Biblia Le Amewo Ƒe Agbenɔnɔ Trɔm

NU KAE ʋã ame nikpi aɖe si lɔ̃ rock hadzidzi la be wòva le amewo lɔ̃m hele kpekpeɖeŋu nam ame bubuwo? Nu kae kpe ɖe Mexico ŋutsu aɖe ŋu wòdzudzɔ agbe gbegblẽ nɔnɔ? Nu ka tae ame siwo nɔ ŋgɔ xɔm le gasɔdodo ƒe hoʋiʋli me le Japan la dometɔ ɖeka dzudzɔ gasɔdodo be yeasubɔ Mawu? Xlẽ ame siawo ŋutɔwo ƒe numenyawo nàkpɔ.

“Menye Dadala Madzeakɔanyi Si Mebua Ame O.”—DENNIS O’BEIRNE

ƑE SI ME WODZII: 1958

DUKƆ SI ME WÒTSO: ENGLAND

AME SI TƆGBI WÒNYE TSÃ: AME NIKPI SI LƆ̃ ROCK HADZIDZI

AGBE SI MENƆ TSÃ: Fofonye nye Irelandtɔ, eye esi menɔ ɖevime la, menɔ Ireland ƒe Katolikoha me. Gake zi geɖe la, nye ɖeka koe dea sɔlemea, togbɔ be sɔlemedede medzɔa dzi nam hafi o hã. Ke hã, enɔ dzroyem vevie be mase Biblia me nyawo gɔme. Megblɔa Aƒetɔ Ƒe Gbedodoɖa la edziedzi, eye meɖo ŋku edzi be menɔa zãba dzi nɔa ŋugble dem le nu si wòfia la ŋu. Metsɔa emenyawo ɖekaɖeka henɔa agbagba dzem be mase nu si wofia la gɔme.

Esi menye ɖekakpui la, meƒo ɖokuinye ɖe Rastafaritɔwo ƒe haa me. Eye medoa vevie nusɔsrɔ̃ tso dunyahenuɖoanyiwo, abe Anti-Nazi League la ene ŋu. Gake meva ƒo ɖokuinye ɖe ame siwo doa vivi ɖe hadzidzi si woyɔna be punk rock la ƒe aglãdzegbenɔnɔ me vevie. Menoa atike vɔ̃ɖiwo, vevietɔ esi nye marijuana la, gbe sia gbe kloe. Nyemetsɔ ɖeke le naneke me le agbe me o, menoa aha tsu, medea nye agbe afɔku me, eye nyemetsɔa ɖeke le eme na amewo o. Menye ame nikpi, nyemeɖoa dze kple ame aɖeke o negbe ɖeko mesusui be nyaa le vevie hafi. Nyemelɔ̃na be woaɖe fotom gɔ̃ hã o. Egbea ne meɖo ŋku ŋkeke mawo dzi la, mekpɔe be ɣemaɣi la, menye dadala madzeakɔanyi si mebua ame o. Ame siwo mía kpli wo dome nɔ kplikplikpli la koe menyoa dɔme na.

Esi mexɔ abe ƒe 20 ene la, meva tsɔ ɖe le Biblia me nyawo me vevie. Xɔ̃nye aɖe si hã noa atike vɔ̃ɖi la te Biblia sɔsrɔ̃ esime wònɔ gaxɔ me, eye mía kplii míeɖo dze legbee aɖe tso mawusubɔsubɔ, sɔlemehawo, kple akpa si Satana le wɔwɔm le xexea me ŋu. Meƒle Biblia henɔ esrɔ̃m le ɖokuinye si. Mía kple xɔ̃nyea míexlẽa Biblia ƒe akpa aɖe, eye míenɔa anyi ɖekae dzroa nu si míesrɔ̃ la me heƒoa nya ta le nu si ŋu míeke ɖo la ŋu. Míewɔ esia ɣleti geɖe.

Nu siwo dzi míeɖo kpee le míaƒe nusɔsrɔ̃a me la dometɔ aɖewoe nye esiawo: míele xexe sia ƒe nuwuɣia me; ele be Kristotɔwo naɖe gbeƒã Mawu Fiaɖuƒe ŋuti nya nyuia; mele be woanye xexea ƒe akpa aɖeke o, eye mele be woahe dunya o; eye be Biblia na mɔfiame nyuiwo ku ɖe agbe nyui nɔnɔ ŋu. Míekpɔe dze sii kɔtɛ be Biblia to nyateƒe, eye be subɔsubɔha vavãtɔ aɖe li. Gake eyae nye ka? Míelé ŋku ɖe ale si sɔleme xɔŋkɔwo ƒe wɔnawo nɔa kpeɖii kple ale si woƒoa wo ɖokui ɖe dunyahehe mee ŋu, eye míede dzesii be Yesu mewɔ nu nenema kura o. Míekpɔe be menye woawo zãm Mawu le o, eya ta míetso nya me be míado subɔsubɔha siwo mexɔ ŋkɔ tututu o la hã akpɔ.

Míekpena kple subɔsubɔha mawo me tɔwo hebiana wo nya vovovowo. Míenya Biblia ƒe nufiafia le nya mawo ŋu, eya ta míekpɔnɛ dzea sii enumake ne woƒe nyawo mewɔ ɖeka kple Mawu ƒe Nyaa o. Ne míekpe kpli wo alea vɔ la, medoa gbe ɖa na Mawu gblɔna be, ‘Ne subɔsubɔha vavãtɔ mee ame siawo le la, ke meɖe kuku, na nye dzi naʋãm be madi be magado go wo ake.’ Gake togbɔ be míekpe kple amewo alea ɣleti geɖe hã la, nyemeke ɖe ha aɖeke si te ŋu ɖo míaƒe Biblia me nyabiasewo ŋu la ŋu o; eye didia hã menɔ menye be magakpe kple wo dometɔ aɖe o.

Mlɔeba, mía kple xɔ̃nyea míekpe kple Yehowa Ðasefowo. Míebia wo nyabiase mawo ke, gake woawo ya ɖo wo ŋu tso Biblia me. Woƒe nyaŋuɖoɖowo wɔ ɖeka kple nu siwo míesrɔ̃ xoxo la pɛpɛpɛ. Eya ta míeyi edzi bia wo nya siwo ƒe ŋuɖoɖowo ŋu míeke ɖo le Biblia me o. Le kpɔɖeŋu me, míebia wo nu si nye Mawu ƒe susu le atamanono kple atike vɔ̃ɖi zazã ŋu. Le esia me hã, wote ŋu tsɔ Mawu ƒe Nyaa ɖo eŋui. Eye míelɔ̃ be míade kpekpe aɖe le Fiaɖuƒe Akpata me.

Kpekpeawo dede menɔ bɔbɔe nam o. Esi wònye nyemelɔ̃a hadede kura o ta la, ale si hameviwo katã do awu nyuie, eye wote ɖe ŋunye hedo vivi ɖe ŋunye la ɖe fu nam. Nyemebu susu nyui ɖe ame siwo te ɖe ŋunye la dometɔ aɖewo ŋu o, eye nyemeganɔ didim be made kpekpea azɔ o. Gake abe ale si mewɔnɛ tsã ene la, medo gbe ɖa na Mawu be wòana madi be makpe kple ame siawo ake nenye be woawoe le subɔsubɔha vavãtɔ me—eye didi sẽŋu aɖe ɖo menye be masrɔ̃ Biblia kple Ðasefoawo.

ALE SI BIBLIA TRƆ NYE AGBENƆNƆ: Menyae be ele be madzudzɔ atike vɔ̃ɖi zazã, eye mete ŋu dzudzɔ le ɣeyiɣi kpui aɖe ko me. Gake atamanono koŋue nye nye kuxia. Metee kpɔ zi geɖe be madzudzɔ, gake nyemete ŋui o. Esi mese ale si ame aɖewo te ŋu tsɔ woƒe atamawo ƒu gbe ko womeganoe azɔ o la, medo gbe ɖa na Yehowa le nya sia ŋu. Emegbe le Yehowa ƒe kpekpeɖeŋu me la, mete ŋu dzudzɔ atamanono. Esia na mesrɔ̃ ale si wòle vevie be maɖi anukware ahagblɔ nye dzimenyawo na Yehowa le gbedodoɖa me.

Nu bubu si me megawɔ tɔtrɔ gãwo le lae nye ale si medoa awu hedzrana ɖoe. Zi gbãtɔ si mede kpekpea le Fiaɖuƒe Akpata me la, nye ɖa nɔ wuya, eye metsɔ amadede blɔ te fli aɖe ɖe eme. Le ɣeyiɣi aɖe megbe la, mede amae wònɔ aŋutiɖiɖi. Medoa jeans kple lãgbalẽdziwui si dzi woŋlɔ nyawo ɖo. Togbɔ be Ðasefowo he nye susu yi nye dzedzemea dzi lɔlɔ̃tɔe hã la, nyemekpɔe be ehiã be mawɔ tɔtrɔ o. Gake mlɔeba la, mebu 1 Yohanes 2:15-17 me nyawo ŋu, si gblɔ be: “Miganɔ xexea alo nu siwo le xexea me la lɔ̃m o. Ne ame aɖe lɔ̃a xexea la, Fofo la ƒe lɔlɔ̃ mele eme o.” Mede dzesii be menɔ eɖem fia le nye awudodowo me be melɔ̃ xexea, eya ta be maɖee afia be melɔ̃ Mawu la, ele be mawɔ tɔtrɔwo, eye mewɔe hã.

Emegbe meva de dzesii be menye Ðasefoawo koe di be made Kristotɔwo ƒe kpekpewo o. Hebritɔwo 10:24, 25 me nyawo na mekpɔe be Mawu di be made kpekpeawo. Esi meva nɔ kpekpeawo katã dem, eye medze si ameawo nyuie vɔ la, mexɔ nyɔnyrɔ tsɔ ɖo kpe adzɔgbe si meɖe na Yehowa dzi.

VIÐE SIWO MEKPƆ: Ale si Yehowa ɖea mɔ míeva nɔa ƒomedodo kplikplikpli me kplii la wɔ dɔ ɖe dzinye ŋutɔ. Eƒe veveseseɖeamenu kple beléname ʋãm be masrɔ̃ eya amea, eye wòʋãm be madze Via, Yesu Kristo, hã ƒe afɔɖoƒewo yome. (1 Petro 2:21) Meva kpɔe be esi mele agbagba dzem be masrɔ̃ Kristo la, nye amenyenyea ƒe akpa si nyo ya agate ŋu anɔ eteƒe. Metu nɔnɔme nyuiwo abe lɔlɔ̃ kple ɖetsɔtsɔ le eme na amewo ene ɖo. Medzea agbagba be masrɔ̃ Kristo le ale si mewɔa nu ɖe srɔ̃nye kple vinyeŋutsuvia ŋu me. Eye metsɔa ɖe le eme na nɔviŋutsu kple nɔvinyɔnu haxɔsetɔwo vevie. Kristo yome dzedze wɔe be bubu le ŋunye, eye wòna mesrɔ̃ ale si maɖe lɔlɔ̃ afia amewoe.

“Wode bubu ŋunye.”​—GUADALUPE VILLARREAL

ƑE SI ME WODZII: 1964

DUKƆ SI ME WÒTSO: MEXICO

AME SI TƆGBI WÒNYE TSÃ: AGBE GBEGBLẼ NƆLA

AGBE SI MENƆ TSÃ: Mí ame adre ye wodzi, eye míetsi le Hermosillo, le Sonora, Mexico, si nye nuto dahe aɖe la, me. Fofonye ku esime menye ŋutsuvi dzaa, eya ta enɔ na danye be wòawɔ dɔ akpɔ mía dzi. Mezɔa afɔ ƒuƒlu zi geɖe elabena ga menɔ anyi míaƒle afɔkpa o. Esi megakpɔtɔ nye ɖevi la, menɔ dɔ wɔm tsɔ nɔ asi kpem ɖe ƒomea ƒe nuhiahiãwo gbɔ kpɔkpɔ ŋu. Míemimi ɖe xɔ me abe ale si wònɔ le ƒome geɖewo hã gome ene.

Zi geɖe la, danye menɔa aƒe me ne wòate ŋu akpɔ mí ɖeviawo ta o. Esi mexɔ ƒe 6 la, ŋutsuvi aɖe si xɔ ƒe 15 la nɔ dɔdɔm kplim. Enɔ nu gbegblẽ sia wɔm ɖe ŋunye ɣeyiɣi didi aɖe. Esia me tsonu ɖekae nye be metɔtɔ le gbɔdɔnyawo gome. Mesusui be esɔ be ŋutsuwo ƒe nu nadzrom. Esi medi kpekpeɖeŋu tso ɖɔktawo kple subɔsubɔhakplɔlawo gbɔ la, woka ɖe edzi nam be kuxi aɖeke mele ŋunye o, eye be naneke megblẽ le nye seselelãmea ŋu o.

Esi mexɔ ƒe 14 la, metso nya me be maɖee afia le nye nudodo kple nuwɔna me be menye ŋutsu si dɔna kple ŋutsu. Aleae menɔ agbee le ƒe 11 siwo kplɔe ɖo la me, eye menɔ ŋutsu vovovowo gbɔ le ɣeyiɣi ma me. Emegbe meva srɔ̃ ɖawɔwɔ, eye meʋu ɖawɔƒe aɖe. Gake dzi menɔ dzɔyem o. Mekpe fu le agbe me, eye ame geɖe mewɔ nuteƒe nam o. Mese le ɖokuinye me be agbe si nɔm menɔ la menyo o. Meva nɔ ɖokuinye biam be, ‘Ðe ame nyuiwo le xexe sia me, siwo dzi mate ŋu aka ɖoa?’

Nɔvinyenyɔnua ƒe nu va susu me nam. Yehowa Ðasefowo srɔ̃ Biblia kplii, eye mlɔeba wòxɔ nyɔnyrɔ. Enɔa nu siwo srɔ̃m wònɔ la gblɔm nam, gake nyemeɖoa toe o. Ke hã, eƒe agbenɔnɔ, kple ale si eƒe srɔ̃ɖeɖea dze edzii la, dze ŋunye. Mede dzesii be woa kple srɔ̃a wolɔ̃ wo nɔewo ŋutɔŋutɔ, eye wodea bubu wo nɔewo ŋu. Wonyoa dɔme na wo nɔewo hã. Emegbe Yehowa Ðasefo aɖe va nɔ Biblia srɔ̃m kplim. Le gɔmedzedzea me la, nyemetsɔ dzo ɖe nusɔsrɔ̃a ŋu o. Gake nuwo va trɔ.

ALE SI BIBLIA TRƆ NYE AGBENƆNƆ: Yehowa Ðasefowo kpem be made yewoƒe kpekpewo dometɔ ɖeka, eye mede. Nu si teƒe mekpɔ le afi ma la nye nu yeye nam. Ame geɖe ɖua fewu le ŋunye, gake Ðasefowo mewɔ nu ɖe ŋunye nenema o. Wodo gbe nam xɔlɔ̃wɔwɔtɔe, eye wode bubu ŋunye. Esia wɔ dɔ ɖe dzinye.

Yehowa Ðasefowo ƒe nu ganyo ŋunye ɖe edzi esi mede woƒe takpekpe aɖe. Mekpɔe be le ƒuƒoƒo gãwo me gɔ̃ hã la, woƒe nɔnɔme le abe nɔvinyenyɔnua tɔ ene—wolɔ̃a ame, eye woɖia anukware. Mebia ɖokuinye be alo ɖe wòanye be ame nyui siwo dzi woate ŋu aka ɖo, siwo dim menɔ xoxoxo lae nye esia? Lɔlɔ̃ kple ɖekawɔwɔ si le wo dome la wɔ nuku nam, tsɔ kpe ɖe ale si wozãa Biblia tsɔ ɖoa nyabiase ɖe sia ɖe ŋu la hã ŋu. Mede dzesii be Bibliae kpɔ ŋusẽ ɖe woƒe agbe dzi nenema gbegbe. Mekpɔe hã be ele be mawɔ tɔtrɔwo hafi ate ŋu azu wo dometɔ ɖeka.

Le nyateƒe me la, enɔ nam be mawɔ tɔtrɔ gãwo le agbe me, elabena ɣemaɣi la, mewɔ ɖokuinye abe nyɔnu ene. Ehiã be mawɔ tɔtrɔwo le nye nuƒoƒo, nuwɔna, awudodo, ɖawɔwɔ, kple ame siwo medea ha kplii ŋu. Xɔ̃nyewo ɖe alɔme le ŋunye, eye wonɔ gbɔgblɔm nam be: “Nu ka tae nèle esia wɔm? Naneke megblẽ le ale si nènɔa agbee tsã ŋu o. Mègasrɔ̃ Biblia o. Naneke mehiã wò o.” Gake nu si ŋu wònɔ sesem nam wu be maɖe asi le lae nye agbe gbegblẽ si nɔm menɔ.

Ke hã, menyae be mate ŋu awɔ tɔtrɔ gã mawo, elabena Biblia me nya si le 1 Korintotɔwo 6:9-11 de dzi gbɔ nam. Afi ma gblɔ be: “Miebe nu ka? Ðe mienyae be ame madzɔmadzɔwo manyi Mawu fiaɖuƒe la dome oa? Migana woable mi o. Agbe gbegblẽ nɔlawo kple trɔ̃subɔlawo kple ahasiwɔlawo kple ŋutsu siwo wɔa wo ɖokuiwo nyɔnuwoe kple ŋutsu siwo dɔna kple ŋutsuwo . . . la, womanyi Mawu fiaɖuƒe la dome o. Ke hã, nenemae mia dometɔ aɖewo nɔ tsã. Ke wole tsi na mi nyuie, ke wona mia ŋuti kɔ.” Yehowa kpe ɖe amewo ŋu wowɔ tɔtrɔ ɣemaɣi, eye wòkpe ɖe nye hã ŋunye. Ƒewo va yi hafi mete ŋu wɔ tɔtrɔwo le ʋiʋli geɖe me, gake mɔfiame si Ðasefoawo nam, kple lɔlɔ̃ si woɖe fiam la kpe ɖe ŋunye ŋutɔ.

VIÐE SIWO MEKPƆ: Fifia, mele agbe nyui nɔm. Meɖe srɔ̃, eye mía kple srɔ̃nye míele mía viŋutsuvia fiam ale si wòanɔ agbe ɖe Biblia me gɔmeɖosewo nu. Nye agbenɔnɔ tsãtɔ zu gbeaɖegbenya fifia, eye mɔnukpɔkpɔ kple viɖe geɖe su asi nye le nye mawusɔbɔsubɔ me. Menye hamemetsitsi, eye mete ŋu kpe ɖe ame bubuwo ŋu wova srɔ̃ nyateƒe si le Mawu ƒe Nyaa me. Danye kpɔ dzidzɔ ɖe tɔtrɔ siwo mewɔ la ŋu ale gbegbe be elɔ̃ be woasrɔ̃ Biblia kpli ye, eye fifia exɔ nyɔnyrɔ zu Ðasefo. Nɔvinyenyɔnu bubu, si nɔ agbe gbegblẽ tsã la, hã va zu Yehowa Ðasefo.

Ame siwo nya agbe si menɔ tsã la dometɔ aɖewo hã kpɔe dze sii be menye ame ɖɔʋu fifia. Eye menya nu si gbɔ wòtso be mewɔ tɔtrɔ siawo. Medi kpekpeɖeŋu tso lãmesẽnyagbɔkpɔlawo gbɔ, gake aɖaŋu gbegblẽwo koe woɖo nam. Ke hã, Yehowa na kpekpeɖeŋu vavãtɔm. Togbɔ be mesusui be nyemedze o hã la, megbem o, ke boŋ elɔ̃m, eye wògbɔ dzi ɖi nam. Ale si Mawu gã sia, si ƒe nunya kple lɔlɔ̃ ƒo wo katã ta la, tsɔ ɖe le eme nam, eye wòdi be manɔ agbe nyui la, gbɔe wòtso be mewɔ tɔtrɔ siawo.

“Nye dzi medze eme o, eye metsi akogo.”—KAZUHIRO KUNIMOCHI

ƑE SI ME WODZII: 1951

DUKƆ SI ME WÒTSO: JAPAN

AME SI TƆGBI WÒNYE TSÃ: GASƆDODO ƑE HOƲLILA

AGBE SI MENƆ TSÃ: Melidzeƒedu ziɖoɖoe si nye Shizuoka Prefecture, le Japan, ye menɔ tsi. Mí ame enyi ye nɔ ƒomea me le aƒe sue aɖe me. Fofonye dzraa gasɔ, eye wòdzrana wo ɖo hã. Tso nye ɖevime ke la, ekplɔnam yia afi si gasɔdolawo nɔa ho ʋlim le heto esia me ƒã gasɔdodo ƒe dzodzro ɖe menye. Esi meganɔ titinasuku la, etsɔ moveviɖoɖo nɔ hehe namem vevie. Esi menɔ sekɛndrisuku la, meɖu dzi enuenu zi etɔ̃ le dukɔa ƒe ƒe sia ƒe hoʋiʋliwo me. Mɔnukpɔkpɔ su asinye be made yunivɛsiti, gake metso nya me be mayi suku si wofiaa gasɔdodo le boŋ. Esi mexɔ ƒe 19 la, gasɔdodo va zu nye dɔwɔɖui.

Ɣemaɣi la, nye taɖodzinue nye be mava zu Japan ƒe gasɔdola bibitɔ. Nye didie nye be mazu gatɔ ale be nye ƒomea nanɔ dedie ahaɖe dzi ɖi le agbe me. Medo vevie hehexɔxɔ ŋutɔ. Ɣesiaɣi si hehexɔxɔa te ɖeɖi ŋunye alo eƒe akpa aɖe le sesẽm nam la, megblɔnɛ na ɖokuinye enuenu be ɖe wodzim be manye gasɔdola, eye be ele be makpɔ dzidzedze godoo! Eye eva eme nenema hã. Nye kutrikukua va nɔ vi ɖem azɔ. Le nye ƒe gbãtɔ me la, meɖu dzi le gasɔdola yeyewo ƒe hoʋiʋli la me. Le ƒe evelia me la, meʋli ho kple ame siwo di be yewoava zu Japan ƒe gasɔdola bibitɔ. Mexɔ nɔƒe evelia zi ade sɔŋ le hoʋiʋli mawo me.

Esi megakpɔtɔ nɔ gasɔdola deŋgɔwo dome la, amewo tsɔ ŋkɔ nam be Tokai ƒe afɔti sesẽtɔwo. Tokai nye nuto aɖe le Japan. Hoʋiʋli ƒe gbɔgbɔ nɔ menye vevie. Amewo va nɔ vɔ̃yem, elabena medoa gasɔ adãtɔe. Nye fetu dzi ɖe edzi, eye metea ŋu ƒlea nu sia nu si dzrom. Meƒle aƒe aɖe si me xɔ si me ŋudɔwɔnu nyuitɔ, siwo wotsɔ dea kame le la, nɔ. Meƒle ʋu aɖe tso duta si ƒe home de sɔsɔ ge kple aƒe ƒe home. Be manɔ dedie le ganyawo gome la, mede nye ga adzɔhawo me eye meƒle xɔ kple anyigbawo hã.

Ke hã, nye dzi medze eme o, eye metsi akogo. Ɣemaɣi la, meɖe srɔ̃, eye viwo nɔ asinye gake nyemegbɔa dzi ɖi na wo o. Dzi kunam vevie ɖe srɔ̃nye kple vinyewo ŋu le nu maɖinuwo ta. Eya ta wova tsia dzodzodzoe henɔa ŋkunyeme kpɔm be adã gale mo nam hã.

Emegbe Yehowa Ðasefowo va nɔ nu srɔ̃m kple srɔ̃nye. Esia he tɔtrɔ geɖe vae. Egblɔ be yedi be yeade Ðasefowo ƒe kpekpewo, eya ta metso nya me be mí katã míayi abe ƒome ene. Megaɖoa ŋku fiẽ si me hamemetsitsi aɖe va aƒenye me hete Biblia sɔsrɔ̃ kplim la dzi. Nu siwo mesrɔ̃ gbe ma gbe la wɔ dɔ ɖe dzinye ŋutɔ.

ALE SI BIBLIA TRƆ NYE AGBENƆNƆ: Nyemaŋlɔ ale si Efesotɔwo 5:5 xexlẽ kpɔ ŋusẽ ɖe dzinyee la be akpɔ o. Afi ma gblɔ be: “Domenyinyi aɖeke meli na agbe gbegblẽ nɔla alo ame makɔmakɔ alo ŋuklẽla—si fia be ame nye trɔ̃subɔla—le Kristo la kple Mawu ƒe fiaɖuƒe la me o.” Mede dzesii be gasɔdodo ƒe duɖimekeke kple tsatsadadae zɔna, eye be hoʋiʋli sia dea ŋukeklẽ ƒe dzi ƒo. Nye dzitsinya va nɔ fu ɖem nam. Mekpɔe be ne medi be madze Yehowa Mawu ŋu la, ahiã be madzudzɔ hoʋiʋlia. Nyametsotso sia wɔwɔ menɔ bɔbɔe nam o.

Ƒe si me mekpɔ dzidzedze le gasɔdodo me wu la wu enu teti koe nye ema, eye meganɔ nudzedziname geɖe wu dim. Gake mede dzesii be Biblia sɔsrɔ̃ nana nye susu dzea akɔ anyi, eye nye dzi dzea eme, gake mele alea kura le hoʋiʋli ƒe gbɔgbɔ si wòle be maɖe afia hafi aɖu dzi la gome o! Togbɔ be zi etɔ̃ koe megaʋli ho tso esime mete Biblia sɔsrɔ̃ hã la, nye dzi gakpɔtɔ nɔ gasɔdodo ŋu. Eye nyemenya ale si mawɔ akpɔ nye ƒomea dzi ne medzudzɔ o. Metsi evedomesi, eye nye ƒometɔwo nɔ tsitre tsim ɖe ŋunye vevie le esi meva le ha dem kple Ðasefowo ta. Ete ɖe fofonye hã dzi vevie. Esi metɔtɔ ta la, nu va te ɖe dzinye vevie, eye dɔmebi ɖe fu nam.

Nu si kpe ɖe ŋunye le ɣeyiɣi sesẽ mawo mee nye be menɔ Biblia sɔsrɔ̃ dzi henɔ Yehowa Ðasefowo ƒe kpekpeawo ha dem. Vivivi la, xɔse sẽŋu va su asinye. Meɖe kuku na Yehowa be wòase nye gbedodoɖawo, eye wòakpe ɖe ŋunye makpɔe adze sii be ele wo sem. Nye nuteɖeamedzia dzi ɖe kpɔtɔ esi srɔ̃nye ka ɖe edzi nam be mehiã be yeanɔ aƒe gã me be dzi nadzɔ ye o. Vivivi la, mewɔ ŋgɔyiyiwo.

VIÐE SIWO MEKPƆ: Meva kpɔe dze sii be Yesu ƒe nya siwo le Mateo 6:33 la le eme vavã. Egblɔ be: “Miyi edzi mianɔ fiaɖuƒe la kple Mawu ƒe dzɔdzɔenyenye dim gbã, eye woatsɔ nu bubu siawo katã akpe ɖe eŋuti na mi.” ‘Nu bubuawo,’ alo agbemenuhiahiã vevi, siwo ŋu Yesu ƒo nu tsoe la, mehiã mí kpɔ o. Togbɔ be fetu si mexɔna fifia la nye esi mexɔna le gasɔdodo me la ƒe memama ɖeka le 30 me hã la, naneke mehiã mía kple nye ƒomea le ƒe 20 siwo va yi la me o.

Gawu la, ne mía kple haxɔsetɔwo míewɔ dɔ alo kpɔ gome le subɔsubɔwɔna aɖe me la, mekpɔa dzidzɔ kple dzidzeme aɖe si tɔgbi nyemekpɔ kpɔ o. Ðeko ŋkekeawo va le yiyim kabakaba. Nye ƒomegbenɔnɔ ganyo ɖe edzi ŋutɔ. Vinyeŋutsuvi etɔ̃awo kple wo srɔ̃wo va zu Yehowa subɔla wɔnuteƒewo.