Nu Ka Tae Wòle Be Nànya Nu Si Mawu Fiaɖuƒea Nye?

Ame miliɔn geɖe le mɔ kpɔm na Mawu Fiaɖuƒea le xexea me godoo. Wokpɔa mɔ nɛ abe ale si Yesu wɔe ene, elabena efia eyomedzelawo be woado gbe ɖa be: “Wò fiaɖuƒe nava! Woawɔ wò lɔlɔ̃nu le anyigba dzi.”​—Mateo 6:10, Eʋegbe Biblia.

Nukutɔe la, esime ame geɖe tsɔ ɖe le Mawu Fiaɖuƒea me vevie la, subɔsubɔha akpa gãtɔ ya metsi dzi ɖe eŋu boo o. Esia ta, ŋutinyaŋlɔla H. G. Wells gblɔ be Yesu de “asixɔxɔ gã aɖe . . . nufiafia tso nu si wòyɔ be Dziƒofiaɖuƒe la ŋu” ale gbegbe, evɔ le Aƒetɔ Wells ƒe nya nu la, ‘Kristotɔwo ƒe subɔsubɔha akpa gãtɔ ya meƒoa nu tso fiaɖuƒe sia ŋu nenema le woƒe nufiafia me o.’

Gake Yehowa Ðasefowo ya to vovo, elabena woƒoa nu tso Mawu Fiaɖuƒea ŋu ŋutɔ. Wò ya bu nya sia ŋu kpɔ: Míetaa míaƒe magazine vevietɔ si xlẽm nèle fifia la ɖe gbegbɔgblɔ 220 sɔŋ me. Ðe sia ɖe ƒe xexlẽme si wotana la ade miliɔn 46 kloe, si wɔe be wòƒo magazine bubu ɖe sia ɖe ta le xexea me godoo. Nyati vevi ka ŋue magazine sia ƒoa nu tso? Eƒe ŋkɔ bliboa ye nye: Gbetakpɔxɔ Le Gbeƒã Ðem Yehowa Ƒe Fiaɖuƒe.a

Nu ka tae Yehowa Ðasefowo le agbagba dzem alea gbegbe be yewoaɖe gbeƒã alo akaka Mawu Fiaɖuƒea ŋuti nya ɖo? Susu si tae nye be, gbã, míexɔe se be Mawu Fiaɖuƒea ye nye nyati vevitɔ si le gbedeasi si le Biblia, si nye agbalẽ vevitɔ kekeake le xexea me la me. Gakpe ɖe eŋu la, míeka ɖe edzi be Mawu Fiaɖuƒea ɖeka koliae koe ate ŋu akpɔ kuxi siwo le fu ɖem na amegbetɔwo egbea la gbɔ.

Ne Yehowa Ðasefowo le nu fiam amewo tso Mawu Fiaɖuƒea ŋu la, wodzea agbagba be yewoasrɔ̃ Yesu ƒe kpɔɖeŋu. Esi Yesu nɔ anyigba dzi la, Mawu Fiaɖuƒea ye nye nu vevitɔ nɛ, eye eya koŋ ŋue wòƒo nu tso le eƒe subɔsubɔdɔa me. (Luka 4:43) Nu ka tae Fiaɖuƒea nɔ vevie na Yesu nenema gbegbe? Eye aleke Fiaɖuƒea ate ŋu aɖe vi na wòe? Míele dzi dem ƒo na wò be nàxlẽ nyati siwo kplɔ esia ɖo be nàkpɔ ale si Biblia ɖo nyabiase siawo ŋui.