Ðe Mabia Gadodo Nɔvinyea?

SIMON ƒe vi suetɔ dze dɔ eye ehiã be woana atikee kaba. Gake Simon da ahe ale gbegbe be mate ŋu aƒlee o. Nukae wòate ŋu awɔ? Ga le ehavi Kristotɔ aɖe si woyɔna be Michael si wu eyama. Ðewohĩ Michael ado gaa nɛ. Gake Simon nya le eƒe dzi me be, kakaɖedzi mele ye si be yeate ŋu agbugbɔ gaa yii o.a

Michael tɔtɔ esi Simon tsɔ nyaa ɖo eŋkume. Ede dzesii be hiahiã li nyateƒe gake ewɔ nɛ be Simon mate ŋu agbugbɔ gaa vɛ o elabena agbagba ŋutɔe wòdzena hafi eƒe ƒomea kpɔa nu ɖuna. Nukae wòle be Michael nawɔ?

Le dukɔ geɖe me la, nusiwo nu amewo nɔa agbe ɖo te ŋu gena le wo si kpata eye ga alo nugblẽfexexe ƒe ɖoɖo aɖeke menɔa anyi na wo woatsɔ axe kɔdzi fewoe o. Ðewohĩ womakpɔ ga hã ado le gadzraɖoƒe o alo be deme si woaxɔ la lolo akpa. Ne nya kpata aɖe do mo ɖa la, ɖewohĩ egbɔkpɔnu si li koe nye be woado ga le xɔlɔ̃ aɖe gbɔ. Hafi nàbia gadodo la, nya vevi aɖewo li siwo ŋu wòle be nàbu.

Bu Agba si Wònye Ŋu

Mɔfiamewo le Ŋɔŋlɔawo me na amesi gbɔ wodo ga le kple amesi wodo ga na siaa. Ne míewɔ ɖe aɖaŋuɖoɖo siawo dzi la, míate ŋu aƒo asa na nyaʋiʋli kple dzivenya geɖe.

Le kpɔɖeŋu me, Biblia ɖo ŋku edzi na mí be mele be míatsɔ gadodo ƒe nya nu tsɛ o. Apostolo Paulo xlɔ̃ nu Roma Kristotɔwo be: “Miganyi naneke ƒe fe le ame aɖeke si o, negbe mia nɔewo lɔlɔ̃ ƒe fe ko; elabena amesi ke le ame bubu lɔ̃m la, ewu se la nu.” (Romatɔwo 13:8) Esɔ be nusi ƒe fe wòle be Kristotɔ nanyi le amewo si nanye lɔlɔ̃ ƒe fe ko. Le esia ta, míate ŋu abia mía ɖokuiwo gbã be, ‘Ðe ga sia dodo hiã ŋutɔŋutɔa?’

Ne ŋuɖoɖoa nye ẽ la, ekema nunya le eme be míabu nusiwo fenyinyi hena vɛ ŋuti. Yesu Kristo ɖee fia be nyametsotso veviwo wɔwɔ bia tamebubu kple ɖoɖowɔwɔ nyuie. Ebia eƒe nusrɔ̃lawo be: “Elabena ameka le mia dome, ne ele didim be, yeatu mɔ̃ la, mabɔbɔ nɔ anyi gbã, eye wòabu eŋu kɔnta, ne nu le esi, be wòawu enu la o mahã?” (Luka 14:28) Míate ŋu awɔ gɔmeɖose sia ŋudɔ ne míele gadodo le nɔvi aɖe si ŋu bum. Agba si le gadodo me ŋu bubu fia be míabu alesi míaxe gae kple ɣeyiɣi si míaxee ŋu.

Amesi ado gaa na ame kpɔ mɔ anya mɔ si dzi míato agbugbɔ gaa vɛ kple ɣeyiɣi si míagbugbɔe vɛ. Ne míeda nyaawo kpɔ nyuie la, míate ŋu ana ŋuɖoɖo siwo ŋu kakaɖedzi le lae. Ðe míebu nusi wòbia be míagbugbɔ gaa ayii le ɣeyiɣi si sɔ me ŋua? Le nyateƒe me la, anɔ bɔbɔe be míagblɔ na mía nɔvia be: “Magbugbɔe vɛ kpuie. Ka ɖe dzinye.” Gake ɖe manyo be míakpɔ nyaa gbɔ ale be kakaɖedzi nanɔ eŋu oa? Ele be míaɖoe tso gɔmedzedzea be míagbugbɔ gaa yii, elabena nu mae Yehowa di tso mía si. Psalmo 37:21 gblɔ be: “Ame vɔ̃ɖi la doa nugbana, eye mexenɛ o.”

Ne míebu alesi míaxe gadodoa kple ɣeyiɣi si míaxee ŋu alea la, ana míaɖo ŋku edzi be agba gã aɖee nye ma míele tsɔtsɔm. Esia ana míanyi fe dzodzro o. Ne míate ŋu aƒo asa na fenyinyi la, aɖe vi na mí. Lododowo 22:7 na míenya be: “Amesi doa nugbana la, dɔla wònye na agbanatɔ.” Ne gbɔgbɔmenɔviwoe amesi gbɔ wodo ga le kple amesi wodo ga na nye gɔ̃ hã la, gadodo ate ŋu akpɔ ŋusẽ ɖe woƒe ƒomedodo dzi va ɖo afi aɖe ya teti. Gadodo ŋuti nugɔmemasemasewo gblẽ hame aɖewo ƒe ŋutifafa me kura gɔ̃ hã.

Ðe Nusitae Ga la Hiã Wò Me

Amesi gbɔ míedo ga le kpɔ mɔ anya alesi tututu míeyina gaa zã gee. Le gadodo sia megbe la, ɖe míegado ga le ame bubuwo gbɔa? Nenye nenemae la, ele be míana esia me nakɔ, elabena afia nenye be míate ŋu axe gadodoa loo alo míate ŋu axee o.

Ele vevie ŋutɔ be míade vovototo gadodo hena dɔ aɖe wɔwɔ kple esi hiã hena nu kpata aɖe gbɔ kpɔkpɔ dome. Ŋɔŋlɔa meda agba ɖe nɔvi aɖeke dzi be wòado ga na nɔvia hena asitsatsa o, gake ɖewohĩ àdi be yeana kpekpeɖeŋu, ne menye nɔvi aɖe ŋutɔ ƒe nuwɔnawoe wɔe be megate ŋu le nuhiahiã veviwo abe nuɖuɖu, nudodo, alo kɔdzi fe veviwo xem o. Numeɖeɖe faa kple nyateƒetoto le nya siawo me awɔe be nyaʋiʋliwo mava o.—Efesotɔwo 4:25.

Miŋlɔe Ði

Ne míedi nyaʋiʋliwo le etsɔme o la, ke ɖoɖowɔwɔa dede agbalẽ me nye afɔɖeɖe vevi aɖe. Ele bɔbɔe be míaŋlɔ ɖoɖo aɖe me nya veviwo be negbe ɖe woŋlɔ wo ɖi ko hafi. Ele be míaŋlɔ gadodoa ƒe home kple ɣeyiɣi si míagbugbɔe vɛ la ɖi. Anye nusi me nunya anɔ be amesi wodo ga na kple amesi gbɔ wodo ga le siaa nade asi ɖoɖoa te eye ɖeka nanɔ wo dometɔ ɖesiaɖe si. Biblia ɖee fia be ele be woade ganyawo ŋuti ɖoɖowo agbalẽ me. Hafi Babilontɔwo natsrɔ̃ Yerusalem la, Yehowa gblɔ na Yeremya be wòaƒle anyigba le eƒe ƒometɔ aɖe gbɔ. Ðoɖo si dzi wozɔ ɖo me dzodzro aɖe vi na mí.

Yeremya gblɔ be: “Meƒle agble, si le Anatot la le tɔnyeɖia vi Xanameel si, eye meda klosalo sekel wuiadre nɛ. Meŋlɔe ɖe agbalẽ me, eye metre enu, meɖe ɖasefowo, eye meda ga la le nudanu me. Eye metsɔ asinyigbalẽ, si nu wotre, kple esi le ʋuʋu, seawo kple ɖoɖoawo de asi na Maxseya vi Neriya ƒe vi Barux le nye tɔɖiayɔvi Xanameel kple ɖasefoawo, amesiwo ŋlɔ ŋkɔ ɖe asinyigbalẽa te la ŋku me kpakple le Yudatɔ, siwo katã le dzɔlawo ƒe xɔxɔnua la ŋku me.” (Yeremya 32:9-12) Togbɔ be kpɔɖeŋu si míeyɔ la ku ɖe nuƒlenya ŋu ke menye gadonyae o hã la, efia vevienyenye si le ganyawo gbɔ kpɔkpɔ le mɔ si me kɔ nu.—Kpɔ March 1, 1974, ƒe Gbetakpɔxɔ, axa 70-1.

Ne nya sesẽwo do mo ɖa la, ele na Kristotɔwo be woadze agbagba akpɔ wo gbɔ le ɖekawɔwɔ me kple Yesu ƒe aɖaŋuɖoɖo si woŋlɔ ɖe Mateo 18:15-17. Gake hamemegã aɖe si dze agbagba be yeana kpekpeɖeŋu le nya siawo ƒomevi me gblɔ be: “Le nya siawo katã kloe me la, ɖoɖoa ŋuti nuŋlɔɖiwo menɔ anyi o. Ewɔe be nugɔmesese nyui aɖeke menɔ ame eveawo dome ku ɖe alesi woagbugbɔ gaa vɛ ŋu o. Meka ɖe edzi be nya siawo ŋɔŋlɔ ɖi nye nɔvilɔlɔ̃ ƒe dzesi, menye makamaka ɖe ame dzi ye o.”

Ne míenya wɔ ɖoɖoa ko la, ele be míadze agbagba kokoko be míawɔ ɖe míaƒe nya dzi. Yesu xlɔ̃ nu be: “Miaƒe nya nanye: Ẽ, ẽ; o, o; eye nusi ke wu esiawo la, etso vɔ̃ɖitɔ la me.” (Mateo 5:37) Ne kuxi aɖe si míekpɔ do ŋgɔ o xe mɔ be míate ŋu agbugbɔ gaa ayii ɖe ɣeyiɣi ɖoɖia dzi o la, ele be míaɖe nyaa me na amesi gbɔ míedo gaa le la enumake. Ðewohĩ aɖe mɔ na mí be míatsɔ ɣeyiɣi si didi wu axe gaa vivivi.

Ke hã nɔnɔme madeamedziwo meɖe agba le mía dzi o. Amesi vɔ̃a Yehowa wɔa etɔ sinua be yeawɔ ɖe yeƒe nya dzi. (Psalmo 15:4) Togbɔ be nɔnɔmeawo manɔ abe alesi míakpɔ mɔ ene o hã la, ele be míanɔ klalo be míawɔ nusianu be míaxe feawo, le esi ema nye mí Kristotɔwo ƒe agbanɔamedzi ta.

Kpɔ Nyuie le Gadodo na Amewo Ŋu

Le nyateƒe me la, menye amesi le gadodo dim koe dze be wòada nyawo kpɔ nyuie o. Ele na nɔvi si si wobia gadodo le hã be wòabu nusiwo ado tso eme ŋu kpɔ. Hafi míado ga na ame la, míanye nunyalawo ne míegbɔ dzi ɖi bu nyawo ŋu nyuie alesi wole tututu. Biblia xlɔ̃ nu be: “Meganɔ amesiwo léa fe nu, eye woƒua asi akɔ ɖe fenyila nu la dome o.”—Lododowo 22:26.

Hafi nàƒo ɖokuiwò ɖe eme la, bu nusi ate ŋu adzɔ ne nɔvia mete ŋu gbugbɔ gaa vɛ na wò o ŋu kpɔ. Ðe wòana ganyawo nava sesẽ na wòa? Togbɔ be susu nyuiwo anɔ nɔvia si hã, nɔnɔmewo ate ŋu atrɔ alo ɖewohĩ mebu nuwo ŋu nyuie o. Yakobo 4:14 ɖo ŋku edzi na mí katã be: “Mienya nusi ava dzɔ etsɔ o; . . . Elabena dzudzɔ, si dzena ɣeyiɣi kpui aɖe, eye emegbe la megadzena o la, ke mienye.”—Tsɔe sɔ kple Nyagblɔla 9:11.

Vevietɔ le gadodo hena dɔ aɖe wɔwɔ me la, anye nusi me nunya anɔ be nàbu alesi wonya amesi le gadodoa biam la ŋuti. Ðe wodze sii be enye amesi ŋu woate ŋu aɖo ŋu ɖo ahaka ɖoa, alo ɖe menya gazazã oa? Ðe wònɔa tsatsam le amewo dzi le hamea me nɔ ga biama? Nunya le eme be míalé nya siawo ɖe susu me: “Amebebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.”—Lododowo 14:15.

Ɣeaɖewoɣi la, ɖewohĩ gadodo maɖe vi nyui aɖeke na amesi nèle gaa dom na hã o. Ate ŋu azu agba nɛ bɔbɔe eye wòagble eƒe dzidzɔkpɔkpɔ me. Ðe míedi be nɔvi sia nazu míaƒe “kluvia”? Ðe gadodo agblẽ mía dome, ahe dzimaɖeɖi alo ŋukpe gɔ̃ hã vɛ ne mete ŋu xe fea oa?

Ne hiahiã li nyateƒe la, ɖe wòanyo wu be míatsɔe akee wu be míadoe nɛa, togbɔ be ho sue aɖe koe wòanye hã? Ŋɔŋlɔwo de dzi ƒo na mí be míaɖe dɔmetɔtrɔ afia ne míekpɔ mía nɔvi aɖe wòle hiã me. Hakpalaa dzi ha be: “Ame dzɔdzɔe la vea ame nu, eye wonaa nu ame.” (Psalmo 37:21) Ele be lɔlɔ̃ naʋa mí be míawɔ nusi míate ŋui ana kpekpeɖeŋu si sɔ nɔvi siwo hiã tu.—Yakobo 2:15, 16.

Lé Ŋku Ðe Wò Afɔɖeɖewo Ŋu Nyuie

Esi gadodowo te ŋu hea masɔmasɔ vɛ ta la, woawoe míabu nyagbɔkpɔnu mamlɛtɔe tsɔ wu be míatrɔ ɖe wo ŋu enumake. Abe alesi míekpɔe do ŋgɔ ene la, ele na amesi wole ga dom na be wòaʋu nya me na amesi gbɔ wòle gaa dom le, woaŋlɔ alesi wòaxe gaa kple ɣeyiɣi si wòaxee ɖe agbalẽ me. Eye ne nu hiã amea nyateƒe la, nunanae anye egbɔkpɔnu si sɔ.

Michael medo ga si Simon biae la nɛ o. Ke Michael tsɔ ga si le sue wu kee boŋ. Simon kpɔ ŋudzedze ɖe kpekpeɖeŋu sia si wo nae be wòaxe via ƒe atikefe ŋuti. Eye dzi dzɔ Michael be yeɖe nɔvilɔlɔ̃ fia le mɔ si sɔ nu. (Lododowo 14:21; Dɔwɔwɔwo 20:35) Michael kple Simon siaa le mɔ kpɔm na ɣeyiɣi si me Kristo “aɖe ame dahe, si le ɣli dom” eye ame aɖeke magblɔ be “yele dɔ lém o” le Fiaɖuƒea ƒe dziɖuɖu te me. (Psalmo 72:12; Yesaya 33:24) Vaseɖe esime ɣeyiɣi ma nava la, mina míalé ŋku ɖe míaƒe afɔɖeɖewo ŋu nyuie ne míekpɔe be ehiã be míabia gadodo nɔvi aɖe.

[Etenuŋɔŋlɔ]

[Nɔnɔmetata si le axa 25]

Gadodo ƒe ɖoɖowo ŋɔŋlɔ ɖi nye nɔvilɔlɔ̃ ƒe dzesi, menye makamaka ɖe ame dzi ye o