Nu Si Ta Nàte Ŋu Aka Ðe Nyanyuigbalẽawo Dzi

“Woxɔ ŋkɔ ŋutɔ. Woto wo dzi wɔ sinima kple agbalẽ geɖe siwo ŋu wogblẽ ga geɖe ɖo, . . . siwo ame geɖewo lɔ̃a ƒeƒle. Kristotɔwo ƒe ha vovovowo zãnɛ. Woto wo dzi to mawusubɔsubɔ kple nyaɣaɣlawo ŋuti nufiafia geɖewo vae.”—SUPER INTERESSANTE, BRAZILTƆWO ƑE MAGAZINE AÐE.

NU KA kafum wole nenema gbegbe? Agbalẽ aɖe si me woƒo yeaɖi nyanyuigbalẽwo, apostolowo ƒe lɛtawo, kple nyaɖeɖefia gbalẽa nu ƒu ɖo, si wofɔ le Nag Hammadi kple Egypt ƒe teƒe vovovowo le ƒe alafa 20 lia ƒe domedome lɔƒo, si me ame geɖe va le ɖe tsɔm le la ŋue magazine ma nɔ nu ƒom tso. Woyɔa agbalẽ ma kple etɔgbiwo zi geɖe be Apokrifa Ŋɔŋlɔawo.a

Ðe Nugbeɖoɖo Aɖe Yi Edzia?

Le míaƒe ɣeyiɣi siawo siwo me amewo megakana ɖe Biblia kple Kristodukɔa dzi tututu o me la, ame geɖewo va le ɖe tsɔm le Apokrifa Ŋɔŋlɔawo me ŋutɔ. Ŋɔŋlɔ siawo kpɔ ŋusẽ gã aɖe ɖe ale si ame geɖewo bua Kristotɔnyenye kple Yesu Kristo ƒe nufiafiawoe la dzi. Magazine aɖe gblɔ be: “Toma Ƒe Nyanyuigbalẽa kple apokrifagbalẽ bubuwo de dzi gbɔ na ame aɖewo, siwo ƒe xexlẽme le dzidzim ɖe edzi egbea—ame siwo mawusubɔsubɔ le dzodzrom gake womekana ɖe subɔsubɔhawo dzi o.” Wobu akɔnta be le Brazil ɖeɖe dzaa la, “ƒuƒoƒo 30 aɖewo ya teti tu woƒe dzixɔsewo ɖe Apokrifa Ŋɔŋlɔawo dzi.”

Nuŋlɔɖi siawo na woto nukpɔsusu aɖewo vae be le ƒe alafa enelia M.Ŋ. me la, Katolikohaa ɖo nugbe be yeatsyɔ nu Yesu ŋuti nyateƒea dzi, ale woɖe Yesu ƒe agbenɔnɔ ŋuti nya aɖewo siwo dze le Apokrifa Ŋɔŋlɔawo me la ɖa le Biblia me hetɔ tsi Nyanyuigbalẽ ene siwo le Biblia me. Elaine Pagels, si nye mawusubɔsubɔ ŋuti nufiala aɖe la hã gblɔ be: “Míeva le dzesi demee be nu si yɔm míele egbea be Kristotɔnyenye—kple nu siwo míenya be wonye Kristotɔwo ƒe nufiafiawo la—katã nye nu siwo woɖe tso agbalẽ vovovowo me.”

Le agbalẽnyawo abe Pagels ene ƒe susu nu la, menye Biblia dzi koe Kristotɔwo tu woƒe xɔse ɖo o, ke boŋ ɖe agbalẽ bubuwo, abe Apokrifa Ŋɔŋlɔawo ene, hã dzi. Le kpɔɖeŋu me, wogblɔ le BBC nyatakakadɔwɔƒea ƒe wɔna aɖe si wona ŋkɔe be Bible Mysteries (Biblia ŋuti Nyaɣaɣlawo) ƒe tanya si nye “Maria Magdalatɔ Vavã La” me be Apokrifa Ŋɔŋlɔawo yɔ Maria Magdalatɔ be enye “nufiala kple kplɔla na Yesu ƒe nusrɔ̃la bubuawo. Menye nusrɔ̃la dzro koe wònye o; enye apostoloawo ƒe apostolo.” Esi Juan Arias nɔ nu ƒom tso ɖoƒe si wobe Maria Magdalatɔ nɔ ŋu la, eŋlɔ ɖe Braziltɔwo ƒe nyadzɔdzɔgbalẽ si nye O Estado de S. Paulo me be: “Egbea la, nu geɖewo na míexɔe se be nyɔnuwoe xɔ ŋgɔ le Kristotɔwo ƒe ha gbãtɔ si Yesu ɖo la me, elabena nyɔnuwo ƒe aƒewo mee woɖo sɔleme gbãtɔwo ɖo, eye woɖo wo nunɔlawo kple bisiɔpwoe.”

Le ame geɖe gome la, kakaɖedzi le Apokrifa Ŋɔŋlɔawo me nyawo ŋu wu Biblia me nyawo. Ke hã, esia fɔ biabia vevie aɖewo ɖe te: Ðe wòsɔ be Kristotɔwo natu woƒe xɔse ɖe Apokrifa Ŋɔŋlɔawo dzia? Ne Apokrifa Ŋɔŋlɔawo me nya aɖe tsi tsitre ɖe Biblia tɔ ŋu la, wo dometɔ ka dzie nàka ɖo—Biblia loo alo Apokrifa Ŋɔŋlɔawo? Nyateƒee wònye be woɖo nugbe le ƒe alafa enelia me heɖe nanewo siwo dze le Apokrifa Ŋɔŋlɔawo me la ɖa le Biblia me hetɔ tsi Nyanyuigbalẽ eneawo bene woatsyɔ nu Yesu, Maria Magdalatɔ, kple ame bubuwo ŋuti nyateƒenya vevi aɖewo dzia? Be míaɖo biabia siawo ŋu la, na míade ŋugble tso Nyanyuigbalẽ eneawo dometɔ ɖeka, si nye Yohanes ƒe Nyanyuigbalẽa, ŋu kpɔ.

Kpeɖodzi Siwo Le Yohanes Ƒe Nyanyuigbalẽa Me

Le ƒe alafa 20 lia ƒe nuwuwu lɔƒo la, woke ɖe Yohanes ƒe Nyanyuigbalẽa ƒe asinuŋɔŋlɔgbalẽ kakɛ aɖe si woyɔna egbea be Papyrus Rylands 457 (P⁵²) la ŋu le Egypt. Biblia ƒe akpa si nye Yohanes 18:31-33, 37, 38 egbea ye nɔ asinuŋɔŋlɔgbalẽ kakɛ ma dzi, eye wodzrae ɖo ɖe John Rylands ƒe agbalẽdzraɖoƒe si le Manchester, England. Esiae nye Kristotɔwo Ƒe Hela Ŋɔŋlɔawo ƒe asinuŋɔŋlɔgbalẽ xoxoetɔ kekeake si ŋu woke ɖo. Agbalẽnyala geɖe xɔe se be ƒe 125 M.Ŋ. mee woŋlɔe, si nye ƒe 25 pɛ ko le Yohanes ƒe ku megbe. Nu si gawɔ nuku wue nye be asinuŋɔŋlɔgbalẽ siwo woŋlɔ emegbe la me nyawo de sɔsɔ ge pɛpɛpɛ kple nya siwo le asinuŋɔŋlɔgbalẽ xoxoetɔ kekeake sia me. Nyateƒe si wònye be Yohanes ƒe Nyanyuigbalẽa ƒe kɔpi xoxoetɔ kekeake sia te ŋu kaka ɖo Egypt le ɣeyiɣi mawo me la ɖo kpe edzi be Yohanes ŋutɔe ŋlɔ eƒe agbalẽa le ƒe alafa gbãtɔ M.Ŋ. me abe ale si Biblia ɖee fia ene. Eya ta ame aɖe si kpɔ nudzɔdzɔ siwo le Yohanes ƒe agbalẽa me teƒe ŋutɔŋutɔe ŋlɔ wo.

Ke le Apokrifa Ŋɔŋlɔaawo ya gome la, ƒe alafa evelia mee woŋlɔ wo katã kloe, si nye ƒe alafa ɖeka kple edzivɔwo le nudzɔdzɔawo megbe. Agbalẽnyala aɖewo he nya be nuŋlɔɖi siwo li xoxoxo dzie wotu Apokrifa Ŋɔŋlɔawo ɖo, gake kpeɖodzi aɖeke mele woƒe nyaa ŋu o. Ke azɔ, biabiae nye be, Wo dometɔ ka dzie nàka ɖo wu—nu siwo eteƒekpɔla ŋutɔ ŋlɔ loo alo esiwo ame siwo va nɔ agbe ƒe alafa geɖewo le nudzɔdzɔawo megbe ŋlɔ la yea? Ŋuɖoɖoa dze ƒãa.b

Ke nya siwo wogblɔ be wotrɔ nya aɖewo le Biblia ƒe Nyanyuigbalẽawo me tsɔ ɣla Yesu ƒe agbemeŋutinya aɖewo ya ɖe? Le kpɔɖeŋu me, ɖe kpeɖodzi aɖe li be wotrɔ nya aɖewo le Yohanes Ƒe Nyanyuigbalẽa me le ƒe alafa enelia me tsɔ tro gbo nyateƒenya aɖewoa? Be míaɖo biabia sia ŋu la, ele be míaɖo ŋku edzi be nuŋlɔɖi siwo dzi wotu Biblia si li egbea ɖo la dometɔ ɖekae nye ƒe alafa enelia me asinuŋɔŋlɔgbalẽ si woyɔna be Vatican 1209. Ne ɖe wotrɔ nya aɖewo le Biblia si le mía si egbea me le ƒe alafa enelia me la, anye ne tɔtrɔ mawo dze le asinuŋɔŋlɔgbalẽ ma me. Dzidzɔtɔe la, asinuŋɔŋlɔgbalẽ bubu si me Luka kple Yohanes ƒe agbalẽawo ƒe akpa gãtɔ dze le lae nye Bodmer 14, 15 (P⁷⁵), si woŋlɔ tso ƒe 175 M.Ŋ. va se ɖe ƒe 225 M.Ŋ. me. Le agbalẽnyalawo ƒe nya nu la, vovototo boo aɖeke mele asinuŋɔŋlɔgbalẽ sia kple Vatican 1209 la dome o. Esia fia be womewɔ tɔtrɔ gobi aɖeke le Biblia me Nyanyuigbalẽawo ŋu o, eye Vatican 1209 la ɖo kpe esia dzi.

Nuŋlɔɖi alo nu bubu aɖeke meli si ɖo kpe edzi be wotrɔ nuwo le Yohanes ƒe agbalẽa, alo Nyanyuigbalẽ bubuawo me le ƒe alafa enelia me o. Le ŋkuléle ɖe asinuŋɔŋlɔgbalẽ kakɛ vovovo siwo ŋu woke ɖo le Oxyrhynchus, Egypt, ŋu vɔ la, Aƒetɔ Peter M. Head, si nye nufialagã le Cambridge Yunivɛsiti la ŋlɔ be: “Ne míagblɔe gbadzaa la, asinuŋɔŋlɔgbalẽ siawo ɖo kpe nya siwo le asinuŋɔŋlɔgbalẽ vevi [siwo wotsɔ ŋɔŋlɔdzesi gãwo ŋlɔ tso ƒe alafa enelia me] siwo koŋ dzi wotu egbegbe Biblia gɔmeɖeɖe geɖewo ɖo, me la dzi. Tɔtrɔ boo aɖeke mele Nubabla Yeye si li egbea kple eƒe nuŋlɔɖi gbãtɔ siwo ŋu woke ɖo la dome o.”

Aleke Míaƒo Nya Tae Azɔ?

Kristotɔ siwo katã nɔ anyi tso ƒe alafa evelia ƒe domedome lɔƒo ke la lɔ̃ ɖe edzi be Biblia me Nyanyuigbalẽ eneawo—Mateo, Marko, Luka, kple Yohanes—me nyawo de pɛpɛpɛ. Biblia me Nyanyuigbalẽ eneawo dzi koe wotu Tatian ƒe Diatessaron (Helagbemenya si gɔmee nye “Eneawo katã”) si ame geɖe zãna, si woŋlɔ tso ƒe 160 va se ɖe ƒe 175 M.Ŋ. me la ɖo, ke menye Apokrifa Ŋɔŋlɔawo me yeaɖi nyanyuigbalẽawoe o. (Kpɔ aɖaka si nye “Nuŋlɔɖi Gbãtɔ Si Ðo Kpe Nyanyuigbalẽawo Dzi.”) Irenaeus, si nɔ agbe le ƒe alafa evelia M.Ŋ. ƒe nuwuwu lɔƒo la hã na numeɖeɖe aɖe si ɖe dzesi. Egblɔ be esi wònye anyigba ƒe dzogoe enee li, (ɣedzeƒe, ɣetoɖoƒe, dziehe, kple anyiehe) eye anyigba ƒe ya enee li ta la, ele be Nyanyuigbalẽawo hã nanye ene. Togbɔ be eƒe numeɖeɖe sia mede to o hã la, woɖo kpe edzi be Nyanyuigbalẽ ene koe nɔ anyi le ɣeyiɣi mawo me.

Nu kae kpeɖodzi siawo katã ɖe fia? Eyae nye be tso ƒe alafa evelia me ke la, wometrɔ nu boo aɖeke le Kristotɔwo Ƒe Hela Ŋɔŋlɔawo, siwo dome Nyanyuigbalẽ eneawo hã le la me o. Kpeɖodzi sẽŋu aɖeke meli be woɖo nugbe le ƒe alafa enelia me hetrɔ Ŋɔŋlɔ siwo tso Mawu ƒe gbɔgbɔ me la me nyawo alo ɖe ɖewo le eme o. Ke boŋ Bibliaŋutinunyala Bruce Metzger ŋlɔ be: “Kaka ƒe alafa evelia nawu enu la, . . . xɔseha vovovo siwo kaka ɖe Mediterranea nutoa kple dukɔ siwo tso Britain va ɖo Mesopotamia la ƒe akpa gãtɔ lɔ̃ ɖe edzi be Nubabla Yeyea me nyawo de pɛpɛpɛ.”

Apostolo Paulo kple Petro siaa ɖo kpe Mawu ƒe Nya la ƒe nyateƒenyenye dzi. Wo ame evea siaa xlɔ̃ nu wo hati Kristotɔwo be woagaxɔ nu bubu aɖeke si to vovo na esiwo wofia wo la dzi ase o. Le kpɔɖeŋu me, Paulo ŋlɔ ɖo ɖe Timoteo be: “Oo, Timoteo, kpɔ nu si wotsɔ de asi na wò la dzi, eye nàgbe dzeɖoɖo ƒuƒlu siwo medea asixɔxɔ nu kɔkɔewo ŋu o, kple nu si woyɔna alakpatɔe be ‘sidzedze’ la ƒe glãkahehewo. To boblododo sidzedze sia ƒomevi me la, ame aɖewo trɔ ɖa le xɔse la gbɔ.” Petro ɖo kpe edzi be: “Ao, menye gli siwo wokpa kple aɖaŋu yomee míedze esi míena mienya mía Aƒetɔ Yesu Kristo ƒe ŋusẽ kple anyinɔnɔ la o, ke boŋ esi míekpɔ eƒe gãnyenye kple atsyɔ̃ teƒe tae.”—1 Timoteo 6:20, 21; 2 Petro 1:16.

Ƒe alafa geɖee nye esia la, gbɔgbɔ ʋã nyagblɔɖila Yesaya wògblɔ be: “Gbe ƒuna, eye seƒoƒo yrɔna, ke mía Mawu ƒe nya anɔ anyi tegbee.” (Yesaya 40:8) Kakaɖedzi ate ŋu anɔ míawo hã si be Ame si ƒe gbɔgbɔ me Ŋɔŋlɔ Kɔkɔeawo tso la kee kpɔ eta le ƒe geɖe siwo va yi me, bene “woaɖe ame ƒomeviwo katã, eye nyateƒe ƒe sidzedze vavãtɔ la nasu wo si.”—1 Timoteo 2:4.

[Etenuŋɔŋlɔwo]

[Nya si ɖe dzesi si le axa 9]

Papyrus Rylands 457 (P⁵²) la, Yohanes ƒe Nyanyuigbalẽa ƒe asinuŋɔŋlɔgbalẽ kakɛ si woŋlɔ le ƒe alafa evelia M.Ŋ. me, si nye ƒe ʋɛ aɖewo ko le eƒe nuŋlɔɖi gbãtɔwo ŋɔŋlɔ megbe

[Aɖaka/Nɔnɔmetata siwo le axa 11]

Nuŋlɔɖi Gbãtɔ Si Ðo Kpe Nyanyuigbalẽawo Dzi

Le Kristotɔwo ƒe ŋutinya ƒe gɔmedzedze ke la, ɖeklemiɖelawo ʋli nya be Nyanyuigbalẽawo tsi tsitre ɖe wo nɔewo ŋu, si wɔe be womate ŋu aka ɖe wo dzi o. Siriatɔ aɖe si ŋkɔe nye Tatian (si nɔ agbe le ƒe 110 va se ɖe 180 M.Ŋ. lɔƒo me) ʋli Nyanyuigbalẽawo ta. Esusui be ne woƒo Nyanyuigbalẽ eneawo nu ƒu wòzu agbalẽ ɖeka si me nyawo to mɔ ɖeka la, ekema akpa aɖeke magadze abe ɖee wòtsi tsitre ɖe akpa bubu ŋu ene o.

Tatian dze dɔ sia wɔwɔ gɔme. Míenya ne Helagbe mee wòwɔ nuŋlɔɖi sia le loo alo Siriagbe mee o. Aleke kee wòɖale o, Tatian wu eƒe dɔa nu le ƒe 170 M.Ŋ. me lɔƒo, eye wòna ŋkɔ eƒe agbalẽ sia be Diatessaron si nye Helagbe me nya si gɔmee nye “eneawo katã.” Nu ka tae wòle be míatsɔ ɖe le nuŋlɔɖi sia si metso gbɔgbɔ me o la me?

Le ƒe alafa 19 lia me la, ɖeklemiɖelawo nɔ gbɔgblɔm be womeŋlɔ Nyanyuigbalẽawo dometɔ aɖeke do ŋgɔ na ƒe alafa evelia M.Ŋ. ƒe domedome o; si nye nukpɔsusu si ana kakaɖedzi maganɔ wo me nyawo ŋu tututu o. Ke hã, Diatessaron ƒe blema asinuŋɔŋlɔgbalẽ siwo ŋu woke ɖo tso ɣemaɣi ke la nye kpeɖodzi sẽŋu aɖe be amewo nya nu tso Nyanyuigbalẽ eneawo ŋu nyuie hafi ƒe alafa evelia M.Ŋ. ƒe domedome naɖo gɔ̃ hã.

Diatessaron la kple eŋuti nuŋlɔɖi vovovo siwo le Arabgbe, Armeniagbe, Helagbe, kple Latingbe me la ʋã agbalẽnyalagã Aƒetɔ Frederic Kenyon wòŋlɔ be: “Nuŋlɔɖi siawo siwo ŋu woke ɖo la na ɖikeke aɖeke mele eme o be Nyanyuigbalẽawo dzie wokpɔ ŋlɔ Diatessaron la, eye woɖo kpe edzi be kaka ƒe 170 M.Ŋ. naɖo la, Biblia ƒe Nyanyuigbalẽ eneawo dzie amewo ka ɖo wu le nuŋlɔɖi bubu siwo katã ƒo nu tso mía Ðela la ƒe agbenɔnɔ ŋu la dome.”

[Nɔnɔmetatawo]

Tatian

Diatessaron la, le Arabgbe me

[Nyaɖoɖo si le 8, 9]

(Edze nyuie le agbalẽa ŋutɔ me)

“c.” stands for “circa,” or “about.”

Ƒe 33 M.Ŋ.

Yesu ku

Ƒe 41 lɔƒo

Woŋlɔ Mateo

Ƒe 58 lɔƒo

Woŋlɔ Mateo

Ƒe 65 lɔƒo

Woŋlɔ Mateo

Ƒe 98 lɔƒo

Woŋlɔ Mateo

Ƒe 125

Rylands 457 (P52)

Ƒe 140 lɔƒo

Apocryphal writings begin

Ƒe 175 lɔƒo

Bodmer 14, 15 (P75)

Ƒe alafa enelia

Vatican 1209

[Nɔnɔmetata si le axa 10]

Vatican 1209

Ƒe alafa enelia me Vatican 1209 ƒe asinuŋɔŋlɔgbalẽ si dze le etame la ɖee fia be nu boo aɖeke metrɔ le Nyanyuigbalẽawo me o

[Afi Si Míexɔ Mɔɖeɖe Tso]

Woɖee tso agbalẽ si nye Bibliorum Sacrorum Graecus Codex Vaticanus, 1868

[Nɔnɔmetata si le axa 8]

[Nɔnɔmetata Tsoƒe si le axa 9]

© The Trustees of the Chester Beatty Library, Dublin