‘Miƒu Du Le Mɔ Si Ana Miaxɔ Dziɖuɖufetu La Nu’

“Miƒu du le mɔ si ana miaxɔe la nu.”—1 KOR. 9:24.

1, 2. (a) Nu kae Paulo zã tsɔ de dzi ƒo na Hebri Kristotɔwo? (b) Nu kae woxlɔ̃ nu Mawu subɔlawo be woawɔ?

LE LƐTA si apostolo Paulo ŋlɔ na Hebritɔwo me la, ezã kpɔɖeŋunyagbɔgblɔ wɔdɔɖeamedziwo tsɔ de dzi ƒo na ehati Kristotɔwo. Eɖo ŋku edzi na wo be menye woawo ɖeɖe koe le agbedua ƒum o. “Ðasefowo ƒe alilikpo gã” aɖe, siwo hã ƒu dua wu enu dzidzedzetɔe la ƒo xlã wo. Ne Hebri Kristotɔawo na woƒe susu le duƒula bibi mawo ƒe xɔsedɔwo kple agbagbadzedzewo ŋu ɣesiaɣi la, aʋã wo be woayi agbedua ƒuƒu dzi, eye womatsi mɔ ta o.

² Le nyati si do ŋgɔ me la, míedzro ame siwo nye “ɖasefowo ƒe alilikpo” la dometɔ aɖewo ƒe agbemeŋutinya me. Eɖe dzesi le wo katã ƒe ŋutinya me be xɔse sesẽ maʋamaʋã si nɔ wo si ye kpe ɖe wo ŋu woyi edzi wɔ nuteƒe na Mawu, abe duƒula si le du ƒum kutrikukutɔe be yeawu duɖimekeke nu ene. Míate ŋu asrɔ̃ nu nyui aɖe tso wo gbɔ. Abe ale si míekpɔe le nyati ma me ene la, Paulo xlɔ̃ nu ehati subɔlawo, siwo dome míawo hã míele, ale: “Mina míaɖe nu kpekpe sia nu kpekpe kple nu vɔ̃ si doa kplamatsɛ mí bɔbɔe la hã ɖa, eye mina míatsɔ dzidodo anɔ duɖimekeke si woɖo na mí la dzi.”—Heb. 12:1.

 3. Aɖaŋu ka koŋ ɖom Paulo nɔ esi wòhe susu yi duƒula siwo kpɔa gome le Helatɔwo ƒe fefewo me dzi?

³ Numekugbalẽ aɖe gblɔ na mí tso duɖimekeke, si nye hadomenuwɔna siwo de du ɣemaɣi la dometɔ ɖeka, ŋu be, “Helatɔwo nɔa amama dea kame heʋlia ho.”a (Backgrounds of Early Christianity) Ɣemaɣiwo la, duɖimekelawo ɖea nu kpekpe kple agba ɖe sia ɖe si ate ŋu ado kplamatsɛ wo be woagaƒu dua sesĩe o la ɖi. Togbɔ be míawo ya míawɔ ŋukpenanu abe woamawo ene o hã la, taɖodzinu ɖeka pɛ si ta wowɔa nu nenemae nye be yewoaxɔ dziɖuɖufetu la. Eya ta nu si Paulo wɔnɛ ye nye be, hafi agbedua ƒulawo ƒe asi nasu fetua dzi la, ele vevie be woaɖe mɔxenu ɖe sia ɖe ƒomevi ɖa. Aɖaŋu nyui aɖee nye esia Paulo ɖo na Kristotɔwo ɣemaɣi, eye eyi na míawo hã egbea. Nu kpekpe alo agba kawoe ate ŋu axe mɔ na mí be míagaƒu agbedua awu enu ahaxɔ fetua o?

‘Miɖe Nu Kpekpe Sia Nu Kpekpe Ða’

 4. Nu kawo ŋue Noa ƒe ŋkekea me tɔwo tsi dzi ɖo?

⁴ Aɖaŋu si Paulo ɖoe nye be “míaɖe nu kpekpe sia nu kpekpe” ɖa. Esia lɔ nu ɖe sia ɖe si ate ŋu axe mɔ na mí be míatsɔ míaƒe susu blibo aɖo duɖime si kem míele la dzi ahawɔ míaƒe ŋutete katã o la ɖe eme. Nu kawoe nu kpekpe siawo ate ŋu anye? Ne míelé ŋku ɖe Noa—si nye ame siwo Paulo yɔ la dometɔ ɖeka—ŋu la, míeɖoa ŋku Yesu ƒe nya sia dzi be: “Abe ale si wòdzɔ le Noa ƒe ŋkekeawo me ene la, nenema kee wòanɔ le Amegbetɔvi la ƒe ŋkekeawo hã me.” (Luka 17:26) Menye tsɔtsrɔ̃ si tɔgbi meva kpɔ o, si le ŋgɔ gbɔna la koŋ ŋue Yesu nɔ nu ƒom tso o, ke boŋ ale si amewo anɔ agbe la ŋu nya gblɔm wònɔ. (Mixlẽ Mateo 24:37-39.) Ame siwo nɔ Noa ƒe ɣeyiɣia me ƒe akpa gãtɔ metsɔ ɖeke le Mawu ƒe nya me kaka ahayi agbagba dze ge be yewoawɔ nu siwo adze eŋu la o. Nu kae nɔ woƒe susu hem? Menye nu wɔnuku aɖekee o. Nuɖuɖu, nunono, kple srɔ̃ɖeɖe—ɛ̃, wonye nu siwo míewɔna le dzɔdzɔme nu. Abe ale si Yesu gblɔe ene la, kuxia koŋ ye nye be “wometsɔ ɖeke le eme o.”

 5. Nu kae ate ŋu akpe ɖe mía ŋu míaƒu dua awu enu dzidzedzetɔe?

⁵ Abe Noa kple eƒe ƒomea ene la, nu geɖe li míawɔ gbe sia gbe. Ehiã be míawɔ dɔ eye míakpɔ míawo ŋutɔwo kple míaƒe ƒomea ƒe nuhiahiãwo gbɔ. Esia ate ŋu axɔ míaƒe ɣeyiɣi, ŋusẽ, kple nunɔamesiwo ƒe akpa gãtɔ. Vevietɔ le ɣeyiɣi siwo ganyawo le sesẽm me la, ele bɔbɔe be míava nɔ dzimaɖi tsim ɖe agbemenuhiahiã veviwo ŋu. Abe Kristotɔ ɖeadzɔgbewo ene la, teokrasi gbanɔamedzi veviwo hã le mía dzi. Míedea gbeadzi, míedzraa ɖo hedea Kristotɔwo ƒe kpekpeawo, eye míetoa ɖokuisinusɔsrɔ̃ kple ƒometadedeagu dzi doa ŋusẽ mía ɖokuiwo le gbɔgbɔ me. Togbɔ be nu siwo wòhiã be Noa nawɔ le Mawu subɔsubɔ me la sɔ gbɔ hã la, “nenema pɛ wòwɔ.” (1 Mose 6:22) Kakaɖedzitɔe la, agba siwo wòle be míatsɔ la dzi ɖeɖe kpɔtɔ kpakple asaƒoƒo na agba siwo mehiã o tsɔtsɔ le vevie ne míedi be míawu Kristotɔwo ƒe duɖimekekea nu.

6, 7. Yesu ƒe aɖaŋuɖoɖo kae wòle be wòanɔ susu me na mí?

⁶ Nu ka koŋ Paulo wɔnɛ esi wògblɔ be míaɖe “nu kpekpe sia nu kpekpe” ɖa? Le nyateƒe me la, míate ŋu avo tso agba siwo katã wòle be míatsɔ la tsɔtsɔ me keŋkeŋ o. Eya ta le nya sia me la, anyo be Yesu ƒe nya siawo nanɔ susu me na mí, esi wògblɔ be: “Migatsi dzimaɖi gbeɖe agblɔ be, ‘Nu kae míaɖu?’ alo ‘Nu kae míano?’ alo ‘Nu kae míado?’ o. Elabena nu siawo katã nye nu siwo yome dukɔwo nɔna vevie. Elabena mia Fofo si le dziƒo la nyae be miehiã nu siawo katã.” (Mat. 6:31, 32) Yesu ƒe nya siawo fia be nu siawo siwo míehiã le dzɔdzɔme nu gɔ̃ hã ate ŋu ava zu agba alo nuklikli na mí ne míetsɔ wo ɖo nɔƒe si dze o.

⁷ Bu nya si Yesu gblɔ be, “Mia Fofo si le dziƒo la nyae be miehiã nu siawo katã,” la ŋu kpɔ. Esia fia be Yehowa, mía Fofo si le dziƒo la, awɔ eƒe akpa dzi ahakpɔ míaƒe nuhiahiãwo gbɔ na mí. Míate ŋu aka ɖe edzi be, “nu siawo katã” si wògblɔ la ate ŋu ato vovo na nu siwo dzɔa dzi na mí alo nu siwo míawo ŋutɔwo míedina. Eye egblɔ hã be míagatsi dzimaɖi ɖe “nu siwo yome dukɔwo nɔna vevie” la ŋu o. Nu ka tae? Yesu ɖo aɖaŋu na eƒe nyaselawo emegbe be: “Mikpɔ mia ɖokui dzi nyuie, be nu tsu ɖuɖu kple aha tsu nono kple agbe me dzimaɖitsitsiwo nagate miaƒe dzi ɖe to gbeɖe o, ne ŋkeke ma nagava lili mi abe mɔ̃ ene o.”—Luka 21:34, 35.

 8. Nu ka tae fifia koŋ ye nye ɣeyiɣi si me wòle be míaɖe “nu kpekpe sia nu kpekpe” ɖa?

⁸ Nuwuƒea koe nye ema le mía ŋgɔ. Aleke gbegbe wòawɔ nublanuie nye esi be míaɖe mɔ nu maɖinu siwo ate ŋu ado kplamatsɛ mí la nado agba na mí esime míegogo nuwuwua keŋkeŋ! Eya ta nunya le aɖaŋu si apostolo Paulo ɖo la me vavã, esi wògblɔ be: “Ðokuitsɔtsɔ na Mawu sia nye viɖenu gã, ne nu si le ame si la dzea ame ŋu.” (1 Tim. 6:6) Esia fia be, ne míena Paulo ƒe nyawo de dzi gbɔ na mí la, ana míatsɔ kakaɖedzi blibo akpɔ mɔ be míaƒe asi asu fetu la dzi.

“Nu Vɔ̃ Si Doa Kplamatsɛ Mí Bɔbɔe La”

9, 10. (a) Nu kae nyagbɔgblɔ si nye “nu vɔ̃ si doa kplamatsɛ mí bɔbɔe la” fia? (b) Aleke nanewo ate ŋu ado kplamatsɛ mí?

⁹ Esi Paulo gblɔ be míaɖe “nu kpekpe sia nu kpekpe” ɖa la, egblɔ hã be míaɖe “nu vɔ̃ si doa kplamatsɛ mí bɔbɔe la” ɖa. Nu kae esia ate ŋu anye? Zi ɖeka pɛ koe Helagbe me nya si gɔme woɖe be “doa kplamatsɛ bɔbɔe” la dze le Biblia me, le kpukpui sia me. Agbalẽnyala Albert Barnes gblɔ be: “Ale si duɖimekela aɖe anɔ ŋudzɔ be nudodo si ate ŋu abla ɖe yeƒe afɔwo la ƒe ɖeke nagaɖe fu na ye eye wòahe ye ɖe megbe o la, nenemae wòle be wòanɔ le Kristotɔwo, siwo koŋ wòle na be woaɖe nu sia nu si ɖi esiawo ɖi la, gome.” Aleke nanewo ate ŋu ado kplamatsɛ Kristotɔ aɖe eye wòana eƒe xɔse nagbɔdzɔ?

¹⁰ Kristotɔ aɖeke ƒe xɔse megbɔdzɔna gbe ɖeka kple eƒe zãdodo o. Esia ate ŋu adzɔ vivivi, alo kura gɔ̃ hã, le eƒe manyamanya me. Do ŋgɔ la, Paulo xlɔ̃ nu le eƒe lɛtaa me tso afɔku si wònye be ‘míatra mɔ’ eye ‘dzi vɔ̃ɖi maxɔse nava nɔ mía si’ ŋu. (Heb. 2:1; 3:12) Ne duƒula aɖe ƒe awu ɖo atame nɛ la, zi geɖe la, edzea anyi godoo. Kakaɖedzi ganɔa ale si wòate ŋu adzɔe be awu aɖe si duƒula do naɖo atame nɛ esime wòle du ƒum la ŋu geɖe wu ne eŋe aɖaba ƒu afɔku si ate ŋu ado tso awu ma ƒomevi dodo me dzi. Nu kae ate ŋu ana wòaŋe aɖaba aƒu afɔkua dzi? Ate ŋu atso ɖekematsɔleme alo kakaɖeameɖokuidzi akpa alo susuhenu aɖewo gbɔ. Nufiame kae le Paulo ƒe aɖaŋuɖoɖoa me na mí?

11. Nu kae ate ŋu awɔe be míava zu xɔsemanɔsitɔwo?

¹¹ Ele be wòanɔ susu me na mí be ame ŋutɔ ƒe afɔɖeɖe gbɔe wòtsona be wòva zua xɔsemanɔsitɔ. Agbalẽnyala bubu aɖe gblɔ le “nu vɔ̃ si doa kplamatsɛ mí bɔbɔe la” ŋu be, enye “nu vɔ̃ si kpɔa ŋusẽ ɖe mía dzi wu, le nɔnɔme si me míele, míaƒe amenyenye, kple míaƒe hadede ta.” Susua ye nye be, ame siwo dome míele, gbɔdzɔgbɔdzɔ siwo le mía ŋu, kple míaƒe hadedewo siaa ate ŋu akpɔ ŋusẽ gbegblẽ ɖe mía dzi. Woate ŋu ana míaƒe xɔse nagbɔdzɔ alo ana míazu xɔsemanɔsitɔ gɔ̃ hã.—Mat. 13:3-9.

12. Ŋkuɖodzinya kawoe wòle be wòade dzi gbɔ na mí bene míagazu xɔsemanɔsitɔwo o?

¹² Ƒe geɖee nye esia si kluvi nyateƒetɔ kple aɖaŋudzela ƒe haa le aɖaŋu ɖom na mí be míanɔ ŋudzɔ ɖe nu siwo míekpɔna kple nu siwo míesena ŋu, si fia nu siwo ŋu míetsɔa míaƒe dzi kple susu ɖona. Woxlɔ̃ nu mí ku ɖe afɔku si le ga kple nunɔamesiwo yome titi me, si ate ŋu ado kplamatsɛ mí la ŋu. Modzakaɖeɖe ƒe vivisese kple dzidzɔdonamenuwo alo nu yeye siwo wole boblo domee ate ŋu ana míatra ɖa le mɔa dzi. Vodada gã aɖe wòanye be míasusui be aɖaŋuɖoɖo sia ƒomevi nye mɔxexe ɖe mía nu fũu akpa, alo be, ame bubuwo ŋu ko wòku ɖo, eye be nu mawo menye afɔku na míawo ŋutɔwo ya o. Satana ƒe xexea to amenubeble kple amefuflu dzi le kplamatsɛ dom mí egbea. Ðekematsɔleme, kakaɖeameɖokuidzi akpa, kple susuhenuwo na ame aɖewo dze anyi, eye nu mawo ƒomevi ate ŋu awɔe be míabu agbe mavɔ ƒe mɔkpɔkpɔa.—1 Yoh. 2:15-17.

13. Aleke míate ŋu akpɔ mía ɖokui ta tso ŋusẽkpɔɖeamedzi gbegblẽwo me?

¹³ Gbe sia gbe la, ame siwo doa xexea ƒe taɖodzinuwo, dzidzenuwo, kple susuwo ɖe ŋgɔ la dzea agbagba be yewoakpɔ ŋusẽ ɖe mía dzi. (Mixlẽ Efesotɔwo 2:1, 2.) Gake míawo ŋutɔwo gbɔe wòatso be nu siawo nagblẽ nu le mía ŋu loo, alo womagblẽ nu le mía ŋu o; atso ale si míewɔa nu ɖe ŋusẽkpɔɖeamedzi mawo ŋu la gbɔ. “Ya” si ŋu Paulo ƒo nu tsoe la wua ame. Ele be míakpɔ nyuie be míagaɖe mɔ wòana gbɔgbɔtsixe natsi mía ƒo alo axe gbɔgbɔ nu na mí o, be wòagana míatsi mɔ ta le duɖimekekea me o. Nu kae akpe ɖe mía ŋu be míanɔ duɖimekekea dzi? Kakaɖedzitɔe la, àlɔ̃ ɖe edzi be Yesue nye agbedua ƒulawo ƒe kpɔɖeŋu deblibo si wòle be míasrɔ̃. (Heb. 12:2) Paulo hã ɖo kpɔɖeŋu ɖi na mí, elabena ebu eɖokui de Kristotɔwo ƒe duɖimea kelawo dome eye wòde dzi ƒo na mí be míazu ye srɔ̃lawo.—1 Kor. 11:1; Flp. 3:14.

Aleke Míawɔ ‘Axɔ Dziɖuɖufetu La’?

14. Aleke Paulo bu eƒe gomekpɔkpɔ le duɖimekekea me?

¹⁴ Aleke Paulo bu eya ŋutɔ ƒe gomekpɔkpɔ le duɖimekekea me? Le nuƒo mamlɛtɔ si wòƒo na hamemetsitsi siwo tso Efeso me la, egblɔ be: “Nyemebu nye luʋɔ nu xɔasi aɖeke na ɖokuinye o; nu si le vevie nam la koe nye be mawu nye duɖimekeke kple subɔsubɔdɔ si mexɔ tso Aƒetɔ Yesu gbɔ la nu.” (Dɔw. 20:24) Enɔ lɔlɔ̃m faa be yeatsɔ nu sia nu asa vɔe, eƒe agbe gɔ̃ hã, be yeawu duɖimekekea nu. Le Paulo ƒe susu nu la, agbagba siwo katã wòdze kple dɔ sesẽ siwo katã wòwɔ la maɖe vi aɖeke o ne wòadzɔ be atsi mɔ ta le duɖimekekea me. Ke hã meka ɖe eɖokui dzi akpa, alo susu be nu ka kee ɖadzɔ o, yeƒe asi asu edzi godoo o. (Mixlẽ Filipitɔwo 3:12, 13.) Esi wòva ɖo eƒe agbe ƒe nuwuwu ko hafi wògblɔ kple kakaɖedzi be: “Ʋiʋli nyui lae meʋli, mewu duɖimekeke la nu, melé xɔse la me ɖe asi.”—2 Tim. 4:7.

15. Dzideƒonya kae Paulo gblɔ na ehati duɖimekelawo?

¹⁵ Gakpe ɖe eŋu la, Paulo di vevie be ye hati Kristotɔwo nawu duɖimekekea nu eye woagatsi mɔ ta o. Le kpɔɖeŋu me, ede dzi ƒo na Kristotɔ siwo nɔ Filipi la be woaku kutri vevie awɔ woawo ŋutɔwo ƒe ɖeɖedɔ la. Enɔ na wo be “woalé agbenya la me ɖe asi goŋgoŋ.” Egblɔ yi edzi be: “Bene makpɔ susu si ta matso aseye ɖo le Kristo ƒe ŋkeke la dzi, be nyemeƒu du dzodzro alo wɔ dɔ sesĩe dzodzro o.” (Flp. 2:16) Nenema kee wòde dzi ƒo na Kristotɔ siwo nɔ Korinto la be: “Miƒu du le mɔ si ana [miaxɔ fetu] la nu.”—1 Kor. 9:24.

16. Nu ka tae wòle be míaƒe taɖodzinua, alo fetua nadze nu ŋutɔŋutɔ na mí wu?

¹⁶ Ne wole du legbe aɖe abe marathon ene ƒum la, nuwuƒea medzena wokpɔna le gɔmedzedzea o. Ke hã, le duɖimekekea katã me la, duɖimekelaa ƒe susu nɔa ale si wòawɔ awu duɖimekekea nu koŋ dzi. Eƒe susu ganɔa edzi geɖe wu ne ekpɔe be yele nuwuƒea gogom. Nenema kee wòle be wòanɔ le míaƒe duɖimekekea gome. Ehiã be taɖodzinua, alo fetua, nadze nu ŋutɔŋutɔ na mí. Esia akpe ɖe mía ŋu míaɖo egbɔ.

17. Aleke xɔse nana míaƒe susu nɔa fetu la dzi?

¹⁷ Paulo ŋlɔ bena: “Xɔse nye dziɖoɖo ɖe nu siwo wole mɔ kpɔm na la ŋu kple kakaɖedzi, nu ŋutɔŋutɔ siwo li togbɔ be womekpɔa wo o la ŋuti ɖeɖe fia si dze kɔtɛ.” (Heb. 11:1) Abraham kple Sara lɔ̃ faa ɖe asi le agbenɔnɔ si me dzidzeme nɔ la ŋu eye wonɔ abe “amedzrowo kple ame siwo le anyigba la dzi hena ɣeyiɣi kpui aɖe” ene. Nu kae kpe ɖe wo ŋu? “Wokpɔ [Mawu ƒe ŋugbedodowo me vava] ɖaa le adzɔge.” Mose gbe ‘nu vɔ̃ ƒe vivisese hena ɣeyiɣi vi aɖe ko’ kple “Egipte ƒe nu xɔasiwo.” Aleke wòwɔ kpɔ xɔse kple ŋusẽ tsɔ nɔ te ɖe nɔnɔme mawo nu? “Eƒe ŋku nɔ teƒeɖoɖofetu la ŋu tututu.” (Heb. 11:8-13, 24-26) Esɔ ŋutɔ be Paulo dze nuƒoƒo tso ame siawo dometɔ ɖe sia ɖe ŋu gɔme kple nyagbɔgblɔ si nye “le xɔse me.” Xɔse kpe ɖe wo ŋu wokpɔ nu yi ŋgɔ wu dodokpɔ kple nɔnɔme sesẽ siwo me tom wonɔ la eye wonɔ nu siwo wɔm Mawu nɔ na wo kple nu siwo wòagava wɔ na wo la kpɔm.

18. Be míaɖe “nu vɔ̃ si doa kplamatsɛ mí bɔbɔe la” ɖa la, afɔ vevi kawoe míate ŋu aɖe?

¹⁸ Ne míedea ŋugble le ŋutsu kple nyɔnu xɔsetɔ siwo woyɔ le Hebritɔwo ta 11 lia me ŋu eye míesrɔ̃a woƒe kpɔɖeŋu la, míate ŋu atu xɔse ɖo eye míaɖe “nu vɔ̃ si doa kplamatsɛ mí bɔbɔe la” ɖa. (Heb. 12:1) Gakpe ɖe eŋu la, ne míeƒoa ƒu kple ame siwo le xɔse si nɔ blematɔwo si la ƒomevi tum ɖo la, míate ŋu anɔ “mía nɔewo ŋu bum, bene míado ŋusẽ mía nɔewo hena lɔlɔ̃ kple dɔ nyuiwo wɔwɔ.”—Heb. 10:24.

19. Nu ka tae nèkpɔe be ehiã be míana míaƒe ŋku nanɔ fetu la dzi?

¹⁹ Míegogo míaƒe duɖimekekea ƒe nuwuwu. Nuwuƒea koe nye ema le mía ŋgɔ. Le xɔse kple Yehowa ƒe kpekpeɖeŋu me la, míawo hã míate ŋu “[aɖe] nu kpekpe sia nu kpekpe kple nu vɔ̃ si doa kplamatsɛ mí bɔbɔe la hã ɖa.” Ɛ̃, míate ŋu aƒu dua le mɔ si ana míaƒe asi nasu dziɖuɖufetua—si nye yayra siwo ŋugbe mía Mawu kple mía Fofo, Yehowa, do na mí la—dzi.

[Etenuŋɔŋlɔ]

Èɖo Ŋku Wo Dzia?

• Nu kawoe “nu kpekpe sia nu kpekpe” ɖeɖeɖa lɔ ɖe eme?

• Nu kae ate ŋu awɔe be Kristotɔ aɖe nava zu xɔsemanɔsitɔ?

• Nu ka tae wòle be míaƒe susu nanɔ fetu la dzi?

[Nɔnɔmetata si le axa 23]

Nu kae nye “nu vɔ̃ si doa kplamatsɛ mí bɔbɔe la,” eye aleke wòate ŋu ado kplamatsɛ mí?