“Mikplɔ Mawu Ƒe Alẽha Si Le Miaƒe Dzikpɔkpɔ Te La”
“Mikplɔ Mawu ƒe alẽha si le miaƒe dzikpɔkpɔ te la, menye le dzizizi ta o, ke boŋ kple lɔlɔ̃nu faa.”—1 PET. 5:2.
1. Nɔnɔme kawoe dze ŋgɔ Kristotɔwo esime Petro ŋlɔ eƒe agbalẽ gbãtɔa?
HAFI Nero nahe yometiti sesẽ ava Kristotɔ siwo nɔ Roma dzi la, apostolo Petro ŋlɔ eƒe agbalẽ gbãtɔ na wo ɣeyiɣi aɖe do ŋgɔ. Edi be yeado ŋusẽ yeƒe haxɔsetɔwo. Abosam nɔ “tsatsam” henɔ didim be yeavuvu Kristotɔwo ami. Hafi woate ŋu atsi tsitre ɖe eŋu sesĩe la, ehiã be ‘woanɔ mo xexi’ eye ‘woabɔbɔ wo ɖokui ɖe Mawu ƒe asi sesẽ la te.’ (1 Pet. 5:6, 8) Ehiã hã be woayi edzi awɔ ɖeka. Eya ta ne wòanye be woanɔ ‘wo nɔewo ɖum, eye woanɔ wo nɔewo mim la,’ esia agblẽ nu le wo ŋu vevie, elabena esia ate ŋu awɔe be ‘woatsrɔ̃ wo nɔewo.’—Gal. 5:15.
2, 3. Ame kae wòle be míanɔ kame tem kpli, eye nu kawo me dzro ge míala le nyati siawo me?
2 Egbea la, míele nɔnɔme ma tɔgbi me. Abosam le mɔnuwo dim be yeavuvu mí ami. (Nyaɖ. 12:12) ‘Xaxa gã, si tɔgbi meva kpɔ tso xexea ƒe gɔmedzedze va se ɖe fifia o’ la ava kpuie. (Mat. 24:21) Ale si ko wònɔ na ƒe alafa gbãtɔ me Kristotɔwo be woaganɔ dzre hem le nya maɖinyawo ŋu le wo nɔewo dome o la, nenema kee mele be míawo hã míanɔ dzre hem o. Be míate ŋu awɔ esia la, míehiãna na hamemetsitsi siwo dze ƒe kpekpeɖeŋu ɣeaɖewoɣi.
3 Mina míadzro nu siwo akpe ɖe hamemetsitsiwo ŋu woaɖe ŋudzedzekpɔkpɔ geɖe wu afia ɖe mɔnukpɔkpɔ si su wo si be woakplɔ ‘Mawu ƒe alẽha si le woƒe dzikpɔkpɔ te’ ŋu la me. (1 Pet. 5:2) Esia megbe la, míade ŋugble le mɔ nyuitɔ si dzi woato awɔ alẽkpɔkplɔdɔa la ŋu. Le nyati si akplɔ esia ɖo me la, míadzro ale si hamea me tɔwo ‘ade bubu ame siwo le dɔ wɔm sesĩe hele alẽha la dzi kpɔm ŋui’ la me. (1 Tes. 5:12) Nya siawo me dzodzro akpe ɖe mía ŋu míatsi tsitre sesĩe ɖe míaƒe Futɔ gãtɔ la ŋu, esi míenyae be mía kplii ye le kame tem ta.—Ef. 6:12.
Mikplɔ Mawu Ƒe Alẽha La
4, 5. Aleke wòle be hamemetsitsiwo nabu alẽha lae? Wɔ eƒe kpɔɖeŋu.
4 Petro de dzi ƒo na hamemetsitsi siwo nɔ ƒe alafa gbãtɔ me Kristotɔwo dome la be woabu alẽha si wotsɔ de wo si la abe ale si Mawu bunɛ ene. (Mixlẽ 1 Petro 5:1, 2.) Togbɔ be wobua Petro be enye sɔti aɖe le hamea me hã la, meɖe gbe na hamemetsitsiawo abe ɖe wònye woƒe amegã ene o. Ke boŋ exlɔ̃ nu wo abe hati hamemetsitsiwo ene. (Gal. 2:9) Abe ale si Petro wɔ nu ene la, Dziɖuha la xlɔ̃a nu hamemetsitsiwo egbea be woaku kutri vevie atsɔ agbanɔamedzi kpekpe si nye be woakplɔ Mawu ƒe alẽawo.
5 Apostoloa ŋlɔ bena, ele na hamemetsitsiwo be ‘woakplɔ Mawu ƒe alẽha si le woƒe dzikpɔkpɔ te la.’ Ele vevie ŋutɔ be wòanɔ nyanya na wo be, Yehowa kple Yesu Kristo tɔe alẽawo nye. Ele na hamemetsitsiwo be woabu akɔnta le ale si wokpɔ Mawu ƒe alẽawo dzi la ŋu. Tsɔe be xɔ̃wò vevi aɖe zɔ mɔ eye wògblẽ viawo ɖe asiwò me be nàkpɔ wo dzi na ye. Ðe màkpɔ wo dzi nyuie ahana nuɖuɖu wo oa? Ne wo dometɔ aɖe dze dɔ la, ɖe màkplɔe ayi kɔdzi ahakpɔ egbɔ be wowɔ atike nɛ nyuie oa? Nenema kee wòle na hamemetsitsi siwo le hamea me la be ‘woakplɔ Mawu ƒe hame, si wòtsɔ ye ŋutɔ Via ƒe ʋu ƒle la.’ (Dɔw. 20:28) Enɔa susu me na wo be Kristo Yesu ƒe ʋu xɔasi lae wotsɔ ƒle alẽawo dometɔ ɖe sia ɖe. Esi hamemetsitsiawo le akɔnta bu ge na Mawu ta la, wonyia alẽawo, wokpɔa wo ta, heléa be na wo.
6. Agbanɔamedzi kae kpɔ blema alẽkplɔlawo ŋkume?
6 Bu agbanɔamedzi si kpɔa alẽkplɔla ŋutɔŋutɔwo ŋkume le blemaɣeyiɣiwo me ŋu kpɔ. Enɔ na wo be woakpɔ alẽawo dzi zã kple keli, le ŋdɔ kple vuvɔ siaa me. (1 Mose 31:40) Wotsɔa woƒe agbe dea afɔku me gɔ̃ hã ɖe alẽawo ta. David, alẽkplɔvi la, ɖe eƒe alẽawo tso lã wɔadãwo, abe dzata kple sisiblisi ene, si me. David gblɔ be, ne dzata lé wo dometɔ aɖe la, ‘yeléa dzataa ƒe ge, eye yeƒonɛ wuna.’ (1 Sam. 17:34, 35) Kalẽwɔwɔ ka gbegbee nye esi! Aleke wòle bɔbɔe be dzataa naɖu eƒe asiwoe nye esi! Ke hã ewɔa eƒe ŋutete ɖe sia ɖe ɖea alẽa le eƒe nu me.
7. Alekee hamemetsitsiwo ate ŋu aɖe alẽawo le Satana ƒe nu me le kpɔɖeŋunyagbɔgblɔ nu?
7 Egbea la, ehiã be hamemetsitsiwo nanɔ ŋudzɔ ɖe Abosam ƒe amedzidzedze abe dzata ene ŋu. Esia ate ŋu abia be woawɔ nu kalẽtɔe aɖe alẽawo le Abosam ƒe nu me, le kpɔɖeŋunyagbɔgblɔ nu. Ne hamemetsitsiwo wɔ nu alea la, woate ŋu axɔ na alẽawo. Woate ŋu ade ŋugble kple nɔvi siwo mele ŋudzɔ o, siwo ate ŋu age ɖe Satana ƒe mɔ̃wo me bɔbɔe la. (Mixlẽ Yuda 22, 23.) Ke hã hamemetsitsiwo mewɔa esia Yehowa ƒe kpekpeɖeŋu manɔmee o. Wowɔa nu ɖe alẽ si dze afɔku la ŋu veveseɖeamenutɔe, woblaa abia nɛ hewɔa Mawu ƒe Nya, si le abe dɔmi si naa vevesese nu fana ene, la ŋu dɔ tsɔ kpena ɖe eŋu.
8. Afi kae hamemetsitsiwo fiaa mɔ alẽawo yina, eye alekee wowɔa esiae?
8 Alẽkplɔla ŋutɔŋutɔ kplɔa alẽawo yia gbeɖuƒe damawo kple tɔwo to. Nenema kee hamemetsitsiwo fiaa mɔ alẽawo yia hamea me, wodea dzi ƒo na wo be woanɔ kpekpeawo dem edziedzi ale be woate ŋu akpɔ nu nyui aɖu eye “woana nuɖuɖu wo le ɣeyiɣi nyuitɔ dzi.” (Mat. 24:45) Ðewohĩ ahiã be hamemetsitsiwo nazã ɣeyiɣi geɖe atsɔ ana kpekpeɖeŋu nɔvi siwo dze dɔ le gbɔgbɔ me la ahade dzi ƒo na wo be woalɔ̃ axɔ gbɔgbɔmenuɖuɖu si tsoa Mawu ƒe Nya la me. Alẽ si tra la anɔ agbagba dzem be yeatrɔ ava alẽhaa me. Le esi hamemetsitsiwo nanɔ nu wɔm atsɔ anɔ dzi ɖem le wo nɔvia ƒo teƒe la, ɖe woɖea Ŋɔŋlɔawo me gɔmeɖosewo me nɛ lɔlɔ̃tɔe hefiaa ale si wòate ŋu awɔ wo ŋu dɔ le eƒe agbenɔnɔ me lae boŋ.
9, 10. Aleke wòle na hamemetsitsiwo be woawɔ nu ɖe alẽ siwo dze dɔ le gbɔgbɔ me la ŋu?
9 Ne èdze dɔ la, ɖɔkta ka ƒomevie nàdi be wòakpɔ ye gbɔ? Àdi be ɖɔkta aɖe si aɖo to wò sẽe ko eye wòaŋlɔ atike siwo nàƒle la na wò kabakaba ale be yeate ŋu akpɔ dɔnɔ bubu gbɔ la nakpɔ ye gbɔa? Alo àdi boŋ be ɖɔkta aɖe si aɖo to wò dzigbɔɖitɔe va se ɖe esime nègblɔ nu siwo le fum ɖem na wò la vɔ, eye wòaɖe nu si gbɔ wò kuxia anya tso la me na wò ahaɖe dɔdamɔnu siwo woate ŋu azã la me na wò la nakpɔ gbɔwòa?
10 Nenema kee hamemetsitsiwo hã ate ŋu aɖo to ame si xɔ abi le gbɔgbɔ me la nyuie eye woakpe ɖe eŋu eƒe lãme nasẽ; to esia wɔwɔ me la, “[woasi] ami nɛ le Yehowa ƒe ŋkɔ me,” le kpɔɖeŋunyagbɔgblɔ nu. (Mixlẽ Yakobo 5:14, 15.) Abe atike si tso Gilead ene la, Mawu ƒe Nya la ate ŋu ana ame si le dɔ lém la ƒe vevesesewo nu nafa. (Yer. 8:22; Eze. 34:16) Biblia ƒe gɔmeɖosewo dzi wɔwɔ ate ŋu akpe ɖe ame si gbɔdzɔ la ŋu wòagali ke le gbɔgbɔ me ake. Ɛ̃, ne hamemetsitsiwo nya ɖo to se alẽ si ƒe lãme gblẽ la ƒe kuxiwo eye wodo gbe ɖa kplii ko la, eɖea vi geɖe.
Menye Le Dzizizi Ta O, Ke Boŋ Kple Lɔlɔ̃nu Faa
11. Nu kae ʋãa hamemetsitsiwo wokplɔa Mawu ƒe alẽha la kple lɔlɔ̃nu faa?
11 Eyome la, Petro ɖo ŋku ale si wòle be woawɔ alẽkpɔkplɔdɔa kple ale si mele be woawɔe o la dzi na hamemetsitsiawo. Ele na hamemetsitsiwo be woakplɔ Mawu ƒe alẽhaa, “menye le dzizizi ta o, ke boŋ kple lɔlɔ̃nu faa.” Nu kae ʋãa hamemetsitsiwo wolɔ̃na faa subɔa wo nɔviwo? Enyo, nu kae ʋã Petro wòkplɔ Yesu ƒe alẽawo henyi wo? Nu vevi aɖee nye lɔlɔ̃ si le esi na Aƒetɔ la kple ale si melɔ̃a nu le egbɔ o. (Yoh. 21:15-17) Le lɔlɔ̃ ta, hamemetsitsiwo ‘meganɔa agbe na wo ɖokuiwo azɔ o, ke na ame si ku ɖe wo ta la boŋ.’ (2 Kor. 5:14, 15) Lɔlɔ̃ na Aƒetɔ la kpakple lɔlɔ̃ si le hamemetsitsiwo si na Mawu kple wo nɔviwo la ƒonɛ ɖe wo nu wozãa woƒe ŋutetewo, nunɔamesiwo, kpakple ɣeyiɣi tsɔ subɔa alẽha la. (Mat. 22:37-39) Wotsɔa wo ɖokuiwo nana faa, ke menye le dzizizi ta o.
12. Aleke gbegbee apostolo Paulo tsɔ eɖokui na ɖe alẽawo ta?
12 Aleke gbegbee wòle na hamemetsitsiwo be woatsɔ wo ɖokuiwo ana ɖe alẽawo ta? Wosrɔ̃a apostolo Paulo le beléle na alẽawo me, abe ale si eya hã srɔ̃ Yesu ene. (1 Kor. 11:1) Esi Paulo kple eƒe zɔhɛawo melɔ̃a nu le Tesalonika nɔviawo gbɔ o ta la, edzɔ dzi na wo ŋutɔ be ‘menye Mawu ƒe nya nyui la ɖeɖe koe woatsɔ ana wo o, ke woawo ŋutɔwo ƒe luʋɔwo hã.’ Le esia wɔwɔ me la, wova fa tu “abe ale si vidada si le no nam ye ŋutɔ viawo la léa be na wo nyuie ene.” (1 Tes. 2:7, 8) Paulo se ale si vidada si le no nam vi sena le eɖokui me ɖe via ŋu la gɔme. Ewɔa nu sia nu nɛ, ne abia be wòafɔ le zã dome ana noe gɔ̃ hã.
13. Nu kawo mee wòle na hamemetsitsiwo be woada asɔ le?
13 Ehiã be hamemetsitsiwo nakpɔ egbɔ be yewoda sɔ le alẽha la dzi kpɔkpɔ kple woawo ŋutɔwo ƒe ƒomegbanɔamedziwo tsɔtsɔ me. (1 Tim. 5:8) Ɣeyiɣi si hamemetsitsiwo zãna ɖe hamea ŋu la nye ɣeyiɣi xɔasi si woate ŋu azã ɖe woƒe ƒomea ŋu hafi. Mɔ ɖeka aɖe si dzi woate ŋu ato ada asɔ le agbanɔamedzi eve siawo tsɔtsɔ mee nye be woakpe nɔviawo woava wɔ ɖeka kpli wo le woƒe Ƒometadedeagu ƒe fiẽsia me ɣeaɖewoɣi. Ƒe geɖewoe nye esia la, Masanao si nye hamemetsitsi le Japan la kpea trewo kple nɔvi siwo dzilawo mele nyateƒea me o la wova wɔa ɖeka kple eƒe ƒomea le eƒe ƒomenusɔsrɔ̃ me. Ɣeyiɣi aɖe megbe la, ame siwo ŋu wòkpe ɖo la dometɔ aɖewo ŋutɔ hã va zu hamemetsitsiwo eye wosrɔ̃ Masanao ƒe kpɔɖeŋu nyuia.
Miƒo Asa Na Viɖe Ƒoɖi Didi—Mikplɔ Alẽha La Kple Didi Vevie
14, 15. Nu ka tae wòle na hamemetsitsiwo be woaƒo asa na “viɖe ƒoɖi didi,” eye aleke woate ŋu asrɔ̃ Paulo ƒe kpɔɖeŋu le go sia me?
14 Petro gade dzi ƒo na hamemetsitsiwo hã be woakplɔ alẽha la, ‘menye le viɖe ƒoɖi didi ta . . . o, ke boŋ kple didi vevie.’ Dɔ si hamemetsitsiwo wɔna la xɔa ɣeyiɣi geɖe ŋutɔ le wo si, ke hã womekpɔa mɔ be woaxe fe na yewo ɖe eta o. Petro kpɔe be ehiã be yeaxlɔ̃ nu ye hati hamemetsitsiwo tso afɔku si alẽhaa kpɔkplɔ le “viɖe ƒoɖi didi” ta nye la ŋu. Nyateƒe si wònye be afɔku ma li ŋutɔŋutɔ la dze le agbe kɔkɔ si “Babilon Gã” la ƒe subɔsubɔhakplɔlawo nɔna, si wɔnɛ be woƒe hameviwo dometɔ geɖe ɖi hiã la me. (Nyaɖ. 18:2, 3) Egbea la, susu geɖewo li siwo tae wòle be hamemetsitsiwo nanɔ ŋudzɔ ɖe dzodzro ɖe sia ɖe si ate ŋu ana woawɔ nu nenema la ŋu.
15 Paulo ɖo kpɔɖeŋu nyui aɖe ɖi na Kristotɔ hamemetsitsiwo. Togbɔ be apostoloe wònye eye wòate ŋu azu “agba gã” aɖe na Kristotɔ siwo nɔ Tesalonika hafi hã la, ‘meɖu nu le ame aɖeke gbɔ dzodzro o.’ Ke boŋ ‘eku kutri wɔ dɔ zã kple keli.’ (2 Tes. 3:8) Hamemetsitsi siwo li egbea, kple esiwo nye dzikpɔla mɔzɔlawo siaa, ɖoa kpɔɖeŋu nyui le go sia me. Togbɔ be edzɔa dzi na wo ne woƒe haxɔsetɔwo wɔ amedzro na wo hã la, wometsɔa “agba gã” aɖeke dana ɖe ame aɖeke dzi o.—1 Tes. 2:9.
16. Nu kae wòfia be woakplɔ alẽha la kple ‘didi vevie’?
16 Hamemetsitsiwo kplɔa alẽha la kple ‘didi vevie.’ Didi vevie si le wo me la dzena le ɖokuitsɔtsɔsavɔ ƒe nɔnɔme si woɖena fiana le kpekpeɖeŋunana alẽhaa me la me. Ke hã esia mefia be wozia alẽhaa dzi be woasubɔ Yehowa o; eye nenema kee hamemetsitsi lɔ̃amewo medea dzi ƒo na nɔviawo be woatsɔ hoʋiʋli ƒe gbɔgbɔ anɔ Mawu subɔm o. (Gal. 5:26) Hamemetsitsiwo nyae be alẽ ɖe sia ɖe to vovo na nɔvia. Eya ta wodina vevie be yewoakpe ɖe yewo nɔviwo ŋu woasubɔ Yehowa kple dzidzɔ.
Woagaɖu Aƒetɔ Ðe Alẽhaa Dzi O, Ke Boŋ Woanye Kpɔɖeŋuwo
17, 18. (a) Nu ka tae wòsesẽ na apostoloawo ɣeaɖewoɣi be woawɔ ɖe nu si Yesu fia wo tso ɖokuibɔbɔ ŋu la dzi? (b) Nɔnɔme si ɖi esia ka me míate ŋu akpɔ mía ɖokui le?
17 Abe ale si míegblɔe va yi ene la, ele be wòanɔ susu na hamemetsitsiwo be Mawu tɔe alẽha si kplɔm wole la nye, ke menye yewo tɔe o. Wokpɔa wo ɖokuiwo dzi be ‘yewoagaɖu aƒetɔ ɖe ame siwo nye Mawu ƒe domenyinu la dzi’ o. (Mixlẽ 1 Petro 5:3.) Ɣeaɖewoɣi la, nukpɔsusu gbegblẽe nɔ Yesu ƒe apostolowo si esime wonɔ mɔnukpɔkpɔ bubuwo minyam. Abe dukɔwo ƒe dziɖulawo ene la, wodi be yewoanɔ nɔƒe kɔkɔ.—Mixlẽ Marko 10:42-45.
18 Egbea la, anyo be nɔviŋutsu siwo le “dzikpɔladɔ minyam la” nadzro wo ɖokui me nyuie akpɔe ɖa be nu kae ʋã yewo yewole dɔa minyam hã. (1 Tim. 3:1) Anyo be ame siwo nye hamemetsitsiwo fifia la nadzro wo ɖokuiwo me anukwaretɔe akpɔe ɖa be, ɖe amegãɖuɖu alo nɔƒe gã didi ƒe didi le wo me abe ale si wònɔ le apostolo aɖewo gome ene hã. Ne kuxia sia ɖe fu na apostoloawo la, efia be ele be hamemetsitsiwo nakpɔe be ele be yewoaku kutri vevie aƒo asa na ale si xexea me tɔwo dina vevie be yewoaɖu aƒetɔ ɖe ame bubuwo dzi la ƒe nɔnɔme ɖe sia ɖe.
19. Nu kae wòle be wòanɔ susu me na hamemetsitsiwo ne wodi be yewoaɖe afɔ aɖe akpɔ alẽhaa ta?
19 Togbɔ be ele alea hã la, ahiã be hamemetsitsiwo natɔ afɔ to sesĩe ɣeaɖewoɣi; le kpɔɖeŋu me, ne wole alẽha la ta kpɔm tso “amegãxi nyanyrawo” si me. (Dɔw. 20:28-30) Paulo gblɔ na Tito be wòayi edzi anɔ “nu xlɔ̃m ahanɔ nya gbem le [ŋusẽ blibo si wonɛ] la nu.” (Tito 2:15) Ke hã ne ehiã be woaɖe afɔ sia tɔgbi hã la, hamemetsitsiwo dzea agbagba dea bubu ame siwo nya la lɔ ɖe eme ŋu. Wonyae be, zi geɖe la, kpekpe ɖe ame ŋu aɖaŋutɔe be wòatrɔ eƒe susu wɔa dɔ ɖe ame ƒe dzi dzi geɖe wu eye wòʋãa amea be wòawɔ nu si le eteƒe, tsɔ wu be woahe nya ɖe eŋu ameŋumabumabutɔe.
20. Alekee hamemetsitsiwo ate ŋu asrɔ̃ Yesu le kpɔɖeŋu nyui ɖoɖo me?
20 Kpɔɖeŋu nyui si Kristo ɖo ɖi la ʋãa hamemetsitsiwo be woalɔ̃ alẽha la. (Yoh. 13:12-15) Ne míexlẽ ale si wòfia nu eƒe nusrɔ̃lawo le gbeƒãɖeɖe kple nusrɔ̃lawɔwɔ dɔa me la, edoa dzidzɔ na mí ŋutɔ. Ðokuibɔbɔ ƒe kpɔɖeŋu si wòɖo ɖi la wɔ dɔ ɖe eƒe nusrɔ̃lawo ƒe dzi dzi heʋã wo wowɔ nu le mɔ si ɖenɛ fiana be ‘wotsɔa ɖokuibɔbɔ bua ame bubuwo be wonye gã wu yewo’ la nu. (Flp. 2:3) Nenema kee esia ʋãa hamemetsitsiwo egbea hã be woasrɔ̃ Yesu ƒe kpɔɖeŋua, eye woawo hã dina be yewoanye “kpɔɖeŋu na alẽha la.”
21. Teƒeɖoɖo kae hamemetsitsiwo ate ŋu anɔ mɔ kpɔm na?
21 Petro tsɔ ŋugbedodo aɖe si ava eme na hamemetsitsiwo le etsɔme la ƒo nuxlɔ̃amenya si wògblɔ na wo la ta. (Mixlẽ 1 Petro 5:4.) Dzikpɔla siwo nye amesiaminawo la axɔ “ŋutikɔkɔe ƒe fiakuku magblẽmagblẽ la” ne wowɔ ɖeka kple Kristo le dziƒo. Mɔnukpɔkpɔ asu alẽkplɔla siwo nye ‘alẽ bubuawo’ me tɔwo la si woakplɔ Mawu ƒe alẽha la le anyigba dzi le “alẽkplɔla gã la” ƒe dziɖuɖu te. (Yoh. 10:16) Nyati si kplɔe ɖo la adzro mɔ siwo dzi hamea me tɔwo ate ŋu ato akpe asi ɖe ame siwo woɖo be woaxɔ ŋgɔ ŋu la me.
Numetoto
• Nu ka tae wòsɔ be Petro xlɔ̃ nu ehati hamemetsitsiwo be woakplɔ Mawu ƒe alẽha si le woƒe dzikpɔkpɔ te la?
• Aleke wòle be hamemetsitsiwo nawɔ nu ɖe ame siwo dze dɔ le gbɔgbɔ me la ŋu?
• Nu kae ʋãa hamemetsitsiwo wokplɔa Mawu ƒe alẽha la?
[Nɔnɔmetata si le axa 21]
Abe alẽkplɔla siwo nɔ anyi le blema ene la, ele na hamemetsitsi siwo li egbea be woalé be na “alẽ” siwo le woƒe dzikpɔkpɔ te