Nu Adre Siwo Nana Biblia Xexlẽ Ðea Vi

“Menye ɖeko Biblia nye agbalẽ si woƒle wu le agbalẽwo dome ko o, ke boŋ eyae nye esi wogaƒlena wu ƒe sia ƒe hã.”—MAGAZINE SI WOYƆNA BE TIME.

“Mexlẽa Biblia ɣeaɖewoɣi, gake exexlẽ mevivia nunye kura o.”—KEITH, SI NYE ENGLANDTƆ HADZILA NYANYƐ AÐE.

EWƆ nuku be Biblia le ame geɖe si, gake edze abe meɖea vi boo aɖeke na wo o ene. Gake ame aɖewo ya dea asixɔxɔ nu si woxlẽna le Biblia me ŋu. Le kpɔɖeŋu me, nyɔnu aɖe si ŋkɔe nye Nancy gblɔ be: “Tso esime mete Biblia xexlẽ ŋdi sia ŋdi hedea ŋugble le nu si mexlẽna ŋu la, eva le bɔbɔe nam be manɔ te ɖe kuxi ɖe sia ɖe si dzea ŋgɔm le ŋkekea me la nu. Gbesiagbe nuwɔna sia kpe ɖe ŋunye mete ŋu lé nye blanuiléle nu wu agbagba ɖe sia ɖe si medze le ƒe 35 siwo va yi me.”

Ne mèxlẽ Biblia kpɔ o hã la, ɖe wòwɔa nuku na wò be exexlẽ le vi ɖem na ame aɖewo ya? Ne èxlẽa Biblia xoxo hã la, ɖe nàdi be exexlẽ naɖe vi geɖe wu na wòa? Ne èdii la, ekema te nu adre siwo ŋu míaƒo nu tsoe le nyati sia me la wɔwɔ kpɔ.

Nu 1—Xlẽe kple susu nyui

◼ Ðewohĩ èxlẽa Biblia le esi emenyawo vivina ta, le esi wòle be nàxlẽe ta, alo esi nèdi be yeakpɔ mɔfiame siwo akpe ɖe ŋuwò le xexe vɔ̃ɖi sia me ta. Gake exexlẽ aɖe vi na wò wu ne wò taɖodzinue nye be yeanya ame si tututu Mawu nye. Tsɔ kpe ɖe eŋu la, aɖe vi geɖe na wò ne wò susue nye be yeakpɔ ale si Biblia me nyawo ate ŋu atrɔ yeƒe agbenɔnɔ.

Ŋɔŋlɔawo tsɔ Biblia sɔ kple ahuhɔ̃e tsɔ te gbe ɖe edzi be, ele vevie be susu nyui nanɔ mía si ne míele Biblia xlẽm hegblɔ be: “Ne ame aɖe nye nyasela, eye menye nyadziwɔla o la, eya amea le abe ame aɖe si le eƒe dzɔdzɔmemo kpɔm le ahuhɔ̃e me la ene. Elabena ekpɔa eɖokui, eye wòdzona yina, eye enumake eŋlɔa ame si ƒomevi wònye la be. Ke ame si léa ŋku ɖe se deblibo si naa ablɔɖe la ŋu, eye wònɔa edzi ɖaa la, le esi wòzu dɔwɔla, ke menye nyasela si ŋlɔa nu be o ta la, akpɔ dzidzɔ le ewɔwɔ me.”—Yakobo 1:23-25.

Ame si ŋu nya wogblɔ le kpɔɖeŋu sia me la kpɔ eƒe mo le ahuhɔ̃e me, gake metrɔ asi le eƒe dzedzeme ŋu o. Ðewohĩ melé ŋku ɖe eɖokui ŋu nyuie o, alo anye be ɖe medi be yeatrɔ asi le yeƒe dzedzeme ŋu o. Nenema kee ne míexlẽa Biblia ɖewoɖewoe, alo míewɔa nu si míexlẽ le eme la dzi o la, maɖe vi gobii aɖeke na mí o. Gake ne míeléa ŋku ɖe Biblia me nyawo ŋu kple susu be míazu “nyadziwɔla,” eye míena míaƒe tamesusuwo kple nuwɔnawo wɔ ɖeka kple Mawu tɔ la, míakpɔ dzidzɔ vavãtɔ.

Nu 2—LIA Di Biblia si gɔme woɖe nyuie

◼ Ðewohĩ Biblia vovovowo le mia degbe me. Togbɔ be Biblia siawo dometɔ ɖe sia ɖe ate ŋu aɖe vi na wò hã la, wo dometɔ aɖewo xexlẽ sesẽ, elabena gbegɔmeɖelaawo zã nya gã nya gã siwo gɔme sese sesẽ. (Dɔwɔwɔwo 4:13) Biblia gɔme ɖela aɖewo tsɔ dekɔnuwo tɔ tsi Biblia me nyawo. Le kpɔɖeŋu me, abe ale si míekpɔe le magazine sia me nyati gbãtɔwo mee ene la, ame aɖewo tsɔ dzesideŋkɔwo abe “Mawu” alo “Aƒetɔ” ene ɖɔ li Mawu ƒe ŋkɔ Yehowa. Eya ta ne èdi be yeaxlẽ Biblia la, di esi gɔme woɖe pɛpɛpɛ, eye egɔmesese kple exexlẽ le bɔbɔe.

Le xexea me godoo la, ame miliɔn geɖe de dzesii be nenemae Xexe Yeye Gɔmeɖeɖe Biblia le.a Bu ŋutsu tsitsi aɖe si le Bulgaria ŋu kpɔ. Ede Yehowa Ðasefowo ƒe kpekpe aɖe, eye wona Xexe Yeye Gɔmeɖeɖe Biblia ɖekae. Egblɔ emegbe be: “Mexlẽ Biblia ƒe geɖe, gake nyemexlẽ Biblia si gɔme sese le bɔbɔe, eye emenyawo de dzi gbɔ na ame alea, tɔgbi kpɔ o.”

Nu 3— LIA Do gbe ɖa

◼ Àte ŋu ase Biblia gɔme ɖe edzi wu ne èbia Eŋlɔla la be wòakpe ɖe ŋuwò abe ale si hakpala la hã biae ene esime wògblɔ be: “Klo nu ɖa le nye ŋku dzi, ne makpɔ nukunuwo le wò se la me!” (Psalmo 119:18) Ɣesiaɣi si nèdi be yeaxlẽ Biblia la, do gbe ɖa na Mawu gbã be wòakpe ɖe ŋuwò nàse eƒe Nyaa gɔme. Àte ŋu ada akpe hã ɖe Biblia ta, elabena Biblia manɔmee la, míate ŋu anya Mawu o.—Psalmo 119:62.

Ðe Mawu ɖoa gbe siwo amewo dona ɖa be wòakpe ɖe yewo ŋu alea la ŋua? Bu nu si dzɔ ɖe nyɔnuvi ƒewuivi eve siwo le Uruguay dzi ŋu kpɔ. Esi woxlẽ nu si Biblia gblɔ le Daniel 2:44 la, womese egɔme o, eya ta wodo gbe ɖa na Mawu be wòaɖo ame aɖe ɖa wòava kpe ɖe yewo ŋu yewoase egɔme. Nyɔnuviawo mekpɔ tu Biblia ƒe akpa ma hafi Yehowa Ðasefo eve va ƒo ʋɔ na wo o; woxlẽ mawunyakpukpui ma tututu si ŋu wodo gbe ɖa le la, eye woɖe eme na wo be mawunyakpukpuia fia be Mawu ƒe Fiaɖuƒea ava xɔ ɖe amegbetɔwo ƒe dziɖuɖuwo teƒe.b Nyɔnuviawo kpɔe dze sii be Mawu ɖo gbe si yewodo ɖa bia be wòakpe ɖe yewo ŋu la ŋu.

Nu 4—LIA Xlẽe gbe sia gbe

◼ Agbalẽtala aɖe gblɔ be esi ŋɔdzidonamelawo dze Amerika dzi le September 11, 2001 megbe la, “ame geɖe te Biblia ƒeƒle.” Le ame geɖe gome la, ne woɖo xaxa me ko hafi wotrɔna ɖe Mawu ƒe Nya la ŋu. Gake Biblia de dzi ƒo na mí be míaxlẽe gbe sia gbe, elabena egblɔ be: “Mègaɖe nu le segbalẽ sia ŋu o, eye nàbu eŋu zã kple keli, ne nàlé nu siwo katã woŋlɔ ɖe eme la me ɖe asi, eye nàwɔ wo dzi; elabena eya ko hafi dzɔgbenyui anɔ mɔ dzi na wò, eye nu sia nu adze edzi na wò.”—Yosua 1:8.

Míate ŋu awɔ ale si wòle vevie be míaxlẽ Biblia ƒe kpɔɖeŋu ale: Tsɔe be dzidɔ ɖea fu na ame aɖe, eya ta eɖoe be yeanɔ nu siwo me nunyiame le wu la ɖum. Ðe nuɖuɖu ƒe ɖoɖo ma aɖe vi nɛ ne ɣeyiɣi si akɔta le evem vevie ko hafi wòwɔna ɖe edzia? Gbeɖe. Ne elé ŋku ɖe eƒe nuɖuɖu ŋu nyuie ɣeawokatãɣi ko hafi wòaɖe vi nɛ. Nenema kee ne èxlẽa Biblia gbe sia gbe ko hafi “nu sia nu adze edzi na wò.”

Nu 5—LIA Xlẽe le mɔ vovovowo nu

◼ Biblia xexlẽ tso Mose Ƒe Agbalẽ Gbãtɔ va se ɖe Nyaɖeɖefia ate ŋu asɔ na ame aɖewo, gake ɖewohĩ àkpɔe be yeate ŋu azã mɔnu bubuwo hã. Te mɔnu siwo gbɔna kpɔ.

Xlẽ nu tso ame aɖe koŋ ŋu. Xlẽ ta alo agbalẽ siwo ƒo nu tso mawusubɔla aɖe koŋ ŋu, abe:

• Yosef: 1 Mose 37-50.

• Rut: Rut 1-3.

• Yesu: Mateo 1-28; Marko 1-16; Luka 1-24; Yohanes 1-21.c

Tia nyati aɖe koŋ. Xlẽ mawunyakpukpui siwo ku ɖe eŋu. Le kpɔɖeŋu me, di nya siwo ku ɖe gbedodoɖa ŋu, eye nàxlẽ aɖaŋu siwo Biblia ɖo ku ɖe gbedodoɖa ŋu kpakple gbedodoɖa geɖe siwo woŋlɔ ɖe Biblia me.d

Kɔ gbe dzi nàxlẽe. Ne èkɔa gbe dzi xlẽa Biblia la, aɖe vi na wò ŋutɔ. (Nyaɖeɖefia 1:3) Miate ŋu akɔ gbe dzi axlẽe ɖekae abe ƒome ene; miate ŋu ama mawunyakpukpuiawo axlẽ, alo ne ame vovovowo ŋue ŋutinyaa ku ɖo la, miate ŋu ana ame sia ame naxlẽ nya si wo dometɔ aɖe koŋ gblɔ. Biblia si woxlẽ lé ɖe mɔ dzi la sese dzɔa dzi na ame aɖewo. Nyɔnu aɖe gblɔ be: “Menɔ bɔbɔe nam be madze Biblia xexlẽ gɔme o, eya ta metsɔ Biblia si woxlẽ lé ɖe mɔ dzi la dze egɔme. Fifia meva kpɔe be Biblia xexlẽ vivina wu ŋutinyagbalẽ vivi gɔ̃ hã xexlẽ.”

Nu 6​—LIA De ŋugble tso nu si nèxlẽ ŋu

◼ Hloloetsotso kple susuhenu siwo bɔ ɖe agbea me egbea nana ŋugble menya dena o. Gake ale si ko wòhiã be míaƒe dɔgbo natu nu siwo míeɖuna hafi ŋusẽ naɖo mía ŋu la, nenema kee wòhiã be míade ŋugble le nu siwo míexlẽna le Biblia me la ŋu hafi wòaɖe vi na mí. Míate ŋu awɔ esia ne míedea ŋugble le nu siwo míexlẽ la ŋu, eye míebiaa mía ɖokui be: ‘Nu kae esia le fiayem tso Yehowa Mawu ŋu? Aleke nya sia kamee? Aleke mate ŋu azãe atsɔ akpe ɖe ame bubuwo ŋui?’

Ŋugbledede alea ana Biblia me nyawo naɖo míaƒe dzi gbɔ ahana míakpɔ dzidzɔ geɖe wu ɖe Mawu ƒe Nya la xexlẽ ŋu. Psalmo 119:97 gblɔ be: “Aleke gbegbe nyemehelɔ̃a wò se lae o! Nye ŋugbledede wònye ɖaa.” Esi hakpala la dea ŋugble le Ŋɔŋlɔawo ŋu ta la, woxɔa susu me nɛ ŋkeke bliboa katã. Ema wɔwɔ kpe ɖe eŋu wòva lɔ̃ nu siwo wòsrɔ̃na la vevie.

Nu 7​—LIA Na woakpe ɖe ŋuwò nàse egɔme

◼ Mawu mekpɔa mɔ be míase yeƒe Nya la gɔme bliboe le mía ɖokui si o. Biblia ŋutɔ gɔ̃ hã na míenya be nya aɖewo “gɔme sese sesẽ.” (2 Petro 3:16) Dɔwɔwɔwo ƒe agbalẽa ƒo nu tso Etiopiatɔ dziɖuɖumegã aɖe si mese Biblia ƒe akpa aɖe si xlẽm wònɔ la gɔme o ŋu. Mawu dɔ eƒe subɔla aɖe ɖa wòva kpe ɖe eŋu, eye nu si do tso emee nye be Etiopia ŋutsua yi “eƒe mɔ la zɔzɔ dzi kple dzidzɔ.”—Dɔwɔwɔwo 8:26-39.

Ne ame aɖe kpe ɖe ŋuwò nèse nu siwo nèxlẽna le Biblia me la gɔme nyuie la, exexlẽ aɖe vi na wò hã geɖe wu. Te ɖe Yehowa Ðasefo siwo le miaƒe nutoa me ŋu, alo zã adrɛs siwo le magazine sia ƒe axa 4 lia dometɔ si sɔ na wò nàtsɔ aŋlɔ agbalẽ na wo, ale be woawɔ ɖoɖo ame aɖe nava srɔ̃ Biblia kpli wò le aƒewò me femaxee.

[Etenuŋɔŋlɔwo]