Mitsɔ Nyagblɔɖilawo Abe Kpɔɖeŋu Ene—Amos
1. Nu ka tae Amos ƒe kpɔɖeŋua ate ŋu ade dzi ƒo na mí?
1 Ðe nèse le ɖokuiwò me kpɔ be yemedze aɖe gbeƒã o le esi mènya agbalẽ o alo nu mede dziwò boo o ta? Ne nenemae la, ke Amos ƒe kpɔɖeŋua ate ŋu ade dzi ƒo na wò. Alẽnyila kple apaɖila wònye, ke hã Yehowa do ŋusẽe wòɖe gbeƒã gbedeasi vevi aɖe. (Amos 1:1; 7:14, 15) Nenema ke egbea la, Yehowa zãa ame dahe siwo bɔbɔa wo ɖokuiwo. (1 Kor. 1:27-29) Nu bubu kawoe míagate ŋu asrɔ̃ tso nyagblɔɖila Amos gbɔ le subɔsubɔdɔa wɔwɔ me?
2. Nu ka tae míate ŋu anɔ te sesĩe ne wotsi tre ɖe mía ŋu le subɔsubɔdɔa me?
2 Nɔ Te Sesĩe Ne Wotsi Tre Ðe Ŋuwò: Esi Amazya, si nye nyivisubɔsubɔ ƒe nunɔla le Israel ƒe dzieheto ewo fiaɖuƒea me, se Amos ƒe nyagblɔɖiawo la, edo dziku eye nya siwo wògblɔ la sɔ kple esiwo amewo gblɔna egbea, be: ‘Dzo le afi sia! Ðe asi le mía ŋu míavo! Míele subɔsubɔha aɖe me xoxo!’ (Amos 7:12, 13) Amazya trɔ gbo nyagblɔɖila la ƒe nyawo esime wòɖo gbe ɖe Fia Yerobeam hebia tso esi be wòaɖo asi Amos ƒe dɔa dzi. (Amos 7:7-11) Gake Amos mevɔ̃ o. Egbea, subɔsubɔhakplɔla aɖewoe nana dziɖuɖuwo tia Yehowa ƒe amewo yome. Gake Yehowa ka ɖe edzi na mí be lãnu sia lãnu si wotu ɖe mía ŋu la madze edzi ɖaa o.—Yes. 54:17.
3. Gbedeasi eve ƒokpli kae míeɖea gbeƒãe egbea?
3 Ðe Gbeƒã Mawu Ƒe Ʋɔnudɔdrɔ̃ Kple Etsɔme Yayrawo: Togbɔ be Amos gblɔ ʋɔnudrɔ̃nyawo ɖi ɖe Israel ƒe to ewo fiaɖuƒea ŋu hã la, egblɔ ŋugbe siwo Yehowa do be yeagbugbɔ wo aɖo te ahadudu yayra akɔ ɖe wo dzi la hã ɖi tsɔ ƒo eƒe Biblia-gbalẽa tae. (Amos 9:13-15) Míawo hã míeɖea gbeƒã Mawu ƒe ‘ʋɔnudrɔ̃gbe’ si gbɔna, gake “fiaɖuƒe ŋuti nya nyui” si wòle be míagblɔ la ƒe akpa aɖe koe esia nye. (2 Pet. 3:7; Mat. 24:14) Ne Yehowa tsrɔ̃ ame vɔ̃ɖiwo le Harmagedon me vɔ la, anyigba bliboa azu paradiso.—Ps. 37:34.
4. Nu ka tae míeka ɖe edzi be míate ŋu awɔ Yehowa ƒe lɔlɔ̃nu ade goe?
4 Vavãe, gbeƒãɖeɖe Fiaɖuƒegbedeasia le xexe sia si me tsitretsiɖeŋulawo sɔ gbɔ ɖo me doa míaƒe tameɖoɖo kplikpaa be míanɔ agbe ɖe adzɔgbe si míeɖe na Yehowa nu ahawɔ eƒe lɔlɔ̃nu la kpɔna. (Yoh. 15:19) Ke hã, míeka ɖe edzi be Yehowa ana nu sia nu si míehiã la mí be míawɔ eƒe lɔlɔ̃nu ade goe, abe ale si wònɔ le Amos gome ene.—2 Kor. 3:5.