Mɔkpɔkpɔ Li Be Kukuawo Afɔ

Ðe nèxɔ ŋugbedodo si le Biblia me be kukuawo afɔ la dzi sea?a Ðikeke mele eme o be adzɔ dzi na mí ŋutɔ be míagakpɔ míaƒe ame vevi siwo ku la ake. Gake ɖe esia ate ŋu ava eme vavã? Be míaɖo nya ma ŋu la, anyo be míadzro kpɔɖeŋu si Yesu Kristo ƒe apostolowo ɖo ɖi la me.

Apostoloawo ka ɖe edzi bliboe be kukuawo afɔ ɖe tsitre. Nu ka tae? Kpeɖodzi eve ya teti li si tae woxɔe se ɖo. Gbãtɔe nye be wofɔ Yesu ŋutɔ hã tso ku me. Apostoloawo, kple “nɔvi siwo wu alafa atɔ̃” la kpɔ Yesu si wofɔ ɖe tsitre la “zi ɖeka.” (1 Korintotɔwo 15:6) Azɔ hã, ame geɖe lɔ̃ ɖe edzi be wofɔ Yesu ɖe tsitre eye woɖi ɖase tso eŋu hã, abe ale si Nyanyuigbalẽ eneawo ɖee fia ene.—Mateo 27:62–28:20; Marko 16:1-8; Luka 24:1-53; Yohanes 20:1–21:25.

Evelia, apostoloawo kpɔ eteƒe Yesu fɔ ame etɔ̃ ya teti ɖe tsitre—efɔ ame gbãtɔ ɖe tsitre le Nain, evelia le Kapernaum, eye mamlɛtɔ le Betania. (Luka 7:11-17; 8:49-56; Yohanes 11:1-44) Tsitretsitsi siawo ƒe mamlɛtɔ, si ŋu míeƒo nu tsoe va yi le magazine sia me la ku ɖe ƒome aɖe si nye Yesu xɔlɔ̃ veviwo la ŋu. Na míagadzro ŋutinya ma me be míakpɔ ale si nuawo dzɔe ɖa.

“Nɔviwò la atsi tsitre.” Nya sia ye Yesu gblɔ na Marta, si nye Lazaro, si ku ŋkeke ene sɔŋ la nɔvinyɔnu. Marta mese Yesu ƒe nyawo gɔme enumake o. Eya ta eɖo nyaa ŋu be, “Menya be atsi tsitre,” henɔ susum be Lazaro atsi tsitre ɣeaɖeɣi le etsɔ si gbɔna me. Gake Yesu gblɔ nɛ be: “Nyee nye tsitretsitsi la kple agbe la.” Eyome wòfɔ nɔvia si ku la ɖe tsitre. Bu ale si gbegbe wòawɔ nuku Marta ŋu kpɔ!—Yohanes 11:23-25.

Esime Lazaro ku la, afi kae wònɔ le ŋkeke ene mawo me? Lazaro megblɔ nya aɖeke si ɖee fia be eyi ɖanɔ agbe le afi aɖe le ŋkeke eneawo me o. Luʋɔ makumaku aɖeke menɔ Lazaro me si do go le eme yi dziƒo o. Ne ɖe Lazaro yi dziƒo la, ekema afia be ɖe Yesu gbugbɔe va anyigba dzi esime wòfɔe ɖe tsitre, eye wògblẽ dzidzɔ si kpɔm wònɔ le Mawu gbɔ la me nɛ. Ke afi kae Lazaro nɔ le ŋkeke ene mawo me? Le nyateƒe me la, enɔ alɔ̃ dɔm le ku me.—Nyagblɔla 9:5, 10.

Ðo ŋku edzi be Yesu tsɔ ku sɔ kple alɔ̃dɔdɔ, eya ta amefɔfɔ tso ku me le abe efɔfɔ tso alɔ̃ me ene. Yesu gblɔ be: “‘Mía xɔlɔ̃ Lazaro le alɔ̃ dɔm; gake la meyina, bena maɖanyɔe atso alɔ̃ me.’ Tete nusrɔ̃lawo gblɔ nɛ bena: ‘Aƒetɔ, ne ele alɔ̃ dɔm la, ekema eƒe lãme asẽ.’ Ke Yesu ƒo nu le eƒe ku ŋuti; ke woa wobu xa bena, eƒo nu le alɔ̃dɔdɔ ŋutɔ ŋuti. Azɔ Yesu ʋu me na wo faa bena: ‘Lazaro ku.’” (Yohanes 11:11-14, Eʋegbe Biblia) Esi Yesu fɔ Lazaro ɖe tsitre la, ɖe wògagbugbɔ agbe de eme eye wòna woa kple eƒe ƒomea wogawɔ ɖeka. Nu nyui ka gbegbee nye esi Yesu wɔ na ƒome ma!

Esi Yesu fɔ amewo ɖe tsitre esime wònɔ anyigba dzi la, enye kpɔɖeŋu na ale si wògbɔna amewo fɔ ge ɖe tsitre le etsɔme abe Mawu Fiaɖuƒea ƒe Fia ene.b Ne Yesu si le dziƒo la dze anyigba dzi ɖuɖu gɔme la, agbɔ agbe ame siwo le alɔ̃ dɔm le tsiẽƒe. Esia tae wògblɔ be, “Nyee nye tsitretsitsi la” ɖo. Bu dzidzɔ si gbegbe nàkpɔ ne ègakpɔ wò ame vevi siwo ku la ake ŋu kpɔ! Eye bu dzidzɔ si gbegbe ame siwo woafɔ ɖe tsitre la hã akpɔ ŋu kpɔ!—Luka 8:56.

Yesu gblɔ na Marta be: ‘Ame si xɔa dzinye sena la, ne eku hã la, agagbɔ agbe; eye ame sia ame si le agbe, eye wòxɔa dzinye sena la, maku akpɔ gbeɖe o.’ (Yohanes 11:25, 26) Mɔnukpɔkpɔ asu ame siwo Yesu afɔ ɖe tsitre le eƒe dziɖuɖu si axɔ ƒe akpe ɖekaa me la si be woanɔ agbe tegbee—zi ale si wonya xɔ eyama dzi se vavã ko.

Esi Yesu gblɔ nya wɔdɔɖeamedzi mawo tso tsitretsitsia ŋu vɔ la, ebia nya si ana Marta nadzro eɖokui me lae be: “‘Èxɔ nya sia dzi sea?’ Egblɔ nɛ be: ‘Ɛ̃, Aƒetɔ; mexɔe se be wòe nye Kristo, Mawu ƒe Vi la.’” (Yohanes 11:26, 27) Ke wò ya ɖe—ɖe nàdi be yeaxɔ tsitretsitsi mɔkpɔkpɔa dzi ase abe ale si Marta xɔe se enea? Afɔ gbãtɔ si wòle be nàɖee nye be nàsrɔ̃ nu tso nu si nye Mawu ƒe tameɖoɖo na ameƒomea ŋu. (Yohanes 17:3; 1 Timoteo 2:4) Nu si nàsrɔ̃ la ate ŋu ana xɔse nasu asiwò. Ðe manyo ŋutɔ be nàbia Yehowa Ðasefowo be woadzro nu si Biblia fia tso nya sia ŋu la me kpli wò oa? Adzɔ dzi na wo be yewoadzro tsitretsitsi mɔkpɔkpɔ wɔnuku la ŋu me kpli wò.