Te Ðe Mawu Ŋu

Yehowa Naa Mɔnukpɔkpɔ Mí Be Míawɔ Tiatia

5 Mose 30:11-20

“ZI GEÐE la, menɔa vɔvɔ̃m madzemadzee be nyemate ŋu ayi edzi awɔ nuteƒe na Yehowa ɖaa o.” Nya mawoe nyɔnu Kristotɔ aɖe si susui be nɔnɔme ɖefuname siwo me yeto le yeƒe ɖevime la wɔe be yemate ŋu alé nu dzɔdzɔe wɔwɔ me ɖe asi o la gblɔ. Nenemae wòle vavã? Nyateƒee wònye be naneke meli si akpe ɖe mía ŋu míawɔ nuteƒe o, le nɔnɔme siwo me míeto va yi ta? Ao. Yehowa Mawu na tiatiawɔblɔɖe mí, si wɔe be míate ŋu atia agbe si ƒomevi míedi be míanɔ. Yehowa di be míawɔ tiatia nyuitɔ, eye eƒe Nya Biblia fia ale si míawɔ esiae la mí. De ŋugble tso Mose ƒe nya siwo le Mose Ƒe Agbalẽ Atɔ̃lia ƒe ta 30 lia me la ŋu kpɔ.

Ðe wòsesẽ be míanya nu si Mawu di tso mía si la ahawɔea?a Mose gblɔ be: “Se, si mede na wò egbe la, menye nya masegɔmea wònye o, eye mele didiƒe tso gbɔwò o.” (Kpukpui 11) Yehowa mebiaa nu si míate ŋu awɔ o la tso mía si o. Eƒe nudidiwo da sɔ, eye wo gbɔ ɖoɖo mesesẽ akpa o. Wo nyanya hã mesesẽ o. Mehiã be míalia ayi “dziƒo” alo azɔ mɔ ayi “ƒu godo” hafi ake ɖe nu si Mawu di tso mía si la ŋu o. (Kpukpui 12, 13) Biblia gblɔ ale si wòle be míanɔ agbee la na mí eme kɔ nyuie.—Mixa 6:8.

Ke hã, Yehowa mezia mía dzi be míaɖo to ye o. Mose gblɔ be: “Metsɔ agbe kple dzɔgbenyui, ku kple dzɔgbevɔ̃e ɖo ŋkuwò me.” (Kpukpui 15) Ekpo ɖe mía gbɔ be míawɔ tiatia le nyui kple vɔ̃, kpakple agbe kple ku dome. Míate ŋu atia be míasubɔ Mawu ahaɖo toe bene míaxɔ eƒe yayrawo loo, alo míate ŋu atiae be míagbe toɖoɖoe ahakpɔ emetsonuawo. Mía ŋutɔwoe awɔ tiatia la.—Kpukpui 16-18; Galatiatɔwo 6:7, 8.

Ðe Yehowa tsɔ ɖe le tiatia si míawɔ mea? Ɛ̃, etsɔ ɖe le eme ŋutɔ! Mawu ƒe gbɔgbɔ ʋã Mose wògblɔ be: “Mitia agbe.” (Kpukpui 19) Gake aleke míawɔ atia agbe? Mose ɖe nu me be: “Nalɔ̃ Yehowa, wò Mawu la, ɖo to eƒe gbe, eye naku ɖe eŋu.” (Kpukpui 20) Ne míeva lɔ̃ Yehowa la, míadi vevie be míaɖo toe ahaku ɖe eŋu nuteƒewɔwɔtɔe, nu ka kee ɖadzɔ o. Míato esia dzi atia agbe—si nye mɔ nyuitɔ kekeake si nu míanɔ agbe ɖo fiafia ahanɔ mɔ kpɔm na agbe mavɔ nɔnɔ le Mawu ƒe xexe yeye si gbɔna me.—2 Petro 3:11-13; 1 Yohanes 5:3.

Nyateƒe fakɔname aɖewo le Mose ƒe nya siawo me na mí. Nɔnɔme ka ke mee nèɖato le xexe vɔ̃ɖi sia me o, mègasusui be naneke meli si akpe ɖe ye ŋu yeawɔ nuteƒe o; alo be yemate ŋu adze Mawu ŋu ɖaa o. Yehowa de bubu ŋuwò to tiatiawɔblɔɖe nana wò me. Ɛ̃, àte ŋu atiae be yealɔ̃ Yehowa, aɖo toe, ahayi edzi awɔ nuteƒe nɛ. Ne èwɔ tiatia ma la, Yehowa ayra ɖe wò agbagbadzedzewo dzi.

Nyateƒenya sia—be mía ŋutɔ gbɔe wòkpo ɖo be míalɔ̃ Yehowa ahasubɔe—fa akɔ na nyɔnu si ŋu míeƒo nu tso le ŋgɔdonyaa me la ŋutɔ. Egblɔ be: “Melɔ̃ Yehowa. Ɣeaɖewoɣi la, meŋlɔna be be nu si le vevie wue nye nyateƒe si wònye be melɔ̃ Yehowa. Esi melɔ̃e ta la, mate ŋu awɔ nuteƒe nɛ.” Le Yehowa ƒe kpekpeɖeŋu me la, wò hã àte ŋui.

[Etenuŋɔŋlɔ]