Biblia Gɔmeɖeɖe Si Trɔ Xexeame

Esi Mawu ƒe nyagblɔɖila Mose dze Biblia ŋɔŋlɔ gɔme anɔ ƒe si wu 3,500 enye si va yi la, dukɔ sue ɖeka aɖe koe te ŋu xlẽnɛ. (Mose V, 7:7) Nenemae wònɔ elabena dukɔ ma ƒe Hebrigbe gbãtɔ me koe Ŋɔŋlɔawo nɔ. Gake nuwo ava trɔ le ɣeyiɣi aɖewo megbe.

NUSI na Biblia ƒe gbedasia kaka eye wòkpɔ ŋusẽ nyui ɖe amewo dzi le ƒe alafawo me la ƒe akpa gã aɖe tso gbãtɔ si gɔme woɖe—si nye Septuagint la—gbɔ. Nukatae woɖe egɔme? Eye ɖe wòsɔ be woagblɔ be eyae nye Biblia si trɔ xexeamea?

Gbɔgbɔe Ʋã Amewo Wowɔ Gɔmeɖeɖe Sia?

Le ƒe alafa adrelia kple adelia D.M.Ŋ. si me Yudatɔwo nɔ aboyo me le Babilon megbe la, wo dometɔ geɖe megatrɔ yi blema Israel kple Yuda nyigba dzi o. Hebrigbe va zu gbesɔsrɔ̃e na Yudatɔ siwo wodzi le aboyo me. Le ƒe alafa etɔ̃lia D.M.Ŋ. me la, Yudatɔwo ƒe nuto aɖe nɔ Alexandria, Egypt—si nye Hela Fiaɖuƒea ƒe dekɔnuwɔƒe vevi aɖe. Yudatɔ mawo va kpɔ asixɔxɔ si le Ŋɔŋlɔ Kɔkɔeawo gɔmeɖeɖe ɖe Helagbe si va zu wo degbe ɣemaɣi me ŋu.

Va ɖo ɣemaɣi la, Hebrigbe mee woŋlɔ Biblia ƒe gbedasi si tso gbɔgbɔ me la ɖo, eye akpa sue aɖe nɔ gbe si ɖi Aramgbe tututu me. Ðe Mawu ƒe Nyaa gɔmeɖeɖe ɖe gbe bubu me awɔe be magakpɔ ŋusẽ ɖe ame dzi vevie abe nusi tso Mawu ƒe gbɔgbɔ me ene oa, ɖewohĩ be woava se egɔme bubuia? Ðe Yudatɔ siwo wotsɔ Nya sia si tso gbɔgbɔ me de asi na la aɖe gbedasia gɔme bubuia?—Psalmo 147:19, 20; Romatɔwo 3:1, 2.

Nya vevi siawo na vɔvɔ̃ ɖo amewo. Gake dzitsitsi be ne womekpɔ nyuie o Yudatɔwo magava se Mawu ƒe Nyaa gɔme o la va ɖu susu bubu ɖesiaɖe dzi. Wova tso nya me be woaɖe Torah—si nye Biblia ƒe agbalẽ gbãtɔ atɔ̃ siwo Mose ŋlɔ—la gɔme ɖe Helagbe me. Mɔ siwo dzi woto ɖe egɔme la va zu glitoto. Wogblɔ le Letter of Aristeas me be Egipte-fia Ptolemy II (285-246 D.M.Ŋ.) di be woaɖe Mose ƒe Agbalẽ Atɔ̃awo (alo, Torah) la gɔme ɖe Helagbe me na ye bene yeatsɔ ada ɖe fiawo ƒe agbalẽdzraɖoƒe. Ede dɔa asi na Yuda-gbalẽnyalagã 72 siwo tso Israel va Egipte va wu egɔmeɖeɖe nu le ŋkeke 72 me. Woxlẽ gɔmeɖeɖe sia na Yudatɔ siwo nɔ nutoa me, eye wogblɔ be enyo hede pɛpɛpɛ. Wogava ɖe ami ɖe ŋutinya sia hegblɔ be togbɔ be woɖe gbegɔmeɖela ɖesiaɖe ɖe vovo ɖe xɔ vovovo me hã la, woƒe gɔmeɖeɖeawo sɔ kple wo nɔewo eye nya ku ɖeka hã meto vovo o. Gbegɔmeɖela 72 ŋuti glitoto sia na wova yɔ Helagbe me Biblia gɔmeɖeɖe sia be Septuagint, si wotu ɖe Latingbe me nya si gɔmee nye “Blaadre” dzi.

Egbegbe gbalẽnyalagã akpa gãtɔ da asi ɖe edzi be Letter of Aristeas nye nuŋlɔɖi si me nyawo wokpa. Woxɔe se hã be Yudatɔ siwo nɔ Alexandria ƒe amegãwoe do susua ɖa be woaɖe egɔme ke menye Ptolemy II ye o. Ke hã Yudatɔ xexemenunyala Philo si tso Alexandria kple Yudatɔ ŋutinyaŋlɔla Josephus ƒe nuŋlɔɖiwo kpakple Talmud la ɖee fia be ƒe alafa gbãtɔ me Yudatɔ geɖe xɔe se be Septuagint la tso gbɔgbɔ me abe alesi tututu Ŋɔŋlɔ gbãtɔawo tso gbɔgbɔ mee ene. Ðikeke mele eme o be alesi wodze agbagba be Septuagint la nanyo Yudatɔ geɖe ŋu le xexeame katãe wɔe be dzixɔse sia va bɔ.

Togbɔ be Mose ƒe agbalẽ atɔ̃awo gɔmee woɖe gbã hã la, mlɔeba wova yɔa ŋkɔ Septuagint na Hebri Ŋɔŋlɔ bliboa si gɔme woɖe ɖe Helagbe me. Ƒe alafa ɖeka alo esi wu nenema siwo gakplɔe ɖo mee wova ɖe agbalẽ mamlɛawo gɔme le. Womeƒo ƒu ɖe Septuagint la gɔmeɖeɖe ŋu wɔ o, ke boŋ ɖe woɖe egɔme kakɛkakɛ vivivi hafi wu enu. Gbegɔmeɖelaawo ƒe ŋutetewo kple Hebrigbea nyanya le vovovo. Woɖe agbalẽawo ƒe akpa gãtɔ gɔme kplalaa, eye wo dometɔ aɖewo kura ganɔ kplalaa wu, gake gɔmeɖeɖe bubuwo ya nyo. Woɖe wo dometɔ aɖewo me nyawo gɔme legbee eye ɖewo le kpuie. Va ɖo ƒe alafa evelia D.M.Ŋ. me la, Hebri Ŋɔŋlɔawo katã nɔ Helagbe me woate ŋu axlẽ. Togbɔ be gɔmeɖeɖea meto mɔ ɖeka o hã la, dɔ si Hebri Ŋɔŋlɔawo gɔmeɖeɖe ɖe Helagbe me va wɔ la yi ŋgɔ wu nusi gbegɔmeɖelaawo kpɔ mɔ na.

Yafet Anɔ Sem ƒe Agbadɔwo Mea?

Esi Talmud la nɔ nu ƒom tso Septuagint ŋu la, eyɔ nya si le Mose I, 9:27, si gblɔ be: “Yafet . . . [anɔ] Sem ƒe agbadɔwo me.” (Megillah 9b, Babilonia Talmud) Talmud la fia le kpɔɖeŋunyagbɔgblɔ nu be le Helagbe si wotsɔ ŋlɔ Septuagint la ƒe nyonyo ta la, Yafet (amesi nye Yawan si me Helatɔwo dzɔ tso fofo) nɔ Sem (Israel-viwo ƒe tɔgbuitɔgbui) ƒe agbadɔwo me. Gake woagate ŋu agblɔe bubui be le Septuagint ƒe nya nu la, Sem nɔ Yafet ƒe agbadɔwo me. Aleke wònɔe?

Esi Aleksanda Gãtɔ ɖu aʋa dzi le ƒe alafa enelia D.M.Ŋ. ƒe nuwuwu lɔƒo megbe la, wodze agbagba vevie be woana Helatɔwo ƒe gbe kple dekɔnuwo naxɔ aƒe ɖe anyigba siwo dzi woɖu la katã dzi. Nuwɔna siae woyɔ be Amewo Wɔwɔ Helatɔwoe. Yudatɔwo va kpɔe be wonɔ dekɔnuwo zim ɖe yewo dzi enuenu. Ne Helatɔwo ƒe dekɔnuwo kple xexemenunya va kpe wo dzi la, ke Yudatɔwo ƒe subɔsubɔ magava ɖi nu o. Nukae woawɔ atsɔ atsi nyaƒoɖeamenua nu?

Yudatɔ Biblia gɔmeɖela Max Margolis gblɔ susu si anye eya hã tae Yudatɔwo ɖe Septuagint la gɔme be: “Ne mí katã míatsɔe be Yudatɔwoe do susua ɖa la, ke anye susu bubu aɖe hã tae, si nye be, bene Trɔ̃subɔdukɔwo nanya Yudatɔwo ƒe Sea eye be xexeame nadze sii be dekɔnu aɖe le Yudatɔwo si si le tasɔsɔ me kple Helatɔwo [Greecetɔwo] ƒe nunya.” Eyata ɖewohĩ nana be Hebri Ŋɔŋlɔawo nasu Helagbedolawo si nye ɖokuitaʋiʋli ƒomevi aɖe kple tsitretsiɖeŋu.

Afɔ si Aleksanda ɖe be yeawɔ amewo Helatɔwoe wɔe be Helagbe va zu gbe si wodona le dukɔwo me le xexeame katã. Esime Romatɔwo va xɔ eƒe fiaɖuƒea gɔ̃ hã la, Helagbe si bɔ (alo, Koine) kpɔtɔ nye gbe si wozãna le asitsatsa kple kadodo me le dukɔwo dome. Eɖanye nu wònye woɖo wɔ alo nɔnɔmeawoe ɖe mɔ ɖe egɔmeɖeɖe ŋu o, eteƒe medidi o Hebri Ŋɔŋlɔawo ƒe Septuagint gɔmeɖeɖea va ɖo ame geɖe siwo menye Yudatɔwo o eye womenya Mawu kple Yudatɔwo ƒe Sea tsã o ƒe aƒewo me eye wònyo wo ŋu. Emetsonuawo wɔ nuku ŋutɔ.

Trɔ̃subɔla-Zu-Yudatɔwo Kple Mawu Vɔ̃lawo

Philo ŋlɔ le ƒe alafa gbãtɔ M.Ŋ. me be “menye Yudatɔwo koe de asixɔxɔ Mose ƒe sea ƒe nyonyo kple gãnyenye ŋu o, ke dukɔ bubuwo katã hã de asixɔxɔ eŋu.” Yudatɔ ŋutinyaŋlɔla Joseph Klausner gblɔ le Yudatɔ siwo menɔ Palestina o ŋu be: “Esesẽ be woaxɔe ase be Palestina sue ma mee Yudatɔ miliɔn gbogbo siawo tso va ƒo ƒu. Míate ŋu asẽ nu o be ŋutsu kple nyɔnu trɔ̃subɔla zu Yudatɔ gbogbo siwo va kpe wo hã gbɔe wòtso be wosɔ gbɔ nenema gbegbe.”

Gake nya wɔdɔɖeamedzi siawo ɖeɖe mekɔ nusianu me o. Agbalẽŋlɔla Shaye J. D. Cohen, amesi nye Yudatɔwo ƒe ŋutinyafialagã gblɔ be: “Trɔ̃subɔdukɔ me tɔ geɖe, ŋutsuwo kple nyɔnuwo siaa, trɔ dzime ɖo Yuda-subɔsubɔ me le ƒe alafa mamlɛawo D.M.Ŋ. me kple le ƒe alafa eve gbãtɔawo M.Ŋ. me. Gake trɔ̃subɔdukɔ me tɔ siwo xɔ Yuda-subɔsubɔ ƒe akpa aɖewo dzi se evɔ wometrɔ dzime o la sɔ gbɔ wu kura gɔ̃ hã.” Klausner kple Cohen siaa yɔ amesiawo siwo meɖo ha la me o be wonye Mawu vɔ̃lawo, eye enye nyagbɔgblɔ si wozãna enuenu le ɣemaɣi ƒe Helagbe me gbalẽwo me.

Vovototo kae le trɔ̃subɔla zu Yudatɔ kple Mawu vɔ̃la dome? Trɔ̃subɔla zu Yudatɔwo nye amesiwo trɔ dzime keŋkeŋ, eye wobua wo Yudatɔwoe le go sia go me elabena woxɔ Israel ƒe Mawu la (wogbe mawu bubu ɖesiaɖe), wotso aʋa na wo, eye wova zu Israel-dukɔa me tɔwo. Gake Cohen gblɔ le Mawu vɔ̃lawo ŋu be: “Togbɔ be trɔ̃subɔdukɔ me tɔ siawo wɔna ɖe Yudatɔwo ƒe kɔnu geɖe dzi eye wodea ta agu na Yudatɔwo ƒe Mawu le mɔ vovovo nu hã la, womebu wo ɖokui Yudatɔwoe o eye ame bubuwo hã mebu wo Yudatɔwoe o.” Klausner gblɔ le wo ŋu be “wole vedomesi,” elabena woxɔ Yuda-subɔsubɔ eye “wowɔa eƒe kɔnu aɖewo dzi, gake . . . wometrɔ zu Yudatɔwo keŋkeŋ o.”

Ðewohĩ nusiwo me wo dometɔ aɖewo dzro kple Yudatɔ siwo wɔ dutanyanyuigbɔgblɔdɔ lae na wova tsɔ ɖe le Mawu me alo esi wokpɔe be Yudatɔwo ƒe agbenɔnɔ, kɔnu, kple nuwɔna to vovo tae. Ke hã Septuagint lae nye dɔwɔnu vevitɔ si na Mawu vɔ̃la siawo va nya nu tso Yehowa Mawu ŋu. Togbɔ be mɔ aɖeke meli si dzi míato anya ƒe alafa gbãtɔa me Mawu vɔ̃lawo ƒe agbɔsɔsɔme o hã la, ɖikeke mele eme o be Septuagint la kaka Mawu ŋuti sidzedze aɖe sinu ɖe Roma Fiaɖuƒea katã me. Woto Septuagint la dzi nɔ gɔmeɖoanyi vevi aɖe hã ɖom.

Septuagint la Le Eme Wodzra Mɔ Dzi Ðo

Septuagint la wɔ akpa ɖedzesi aɖe le Kristotɔnyenye ƒe gbedasia kaka me. Yudatɔ Helagbedola geɖe nɔ amesiwo nɔ anyi woɖo Kristo-hamea gɔme anyi le ƒe 33 M.Ŋ. ƒe Pentekoste dzi dome. Trɔ̃subɔla zu Yudatɔwo hã nɔ amesiwo zu Kristo ƒe nusrɔ̃lawo le gɔmedzeɣi mawo me dome. (Dɔwɔwɔwo 2:5-11; 6:1-6; 8:26-38) Esi taɖodzinuae nye be Yesu ƒe apostolowo kple nusrɔ̃la gbãtɔ bubuawo ƒe nuŋlɔɖi siwo tso gbɔgbɔ me naɖo ame gbogbo alesi dze gbɔ ta la, woŋlɔe ɖe Helagbe me.a Eyata nya geɖe siwo woyɔ tso Hebri Ŋɔŋlɔawo me ɖe Kristotɔwo ƒe Hela Ŋɔŋlɔawo me la tso Septuagint la me.

Menye dzɔdzɔme Yudatɔwo kple trɔ̃subɔla zu Yudatɔwo koe nɔ klalo be yewoaxɔ Fiaɖuƒegbedasia o. Kornelio, Trɔ̃subɔdukɔ me tɔ la nye “mawumeme, eye wòvɔ̃a Mawu kple eƒe aƒe blibo la; amesi wɔ dɔmenyonu geɖewo na amewo, eye wòdoa gbe ɖa na Mawu ɖaa.” Le ƒe 36 M.Ŋ. me la, Kornelio kple eƒe ƒomea kpakple ame bubu siwo ƒo ƒu ɖe eƒeme lae nye Trɔ̃subɔdukɔ me tɔ gbãtɔ siwo wonyrɔ wozu Kristo yomedzelawo. (Dɔwɔwɔwo 10:1, 2, 24, 44-48; tsɔe sɔ kple Luka 7:2-10.) Esime apostolo Paulo zɔ mɔ to Asia Sue kple Greece bliboa la, eɖe gbeƒã na Trɔ̃subɔdukɔ me tɔ siwo vɔ̃a Mawu xoxo kpakple na “Helatɔ, siwo vɔ̃a Mawu.” (Dɔwɔwɔwo 13:16, 26; 17:4) Nukae wɔe be Kornelio kple Trɔ̃subɔdukɔ me tɔ bubu mawo nɔ klalo be yewoaxɔ nyanyuia? Septuagint la nɔ eme wodzra mɔa dzi ɖo. Agbalẽnyalagã aɖe gblɔ be Septuagint la nye “agbalẽ vevi aɖe ale gbegbe be eya manɔmee la, anye ne womanya Kristodukɔa kple ɣetoɖoƒetɔwo ƒe kɔnu o.”

Womegava Bu Septuagint la be ‘Etso Gbɔgbɔ Me’ O

Alesi wova nɔ Septuagint la zãm fũ wɔe be mlɔeba la, susu totrowo va ɖo Yudatɔwo si. Le kpɔɖeŋu me ne Yudatɔwo le nu me dzrom kple Kristotɔwo la, wohea nya be womeɖe Septuagint la gɔme nyuie o. Kaka ƒe alafa evelia M.Ŋ. naɖo la, Yudatɔwo va trɔ megbe de gɔmeɖeɖe si wokafu tsã be etso gbɔgbɔ me la kura. Rabiwo gbe xotutu si ku ɖe gbegɔmeɖela 72 ŋu hegblɔ be: “Ŋkeke ɖeka aɖe koe wòdzɔ be ame tsitsi atɔ̃ ŋlɔ Torah la ɖe Helagbe me na Fia Ptolemy, eye gbemagbe nye ŋkeke vɔ̃ na Israel abe alesi gbesigbe wowɔ sikanyivia nye ŋkeke vɔ̃ ene, elabena womete ŋu ɖe Torah la gɔme nyuie o.” Bene woakpɔ egbɔ be nuwo sɔ kple rabiwo ƒe nukpɔsusuwo tututu la, rabiawo na be wogaɖe yeye gɔme ɖe Helagbe me. Trɔ̃subɔla zu Yudatɔ aɖe si ŋkɔe nye Aquila, amesi nye rabi Akiba ƒe nusrɔ̃vie ɖe egɔme le ƒe alafa evelia M.Ŋ. me.

Yudatɔwo va dzudzɔ Septuagint la zazã, gake eva zu Katoliko Ha si nɔ dodom yeyee la ƒe “Nubabla Xoxo” si dzi woda asi ɖo vaseɖe esime Jerome ƒe Latin Vulgate va xɔ ɖe eteƒe. Togbɔ be Septuagint ƒe gɔmeɖeɖe bubu aɖeke mate ŋu axɔ ɖe gbãtɔ teƒe o hã la, ewɔ akpa vevi aɖe le Yehowa Mawu kple eƒe Fiaɖuƒe si le Yesu Kristo si me ŋuti sidzedze kaka me. Nyateƒee, Septuagint la nye Biblia gɔmeɖeɖe si trɔ xexeame.

[Etenuŋɔŋlɔ]

[Nɔnɔmetata si le axa 31]

Ame geɖe siwo Paulo ɖe gbeƒã na la se “Septuagint” la gɔme

[Nɔnɔmetata Tsoƒe si le axa 29]

Le Israel Antiquities Authority ƒe mɔɖeɖe nu