Ðe Wole Vi Ðem na Wòa?
1 Ame miliɔn geɖe dina egbea be yewoanya alesi yewoawɔ anɔ te ɖe kuxiwo nu eye yewoanɔ agbe si me dzidzɔ le. Woxlẽa agbalẽ siwo fiaa alesi woatrɔ asi le ame ƒe agbenɔnɔ ŋu dometɔ geɖe alo biaa aɖaŋuɖoɖo tso ƒuƒoƒowo kple habɔbɔwo gbɔ tso nusi woawɔ atsɔ ana be woƒe agbenɔnɔ nanyo ɖe edzi wu. Ðewohĩ wo dometɔ aɖewo ate ŋu atɔ asi viɖe ʋɛ aɖewo siwo wokpɔ tso eme dzi. Gake ne míelé ŋku ɖe alesi agbenɔnɔ le egbea ŋu la, ɖe míate ŋu agblɔ be amewo srɔ̃ alesi woanɔ anyi le ŋutifafa me, le agbe si me dzidzeme vavãtɔ le to amegbetɔwo ƒe nufiameɖoɖowo dzia? Kura o!—Kor. I, 3:18-20.
2 Gake mía Wɔla tsɔ nufiame si ŋu viɖe le wu ɖesiaɖe na amesiwo katã alɔ̃ asee la femaxee. Yehowa di be yeƒe nufiafia naɖe vi na amesiame. Ena eƒe Nya si tso gbɔgbɔ me mí dɔmenyotɔe be wòafia dzɔdzɔenyenye ƒe mɔ ameƒomea eye wòna be woaɖe gbeƒã eƒe Fiaɖuƒe ŋuti nyanyuia le xexe bliboa katã me. (Ps. 19:8, 9; Mat. 24:14; Tim. II, 3:16) Agbe si me dzidzɔ akuakua le do ƒome kple toɖoɖo Yehowa ƒe sededewo tẽ.—Yes. 48:17, 18.
3 Yehowa ƒe mɔfiame ƒo kpekpeɖeŋunameɖokuigbalẽ alo asitɔtrɔleameɖokuiŋuɖoɖo ɖesiaɖe si le xexeame la ta sasasã. Kpekpeɖeŋu nyuitɔ kple viɖe mavɔ ate ŋu asu mía si ne míewɔ Yehowa ƒe mɔnuɖoɖo siwo ŋu woƒo nu tsoe le eƒe Nya la me kple esi eƒe habɔbɔa fiana la ŋudɔ bliboe.—Pet. I, 3:10-12.
4 Na Hamea ƒe Kpekpewo Nàɖe Vi na Wò: Egbea Yehowa tsɔ ɖe le eƒe mɔwo fiafia mí me eye eɖea vi na mí ne míelé to ɖe eƒe nufiame ŋu. Kpekpe atɔ̃ siwo míewɔna kwasiɖa ɖesiaɖe nye kpeɖodzi be Yehowa tsɔ ɖe le eme na mí lɔlɔ̃tɔe. Míaƒe sidzedze Mawu dzina ɖe edzi ne míede hamea ƒe kpekpewo. Míesrɔ̃a alesi míakpɔ mía ɖokui ta tso nusi nye vɔ̃ si me ne míete ɖe Yehowa ŋu kplikplikpli. Esia nana míaƒe dzidzɔkpɔkpɔ dzina ɖe edzi.
5 Viɖe bubuwo gali. Míete ŋu ‘kekea mía ɖokui ɖe enu’ le hamea ƒe kpekpewo me. (Kor. II, 6:13) Esia bia be míanya hamea me tɔ bubuwo. Dzidedeƒo na mía nɔewo ɖea vi na mí, abe alesi apostolo Paulo ŋlɔe ɖe eƒe lɛta si wòɖo ɖe Romatɔwo me ene. (Rom. 1:11, 12) Esime wònɔ agbalẽ ŋlɔm na Hebritɔwo la, exlɔ̃ nu amesiwo ɖewohĩ Kristotɔwo ƒe kpekpewo mademade nɔ numame zum na la vevie.—Heb. 10:24, 25.
6 Dzidzɔ si me dzidzeme le ƒe amesisusu do ƒome kplikplikpli kple ɖetsɔtsɔ le ame bubuwo ƒe nyonyo me. Wode dzi ƒo na mí be míadi mɔ siwo dzi míato ana ame bubuwo nakpɔ dzidzɔ. Eyata míaƒe Kristotɔwo ƒe kpekpewo ɖea vi na mía ŋutɔwo kple amesiwo míedea ha tuameɖowo kplii. Nusi wodi tso mía si enye be míakpɔ gome le wo me bliboe.
7 Apostolo Paulo gblɔ nya ma tɔgbe le eƒe aɖaŋu si wòɖo na Timoteo me esi wògblɔ be: ‘Mawusosroɖa nanye wò taɖodzinu nàtsɔ anɔ ɖokuiwò mlamee.’ (Tim. I, 4:7) Míate ŋu abia mía ɖokui se be: ‘Ðe mele hehe nam ɖokuinyea? Ðe mele nanam be nusiwo mesena le hamea ƒe kpekpewo me le vi ɖem nama?’ Míate ŋu aɖo eŋu be ẽ, ne míeléa to ɖe nusiwo míesena le kpekpeawo me ŋu eye míedzea agbagba be míatsɔ nusi míesrɔ̃ ade dɔwɔwɔ me. Ele be míatsɔ xɔseŋku akpɔ nu yi ŋgɔ wu nɔvi siwo le nua fiam eye míabu Yehowa be eyae nye eƒe amewo ƒe Nufiala Gãtɔ.—Yes. 30:20.
8 Teokrasi Subɔsubɔ Suku Kple Subɔsubɔ Kpekpea: Wotrɔ asi le kpekpe eve siawo ŋu be wòakpe ɖe mía ŋu míabi le Kristotɔwo ƒe subɔsubɔdɔa wɔwɔ me. Teokrasi Subɔsubɔ Sukua ƒe taɖodzinu tututue nye ema—enye suku si me sukuviwo xɔa nufiame kple aɖaŋuɖoɖo le enuenu. Mɔnukpɔkpɔ sua asiwò be nàɖe ŋgɔyiyi si nèwɔ le dutoƒonuƒoƒo kple Mawu ƒe Nya la fiafia me afia. Gake be sukua naɖe vi gbogbotɔ la, ele be nàŋlɔ ŋkɔ ɖe eme, ade kpekpea ɣesiaɣi eye nàtsɔ wò dɔdasiwo nu vevii. Aɖaŋu si woɖo xɔxɔ kple wo tsɔtsɔ wɔ dɔe akpe ɖe ŋuwò be nàwɔ ŋgɔyiyi.
9 Subɔsubɔ Kpekpea fiaa vevienyenye si le Kristotɔwo ƒe subɔsubɔdɔa ŋu kple alesi míate ŋu akpɔ gome le nusrɔ̃lawo wɔwɔ dɔa mee mí. Ðe nusiwo wofiana le kpekpe eve siawo me le vi ɖem na mia kple wò ƒomea bliboea? Kristotɔ srɔ̃tɔ aɖewo gblɔ be: “Míese wogblɔ le Subɔsubɔ Kpekpeawo dometɔ ɖeka me be ele be mía kple míaƒe ƒomeawo míadzro gbesiagbe mawunyakpukpuia me ɖekae. Míenɔ esia wɔm tsã o, gake fifia míewɔnɛ.” Vi kae wòɖe na wo? Wolɔ̃ ɖe edzi be: “Míede dzesii be míesea vivi na dzeɖoɖo le nuɖukplɔ̃ ŋu wu tsã. Míegahea nya le fiẽnuɖuɣiwo o.” Ðe kpekpeawo ɖea vi na ɖevi suewo gɔ̃ hã? Ẽ. Vidada la gblɔ be: “Edze ƒã be kpekpeawo le ŋusẽ gã aɖe kpɔm ɖe mía viwo dzi. Le kwasiɖa aɖe me la, míelé mía viŋutsuvi si xɔ ƒe ade wònɔ alakpa dam. Gake nufiamenuƒo si woƒo le kwasiɖa ma me ku ɖe alakpadada ŋu. Mía viŋutsua trɔ kpɔ fofoa kple mo si ɖe fɔbuameɖokui fia ŋutɔ eye wòtrɔ nɔ eƒe zikpuia me kpoo. Esrɔ̃ nu tso eme eye kuxi aɖeke megado mo ɖa emegbe o.”
10 Nɔvinyɔnu mɔɖela aɖe gblɔ be edzɔ dzi na ye be woɖoa aɖaŋu le mɔ siwo dzi míato ana be míaƒe subɔsubɔdɔa naganyo ɖe edzi wu le Subɔsubɔ Kpekpea me. Nukatae? Eɖe eme be: “Nyemebua wo ŋu boo o. Mesusunɛ ɣeaɖewoɣi be aɖaŋuɖoɖo siwo le Míaƒe Fiaɖuƒe Subɔsubɔdɔ me mawɔ dɔ o. Gake ne mese le Subɔsubɔ Kpekpea me be ele be míatee akpɔ la, aɖaŋuɖoɖoa tsɔtsɔ de dɔwɔna me ƒe dzonɔameme yɔa menye fũ. Ewɔnɛ be dzidzɔ nɔa subɔsubɔdɔa me!” Esi wòtsɔ aɖaŋu si woɖo be míadze agbagba adze Biblia-nusɔsrɔ̃ gɔme zi gbãtɔ si míeyi amewo gbɔ de dɔwɔwɔ me kwasiɖa geɖe megbe la, edze nusɔsrɔ̃ gɔme kple nyɔnuvi aɖe si nɔ gbe dom ɖa nɔ kpekpeɖeŋu biam zi gbãtɔ si wòyi egbɔ.
11 Ne èse nuƒo aɖe si me woɖo Biblia me ɖaŋuwo le ame ŋutɔ ƒe tiatiawɔwɔ ŋu la, ɖe nèbunɛ be Yehowae le nu ƒom na ye tẽa? Nɔviŋutsu aɖe see le eɖokui me nenema. Egblɔ be: “Nyitsɔ laa le kpekpe aɖe me la, nɔviŋutsu aɖe ƒo nu tso modzakaɖeɖe siwo tɔgbe sɔ na Kristotɔwo kple esiwo mesɔ na wo o ŋu. Melɔ̃a kɔdada kpɔkpɔ le television dzi tsã. Gake le kpekpe ma megbe la, mekpɔ be kamedefefe sia le esiwo mesɔ be Kristotɔwo nakpɔ o la dome. Eyata medzudzɔ ekpɔkpɔ.” Ẽ, togbɔ be nɔviŋutsu sia lɔ̃a nane si me ŋutasesẽ le tsã vevie hã la, ebɔbɔ eɖokui ɖe Yehowa ƒe mɔfiafia te.—Ps. 11:5.
12 Dutoƒo Kpekpea, Gbetakpɔxɔ Nusɔsrɔ̃, Kple Hame ƒe Agbalẽ me Nusɔsrɔ̃: Dutoƒonuƒo si míesena kwasiɖa ɖesiaɖe kuna ɖe Biblia me nyati vovovowo ŋu. Vi kawo ɖem nuƒo siawo le na wò? Kristotɔ srɔ̃ŋutsu aɖe ƒo nu tso vi siwo wòɖe nɛ ŋu be: “Dutoƒonuƒo aɖe ƒo nu tso gbɔgbɔ ƒe kutsetsewo katã ŋu. Nuƒola la gblɔ le eɖokui ŋu be, be yeate ŋu atse ku siawo la, yetiaa nɔnɔmeawo dometɔ ɖeka wɔa dɔ le eŋu kwasiɖa ɖeka. Le kwasiɖa la ƒe nuwuwu la, yedea ŋugble le mɔ siwo nu yeɖe kutsetse ma fia le yeƒe gbesiagbenuwɔnawo me ŋu. Emegbe yegatsɔa amenyenye bubu wɔa dɔ le eŋu le kwasiɖa si kplɔe ɖo me. Eƒe susua dze ŋunye eye nye ŋutɔ medze ewɔwɔ gɔme.” Nusiwo wòsrɔ̃ tsɔtsɔ de dɔwɔwɔ me ƒe kpɔɖeŋu nyui kae nye si!
13 Gbetakpɔxɔ Nusɔsrɔ̃a fiaa nu mí be míatsɔ Biblia ƒe gɔmeɖosewo ade dɔwɔwɔ me le agbe me nudzɔdzɔ vovovowo me. Esia kpena ɖe mía ŋu be míaƒe susu kple dzi nadze akɔ anyi kpoo togbɔ be agbemedzimaɖitsitsiwo li hã. Gbetakpɔxɔ Nusɔsrɔ̃a kpena ɖe mía ŋu be míanɔ akasanu kple nyateƒe siwo woɖena ɖe go fiana vivivi la. Le kpɔɖeŋu me, ɖe May 1, 1999, Gbetakpɔxɔ, ƒe nyati siwo nye, “Nusiawo Ava Eme Tsã,” “Amesi Le Exlẽm la, Nese Egɔme,” kple “Minɔ Ŋudzɔ eye Miku Kutri!” sɔsrɔ̃ meɖe vi na mí oa? Dɔ kae nusɔsrɔ̃ siawo wɔ ɖe dziwò? Ðe nèɖenɛ fiana le wò nuwɔnawo me be yetsɔ ɖe le Yesu ƒe nuxlɔ̃ame si ku ɖe etsɔme ŋu mea? Ðe nèle dzadzram ɖo ɖe dodokpɔ siwo le ŋgɔ gbɔna ne míekpɔ “aƒedo ƒe ŋunyɔnu, si hea gbegblẽ vɛ si . . . anɔ tsitre le kɔkɔeƒea” ŋua? (Mat. 24:15-22) Ðe wò taɖodzinuwo kple alesi nènɔa agbee ɖee fia be menye ŋutilãmenuwo nu ƒoƒoƒu o ke boŋ Yehowa ƒe ŋkɔ ŋutikɔkɔ ye nye nu vevitɔ kekeake na wò le agbe mea? Ðe Gbetakpɔxɔ Nusɔsrɔ̃a mele vi ɖem na mí fifia oa?
14 De ŋugble le nu agbɔsɔsɔme si míesrɔ̃na le Hame ƒe Agbalẽ me Nusɔsrɔ̃ me kwasiɖa sia kwasiɖa ŋu kpɔ. Fifia míele Biblia-gbalẽ si nye Daniel srɔ̃m. Le dzinu ene siwo míetsɔ le Biblia-gbalẽ sia srɔ̃m me la, ɖe mèkpɔe be míaƒe xɔse le sesẽm ɖe edzi kwasiɖa sia kwasiɖa oa? Abe Yehowa ƒe nyagblɔɖila Daniel si gbɔ melɔ̃a nu lena o ene la, míedoa ŋusẽ míaƒe xɔse ale be míate ŋu ado dzi.
15 Yehowa Fiaa Nu Mí be Míanɔ Agbe si me Dzidzɔ Le: Míeƒoa asa na dzigbagbã geɖe ne míewɔ Mawu ƒe sewo dzi. Gawu la, enaa míenɔa agbe si me dzidzɔ le. Yehowa ƒe mɔfiafia dzi zɔzɔ na míeva zua amesiwo kpɔa gome le eƒe dɔ me, menye nukpɔlawo ko o. Eye amesiwo wɔa Mawu ƒe dɔ la nye dzidzɔmewo.—Kor. I, 3:9; Yak. 1:25.
16 Nɔ alesi nàtsɔ nusiwo nèsena le hamea ƒe kpekpewo me ade dɔwɔwɔ me ŋu bum. (Yoh. 13:17) Subɔ Mawu dzonɔamemetɔe kple wò dzi blibo. Àkpɔ dzidzɔ ale gbegbe. Wò agbe anyo ɖe edzi eye gɔmesese anɔ eŋu wu. Ẽ, woaɖe vi na wò.