Anyigba Nyui La Ƒe “Agblemenu Adreawo”

WOÐƆ Israel le Biblia me be enye anyigba si dzi togbɛwo, baliwo, ƒutanutowo kple kponyigbawo, kpakple tɔsisiwo kple tsidzidziwo le. Le ale si anyigba kple yame ƒe nɔnɔmewo le vovovo, dzogbewo le anyiehekpa dzi, eye to siwo dzi sno le la le dziehekpa dzi ta la, anyigba la nyoa nuku vovovo geɖe ŋutɔ. Esi Mose nɔ nu ƒom tso ale si gbegbe “anyigba nyui” si dzi Israel viwo le mɔ kpɔm be yewoayi la nyoe ŋu la, eyɔ anyigba ma dzi agblemenu adre tẽe esi wògblɔ be enye “anyigba, si dzi lu kple [ƒo], wainkawo, gbotiwo kple yevuboɖatiwo le, anyigba, si dzi amitiwo kple anyitsi le.”—5 Mose 8:7, 8.

Egbea gɔ̃ hã la, amewo zãa nya “agblemenu adreawo” tsɔ ɖɔa nuku siwo anyigba ma wɔna. Le ɣeyiɣi vovovowo me la, agblemenu siawo ƒe tata dze le gakuwo kple lɛtakotokudzigbalẽviwo dzi wònye ale si anyigbaa wɔa nui la ƒe dzesi. Aleke wodea nu siawo ƒe agble le Biblia ƒe ɣeyiɣiwo me? Aleke amewo wɔa wo ŋu dɔe? Na míakpɔe ɖa.

“Lu Kple Ƒo” Togbɔ be kele mee woƒãa nuku siawo hã la, ƒo la ƒuna ɣleti ɖeka doa ŋgɔ na lua. Ne wole Abolo Maʋãmaʋã Ƒe Ŋkekenyuia ɖum le March alo April me la, woɖea ƒobabla ɖeka tsoa kutsetse gbãtɔawo dome yia gbedoxɔa me ɖatsɔ saa vɔe na Yehowa. Ke ne wole Kwasiɖawo ƒe Ŋkekenyui, alo Pentekoste ŋkekenyuia ɖum le May me la, wotsɔa lubolo saa vɔe.—3 Mose 23:10, 11, 15-17.

Le ƒe alafa geɖe siwo va yi me va se ɖe nyitsɔ laa la, asi koe Israel ƒe agbledelawo tsɔ ƒãa nukuwoe. Wolɔa nukuawo ɖe woƒe awu me hewunɛ ɖe agblea dzi. Le ƒo gome la, ɖeko wowunɛ ɖi. Ke ele be woaxe ke ɖe luawo ya dzi. Eya ta wonana dɔwɔlãwo ɖoa afɔ wo dzi alo wogadzoboa anyigba.

Woƒoa nu tso nukuwo ƒaƒã, wo ŋeŋe, wo ƒoƒo, wo gbɔgbɔ, kple wɔtutu ŋu zi geɖe le Biblia me. Dɔ siawo dometɔ aɖeke menye dɔ vi o. Gbe sia gbe le aƒewo me la, wotsɔa nuku siwo woŋe la ƒe ɖe tua wɔe hetsɔnɛ mèa abolo na ƒomea. Esia gana míese nu si tae Yesu fia eyomedzelawo be woado gbe ɖa abia “gbe sia gbe bolo” ɖo la gɔme ɖe edzi. (Mateo 6:11, King James Version) Le Biblia ƒe ɣeyiɣiwo me la, abolo si womè kple luwɔ alo ƒowɔ la nyea gbe sia gbe nuɖuɖu.—Yesaya 55:10.

“Wainkawo, Gbotiwo Kple Yevuboɖatiwo” Esi Mose kplɔ eƒe amewo le gbeadzi ƒe 40 megbe la, eƒo nu tso nu nyui aɖe si woakpɔ mɔ na le Ŋugbedodonyigbaa dzi la ŋu na wo, si nye be woaɖu edzi kutsetsewo. Ƒe 40 do ŋgɔ la, nu kae ŋkutsala ewoawo tsɔ gbɔe tso Ŋugbedodonyigbaa dzi va fia Israel vi siwo ƒu asaɖa anyi le gbeadzi la wònye ale si anyigba ma wɔa nui ŋuti kpeɖodzi? “Waintsetse kpo ɖeka” nɔ kpekpem ale gbegbe be “ame eve ƒo ati ɖe eme” hafi te ŋu tsɔe. Wotsɔ gbowo kple yevuboɖawo hã ɖe asi vae. Aleke gbegbee esia ana nu siawo ɖuɖu nadzro dzogbedzinɔla siawoe enye esi! Nu nyui siwo le ŋgɔ la ƒe kpɔkplɔyiɖeme koe esia nye!—4 Mose 13:20, 23.

Ehiã be woanɔ be lém na wainkawo edziedzi hafi woate ŋu atse nyuie. Esia bia be woanɔ eŋu ɖem, anɔ tsi demee ahanɔ kutsetsewo gbem le edzi. Nu siwo ɖea dzesi le wainbɔ si le togbɛwo dzi si wolé be na nyuie ŋu dometɔ aɖewoe nye be wotɔa kpɔ ƒoa xlãe, wokpaa togbɛa ŋu ɖe agbaka nu, eye dzɔlawo ƒe xɔ nɔa agbo nu. Israel viwo va nya mo na dɔ sesẽ siwo katã waingbledede lɔ ɖe eme, eye wonya nu si adzɔ ne womelé be nɛ o hã.—Yesaya 5:1-7.

Ne woxa waintsetsewo vɔ la, wainfiafiã kplɔnɛ ɖo. Wotugua waintsetsewo le zɔ gãwo me alo fiãa wo le wainfiãnu me. Woɖaa waintsetsemetsia heɖea sukli tso eme alo wodanɛ ɖi wòʋãna hezua wain. Israel nyigba la kple yame ƒe nɔnɔme siaa sɔ nyuie na waingbledede kple wainfiafiã.a

Le ame siwo le adzɔge tso anyigba siwo dzi gbowo wɔna le gbɔ gome la, gbotsetse si wosia wòƒu heƒo gbabɛ la koe woanya kpɔ kpɔ. Gbo si wogbe le ati dzi teti la adze nu si to vovo kura, elabena tsi nɔa eme, eye wòvivina ŋanaŋana. Nuŋeɣia nɔa anyi ɣeyiɣi kpui aɖe ko, eya ta be gbo naganɔ anyi woanɔ ɖuɖum la, wosianɛ wòƒuna hedzranɛ ɖo. Woƒo nu tso “gbotsetsebolo” ŋu zi geɖe le Biblia me.—1 Samuel 25:18.

Ne èɖe tsro le yevuboɖa si ɖi ŋu la, àkpɔ kutsetse suesuesue alafa geɖe le eme si woate ŋu aɖu enumake alo afiã tsia le eme. Evivina, enyo na ŋutilãa, eye amenyinu le eme. Wodea asixɔxɔ yevuboɖa ŋu. Le kpɔɖeŋu me, wolɔ̃a yevuboɖawo ɖe nunɔlagã la ƒe awuawo dometɔ ɖeka toga, eye wowɔ eƒe nɔnɔme tsɔ ɖo atsyɔ̃ na Salomo ƒe gbedoxɔa ƒe sɔtiwo.—2 Mose 39:24; 1 Fiawo 7:20.

“Amitiwo Kple Anyitsi” Amititsetse nye nuɖuɖu vevi aɖe si me wokpɔa ami tsonɛ, eye woƒo nu tso eŋu zi 60 kloe le Biblia me. Amitivewo gale Israel ƒe teƒe geɖe egbea gɔ̃ hã. (5 Mose 28:40) Va de asi na egbea le nuto geɖe me la, ƒome bliboa kpea asi ɖe dɔ ŋu ne amitiwo xaɣi ɖo le October me. Nuŋelawo ƒoa atia ƒe alɔwo be amititsetseawo nadudu, eyome wofɔnɛ. Wotrɔa asi le eŋu be wòagagblẽ o ale be ƒomea nanɔ ezãm le ƒea me, alo wotsɔnɛ yia afi si woɖaa ami le. Blematomenukulawo ke ɖe blema amiɖaƒe ƒomevi vovovo alafa geɖe ŋu gɔ̃ hã. Egbea, dzidzɔnyae wònyena be ame nakpɔ ale si ami sia si ƒe amadede le abe gbemumu ene la wòanɔ tsatsram ɖe nugowo me bene ƒomea nazã le ƒea me alo adzra. Le blema la, menye nuɖuɖu koe wònye na wo o, ke wokɔnɛ ɖe akaɖiwo me, eye wònye ami sisi hã.

Anyitsi si ŋu Mose ƒo nu tsoe la ate ŋu anye esi anyiwo wɔ alo ayede kple waintsetse me tsi si woɖa. Egbea, ame geɖe gadea anyitsi si woɖe tso atikutsetse siawo me la nuɖuɖu me wòvivina. Ke hã, ɖikeke mele eme o be anyitsi si ŋu Biblia ƒo nu tsoe le Simson kple Yonatan ƒe ŋutinyaa me ya nye gbemenyitsi si woɖe tso anyixe tata me. (Ʋɔnudrɔ̃lawo 14:8, 9; 1 Samuel 14:27) Woke ɖe anyinyiƒe aɖe ŋu le Tel Rehov nyitsɔ laa si me anyixɔ 30 kple edzivɔ le le dziehe Israel. Esia ɖo kpe edzi be anyinyiƒewo nɔ anyi tso keke Salomo ƒe ŋkekea me ke.

Egbea, ame sia ame si ɖi tsa yi Israel ƒe asi aɖe, si me wotsɔ adzɔnu vovovowo ɖo asii le hekpe ɖe eƒe abolomeƒewo kpakple atikutsetse kple amagbe dzraƒewo ŋu la, akpɔ “agblemenu adreawo” ƒe gbogbo aɖewo siwo ŋu wotrɔ asi le le mɔ vovovowo nu. Ke hã, nu adre siawo nye nuɖuɖu gbogbo siwo ƒe agble wodena le Israel la dometɔ ʋɛ aɖewo ko. Egbegbe agbledemɔnuwo wɔe be wotea ŋu dea nuɖuɖu siwo wɔna le anyigba bubuwo dzi la ƒe agble le afi ma. Ale si nuɖuɖu vovovowo wɔna le anyigba vi ma dzi la ɖo kpe edzi be enye ‘anyigba nyui’ vavã.—4 Mose 14:7.

[Etenuŋɔŋlɔ]

[Nɔnɔmetata si le axa 11]

Lu

[Nɔnɔmetata si le axa 11]

Ƒo

[Nɔnɔmetata si le axa 12]

Wainka

[Nɔnɔmetata si le axa 12, 13]

Gbowo

[Nɔnɔmetata si le axa 12]

Yevuboɖawo

[Nɔnɔmetata si le axa 13]

Anyitsi

[Nɔnɔmetata si le axa 13]

Amitiwo