Ðe Nàte Ŋu Axɔ Biblia Dzi Asea?

BIBLIA dzixɔxɔse kpɔtɔ nye nusi bɔ, le egbe xexe sia me gɔ̃ hã. Le kpɔɖeŋu me, le Gallup ƒe numekuku aɖe si wowɔ nyitsɔ laa me le Amerikatɔwo dome la, ame 80 le alafa me xɔe se be Biblia nye Mawu ƒe Nya si tso gbɔgbɔ me. Ne alafa memamã sia yi ŋgɔ wu le wò nutoa me loo alo mede nenema o la, àte ŋu akpɔe be edzixɔsela siawo kpɔa mɔ be woafia Biblia yewo le sɔleme. Gake zi geɖe la, womefiaa wo o. Le kpɔɖeŋu me, bu fuwɔwɔ luʋɔ la le ku megbe ƒe nufiafia la ŋu kpɔ.

Ðe Biblia ƒe akpa aɖe fia nu tso ŋutiklɔdzo alo dzomavɔ ŋua? Egbea, Kristodukɔa ƒe agbalẽnyala geɖe aɖo ŋu be ao. New Catholic Encyclopedia gblɔ be: “Nusi wova de dzesii mlɔeba enye be, xotutu dzie wotu Katolikotɔwo ƒe ŋutiklɔdzo nufiafia la ɖo, menye Ŋɔŋlɔ Kɔkɔea dzie o.” A Dictionary of Christian Theology gblɔ le dzomavɔ ŋuti be: “Míekpɔ dzomavɔ le blematɔwo ƒe mawunyagbɔgblɔ me le Nubabla Yeye la me o.”

Le nyateƒe me la, England Sɔlemeha ƒe nufiafiamekuha ƒe nya si wodo ɖa be ele be woadzudzɔ dzomavɔ nufiafia la keŋkeŋ ɖi hoo le nyadzɔdzɔwo me. Litchfield Bisiɔpwo ƒe Sɔleme ƒe nunɔlawo ƒe tatɔ Ðk. Tom Wright gblɔ be alesi woɖɔ dzomavɔe va yi tsã la na be “wòdze abe ame vɔ̃ɖivɔ̃ɖi aɖee Mawu nye ene eye wòna wòtsi susu me na ame gbogbo aɖewo.” Nufiafiamekuha la ƒe nyatakaka la gblɔ le dzomavɔ ŋu be “meli kura o.”a Nenema ke New Catholic Encyclopedia la hã gblɔ le Katolikotɔwo ƒe nukpɔsusu ŋu be: “Egbe ƒe mawuŋununya bua dzomavɔnya la be enyãa amewo ɖa le Mawu ŋu.”

Le nyateƒe me la, nusi Biblia fia ku ɖe luʋɔ ŋuti la tsi tre ɖe ŋutiklɔdzo kple dzomavɔ ƒe nufiafiawo ŋuti. Zi geɖe la, Biblia ƒoa nu tsoa luʋɔwo ƒe kuku ŋuti. “Luʋɔ, si wɔ nuvɔ̃ la, eyae aku.” (Xezekiel 18:4) Biblia gblɔ be ame kukuwo meganya naneke o, womegasea veve o. “Agbagbeawo nyae be, yewogbɔna kuku ge, ke kukuawo menya naneke o.” (Nyagblɔla 9:5) Mɔkpɔkpɔ si le Biblia si na ame kukuwoe nye tsitretsitsi le etsɔme. Esi Yesu xɔlɔ̃ Lazaro ku la, Yesu tsɔ ku sɔ kple alɔ̃dɔdɔ. Lazaro nɔvinyɔnu Marta ɖee fia be yeka ɖe mɔkpɔkpɔ si Biblia fia la dzi esi wògblɔ be: “Menyae bena, atsi tre le tsitretsitsi la me le nuwuwuŋkeke la dzi.” Esi Yesu fɔ Lazaro ɖe tsitre la, eɖo kpe mɔkpɔkpɔ ma ƒe nyateƒenyenye dzi na ameƒomea.—Yohanes 5:28, 29; 11:11-14, 24, 44.

Ŋutinyaŋlɔlawo ɖee fia be menye Biblia mee luʋɔ makumaku si le vovo ƒe amesinɔnɔ nufiafia la tso o ke boŋ Hela xexemenunya mee wòtso. New Catholic Encyclopedia la de dzesii be blema Hebritɔwo mebui be ŋutilã si wokpɔna kple luʋɔ si womekpɔna o ye wotsɔ wɔ amee o. Egblɔ tso Hebritɔwo ƒe dzixɔse ŋuti be: “Esi agbegbɔgbɔ ɖo ame gbãtɔ si Mawu tsɔ anyi mee me la, eva zu ‘ame gbagbe’ (Mose I, 2.7). Womebu ku be enye nu eve si le ame me la dome mamã abe alesi wòle le Hela xexemenunya gome ene o; ne agbegbɔgbɔ la do le ame me la, ezua ‘ame kuku’ (Mose III, 21.11; Mose IV, 6.6; 19.13). Le ɖesiaɖe gome la, nya ‘ame’ asɔ na Hebrigbe me nya [neʹphesh], si gɔme woɖena zi geɖe be ‘luʋɔ’ la, si le nyateƒe me sɔ kple ame la ŋutɔ.”

Numekugbalẽ ma ke de dzesii be nyitsɔ laa sia la, Katolikotɔwo ƒe agbalẽnyalawo “da asi ɖe edzi be Nubabla Yeye la mefia nu tso luʋɔ makumaku ŋuti le alesi Helatɔwo se egɔmee nu o.” Eƒo eta be: “Menye xexemenunya ƒe nususugblɔwo mee woakpɔ kuxia gbɔkpɔnu ŋutɔŋutɔ le o ke boŋ woakpɔe le Tsitretsitsi ƒe nunana si menye dzɔdzɔmetɔ o la me.”

Biblia alo Kɔnyinyia?

Gake aleke nukpɔsusu si wometu ɖe Biblia dzi o wɔ ge ɖe sɔlemehawo ƒe nufiafia me? Sɔlemeha geɖe gblɔna be Bibliae nye yewoƒe nufiafiatsoƒe si ƒo ɖesiaɖe ta. Le kpɔɖeŋu me, eteƒe medidi boo o, Papa John Paul II gblɔ alesi wòhiãe be “hameviwo naxɔ [Ŋɔŋlɔa] be eyae nye nyateƒe akuakua eye be eyae nye míaƒe xɔse ƒe dzidzenu kɔkɔtɔ kekeake.” Gake ame geɖe lɔ̃ ɖe edzi be egbea Kristodukɔa ƒe nufiafiawo mesɔ kple ƒe alafa gbãtɔ me Kristotɔwo tɔ o. Sɔlemeha akpa gãtɔ bua tɔtrɔ siawo be wonye tɔtrɔ siwo nɔ gegem ɖe sɔlemehawo ƒe nufiafia me vivivi. Gawu la, Katolikoha la tsɔe be sɔlemeha ƒe kɔnyinyiwo kple Ŋɔŋlɔawo ƒe ŋusẽ sɔ. New Catholic Encyclopedia la gblɔ be sɔlemeha la “menɔa te ɖe Ŋɔŋlɔa ɖeɖeko dzi lɔ̃na ɖe nyateƒe aɖeke dzi kɔnyinyiwo manɔmee alo nɔa te ɖe kɔnyinyiwo ɖeɖeko dzi Ŋɔŋlɔawo manɔmee o.”

Le ŋutinya me la, sɔlemehawo tsɔ nufiafia siwo wotu ɖe kɔnyinyiwo ɖeɖeko dzi ɖɔ li Ŋɔŋlɔawo ƒe nufiafiawoe. Le nyateƒe me la, sɔlemeha geɖe gblɔna be Biblia ƒe nufiafiawo mesɔ o. Le kpɔɖeŋu me, New Catholic Encyclopedia la gblɔ be “ne míetsɔ egbe ƒe dzɔdzɔmeŋutinunya kple ŋutinya ɖo Biblia me nyawo ŋu la, edzena ƒã be emenya geɖe menye nyateƒe o.” Egblɔ kpee le Biblia ƒe nufiafia si ku ɖe ame kukuwo ƒe naneke manyamanya ŋuti be: “Le subɔsubɔnyawo me kura gɔ̃ hã la, Nubabla Xoxoa ɖo kpe edzi be womenya nu bliboe le . . . agbenɔnɔ le ku megbe ŋu o.” Numekugbalẽa yɔ Psalmo 6:5 (kpukpui 6 le Eʋegbe Biblia kple gɔmeɖeɖe bubu aɖewo me) si gblɔ be: “Ŋkuɖoɖo dziwò meli le ku me o, eye ameka akafu wò le tsiẽƒe[?]” abe nya sia ƒe kpɔɖeŋu ene. Protestanttɔwo ƒe osɔfosukuwo kple kɔledzi aɖewo megafiaa nu be vodada aɖeke mele Biblia me o. Le go bubu me la, Katolikoha la susunɛ be nufiafia ƒe ŋusẽ le ye si yeatsɔ aɖe nusi Biblia fia gɔmee. Ðewohĩ àbia be ‘Ke ne gɔmeɖeɖe siawo dze abe ɖe wotsi tre ɖe Ŋɔŋlɔawo ŋuti ya ene ɖe?’

Ŋɔŋlɔawo ƒe Vevienyenye

Yesu yɔ nya tso Ŋɔŋlɔawo me edziedzi abe kpeɖodzi ene eye wòdzea egɔme be: “Woŋlɔ ɖi bena.” (Mateo 4:4, 7, 10; Luka 19:46) Le nyateƒe me la, esi Yesu ƒo nu tso ame ƒe srɔ̃gbenɔnɔ ŋuti la, menye Hela xexemenunya ƒe nyasusugblɔ dzie wòtui ɖo o ke boŋ Mose ƒe xexemewɔwɔ ŋuti nuŋlɔɖia dzie wòtui ɖo. (Mose I, 1:27; 2:24; Mateo 19:3-9) Edze ƒã be Yesu bu Ŋɔŋlɔawo be Mawu ƒe gbɔgbɔ mee wotso eye be wonye nyateƒe. Le gbedodoɖa na Mawu me la, egblɔ be: “Wò nya la enye nyateƒe.”—Yohanes 17:17.b

Biblia ŋlɔ alesi Yesu he nyae ɖe eƒe ŋkekea me subɔsubɔhaŋgɔnɔlawo ŋui be: “Mieɖe Mawu ƒe se la ɖa nyuie, bena mianyi mia ŋutɔwo ƒe kɔ. . . . Miena Mawu ƒe nya la tsi mabumabu le miaƒe kɔ, si mieɖo anyi la ŋuti.” (Marko 7:6-13) Nenema ke apostolo Paulo hã meɖe mɔ wozii ɖe edzi be wòtsɔ Hela xexemenunya alo kɔnyinyi gbegblẽwo de eƒe nufiafia me o. Exlɔ̃ nu be: “Mikpɔ nyuie, bena ame aɖeke nagakplɔ mi ayi aboyo to xexemenunya kple beble dzodzro me o, le amewo ƒe nuɖoanyi la nu.” (Kolosetɔwo 2:8; Korintotɔwo I, 1:22, 23; 2:1-13) Kɔnyinyi alo nufiafia aɖewo nɔ anyi siwo me Paulo de dzi ƒo na Kristotɔwo be woalé ɖe asi, gake Ŋɔŋlɔawo dzie wotu wo ɖo eye wowɔ ɖeka kplii hã. (Tesalonikatɔwo II, 2:13-15) Paulo ŋlɔ be: “Ŋɔŋlɔawo katã tso Mawu ƒe gbɔgbɔ me eye enye viɖenu hena nufiafia, na mokaka, na nuwo ɖɔɖɔɖo dzɔdzɔe, na amehehe, si le dzɔdzɔenyenye me, bene Mawu ƒe ame la nade blibo keŋkeŋ, anɔ dzadzraɖo ɖi keŋkeŋ hena dɔ nyui sia dɔ nyui wɔwɔ.”—Timoteo II, 3:16, 17, NW.

Paulo kpɔe do ŋgɔ be woava ɖe asi le Ŋɔŋlɔawo ŋuti. Ena Timoteo nya be: “Ɣeyiɣi le vava ge, esime womaxɔ nufiafia si le blibo la o, . . . Eye woaɖe to ɖa le nyateƒe la ŋuti.” Exlɔ̃ nu Timoteo be: “Ke wò la nɔ mo xexi le nuwo katã me.” (Timoteo II, 4:3-5) Gake le mɔ ka nu? Mɔ ɖekae nye be ‘wòaɖɔ ʋu.’ Helagbe me nyagɔmeɖegbalẽ aɖe ɖe Biblia me nya sia gɔme be “lɔlɔ̃ be woasrɔ̃ nu ahabu nane ŋu akpaɖekedzimademadee.” Luka zã nyagbɔgblɔ sia tsɔ ɖɔ amesiwo ɖo to Paulo le Beroia le ƒe alafa gbãtɔ me. Nusi fiam Paulo le la nye nu yeye na wo, eye womedi be woable yewo o. Luka kafu wo le nya siawo me ale: “[Beroiatɔwo] ɖɔ ʋu wu amesiwo le Tesalonika, woawo la woxɔ nya la kple dzi faa, eye wole ŋɔŋlɔawo me dzrom gbesiagbe be, nusiawo le eme hã.” Beroiatɔwo ƒe ʋuɖɔɖɔ mewɔe be woke ɖi hegbe be yewomaxɔ naneke dzi ase o. Ke boŋ nusi do tso woƒe numekukua mee nye be “wo dome ame geɖewo xɔe se.”—Dɔwɔwɔwo 17:11, 12.

Agbenɔnɔ ɖe Biblia nu ƒe Viɖewo

Wonya Kristotɔ gbãtɔwo ƒe wɔwɔ ɖe Biblia me nyawo dzi kple ɖokuitsɔtsɔsavɔ ƒe lɔlɔ̃ si le wo me nyuie. Gake “mawusosroɖa ƒe nɔnɔme” le ame geɖe si egbea “gake wogbe eƒe ŋusẽ la.” (Timoteo II, 3:5) Kristotɔnyenye ƒomevi ɖesiaɖe si mesɔ kple ƒe alafa gbãtɔ me tɔ o la mate ŋu akpɔ ŋusẽ gobi aɖeke ɖe amewo ƒe agbenɔnɔ dzi o. Ðe wòate ŋu anye esia tae míekpɔa ŋutasesẽ ƒe dzidziɖedzi, agbegbegblẽnɔnɔ, ƒomewo ƒe gbagbã, kple ŋutilãmenudidi le Kristodukɔa ƒe akpa gãtɔ mea? Le “Kristotɔwo” ƒe anyigba aɖewo dzi la, subɔsubɔha ɖeka me tɔwo wɔa gbevovovodolawo dome ʋa dziŋɔwo kura gɔ̃ hã.

Ðe Beroiatɔwo ƒe ʋuɖɔɖɔ ƒe gbɔgbɔ la megali oa? Ðe ame aɖewo li egbea siwo xɔ Biblia dzi se henɔa agbe ɖe enua?

Encyclopedia Canadiana gblɔ be: “Yehowa Ðasefowo ƒe dɔ la nye agbegbɔgbɔ blema Kristotɔnyenye si ƒe agbe Yesu kple eyomedzelawo nɔ le ƒe alafa gbãtɔ kple evelia me le mía ŋɔli me kple egbugbɔgaɖoanyi.” New Catholic Encyclopedia gblɔ tso Ðasefoawo ŋu be: “Wobua Biblia be eyae nye yewoƒe dzixɔse kple agbenɔnɔ ƒe dzidzenu tsoƒe.”

Ðikeke mele eŋu o be esiae nye susu vevi aɖe si tae wonya Yehowa Ðasefowo le xexeame godoo be wokpɔa gbɔgbɔmedzidzedze, wonɔa anyi kple amewo le ŋutifafa kple dzidzɔ me. Eyata míele dzi dem ƒo na míaƒe nuxlẽlawo be woasrɔ̃ nu geɖe tso Biblia ƒe nufiafia siwo ɖea vi na ame le gbɔgbɔ me la ŋuti. Ne míedzi míaƒe sidzedze ɖe edzi la, ate ŋu ana be míagaka ɖe Biblia dzi wu eye míaƒe Mawu dzixɔxɔse me nagasẽ ɖe edzi. Viɖe mavɔ siwo míakpɔ tso xɔse sia ƒomevi me la wu gbɔgblɔ.

[Etenuŋɔŋlɔwo]

[Nɔnɔmetata si le axa 6]

Apostolo Paulo kple ame bubuwo ɖe gbeƒã le asime

[Nɔnɔmetata si le axa 7]

Yehowa Ðasefowo “[bua] Biblia be eyae nye yewoƒe dzixɔse kple agbenɔnɔ ƒe dzidzenu tsoƒe”