Kpɔ Nyuie Be Woagable Wò O

DON QUIXOTE nye ŋkɔ si Spaintɔ agbalẽŋlɔla Miguel de Cervantes si nɔ agbe le ƒe alafa 16 lia me la tsɔ na ame aɖe le agbalẽ si wòtsɔ ŋkɔ ma ke na la me. Le ŋutinyagbalẽ ma me la, Don Quixote bua xotutu kple gli siwo ŋu nya wòse tso kalẽtɔ xɔnametɔ siwo xɔna na ɖetugbui siwo ɖo xaxa me la ŋu. Eteƒe medidi hafi wòsusu be ye hã yezu kalẽtɔ xɔnametɔ o. Le ŋutinya xɔŋkɔ siwo wòŋlɔ dometɔ ɖeka me la, Don Quixote kpɔ blema nutumɔ gã aɖewo hesusu be amedzidzela dzɔatsu vɔ̃ɖi aɖewoe, eya ta ete avuwɔwɔ kpli wo. Esusu be dɔ nyui wònye yeawɔ na Mawu ne yewu amedzidzela dzɔatsu mawo, evɔ ŋukpe ko wòdo eɖokui mlɔeba.

Nya kpakpae Don Quixote ƒe ŋutinya sia nye, gake zi geɖe la, menye nukokoedoname ƒe nyae amebeble nyena o. Le kpɔɖeŋu me, bu ahanoxe si susuna be yeate ŋu ano aha ale si nu yedi, gake esia wɔe be wòva dze dɔ mlɔeba, alo eƒe ahanonoa gblẽ nu le eƒe ƒomea ŋu vevie la ŋu kpɔ. Alo bu nyɔnuvi si le vɔvɔ̃m be yeava lolo akpa, ale be megaɖua nu nyuie o, gake wòsusu be yele lãmesẽ me, evɔ wònye eɖokui wum wòle vivivi hafi la ŋu kpɔ.

Ðe wòate ŋu adzɔ be woable mía dometɔ aɖe hã? Ewɔ nublanui ya, gake ŋuɖoɖoae nye ɛ̃. Nya lae nye be, mía dometɔ ɖe sia ɖe ate ŋu aɖo nɔnɔme sia me. Eye woate ŋu able mí le nu siwo dzi míexɔ se vevie le mawusubɔsubɔ me la gɔ̃ hã me, eye esia ate ŋu agblẽ nu le mía ŋu vevie. Nu ka tae? Aleke míawɔ be woagable mí o?

Nu Si Beble Ate Ŋu Agblẽ Le Ame Ŋu

Nyagɔmeɖegbalẽ aɖe ɖe nya “beble” gɔme be, “woana ame nalɔ̃ ɖe edzi be nu si nye aʋatso alo si ŋu kpeɖodzi mele o la nye nyateƒe alo nu si ŋu kpeɖodzi le.” Efia hã be “woazi susu alo dzixɔse totro ɖe ame dzi ale be ame nasusu be yemenya naneke o, nyaa nawɔ nuku nɛ alo wòaxɔe ade eme nenema.” Nu si koŋ nya sia kple etɔgbi bubu siwo nye “kplɔ ame trae” kple “flu ame” fiae nye ale si woato ayemɔ dzi able ame. Ne ame aɖe menya be ɖe woɖoe koŋ gblɔ nya si mele eteƒe o na ye, ale be ‘yeasusu be yemenya naneke o, nyaa nawɔ nuku na ye alo yeaxɔe ade eme nenema ko’ o la, ekema ele afɔku gã aɖe me.

Nyateƒenya si wɔ nublanui lae nye be, zi geɖe la, ne woɖo kpe edzi na ame si woble alo flu la be nu si dzi wòxɔ se la menye nyateƒe o hã la, eléa eme ɖe asi kokoko. Ðewohĩ eƒe dzi katã ku ɖe nu si dzi wòxɔ se la ŋu ale gbegbe be, medina be yeakpɔ alo ase kpeɖodzi aɖeke si ate ŋu ana wòatrɔe o.

Ðe Míawo Hã Míele Afɔku Ma Mea?

Ðewohĩ àbia be: ‘Ðe menye amiɖeɖeɖenya be woagblɔ be afɔku li be woate ŋu able mía dometɔ ɖe sia ɖe le nu siwo dzi míexɔ se le mawusubɔsubɔ me la me oa?’ Kpao. Nu si tae nye be Satana Abosam, ame si Yesu yɔ be “aʋatsokafofo” la ɖoe kplikpaa be yeable mí ahaflu mí. (Yohanes 8:44) Biblia yɔ Satana be “nuɖoanyi sia ƒe mawu,” eye wògblɔ be “[egbã] ŋku” na ame miliɔn geɖe tso gbe aɖe gbe ke. (2 Korintotɔwo 4:4) Eye egale “anyigba dzi nɔlawo katã blem” fifia kura gɔ̃ hã.—Nyaɖeɖefia 12:9.

Tso esime wowɔ amegbetɔwo kee Satana dze amewo beble gɔme. Le kpɔɖeŋu me, eble Xawa be mehiã be wòawɔ Ewɔla ƒe sewo dzi o, eye be ate ŋu ‘anɔ abe Mawu ene, anya nyui kple vɔ̃,’ si fia be eya ŋutɔ ate ŋu aɖo nu si nye nyui kple nu si nye vɔ̃ na eɖokui. (1 Mose 3:1-5) Emae nye zi gbãtɔ si woble ame vevie, elabena togbɔ be wona ablɔɖe amegbetɔwo be woawo ŋutɔwo natia nu si woawɔ hã la, womewɔ wo be woawo ŋutɔwo naɖo nu si nye nyui kple nu si nye vɔ̃ na wo ɖokui o. Mawu ɖeka, si nye Wɔla kple Dziɖulagã koe kpɔ mɔ, eye eya ko sie ŋusẽ le be wòaɖo nu si nye nyui kple nu si nye vɔ̃ na amegbetɔwo. (Yeremiya 10:23; Nyaɖeɖefia 4:11) Ne ame aɖe susui be esi yekpɔ mɔ atia nu si nyo na ye kple nu si menyo na ye o ta la, efia be yekpɔ mɔ aɖo nu si nye nyui kple nu si nye vɔ̃ na ye ɖokui la, menye ɖe woblee nye ema oa? Nublanuitɔe la, mɔ sia ɖea mí amegbetɔ madeblibowo bɔbɔe.

Ðe Wòate Ŋu Aɖe Wò Hã?

Ðewohĩ nu siwo dzi nèxɔ se vevie la li tso gbe aɖe gbe ke, eye anɔ eme be eya dzie wò ƒometɔwo katã xɔ se. Gake ema mefia kokoko be nu siwo dzi woxɔ se la nye nyateƒe o. Nu ka tae? Biblia gblɔ be le Kristo ƒe apostoloawo ƒe ku megbe teti la, Kristo hamea me tɔ aɖewo va zu ameblelawo, eye wofiaa nu “totrowo, be woahe nusrɔ̃lawo ɖe wo ɖokuiwo ŋu.” (Dɔwɔwɔwo 20:29, 30) Wodze aɖaŋu hetsɔ “aɖe ŋanɛ” kpakple “xexemenunya kple beble dzodzro . . . le amewo ƒe kɔnyinyiwo nu” ble amewo.—Kolosetɔwo 2:4, 8.

Ðe nuwo trɔ egbea? Ao, elabena apostolo Paulo gblɔ be nuwo agblẽ ɖe edzi le “ŋkeke mamlɛawo,” si nye ŋkeke siwo me míele fifia la me. Eŋlɔ be: “Ame vɔ̃ɖiwo kple ameblelawo anɔ vɔ̃ɖivɔ̃ɖim ɖe edzi, woanɔ amewo kplɔm anɔ tatram, eye woanɔ woawo hã kplɔm anɔ tatram.”—2 Timoteo 3:1, 13.

Eya ta anyo be míatsɔ apostolo Paulo ƒe nuxlɔ̃ame sia nya vevii be: “Eya ta ame si susu be yele tsitre la nakpɔ nyuie be wòagadze anyi o.” (1 Korintotɔwo 10:12) Nya lae nye be ame siwo be yewonye Mawu subɔlawo ye Paulo gblɔ nya siawo na. Eya ta ne ame aɖe susui be Satana mate ŋu able ye o la, ekema eble eɖokui ŋutɔ. Ame ɖeka hɔ̃ hã meli, si Satana mate ŋu able kple eƒe “aɖaŋu vɔ̃wo” o. (Efesotɔwo 6:11) Esia tae apostolo Paulo gblɔ na ehati Kristotɔwo be yele vɔvɔ̃m be “le mɔ aɖe nu la, ale si da la tsɔ eƒe ayedzedze ble Xawa la, ɖewohĩ woagblẽ [woƒe] susu tso anukwareɖiɖi kple agbe dzadzɛ nɔnɔ siwo Kristo la dze na la me.”—2 Korintotɔwo 11:3.

Nu Kae Nàwɔ Be Woagable Wò O?

Nu kae nàwɔ be Satana nagable wò o? Aleke nàwɔ aka ɖe edzi be yele ‘ta dem agu na Mawu le gbɔgbɔ kple nyateƒe me’? (Yohanes 4:24) Ðe mɔ nu si Yehowa Mawu na wò la nakpe ɖe ŋuwò. Gbã la, ena “susumeŋutete mí,” ale be míate ŋu ade vovo nu si nye nyateƒe kple nu si nye aʋatso dome. (1 Yohanes 5:20) Ena wòle bɔbɔe be nàte ŋu anya Satana ƒe aɖaŋu vɔ̃awo hã. (2 Korintotɔwo 2:11) Le nyateƒe me la, ena nu sia nu si akpe ɖe ŋuwò be Satana nagable wò o.—Lododowo 3:1-6; Efesotɔwo 6:10-18.

Vevietɔ wu la, ena nu vevi aɖe si nàte ŋu azã ɣesiaɣi atsɔ akpɔ ɖokuiwò ta. Eyae nye nu ka? Nu ma ke ŋue apostolo Paulo de dzi ƒo na eƒe zɔhɛ Timoteo be wòaɖo ŋu ɖo le nu siwo dzi wòaxɔ ase le mawusubɔsubɔ me la ŋu. Esi apostolo Paulo xlɔ̃ nu Timoteo tso “ame vɔ̃ɖiwo kple ameblelawo” ŋu vɔ la, egblɔ nɛ be wòaxɔ nya siwo le “ŋɔŋlɔ kɔkɔeawo,” si nye Mawu ƒe Nya kɔkɔe Biblia la, me ko dzi ase, ale be wòagbe ame mawo ƒe nufiafiawo.—2 Timoteo 3:15.

Ele eme be ame aɖewo agblɔ be ame siwo xɔ Mawu dzi se, eye wolɔ̃ ɖe edzi be eƒe Nyae Biblia nye la boŋ ye woble. Gake ne míagblɔe tututu la, ame siwo sẽ dzi me hegbe kpeɖodzi siwo ɖee fia kɔtɛ be Wɔla aɖe li, kple kpeɖodzi siwo ɖee fia be Mawue na woŋlɔ Biblia la vavã, la boŋ ye woble.a—Romatɔwo 1:18-25; 2 Timoteo 3:16, 17; 2 Petro 1:19-21.

Le esi teƒe be nàɖe mɔ woatsɔ “nu si woyɔna alakpatɔe be ‘sidzedze’” able wò la, zã Mawu ƒe Nya la boŋ, ale be nànya nu si tututu nye nyateƒea. (1 Timoteo 6:20, 21) Wɔ nu abe ame ɖɔʋu siwo apostolo Paulo ɖe gbeƒã na le Beroia ene. “Wotso dzi me lɔ̃ faa xɔ nya la.” Menye ɖeko woxɔ nu si apostolo Paulo fia wo la dzi se ko evɔ o, ke boŋ “wonɔa Ŋɔŋlɔawo me dzrom tsitotsito gbe sia gbe be nya siawo le nenema hã.”—Dɔwɔwɔwo 17:11.

Mele be nàvɔ̃ be yeaku nu si nèxɔ se la me o. Le nyateƒe me la, Biblia de dzi ƒo na wò be “[nàdo] nuwo katã kpɔ” hafi nàlɔ̃ ɖe wo dzi be wonye nyateƒe. (1 Tesalonikatɔwo 5:21) Ƒe alafa gbãtɔ M.Ŋ. ƒe nuwuwu lɔƒo la, apostolo Yohanes xlɔ̃ nu ehati Kristotɔwo be: “Lɔlɔ̃tɔwo, migaxɔ nya sia nya si tso gbɔgbɔ me la dzi se o, ke boŋ mido nya siwo tso gbɔgbɔ me la kpɔ, be Mawu gbɔe wotso hã.” (1 Yohanes 4:1) Ɛ̃, subɔsubɔhawo ƒe nufiafia aɖe ate ŋu adze abe etso “gbɔgbɔ me”—si fia be etso Mawu gbɔ—ene, gake anyo be nàgadzro Ŋɔŋlɔawo me akpɔ nyuie hafi axɔe be nyateƒee.—Yohanes 8:31, 32.

Wɔ Ðe Nu Si Nèsrɔ̃ La Dzi

Nu bubu aɖe hã gale vevie. Nusrɔ̃la Yakobo ŋlɔ be: “Mizu nyadziwɔlawo, ke menye nyaselawo ko o, bene miagatsɔ tamebubu totro anɔ mia ɖokuiwo blem o.” (Yakobo 1:22) Biblia ƒe nufiafia ɖeɖe nyanya mesɔ gbɔ o. Ele be nàtsɔe ade dɔwɔna me. Aleke nàwɔe? Àte ŋu awɔ esia ne èwɔa nu si Mawu di, eye nètsria nu si medi o.

Le kpɔɖeŋu me, kpɔ ale si gbegbe ame siwo dome míele la dometɔ akpa gãtɔ ƒe agbenɔnɔ gblẽe ɖa. Ðe esia meɖee fia be Satana te ŋu flu amewo wosusui be yewoate ŋu agbe Mawu ƒe se siwo ku ɖe agbe nyui nɔnɔ ŋu, evɔ magblẽ naneke le yewo ŋu oa? Esia tae apostolo Paulo xlɔ̃ nu Kristotɔwo vevie be: “Migana woakplɔ mi atrae o: Mawu menye ame si ŋu woaɖu fewu le o. Elabena nu sia nu si ƒãm ame le la, nu sia kee wòaŋe.”—Galatiatɔwo 6:7.

Eya ta mèganɔ abe “ŋutsu tsibome” si ŋu Yesu gblɔ le be ‘esea’ yeƒe nyawo, gake “mewɔa wo dzi o” la ene o. Abe Don Quixote si eya ŋutɔ ƒe susuwo ble, si ŋu Cervantes ƒe agbalẽa ƒo nu tso ene la, woble ŋutsu sia hã wòsusui be yeate ŋu atu xɔ ɖe ke dzi wòali ke ahanɔ dedie. Ke boŋ nɔ abe ŋutsu si “tu eƒe xɔ ɖe agakpe dzi” la ene. Yesu yɔ ŋutsu sia be “ŋutsu dzeaɖaŋu,” elabena esea Yesu ƒe nyawo, “eye wòwɔa wo dzi.”—Mateo 7:24-27.

[Etenuŋɔŋlɔ]

[Aɖaka/Nɔnɔmetata si le axa 12]

Èkpɔa Nuwo Abe Ale Si Tututu Wole Enea?

Le ƒe 1930 me la, Swedentɔ nutala Oscar Reutersvärd ta nu geɖe siwo wova yɔna be nutata fluamewo. Nutata siawo dometɔ ɖekae nye esia le miame. Ne wò ŋku kli nutata siawo zi gbãtɔ la, àsusu be nu ŋutɔŋutɔwoe. Gake ne èle ŋku ɖe eŋu nyuie la, àkpɔe be ɖe wota wo aɖaŋutɔe be woatsɔ able ame si akpɔ wo la ƒe ŋku kple susu.

Menye nutata fluamewo koe dzea nu bubui wu nu si ŋutɔŋutɔ wonye o. Biblia xlɔ̃ nu mí ƒe akpe eve kloe nye esia be: “Mikpɔ nyuie: ɖewohĩ ame aɖe ato xexemenunya kple beble dzodzro dzi le amewo ƒe kɔnyinyiwo nu alé mi adzoe, le xexea ƒe gɔmedzenuwo nu, ke menye le Kristo nu o.”—Kolosetɔwo 2:8.

Nu si tae wòle be míabu nuxlɔ̃ame sia nya vevi lae nye be woble ame si gblɔ nya siawo la ŋutɔ hã kpɔ. Esi wònye mawunyafiala siwo ŋu wodea bubu ŋutɔ le wo ŋɔli la dometɔ ɖekae fia nui, eye woa kple ame ŋkutawo dome le nyuie ta la, ɖewohĩ àsusu be womate ŋu able ame sia tɔgbi bɔbɔe o.—Dɔwɔwɔwo 22:3.

Saul sia si tso Tarso, bua ame sia ame si melɔ̃ ɖe eƒe dzixɔsewo kple kɔnyinyiwo dzi o la be enye fiƒodeme. Esi Yuda subɔsubɔha kplɔlawo na ŋusẽe ta la, ebui be Mawu de dɔ asi na ye be yeati ame siwo katã magbe nu le Kristo gbɔ o la yome. Ekpe asi ɖe eŋu gɔ̃ hã wowu wo de tɔ aɖe si nu wotso madzemadzee be egblɔ busunya.—Dɔwɔwɔwo 22:4, 5, 20.

Emegbe wova kpe ɖe Saul ŋu wòkpɔ vovo si le nu si nyo kple nu si menyo o, kpakple nu si dzea Mawu ŋu kple nu si medzea eŋu o la dome. Esi Saul va nya be nu si wɔm yele la mesɔ o ko la, ŋutsu dovevienu sia trɔ eƒe zɔzɔme, eye wova yɔnɛ be Paulo, eye wòva zu Yesu Kristo ƒe apostolo. Esi womegablea Paulo azɔ o ta la, eva nya mɔ nyuitɔ si dzi wòato asubɔ Mawu.—Dɔwɔwɔwo 22:6-16; Romatɔwo 1:1.

Abe Paulo ene la, wotsɔ nufiafia siwo míate ŋu atsɔ asɔ kple nutata fluamewo la ble ame geɖewo tsã, siwo nye dzixɔse siwo dze abe susu le wo me ene, gake wometu wo ɖe Mawu ƒe Nya la dzi o. (Lododowo 14:12; Romatɔwo 10:2, 3) Gake wova kpe ɖe wo ŋu wokpɔ nu si tututu dzi woxɔ se kple ku siwo woƒe subɔsubɔhawo tsena. (Mateo 7:15-20) Esi wova srɔ̃ nu si tututu Biblia fia la, wotrɔ woƒe dzixɔsewo kple woƒe agbenɔnɔ, ale be woƒe nu nadze Mawu ŋu.

Àdi be yeasrɔ̃ apostolo Paulo ƒe kpɔɖeŋu ahatsɔ Mawu ƒe Nya, Biblia, ado nu siwo dzi nèxɔ se la kpɔa? Adzɔ dzi na Yehowa Ðasefowo be yewoakpe ɖe ŋuwò nàwɔ esia.

[Nɔnɔmetata Tsoƒe si le axa 10]

Engravings by Doré