Yehowa ‘Na Nye Mɔwo Dzɔ’

Dzinyelawo srɔ̃ nyateƒea le ƒe 1920-awo me, eye emegbe wova ɖe wo nɔewo. Wodzim le ƒe 1939 me. Esime menye ŋutsuvi dzaa, nye kple dzinyelawo míenɔ England, eye mekplɔa wo ɖo míeyia kpekpeawo, emegbe meva ŋlɔ ŋkɔ ɖe Teokrasi Subɔsubɔ Sukua me. Megaɖoa ŋku zi gbãtɔ si meƒo nuƒoa dzi, ehiã be matɔ ɖe aɖakago aɖe dzi be makɔkɔ vie ale be mate ŋu akpɔ nyaselawo ŋkume. Ƒe ade ko mexɔ ɣemaɣi eye menɔ vɔvɔ̃m vevie esi mekpɔ ametsitsi gbogbo siwo ŋkume metɔ ɖo.

Tɔnye ŋlɔa nya siwo magblɔ le gbeadzi la ɖe agbalẽvi aɖe dzi nam. Ƒe enyi koe mexɔ esi nye ɖeka meɖi ɖase na ame aɖe le gbeadzi zi gbãtɔ. Dzi dzɔm ŋutɔ esi aƒemenɔlaa xlẽ nya siwo le nye agbalẽvia dzi eye wòlɔ̃ xɔ agbalẽ si nye “Mawu Nanye Nyateƒetɔ”! si le yevugbe me. Meƒu du yi vae gblɔe na tɔnye le mɔa godo. Gbeadzi kple kpekpeawo dede nana dzi dzɔam ŋutɔ eye wova kpe ɖe ŋunye meva di vevie be mawɔ ɣeyiɣiawo katã ƒe subɔsubɔdɔa.

Meva lɔ̃ Biblia geɖe wu esime tɔnye va nɔ Gbetakpɔxɔ dɔm nam. Ne Gbetakpɔxɔwo nya va ɖo ko la, mexlẽa wo enumake. Meva ka ɖe Yehowa dzi geɖe wu, esia wɔe be meva tsɔ nye agbe ɖe adzɔgbe nɛ.

Le ƒe 1950 mea, míede Teokrasi Ƒe Dzidziɖedzi Takpekpea le New York. Le Yawoɖagbe August 3 dzia, tanya si dzi wotu ŋkeke ma ƒe wɔna ɖoe nye “Dutanyanyuigblɔlawo Ƒe Ŋkeke.” Nɔviŋutsu Carey Barber, si va nye Dɔdzikpɔha me tɔa, ye ƒo nyɔnyrɔxɔxɔnuƒoa gbe ma gbe. Nye hã menɔ nyɔnyrɔxɔlawo dome taa, esime wòbia biabia eveawo le eƒe nuƒoa ƒe nuwuwua, metso heɖo eŋu be “Ɛ̃!” Ƒe 11 koe mexɔ ɣemaɣi gake menya be nyametsotso vevi aɖee nye ema mewɔ. Ke hã, menɔ vɔvɔ̃m be mage ɖe tsia me elabena nyemenya tsiƒuƒu o. Nyruinye kplɔm yi ɖe tsia gbɔ eye wòde dzi ƒo nam be nyemegavɔ̃ o. Le nyateƒe mea, nu sia nu si yi nyuie. Nɔviawo mena nye afɔwo ka anyigba le tsia te gɔ̃ hã o. Nɔviŋutsu aɖe kɔm na nɔviŋutsu bubu aɖe eye wònyrɔm, emegbe nɔviŋutsu bubu kɔm do goe le tsia me. Tso ŋkeke vevi ma dzia, Yehowa yi edzi na nye mɔwo dzɔ.

Esi mewu suku nua, medi be mawɔ mɔɖeɖedɔa, gake nye nufialawo de dzi ƒo nam be made yunivɛsiti. Meva lɔ̃ ɖe woƒe susua dzi eye meyi yunivɛsiti; ke hã, eteƒe medidi hafi meva de dzesi be nyemate ŋu ayi edzi ali ke ɖe nyateƒea me eye le ɣeyiɣi ma ke mea, malé fɔ ɖe nye suku nusɔsrɔ̃wo ŋu o, eya ta metso nya me be madzudzɔ sukua dede. Medo gbe ɖa tso eŋu na Yehowa eye meŋlɔ agbalẽ na sukutatɔwo heɖe eme na wo bubutɔe be, medi be madzudzɔ sukua dede le ƒe gbãtɔ ƒe nuwuwu. Meɖo ŋu ɖe Yehowa ŋu bliboe eya ta medze mɔɖeɖedɔa gɔme enumake.

Medze ɣeyiɣiawo katã ƒe subɔsubɔdɔa gɔme le July ƒe 1957 me le du si nye Wellingborough me. Mebia nɔvi siwo le London Betel la be woadi nɔviŋutsu mɔɖela bibi aɖe si mawɔ dɔ kplia nam. Mesrɔ̃ nu geɖe tso Nɔviŋutsu Bert Vaisey gbɔ, enye gbeƒãɖela dovevienu eye wòkpe ɖe ŋunye menya ale si mawɔ ɖoɖo nyui ɖe nye gbeƒãɖeɖedɔa ŋu. Nye kple Nɔviŋutsu Vaisey kpakple nɔvinyɔnu tsitsi ade ye nɔ hame si me míenɔ la me. Dzadzraɖo ɖe kpekpeawo ŋu, nyaŋuɖoɖowo kple dɔdeasiwo wɔwɔ le kpekpea me ʋu mɔnukpɔkpɔ nam be megaka ɖe Yehowa dzi eye meʋua nye xɔse me.

Wolém de gaxɔ me ɣeyiɣi kpui aɖe esi megbe be nyemawɔ asrafodɔ o ta, emegbe medo go nɔvinyɔnu mɔɖela vevi aɖe si ŋkɔe nye Barbara. Míeɖe srɔ̃ le ƒe 1959 me eye míenɔ klalo be míasubɔ le afi sia afi si woaɖo mí ɖo. Gbãa, woɖo mí ɖe Lancashire si le England ƒe dzieheɣetoɖoƒe. Emegbe le January ƒe 1961 mea, wokpem be made Fiaɖuƒe Subɔsubɔ Suku si woawɔ le London Betel ɣleti ɖeka. Esi míewu sukua nu la, wode dɔ asi nam be mava wɔ dzikpɔlamɔzɔla dɔa eye nye nu ku. Wona nutome sue dzikpɔla bibi aɖe na hehem kwasiɖa eve le Birmingham, eye woɖe mɔ na Barbara be woayi kplim. Eyome míetrɔ va yi míaƒe mɔɖela vevi dɔa dzi le Lancashire kple Cheshire.

Esi míenɔ mɔkeke le August ƒe 1962 mea, míexɔ lɛta aɖe tso alɔdzedɔwɔƒea gbɔ. Gilead Suku ƒe dɔbiagbalẽwoe nɔ lɛta me! Nye kple Barbara míedo gbe ɖa tso eŋu eye míekpe agbalẽviawo ɖo eye míetrɔe yi na alɔdzedɔwɔƒea enumake abe ale si wobia tso mía si ene. Ɣleti atɔ̃ megbea, míeɖo ta Brooklyn, New York be míava de Gilead Suku ƒe klas 38 lia si me míava srɔ̃ Biblia le, axɔ hehe ɣleti ewo sɔŋ.

Le sukua, míesrɔ̃ nu geɖe tso Mawu ƒe Nyaa, eƒe habɔbɔa kple mía nɔvi siwo le xexea me godooa ŋu. Ɣemaɣia, míenɔ míaƒe ƒe 20-awo me eye míesrɔ̃ nu geɖe tso sukuvi bubuawo gbɔ. Mɔnukpɔkpɔ su asinye be mewɔa dɔ kple Nɔviŋutsu Fred Rusk si nye míaƒe nufialawo dometɔ ɖeka. Nu vevi aɖe si dzi wòtea gbe ɖo enuenue nye be, ɣesiaɣi si míele aɖaŋu ɖom la, ele be míazã Ŋɔŋlɔawo. Nɔviŋutsu siwo fia nu mí le sukua dometɔ aɖewoe nye Nathan Knorr, Frederick Franz, kple Karl Klein. Eye mí sukuviawo míesrɔ̃ nu geɖe tso ale si Nɔviŋutsu A. H. Macmillan bɔbɔa eɖokuia me. Nuƒo aɖe si wòƒo na míegava se nu geɖe me tso ale si Yehowa fia mɔ eƒe amewo le ɣeyiɣi sesẽ siwo dze egɔme tso ƒe 1914 va ɖo ƒe 1919 ƒe gɔmedzedze me!

Esi wòsusɔ vie míawu sukua nua, Nɔviŋutsu Knorr gblɔ na nye kple Barbara be woaɖo mí ɖe Burundi le Afrika. Míeƒu du yi Betel ƒe agbalẽdzraɖoƒea vae tsɔ ƒegbalẽa be míakpɔe ɖa be gbeƒãɖela nenie le Burundi hã. Gake ewɔ nuku be míekpɔ naneke o! Míekpɔe be míeyina teƒe aɖe si womeɖe gbeƒã le kpɔ o, afi si ŋu míenya naneke tsoe o. Hmm, míetsi dzimaɖi ŋutɔ! Gake gbedodoɖa kpe ɖe mía ŋu míeɖe dzi ɖi.

Le míaƒe dɔdeasi yeyea mea, nu sia nu to vovo kura; yame ƒe nɔnɔme, dekɔnu, kple gbegbɔgblɔa. Fifia, ele be míasrɔ̃ Fransegbe. Afi si míanɔ hã nye kuxi. Esi míeva ɖo Burundi ŋkeke eve megbea, Nɔviŋutsu Harry Arnott si de Gilead Sukua kpli mí la, va srã mí kpɔ esime wòyina Zambia, afi si woɖoe ɖo. Ekpe ɖe mía ŋu míekpɔ xɔ, afi si va zu dutanyanyuigblɔlawo ƒe dzeƒe gbãtɔ. Eteƒe medidi o, dziɖuɖumegã siwo menya naneke tso Yehowa Ðasefowo ŋu oa va nɔ tsitre tsim ɖe mía ŋu. Esi míete dzidzɔkpɔkpɔ le míaƒe dɔdeasia mea, ɣemaɣi tututue dziɖuɖumegãwo va gblɔ na mí be ne dɔwɔwɔɖaseɖigbalẽvi mele mía si oa, mímate ŋu ayi edzi anɔ dukɔa me o. Nublanuitɔea, ehiã be míadzo eye míaʋu ayi dukɔ bubu si nye Uganda me, eye míagatrɔ ɖe nɔnɔme yeyewo ŋu le afi ma.

Esi dukɔmenɔgbalẽ mele mía si míatsɔ azɔ mɔ ayi Uganda o ta, míetsi dzimaɖi, gake míeɖo ŋu ɖe Yehowa ŋu. Nɔviŋutsu aɖe si tso Canada si le subɔsubɔm le afi si hiahiã geɖe wu le le Uganda va ɖe míaƒe nɔnɔmea me na amegã aɖe si kpɔa dutamɔzɔnyawo gbɔ, eye amegãa ɖe mɔ na mí be míanɔ dukɔa me ɣleti aɖewo ale be míawɔ agbalẽ siwo hiã. Esia na míekpɔe be Yehowa nɔ kpekpem ɖe mía ŋu.

Ale si nɔnɔmeawo le le dɔdeasi yeye sia mea to vovo kura na ale si nuwo nɔ le Burundi. Gbeƒãɖeɖedɔa nɔ edzi yim le dukɔa me, gake Ðasefo 28 koe nɔ dukɔ bliboa me. Míeke ɖe ame geɖe siwo doa Eŋlisigbe le nutoa mea ŋu. Gake eteƒe medidi o, míeva kpɔe be hafi míate ŋu akpe ɖe ame siwo tsɔ ɖe le nyaa me ŋua, ele be míasrɔ̃ gbe siwo wodona le dukɔa mea dometɔ ɖeka ya teti. Míete gbeƒãɖeɖe le Kampala dugãa me, afi si ame geɖe doa Lugandagbea le, eya ta míetiae be míasrɔ̃ gbe ma. Exɔ ƒe geɖe hafi gbea va ma nu na mí, gake ekpe ɖe mía ŋu ŋutɔ le gbeƒãɖeɖedɔa me! Ekpe ɖe mía ŋu míeva nya ale si tututu míakpe ɖe míaƒe Biblia nusrɔ̃viwo ŋu. Esia wɔe be nusrɔ̃viawo tea ŋu ɖea woƒe dzimenyawo kple ale si wole sesem le wo ɖokuiwo me tso nu si srɔ̃m wole ŋua gblɔna.

Míekpɔa dzidzɔ ne míele kpekpem ɖe amewo ŋu wova srɔ̃ nyateƒea, ke hã, míegakpɔ dzidzɔ wu esi wobia tso mía si be míawɔ dzikpɔla mɔzɔla dɔa le dukɔa me. Kenya alɔdzedɔwɔƒea de dɔ asi na mí be míazɔ mɔ ayi teƒeteƒewo le dukɔa me ade dzesi afi siwo woate ŋu aɖo mɔɖela veviwo ɖo. Enuenu le mɔzɔzɔ mawo mea, ame siwo menya naneke tso Ðasefowo ŋu oa nyoa dɔme na mí. Woxɔa mí nyuie eye woɖaa nu na mí gɔ̃ hã.

Teƒe bubu siwo megazɔ mɔ yi. Meɖo keteke ŋkeke eve tso Kampala zɔ mɔ yi Kenya ƒe melidzeƒe si nye Mombasa, eye tso afi maa, meɖo meli yi Seychelles, si nye ƒukpo siwo le India Ƒua me la dzi. Emegbe tso ƒe 1965 va ɖo ƒe 1972 mea, woɖe mɔ na Barbara be wòazɔ mɔ kplim ɣesiaɣi si meyina ɖe ƒukpo mawo dzi. Emegbe gbeƒãɖela eve siwo nɔ afi ma va zu ƒuƒoƒo, eye ƒuƒoƒoa hã va zu hame. Mɔnukpɔkpɔ gasu asinye mevae wɔ subɔsubɔdɔa le dukɔ siwo nye Eritrea, Ethiopia, kple Sudan me.

Esi asrafowo va xɔ zia le Uganda la, dunyahenyawo trɔ kura. Ale si nuwo tɔ zi le ƒe siwo kplɔe ɖo mea na míeva kpɔe be enyo be míaɖo to nya si Biblia gblɔ be: “Mitsɔ nu siwo nye Kaisaro tɔ la na Kaisaro.” (Marko 12:17) Gbe ɖekaa, wobia tso amedzro siwo katã le dukɔa me si be woayi avae de woƒe ŋkɔwo agbalẽ me le polis dɔwɔƒe si te ɖe wo ŋua me. Míewɔ esia enumake. Ŋkeke ʋɛ aɖewo megbe, esime míenɔ ʋu kum to Kampala dua mea, polis aɖewo te ɖe nye kple dutanyanyuigblɔla aɖe ŋu. Míaƒe dzi nɔ tsotsom kpokpokpo! Wotso mía nu be míenye ŋkutsalawo eye wokplɔ mí yi poliswo ƒe dɔwɔƒegã. Míeɖe eme na wo be dutanyanyuigblɔla siwo ɖea gbeƒã Mawu ƒe nyawoe míenye. Míegblɔ na wo be míede míaƒe ŋkɔwo agbalẽ me, gake wodo tokui. Wolé mí eye wokplɔ mí yi poliswo ƒe dɔwɔƒe si te ɖe míaƒe aƒea ŋu. Akpe si míadae nye be polis-megã si míeva tua, kpɔ mí de dzesi be míede míaƒe ŋkɔwo agbalẽ me, eya ta eɖe gbe be woaɖe asi le mía ŋu.

Le ɣeyiɣi mawo mea, míedoa go asrafo siwo va tso mɔ zi geɖe le mɔa dzi eye míevɔ̃na ŋutɔ vevietɔ esiwo no aha mu. Ne edzɔ nenemaa, míedoa gbe ɖa eye woɖea mɔ na mí míeva yina. Esia nana míaƒe dzi dzea eme ŋutɔ. Nublanuitɔea, le ƒe 1973 mea, woɖe gbe be dutanyanyuigblɔlawo katã nadzo le Uganda dua me.

Esia ta míegaxɔ dɔdeasi yeye, fifia ya míeyina ɖe Côte d’Ivoire le Afrika. Tɔtrɔ gã aɖee esia hã ganye na mí, ahiã be míasrɔ̃ dekɔnu yeyewo, fifia Fransegbe koŋue míanɔ dodom eye ahiã be míatrɔ ɖe dutanyanyuigblɔla siwo tso dukɔ bubuwo me hã ŋu. Togbɔ be enɔ alea hã la, míegakpɔe ake be Yehowae nɔ mɔ fiam mí, elabe ɖokuibɔbɔlawo kple ame siwo si dzi nyui lea va nɔ to ɖom nya nyuia. Míekpɔe be esi míeɖo ŋu ɖe Yehowa ŋu taa, ena míaƒe mɔwo dzɔ.

Nublanuitɔea, wova kpɔ kansa le Barbara ŋu. Míezɔ mɔ enuenu yi Europa be woakpɔ Barbara gbɔ, gake le ƒe 1983 mea, míekpɔe be míagate ŋu ayi míaƒe dɔdeasia dzi le Afrika o. Esia gbã dzi na mí ŋutɔ!

Barbara ƒe kansa va nyra ɖe edzi esime míenɔ subɔsubɔm le London Betel, eye emegbe eva ku. Nɔvi siwo le Betel la kpe ɖe mía ŋu ŋutɔ. Vevietɔ wua, atsu kple asi aɖe kpe ɖe ŋunye metrɔ ɖe nɔnɔmea ŋu eye meyi edzi ɖo ŋu ɖe Yehowa ŋu. Emegbe medo go Nɔvinyɔnu Ann, si nye mɔɖela vevi aɖe si va kpea asi ɖe dɔ ŋu le Betel, eye wòlɔ̃ Yehowa vevie. Míeɖe srɔ̃ le ƒe 1989 me, eye míesubɔ le London Betel tso ɣemaɣi va se ɖe fifia.

Tso ƒe 1995 va ɖo ƒe 2018 mea, mesubɔ abe dɔwɔƒegã ƒe amedɔdɔ, si woyɔna tsã be alɔdzewo dzikpɔla ene, eye meyi dukɔ vovovo siwo ade 60 me. Le dukɔ mawo dometɔ ɖe sia ɖe mea, mekpɔ ale si Yehowa léa be na eƒe amewo le nɔnɔme ɖe sia ɖe me.

Le ƒe 2017 mea, megazɔ mɔ yi Afrika. Dzi dzɔm be mekplɔ Ann yi Burundi zi gbãtɔ, eye míaƒe nu koe ku esi míekpɔ ame gbogbo siwo va xɔ nyateƒea! Le nuto si me menɔ gbeƒã ɖem tso aƒe me yi aƒe me le le ƒe 1964 mea, fifia wotu Betel-ƒe nyui aɖe ɖe afi ma, eye gbeƒãɖela siwo wu 15,500 ye le dukɔa me.

Dzi dzɔm ŋutɔ esime wona menya dukɔ siwo me mayi le ƒe 2018 me. Côte d’Ivoire hã nɔ dukɔawo dome. Esi míeva ɖo Abidjan si nye fiadu mea, ɖeko wòle abe aƒee megbɔ va ene. Esime menɔ telefon gbalẽvia me tsam be makpɔ nɔvi siwo nɔ dɔ wɔm le Betel la, kaka makpɔa Nɔviŋutsu Sossou ye le mía xa. Meɖo ŋku edzi be eyae nye dugãdzikpɔla esime menɔ Abidjan. Gake menye Sossou si menya ye o, via boŋ ye.

Yehowa wɔ ɖe eƒe nyawo dzi. Nɔnɔme sesẽ siwo me metoa na mekpɔe be, ne míeɖo ŋu ɖe Yehowa ŋua, enana míaƒe mɔwo dzɔna nyateƒe. Fifia, míeɖoe kplikpaa be míayi Yehowa subɔsubɔ dzi va se ɖe esime wòakplɔ mí ayi ɖe xexe yeyea me.—Lod. 4:18.