Exlẽlawo Bia Be . . .

Nu Ka Tae Satana To Da Dzi Ƒo Nu Na Xawa?

▪ Anɔ eme be wò hã èlɔ̃ ɖe edzi be Satanae na da la ƒo nu na Xawa, abe ale si míedzro eme le axa 8 lia ene. Biblia ƒe nufiafiae esia nye vavã. Gake ɖewohĩ èbia ɖokuiwò kpɔ be, ‘Nu ka tae gbɔgbɔmenuwɔwɔ sẽŋu ma ato da dzi hafi aƒo nu na Xawa?’

Biblia ɖɔ Satana ƒe mɔwo be wonye “aɖaŋu vɔ̃wo,” eye nudzɔdzɔ sia ɖo kpe nya sia ƒe nyateƒenyenye dzi. (Efesotɔwo 6:11) Menye gli, si ku ɖe lã aɖe si le nu ƒom, ŋue nu si dzɔ le Eden bɔa me la nye o; ale si Satana zãa ayedzedze be yeatsɔ able amewo woate ɖa le Mawu gbɔ la ŋuti nudzɔdzɔ vevi aɖe, si nye ŋkubiãnya, lae wònye. Le mɔ ka nu?

Susu vevi aɖe tae wònye Xawae Satana tia be yeable. Le nuwɔwɔ siwo si nunya le le xexea me katã dome la, Xawae nye ɖevitɔ. Esi wònye be mekpɔ nuteƒe boo o ta la, Satana ɖoe be yeablee ahaƒã dzodzro vɔ̃ ɖe eme. Da nye lã aɖe si dze aye ŋutɔ, eya ta Satana be ɖe da la megbe ayetɔe bene yeƒe tameɖoɖo vɔ̃wo nagadze o. (1 Mose 3:1) Abe ale si nàkpɔe le numeɖeɖe si gbɔna me ene la, ale si wòna wòdze abe da lae le nua ƒom la hã kpe ɖe eŋu.

Gbã la, esia na Satana te ŋu he Xawa ƒe susu bɔbɔe. Enya be da meƒoa nu o; srɔ̃ae tsɔ ŋkɔ na lãwo katã, ɖewohĩ elé ŋku ɖe wo ŋu nyuie hafi tsɔ ŋkɔawo na wo, daa hã le eme. (1 Mose 2:19) Anɔ eme be Xawa hã de dzesii be lã sia dze aye. Eya ta Satana ƒe ayemɔ sia nyɔ Xawa ƒe ɖetsɔleme; ena Xawa ƒe susu trɔ ɖe nu ɖeka kolia si ŋu Mawu de se ɖo le abɔa me la ŋu. Evelia, ne ati si ŋu Mawu de se ɖo la mee Xawa kpɔ daa le la, susu kae ate ŋu ava ta me nɛ? Ðe mana wòaƒo nya ta be lã tsɛ sia, si meƒoa nu o la, ɖu atikutsetsea ƒe ɖe, si na wòte ŋu le nu ƒom oa? Ne atikutsetsea te ŋu wɔ nu sia gbegbe na daa ɖe, ke mawɔ nu si yi ŋɔ wu ema na ye oa? Míate ŋu anya ale si tututu Xawa bu nuwo ŋui, alo nenye be daa ka atikutsetsea ɖe ɖu ya o, gake nu si míenyae nye be esi da la gblɔ na Xawa be atikutsetsea ana wòanɔ “abe Mawu ene” la, eƒe dzi trɔ ɖe alakpanya ma dzi xɔxɔ se ŋu xoxo.

Nya siwo Satana tia gblɔ la hã wɔ akpa vevi aɖe. Eƒã ɖikeke ɖe Xawa ƒe susu me, le esi wòna wòdze abe Mawu le nu nyui aɖe temee, eye wòle ablɔɖe xɔm le esi madzemadzee. Ne Xawa ɖe mɔ ɖokuitɔdidi xɔ ɖe lɔlɔ̃ si wòle be wòanɔ esi na Mawu, ame si gbɔ nu siwo katã le esi tso, teƒe la, ke Satana ƒe aɖaŋu vɔ̃a adze edzi nɛ. (1 Mose 3:4, 5) Nublanuitɔe la, Satana ƒe ayemɔa dze edzi nɛ; lɔlɔ̃ kple ŋudzedzekpɔkpɔ, si tso dzi me, si wòle be wòanɔ Xawa kple Adam siaa si na Yehowa la, menɔ wo si o. Ðe Satana meƒãa ɖokuitɔdidi kple tomaɖomaɖo ƒe nɔnɔme sia ke ɖe amewo me egbea hã oa?

Ke susu kae nɔ Satana si wòtsɔ wɔ nu ma? Nu ka dimee wònɔ? Le Eden bɔa me la, edze agbagba be yeaɣla ye ɖokui kple susu si le ye si la siaa. Gake le ɣeyiɣi aɖe megbe la, eɖe ha eɖokui. Esi wònɔ Yesu tem kpɔ la, enya nyuie be yemate ŋu aɣla ame si yenye o. Eya ta egblɔ na Yesu tẽe be: “[Dze] klo de ta agu nam.” (Mateo 4:9) Esia na wòdze kɔtɛ be tso gbe aɖe gbe ke la, Satana biã ŋu tadedeagu si wotsɔna naa Yehowa Mawu la. Awɔ nu sia nu si wòate ŋui be amewo nagasubɔ Mawu o, alo ana be woƒe tadedeagu nagadze eŋu o. Edina vevie be yeana míadzudzɔ nuteƒewɔwɔ na Mawu.

Eya ta Biblia na eme kɔ be Satana nye ayemenuwɔla si di be yeakplɔ ame siwo yetɔ ŋkui la ayi tsɔtsrɔ̃ me. Dzidzɔtɔe la, míawo ya míate ŋu akpɔ mía ɖokui dzi be wòagable mí abe ale si wòble Xawa ene o, “elabena eƒe nugbeɖoɖowo mele manyamanya na mí o.”—2 Korintotɔwo 2:11.