Na Wò Agbe Nakpɔ Dzidzedze!
“Woayra amesi mezɔna ɖe ame vɔ̃ɖiwo ƒe aɖaŋuɖoɖo nu o, . . . Nusianu, si wòwɔna la, ewɔnɛ wua nu nyuie!”—PSALMO 1:1, 3.
1. (a) Aleke sɔhɛ geɖe le xexeame bua dzidzedzekpɔkpɔe? (b) Aleke Biblia ɖɔ amesi kpɔ dzidzedzee?
DZIDZEDZEKPƆKPƆ—nukae nya ma fia na wò? Ðekakpui aɖe gblɔ be: “Nye taɖodzinu vevitɔ kekeake enye be makpɔ dzidzedze le dɔwɔnyawo me.” Ðetugbi aɖe gblɔ be: “Nye didi vevitɔ enye be ƒome si me dzidzɔkpɔkpɔ le nanɔ asinye.” Gake ɖetugbi bubu gblɔ be: “Nye didi koe nye be aƒe nyui aɖe kple ʋu nyui aɖe nanɔ asinye . . . Tɔnye ŋu bum mele.” Nya lae nye be menye ga, alo ƒome, alo dɔwɔɖui si hea ga geɖe vɛ gɔ̃ hãe nye nusi hea dzidzedzekpɔkpɔ vavãtɔ vɛ o. Míexlẽ le Psalmo 1:1-3 be: “Woayra amesi mezɔna ɖe ame vɔ̃ɖiwo ƒe aɖaŋuɖoɖo nu o . . . Ekpɔa dzidzɔ le Yehowa ƒe se la ŋu, . . . Nusianu, si wòwɔna la, ewɔnɛ wua nu nyuie!”
2. Afikae dzidzedzekpɔkpɔ vavãtɔ tsona, eye mɔ ka dzi koe woato akpɔe?
2 Le afisia la, Biblia do nane si amegbetɔ aɖeke mate ŋu ana o ŋugbe—eyae nye dzidzedzekpɔkpɔ vavãtɔ! Gake menye gakpɔkpɔ ŋu nya gblɔm wòle o. Biblia ŋutɔ xlɔ̃ nu be: “Nuvɔ̃wo katã ƒe ke enye galɔlɔ̃.” (Timoteo I, 6:10) Dzidzedzekpɔkpɔ vavãtɔ dona tsoa Mawu ŋu dzedze me—si me Yehowa ƒe se dzi wɔwɔ hã le. Esia koe ate ŋu ahe dzidzeme ŋutɔŋutɔ kple dzidzɔkpɔkpɔ vavãtɔ vɛ! Ðewohĩ Yehowa ƒe sewo te nɔnɔ kple be woagblɔ nusi wòle be nàwɔ na wò mado dzidzɔ na wò o. Gake Yesu gblɔ be: “Dzidzɔtɔwoe nye amesiwo tsɔa ɖe le woƒe gbɔgbɔ me nuhiahiã me.” (Mateo 5:3, NW) Ènyae alo mènyae o, wowɔ wò kple gbɔgbɔmenuhiahiãwo—hekpe ɖe hiahiã si ƒo ke ɖe to ɖe mewò sesĩe be nànya Mawu ahase eƒe tameɖoɖowo gɔme ŋu. Eyata ne èkpɔ hiahiã mawo gbɔ hewɔ ɖe “Yehowa ƒe se” dzi ko hafi dzidzɔ vavãtɔ ate ŋu asu asiwò.
Nusitae Míehiã Mawu ƒe Sewo
3. Nukatae wòle be wòanye dzidzɔ na mí be míana Yehowa ‘nafia mɔ mí’?
3 Nyagblɔɖila Yeremya ŋlɔ bena: “Yehowa, menyae be, amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” (Yeremya 10:23) Aleae wòle le amegbetɔwo katã gome, ɖeviwo kple tsitsiawo siaa. Menye ɖeko nunya, nuteƒekpɔkpɔ, kple sidzedze mele mía si míatsɔ afia mɔ mía ɖokui o; nya la koe nye be míekpɔ mɔ awɔe nenema o. Biblia gblɔ le Nyaɖeɖefia 4:11 be: “Mía Aƒetɔ kple mía Mawu, wòe dze be, naxɔ ŋutikɔkɔe kple bubu kple ŋusẽ; elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.” Esi Yehowae nye mía Wɔla ta la, eyae nye míaƒe “agbedzɔƒe.” (Psalmo 36:10) Le esia ta enya alesi wòle be míazã míaƒe agbee wu amesiame. Eyata ewɔ sewo, menye be woaxe mɔ ɖe míaƒe vivisese nu o, ke boŋ be wòaɖe vi na mía ŋutɔwo. (Yesaya 48:17) Ne ègbe Mawu ƒe se dzi wɔwɔ la, eme manyo na wò akpɔ o.
4. Nukatae sɔhɛ geɖe ŋutɔ gblẽa woƒe agbe dome ɖo?
4 Le kpɔɖeŋu me, èbu nusita sɔhɛ geɖe ŋutɔ to atikevɔ̃ɖizazã, gbɔdɔdɔ vivivo, kple nu gbegblẽ bubuwo wɔwɔ me gblẽ agbe dome na wo ɖokui ŋu kpɔa? Psalmo 36:2, 3 ɖe eme be: “Ame vɔ̃ɖi ƒe dzidada ƒe gbe le nye dzi me be: Mawu ƒe vɔvɔ̃ aɖeke metso ga ɖe ŋku me nɛ o. Elabena evivi nume nɛ le eŋku me, ne wòakpɔ mɔnu le eƒe dzidada ŋu, eye wòalé fui.” Esi ‘Mawu vɔvɔ̃’ nyuitɔ aɖeke mele sɔhɛ geɖe me o ta la, woflua wo ɖokui susuna be nu gbegblẽ wɔwɔ mahe afɔku aɖeke vɛ na yewo o. Gake mlɔeba la, ele be gɔmeɖose sia si metrɔna o nava eme ɖe wo dzi, si gblɔ be: “Nusi ke ame ƒãna la, esia ke wòaŋe. Elabena amesi ƒã nu ɖe eƒe ŋutilã me la, aŋe gbegblẽ atso eƒe ŋutilã me; ke amesi ƒã nu ɖe Gbɔgbɔ me la, aŋe agbe mavɔ atso Gbɔgbɔ me.”—Galatiatɔwo 6:7, 8.
‘Ŋkekeawo Xexlẽ’
5, 6. (a) Nukatae wòle be sɔhɛwo ‘naxlẽ woƒe ŋkekewo,’ eye nukae wo xexlẽ fia? (b) Nukae wòfia be ‘míaɖo ŋku mía Wɔla dzi’?
5 Aleke nàwɔ agbe nadze edzi na wò eye ‘nàkpɔ agbe mavɔ’? Mose ŋlɔ bena: “Míaƒe agbenɔƒewo nye ƒe blaadre, ne ede ƒã la, ƒe blanyi, . . . Wova yi kabakaba, eye míedzo.” (Psalmo 90:10) Ðewohĩ ƒã hafi nàbu ku ŋu, ne àbu eŋu gɔ̃ hãe nye ma. Le nyateƒe me la, sɔhɛ geɖe wɔa nu abe ɖe womate ŋu aku o ene. Gake Mose na míekpɔ alesi agbe le kpuie si nye vevesese ŋutɔ la ƒe nyateƒenyenye dze sii kɔte. Kakaɖedzi aɖeke gɔ̃ hã meli be míanɔ agbe aɖo ƒe 70 alo 80 o. “Azãgbe kple nuɖiɖeame” ate ŋu atso amesiwo metsi o eye wole lãmesẽ me gɔ̃ hã ƒe agbe dzi. (Nyagblɔla 9:11) Ekema, aleke nàzã agbe xɔasi si le asiwò fifia lae? Mose do gbe ɖa be: “Fia alesi míaxlẽ míaƒe ŋkekewoe la mí, ne dzi nyanu naɖo mía si!”—Psalmo 90:12.
6 Nukae wòfia be nàxlẽ wò ŋkekewo? Mefia be ele be nànɔ ƒe xexlẽme si nàte ŋu anɔ agbe la ŋu bum kakaka o. Mose nɔ gbe dom ɖa be Yehowa nafia alesi Eƒe amewo nazã ŋkeke si susɔ na wo le mɔ si ade bubu Eŋu nu la wo. Èxlẽa wò agbemeŋkekewo—hebua ŋkeke ɖesiaɖe be enye mɔnukpɔkpɔ xɔasi si yeazã atsɔ akafu Mawuia? Biblia de dzi ƒo na sɔhɛwo ale: “Ðe dziku ɖa le wò dzi ŋu, eye vɔ̃ neƒo asa na wò ŋutilã; elabena ɖekakpui me nɔnɔ kple ŋutsu me nɔnɔ toflokowoe. Ðo ŋku wɔwòla dzi le wò ɖekakpuiŋkekewo me.” (Nyagblɔla 11:10–12:1) Ŋkuɖoɖo mía Wɔla dzi fia nu geɖe wu ŋkuɖoɖo edzi ko be eli. Esi nuvɔ̃wɔla la ƒo koko na Yesu be “Ðo ŋku dzinye, ne èva ɖo wò fiaɖuƒe la me” la, edi tso Yesu si be wòawɔ nane si awu ŋku si wòaɖo yeƒe ŋkɔ ko dzi. Edi be Yesu nawɔ nane, be wòafɔ ye ɖe tsitre! (Luka 23:42; tsɔe sɔ kple Mose I, 40:14, 23; Hiob 14:13.) Nenema ke be woaɖo ŋku Yehowa dzi bia be woawɔ nane, ebia be woawɔ nusi dzea eŋu. Ðe woate ŋu agblɔ be èle ŋku ɖom Yehowa dzia?
Tsri Ŋuʋaʋã Nugbegblẽwɔlawo
7. Nukatae sɔhɛ aɖewo tiae be yewoaŋlɔ wo Wɔla be? Gblɔ eƒe kpɔɖeŋu aɖe.
7 Sɔhɛ geɖe ɖoe be yewoaŋlɔ Yehowa be elabena wosusui be Ðasefo nyenye xea nu geɖe ƒe mɔ na ame. Nɔviŋutsu aɖe si le Spain gblɔ alesi wòsena le eɖokui me esime wònye ƒewuivi be: “Xexeame yiyi dzroam elabena edze abe ɖe nyateƒea me nɔnɔ sesẽ eye wòle kpaɖii ene. Ele be nànɔ anyi, anɔ nu srɔ̃m, anɔ kpekpewo yim, anɔ kɔla blam, nu mawo wɔwɔ mevivia nunye o.” Ðe nèsenɛ le ɖokuiwò me ɣeaɖewoɣi be esi yele Mawu subɔm ta nane le ye ŋu toma? Ðewohĩ awɔ nuku na wò be nàse be Biblia-ŋlɔlawo dometɔ ɖeka se le eɖokui me kpɔ nenema tututu. Taflatse tsɔ wò Biblia nàxlẽ Psalmo 73 lia.
8. Nukatae Asaf ‘ʋã ŋu adegbeƒolawo’?
8 Na míadzro psalmo sia me tsitotsito. Kpukpui 2 kple 3 gblɔ be: “Ke nye la ekpɔtɔ ʋee nye afɔ da kloe, esusɔ vie nye afɔ ɖiɖi kloe. Elabena meʋã ŋu adegbeƒola, esi mekpɔ be, enyona na ame vɔ̃ɖi la.” Nusi woŋlɔ ɖe psalmo sia tame fia be Asaf ye ŋlɔe. Enye Lewi-vi hadzila aɖe si nɔ anyi le Fia Dawid ŋɔli. (Kronika I, 25:1, 2; Kronika II, 29:30) Togbɔ be mɔnukpɔkpɔ nyui su esi wòsubɔ le Mawu ƒe gbedoxɔ me hã la, ‘eva nɔ ŋu ʋãm’ amesiwo tsɔ woƒe sedzimawɔmawɔ nɔ adegbe ƒomee. Edze abe ɖe nuwo nɔ edzi dzem na wo ene; ewɔ abe ɖe wonɔ ŋutifafa kple dedienɔnɔ me ene. Le nyateƒe me la, alesi wòdze abe ɖe nuwo nɔ edzi dzem na wo ene la na “woƒe dzimesusuwo do lululu.” (Kpukpui 5, 7) Woƒoa nu tsoa woƒe nu vɔ̃ɖi wɔwɔwo ŋuti le “kɔkɔƒe,” si fia be wogblɔnɛ dadatɔe. (Kpukpui 8) ‘Wodoa nu ɖe dziƒo, eye woƒe aɖe tsana le anyigba dzi,’ womedea bubu ame aɖeke ŋu o—eɖanye le dziƒo alo anyigba dzi o.—Kpukpui 9.
9. Aleke Kristotɔ sɔhɛ aɖewo ate ŋu ase le wo ɖokui me egbea abe Asaf ene?
9 Ðewohĩ woate ŋu agblɔ nya sia ke le wò sukuhatiwo hã ŋu. Ðewohĩ àsee woatsɔ woƒe gbɔdɔdɔ ƒe agbegbegblẽnɔnɔ, woƒe aglotutuwo, kple wo ɖokui ƒoƒo ɖe ahanono kple atikevɔ̃ɖizazã me anɔ adegbe ƒom ŋumakpemakpee. Ne ètsɔ woƒe yeaɖi dzidzɔ si kpɔm wole le agbe me sɔ kple mɔ xaxɛ si dzi wòle be wò Kristotɔ nàzɔ la, àsee le ɖokuiwò me ɣeaɖewoɣi be ‘yeaʋã ŋu adegbeƒolawo.’ (Mateo 7:13, 14) Eva ɖo afi aɖe si Asaf ŋutɔ gblɔ be: “Nyateƒee, yakatsyɔe mena nye dzi ŋu dza, eye meklɔ nye asi ɖe fɔmaɖimaɖi me. Ẽ, mekpea fu gbesiagbe.” (Kpukpui 13, 14) Ẽ, ete ɖikeke asixɔxɔ si le Mawu subɔsubɔ kple nu dzɔdzɔe wɔwɔ ŋu.
10, 11. (a) Nukae na Asaf trɔ susu? (b) Aleke nuvɔ̃wɔlawo le ‘ɖiɖiƒee’? Gblɔ eƒe kpɔɖeŋu aɖe.
10 Dzidzɔtɔe la, Asaf menɔ blanuiléle ƒe nɔnɔme sia me ɣeyiɣi didi o. Eva kpɔe dze sii kaba be yeaɖi ŋutifafa si me ame vɔ̃ɖiwo nɔ menye naneke o, boŋ ameɖokuifuflue—eye ɣeyiɣi kpui aɖe koe wòanɔ nenema! Egblɔ be: “Nyateƒee, ètsɔ wo ɖo ɖiɖiƒe, eye nèxlã wo ɖe anyi wozu anyiglago. Ale ŋɔdzi na wotsrɔ̃ le aɖabaƒoƒo ɖeka me, wobu, eye wo nu yi!” (Kpukpui 18, 19) Hatiwò geɖe le “ɖiɖiƒe” nenema ke. Gbeɖeka la, woakpɔ woƒe mawumavɔmavɔ̃gbenɔnɔa me tsonu, ɖewohĩ ahe gbɔmeyafufɔfɔ, nulɔdɔ, gaxɔmenɔnɔ, alo ku gɔ̃ hã vɛ na wo! Vɔ̃ɖitɔe wu la, ate wo ɖa tso Mawu gbɔ.—Yakobo 4:4.
11 Ðasefo sɔhɛ aɖe si le Spain ŋutɔ kpɔ nya sia ƒe nyateƒenyenye dze sii. Le eƒe ɖetugbime la, enɔ agbe eve nɔm, eye wònɔ ha dem kple sɔhɛ mawumavɔ̃la aɖewo ƒe ƒuƒoƒo kplikplikpli. Eteƒe medidi o, eva zu wo dometɔ ɖeka ƒe ahiãvi—amesi nye atikevɔ̃ɖizãla. Togbɔ be eya ŋutɔ mezãa atikevɔ̃ɖia o hã la, eƒlenɛ nɛ. Elɔ̃ ɖe edzi be: “Mekpena ɖe eŋu wòdoa abuia gɔ̃ hã.” Dzidzɔtɔe la, wokpe ɖe nɔvinyɔnu sia ŋu wònyɔ le eɖokui me, eye wogaɖoe te le gbɔgbɔ me. Gake aleke gbegbee dzidzi ƒoe enye si esi wòse emegbe be AIDS wu yeƒe ahiãvi atikevɔ̃ɖizãla la. Ẽ, ɖeko wòle abe alesi hakpala la gblɔe ene be mawumavɔ̃lawo le “ɖiɖiƒe.” Wo dometɔ aɖewo ate ŋu aku kukpo le woƒe hadzegbenɔnɔ ta. Le wo dometɔ susɔeawo gome la, negbe ɖe wotrɔ woƒe agbenɔnɔ, ne menye nenema o la, eteƒe madidi o woado go “Aƒetɔ Yesu Kristo kple eƒe ŋusẽ ƒe dɔlawo ƒe ɖeɖefia tso dziƒo . . . le dzo ƒe aɖe me, esime wòabia hlɔ̃ amesiwo menya Mawu o kple amesiwo meɖoa to mía Aƒetɔ Yesu Kristo ƒe nyanyui la o.”—Tesalonikatɔwo II, 1:7, 8.
12. Aleke ɖekakpuivi aɖe si le Japan va kpɔ bometsitsi si wònye be woaʋã ŋu nuvlowɔlawo dze sii?
12 Eyata aleke gbegbe wòanye bometsitsie nye si be woaʋã ŋu “amesiwo menya Mawu o”! Le nyateƒe me la, amesiwo nya Yehowa eye agbenɔnɔ tegbee ƒe mɔkpɔkpɔ le wo sie woaʋã ŋui. Nɔviŋutsu ɖekakpuivi aɖe si le Japan va kpɔe dze sii nenema. Esi wònye ɖekakpui la, eya hã di “ablɔɖe geɖe.” Eɖe eme be: “Mesusui be nane nɔ ŋunye tom. Emegbe mede dzesii be nyateƒea megbɔna ŋusẽ kpɔ ge ɖe nye agbe dzi o. Mekpɔe be ƒe 70 alo 80 koe manɔ agbe aku. Gake agbe mavɔ mɔkpɔkpɔe Yehowa ɖo mía ŋkume! Dzesidede esia kpe ɖe ŋunye mekpɔ ŋudzedze ɖe nusi le asinye la ŋu.” Togbɔ be ele nenema hã la, nuteƒewɔwɔ me léle ɖe asi ne amesiwo dome nèle mewɔa Mawu ƒe sewo dzi o mele bɔbɔe o. Nusiwo nàte ŋu awɔ atsɔ atsi tre ɖe nyaƒoɖeamenu mawo ŋu dometɔ aɖewo ɖe?
Lé Ŋku Ðe Amesiwo Nèdea Ha Kplii Ŋu!
13, 14. Nukatae wòle vevie be nàlé ŋku ɖe amesiwo nèdea ha kplii ŋu?
13 Mina míagalé ŋku ɖe alesi woɖɔ amesi nu dze edzi na si woŋlɔ ɖe Psalmo 1:1-3 ŋu ake. “Woayra amesi mezɔna ɖe ame vɔ̃ɖiwo ƒe aɖaŋuɖoɖo nu o, amesi metsia tsitre ɖe nuvɔ̃wɔlawo ƒe mɔ dzi o, eye menɔa anyi ɖe fewuɖulawo ƒe ha me o; ke boŋ ekpɔa dzidzɔ le Yehowa ƒe se la ŋu, eye wòdea ŋugble le eƒe se la ŋu zã kple keli. Eyama ɖi ati, si wodo ɖe tɔʋuwo to, si tsena le etseɣi, eye eƒe aŋgbawo melũa xe o; eye nusianu, si wòwɔna la, ewɔnɛ wua nu nyuie!”
14 Gbã la, de dzesii be amesiwo nèdea ha kplii wɔa akpa vevi aɖe. Lododowo 13:20 gblɔ be: “Ne èzɔ kple nunyalawo la, àdze nunya; ke ne ède ha kple bometsilawo la, àzu ame gbegblẽ.” Esia mefia be mele be nàdo vivi ɖe sɔhɛ siwo menye Yehowa Ðasefowo o ŋu, nàlé fu wo, alo nàwɔ nu ɖe wo ŋu amemabumabutɔe o. Biblia xlɔ̃ nu mí be míalɔ̃ mía haviwo eye ‘míanɔ anyi kple amewo katã le ŋutifafa me.’ (Romatɔwo 12:18; Mateo 22:39) Gake àva kpɔe be yele ‘zɔzɔm ɖe’ amesiwo mewɔna ɖe Biblia ƒe gɔmeɖosewo dzi o ƒe ‘aɖaŋuɖoɖo nu’ ne èdea ha kpli wo kplikplikpli.
Biblia Xexlẽ ƒe Viɖewo
15. Aleke sɔhɛwo awɔ Biblia xexlẽ nadzro wo vevie?
15 Hakpala la gade dzesii hã be amesi nu dze edzi na la kpɔa dzidzɔ le Mawu ƒe se la xexlẽ ŋu eye ‘wòdea ŋugble le eŋu zã kple keli.’ (Psalmo 1:1, 2) Ele eme be Biblia menye agbalẽ si woaxlẽ agbagba aɖeke madzemadze le eŋu o, elabena “[emenya] aɖewo ƒe gɔmesese nye dɔ.” (Petro II, 3:16) Gake mele be Biblia xexlẽ nanye dɔ sesẽ o. Anya wɔ be ‘míana Mawu ƒe Nya ƒe notsi tsimatɔ la nadzro mí vevie.’ (Petro I, 2:2) Dze agbagba nàxlẽ akpa sue aɖe ko gbesiagbe. Ne mèse nanewo gɔme o la, wɔ numekuku le wo ŋu. Emegbe bu nusi nèxlẽ la ŋu. (Psalmo 77:12, 13) Ne wò susu mete ŋu le eŋu nɔm o la, dze agbagba nàxlẽe ‘kple gbe si bɔbɔ ɖe anyi.’ Le ɣeyiɣi aɖe megbe la, wò lɔlɔ̃ na Biblia xexlẽ adzi ɖe edzi godoo. Nɔvinyɔnu ɖetugbivi aɖe si le Brazil gblɔ be: “Ɣesiaɣi la, ewɔna abe ɖe Yehowa le adzɔge tso gbɔnye ene. Gake ɣleti aɖewoe nye sia fifia la, mele ŋgɔyiyi wɔm le nye ɖokuisinusɔsrɔ̃ kple Biblia xexlẽ me. Fifia mèsenɛ le ɖokuinye me be mía kple Yehowa dome ƒomedodo me sẽ ɖe edzi. Mebunɛ ame ŋutɔŋutɔe wu.”
16. Nukae míawɔ be hamea ƒe kpekpewo naɖe vi na mí wu?
16 Hamea ƒe kpekpewo dede hã le vevie hena wò gbɔgbɔmetsitsi. Ne ‘èléa to ɖe nya ŋu nyuie’ la, dzideƒo geɖe asu asiwò. (Luka 8:18) Ðe nèsenɛ le ɖokuiwò me ɣeaɖewoɣi be kpekpeawo mevivina tututu oa? Bia ɖokuiwò se be, ‘Nukae mewɔna be kpekpeawo navivi? Ðe meɖoa toa? Ðe medzrana ɖoa? Ðe meɖoa nya ŋua?’ Biblia gblɔe na mí hã be “míalé ŋku ɖe mía nɔewo ŋu, bena míade dzi ƒo na mía nɔewo le lɔlɔ̃ kple dɔ nyui wɔwɔ me, . . . míaxlɔ̃ nu mía nɔewo.” (Hebritɔwo 10:24, 25) Be nàwɔ esia la, ele be nàkpɔ gome le eme! Gake hafi nàte ŋu akpɔ gome le eme la, ele be nàsrɔ̃ nua do ŋgɔ. Nɔvinyɔnu ɖetugbi aɖe lɔ̃ ɖe edzi be: “Enye nyateƒe be ele bɔbɔe wu be nàkpɔ gome le kpekpeawo me ne èdzra ɖo.”
Mawu ƒe Mɔwo Me Léle Ðe Asi Naa Wokpɔa Dzidzedze
17. Aleke amesi kua kutri le Biblia xexlẽ me “ɖi ati, si wodo ɖe tɔʋuwo to” lae?
17 Hakpala la yi edzi gblɔ le amesi kpɔ dzidzedze ŋu be “[eɖi] ati, si wodo ɖe tɔʋuwo to.” Tɔʋuawo ate ŋu anye ʋe siwo woɖe be tsi natsa ato wo me ade tsi abɔmetiwo. (Yesaya 44:4) Biblia xexlẽ gbesiagbe le abe alesi nànɔ nunyiame xɔm tso nuɖuɖu kple ŋusẽdodo tsoƒe aɖe si li ɖaa la ene. (Yeremya 17:8) Ŋusẽ si nàhiã atsɔ anɔ te ɖe dodokpɔwo kple fukpekpewo nu asu asiwò gbesiagbe. Esi nèsrɔ̃ alesi Yehowa ƒe susu le le nuwo ŋu ta la, nunya si nàhiã awɔ nyametsotso nyuiwoe asu asiwò.
18. Nukae ana sɔhɛ nakpɔ dzidzedze le Yehowa subɔsubɔ me?
18 Ɣeaɖewoɣi la, Yehowa subɔsubɔ adze nu sesẽe. Gake mègase le ɖokuiwò me gbeɖe be esesẽ akpa na ye o. (Mose V, 30:11) Biblia do ŋugbe na wò be ‘nusianu si nàwɔ la, àwɔe awu enu nyuie,’ zi alesi wònye wò taɖodzinu be yeadze Yehowa ŋu ahado dzidzɔ na eƒe dzi ko! (Lododowo 27:11) Eye ɖo ŋku edzi be menye wò ɖeɖee li o. Yehowa kple Yesu Kristo le megbe na wò. (Mateo 28:20; Hebritɔwo 13:5) Wonya nyaƒoɖeamenu siwo nèdoa goe, eye womagblẽ wò ɖi akpɔ o. (Psalmo 55:23) ‘Nɔviwo ƒe habɔbɔ bliboa’ hã, kple dziwòlawo ne wonye Mawu vɔ̃lawo, le megbe na wò. (Petro I, 2:17) Esi ame gbogbo siawo da megbe na wò, hekpe ɖe wò tameɖoɖo kplikpaa kple agbagbadzedze ŋu la, ana be menye fifia koe nàte ŋu anɔ agbe wòadze edzi na wò ko evɔ o, ke adze edzi na wò tegbee hã!
Numetotobiabiawo
◻ Nukae nye dzidzedzekpɔkpɔ vavãtɔ?
◻ Nukatae wòhiã be Yehowa nafia afɔɖoƒe mí?
◻ Aleke sɔhɛwo awɔ ‘axlẽ woƒe ŋkekewoe’?
◻ Nukatae ŋuʋaʋã nugbegblẽwɔlawo nye bometsitsi?
◻ Aleke Biblia xexlẽ gbesiagbe kple kpekpeawo dede edziedzi ate ŋu akpe ɖe sɔhɛwo ŋu be agbe nadze edzi na woe?
[Nɔnɔmetata si le axa 20]
Esi ‘Mawu vɔvɔ̃’ nyuitɔ aɖeke mele sɔhɛ geɖe me o ta la, wonɔa agbe si gblẽa wo dome
[Nɔnɔmetata si le axa 22]
Zi geɖe la, sɔhɛwo ŋlɔna be be yewoƒe nuwɔnawo me tsonuwo li
[Nɔnɔmetata si le axa 23]
Srɔ̃ alesi nàna Biblia xexlẽ navivi nuwò
[Nɔnɔmetata si le axa 23]
Àse vivi na kpekpeawo wu ne èkpɔa gome le wo me