Ðe ‘Ŋù Le Wò Ŋutilã Mea’?
1 Edzroa mí vevie be míawɔ nusianu si míate ŋui awɔ nyanyuigbeƒãɖeɖedɔ si wode mía si. Gake esesẽna na mía nɔviŋutsu kple nɔvinyɔnu lɔlɔ̃tɔ geɖe be woawɔe bliboe le esi dɔléle alo nuwɔametɔnyenye zu kplamatsedonu na wo ta, ale be wòsesẽna be woawɔ dɔa alesinu wodii. Dziɖeleameƒoa nu gasẽna na wo vevietɔ ne wokpɔ be amesiwo dome wole biã ŋku ɖe subɔsubɔdɔa ŋu vevie.—Kor. I, 9:16.
2 Kpɔɖeŋu si Míasrɔ̃: Enɔ na apostolo Paulo be wòawɔ avu kple ‘ŋù aɖe si nɔ eƒe ŋutilã me.’ Eɖe kuku na Yehowa zi gbɔ zi etɔ̃ be wòaɖe mɔxenu ɖefuname si wòyɔ be “Satana ƒe dɔla” si nɔ eƒom la ɖa. Gake togbɔ be enɔ fu ɖem nɛ hã la, Paulo do dzi eye wòʋli yi ŋgɔ le eƒe subɔsubɔdɔa me. Mewɔ eɖokui nublanuitɔ alo zu nyatoƒoetola ɖaa o. Ewɔ etɔ sinua. Nusi na wòte ŋu nɔ te ɖe enue nye dzideƒonya si tso Mawu gbɔ be: “Nye amenuveve sɔ gbɔ na wò; elabena nye ŋusẽ zu blibo le gbɔdzɔgbɔdzɔ me.” Paulo ƒe gbɔdzɔgbɔdzɔa va zu ŋusẽtsoƒe boŋ esi wòsrɔ̃ alesi wòatsɔ nɔnɔmea nenema eye wòva ɖo ŋu ɖe Yehowa kple gbɔgbɔ kɔkɔea ŋu bene yeate ŋu ado dzi.—Kor. II, 12:7-10.
3 Alesi Nàte Ŋu Ado Dzii: Ðe gbɔdzɔgbɔdzɔ si le amegbetɔ ŋu doa kplamatse wò Mawu subɔsubɔa? Ne nenemae la, ke srɔ̃ nukpɔsusu si nɔ Paulo si. Ne dɔyɔmɔnu aɖeke meli si ada wò dɔlélea alo nuwɔametɔnyenyea keŋkeŋ le fifi nuɖoanyia me o hã la, àte ŋu atsɔ wò ŋuɖoɖeŋu katã ada ɖe Yehowa dzi, amesi nya nusiwo hiã wò eye wòana ‘ŋusẽ—si gbɔ dzɔdzɔmetɔ ŋu’ la wò. (Kor. II, 4:7) Xɔ kpekpeɖeŋu si woate ŋu ana wò le hamea me, eye mègaɖe ɖokuiwò ɖe aga o. (Lod. 18:1) Ne ʋɔtru nu yi ʋɔtru nu ƒe dɔa wɔwɔ sesẽ na wò la, di mɔ nyui siwo dzi nàto awɔ vomeɖaseɖiɖi alo telefon dzi ɖaseɖiɖi.
4 Togbɔ be ŋù si le wò ŋutilã me maɖe mɔ nàwɔ subɔsubɔdɔa alesi nèdii o hã la, mègasusu be wɔƒe aɖeke mele ye si o. Ne èwɔa nusi wò ŋusẽ kple nɔnɔmewo aɖe mɔ be nàwɔ la, ke wò hã àte ŋu ‘aɖi ɖase le Mawu ƒe amenuveve nyanyuia ŋuti tsitotsito’ abe Paulo ene. (Dɔw. 20:24) Zi alesi nèle agbagba dzem be yeawɔ yeƒe subɔsubɔdɔa ko la, nyae be edzea Yehowa ŋu nyuie.—Heb. 6:10.