Ðe Mɔ Mawu Ƒe Gbɔgbɔ La Nafia Mɔ Wò, Ke Menye Xexea Ƒe Gbɔgbɔ O
“Menye xexea ƒe gbɔgbɔ ye míexɔ o, ke boŋ gbɔgbɔ si tso Mawu gbɔ lae míexɔ, bene míanya nu siwo Mawu na mí dɔmenyotɔe la.”—1 KOR. 2:12.
1, 2. (a) Gɔmesese ka nue míate ŋu agblɔ be Kristotɔ vavãwo le aʋagbedzi le? (b) Nyabiase kawo mee míadzro?
KRISTOTƆ vavãwo le aʋagbedzi! Ŋusẽ le míaƒe futɔa ŋu ale gbegbe, edze aye, eye wòbi ɖe aʋawɔwɔ me ŋutɔ. Aʋawɔnu sẽŋu aɖe si wɔa dɔ ŋutɔ la le esi, si na wòkpɔ ŋusẽ ɖe ameƒomea ƒe akpa gãtɔ dzi. Gake mele be míasusui be ŋusẽ aɖeke mele mía ŋu o, alo be mɔkpɔkpɔ aɖeke meli be míaɖu aʋa dzi o. (Yes. 41:10) Takpɔnu si le abe mɔ sesẽ aɖe ene, si womate amu aƒu anyi gbeɖe o la le mía si.
2 Menye ŋutilãmeʋa wɔm míele o, ke boŋ gbɔgbɔmeʋa wɔm míele. Satana Abosam ye nye míaƒe futɔ la, eye aʋawɔnu vevitɔ si wòzãna ye nye “xexea ƒe gbɔgbɔ.” (1 Kor. 2:12) Takpɔnu vevitɔ si le mía si, si míatsɔ awɔ aʋa kplii ye nye Mawu ƒe gbɔgbɔ kɔkɔe la. Hafi míate ŋu aɖu aʋa sia dzi eye ŋusẽ nakpɔtɔ anɔ mía ŋu le gbɔgbɔ me la, ehiã be míabia Mawu wòana eƒe gbɔgbɔ la mí, eye míaɖe eƒe kutsetsea afia le míaƒe agbenɔnɔ me. (Gal. 5:22, 23) Gake nu kae nye xexea ƒe gbɔgbɔ la, eye nu kae na wòva le ŋusẽ kpɔm ɖe ame geɖe dzi alea gbegbe ɖo? Aleke míawɔ anya ne xexea ƒe gbɔgbɔ le ŋusẽ kpɔm ɖe mía dzi? Eye nu kae míate ŋu asrɔ̃ tso Yesu gbɔ le nu si míawɔ be Mawu ƒe gbɔgbɔa nafia mɔ mí eye míatsi tsitre ɖe xexea ƒe gbɔgbɔ ŋu la ŋu?
Nu Ka Tae Xexea Ƒe Gbɔgbɔ Le Ŋusẽ Kpɔm Ðe Ame Geɖe Dzi Egbea?
3. Nu kae nye xexea ƒe gbɔgbɔ la?
3 Satana, ame si nye “xexea dzi ɖula” la, gbɔe xexea ƒe gbɔgbɔ dzɔ tso, eye gbɔgbɔ sia tsi tsitre ɖe Mawu ƒe gbɔgbɔ kɔkɔea ŋu. (Yoh. 12:31; 14:30; 1 Yoh. 5:19) Enye ale si koŋ xexea bua nuwo ŋui eye eyae ʋãa amewo wowɔa nu. Ŋusẽ siae ʋãa amegbetɔwo wowɔa nu tsia tsitre ɖe Mawu ƒe lɔlɔ̃nu kple eƒe tameɖoɖo ŋu.
4, 5. Aleke gbɔgbɔ si Satana dona ɖe ŋgɔ la wɔ va xɔ aƒe ɖe xexea me?
4 Aleke wòdzɔe be gbɔgbɔ sia si Satana dona ɖe ŋgɔ la va xɔ aƒe ɖe xexea me katã? Gbã la, Satana ble Xawa le Eden bɔa me. Ena wòva xɔe se be eme anyo nɛ wu ne egbe toɖoɖo Mawu hewɔ nu le eɖokui si. (1 Mose 3:13) Alakpatɔ ka gbegbee nye esi Satana nye! (Yoh. 8:44) Emegbe eto nyɔnua dzi kpɔ ŋusẽ ɖe Adam dzi wògbe nuteƒewɔwɔ na Yehowa. Tiatia si Adam wɔ la wɔe be ameƒomea va zu nu vɔ̃ ƒe kluvi, eye esia wɔe be Satana ƒe tomaɖomaɖo ƒe gbɔgbɔa tea ŋu kpɔa ŋusẽ ɖe wo dzi bɔbɔe.—Mixlẽ Efesotɔwo 2:1-3.
5 Satana kpɔ ŋusẽ ɖe mawudɔla gbogbo aɖewo hã dzi, eye wova zu gbɔgbɔ vɔ̃wo. (Nyaɖ. 12:3, 4) Nuteƒemawɔmawɔ na Mawu ƒe nuwɔna sia dzɔ ɣeaɖeɣi do ŋgɔ na Noa ƒe ŋkekea me Tsiɖɔɖɔa. Mawudɔla mawo xɔe se be eme anyo na yewo wu ne yewogblẽ yewoƒe nɔƒewo ɖi le dziƒo va ɖi kɔ na yewoƒe dzodzro si mele dzɔdzɔme nu o la le anyigba dzi. (Yuda 6) Gbɔgbɔ vɔ̃ mawo, siwo le gbɔgbɔmenutowo me fifia la, le asi kpem ɖe Satana ŋu wòle “anyigba dzi nɔlawo katã blem.” (Nyaɖ. 12:9) Nublanuitɔe la, amegbetɔ akpa gãtɔ menya kura be gbɔgbɔ vɔ̃wo kpɔa ŋusẽ ɖe yewo dzi o.—2 Kor. 4:4.
Ðe Xexea Ƒe Gbɔgbɔ Le Ŋusẽ Kpɔm Ðe Dziwòa?
6. Mɔ ɖeka kolia ka dzie xexea ƒe gbɔgbɔ ato akpɔ ŋusẽ ɖe mía dzi?
6 Ame geɖe menya mɔ siwo dzi Satana tona kpɔa ŋusẽ ɖe amegbetɔwo dzi o, gake Biblia la na Kristotɔ vavãwo ya nya eƒe ayemɔwo. (2 Kor. 2:11) Le nyateƒe me la, xexea ƒe gbɔgbɔ mate ŋu akpɔ ŋusẽ ɖe mía dzi o, negbe ɖe míawo ŋutɔwo míeɖe mɔ nɛ hafi. Mina míadzro nyabiase ene siwo akpe ɖe mía ŋu míanya nenye be Mawu ƒe gbɔgbɔa ye le mɔ fiam mí loo alo xexea ƒe gbɔgbɔ ye le ŋusẽ kpɔm ɖe mía dzi la me.
7. Mɔ ɖeka ka dzie Satana tona dzea agbagba be yeate mí ɖa tso Yehowa gbɔ?
7 Nu kae modzakaɖeɖe si metiana ɖena fiana le ŋunye? (Mixlẽ Yakobo 3:14-18.) Satana dzea agbagba be yeaƒã ŋutasẽnuwɔwɔlɔlɔ̃ ɖe mía me atsɔ ate mí ɖa tso Mawu gbɔ. Abosam nyae be Yehowa léa fu ame sia ame si lɔ̃a ŋutasẽnuwɔwɔ. (Ps. 11:5) Eya ta Satana dzea agbagba be yeato agbalẽwo, sinimawo, haƒoƒowo, kple kɔmpiutadzifefewo dzi ana míaɖi kɔ na míaƒe ŋutilã ƒe nudzodzrowo—kɔmpiutadzifefe siawo dometɔ aɖewo biana be fefea ƒolawo natiae be yewonye ŋutasẽnuwɔla gãtɔ alo agbe ƒaƒã si mele gbɔgblɔ me o la nɔla le fefea me. Enyea dzidzɔ na Satana ne míetsɔ dzi afã lɔ̃ nu dzɔdzɔe wɔwɔ eye míetsɔ dzi afã lɔ̃ nu vɔ̃ɖi siwo wòdona ɖe ŋgɔ la hã.—Ps. 97:10.
8, 9. Nya kawoe wòle be míabia mía ɖokui ku ɖe modzakaɖeɖe ŋu?
8 Gake Mawu ƒe gbɔgbɔ kɔkɔea ya ʋãa ame siwo ɖea mɔ wòfiaa mɔ wo la be woanye agbe dzadzɛ nɔlawo kple ŋutifafawɔlawo, eye nublanuikpɔkpɔ nayɔ wo fũu. Ele be míabia mía ɖokui be, ‘Ðe modzakaɖeɖe si metiana la ƒãa nɔnɔme nyuiwo ɖe menyea?’ Nunya si tso dziƒo la, “alakpanuwɔwɔ mele eme o.” Ame siwo Mawu ƒe gbɔgbɔa fiaa mɔe la mayi aɖaɖe gbeƒã tso agbe dzadzɛ nɔnɔ kple ŋutifafa ŋu na woƒe aƒelikawo, evɔ woawo ŋutɔwo woava nɔ ŋutasẽnuwɔna vɔ̃ɖiwo kple gbɔdɔnuwɔna nyɔŋuwo kpɔm le woƒe xɔwo me o.
9 Yehowa kpɔa mɔ be míatsɔ mía ɖokui ana ye bliboe. Gake tadedeagunuwɔna ɖeka pɛ koe Satana ya dina, abe ale si wòdii tso Yesu si ene. (Luka 4:7, 8) Ele be míabia mía ɖokui be: ‘Ðe modzakaɖeɖe si metiana la nana ɖokuitsɔtsɔ na Mawu bliboe nɔa bɔbɔe nama? Ðe tiatia siwo mewɔna la nana tsitretsitsi ɖe xexea ƒe gbɔgbɔ ŋu nɔa bɔbɔe nam loo, alo ɖe wòwɔnɛ be esia wɔwɔ sesẽna nama? Ðe wòle be mawɔ tɔtrɔ le tiatia siwo magava wɔ mea?’
10, 11. (a) Nɔnɔme kawoe xexea ƒe gbɔgbɔ dona ɖe ŋgɔ ku ɖe ŋutilãmenunɔamesiwo ŋu? (b) Nɔnɔme kawo ƒe dzie Mawu ƒe Nya si tso gbɔgbɔ me la dea ƒo na mí?
10 Aleke mewɔa nu ɖe ŋutilãmenunɔamesiwo ŋu? (Mixlẽ Luka 18:24-30.) Xexea ƒe gbɔgbɔ doa “ŋkuwo ƒe nudzodzro” ɖe ŋgɔ to ŋukeklẽ kple ŋutilãmenuwo didi vivivo kafukafu me. (1 Yoh. 2:16) Eƒã kesinɔtɔzuzu ƒe didi vevie ɖe amewo me. (1 Tim. 6:9, 10) Gbɔgbɔ ma ana míaxɔe se be kɔlili ŋutilãmenuwo ɖi ana míanɔ dedie ɖaa. (Lod. 18:11) Gake ne míeɖe mɔ galɔlɔ̃ va xɔ ɖe lɔlɔ̃ si le mía si na Mawu teƒe la, Satana ƒe asi asu mía dzi. Ele be míabia mía ɖokui be, ‘Ðe nye agbenɔnɔ katã va ku ɖe ŋutilã me dzidzemekpɔkpɔ kple vivisese ŋua?’
11 To vovo na esia la, Mawu ƒe Nya si tso gbɔgbɔ me la dea dzi ƒo na mí be nukpɔsusu si da sɔ ku ɖe ga ŋu nanɔ mía si, eye míawɔ dɔ sesĩe akpɔ míawo ŋutɔwo kple míaƒe ƒomea ƒe ŋutilãmenuhiahiã veviwo gbɔ. (1 Tim. 5:8) Mawu ƒe gbɔgbɔa kpena ɖe ame siwo nana wòfiaa mɔ wo la ŋu be woasrɔ̃ dɔmenyonyo ƒe nɔnɔme si le Yehowa si. Wonya ame siawo be wonye nunalawo, ke menye ame siwo xɔa nu ɣesiaɣi o. Ame siawo bua amewo be woxɔ asi sãsãsã wu nunɔamesiwo eye wonaa nu amewo kple dzidzɔ ne ŋutetea le wo si na ewɔwɔ. (Lod. 3:27, 28) Eye womebua ga yome titi nu vevii wu Mawu subɔsubɔ gbeɖe o.
12, 13. To vovo na xexea ƒe gbɔgbɔ la, aleke Mawu ƒe gbɔgbɔa kpɔa ŋusẽ nyui ɖe mía dzi?
12 Gbɔgbɔ kae nye amenyenye ɖena fiana? (Mixlẽ Kolosetɔwo 3:8-10, 13.) Xexea ƒe gbɔgbɔ doa ŋutilã ƒe dɔwɔwɔwo ɖe ŋgɔ. (Gal. 5:19-21) Menye ne nu sia nu le zɔ ɖem na mí nyuie ye gbɔgbɔ si ƒomevi kpɔa ŋusẽ ɖe mía dzi la dzena o, ke boŋ nu si koŋ me wòdzena le ye nye ne nɔviŋutsu alo nɔvinyɔnu Kristotɔ aɖe megakea nu dea eme na mí o, do dziku na mí, alo wɔ nu vɔ̃ ɖe mía ŋu gɔ̃ hã. Gakpe ɖe eŋu la, gbɔgbɔ si kpɔa ŋusẽ ɖe mía dzi la dzena ƒãa le nu siwo míewɔna le míaƒe aƒewo me la me. Ðewohĩ ahiã be míadzro mía ɖokuiwo me kpɔ. Bia ɖokuiwò be, ‘Le ɣleti ade siwo va yi me la, ɖe nye amenyenye va ɖi Kristo la tɔ geɖe wua, alo ɖe nye nuƒoƒo kple nuwɔna ɖee fia be megatrɔ yi nye numame gbegblẽ aɖewo gbɔ vivivia?’
13 Mawu ƒe gbɔgbɔa ate ŋu akpe ɖe mía ŋu ‘míaɖe amenyenye xoxo la kple eƒe nuwɔnawo ɖa’ eye míado “amenyenye yeye” la. Esia akpe ɖe mía ŋu míazu amelɔ̃lawo kple dɔmenyolawo geɖe wu. Anɔ bɔbɔe na mí geɖe wu be míatsɔ anɔ mía nɔewo kem faa, ne edze abe nya aɖe le mía si ɖe ame aɖe ŋu vavã gɔ̃ hã. Míaganɔ dziku dom ɖe nu si míesusu be enye nu madzɔmadzɔ wɔwɔ ɖe mía ŋu la ta, to “ameléleɖedɔme kaɖikaɖi kple dɔmedzoe kple dziku kple ɣlidodo kpakple dzugbewo” dzi o. Ke boŋ míadze agbagba vevie be ‘míaƒe dɔme natrɔ ɖe amewo ŋu vevie.’—Ef. 4:31, 32.
14. Aleke ame geɖewo bua Mawu ƒe Nya lae?
14 Ðe melɔ̃ Biblia ƒe agbe nyui nɔnɔ ƒe dzidzenuwo hedea bubu wo ŋua? (Mixlẽ Lododowo 3:5, 6.) Xexea ƒe gbɔgbɔ dea dzi ƒo na amewo be woatsi tsitre ɖe Mawu ƒe Nyaa ŋu. Ame siwo dzi gbɔgbɔ sia kpɔa ŋusẽ ɖo la ŋea aɖaba ƒua Biblia ƒe akpa siwo wosusu be womesɔ na yewo o la dzi, eye wodina boŋ be yewoanɔ agbe ɖe amegbetɔwo ƒe kɔnyinyiwo kple xexemenunya nu. (2 Tim. 4:3, 4) Ame aɖewo medea bubu Mawu ƒe Nyaa ŋu kura o. Ame siawo gblɔna be Biblia mesɔ na míaƒe ɣeyiɣia o eye emenyawo menye nyateƒe o; wonyea nunyalawo le woawo ŋutɔwo ŋkume. Wotɔa tsi Biblia ƒe dzidzenu dzadzɛ siwo ku ɖe ahasiwɔwɔ, vidzinu ɖeka tɔgbi tɔwo ƒe gbɔdɔdɔ, kple srɔ̃gbegbe ŋu. ‘Woyɔa vɔ̃ be nyui kple nyui be vɔ̃.’ (Yes. 5:20) Ðe gbɔgbɔ sia kpɔa ŋusẽ ɖe mía dzia? Ne míedo go kuxiwo la, ɖe míeɖoa ŋu ɖe amegbetɔwo ƒe nunya kple míawo ŋutɔwo ƒe susuwo ŋua? Alo ɖe míedzea agbagba be míawɔ ɖe Biblia ƒe aɖaŋuɖoɖowo dzia?
15. Le esi míaɖo ŋu ɖe míawo ŋutɔwo ƒe nunya ŋu teƒe la, nu kae wòle be míawɔ?
15 Mawu ƒe gbɔgbɔa kpena ɖe mía ŋu míedea bubu Biblia ŋu. Abe hakpala la ene la, míebua Mawu ƒe nya be enye akaɖi na míaƒe afɔ kple kekeli na míaƒe toƒe. (Ps. 119:105) Le esi míaɖo ŋu ɖe míawo ŋutɔwo ƒe nunya ŋu teƒe la, míeɖoa ŋu ɖe Mawu ƒe Nya si woŋlɔ ɖi la ŋu kakaɖedzitɔe boŋ be akpe ɖe mía ŋu míade vovototo nyui kple vɔ̃ dome. Menye ɖeko Mawu ƒe gbɔgbɔa fia mí be míade bubu Biblia ŋu ko o, ke efia mí hã be míalɔ̃ Mawu ƒe sea.—Ps. 119:97.
Srɔ̃ Yesu Ƒe Kpɔɖeŋu
16. Nu kawoe wòhiã be míawɔ be “Kristo ƒe tamesusu” nasu mía si?
16 Hafi míaxɔ Mawu ƒe gbɔgbɔa la, ele be míana “Kristo ƒe tamesusu” nasu mía si. (1 Kor. 2:16) Be “tamesusu ƒe nɔnɔme si tututu nɔ Kristo Yesu si” nanɔ mía si la, ebia be míanya ale si wòbua nuwo ŋui kple ale si wòwɔa nui, eye míasrɔ̃ eƒe kpɔɖeŋua. (Rom. 15:5; 1 Pet. 2:21) Bu mɔ aɖewo siwo dzi míate ŋu ato awɔ esia la ŋu kpɔ.
17, 18. (a) Nu kae míesrɔ̃ tso Yesu gbɔ le gbedodoɖa ŋu? (b) Nu ka tae wòle be ‘míanɔ ebiabia dzi’?
17 Do gbe ɖa nàbia Mawu ƒe gbɔgbɔ la. Hafi Yesu nato dodokpɔwo me la, edo gbe ɖa bia Mawu ƒe gbɔgbɔa be wòakpe ɖe ye ŋu. (Luka 22:40, 41) Ehiã be míawo hã míabia Mawu be wòana gbɔgbɔ kɔkɔe la mí. Yehowa naa eƒe gbɔgbɔ la ame siwo katã bianɛ le xɔse me la faa dɔmenyotɔe. (Luka 11:13) Yesu gblɔ be: “Minɔ ebiabia dzi, eye woana mi; minɔ edidi dzi, eye miakpɔe; minɔ ʋɔƒoƒo dzi, eye woaʋui na mi. Elabena ame sia ame, si le nu biam la, exɔnɛ; eye ame sia ame si le nu dim la, ekpɔnɛ; eye ame sia ame si le ʋɔ ƒom la, woaʋui nɛ.”—Mat. 7:7, 8.
18 Ne èle Yehowa ƒe kpekpeɖeŋu kple eƒe gbɔgbɔa dim la, mègana ebiabia nati wò o. Ahiã be míanɔ gbe dom ɖa edziedzi geɖe wu eye míanɔ edom ɖa hena ɣiyiɣi didi aɖe. Ɣeaɖewoɣi la, Yehowa ɖea mɔ be ame siwo le koko ƒom nɛ la naɖe ale si gbegbe nu si biam wole la le vevie na woe kple woƒe xɔse ƒe nuvãnyenye afia hafi yeaɖo woƒe gbedodoɖawo ŋu.a
19. Nu kae Yesu wɔna ɣesiaɣi, eye nu ka tae wòle be míasrɔ̃ eƒe kpɔɖeŋua?
19 Ðo to Yehowa bliboe. Yesu wɔa nu siwo dzea Fofoa ŋu ɣeawokatãɣi. Zi ɖeka aɖe ya teti la, ale si Yesu di be yeakpɔ nɔnɔme aɖe gbɔe la to vovo na Fofoa ƒe didi. Ke hã, egblɔ na Fofoa kakaɖedzitɔe be: “Menye nye lɔlɔ̃nu o, ke boŋ tɔwò nava eme.” (Luka 22:42) Bia ɖokuiwò be, ‘Ðe meɖoa to Mawu ne esia wɔwɔ manɔ bɔbɔe nam o gɔ̃ hã?’ Toɖoɖo Mawu le vevie hafi míanɔ agbe. Esi wònye eyae nye mía Wɔla, míaƒe Agbedzɔtsoƒe, kple Ame si léa míaƒe agbe ɖe te ta la, agba le mía dzi be míaɖo to eƒe gbe. (Ps. 95:6, 7) Nu bubu aɖeke meli míawɔ adze Mawu ŋu tsɔ wu be míaɖo toe o.
20. Nu kae nye nu vevitɔ na Yesu le eƒe agbe me, eye aleke míate ŋu asrɔ̃ eƒe kpɔɖeŋu?
20 Nya Biblia la nyuie. Esi Satana do Yesu ƒe xɔse kpɔ tẽe la, Yesu yɔ nya tso Ŋɔŋlɔawo me tsɔ tsi tsitre ɖe eŋu. (Luka 4:1-13) Esi Yesu nɔ mo kam na subɔsubɔhakplɔla tsitretsiɖeŋulawo la, eɖo ŋu ɖe Mawu ƒe Nya la ŋu eye wòzãe. (Mat. 15:3-6) Mawu ƒe sea nyanya kple edziwɔwɔ ye nye nu vevitɔ na Yesu le agbe me. (Mat. 5:17) Míawo hã míedi be míatsɔ Mawu ƒe Nya si doa ŋusẽ ame ƒe xɔse la anɔ míaƒe susu mlamee. (Flp. 4:8, 9) Ɣeyiɣikpɔkpɔ ɖe ɖokuisinusɔsrɔ̃ kple ƒomenusɔsrɔ̃ ŋu ate ŋu asesẽ na mía dometɔ aɖewo. Ke hã, le esi míadi be míakpɔ ɣeyiɣi hafi asrɔ̃ nu teƒe la, ɖewohĩ ahiã be míaƒle ɣeyiɣi na ewɔwɔ boŋ.—Ef. 5:15-17.
21. Ðoɖo ka ŋu dɔe míate ŋu awɔ be míanya Mawu ƒe Nya la nyuie wu ahanɔ agbe ɖe enu?
21 “Kluvi nyateƒetɔ kple aɖaŋudzela” la kpe ɖe mía ŋu be míakpɔ ɣeyiɣi na ɖokuisinusɔsrɔ̃ kple ƒomenusɔsrɔ̃ to kwasiɖa sia kwasiɖa ƒe Ƒometadedeagu fiẽsi ƒe ɖoɖo la dzi. (Mat. 24:45) Ðe nèle ɖoɖo sia ŋu dɔ wɔm nunyatɔe? Be Kristo la ƒe tamesusu nasu asiwò la, ɖe manyo be nàwɔ ɖoɖo anɔ nu siwo Yesu fia ku ɖe nyati siwo me nètsɔ ɖe le ŋu hã me dzrom ɖe ɖoɖo nu oa? Àte ŋu azã Watch Tower Publications Index (Index des publications Watch Tower) atsɔ adi nyati siwo dzro nu siwo nèdi be yeanya la me. Le kpɔɖeŋu me, tso ƒe 2008 va de asi na ƒe 2010 me la, wota nyati vovovo 12 ɖe magazine sia ƒe tata si míemana me, siwo ƒe tanya gã ye nye, “Nu Si Míesrɔ̃ Tso Yesu Gbɔ.” Ðewohĩ àdi be yeazã nyati siawo atsɔ awɔ nusɔsrɔ̃. Tso ƒe 2006 me la, wotaa nyati si ƒe tanyae nye “Aleke Nàɖo Wo Ŋui?” ɖe Nyɔ! me. Wotrɔ asi le nyabiase siwo le eme ŋu be woana Mawu ƒe Nya la ŋuti sidzedze si su mía si la nadzi ɖe edzi ahade to ɖe edzi. Ðe manyo be nàzã nyati siawo ƒe ɖewo le wò Ƒometadedeagu me tso ɣeyiɣi yi ɣeyiɣi oa?
Míate Ŋu Aɖu Xexea Dzi
22, 23. Nu kae wòle be míawɔ be míaɖu xexea dzi?
22 Be Mawu ƒe gbɔgbɔa nafia mɔ mí la, ele be míatsi tsitre ɖe xexea ƒe gbɔgbɔ ŋu. Esia wɔwɔ mele bɔbɔe o. Ebia agbagbadzedze blibo kple ʋiʋli vevie. (Yuda 3) Gake àte ŋu aɖu dzi! Yesu gblɔ na eƒe nusrɔ̃lawo be: “Le xexea me la, miele xaxawo me tom, gake milé dzi ɖe ƒo! Meɖu xexea dzi.”—Yoh. 16:33.
23 Míawo hã míate ŋu aɖu xexea dzi ne míetsi tsitre ɖe xexea ƒe gbɔgbɔ ŋu eye míewɔ nu sia nu si míate ŋui be míaxɔ Mawu ƒe gbɔgbɔ la. Vavãe, “ne Mawu le mía dzi ɖe, ame kae atsi tsitre ɖe mía ŋu?” (Rom. 8:31) Ne míexɔ Mawu ƒe gbɔgbɔ la eye míewɔ ɖe eƒe mɔfiafia si le Biblia me dzi la, míakpɔ dzidzeme, ŋutifafa, kple dzidzɔ, eye míaka ɖe edzi be míakpɔ agbe mavɔ le xexe yeye si ava kpuie la me.
[Etenuŋɔŋlɔ]
a Kpɔ esia ŋuti nyatakaka bubuwo le Nuka Tututue Nye Biblia ƒe Nufiafia? ƒe axa 170-173.
Èɖo Ŋku Wo Dzia?
• Nu ka tae xexea ƒe gbɔgbɔ va xɔ aƒe ɖe xexea me alea ɖo?
• Nyabiase ene kawoe wòle be míabia mía ɖokuiwo?
• Nu etɔ̃ kawoe míesrɔ̃ tso Yesu gbɔ le ale si míawɔ axɔ Mawu ƒe gbɔgbɔ la ŋu?
[Nɔnɔmetata si le axa 8]
Alekee mawudɔla aɖewo wɔ va zu gbɔgbɔ vɔ̃wo?
[Nɔnɔmetata si le axa 10]
Satana zãa xexea ƒe gbɔgbɔ tsɔ kpɔa ŋusẽ ɖe amewo dzi, gake míate ŋu aɖe mía ɖokui ɖa le eƒe ŋusẽkpɔɖeamedzi te