Tsɔ Ðe Le Eme na Amewo—To Tɔtrɔ Ðe Nɔnɔme Vovovowo Ŋu Me
1 Apostolo Paulo nye amesi te ŋu trɔna ɖe nɔnɔme vovovo siwo wòdoa goe le nyanyuigbɔgblɔdɔa me ŋu, eye esia nye kpɔɖeŋu nyui aɖe si wòɖo ɖi. (Kor. I, 9:19-23) Ele be míadze agbagba awɔe nenema. Zi geɖe ne míedo ŋgɔ de ŋugble le nuwo ŋu vie la, míate ŋu atrɔ asi le kpɔɖeŋu dzeɖonya siwo dzena le Míaƒe Fiaɖuƒe Subɔsubɔdɔ me ŋu be wòasɔ na amesiwo le míaƒe anyigbamama me la ƒe nuhiahiãwo. Ne míele gegem ɖe aƒe aɖe me la, ɖewohĩ míade dzesi nanewo, siwo ana míanya nusiwo me aƒemenɔlaa tsɔ ɖe le ale be míate ŋu ade wo míaƒe dzeɖonyaa me. Ke hã, mɔnu bubu aɖe gali si dzi míate ŋu ato atrɔ ɖe nɔnɔme vovovowo ŋu le gbeadzi.
2 Tu Wò Nyawo Ðe Woƒe Nyagbɔgblɔwo Dzi: Ne míele nyanyuia gblɔm la, zi geɖe míebiaa nya heɖea mɔ na aƒemenɔlawo be woaɖo eŋu. Aleke nèbua aƒemenɔlaa ƒe nyaŋuɖoɖoae? Ðe nèɖenɛ fiana ɖewoɖewoe be yekpɔ ŋudzedze ɖe ŋuɖoɖoa ŋu ko heyina nya si nètsɔ yii la gbɔgblɔ dzia? Alo ɖe wò nyagbɔgblɔwo ɖenɛ fiana be yetsɔ ɖe le aƒemenɔlaa ƒe nyaŋuɖoɖoa mea? Ne ètsɔa ɖe le amewo ƒe nyagbɔgblɔwo me vavã la, ke àte ŋu abia nya bubuwo aɖaŋutɔe ahanya nusi tututu le woƒe susu me. (Lod. 20:5) Ewɔwɔ alea ana nàte ŋu anya Fiaɖuƒegbedasia ŋuti numeɖeɖe si nàzã wòaɖe kpe wu le nya siwo ŋu wò nyaselawo tsi dzi ɖo gbɔ kpɔkpɔ me.
3 Esia bia be míalɔ̃ faa atrɔ ɖe nya bubuwo ŋu, ke menye esiwo ŋu míedzra ɖo ɖo ko o. Ne kuxi aɖe si ŋu woƒo nu tsoe le nyadzɔdzɔwo me ye míetsɔ dze dzeɖoɖoa gɔmee, eye aƒemenɔlaa do nutoa me nudzɔdzɔ bubu aɖe ŋu nya alo eya ŋutɔ ƒe nya aɖe si ŋu wòtsi dzi ɖo ɖa la, míaƒe didi vevie be míakpɔ aƒemenɔlaa ƒe nuhiahiãwo gbɔ aʋã mí be míatu Biblia me dzeɖoɖoa ɖe nusi me wòtsɔ ɖe le wu dzi.—Fil. 2:4.
4 Tɔtrɔ Ðe Nɔnɔmea Ŋu: Ne aƒemenɔlaa bia nya aɖe la, ɖewohĩ aɖe vi awu ne míeyi ɖawɔ nyaa ŋuti numekuku hetrɔ yi ɣebubuɣi va ɖe nu me nɛ. Azɔ hã, míate ŋu atsɔ agbalẽ siwo dzro nyatia me yi ŋgɔe wu ayi nɛ. Esiawo katã aɖee afia be míedi vevie nyateƒe be míakpe ɖe amewo ŋu woava nya Yehowa.—Kor. II, 2:17.