Ðo Ŋu Ðe Yehowa Ŋu Akpe Ðe Ŋuwò Godoo

Abe ale si Edmund Schmidt gblɔe ene

Esi menɔ gegem ɖe ʋɔnudrɔ̃ƒe le New York le October 1943 me la, aɖaŋuɖoɖo siae va susu me nam. Kaka maxɔ ƒe 25 la, menɔ ga me ƒe ene xoxo le esi menye Kristotɔ, eye nyemedi be mahe dunya o ta. Abe Yesu yome dzela gbãtɔwo ene la, meɖoe be ‘mabu Mawu abe dziɖula ene wu amewo.’ (Dɔwɔwɔwo 5:29) Gake hafi mayi edzi la, na magblɔ ale si mewɔ va xɔ Mawu dzi se vevie la na wò.

WODZIM le Cleveland le Ohio, le Amerika, le April 23, 1922, le míaƒe xɔ si le fofonye ƒe abolomeƒe tame la me. Ɣleti ene megbe la, fofonye, Edmund, de Yehowa Ðasefowo, siwo woyɔna ɣemaɣi be Biblia Nusrɔ̃viwo, ƒe takpekpe aɖe le Cedar Point, si te ɖe Sandusky ŋu, eye wòdidi tso míaƒe me abe kilometa 160 ene.

Wode dzi ƒo na takpekpe ma valawo be: “Miɖe gbeƒã, miɖe gbeƒã, miɖe gbeƒã [Mawu ƒe] Fia la kple eƒe fiaɖuƒe la.” Papa hã dze dɔ sia gɔme le Kwasiɖagbe si kplɔe ɖo. Eyi dɔ sia dzi ƒe 66 sɔŋ va se ɖe esime wòku le July  4, 1988. Danye hã wɔnuteƒe na Mawu va se ɖe esime wòku le ƒe 1981 me.

Meva Wɔ Ðeka Kple Dzinyelawo Le Mawusubɔsubɔ Me

Míaƒe ƒomea dea kpekpewo le Polandgbe hamea me le Cleveland. Le Memleɖagbe ŋdɔwo la, ame tsitsiwo kplɔa mí ɖeviwo ɖe asi ɖaɖea gbeƒã tso aƒe me yi aƒe me. Le Kwasiɖagbewo la, mía dzilawo sea Biblia me nuƒo le afi si míekpena le. Eye Biblia fiala bibi aɖe hã zãa agbalẽ si nye The Harp of Goda tsɔna srɔ̃a Biblia kpli mí ɖevi siwo ade 30 hã. Eteƒe medidi o, nye ŋutɔ hã meva te Biblia sɔsrɔ̃ kple amewo, eye eɖe vi geɖe.

Emegbe wodzi yonyemetɔ Frank, eye le July 1931 me la, míaƒe ƒomea de Biblia Nusrɔ̃viwo ƒe takpekpe bubu le Columbus, si didi abe kilometa 160 ene. Afi mae Biblia Nusrɔ̃viwo lɔ̃ ɖe edzi tso dzi blibo me be yewoatsɔ ŋkɔ si woɖe tso Biblia me, si nye Yehowa Ðasefowo le. (Yesaya 43:10-12) Nye hã menɔ eme míeɖi ɖase na amewo ɣemaɣi, eye míekpe amewo be woava se nuƒo si J. F. Rutherford, si nɔ Yehowa Ðasefowo ƒe dɔa dzi kpɔm ɣemaɣi aƒo la. Yehowa Mawu subɔsubɔ le eƒe amewo dome zu nu vevitɔ nam le agbe me ƒe 79 kple edzivɔe nye esia.

Nye Subɔsubɔdɔa Tse Ku Togbɔ Be Kuxiwo Li Hã

Kaka ƒe 1933 naɖo la, ganyawo va le sesẽm ŋutɔ le xexea me godoo. Le Amerika la, dɔwɔlawo dometɔ 1 le 4 me, si nye ame miliɔn 15 kple edzivɔ sɔŋ, mekpɔ dɔ awɔ o. Du geɖewo ɖu agba, eye dziɖuɖua megakpena ɖe ame tsitsiwo kple ame dahewo ŋu o. Gake mía nɔvi Kristotɔwo kpe ɖe wo nɔewo ŋu. Le Kwasiɖagbewo la, míaƒe ƒomea tsɔa abolo kple akpɔnɔ viviwo yia kpekpeawo ɖamana na nɔviwo. Ne ga aɖe susɔ ɖe Papa si le ɣletia ƒe zazãwo megbe la, eɖoe nɛ ɖe Yehowa Ðasefowo ƒe Dɔwɔƒegã le Brooklyn le New York. Enya be ga sia ate ŋu akpe ɖe wo ŋu woata Biblia srɔ̃gbalẽwo.

Míezãa radio tsɔ ɖe gbeƒã nya nyuia ŋutɔ le ƒe mawo me. Amewo tea ŋu léa radiodɔwɔƒe 400 kple edzivɔ sea takpekpe me nuƒowo. Le ƒe 1930 me la, Ðasefowo lé nuƒowo ɖe agbawo dzi le woƒe mɔɖaŋudɔwɔƒe si le Brooklyn. Míezãa wo le gbeƒãɖeɖedɔa me, eye míebua akɔnta tso zi ale si nu míeƒo Biblia me nuƒoawo na ame siwo menye Ðasefowo o kple ame agbɔsɔsɔ si va ɖo to la ŋu.

Adolf Hitler kple Nazi dunyaheha la va zi dzi le Germany le ƒe 1933 me. Woti Yehowa Ðasefowo yome le afi ma kutɔkutɔe le esi wogbe be yewomahe dunya o ta. (Yohanes 15:19; 17:14) Wode Ðasefo siwo le Germany la dometɔ geɖe gaxɔ me alo ɖo wo ɖe fuwɔamesaɖawo me le esi wogbe be yewomahe dunya alo ado Hitler ɖe dzi o ta. Wowu ame geɖewo, wozi bubuwo hã dzi wowɔ dɔ sesẽ heto eme ku. Ale si wowɔ fu wo vevie la wɔe be wo dometɔ geɖe ku esi woɖe asi le wo ŋu megbe kpuie ko. Gake ame geɖe menya nu boo aɖeke le fu si wowɔ Yehowa Ðasefowo le dukɔ bubuwo, abe Amerika ene me ŋu o.

Le ƒe 1940 me la, míede takpekpe aɖe le Detroit le Michigan. Afi mae wonyrɔm le, le July 28 lia, wònye dzesi be metsɔ ɖokuinye ɖe adzɔgbe na Yehowa Mawu. Le ɣleti si do ŋgɔ na takpekpea wɔɣi la, Amerika Ʋɔnudrɔ̃ƒe Gãtɔ de se be, ne ame aɖe gbe be yemado gbe na aflaga o la, ekema edze agɔ le dziɖuɖua dzi, eye esia ana woanya ame le suku. Aleke Ðasefowo wɔ nu ɖe nyametsotso sia ŋui? Wo dometɔ geɖe ɖo woawo ŋutɔwo ƒe suku be woafia nu wo viwo. Woyɔ suku siawo be Fiaɖuƒe Suku.

Xexemeʋa 2 lia dzɔ le September 1939 me le Europa, eye Amerikatɔ geɖe ƒe ŋku biã ɖe aʋaa ŋu. Sɔhɛwo kple tsitsiawo siaa, siwo mese nu si tae Yehowa Ðasefowo sɔhɛwo gbe aʋawɔwɔ o la, ɖe fu na wo heƒo wo vevie. Woka nya ta be, tso ƒe 1940 va se ɖe ƒe 1944 me la, wosẽ ŋuta le Yehowa Ðasefo 2,500 kple edzivɔ ŋu le Amerika. Wogati wo yome ɖe edzi esi Japantɔwo dze melidzeƒe si nye Pearl Harbor dzi le December 7, 1941. Mezu mɔɖela kwasiɖa ʋɛ aɖewoe nye ema (nenemae woyɔa Yehowa Ðasefo siwo zãa woƒe ɣeyiɣi akpa gãtɔ tsɔna ɖea gbeƒã Mawu ƒe Nya). Medzra ga ɖo tsɔ ƒle kekexɔ si keke meta 7, eye mía dometɔ geɖe míeʋu yi Louisiana be míasubɔ le afi ma.

Woti Yonyeme Le Anyiehe

Nutoa me nɔlawo ɖe mɔ na mí be míada míaƒe kekexɔa ɖe yevuzibɔ aɖe me le Jeanerette dua xa. Memleɖa aɖe gbe la, míeɖoe be míaɖi ɖase le ablɔ dzi, gake kpovitɔwo ƒe amegã na eƒe amewo lé mí hekplɔ mí yi ɖade ga le dua ƒe takpexɔ me. Ame 200 kloe ƒo ƒu ɖe xexe, eye kpovitɔwo ɖe asi le mía ŋu ɖo ɖe wo dome; eye womewɔ naneke be yewoatsɔ akpɔ mía ta o. Esi ameha la na mɔ mí míeva yi la, míaƒe dzi dze eme. Esi ŋu ke la, míeyi Baton Rouge, si nye du gã aɖe si te ɖe afi ma la me, be míagblɔ nu si dzɔ la na mía nɔvi Ðasefo siwo le afi ma.

Esi míetrɔ gbɔ va Jeanerette la, woŋlɔ nane klã ɖe míaƒe ʋɔtru ŋu be: “Meɖe kuku, mieva kpɔm le amikulawo nɔƒea.” Woŋlɔ “E. M. Vaughn” ɖe ete. Míeke ɖe Aƒetɔ Vaughn ŋu, eye wòkpe mí be míava ɖu nu kple ye kpakple ye srɔ̃. Egblɔ be ye kple yeƒe amewo yewonɔ amehaa dome le Memleɖagbe, eye be ne ɖe amehaa ka asi mía ŋu la, yewoakpɔ mía ta. Eƒe dzideƒoname kple kpekpeɖeŋua dze mía ŋu.

Le ŋufɔke la, nutoa me ʋɔnudrɔ̃la ƒe kpeɖeŋutɔwo tsɔ tu ɖe asi va do, eye wolé mí hexɔ míaƒe agbalẽwo. Woxɔ nye kekexɔ ƒe safuiwo, eye wodem ameɖekɛgaxɔ me ŋkeke 17 sɔŋ, eye womena nu gbagbe aɖekem meɖu o. Aƒetɔ Vaughn wɔ ɖe sia ɖe be yeakpe ɖe mía ŋu, gake medze edzi o. Esi míenɔ ga me la, amehawo fi míaƒe nuwo hetɔ dzo míaƒe nuwo katã kple kekexɔa hã. Nyemenya ɣemaɣi be ɖe Yehowa nɔ dzrayem ɖo ɖe nu siwo me to ge megbɔna kpuie la ŋu o.

Wodem Mɔ Le Dziehe

Esi metrɔ va dziehe ɣleti ɖeka megbe la, woɖo mía kple Ðasefo bubuwo be míanye mɔɖela veviwo le Olean le New York. Dziɖuɖua bia tso asinye le afi ma be maŋlɔ ŋkɔ azu asrafo, gake esi meɖe eme be nye dzitsinya meɖe mɔ nam be mawɔe o la, wolɔ̃ ɖe edzi nam. Esi wodo nye ŋutilã kple susu kpɔ vɔ la, woŋlɔ ɖe nye agbalẽa dzi be: “Esu Te Ade Asrafosuku.”

Megate ŋu yi mɔɖeɖedɔa dzi ƒe ɖeka aɖe. Gake le ƒe 1943 me la, esi megbe be nyemadzudzɔ nye subɔsubɔdɔa ahade asrafosuku o ta la, Amerika Numekuƒegã (si woyɔna be FBI) samam, eye wobia tso asinye be mava dukɔa ƒe ʋɔnudrɔ̃ƒe le Syracuse, le New York, le kwasiɖa si kplɔe ɖo me ne woadrɔ̃ nya nam. Ʋɔnudrɔ̃ƒea lɔ̃ ɖe nutsotsoa dzi, eye woɖoe be woadrɔ̃ ʋɔnum le ŋkeke eve megbe.

Nyemetsɔ lɔya aɖeke o. Wofiaa ale si mí sɔhɛ Ðasefowo míaʋli gome si le mía si le se nu ta le ʋɔnu la mí, kple ale si míawɔ nui le afi ma hã. Afi mae meɖo ŋku nya si megblɔ le nyati sia ƒe gɔmedzedzea me la dzi le. Ete ɖe setɔ aɖewo gɔ̃ hã dzi be Ðasefowo nya se wu yewo! Gake wodrɔ̃ ʋɔnum be meɖi fɔ. Esi ʋɔnudrɔ̃la la bia be nya aɖe gale asinye hã la, ɖeko megblɔ be: “Dukɔa le ʋɔnu le Mawu gbɔ egbea le ale si wole nu wɔm ɖe esubɔlawo ŋu ta.”

Wotso afia nam be mayi mɔ ƒe ene sɔŋ le dukɔa ƒe gakpɔ si le Chillicothe le Ohio me. Wode dɔ asi nam le afi ma be manye dɔwɔƒe si yɔa amewo na asrafodɔ la ƒe amegãwo dometɔ ɖeka ƒe agbalẽŋlɔla. Le kwasiɖa ʋɛ aɖewo megbe la, numekula tɔxɛ aɖe tso Washington D.C. va míaƒe dɔwɔƒea hegblɔ be yewole nu me kum tso Hayden Covington ŋu. Enye Yehowa Ðasefowo ƒe lɔya, eye ame geɖe dze sii be enye Amerika senyala gãtɔwo dometɔ ɖeka.

Numekulaa gblɔ be yele nuŋlɔɖi siwo ku ɖe gamenɔla eve siwo nye Danny Hurtado kple Edmund Schmidt ŋu la dim. Nye aƒetɔ ɖo eŋu nɛ be: “Ewɔ nuku ŋutɔ lo; Aƒetɔ Schmidt ye nye esi le afii!” Ðe wòva nyaa me ku ge le adzame hafi, gake nya la va ɖo nyatɔwo ŋutɔ ƒe to me xoxo! Eya ta eteƒe medidi o, woɖɔ li dɔ nam heɖom ɖe nuɖaƒe.

Mɔɖeɖedɔa Wɔwɔ, Subɔsubɔ Le Betel Kple Srɔ̃ɖeɖe

Le September 26, 1946 la, woɖe asi le ŋunye vie, eye megate mɔɖeɖedɔa wɔwɔ le Highland Park Hamea me le California. Mlɔeba le September 1948 me la, meɖo taɖodzinu si mele mɔ kpɔm na xoxoxo la gbɔ. Wokpem be mava nɔ abolo mem na Betel ƒomea le dɔwɔƒegãa le Brooklyn, afi si wotaa Biblia srɔ̃gbalẽ siwo míetsɔna ɖea gbeƒã la le. Enumake meɖe asi le abolomedɔ si mewɔna le nuɖuɖudzraƒe aɖe le Glendale la ŋu, eye meyi ɖatsi Betel.

Le ƒe 1955 me, si nye ƒe adre megbe la, wowɔ ɖoɖo be woawɔ dukɔwo dome takpekpewo le Europa. Nye ƒomea di ga nam mede takpekpe siawo. Mede takpekpe siwo wowɔ le London, Paris, Rome, kple vevietɔ esi wowɔ le Nuremberg le Germany, afi si ame 107,000 kple edzivɔ ƒo ƒu ɖe bɔlƒoƒe si dadala Hitler hã ƒo eƒe asrafowo nu ƒu ɖo kpɔ le. Ðasefo siwo Hitler ka atam be yeatsrɔ̃ ɖa keŋkeŋ hã nɔ takpekpe ma me. Dzidzɔ gã aɖe ŋutɔe wònye nam be menɔ ame siawo dome!

Medo go Ðasefo Germanytɔ ɖetugbui aɖe le Nuremberg takpekpea me, si ŋkɔe nye Brigitte Gerwien, eye eƒe nu lé dzi nam. Mede ƒe ɖeka le ema megbe hafi míeɖe mía nɔewo o, eye míegbugbɔ yi Glendale be míate ɖe dzinyelawo ŋu. Míedzi mía vi gbãtɔ, Tom, le ƒe 1957 me, míedzi evelia, si nye Don, le ƒe 1958 me, eye míedzi mía vinyɔnu Sabena le ƒe 1960 me.

Nye Dzi Dze Eme Bliboe Le Agbe Me

Ame aɖewo bianam be ɖe wòvem be wosẽ ŋuta le ŋunye hedem gaxɔ me le Mawu subɔsubɔ ta hã. Kpao, ke boŋ ɖe medaa akpe na Yehowa boŋ be ena mɔnukpɔkpɔm be mía kple ame geɖe siwo wɔa nuteƒe nɛ la míele esubɔm. Eye mele mɔ kpɔm be nu siwo me meto la ade dzi ƒo na ame bubuwo be woawo hã woate ɖe Mawu ŋu geɖe wu, eye woagate ɖa le eŋu gbeɖe o.

Mawu subɔla geɖewo kpe fu ŋutɔ le Mawu subɔsubɔ ta. Gake ɖe menye nu mae wogblɔ be míanɔ mɔ kpɔm na oa? Biblia gblɔ be: “Ame siwo katã dina be yewoanɔ agbe le ɖokuitsɔtsɔ na Mawu nu le Kristo Yesu me la, woati woawo hã yome.” (2 Timoteo 3:12) Gake nya siwo le Psalmo 34:20 la va eme nam be: “Ame dzɔdzɔe ƒe fukpekpewo sɔ gbɔ, ke Yehowa ɖenɛ tsoa wo katã me”!

[Etenuŋɔŋlɔ]

[Nɔnɔmetata si le axa 27]

Míele gbeƒã ɖem le Louisiana le ƒe 1940-awo ƒe gɔmedzedze

[Nɔnɔmetata si le axa 29]

Memèa abolo na dɔwɔla siwo le dɔdzikpɔƒegã

[Nɔnɔmetata si le axa 29]

Mía kple srɔ̃nye Brigitte