Ètsɔa Bubu si Le Wo Ŋu Naa Woa?

WOXA Afrikatɔwo abe lãwo ene hede wo teƒe ʋeʋẽ si ƒo ɖi wu gbɔgblɔ, eye wode wo meli me abe agba ene kplɔ wo yi Amerika-nyigbawo dzi. Wokpɔ mɔ be woƒe afã ya teti aku hafi woaɖo afisi woyina. Womã ƒometɔwo me ŋutasesẽtɔe, eye womegakpɔ wo nɔewo kpɔ gbeɖe o. Kluvisitsatsa la nye amegbetɔ ƒe ŋutasesẽ le ehavi ŋu ƒe nudzɔdzɔ vɔ̃ɖitɔwo dometɔ ɖeka. Nu ma tɔgbe bubuwo dzɔ esime dziɖula ŋusẽtɔwo tsɔ tagbɔsesẽ ɖu anyigbatɔ wɔnamanɔŋutɔwo dzii.

Bubu koklo le ame ŋu ate ŋu anye anyrawɔwɔ si nu sẽ wu be woaƒo amea ŋutɔŋutɔ. Enana agbe meganɔa ame me o. Togbɔ be wote fli ɖe kluvinyenye me le dukɔ akpa gãtɔ me hã la, woyi edzi le amegbetɔ ƒe bubu klom le amewo ŋu, ɖewohĩ le mɔ si medzena tututu o nu.

Gake Kristotɔ vavãwo dzea agbagba be yewoawɔ ɖe Yesu Kristo ƒe nuxlɔ̃ame be ‘woalɔ̃ wo nɔewo abe wo ɖokui ene’ la dzi. Eyata wobiaa wo ɖokui be, ‘Ðe metsɔa bubu si le ame bubuwo ŋu la naa woa?’—Luka 10:27.

Bubudedeameŋu ƒe Kpɔɖeŋu

Nyagɔmeɖegbalẽ aɖe ɖe bubudedeameŋu gɔme be efia nu alo nɔnɔme si dze, nusi ŋu wodea bubu alo asixɔxɔe. Aleke gbegbe woɖɔ Xexeame Katã ƒe Dziɖulagã, Yehowa Mawu, ƒe nɔnɔme wòsɔ nyuie enye si! Le nyateƒe me la, enuenu Ŋɔŋlɔawo ƒoa nu tso Yehowa kple eƒe dziɖulanyenye ŋu wònyea bubudedeameŋu. Mɔnukpɔkpɔ su Mose, Yesaya, Xezekiel, Daniel, apostolo Yohanes, kple ame bubuwo si be wokpɔ Dziƒoʋĩtɔ la kple eƒe dziƒonɔƒea ŋuti ŋutega siwo tso gbɔgbɔ me, eye gãnyenye ɖedzesi kple bubu dze le alesi wo katã ɖɔ woe me. (Mose II, 24:9-11; Yesaya 6:1; Xezekiel 1:26-28; Daniel 7:9; Nyaɖeɖefia 4:1-3) Fia Dawid gblɔ le kafukafu ƒe gbedodoɖa aɖe me be: “Yehowa, tɔwòe nye gãnyenye kple ŋusẽ, ŋutikɔkɔe, bubu kple kafukafu, elabena nusianu, si le dziƒo kple anyigba la, tɔwòe.” (Kronika I, 29:11) Nyateƒee, ame aɖeke medze na bubu kple kɔkɔdoame wu Yehowa Mawu ŋutɔ o.

Esi Yehowa wɔ amegbetɔ ɖe eƒe nɔnɔme nu eye wòɖi eyama ta la, ena asixɔxɔ, ŋudzedzekpɔkpɔ ɖe ame ɖokui ŋu, kple bubunɔameŋu amegbetɔwo vaseɖe afi aɖe. (Mose I, 1:26) Eyata le míaƒe nuwɔwɔ kple ame bubuwo me la, ehiã be míatsɔ bubu si dze ana amesiame ahasi wo ɖa. Ne míewɔe nenema la, míeɖenɛ fiana be míekpɔ ŋudzedze ɖe Yehowa Mawu, amesi nye amegbetɔ ƒe bubunɔameŋu Tsoƒe la ŋu.—Psalmo 8:5-10.

Bubudedeameŋu le Ƒomekadodowo Me

Gbɔgbɔ ʋã apostolo Petro si nye srɔ̃tɔ wòxlɔ̃ nu Kristotɔ srɔ̃ŋutsuwo be ‘woabu wo srɔ̃wo le esi wonye gbɔdzɔgbɔdzɔtɔwo wu la ŋuti.’ (Petro I, 3:7; Mateo 8:14) Apostolo Paulo ɖo aɖaŋu be: “Ke nyɔnu la nasi srɔ̃a ɖa.” (Efesotɔwo 5:33) Eyata le srɔ̃ɖeɖe me la, enye Biblia me nudidi be woatsɔ ame srɔ̃ ƒe bubu nɛ ahasii ɖa. Mɔ kawo nue woate ŋu aɖe esia afia le?

Abe alesi tsi doa ŋusẽ numiemie si le tsitsim ene la, srɔ̃ŋutsu kple srɔ̃a ƒe nuƒoƒo si vivi kple nuwɔwɔ ɖe ame nɔewo ŋu dɔmenyotɔe le gaglãgbe kple aƒeme siaa ate ŋu atu ƒomedodo kplikplikpli si le wo dome ɖo. Gake dzugbewo zazã adãtɔe alo amedadaɖeanyi ƒe nyatoƒoetoto, abe alesi míesenɛ zi geɖe le television dzi nukokoedoname fefewo me ene gblẽa nu. Woate ŋu ana numaɖinunyenye, blanuiléle, kple dziku ƒe seselelãmewo naho ɖe ame me; woate ŋu ade abi si malɔ̃ avɔ o ame ƒe seselelãme ŋu gɔ̃ hã.

Bubu tsɔtsɔ na ame bubuwo hã fia be woalɔ̃ ɖe amesi ƒomevi wonye dzi, ke menye be woanɔ agbagba dzem be woatrɔ wo woazu amesi tɔgbe wosusu ɖe tame alo woatsɔ wo anɔ sɔsɔm kple ame bubuwo madzemadzee o. Esia le vevie vevietɔ le srɔ̃ŋutsuwo kple srɔ̃nyɔnuwo dome. Ne woɖoa dze eye woƒoa nu faa dzidzemetɔe eye ame aɖeke mevɔ̃na be woaɖe ɖeklemi ye alo woanyra ɖe ye dzi o la, etua ƒomedodo ɖo. Ne ame te ŋu vona le eɖokui me le srɔ̃ɖeɖe me la, ekema aƒeme va zua sitsoƒe ŋutɔŋutɔ tso egodo si ŋutasesẽ si doa vevesese na ame le la me.

Ŋɔŋlɔawo de se na ɖeviwo be woabu wo dzilawo ahaɖo to wo. Anyo be dzila nyanu siwo lɔ̃a ame hã natsɔ wo viwo ƒe bubu na wo. Wo kafukafu ɖe nusi wowɔ nyuie ta, kple tohehe le dzigbɔɖi me ne ehiã te ŋu doa ŋusẽ ‘woƒe susu tɔtrɔ ɖe Yehowa ŋu.’ Ðeko wòana woado dziku ne woɖea ɖeklemi wo ɣesiaɣi, wodoa aƒa ɖe wo ta, eye woyɔa megbeŋkɔ na wo hezãa nya siwo ɖia gbɔ ame abe “bometsila” alo “asotɔ” ene ɖe wo ŋu.—Efesotɔwo 6:4.

Kristotɔ hamemegã aɖe si nye vifofo, amesi le viŋutsu etɔ̃ kple vinyɔnu etɔ̃ hem la gblɔ be: “Ne míele Fiaɖuƒe Akpata me la, míehea wo le ɖoɖoezizi me alesi wòanya wɔe. Zi geɖe la, asitɔtɔ wo vie alo ŋku fɔfɔ ɖe wo dzi nuxlɔ̃ametɔe ɖeɖe sɔa gbɔ. Ne wohiã tohehe si de ŋgɔ wu la, míenaa wo le míaƒe aƒeme eye míenaa ɖevi bubuwo kpɔa eteƒe o. Fifia si ɖeviawo tsi vie la, wo hehe bia be míaɖo aɖaŋu si me nunya le si tso Mawu ƒe Nya la me na wo dometɔ ɖesiaɖe lɔlɔ̃tɔe ɖe woƒe nuhiahiãwo nu. Míedzea agbagba be míaɣla amesiame ƒe nya nɛ le ame ŋutɔ ƒe nya siawo gome, eye míetoa esia me dea asixɔxɔ ɖevi ɖesiaɖe ƒe nya ɣaɣlawo ŋu hetsɔa woƒe bubu naa wo.”

Mele be míaŋe aɖaba ƒu nɔnɔme nyuiwo ɖeɖefia le ƒomea me le nuƒoƒo kple nuwɔna me dzi o. Mele be alesi miedze si mia nɔewo nyuie la nawɔe be miagbe nya siawo tɔgbe abe “taflatse,” “akpe na wò,” “meɖe kuku,” kple “tɔnye medzɔ o” ene gbɔgblɔ o. Nɔnɔme nyuiwo ɖeɖefia hiã vevie le nana be ame ŋutɔ ƒe bubu kple ame bubuwo tɔ nakpɔtɔ anɔ anyi me.

Le Kristo-Hamea Me

Yesu gblɔ be: “Mite va gbɔnye, mi amesiwo katã le agbagba dzem, eye agba le mia wum la, eye nye la mana dzudzɔ mi.” (Mateo 11:28) Amesiwo wote ɖe anyi, blanuilélawo, kple ɖevi suewo gɔ̃ hã te ŋu te ɖe Yesu ŋu. Subɔsubɔhakplɔla dadala siwo dzea wo ɖokui ŋu kple ŋgɔnɔla siwo nɔ anyi ɣemaɣi do vlo wo. Gake wokpɔe be Yesu tsɔ bubu si wodze na la na yewo.

Míawo hã míedi be míasrɔ̃ Yesu eye míanye dzideƒotsoƒe na mía haxɔsetɔwo. Esia fia be míadi mɔnukpɔkpɔwo atsɔ atu wo ɖo to míaƒe nuƒoƒo kple nuwɔnawo me. Esɔ be míanyo dɔme ɣesiaɣi agblɔ nya dzeto siwo tua ame ɖo le míaƒe dzeɖoɖo me. (Romatɔwo 1:11, 12; Tesalonikatɔwo I, 5:11) Míeɖenɛ fiana be míaƒe susu nɔa ame bubuwo ƒe seselelãme ŋu ne míeɖɔa ŋu ɖo le nya si míegblɔna kple alesi míegblɔnɛ me. (Kolosetɔwo 4:6) Dzadzraɖo si sɔ kple nudzeamewɔwɔ le Kristotɔwo ƒe kpekpewo me hã ɖea bubu deto tsɔtsɔ na míaƒe Mawu, eƒe tadedeagu, kple mía hati tadeagulawo fiana.

Yesu tsɔ bubu si le amewo ŋu na wo esime wònɔ wo subɔm gɔ̃ hã. Megblẽ nu le ame bubuwo ŋu alo da wo ɖe anyi tsɔ do gã eɖokui kpɔ o. Esi kpodɔléla aɖe va Yesu gbɔ be wòada dɔ na ye la, megblɔ be ŋutsua ŋu mekɔ o eye medze o, eye mehe susu yi eɖokui dzi hewɔe be amewo nava kpɔ hã o. Ke boŋ esi kpodɔléla la ɖe kuku na Yesu be, “Aƒetɔ, ne èlɔ̃ ko, àte ŋu aklɔ ŋutinye” la, Ede bubu kpodɔléla la ŋu hegblɔ nɛ be, “Melɔ̃.” (Luka 5:12, 13) Aleke gbegbe wònyoe nye si be menye kpekpeɖeŋu koe míana amesiwo hiã tu o ke míaka ɖe edzi na wo hã be menye agbae wonye na mí o ke boŋ míehiã wo helɔ̃a wo! Zi geɖe la, woƒoa asa na amesiwo ŋu kpena, blanuilélawo, kple nuwɔametɔwo alo wodaa wo ɖe anyi gɔ̃ hã le xexeame. Gake ele be woade ha vavãtɔ kpli wo eye woaxɔ wo ne wole wo nɔviŋutsu kple nɔvinyɔnu Kristotɔwo dome. Ele be míawɔ míaƒe akpa dzi ado nɔnɔme sia ɖe ŋgɔ.

Yesu lɔ̃ eƒe nusrɔ̃lawo abe ‘etɔwo’ ene eye “elɔ̃ wo vaseɖe nuwuwu” togbɔ be gbɔdzɔgbɔdzɔwo kple kpɔtsɔtsɔ nɔ woƒe amenyenye ŋu hã. (Yohanes 13:1) Ekpɔe be dzi dzadzɛ le wo si eye wotsɔ wo ɖokui na Fofoa bliboe. Nenema ke mele be míabu susu vɔ̃ ɖe mía hati tadeagulawo ŋu le esi ɖewohĩ womawɔ nu alesi míedi alo le esi woƒe numãmewo alo amenyenye madzɔ dzi na mí ta ko o. Bubu si le mía nɔviwo ŋu tsɔtsɔ na wo aʋã mí míalɔ̃ wo eye míakpɔ ŋudzedze ɖe alesi wole ŋu, eye míabui be woawo hã wolɔ̃ Yehowa eye wotsɔa susu nyui subɔnɛ.—Petro I, 4:8-10.

Vevietɔ ele be hamemegãwo naɖɔ ŋu ɖo be womana amesiwo wotsɔ de woƒe dzikpɔkpɔ te la natsi dzodzodzoe madzemadzee o. (Petro I, 5:2, 3) Ne hamemegãwo kpe kple hamea me tɔ si wɔ nuvɔ̃ la, anyo be woana dɔmenyo kple ameŋububu nadze le woƒe nyawo me eye woatsri nya siwo tɔtɔa ame biabia madzemadzee. (Galatiatɔwo 6:1) Ne esɔ be woaka ŋkume na amea vevie alo woahe to nɛ hã la, woayi edzi atsɔ bubu kple sisiɖa si dze la ana nuvɔ̃wɔla la.—Timoteo I, 5:1, 2.

Ame Ŋutɔ ƒe Bubu Ta Kpɔkpɔ

Esi wònye Mawu ƒe nɔnɔme kple amenyenye wotsɔ wɔ mí ta la, ele be míaɖe Mawu ƒe nɔnɔme nyuiwo—kple eƒe bubu—afia le míaƒe gbesiagbegbenɔnɔ me alesi míate ŋui. (Mose I, 1:26) Nenema ke gɔmesese si le se si wode be “lɔ̃ hawòvi abe wò ŋutɔ ɖokuiwò ene” ŋu fia be ele be míada asɔ le bubu kple sisiɖa si anɔ mía ŋu me. (Mateo 22:39) Nya lae nye be ne míedi be ame bubuwo nasi mí ɖa eye woade bubu mía ŋu la, ke ele be míaɖee afia be míedze nɛ.

Nu vevi aɖe si hiã le sisiɖa kple bubu ƒe ameŋunɔnɔ mee nye be woalé dzitsinya dzadzɛ me ɖe asi. Dzitsinya si medza o kple fɔɖiɖi ƒe fuwɔame nana wosena le ame ɖokui me be womeɖi naneke o, dzi ɖena le ame ƒo, eye woléa blanui. Eyata ne ame aɖe wɔ nuvɔ̃ gã aɖe la, ele be wòaɖe afɔ enumake atrɔ dzime eye wòadi gbɔgbɔmekpekpeɖeŋu tso hamemegãwo gbɔ ale be “gbɔɖemeɣi nava tso Aƒetɔ la [gbɔ]” nɛ. Gbɔdzɔe si woakpɔ la ƒe ɖee nye be woƒe bubu kple sisiɖa agava su wo si.—Dɔwɔwɔwo 3:19, 20.

Ele vevie hã be míadze agbagba ɣesiaɣi adzɔ míaƒe dzitsinya si Biblia na hehee ŋu, eye míagaɖe mɔ naneke naƒo ɖii alo ana wòagbɔdzɔ o. Mía ɖokui dzi ɖuɖu le míaƒe gbesiagbegbenɔnɔ ƒe akpa ɖesiaɖe—le nu ɖuɖu, nu nono, dɔwɔwɔ, modzakaɖeɖe, nuwɔwɔ kple ŋutsuwo alo nyɔnuwo me—akpe ɖe mía ŋu be dzitsinya dzadzɛ nanɔ mía si eye wòana míaɖe Mawu ƒe ŋutikɔkɔe kple bubu afia le míaƒe agbenɔnɔ me.—Korintotɔwo I, 10:31.

Ke ne vodada siwo míewɔ va yi ƒe fɔɖiɖi gaɖea fu na mí kokoko ɖe? Alo ne ŋkuɖoɖo nu gbegblẽ siwo wowɔ ɖe mía ŋu gawɔa fu mí ya ɖe? Esia ate ŋu agblẽ bubu si le mía ŋu me eye wòana míalé blanui vevie. Aleke gbegbe Fia Dawid ƒe nya siwo le Psalmo 34:19 la fa akɔ na mí enye si: “Yehowa tsɔ ɖe amesiwo ƒe dzi gbã gudugudu la gbɔ, eye wòxɔna na amesiwo ƒe gbɔgbɔ woƒo ƒu anyi”! Yehowa le klalo eye elɔ̃ faa be yealé esubɔlawo ɖe te ne ehiã be woakpe akɔ kple blanuiléle kple amemaɖinunyenye ƒe seselelãmewo. Kokoƒoƒo nɛ kple kpekpeɖeŋu didi tso amesiwo dze le gbɔgbɔ me, abe dzila Kristotɔwo, hamemegãwo, kple hamea me tɔ tsitsi bubuwo ene, gbɔ ana bubu kple sisiɖa si nɔ ŋuwò nagasu asiwò.—Yakobo 5:13-15.

Gake ele be míanɔ ŋudzɔ ɖe vovototo si le bubunɔameŋu kple ɖokuidodoɖedzi dome ŋu. Aɖaŋu si Ŋɔŋlɔawo ɖo na míe nye be “[ame] negabu eɖokui gã wu alesi dze o; ke wòabu alesi eƒe susu nanɔ tee la ŋu boŋ, amesiame abe alesi Mawu dzidze xɔse ƒe dzidzenu nɛ ene.” (Romatɔwo 12:3, NW) Togbɔ be enyo be míana bubu nanɔ mía ŋu hã la, míedi be míabu mía ɖokui ame veviwoe akpa alo atsɔ amegbetɔ ƒe bubunɔameŋu atɔtɔ kple ɖokuitɔdidi ƒe agbagbadzedze si gbɔ eme si ame aɖewo tsɔ dia bubu le ame bubuwo gbɔ la o.

Ẽ, Kristotɔwo ƒe nudidie wònye be míatsɔ bubu si le ame bubu ŋu nɛ. Míaƒe ƒometɔwo kple mía hati Kristotɔwo katã dze na míaƒe sisiɖa, bubu, kple asixɔxɔdedeameŋu. Yehowa na bubu kple sisiɖa mía dometɔ ɖesiaɖe vaseɖe afi aɖe eye míaxɔ wo alé wo me ɖe asi. Gake ƒo ye katã ta la, ele be míade bubu deto ɖoƒe kɔkɔ si míaƒe Dziƒofofo, Yehowa Mawu, le kpakple eƒe gãnyenye ŋu.

[Nɔnɔmetata si le axa 31]

Ðeviwo ate ŋu ade bubu nuwɔametɔwo ŋu