Lɛta Si Tso Madagascar

Ðeko Wònɔ Abe Ha Vivi Aɖe Ene

MÍA kple srɔ̃nye míenɔ dzadzraɖo wɔm be míazɔ mɔ ayi Madagascar, si nye ƒukpo si dzi míawɔ dutanyanyuigbɔgblɔdɔ le. Míeklã míaƒe ƒometɔwo kple xɔlɔ̃wo zi mamlɛtɔ, míelé dzi ɖe ƒo heɖo ŋu ɖe Yehowa ŋu be akpe ɖe mía ŋu míakpɔ dzidzedze le afi si wòdɔ mí ɖo la.

Míaŋlɔ zi gbãtɔ si míede hame ƒe kpekpewo le teƒe yeye si woɖo mí ɖo la be gbeɖe o. Ðeko wòwɔ na mí abe ɖe nɔviŋutsu si nɔ Gbetakpɔxɔ Nusɔsrɔ̃a dzi kpɔm la nɔ ŋgɔ xɔm na hadziha aɖe ene. Esi wònye be míese gbea o ta la, ɖeko wòwɔ na mí abe ha vivi aɖe semee míenɔ ene. Míese le mía ɖokui me be adidi ŋutɔ hafi míaɖu tu na gbea.

Zi gbãtɔ si mese nya aɖe si wobia le kpekpea me gɔme la, womeyɔm hafi ŋuɖoɖoa ge le nunye o. Ame siwo te ɖe ŋunye la see. Nu bliboa ɖi kokoe nam ale gbegbe be ɖe metsyɔ asi nu. Togbɔ be edze ŋukpe dzi nam vie hã la, dzi dzɔm be mete ŋu se nya ɖeka aɖe ya teti gɔme!

Le esi teƒe be manye ame si aɖo kpɔɖeŋu na amewo be woasrɔ̃ le gbeƒãɖeɖedɔa me la, ɖe meva nɔ sesem le ɖokuinye me abe ame si wokplɔ ɖe asi boŋ ene. Nɔviŋutsu kple nɔvinyɔnu haxɔsetɔwo wɔ nu ɖe ŋunye lɔlɔ̃tɔe, wofiam ale si mazã dzeɖonya si gɔme amewo ase bɔbɔe, wofiam nya si magblɔ kple mawunyakpukpui siwo mazã.

Meɖo ŋku edzi be gbe ɖeka esi míenɔ gbeƒã ɖem la, ɖevi aɖe de asi ɣlidodo me nɔ gbɔgblɔm be “Vazaha! Vazaha!” Aleae Madagascartɔwo yɔa “amedzroe.” Míeɖe abla be ɖevi bubuwo nagasee ale be woawo hã nava nɔ ɣlia dom ɖe mía ta o. Enumake ŋutsuvi aɖe blu ɖe eta. Ŋutsuvia gblɔ be: “Menye amedzroe o, edoa mía degbea!” Madagascar nyɔnu si mía kplii míenɔ zɔzɔm lae ɖe nya si gblɔm wonɔ la gɔme nam, elabena ale si wonɔ nu ƒom kabakaba la wɔe be nyemese nya si gblɔm wonɔ la gɔme o. Ke hã, mese le ɖokuinye me be mele agbagba dzem. Mlɔeba meva le sesem le ɖokuinye me abe aƒee mele ene.

Ɣeaɖewoɣi ne mese le ɖokuinye me be metsi akogo la, etea ŋu dzɔna be ɖevi aɖe nava lé nye asi, eye ne mekpɔ eƒe ŋkume la, mekpɔnɛ be eɖo nukomo le ŋkunye kpɔm kple dzidzɔ togbɔ be nyemese gbea nyuie o hã. Yayra gã aɖee ɖevi siwo le hamea me la nye tso Yehowa gbɔ vavã. Hasina, si nye nyɔnuvi aɖe le haa me va nye nye nyagɔmeɖela. Ne ame aɖeke mele nya si gblɔm mele gɔme sem o la, eya tea ŋu sea egɔme. Eye zi geɖe ne mele agbagba dzem be maɖo dze kple xɔ̃nyewo le hamea me la, eva kpena ɖe ŋunye heɖea nya si tututu medi be magblɔ la me na wo.

Ɣeaɖeɣi la, eva hiã be woama hame si me mía kple nye aƒetɔ míenɔ la me ahaɖo hame yeye. Esia fia be ele be nɔvi aɖewo nana nɔvi bubuwo nasrɔ̃ nu kple ame siwo wosrɔ̃a Biblia kplii la, le esi wole hame yeyea ƒe anyigbamama me ta. Nɔvinyɔnu aɖe de dzi ƒo nam be mayi nusɔsrɔ̃a dzi kple ame si wònɔ Biblia srɔ̃m kplii. Menɔ vɔvɔ̃m be nyemate ŋui o, eya ta megblɔ nɛ be nyemesu te haɖe o, gake eƒoe ɖe nunye. Eka ɖe edzi nam be mate ŋu awɔe le Yehowa ƒe kpekpeɖeŋu me. Ekpɔ ŋkunyeme xɔlɔ̃tɔe, eye wòzã nyagbe siwo gɔme mate ŋu ase bɔbɔe la ƒo nu nam gblɔ bena eteƒe madidi o mate ŋu afia nu amewo abe ale si medi ene. Eƒe nyawo de dzi ƒo nam ŋutɔ.

Tso ekema dzi la, Biblia nusrɔ̃via le agbagba dzem. Gbe ɖeka esi menɔ gota la, mesee wòyɔ ŋkɔnye. Wo kple srɔ̃a wònɔ mɔ dzi yina woƒe srɔ̃ɖeɖea de ge agbalẽ me be wòanɔ se nu. Ŋutsua hã nɔ Biblia srɔ̃m, eye taɖodzinu geɖe le wo si siwo gbɔ wodi be yewoaɖo le mawusɔbɔsubɔ me, siwo dometɔ ɖekae nye be yewoana woanyrɔ yewo. Menya be Yehowa ŋutɔe hea amewo vaa eɖokui gbɔ ya, ke hã, esia na dzi dzɔm.

Míesrɔ̃ nu geɖe ŋutɔ le teƒe sia. Togbɔ be míesusua mía xɔlɔ̃wo kple ƒometɔ siwo míegblẽ ɖe aƒe hã la, ewɔna na mí abe ɖe míekplɔ wo dometɔ aɖewo ɖe asi vae ene. Míeƒoa nu tso wo ŋu na hamea me tɔwo zi geɖe, eya ta fifia wobiaa wo ta hebiaa wo ƒe fɔfɔme ta sena gɔ̃ hã. Míele mɔ kpɔm na ɣeyiɣi si me míaƒe ƒometɔ siwo le aƒe kple ame siwo va le na mí abe ƒometɔwo ene le Madagascar la ado go ahadze si wo nɔewo.

Amewo ƒe nuƒoƒo gale abe hadzidzi ene le to me nam ya, gake fifia ya mesea nyawo gɔme. Mele mɔ kpɔm na ɣeyiɣi si me nye hã mate ŋu akpe asi ɖe hadzidzia ŋu wòanya se, ke menye be manɔ nyawo gblɔm tatata abe kpẽ ƒe ɖiɖi ene o. Yesu gblɔ be: “Migatsi dzimaɖi gbeɖe le etsɔ si gbɔna la ŋu o, elabena etsɔ si gbɔna la kple ye ŋutɔ ƒe dzimaɖitsitsiwoe.” (Mateo 6:34) Eya ta ɖeko míanɔ edzi anɔ nyagbeawo srɔ̃m ɖekaɖeka. Eye mayi edzi anɔ nye towo, susu, kple dzi trɔm ɖe gbea ŋu, ale be mate ŋu awɔ dɔ aduadua kple haxɔsetɔ siwo le Madagascar afi sia siwo lɔ̃a mí hegbɔa dzi ɖi na mí la.

[Nɔnɔmetata si le axa 25]

Mía kple Hasina míele gbeƒã ɖem