Nɔ Dzadzraɖoɖi!

“[Minɔ] dzadzraɖoɖi, elabena Amegbetɔvi la gbɔna le gaƒoƒo si miesusu be eya dzie wòava o la dzi.”—MAT. 24:44.

1, 2. (a) Nudzɔdzɔ ka ŋu nyae wogblɔ ɖi le Biblia me si míate ŋu atsɔ asɔ kple kpɔ̃ ƒe amedzidzedze? (b) Aleke amedzidzedze si gbɔna la ka wòe?

FEFEWƆLA aɖe si wonya nyuie be enɔa fefem dziɖeɖitɔe kple Bengal kpɔ̃ siwo wòmla nyuie hetsɔ ɖea modzaka na nukpɔlawo eye wòwɔ esia ƒe geɖe la gblɔ be: “Ne lã wɔada aɖe lɔ̃ wò nya la, àse le ɖokuiwò me be nu nyuitɔ kekeake si le xexea me la su ye si.” Gake nɔnɔmeawo va trɔ le October 3, 2003 dzi. Ame aɖeke menya nu kae dzɔ gbe ma gbe o, kasia eƒe lãawo dometɔ ɖeka, si nye kpɔ̃ ɣi aɖe, si ƒe kpekpeme nye kilogram 172 la dze edzi le vo me. Fefewɔlaa menɔ mɔ kpɔm na amedzidzedze ma kura o, eye menɔ dzadzraɖoɖi o.

² Enyo be míade dzesii be Biblia gblɔ “lã wɔadã” aɖe ƒe amedzidzedze ŋu nya ɖi, eye ehiã be míanɔ ŋudzɔ. (Mixlẽ Nyaɖeɖefia 17:15-18.) Ame ka dzie lã wɔadã la adze? Xexea me ƒe nudzɔdzɔwo atrɔ kpata, eye Abosam ƒe xexea me ama ahatsi tsitre ɖe wo nɔewo. Lã wɔadã si biã helĩhelĩ la le tsitre ɖi na Dukɔ Ƒoƒuawo, eye “dzo ewoawo” le tsitre ɖi na dunyaheŋusẽwo katã. Woawoe atrɔ ɖe Babilon Gã si nye alakpasubɔsubɔ ƒe xexeme fiaɖuƒe la ŋu, eye woatsrɔ̃e ɖa anyratɔe. Ɣekaɣie nu sia adzɔ? Míenya ŋkeke la alo gaƒoƒo la o. (Mat. 24:36) Gake míenya be anye gaƒoƒo aɖe si me míanɔ mɔ kpɔm nɛ o, eye ɣeyiɣi si susɔ hafi nu sia nadzɔ la le kpuie. (Mat. 24:44; 1 Kor. 7:29) Ekema, ele vevie be míanɔ dzadzraɖoɖi le gbɔgbɔ me, ale be ne amedzidzedze ma va eme eye Kristo va abe Ametsrɔ̃la ene la, wòanye míaƒe Ðela hã! (Luka 21:28) Hafi míate ŋu adzra mía ɖokui ɖo alea la, ele be míasrɔ̃ nu tso Mawu subɔla wɔnuteƒe siwo nɔ dzadzraɖoɖi eye esia wɔe be wova kpɔ Mawu ƒe ŋugbedodowo me vava teƒe kple ŋku la gbɔ. Ðe míana be nufiame siwo le agbemenudzɔdzɔ ŋutɔŋutɔ siawo me la nade dzi gbɔ na mía?

Nɔ Dzadzraɖoɖi Abe Noa Ene

 3. Nu kawoe wɔe be Mawu subɔsubɔ nuteƒewɔwɔtɔe menɔ bɔbɔe na Noa o?

³ Togbɔ be agbenɔnɔ vlo le anyigba dzi eye wòɖea fu na ame ŋutɔ le Noa ƒe ɣeyiɣia me hã la, Noa nɔ dzadzraɖoɖi be yeakpɔ Mawu ƒe ŋugbedodo la me vava teƒe. Kpɔ kuxi siwo me Noa anya to esime mawudɔla dzeaglãwo do amegbetɔwo ƒe ŋutilã heva dɔ kple nyɔnu dzetugbewo le anyigba dzi la le susu me ɖa! Woƒe gbɔdɔdɔ manɔdzɔdzɔmenu sia na wodzi dzidehlɔ̃meviwo, siwo nye “ame kako ŋkɔxɔla” siwo zã woƒe ŋusẽ tsɔ wɔ anyra le ame bubuwo ŋu. (1 Mose 6:4) Bu ale si gbegbe ame dzɔtsu mawo ana ŋutasesẽ kple tɔtɔ naxɔ aƒe ɖe afi sia afi si woyi la ŋu kpɔ. Esia wɔe be vɔ̃ɖinyenye va sɔ gbɔ eye amegbetɔwo ƒe tamebubu kple nuwɔna va gblẽ keŋkeŋ. Ɣemaɣi la, Aƒetɔ Dziɖulagã Yehowa de se aɖe si nye xexe mavɔ̃mawu ma ƒe nuwuɣi ƒe gɔmedzedze.—Mixlẽ 1 Mose 6:3, 5, 11, 12.a

4, 5. Mɔ kawo nue ale si nuwo le le míaƒe ŋkekea me la le abe ale si wonɔ le Noa ƒe ŋkekea me ene le?

⁴ Yesu gblɔ ɖi be nu siwo adzɔ le míaƒe ŋkekea me la anɔ abe ale si wònɔ le Noa ƒe ŋkekeawo me ene. (Mat. 24:37) Le kpɔɖeŋu me, gbɔgbɔ vɔ̃wo kpɔa ŋusẽ ɖe amewo ƒe nuwɔnawo dzi egbea hã. (Nyaɖ. 12:7-9, 12) Mawudɔla vɔ̃ɖi siawo do amegbetɔwo ƒe ŋutilã le Noa ƒe ŋkekeawo me. Togbɔ be woxe mɔ na wo be woagado amegbetɔŋutilã egbea o hã la, wodzea agbagba be yewoakpɔ ŋusẽ ɖe ɖeviwo kple tsitsiawo siaa dzi. Le amewo ƒe manyamanya me la, gbɔgbɔ vɔ̃ siawo, siwo kpɔ gome le gbɔdɔdɔ si mele dzɔdzɔme nu o me la, kpɔa dzidzɔ ɖe ame siwo woate ŋu aflu le anyigba dzi la ƒe nuwɔna vɔ̃ɖiwo kple agbe maɖɔʋu nɔnɔ ŋu.—Ef. 6:11, 12.

⁵ Mawu ƒe Nya la ɖɔ Abosam be “amewulae” wònye eye wògblɔ be enye “ame si ate ŋu ahe ku avae.” (Yoh. 8:44; Heb. 2:14) Seɖoƒe li na ŋusẽ si le esi be wòawu ame tẽe la. Ke hã, gbɔgbɔmenuwɔwɔ vɔ̃ɖi sia na be amebeble kple amefuflu va xɔ aƒe ɖi. Eƒãa amewuwu ɖe amewo ƒe susuwo kple woƒe dziwo me. Le kpɔɖeŋu me, ne wodzi ɖevi 142 le Amerika la, ɖevi 1 ava nye ame si woawu ŋutasesẽtɔe. Esi ŋutasesẽ manyatalenu va do agbogbo egbea ta la, ɖe mèkpɔe be Yehowa atsi dzi le eɖokui me ŋutɔ wu ale si wònɔ le Noa ƒe ŋkekea me oa? Ðe wòado kpo afɔɖeɖea?

6, 7. Aleke Noa kple eƒe ƒomea ɖe xɔse kple mawuvɔvɔ̃ fiae?

⁶ Emegbe la, Mawu na Noa nya nyametsotso si wòwɔ be yeahe tsiɖɔɖɔ aɖe ava anyigba dzi be wòatsrɔ̃ ŋutilãwo katã la. (1 Mose 6:13, 17) Yehowa na mɔfiame Noa be wòakpa aɖakaʋu aɖe si ƒe nɔnɔme nɔ abe aɖakago gã aɖe ene. Noa kple eƒe ƒomea tso ɖe dɔ ŋu. Nu kae kpe ɖe wo ŋu be woɖo to eye wonɔ dzadzraɖoɖi esime Mawu ƒe ʋɔnudɔdrɔ̃a va?

⁷ Xɔse sẽŋu kple mawuvɔvɔ̃ ye ʋã Noa kple eƒe ƒomea be wowɔ abe ale si Mawu de se na wo ene. (1 Mose 6:22; Heb. 11:7) Abe ƒome ene la, Noa kple viawo nɔ ŋudzɔ le gbɔgbɔ me eye woƒo asa na agbe baɖa siwo nɔm blemaxexe ma me tɔwo nɔ la. (1 Mose 6:9) Enyae be mele be yeƒe ƒomea nasrɔ̃ ŋutasẽgbenɔnɔ kple aglãdzedze ɖe Mawu ŋu ƒe nɔnɔme si ame siwo dome wonɔ la ɖena fiana o. Enɔ vevie na wo be woagaƒo wo ɖokuiwo ɖe gbe sia gbe dɔwɔna bubuwo me fũu o. Mawu de dɔ aɖe asi na wo be woawɔ, eye enɔ vevie ŋutɔ be ƒome bliboa nana dɔ ma nanye dɔ vevitɔ na wo le agbe me.—Mixlẽ 1 Mose 6:14, 18.

Noa Kple Eƒe Ƒomea Nɔ Dzadzraɖoɖi

 8. Nu kae ɖee fia be Noa ƒe ƒomea me tɔwo ɖe ɖokuitsɔtsɔ na Mawu fia?

⁸ Noa si nye ƒome ƒe ta la koŋ ŋue Biblia me nuŋlɔɖia ƒo nu tso, gake Noa srɔ̃ kple viaŋutsuwo kpakple wo srɔ̃wo hã nye Yehowa subɔlawo. Nyagblɔɖila Ezekiel ɖo kpe esia dzi. Egblɔ be, nenye ɖe Noa nɔ agbe le yeƒe ɣeyiɣia me la, womaɖe viawo le wo fofo ƒe nu dzɔdzɔe wɔwɔ ta o. Wotsi nyuie ate ŋu aɖo to alo agbe toɖoɖo. Esia fia be wo dometɔ ɖe sia ɖe ɖee fia le mɔ vovovowo nu be yewolɔ̃ Mawu kpakple eƒe mɔwo. (Eze. 14:19, 20) Ƒomea ɖo to Noa ƒe mɔfiame, wowɔ ɖeka kplii le xɔse me, eye womeɖe mɔ ame bubuwo kpɔ ŋusẽ ɖe wo dzi wogbe dɔ si Mawu de wo si la wɔwɔ o.

 9. Ale si Noa ɖe xɔse fia le blema ƒe kpɔɖeŋu kawoe li egbea?

⁹ Dzidzɔ ka gbegbee nye esi wònyena ne míekpɔe egbea be ƒome ƒe ta siwo le xexea me katã ƒe nɔviwo ƒe habɔbɔa, si le abe ƒome ene, me la le woƒe ŋutete katã wɔm be yewoasrɔ̃ Noa ƒe kpɔɖeŋua! Wokpɔe dze sii be menye ƒomea ƒe nuɖuɖu, nudodo, dɔƒe, kple sukudenyawo gbɔ kpɔkpɔ koe hiã o, ke ele vevie be yewoakpɔ woƒe gbɔgbɔmenuhiahiãwo hã gbɔ na wo. Woto esia me le egbɔ kpɔm be yewoanɔ dzadzraɖoɖi na nu si Yehowa le wɔwɔ ge kpuie la.

10, 11. (a) Aleke Noa kple eƒe ƒomea anya se le wo ɖokuiwo me godoo esime wonɔ aɖakaʋua me? (b) Nya kae wòanyo be míabia mía ɖokuiwo?

¹⁰ Abe ƒe 50 ene la, Noa, srɔ̃a, viaŋutsuawo, kpakple wo srɔ̃wo siaa anya wɔ dɔ le aɖakaʋua kpakpa me. Esi wonɔ aɖakaʋua kpam la, woanya ge ɖe eme ahado zi gbɔ zi alafa geɖe. Wotsɔ aŋɔ tre eme keŋ, woƒo nuɖuɖuwo nu ƒu ɖe eme, eye wokplɔ lãwo yi ɖe eme. Kpɔ nɔnɔmea le susu me ɖa. Ŋkeke vevitɔa va ɖo mlɔeba. Eyae nye ƒe 2370 D.M.Ŋ. ƒe ɣleti evelia ƒe ŋkeke 17 lia dzi, eye woyi ɖe aɖakaʋua me. Yehowa do ʋɔa ɖe wo nu, eye tsi te dzadza. Menye ale si tsi dzana heɖea amewo le nuto aɖe me ƒe nya dzro koe esia nye o. Dziƒo nu ʋu, eye emetsi gbogboawo dudu ɖe anyi, eye tsi gã aɖe nɔ dzadzam ɖe aɖakaʋua dzi bababa. (1 Mose 7:11, 16) Ame siwo nɔ gota la nɔ kukum esime wonɔ ame siwo nɔ aɖakaʋua me ya xɔm ɖe agbe. Aleke Noa ƒe ƒomea anya se le eɖokui me ɣemaɣi? Woada akpe gã aɖe na Mawu godoo. Gake ɖikekemanɔmee la, woanɔ gbɔgblɔm na wo ɖokuiwo be, ‘Aleke wònyoe nye esi be míezɔ kple Mawu vavã la eye míekpɔ egbɔ be míenɔ dzadzraɖoɖi!’ (1 Mose 6:9) Ðe nàte ŋu akpɔe le susu me be wòe nye ema tsi agbe le Harmagedon me, eye nèle akpe dam na Mawu tso dzi me nenema kea?

¹¹ Naneke mate ŋu axe mɔ na Ŋusẽkatãtɔ la be wòagawɔ ŋugbe si wòdo be yeatsrɔ̃ Satana ƒe nuɖoanyi sia ɖa la dzi o. Bia ɖokuiwò be, ‘Ðe meka ɖe edzi bliboe be Mawu ƒe ŋugbedodowo dometɔ aɖeke mado kpo eme vava le eƒe ɣeyiɣi ɖoɖi dzi o, eye be, woƒe akpa suetɔ kekeake gɔ̃ hã ava emea?’ Ne nenemae la, ekema na “Yehowa ƒe ŋkeke” si le du dzi gbɔna la nanɔ susu me na wò vevie eye nàto esia me anɔ dzadzraɖoɖi.—2 Pet. 3:12.

Mose Yi Edzi Nɔ Ŋudzɔ

12. Nu kawoe ate ŋu ahe Mose ƒe susu ɖa le gbɔgbɔmenuwo dzi hafi?

¹² Na míadzro kpɔɖeŋu bubu me kpɔ. Le amegbetɔ ƒe nukpɔsusu nu la, edze abe ɖoƒe si Mose nɔ le Egipte nyigba dzi la de edzi ŋutɔ ene. Esi wònye be Farao vinyɔnu ye xɔe nyi ta la, anɔ eme be wodea bubu eŋu ŋutɔ, aɖu nuɖuɖu viviwo, ado awu nyuitɔ kekeake, eye wòanɔ teƒe siwo dze ani wu le anyigba ma dzi. Wona hehe deŋgɔ eyama. (Mixlẽ Dɔwɔwɔwo 7:20-22.) Domenyinu gã aɖe ate ŋu asu eyama si.

13. Aleke Mose na eƒe susu nɔ Mawu ƒe ŋugbedodowo dzi?

¹³ Edze abe hehe si Mose dzilawo nae le gɔmedzedzea me la kpe ɖe eŋu wòte ŋu kpɔe dze sii be trɔ̃subɔsubɔ, si me Egiptetɔwo ƒo wo ɖokuiwo ɖo la, nye bometsinu ene. (2 Mose 32:8) Hehe deŋgɔ si wona Mose le Egipte kple woƒe nunɔamesiwo ƒe atsyɔ̃ɖoɖo mete ŋu trɔ eyama ɖa tso tadedeagu vavãtɔ gbɔ o. Anya de ŋugble le ŋugbe siwo Mawu do na tɔgbuiawo la ŋu vevie eye wòdi vevie be yeanɔ dzadzraɖoɖi awɔ Mawu ƒe lɔlɔ̃nu. Mose va gblɔ na Israel viwo mlɔeba be: “Yehowa, . . . Abraham ƒe Mawu, Isak ƒe Mawu kple Yakob ƒe Mawu la” ye dom ɖe mia gbɔ.—Mixlẽ 2 Mose 3:15-17.

14. Alekee wodo Mose ƒe xɔse kple dzideƒo kpɔe?

¹⁴ To vovo na Egipte mawu siwo me agbe mele o la katã la, Yehowa, Mawu vavã la, nye ame ŋutɔŋutɔ na Mose. Enɔ agbe abe ɖe wònɔ “Ame si womekpɔna o la kpɔm” ene. Mose xɔe se be woava ɖe Mawu ƒe amewo, gake menya ɣeyiɣi si esia ava eme o. (Heb. 11:24, 25, 27) Didi vevie si nɔ eme be yeakpɔ eteƒe woaɖe Hebritɔwo tso kluvinyenye me la dze ƒãa le ale si wòʋli Israel vi kluvi aɖe si ƒom wonɔ la ta la me. (2 Mose 2:11, 12) Ke hã, Yehowa ƒe ɣeyiɣia mede haɖe o, eya ta enɔ na Mose be wòasi ayi aɖanɔ gbedzi le anyigba didi aɖe dzi. Ðikekemanɔmee la, esesẽ nɛ ŋutɔ be, eya ame si nɔ nudzedziname ƒe agbe le Egipte fiasã me la nava nɔ gbedadaƒo. Ke hã, Mose nɔ dzadzraɖoɖi esi wònɔ ŋudzɔ ɖe mɔfiame ɖe sia ɖe si Yehowa nɛ la ŋu. Esia tae Mawu te ŋu dɔe esime wònɔ Midian nyigba dzi ƒe 40 megbe be wòayi aɖaɖe nɔviawo tso kluvinyenye me. Mose ɖo to Mawu hetrɔ yi Egipte le eƒe mɔfiafia nu. Ɣeyiɣia de azɔ be Mose nawɔ dɔ aɖe si Mawu de asi nɛ la, eye be wòawɔe le mɔ si Mawu di la nu. (2 Mose 3:2, 7, 8, 10) Esi Mose, si ‘fa wu ame siwo katã nɔ anyigba dzi’ la, trɔ yi Egipte la, ehiã xɔse kple dzideƒo be wòado ɖe Farao ŋkume. (4 Mose 12:3) Ewɔ esia, menye zi ɖeka o, menye zi eve o; gake ewɔe zi ale si fuwɔameawo nya nɔ edzi yim ko, eye menya zi nenie wòagayi Farao ŋkume le fuwɔame aɖe megbe o.

15. Togbɔ be kplamatsɛdonuwo ɖe fu na Mose hã la, nu kae ʋãe wònɔ ŋudzɔ be yeade bubu ye Fofo si le dziƒo la ŋu le mɔnukpɔkpɔ ɖe sia ɖe me?

¹⁵ Le ƒe 40 siwo kplɔe ɖo, tso ƒe 1513 D.M.Ŋ. me va ɖo ƒe 1473 D.M.Ŋ. me la, Mose to nɔnɔme ɖedzileameƒo geɖe me. Ke hã, enɔ ŋudzɔ be yeade bubu Yehowa ŋu le mɔnukpɔkpɔ ɖe sia ɖe me, eye wòde dzi ƒo na nɔvia Israel viwo hã be woawɔ nenema ke. (5 Mose 31:1-8) Nu ka tae? Elabena elɔ̃ Yehowa ƒe ŋkɔa kple eƒe dziɖulanyenyea wu eya ŋutɔ ƒe ŋkɔ gɔ̃ hã. (2 Mose 32:10-13; 4 Mose 14:11-16) Togbɔ be dziɖeleameƒo kple kplamatsɛdonuwo ɖea fu mí hã la, ele be míayi edzi anɔ Mawu ƒe dziɖuɖu ƒe akpa dzi kple kakaɖedzi be ale si wòwɔa nuwoe lae nye dzɔdzɔetɔ, esi me nunya le wu, eye wònyo wu ɖe sia ɖe. (Yes. 55:8-11; Yer. 10:23) Nenemae nèsena le ɖokuiwò mea?

Yi Edzi Nànɔ Ŋudzɔ!

16, 17. Nu ka tae gɔmesese vevi aɖe le Marko 13:35-37 me nyawo ŋu na wò?

¹⁶ “Minɔ mia ɖokui dzi kpɔm nyuie, minɔ ŋudzɔ, elabena mienya ɣekaɣie nye ɣeyiɣi ɖoɖi la o.” (Mar. 13:33) Yesu ye gblɔ nuxlɔ̃amenya sia esime wònɔ nu ƒom tso nuɖoanyi vɔ̃ɖi sia ƒe nuwuɣia ƒe dzesi la ŋu. De ŋugble le nya mamlɛ siwo Yesu gblɔ le eƒe nyagblɔɖinya vevi la me le Marko ƒe nuŋlɔɖia me ŋu kpɔ; egblɔ be: “Minɔ ŋudzɔ, elabena mienya ɣekaɣi aƒetɔa le vava ge o, eɖanye fiẽ alo zãtiƒe alo koklo ƒe atɔkuɣi alo ŋdikanya o; be ne eva ɖo le vo me la, wòagakpɔ mi le alɔ̃ me o. Gake nu si gblɔm mele na mi la, amewo katãe mele egblɔm na be: Minɔ ŋudzɔ.”—Mar. 13:35-37.

¹⁷ Nu si naa wobua tame ye Yesu ƒe nuxlɔ̃amenya sia nye. Eƒo nu tso zã ƒe ŋudzɔɣi vovovo ene ŋu. Ŋudzɔɣi mamlɛa anye ɣeyiɣi si me ŋudzɔnɔnɔ asesẽ ŋutɔ, elabena etsoa fɔŋli ga etɔ̃ va se ɖe esime agu dzena. Aʋawɔwɔ ŋuti aɖaŋuwɔlawo kpɔe be esia ye nye ɣeyiɣi nyuitɔ si me woadze futɔwo dzi, si me woakpɔ wo godoo le “alɔ̃ me.” Nenema kee egbea la, esime xexea le alɔ̃ me ʋĩi le gbɔgbɔmegɔmesese nu la, ate ŋu asesẽ na mí ŋutɔ be míakpɔtɔ anɔ ŋudzɔ. Ðe ɖikeke aɖe le mía me be mehiã be ‘míanɔ ŋudzɔ’ eye ‘míanɔ mía ɖokui dzi kpɔm nyuie’ ɖe nuwuwu la kpakple míaƒe ɖeɖekpɔkpɔ si wogblɔ ɖi la ŋu oa?

18. Mɔnukpɔkpɔ si ɖeke mesɔ kpli o kae su mí Yehowa Ðasefowo si?

¹⁸ Fefewɔla si ƒe nya míegblɔ le gɔmedzedzea me la tsi agbe esi Bengal kpɔ̃ la dze edzi. Gake Biblia me nyagblɔɖia na eme kɔ kɔtɛ be manya wɔ be alakpasubɔsubɔ loo alo nuɖoanyi vɔ̃ɖi sia ƒe akpa susɔea nasi le nuwuwu si le aƒe tum la nu o. (Nyaɖ. 18:4-8) Neva eme be Mawu subɔlawo katã, ɖeviwo kple tsitsiawo siaa, nakpɔe be ele be vevie be yewoawɔ yewoƒe ŋutete katã be yewoanɔ dzadzraɖoɖi na Yehowa ƒe ŋkeke la, abe ale si Noa kple eƒe ƒomea wɔe ene. Míele agbe le xexe aɖe si me womedea bubu Mawu ŋu le o, si me alakpanufialawo, Mawu ƒe anyinɔnɔ ŋuti ɖikelawo, kple mawudzimaxɔselawo siaa to woƒe nyagbɔgblɔwo dzi le fewu ɖum le Wɔlaa ŋu, la me. Gake mele be míaɖe mɔ woakpɔ ŋusẽ ɖe mía dzi o. Ele be miana be kpɔɖeŋu siwo me míedzro la nade dzi gbɔ na mí eye míanɔ ŋudzɔ be míawɔ mɔnukpɔkpɔ ɖe sia ɖe ŋu dɔ atsɔ ade bubu Yehowa ŋu ahaʋli eta be eyae nye “mawuwo dzi Mawu” la, ɛ̃, be míatsɔ aɖee afia be eya ye nye “Mawu gã, si ŋu ŋusẽ kple ŋɔdzi le.”—5 Mose 10:17.

[Etenuŋɔŋlɔ]

Èɖo Ŋku Wo Dzia?

• Nu ka tae wòhiã be Noa natsɔ eƒe ƒomea ƒe gbɔgbɔmenuwo gbɔ kpɔkpɔ aɖo nɔƒe gbãtɔ?

• Mɔ vevi kawo nue míaƒe ɣeyiɣia le abe Noa ƒe ŋkekea ene le?

• Togbɔ be dziɖeleameƒo ɖe fu na Mose hã la, nu ka tae eƒe ŋku nɔ Yehowa ƒe ŋugbedodowo dzi?

• Biblia ƒe nyagblɔɖi kawoe ʋã wò be nàkpɔtɔ anɔ ŋudzɔ le gbɔgbɔ me?

[Nɔnɔmetata si le axa 25]

Noa kple eƒe ƒomea tsɔ woƒe susu katã ɖo dɔ si Yehowa de asi na wo la ŋu

[Nɔnɔmetata si le axa 26]

Mawu ƒe ŋugbedodo siwo ŋu kakaɖedzi nɔ la kpe ɖe Mose ŋu wòyi edzi nɔ ŋudzɔ