Teƒeɖoɖo Le Nuteƒewɔwɔ Ŋu
1 Wogblɔ na mí le Hebritɔwo 11:6 be Mawu “[nye] teƒeɖola na amesiwo dinɛ vevie.” Mɔ siwo dzi wòɖoa eteƒe na esubɔla siwo tsɔ wo ɖokui nɛ eye ‘wowɔa nuteƒe le nu suewo me’ ye nye be ‘etsɔa wo ɖoa nu geɖewo nu.’ (Mat. 25:23) Ne míagblɔe bubui la, efia be zi geɖe la, Yehowa gatsɔa subɔsubɔ mɔnukpɔkpɔ bubuwo kpenɛ na eƒe ɖasefo nuteƒewɔlawo ɖe woƒe nuteƒewɔwɔ ta.
2 Woɖo apostolo Paulo ƒe nuteƒewɔwɔ teƒe nɛ esi wode subɔsubɔdɔ si kplɔe yi Europa kple Asia Sue ƒe dugãwo kple duviwo me la asi nɛ. (Tim. I, 1:12) Togbɔ be ebia agbagbadzedze geɖe hafi Paulo nawɔ eƒe subɔsubɔdɔa bliboe hã la, ede asixɔxɔ gã mɔnukpɔkpɔ si wòxɔ la ŋu. (Rom. 11:13; Kol. 1:25) Edze agbagba vevie di mɔnukpɔkpɔ siwo me wòaɖe gbeƒã le tsɔ fia be yekpɔ ŋudzedze ɖe eŋu tso dzi me. Eto eƒe dɔwɔwɔ dzonɔamemetɔe me fia kɔte be yenɔa agbe si sɔ ɖe yeƒe xɔse la nu. Eƒe kpɔɖeŋua ʋãa mí be míade asixɔxɔ gã aɖe míaƒe subɔsubɔ mɔnukpɔkpɔwo ŋu.
3 Yehowa De Subɔsubɔdɔ Asi na Mí: Aleke míawɔ aɖee fia be míebua subɔsubɔ mɔnukpɔkpɔ sia abe alesi Paulo bui ene? Míeɖenɛ fiana ne míedia mɔ siwo dzi míato adzi míaƒe gomekpɔkpɔ le subɔsubɔdɔa me ɖe edzi. Ne míezãa mɔnukpɔkpɔ ɖesiaɖe tsɔ ɖia vomeɖase kple tso ʋɔtru nu yi ʋɔtru nu. Ne míegbugbɔna yia amesiwo katã menɔ aƒeme esi míede gbã o gbɔ eye míetrɔna yia amesiwo katã ɖe ɖetsɔleme fia gbɔ. Eye ne míewɔ aƒeme Biblia nusɔsrɔ̃ ƒe ɖoɖo kple amewo la, míezɔna ɖe edzi.
4 Paulo xlɔ̃ nu le míaƒe subɔsubɔdɔa ŋu be, ‘Tsɔ hiahiã kpata nɔ edzii.’ (Tim. II, 4:2) Ne nane hiã kpata la, ele be woatso ɖe eŋu enumake. Ðe míewɔa míaƒe subɔsubɔdɔa abe nusi hiã kpata ene, eye míedanɛ ɖe nɔƒe gbãtɔ le míaƒe agbe mea? Le kpɔɖeŋu me, míalɔ̃ be modzakaɖeɖe alo mía ŋutɔ míaƒe kwasiɖanuwuwu wɔnawo nagblẽ ɣeyiɣi si wòle be míatsɔ ayi gbeadzii me o. Esi míeka ɖe edzi be nuɖoanyi sia ƒe nuwuwu ɖo vɔ ta la, míeka ɖe edzi hã be gbeƒãɖeɖe Fiaɖuƒe nyanyuia ye nye dɔ vevitɔ kekeake si wòle be míawɔ.
5 Míaƒe nuteƒewɔwɔ na Mawu dzena le alesi míekuna ɖe eŋu nɔa eŋu kplikplikpli eye míenɔa dɔ si wòde asi na mí la dzi me. Mina míawɔ míaƒe subɔsubɔdɔa bliboe, ale be Yehowa naɖo míaƒe nuteƒewɔwɔ teƒe na mí geɖe.