Ɣeyiɣi Kple Mavɔmavɔnyenye—Nukae Míenya tso Wo Ŋu?
NUMEKUGBALẼ aɖe gblɔ be: “Edze abe ɣeyiɣi nye nusiwo do viviti ɖe amegbetɔwo wu dometɔ ɖeka ene.” Ẽ, edze abe ɖe manya wɔ be woaɖe nusi ɣeyiɣi fia gɔme eme nakɔ o ene. Míegblɔna be ɣeyiɣi “va yi,” “le yiyim,” “le du dzi,” eye be mía ŋutɔwo míele zɔzɔm “ɖe ɣeyiɣi dzi” kura gɔ̃ hã. Gake míenya nusi tututu ŋu míele nu ƒom le o.
Woɖe ɣeyiɣi gɔme be enye “dometsotso si le nudzɔdzɔ eve dome.” Gake nuteƒekpɔkpɔ le mía fiam be ɣeyiɣi menɔ te ɖe nudzɔdzɔwo dzi o; edze abe eyia edzi ne nya aɖe ɖadzɔ loo alo medzɔ o. Xexemenunyala aɖe gblɔ be naneke meli ŋutɔŋutɔ si woyɔna be ɣeyiɣi o, ke nusi wobu le susu me ko wònye. Ðe wòanye be nusi dzi míetu míaƒe nuteƒekpɔkpɔ geɖe ɖo la nye nususukpɔ dzro aɖe koa?
Biblia ƒe Nukpɔsusu le Ɣeyiɣi Ŋu
Biblia mena gɔmeɖeɖe aɖeke le ɣeyiɣi ŋu o, si na wòdze abe ɖewohĩ egbɔ amegbetɔwo ƒe ŋutete ŋu be woase egɔme bliboe ene. Ele abe dziƒo gbahoo si seɖoƒe meli na o, si hã gɔmesese sesẽna na mí. Edze ƒã be ɣeyiɣi nye nusiwo gɔme Mawu ɖeɖeko te ŋu sena bliboe la dometɔ ɖeka, elabena eya ɖeka koe li “tso mavɔ me yi mavɔ me.”—Psalmo 90:2.
Togbɔ be Biblia megblɔ nusi ɣeyiɣi fia o hã la, eƒo nu tso ɣeyiɣi ŋu be enye nu ŋutɔŋutɔ. Gbã la, Biblia gblɔ na mí be Mawu wɔ “nu keklẽwo”—ɣe, ɣleti, kple ɣletiviwo—wonye ɣeyiɣifianuwo, be “woanɔ anyi anye dzesiwo, afia azãgbewo, ŋkekewo kple ƒewo.” Wotu nudzɔdzɔ geɖe siwo woŋlɔ ɖe Biblia me ɖe ɣeyiɣi dzi. (Mose I, 1:14; 5:3-32; 7:11, 12; 11:10-32; Mose II, 12:40, 41) Biblia ƒo nu tso ɣeyiɣi ŋu hã be enye nusi ŋudɔ wòle be míawɔ nunyatɔe be míate ŋu akpɔ Mawu ƒe yayra si nye ɣeyiɣi mavɔ—agbe mavɔ nɔnɔ ƒe mɔnukpɔkpɔ.—Efesotɔwo 5:15, 16.
Agbemavɔnɔnɔ—Ðe Susu Le Emea?
Togbɔ be agbagbadzedze be woase nusi tututu ɣeyiɣi nye gɔme tɔtɔa amewo hã la, ame geɖe bui be agbe mavɔ, alo agbe tegbee nɔnɔ, ƒe nya lae tɔtɔa ame wu. Nusiwo ta wòle alea dometɔ ɖeka ate ŋu anye be míaƒe nuteƒekpɔkpɔ le ɣeyiɣi ŋu doa ƒome kple vidzidzi, tsitsi, amegãkuku, nyagãkuku, kple ku siwo yia edzi ɖaa. Eyata míeva le ɣeyiɣi bum ɖe ame ƒe tsitsi ŋutɔŋutɔ ŋu. Le ame geɖe gome la, susu bubu ɖesiaɖe si ato vovo na esia anye tatra tso nusi wobu be ɣeyiɣi nye ŋutɔŋutɔ la gbɔ. Ðewohĩ woabia be, ‘Nukatae wòle be amegbetɔwo ya nado le nusi dzɔna ɖe nu gbagbe bubuwo katã dzi la me?’
Nusi dzi woŋea aɖaba ƒuna zi geɖe le nya sia mee nye nyateƒe si wònye be amegbetɔwo to vovo tso nuwɔwɔ siwo li gbɔ le nu geɖe me. Le kpɔɖeŋu me, tamebubu ŋutete si le amegbetɔwo si mele lãwo si o. Togbɔ be amewo gblɔna be mele nenema o hã la, lãwo mete ŋu wɔa nu wògbɔa nusi woƒe lãmenusese gblɔna na wo be woawɔ ŋu o. Aɖaŋu ƒe nunana alo lɔlɔ̃ kple ŋudzedzekpɔkpɔ ɖeɖefia ƒe ŋutete si le amegbetɔwo si la mele wo si o. Ne wona nu geɖe amegbetɔwo le nɔnɔme kple ŋutete siawo siwo naa gɔmesese nɔa agbe ŋu gome la, nukata manya wɔ be woana nu geɖe wo wu le agbe ŋutɔŋutɔ gome hã o?
Le mɔ bubu nu la, ɖe mewɔ mo yaa be ati si nye nusi mete ŋu bua tame o ƒe ɖewo te ŋu nɔa agbe ƒe akpe geɖe, esime amegbetɔ nyanuwo ya te ŋu nɔa agbe ƒe 70 vaseɖe 80 pɛ ko le mamã dedie nu oa? Ðe metsi tre ɖe nusi sɔ ŋu be klo si si aɖaŋu alo aɖaŋuwɔwɔ ƒe ŋutete aɖeke mele o te ŋu nɔa agbe wu ƒe 200 kple edzivɔ, esi amegbetɔ si wona aɖaŋu geɖe la ƒe agbenɔƒe mede etɔ ƒe afã gɔ̃ hã oa?
Togbɔ be amegbetɔ mate ŋu ase ɣeyiɣi kple mavɔmavɔnyenye gɔme bliboe o hã la, kakaɖedzi blibo le agbe mavɔ ƒe ŋugbedodo ƒe mɔkpɔkpɔ si le Biblia me ŋu. Nyagbɔgblɔ “agbe mavɔ” dze le eme zi 40 kloe. Gake ne Mawu ƒe tameɖoɖoe wònye be amegbetɔwo nanɔ agbe tegbee la, ke nukatae meva eme kpɔ o? Míaɖo biabia sia ŋu le nyati si kplɔe ɖo me.