔ mí gamenɔla yeyewo yi gakpɔa ƒe akpa si woyɔna be Saɖeaga. Mía nɔvi Kristotɔwo lé be na mí le afima eye wona míenɔ dzadzraɖoɖi na nusianu si ava dzɔ. Wogaku Ðasefo bubuwo vɛ tso Netherlands le kwasiɖa ɖeka megbe. Gbã la, wona míetɔna ɖe teƒe ɖeka le gaxɔawo ŋkume tso ŋdi ga adre vaseɖe fiẽ ga ade. Ɣeaɖewoɣi gamenɔlawo wɔa nusia gbesiagbe hena kwasiɖa ɖeka alo kple edzivɔ.

Togbɔ be wowɔa fu mí hã la, nɔviawo kpɔ alesi wòhiã kpata be míanɔ ɖoɖowɔwɔ me eye míaxɔ gbɔgbɔmenunyiame la dze sii. Wodea dɔ asi na ame ɖeka gbesiagbe be wòdzra numeɖeɖe aɖewo ɖo tso Biblia kpukpui aɖe ŋu. Emegbe le kpɔa me ƒe ƒuƒoƒe la, Ðasefowo yia amesia gbɔ ɖekaɖeka ɖasea nuƒo si wòdzra ɖo la. Wotoa mɔ vovovowo dzi tsɔa agbalẽwo vaa kpɔa me le bebem edziedzi, eye míekpea ta ŋutɔŋutɔ Kwasiɖagbe ɖesiaɖe eye míesrɔ̃a Biblia srɔ̃gbalẽ sia ɖekae.

To mɔ aɖe nu la, wote ŋu tsɔ Children-gbalẽ si woɖe ɖe go le St. Louis takpekpe gã me le United States le ƒe 1941 ƒe dzomeŋɔli la va Sachsenhausen le bebeme. Bene míagana asi nasu agbalẽa dzi bɔbɔe eye woagblẽ edome o la, míeɖee le eme ɖekaɖeka, eye agbalẽɖeɖeawo tsana le nɔviawo dzi bene amesiame nate ŋu axlẽe le ɖoɖo nu.

Le ɣeyiɣi aɖe megbe la, gaxɔa dzikpɔla va nya nu tso kpekpe siwo míewɔna ŋu. Eyata Womã Ðasefoawo me eye wokplɔ wo yi gaxɔ vovovo me. Esia na mɔnukpɔkpɔ nyui aɖe su mía si be míeɖe gbeƒã na gamenɔla bubuwo, eye ewɔe be Polandtɔwo, Ukrainetɔwo, kple ame bubu geɖewo va xɔ nyateƒea.

Nazitɔwo meɣla alesi woɖoe be yewoagblẽ Bibelforscher nye alesi woyɔna Yehowa Ðasefowo ɣemaɣi, ƒe nuteƒewɔwɔ me alo awu o. Ena be alesi wova nɔ mía dzi zimee la nu va sẽ ŋutɔ. Wogblɔ na mí be woate ŋu aɖe asi le mía ŋu ne míede asi agbalẽ te tsɔ gbe míaƒe xɔse ko. Nɔvi aɖewo va wɔ susu be, “Ne woɖe gam la, mate ŋu awɔ geɖe le Yehowa ƒe subɔsubɔ me.” Togbɔ be ame ʋee aɖewo de asi ete hã la, mía nɔvi geɖewo lé nuteƒewɔwɔ me ɖe asi le ŋukpedodo, fuwɔame, kple nuhiahiã manamana mí me. Míegase amesiwo na ta la dometɔ aɖewo ŋkɔ gbeɖe o. Gake dzidzɔtɔe la, bubuwo va nyɔ le wo ɖokui me emegbe eye wokpɔtɔ nye Ðasefo veviedonulawo.

Wozia mía dzi be míakpɔ eteƒe ne wole gamenɔlawo ƒom ŋutasesẽtɔe, abe wo ƒoƒo ati 25 ene. Gbeɖeka wona míekpɔ eteƒe esi wode ka ve na ŋutsu ene. Nu mawo teƒe kpɔkpɔ wɔa dɔ ɖe ame dzi ŋutɔ. Nɔviŋutsu kɔkɔ dzeɖekɛ aɖe si nɔ gaxɔ ɖeka me kplim la gblɔ nam be: “Hafi mava afisia la, nyemate ŋu akpɔ ʋu agbe ƒenyikuku o. Gake fifia nye dzi tri.” Togbɔ be míaƒe dzi va tri hã la, míezu vevemaseɖeamenulawo o. Magblɔ be nyemeɖo vɔ̃ ɖe susu me alo fuléle ɖo menye ɖe mía yometilawo ŋu kpɔ o.

Esi mewɔ dɔ kple kommando (dɔwɔha) aɖe hena ɣeyiɣi aɖe megbe la, melé ŋudza sesẽ aɖe wokplɔm yi kɔdzii. Norway ɖɔkta aɖe kple Czchoslovakia dɔnɔdzikpɔla aɖee kpe ɖe ŋunye, eye ɖewohĩ woƒe dɔmenyowɔwɔe xɔm ɖe agbe.

Kuzɔli La

Kaka April 1945 naɖo la, eva dze ƒã be wonɔ Germany dzi ɖum le aʋa la me. Ɣetoɖoƒe dukɔ wɔɖekawo nɔ zɔ ɖem afɔtsɔtsɔe gbɔna tso ɣetoɖoƒe gome, eye Soviettɔwo hã nɔ vavam tso ɣedzeƒe. Manya wɔ na Nazitɔwo be woawu ame akpe alafa geɖe siwo nɔ fuwɔamegakpɔawo me aɖi woƒe kukuawo le ŋkeke ʋee aɖewo me eye dzesi aɖeke matsi anyi o. Eyata woɖoe be yewoawu amesiwo nɔ dɔ lém eye yewoakplɔ gamenɔla mamlɛawo ayi melidzeƒe si tsɔ afima gbɔ wu lae. Woɖoe be yewoade wo meli me eye yewoanyrɔ melia le ƒu dzi.

Gamenɔla 26,000 ƒe azɔlizɔzɔ tso Sachsenhausen dze egɔme le April 20 lia ƒe zã me. Hafi míadzo le gakpɔa me la, míeva fi mía nɔvi dɔnɔwo tso dɔnɔdzikpɔƒea. Míedi keke aɖe si dzi míakɔ wo ɖo. Mí katã ƒe ƒuƒoƒo ade ame 230 siwo tso dukɔ vovovo ade me. Dɔnɔawo dometɔ ɖekae nye Nɔviŋutsu Arthur Winkler si wɔ akpa gã aɖe le dɔa ta keke me le Netherlands. Mí Ðasefowoe nye ame susɔeawo nɔ afɔzɔlaawo yome, eye míedea dzi ƒo na mía nɔewo enuenu be woanɔ azɔli dzi.

Esi míedze egɔme la, míezɔ azɔli gaƒoƒo 36 eye míedzudzɔ le teƒe aɖeke o. Esi menɔ zɔzɔm la, fukpekpe kple ɖeɖiteameŋu na be medɔa alɔ̃ ŋutɔŋutɔ. Gake megbetsitsi alo dzudzɔdzudzɔ manyo o elabena dzɔlawo ate ŋu ada ame faa. Le zã me la, míemlɔa gbagbagbe alo avewo me. Nuɖuɖu sue aɖe alo ɖeke kura hã menɔ anyi o. Esi dɔ wum ɖi tsi ɖe ŋunye la, meɖuɖɔ aɖuŋututumi si Swedentɔwo ƒe Atitsogadzẽ habɔbɔ na mí la.

Eva ɖo afi aɖe, esi Germany-dzɔlawo menya afisi Russia alo United States asrafowo nɔ o ta la, míeƒu asaɖa anyi ɖe aveme ŋkeke ene sɔŋ. Esia de mía dzi elabena ewɔe be míete ŋu ɖo Lubeck Adɔ̃a me kaba bene míaɖo meli siwo akɔ mí ayi míaƒe kuƒe le tɔ me o. Mlɔeba le ŋkeke 12 megbe esi míezɔ afɔ anɔ kilomita 200 megbe la, míeva Crivitz Wood. Afisia tsɔ ɖe Schwerin, si nye dugã si didi kilomita 50 tso Lubeck la gbɔ.

Soviettɔwo nɔ míaƒe miame, eye Amerikatɔwo nɔ míaƒe ɖusime. Tu gãwo ƒe gbeɖiɖi kple aʋawɔtuwo ƒe ɖiɖi madzudzɔmadzudzɔe na míenya be míete tu aʋagbea dzi. Vɔvɔ̃ ɖo Germany-dzɔlaawo; wo dometɔ aɖewo si dzo, eye bubuwo ɖɔli woƒe asrafowuwo hetsɔ gamenɔwu siwo woɖe le ame kukuwo ŋu la do kple susu be womegakpɔ yewo dze sii o. Le tɔtɔtɔa me la, mí Ðasefowo míekpe ta do gbe ɖa hena mɔfiafia.

Nɔvi siwo nɔ mía nu la tso nya me be míadze mɔ le ŋufɔke eye míaɖo ta United States ʋakɔwo ƒe gome. Togbɔ be gamenɔla siwo dze kuzɔlia zɔzɔ gɔme ƒe afã ku alo wowu wo le mɔa dzi hã la, Ðasefoawo katã tsi agbe.

Canada asrafodɔwɔla aɖe kɔm ɖe ʋu me yi dugã si nye Nijmegen me, afisi danye aɖe nɔ kpɔ. Gake esi meɖo afima la, mekpɔ be eʋu. Eyata medze azɔli zɔzɔ gɔme ɖo ta Rotterdam. Amenuvevetɔe le mɔa dzi la, ame aɖe kɔm ɖe eya ŋutɔ ƒe ʋu me yi afisi yim menɔ la tẽ.

Nyateƒea Nue Mele Agbe Ðo

Gbesigbe tututu meva ɖo Rotterdam koe mebia ake be mawɔ mɔɖeɖedɔa. Le kwasiɖa etɔ̃ megbe la, meva ɖo nye dɔ gbe le dugã si nye Zutphen me, afisi mewɔ dɔ le ƒe ɖeka kple afa si kplɔe ɖo. Ŋusẽ gaɖo ŋunye vie le ɣeyiɣi mawo me. Emegbe woɖom nutome sue dzikpɔla, si nye alesi woyɔna na subɔla mɔzɔlawoe. Le ɣleti ʋee aɖewo megbe la, wokpem va Gbetakpɔxɔ Habɔbɔa ƒe Gilead Biblia Sukua le South Lansing, New York. Woɖom ɖe Belgium esi medo le suku ma ƒe klass 12 lia le February 1949 megbe.

Mewɔ subɔsubɔdɔa ƒe akpa geɖe le Belgium, siwo ƒe ɖewo nye dɔwɔwɔ ƒe enyi kloe le alɔdzedɔwɔƒea kple ƒe bla nanewo le mɔzɔzɔdɔa me abe nutome sue kple nutome gã dzikpɔla ene. Le ƒe 1958 me la, meɖe Justine, amesi va zu nye mɔzɔhati. Fifia esi amegãkuku va le nu tem ɖe dzinye vevie la, dzi gadzɔam kokoko be mete ŋu le dzikpɔla mɔzɔla teƒenɔla ƒe dɔa wɔm le mɔ sue aɖe nu.

Ne metrɔ bu nye subɔsubɔdɔa ŋu la, mate ŋu agblɔ nyateƒetɔe be: “Naneke meli si nyo wu nyateƒea o.” Nyateƒee, menɔ bɔbɔe ɣesiaɣi ya o. Meva kpɔ alesi wòhiã be masrɔ̃ nu tso nye vodadawo kple kpododonuwo me la me. Eyata ne mele nu ƒom kple zɔhɛwo la, megblɔna na wo zi geɖe be: “Wò hã àda vo eye ɖewohĩ àwɔ nuvɔ̃ gã aɖe gɔ̃ hã, gake megada alakpa le eŋu o. Dzro nya la me kple dziwòlawo alo hamemegã aɖe, eye nàwɔ ɖɔɖɔɖo siwo hiã.”

Le ƒe 50 kloe siwo metsɔ le ɣeyiɣiawo katã ƒe subɔsubɔdɔa me le Belgium la, mɔnukpɔkpɔ su asinye be mekpɔ ame aɖewo siwo menya tso woƒe ɖevime la wova zu hamemegãwo kple nutome sue dzikpɔlawo. Eye mekpɔ eteƒe Fiaɖuƒe gbeƒãɖela 1,700 alo esi wu nenema siwo nɔ dukɔa me la dzi ɖe edzi wu 27,000.

Mele biabiam be, “Ðe agbenɔnɔ si me yayra le gali wu Yehowa subɔsubɔa?” Ðeke menɔ anyi kpɔ, alo li fifia, alo ava gbeɖe o. Mele gbe dom ɖa be Yehowa nayi edzi afia mɔ mía kple srɔ̃nye eye wòayra mí be míakpɔtɔ anɔ esubɔm tegbee.

[Nɔnɔmetata si le axa 26]

Mía kple srɔ̃nye esi míeɖe mía nɔewo le ƒe 1958 megbe kpuie