Thomas Emlyn​—Busunyae Wògblɔa, Alo Nyateƒee Wòto?

AME kae nye Thomas Emlyn, eye nu kae ʋãe wòʋli nyateƒea ta? Nu kae míate ŋu asrɔ̃ tso egbɔ si aɖe vi na mí egbea?

Be míaɖo nya siawo ŋu la, ele be míatrɔ ɖe nu siwo dzɔ le England kple Ireland le ƒe alafa 17 lia ƒe nuwuwu kple 18 lia ƒe gɔmedzedze la ŋu. Ɣemaɣi la, ŋusẽ geɖe nɔ England Sɔlemeha la ŋu. Gake Protestant-ha vovovowo kple ame ɖekaɖekawo tsi tsitre ɖe sɔlemea ƒe nuwɔnawo kple nufiafiawo ŋu.

Aleae nɔnɔmea nɔ le England hafi wodzi Thomas Emlyn le May 27, 1663 dzi le Stamford, le Lincolnshire. Ƒe 19 koe wòxɔ esime wògblɔ mawunya zi gbãtɔ le sɔlemea me. Emegbe eva wɔ nunɔladɔ na nyɔnu bubume aɖe si nɔ London; esia megbe la, eʋu yi ɖatsi Belfast le Ireland.

Le Belfast la, wova ɖoe nunɔla ɖe nuto aɖe nu. Emegbe Emlyn wɔ nunɔladɔ le Dublin kple teƒe vovovowo.

Le ɣeyiɣi mawo me la, Emlyn nɔ Biblia srɔ̃m moveviɖoɖotɔe. Nu siwo wòsrɔ̃ la na wòke ɖi Mawuɖekaetɔ̃ ƒe nufiafia la, togbɔ be exɔ edzi se tsã hafi hã. Numekuku siwo wòwɔ le Nyanyuigbalẽawo me la na wòkpɔ nu siwo ɖo kpe gɔmesese nyuitɔ si va su esi la dzi.

Emlyn megblɔ nu si ŋu wòva ke ɖo la na amewo enumake o. Ke hã ame siwo nɔ Dublin sɔlemehaa me la de dzesii be megaƒoa nu tso Mawuɖekaetɔ̃ ƒe nufiafiaa ŋu le eƒe mawunyagbɔgblɔwo me o. Esi wònya be womada asi ɖe nu siwo ŋu yeke ɖo la dzi o ta la, eŋlɔ ɖi be: “Ne meƒo nu tso nu siwo ŋu meke ɖo ŋu ko la, nyemegale mɔ kpɔm be magakpɔtɔ anɔ ɖoƒe sia le afi sia o.” Le June 1702 me la, ehati nunɔlawo va bia gbee ku ɖe nu si tae megaƒoa nu tso Mawuɖekaetɔ̃ ƒe nufiafiaa ŋu le eƒe mawunyagbɔgblɔwo me o ŋu. Emlyn ʋu eme be yemegaxɔ nufiafia ma dzi se o, eye wògblɔ be yedi be yeaɖe asi le yeƒe ɖoƒea ŋu.

Le ŋkeke ʋɛ aɖewo megbe la, edzo le Dublin, le Ireland, heyi England. Gake le kwasiɖa ewo megbe la, etrɔ va Dublin be yeava kpɔ nya aɖewo gbɔ kple susu be ne yewɔ vɔ ko la, yeayi aɖatsi London mlɔeba. Esime wònɔ Dublin la, edi be yeaʋli yeƒe dzixɔsewo ta, eya ta eɖe agbalẽ si nye An Humble Inquiry Into the Scripture-Account of Jesus Christ (Yesu Kristo Ƒe Ŋutinya Si Le Ŋɔŋlɔawo Me La Ŋuti Numekuku Aɖe) ɖe go. Le agbalẽ sia me la, eƒo nu tso Ŋɔŋlɔawo me kpeɖodzi siwo ɖee fia be Yesu mate ŋu anye Mawu Ŋusẽkatãtɔ o la ŋu. Esia ku dzi na Emlyn ƒe sɔleme tsãtɔa me tɔ siwo le Dublin la vevie. Eya ta wotso enu le ʋɔnu.

Wolé Emlyn hekplɔe yi ʋɔnudrɔ̃ƒe si nye Queen’s Bench Court le Dublin le June 14, 1703 dzi. Le Emlyn ƒe agbalẽ si nye True Narrative of the Proceedings (Nu Si Tututu Yi Edzi Le Ʋɔnudrɔ̃ɣia) me la, egblɔ be wotso ye nu be “meŋlɔ agbalẽ aɖe si ŋu wogblɔ le be megblɔ busunyawo, nya dadawo kple bubuawo ɖo be Yesu Kristo mele tasɔsɔ me kple Mawu, Fofo la o.” Edze ƒãa be wotso afia xoxo hafi va drɔ̃ ʋɔnui gɔ̃ hã. Ireland Sɔlemea ƒe bisiɔp adre bɔbɔ nɔ anyi ɖe ʋɔnudrɔ̃laawo gbɔ hafi ʋɔnudɔdrɔ̃a dze egɔme. Womeɖe mɔ na Emlyn be wòaɖe eɖokui nu o. Richard Levins, si nye senyala bubume aɖe la gblɔ na Emlyn be “[yewole] exlã ge ɖe anyi abe amegãxi ene,” si fia be yewomele mɔ na gee be wòaʋli eɖokui ta o. Esi afiatsoɣia ɖo la, Ireland ƒe Ʋɔnudrɔ̃lagã Richard Pyne gblɔ na ʋɔnudrɔ̃lawo be ne wometso afia si yewole mɔ kpɔm na o la, yeƒe “aƒetɔ bisiɔpawo le afi ma hee.” Anɔ eme be esia fia be woahe to na ʋɔnudrɔ̃lawo vevie.

Esi wobu fɔ Emlyn la, senyalawo ƒe amegã la gblɔ nɛ be wòagbe eƒe nyawo. Gake Emlyn gbe. Wobla fe nɛ hegaka ƒe ɖeka nɛ be wòatsɔ anɔ ga me. Esi mete ŋu xe fea o ta la, enɔ gaxɔ me ƒe eve va se ɖe esime exɔlɔ̃ aɖe yi amegãwo gbɔ ɖaɖe kuku ɖe eta be woaɖe fea dzi nɛ. Wova ɖe asi le Emlyn ŋu mlɔeba le July 21, 1705 dzi. Ale si wodo vloe lae na wògblɔ nya si dze le etame la be: “Melɔ̃ faa be makpe fu ɖe nu si mexɔ se be enye nyateƒea ku ɖe [Mawu] kple eƒe ŋutikɔkɔe ŋu la ta.”

Emlyn ʋu yi London, eye emegbe wòwɔ dɔ kple William Whiston ɖekae. Eya hã nye Biblia ŋuti nunyala si wonya de gbe le esi wòta agbalẽ aɖe si me wògblɔ nu siwo wòsusu be wonye Biblia me nyateƒea ɖo ta. Whiston de bubu Emlyn ŋu eye wògblɔ tso eŋu be enye “‘blema kristotɔnyenye’ ƒe ‘ame vevi gbãtɔ si ʋu eƒe xɔse me dzinɔameƒotɔe.’”

Emlyn kpɔe be Mawuɖekaetɔ̃ ƒe nufiafia si dze le Atanasio ƒe Xɔsemeʋuʋua me la mewɔ ɖeka kple Biblia ƒe nufiafia o, abe ale si William Whiston kple agbalẽnyala xɔŋkɔ bubu si nye Isaac Newton hã kpɔe ene. Egblɔ be: “Esi mebu nuwo ŋu hedzro Ŋɔŋlɔawo me nyuie vɔ la, . . . mekpɔ susu vevi siwo ta wòhiã be . . . magbe nu le dzixɔse siwo nɔ asinye tsã ku ɖe Mawuɖekaetɔ̃ ŋu la gbɔ.” Eƒo nya ta be “Yesu Kristo ƒe Mawu, si nye Fofoa la ɖeka koliae nye Ŋusẽkatãtɔ la.”

Nu kae na Emlyn ƒo nya ta nenema? Ede dzesi mawunyakpukpui geɖe siwo ɖe vovototo si le Yesu kple Fofoa dome la fia. Esia ƒe kpɔɖeŋu ʋɛ aɖewoe nye esi (Ale si Emlyn ɖe ŋɔŋlɔawo mee lae le nuŋɔŋlɔ si viã la me):

• Yohanes 17:3: “Womegblɔ kpɔ gbeɖe be Kristoe nye Mawu ɖeka la, alo be eyae nye Mawu, kaka wòayi Mawu vavã ɖeka kolia la nye ge o.” Fofo la koe woyɔ be “Mawu vavã ɖeka la.”

• Yohanes 5:30: “Vi la mewɔa eya ŋutɔ ƒe lɔlɔ̃nu o, ke boŋ Fofo la ƒe lɔlɔ̃nu.”

• Yohanes 5:26: “Fofoa gbɔe eƒe Agbe dzɔ tso.”

• Efesotɔwo 1:3: “Woyɔa Yesu Kristo zi geɖe be Mawu ƒe Vi, gake míekpɔe le afi aɖeke kpɔ be woyɔ Fofo la be Mawu ƒe Fofo o, evɔ woyɔa [Mawu] ya zi geɖe be míaƒe Aƒetɔ Yesu Fofo.”

si Emlyn dzro kpeɖodziawo katã me vɔ la, egblɔ kple kakaɖedzi be: “Nya aɖeke mele Ŋɔŋlɔ kɔkɔeawo me si gblɔ kã be Fofo la, Vi la, kple Gbɔgbɔ Kɔkɔe la le ɖeka alo wonye ame ɖeka o, eye nya aɖeke meli si ana míasusui nenema hã o.”

Egbea, ame geɖe vɔ̃na be yewoagblɔ nu si tututu Ŋɔŋlɔawo fia. Gake Emlyn ya ʋli Biblia me nyateƒea ta. Ebia be, “Ne ame aɖe maʋli nyateƒe vevi siwo ŋu wòke ɖo le Ŋɔŋlɔ kɔkɔeawo me, siwo wòkpɔ be wo me kɔ eye kakaɖedzi le wo ŋu la ta o la, ke susu ka tae wòanɔ wo xlẽm ahanɔ wo me dzrom?” Emlyn ɖoe kplikpaa be yemamia nu ɖe nyateƒea dzi o.

Kpɔɖeŋu si Emlyn kple ame bubuwo ɖo la ate ŋu aʋã mí míadzro mía ɖokui me kpɔ be ɖe míayi edzi aʋli nyateƒea ta ne wodo vlo mí hã. Míawo hã míate ŋu abia mía ɖokui be, ‘Kae le vevie wu​—amewo ƒe bubu kple ŋudzedzekpɔkpɔ ɖe mía ŋue loo alo nyateƒe si le Mawu ƒe Nyaa me la ta ʋiʋli yea?’