Èɖea Yehowa Ƒe Ŋutikɔkɔe Fiana?

“[Míeɖea] Yehowa ƒe ŋutikɔkɔe fiana abe ahuhɔ̃ewo ene.”—2 KOR. 3:18.

ALEKE NÀÐO WO ŊUI?

Togbɔ be míenye nu vɔ̃ wɔlawo hã la, aleke míate ŋu aɖe Yehowa ƒe ŋutikɔkɔe afiae?

Aleke míaƒe gbedodoɖawo kple Kristotɔwo ƒe kpekpewo dede kpena ɖe mía ŋu míeɖea Mawu ƒe ŋutikɔkɔe fiana?

Nu kae ate ŋu akpe ɖe mía ŋu míayi edzi anɔ Yehowa ƒe ŋutikɔkɔe ɖem fia?

1, 2. Nu ka tae susu le eme be míakpɔ mɔ be míate ŋu asrɔ̃ Yehowa ƒe nɔnɔmewo?

MÍ KATÃ míeɖi mía dzilawo le mɔ aɖe nu godoo. Eya ta mewɔa nuku na mí o ne míesee ame aɖe gblɔ na ŋutsuvi aɖe be, ‘Wò ya, fofowò ko nèɖi.’ Woate ŋu agblɔ na nyɔnuvi aɖe be, ‘Ne mekpɔ wò ko la, meɖoa ŋku dawò dzi.’ Eye zi geɖe la, ɖeviwo srɔ̃a nu siwo wo dzilawo wɔna wokpɔna. Ke míawo ya ɖe? Ðe míate ŋu asrɔ̃ Yehowa, mía Fofo si le dziƒo la? Togbɔ be míekpɔe kpɔ o hã la, míate ŋu akpɔ eƒe nɔnɔme nyuiwo adze sii ne míesrɔ̃a eƒe Nya la, ne míeléa ŋku ɖe eƒe nuwɔwɔwo ŋu, eye míedea ŋugble le Ŋɔŋlɔawo ŋu, vevietɔ Yesu Kristo, Mawu ƒe Vi la, ƒe nyagbɔgblɔwo kple agbenɔnɔ. (Yoh. 1:18; Rom. 1:20) Ate ŋu anya wɔ be míaɖe Yehowa ƒe ŋutikɔkɔe afia.

² Hafi Mawu nawɔ Adam kple Xawa la, Eka ɖe edzi be amegbetɔwo ate ŋu awɔ yeƒe lɔlɔ̃nu, woaɖe yeƒe nɔnɔme nyuiwo afia, eye woakafu ye. (Mixlẽ 1 Mose 1:26, 27.) Mí Kristotɔwo míedi be míasrɔ̃ mía Mawu si wɔ mí ƒe nɔnɔme nyuiwo. Ne míewɔ esia la, mɔnukpɔkpɔ gã aɖe asu mía si be míaɖe Mawu ƒe ŋutikɔkɔe afia—dukɔ ka me tɔ míeɖanye o, afi ka kee míeɖade suku se o, alo gbe ka kee míeɖadona o. Nu ka tae? Elabena “Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu.”—Dɔw. 10:34, 35.

 3. Aleke Kristotɔwo ate ŋu ase le wo ɖokuiwo me ne wole Yehowa ƒe lɔlɔ̃nu wɔm?

³ Kristotɔ amesiaminawo ɖea Yehowa ƒe ŋutikɔkɔe fiana. Eya ta apostolo Paulo si wotsɔ gbɔgbɔ dzi la ŋlɔ bena: “Esi mí katã míetsɔa mo siwo wometsyɔ nui o ɖea Yehowa ƒe ŋutikɔkɔe fiana abe ahuhɔ̃ewo ene la, wotrɔa míaƒe nɔnɔme ɖe nɔnɔme ma ke me tso ŋutikɔkɔe me yi ŋutikɔkɔe me.” (2 Kor. 3:18) Esi nyagblɔɖila Mose ɖi tso Sinai Toa dzi kple kpe siwo dzi Se Ewoawo nɔ la, eƒe mo nɔ keklẽm, elabena Yehowa ƒo nu kplii. (2 Mose 34:29, 30) Togbɔ be Kristotɔwo meƒo nu kple Yehowa kpɔ o eye woƒe mo meklẽna o hã la, dzidzɔ yɔa woƒe mo ne wole gbeƒã ɖem na amewo tso Yehowa, eƒe nɔnɔme nyuiwo, kple tame wɔnuku si wòɖo ɖe ameƒomea ŋu la ŋu. Abe gahuhɔ̃e si wozãna le blema, si ƒe ŋkume wozrɔ̃ nyuie ene la, amesiaminawo kple woƒe zɔhɛ siwo si anyigbadzinɔnɔ ƒe mɔkpɔkpɔ le la ɖea Yehowa ƒe ŋutikɔkɔe fiana to woƒe agbenɔnɔ kple subɔsubɔdɔa dzi. (2 Kor. 4:1) Ðe nètoa wò mawusosroɖagbenɔnɔ kple wò gomekpɔkpɔ le Fiaɖuƒegbeƒãɖeɖedɔa me edziedzi dzi ɖea Yehowa ƒe ŋutikɔkɔe fiana?

MÍEDI BE MÍAÐE YEHOWA ƑE ŊUTIKƆKƆE AFIA

4, 5. (a) Abe Paulo ene la, ʋiʋli ka ʋlim míele? (b) Aleke nu vɔ̃ kpɔ ŋusẽ ɖe mía dzi?

⁴ Mí Yehowa subɔlawo míedina vevie be míade bubu mía Wɔla la ŋu ahakafui le nu sia nu me. Gake zi geɖe la, menye nu si míedi be míawɔ lae míewɔna o. Kuxi sia ɖe fu na Paulo hã. (Mixlẽ Romatɔwo 7:21-25.) Paulo ɖe nu si tae wòle alea me esi wòŋlɔ bena: “Wo katã wɔ nu vɔ̃, eye womete ŋu ɖoa Mawu ƒe ŋutikɔkɔe la gbɔ o.” (Rom. 3:23) Ɛ̃, esi amegbetɔƒomea katã dzɔ tso Adam, si wɔ nu vɔ̃ la, me ta la, mí katã míezu ‘Fia Nu Vɔ̃’ ƒe kluviwo.—Rom. 5:12; 6:12.

⁵ Nu kae nye nu vɔ̃? Enye nu sia nu si tsi tsitre ɖe Yehowa ƒe amenyenye, eƒe mɔwo, eƒe dzidzenuwo, kple eƒe lɔlɔ̃nu ŋu. Nu vɔ̃ gblẽa ame kple Mawu dome ƒomedodo me. Nu vɔ̃ xea mɔ na mí be míagaɖe Mawu ƒe ŋutikɔkɔe afia o, abe ale si ko nane ate ŋu awɔe be aŋutrɔdala aɖe ƒe aŋutrɔ matɔ nu si dzi wòdzidzee ɖo o ene. Ate ŋu adzɔ be míaɖoe koŋ awɔ nu vɔ̃ alo míaɖe ŋu ɖi awɔ nu vɔ̃. (4 Mose 15:27-31) Nu vɔ̃ ƒo ke ɖe to ɖe amegbetɔwo me eye wòzu mɔxenu le woa kple wo Wɔla dome. (Ps. 51:7; Yes. 59:2; Kol. 1:21) Eya ta ameƒomea me tɔ akpa gãtɔ metea ŋu nɔa agbe wòwɔa ɖeka kple Yehowa ƒe lɔlɔ̃nu kura o, eye wodaa mɔnukpɔkpɔ si nye be woaɖe Mawu ƒe ŋutikɔkɔe afia la ƒu. Ðikeke mele eme o be, nu vɔ̃e nye dɔ vɔ̃ɖitɔ kekeake si le nu gblẽm le ameƒomea ŋu.

 6. Togbɔ be míenye nu vɔ̃ wɔlawo hã la, alekee míate ŋu aɖe Mawu ƒe ŋutikɔkɔe afia?

⁶ Togbɔ be míenye nu vɔ̃ wɔlawo hã la, Yehowa Mawu ‘na mɔkpɔkpɔ’ mí. (Rom. 15:13) Esi Yehowa tsɔ Yesu Kristo na abe tafevɔsa ene la, Eʋu mɔnukpɔkpɔ ɖi be míavo tso nu vɔ̃ si me. Ne míexɔa vɔsa ma dzi se la, ekema míeganye “nu vɔ̃ ƒe kluviwo” o, ke koŋ míate ŋu aɖe Yehowa ƒe ŋutikɔkɔe afia. (Rom. 5:19; 6:6; Yoh. 3:16) Ne míekpɔtɔ nye Mawu xɔlɔ̃wo la, míate ŋu aka ɖe edzi be Yehowa ayra mí fifia, eye le etsɔme la, ana míade blibo eye wòana agbe mavɔ mí. Togbɔ be míegakpɔtɔ nye nu vɔ̃ wɔlawo hã la, yayra ka gbegbee nye esi be Mawu bua mí be míate ŋu aɖe yeƒe ŋutikɔkɔe afia!

ALE SI MÍAÐE MAWU ƑE ŊUTIKƆKƆE AFIA

 7. Nu ka dzi wòle be míalɔ̃ ɖo le mía ɖokui ŋu ne míedi be míaɖe Mawu ƒe ŋutikɔkɔe afia?

⁷ Be míate ŋu aɖe Mawu ƒe ŋutikɔkɔe afia nyuie la, ele be míalɔ̃ ɖe edzi anukwaretɔe be míenye nu vɔ̃ mewo. (2 Kron. 6:36) Ehiã be míalɔ̃ ɖe edzi be gbɔdzɔgbɔdzɔwo le mía ŋu eye míaʋli vevie aɖu wo dzi ale be míate ŋu aɖe Mawu ƒe ŋutikɔkɔe afia geɖe wu. Le kpɔɖeŋu me, ne ezu numame na mí be míekpɔa amamaɖeɖenuwɔnawo, si nye nu vɔ̃ si ɖia gbɔ ame la, ele be míalɔ̃ ɖe edzi be míehiã hamemetsitsiwo ƒe kpekpeɖeŋu eye míate ɖe wo ŋu abia be woakpe ɖe mía ŋu. (Yak. 5:14, 15) Esia anye afɔ gbãtɔ si míaɖe ne míedi ŋutɔŋutɔ be míade bubu Mawu ŋu. Esi míenye Yehowa subɔlawo ta la, ele be míayi edzi anɔ mía ɖokuiwo me dzrom kpɔ be, ɖe míegakpɔtɔ ɖoa eƒe nudidi dzɔdzɔeawo gbɔ hã. (Lod. 28:18; 1 Kor. 10:12) Nu ka kee ɖanye míaƒe gbɔdzɔgbɔdzɔwo o, ele be míayi edzi anɔ avu wɔm kpli wo, ale be míate ŋu aɖe Mawu ƒe ŋutikɔkɔe afia.

 8. Togbɔ be míede blibo o hã la, nu kae wòle be míawɔ?

⁸ Yesu koe nye amegbetɔ ɖeka kolia si wɔ Mawu ƒe lɔlɔ̃nu ɣeawokatãɣi eye wòɖe Mawu ƒe ŋutikɔkɔe fia bliboe. Togbɔ be míede blibo abe Yesu ene o hã la, míate ŋu adze agbagba asrɔ̃ eƒe kpɔɖeŋu, eye ele be míawɔe hã. (1 Pet. 2:21) Yehowa kpɔa agbagba siwo míedzena kple ŋgɔyiyi si wɔm míele la siaa, eye eyrana ɖe míaƒe agbagbadzedze be míahe ŋutikɔkɔe ava nɛ la dzi.

 9. Aleke Biblia kpena ɖe Kristotɔwo ŋu woɖea Mawu ƒe ŋutikɔkɔe fiana geɖe wu?

⁹ Yehowa ƒe Nya la ate ŋu akpe ɖe mía ŋu míanya ale si míawɔ be míaɖe Mawu ƒe ŋutikɔkɔe afia nyuie wu. Ele vevie be míasrɔ̃ Ŋɔŋlɔawo veviedodotɔe eye míade ŋugble le Biblia me nyawo ŋu. (Ps. 1:1-3) Ŋɔŋlɔawo xexlẽ gbe sia gbe akpe ɖe mía ŋu míawɔ ŋgɔyiyi. (Mixlẽ Yakobo 1:22-25.) Nu si míesrɔ̃ tso Biblia me doa ŋusẽ míaƒe xɔse eye wònana míeɖonɛ kplikpaa wu tsã be míaƒo asa na nu vɔ̃ gãwo eye míadze Yehowa ŋu.—Ps. 119:11, 47, 48.

10. Aleke gbedodoɖa ate ŋu akpe ɖe mía ŋu míasubɔ Yehowa nyuie wu?

¹⁰ Be míaɖe Mawu ƒe ŋutikɔkɔe afia la, ehiã hã be ‘míanɔ gbedodoɖa dzi ɖaa.’ (Rom. 12:12) Míate ŋu ado gbe ɖa na Yehowa be wòakpe ɖe mía ŋu míasubɔe wòadze eŋu nyuie, eye ele be míawɔe hã. Be míate ŋu aɖo taɖodzinu sia gbɔ la, esɔ be míabiae be wòana gbɔgbɔ kɔkɔea mí, wòana xɔse geɖe wu mí, wòado ŋusẽ mí míaɖu tetekpɔwo dzi, eye wòana ŋutete mí ‘míawɔ nyateƒenya la ŋu dɔ pɛpɛpɛ.’ (2 Tim. 2:15; Mat. 6:13; Luka 11:13; 17:5) Abe ale si ɖeviwo ɖoa ŋu ɖe wo fofo ŋu ene la, nenemae wòle be míaɖo ŋu ɖe Yehowa, mía Fofo si le dziƒo la, ŋui. Ne míebiae be wòakpe ɖe mía ŋu míasubɔe nyuie wu la, míate ŋu aka ɖe edzi be akpe ɖe mía ŋu. Mele be míase le mía ɖokui me gbeɖe be míele fu ɖem nɛ o! Ke boŋ mina míado gbe ɖa akafui, ada akpe nɛ, abiae be wòafia mɔ mí, vevietɔ ne míele tetekpɔwo me tom, eye míabiae be wòakpe ɖe mía ŋu míasubɔe le mɔ siwo ahe kafukafu ava eƒe ŋkɔ kɔkɔea dzi nu.—Ps. 86:12; Yak. 1:5-7.

11. Aleke hamea ƒe kpekpewo kpena ɖe mía ŋu míeɖea Mawu ƒe ŋutikɔkɔe fiana?

¹¹ Mawu tsɔ eƒe alẽ xɔasiawo dzi kpɔkpɔ de asi na ‘kluvi nuteƒewɔla kple aɖaŋudzela’ la. (Mat. 24:45-47; Ps. 100:3) Kluvi ƒe ha la tsɔa ɖe le ale si woƒe haxɔsetɔwo le Yehowa ƒe ŋutikɔkɔe ɖem fiae la me vevie. Míaƒe kpekpewo kpena ɖe mía ŋu míewɔa tɔtrɔwo le míaƒe agbenɔnɔ me hetua Kristotɔwo ƒe nɔnɔme nyuiwo ɖo nyuie wu, abe ale si ko nutɔla ate ŋu atrɔ asi le míaƒe awu ŋu wòasɔ nyuie wu ene. (Heb. 10:24, 25) Eya ta mina míanɔ kpekpeawo dem ɖe game dzi, elabena ne megbetsitsi zu numame na mí la, nu siwo akpe ɖe mía ŋu míawɔ asitɔtrɔ be míasubɔ Yehowa nyuie wu la dometɔ aɖewo ato mía ŋu.

MINA MÍASRƆ̃ MAWU

12. Aleke míate ŋu asrɔ̃ Mawu?

¹² Hafi míate ŋu aɖe Yehowa ƒe ŋutikɔkɔe afia la, ele be ‘míazu Mawu srɔ̃lawo.’ (Ef. 5:1) Mɔ ɖeka aɖe si nu míasrɔ̃ Yehowa lee nye be míadze agbagba be míanɔ nuwo ŋu bum abe eyama ene. Agbagbadzedze be míanɔ agbe le mɔ bubu ɖe sia ɖe nu nye bubumademade Yehowa ŋu eye esia agblẽ nu le mía ŋu. Esi wònye be xexe si ƒo xlã mí la le vɔ̃ɖitɔ, Satana Abosam, ƒe ŋusẽ te ta la, ele be míaku kutri vevie alé fu nu siwo Yehowa lé fui ahalɔ̃ nu siwo wòlɔ̃ la vevie. (Ps. 97:10; 1 Yoh. 5:19) Ele be míaka ɖe edzi tso dzi blibo me be mɔ nyuitɔ si nu míasubɔ Mawu le wòadze eŋue nye be míawɔ nuwo katã hena eƒe kafukafu.—Mixlẽ 1 Korintotɔwo 10:31.

13. Nu ka tae wòle be míalé fu nu vɔ̃, eye nu kae esia aʋã mí míawɔ?

¹³ Yehowa lé fu nu vɔ̃, eya ta ele be míawo hã míalé fu nu vɔ̃. Ne míelé fu nu vɔ̃ la, míate ɖa xaa tso nu sia nu si ate ŋu ana míawɔ nu vɔ̃ la gbɔ. Le kpɔɖeŋu me, ele be míakpɔ mía ɖokuiwo dzi nyuie be xɔsegbegbe, si nye nu vɔ̃ si ana míagate ŋu aɖe Mawu ƒe ŋutikɔkɔe afia o la, ƒe mɔ̃ nagaɖe mí o. (5 Mose 13:7-10) Eya ta mina míaƒo asa na ame sia ame si nye xɔsegbela alo ame ɖe sia ɖe si gblɔna be yenye nɔvi gake medea bubu Mawu ŋu o la keŋkeŋ. Alea wòle be míawɔ nui ne amea nye míaƒe ƒometɔ gɔ̃ hã. (1 Kor. 5:11) Ne míedze agbagba be míaʋli nya kple xɔsegbelawo alo ame siwo ƒoa nu tsia tsitre ɖe Yehowa ƒe habɔbɔa ŋu la, maɖe vi aɖeke na mí o. Le nyateƒe me la, mesɔ be míaxlẽ woƒe nyatakakawo o, eɖanye le agbalẽwo me alo le Internet dzi o, elabena esia agblẽ mía kple Yehowa dome ƒomedodoa me.—Mixlẽ Yesaya 5:20; Mateo 7:6.

14. Ne míele agbagba dzem be míaɖe Mawu ƒe ŋutikɔkɔe afia la, nɔnɔme kae wòle be wòaɖe dzesi le mía ŋu, eye nu ka tae?

¹⁴ Amewo lɔlɔ̃ nye mɔ nyuitɔ si dzi míato asrɔ̃ mía Fofo si le dziƒo la. Ɛ̃, ele be míalɔ̃ amewo abe ale si wòlɔ̃ wo ene. (1 Yoh. 4:16-19) Le nyateƒe me la, lɔlɔ̃ si le mía dome lae nye dzesi be míenye Yesu ƒe nusrɔ̃lawo kple Yehowa subɔlawo. (Yoh. 13:34, 35) Togbɔ be nu vɔ̃ si ƒe dome míenyi la ate ŋu awɔe be wòasesẽ na mí ɣeaɖewoɣi be míalɔ̃ amewo hã la, ele be míaɖu edzi eye míalɔ̃ amewo ɣeawokatãɣi. Lɔlɔ̃ kple mawumenɔnɔme nyui bubuwo tutu ɖo akpe ɖe mía ŋu míaƒo asa na nu manyomanyo wɔwɔ ɖe ame ŋu kple nu vɔ̃ wɔwɔ.—2 Pet. 1:5-7.

15. Aleke lɔlɔ̃ kpɔa ŋusẽ ɖe mía kple amewo dome ƒomedodo dzi?

¹⁵ Lɔlɔ̃ nana míedina be míawɔ nyui na amewo. (Rom. 13:8-10) Le kpɔɖeŋu me, ne míelɔ̃ mía srɔ̃ la, míaƒo ɖi míaƒe srɔ̃ɖeba la o. Ne míelɔ̃ hamemetsitsiwo eye míekpɔa ŋudzedze ɖe dɔ siwo wowɔna ŋu la, esia akpe ɖe mía ŋu míaɖo to wo ahabɔbɔ ɖe woƒe mɔfiafia te. Ðevi siwo lɔ̃ wo dzilawo la ɖoa to wo dzilawo hedea bubu wo ŋu, eye womegblɔa nya gbegblẽwo tso wo ŋu o. Ne míelɔ̃ mía havi amegbetɔwo la, míabui be míexɔ asi wu wo alo anɔ nu ƒom na wo bubumadeameŋutɔe o. (Yak. 3:9) Eye hamemetsitsi siwo lɔ̃ Mawu ƒe alẽawo la wɔa nu ɖe wo ŋu tufafatɔe.—Dɔw. 20:28, 29.

16. Aleke lɔlɔ̃ɖeɖefia kpena ɖe mía ŋu le subɔsubɔdɔa me?

¹⁶ Ele be lɔlɔ̃ naɖe dzesi le míaƒe gbeƒãɖeɖedɔa hã me. Esi míelɔ̃ Yehowa vevie ta la, míaɖe mɔ aƒemenɔla aɖewo ƒe ɖekematsɔleme alo tomaɖomaɖo gbedeasia naɖe dzi le mía ƒo o. Ke boŋ míayi edzi anɔ gbeƒã ɖem nya nyuia. Lɔlɔ̃ aʋã mí be míadzra ɖo nyuie ɖe gbeƒãɖeɖedɔa ŋu eye be míadze agbagba awɔ subɔsubɔdɔa memie. Ne míelɔ̃ Mawu kple mía haviwo vavã la, míaɖe gbeƒã le esi wònye be wobiae tso mía si ta ko o, ke boŋ míabu Fiaɖuƒegbeƒãɖeɖedɔa be enye mɔnukpɔkpɔ gã aɖe eye míawɔe kple dzidzɔ.—Mat. 10:7.

YI EDZI NÀNƆ ŊUTIKƆKƆE TSƆM NA YEHOWA

17. Esi míeva se egɔme be nu vɔ̃ xea mɔ na mí be míetea ŋu ɖea Mawu ƒe ŋutikɔkɔe fiana o ta la, nu kae wòle be míawɔ?

¹⁷ Xexea me tɔ akpa gãtɔ mekpɔa ŋkubiãnya si gbegbe nu vɔ̃ nye la dzea sii o, gake mele alea le míawo ya gome o. Le susu sia ta la, míekpɔe be ehiã be míawɔ avu kple nu vɔ̃ ƒe dzodzro siwo le mía me la. Ne míelɔ̃ ɖe edzi be míenyi nu vɔ̃ ƒe dome la, esia ʋãa mí míenaa hehe míaƒe dzitsinya ale be wòakpe ɖe mía ŋu be míawɔ nu si le eteƒe ne nu vɔ̃ ƒe dzodzro aɖe va míaƒe dzi kple susu me. (Rom. 7:22, 23) Nyateƒee, míenye gbɔdzɔgbɔdzɔtɔwo, gake Mawu ate ŋu ado ŋusẽ mí míawɔ nu si le eteƒe le nɔnɔme ɖe sia ɖe me.—2 Kor. 12:10.

18, 19. (a) Nu kae akpe ɖe mía ŋu míaɖu dzi le avu si wɔm míele kple gbɔgbɔmenuwɔwɔ vɔ̃ɖiwo la me? (b) Nu kae wòle be míaɖo kplikpaa be míawɔ?

¹⁸ Be míaɖe Yehowa ƒe ŋutikɔkɔe afia la, ele be míawɔ avu kple gbɔgbɔmenuwɔwɔ vɔ̃ɖiwo hã. Aʋawɔnu siwo Mawu na mí la ate ŋu akpe ɖe mía ŋu míaɖu wo dzi. (Ef. 6:11-13) Satana dzea agbagba madzudzɔmadzudzɔe be yeafi ŋutikɔkɔe si Yehowa ɖeɖe ko dze na la. Tsɔ kpe ɖe eŋu la, Abosam yi edzi le agbagba ɖe sia ɖe dzem be yeagblẽ mía kple Yehowa dome ƒomedodo me. Esia ta, ne míawo ŋutɔwo kple ame madeblibo miliɔn geɖe bubu siwo nye ŋutsuwo kple nyɔnuwo kpakple ɖeviwo míeyi edzi lé nuteƒewɔwɔ me ɖe asi hele Mawu kafum la, enyea Satana dzi ɖuɖu! Eya ta mina míakafu Yehowa abe ale si dziƒodɔlawo kafui ene, esime wogblɔ be: “Yehowa, mía Mawu, wòe dze be nàxɔ ŋutikɔkɔe kple bubu kple ŋusẽ, elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.”—Nyaɖ. 4:11.

¹⁹ Mina míaɖoe kplikpaa be míayi edzi anɔ ŋutikɔkɔe tsɔm na Yehowa, nu ka kee ɖadzɔ o. Kakaɖedzitɔe la, ekpɔa dzidzɔ be nuteƒewɔla geɖe le woƒe ŋutete ɖe sia ɖe wɔm be yewoasrɔ̃ ye ahaɖe yeƒe ŋutikɔkɔe afia. (Lod. 27:11) Ele be míawo hã míase le mía ɖokui me abe David, si kafu Yehowa tso eƒe dzi blibo me eye wòdzi ha be, “Made bubu wò ŋkɔ ŋu ɖaa” la, ene. (Ps. 86:12) Aleke gbegbe míele mɔ kpɔm na ɣeyiɣi si míaɖe Yehowa ƒe ŋutikɔkɔe afia bliboe eye míate ŋu akafui tegbee nye esi! Mɔnukpɔkpɔ dodzidzɔname siae asu amegbetɔ toɖolawo si. Ðe nèle Yehowa Mawu ƒe ŋutikɔkɔe ɖem fia fifia hele mɔ kpɔm be yeayi edzi awɔe yi ɖe mavɔmavɔ mea?

[Nɔnɔmetata siwo le axa 27]

Ðe nèle Yehowa ƒe ŋutikɔkɔe ɖem fia le mɔ vovovo siawo nua?