Nu Kae Wòfia Be Ame Nanye Havi Nyui Abe “Samariatɔ Havilɔ̃la” Ene?
Ale si Biblia ɖo eŋui
Wozãa nya “Samariatɔ havilɔ̃la” zi geɖe tsɔ ɖɔa ame si naa kpekpeɖeŋu ame bubuwo ne ameawo ɖo hiã me. Nya sia dzɔ tso ŋutinya aɖe si Yesu gblɔ tsɔ fia nu tso ale si havi nyui kpɔa nublanui na amewo eye wòkpena ɖe wo ŋu afi ka kee ameawo tso alo ame ka kee wonye o la ŋu.
Nyati sia aɖo biabia siawo ŋu
Nu ka ŋue “Samariatɔ havilɔ̃la” ƒe ŋutinyaa ku ɖo?
Míato Yesu ƒe ŋutinyaa ɖe eme kpokploe ale: Yuda ŋutsu aɖe nɔ mɔ zɔm tso Yerusalem yina Yeriko. Esi wònɔ mɔa dzi la, fiafiwo va dze edzi, woxɔ eƒe nuwo le esi eye woƒoe wòku afã kple afã.
Yudatɔ aɖe si nye nunɔla va tso eme yina, eye wòto Yuda ŋutsu si dze adzodalawo si me la ŋu. Nenema kee Yuda subɔsubɔhakplɔla aɖe hã va to eŋu yi. Togbɔ be ame eve siawo kple ame si dze adzodalawo si me tso du ɖeka me hã, wometɔ kpe ɖe eŋu o.
Mlɔeba, ŋutsu aɖe si tso du bubu me la va yina. Samariatɔe wònye. (Luka 10:33; 17:16-18) Ŋutsu si dze adzodalawo si me la ƒe nu wɔ nublanui na Samariatɔa, eye wòkpɔ eƒe abiawo gbɔ heblae nɛ. Emegbe ekɔ amea yi amedzrodzeƒe, eye wòkpɔ edzi zã bliboa. Esi ŋu ke la, exe fe na amedzrodzeƒea dzi kpɔla be wòalé be na Yuda ŋutsua, eye wògblɔ nɛ be yeaxe nu bubu siwo ƒe fe wòagagblẽ la nɛ.—Luka 10:30-35.
Nu ka tae Yesu gblɔ ŋutinya sia?
Yesu gblɔ ŋutinya sia na ŋutsu aɖe si susu be ame siwo tso du ɖeka me alo wonye subɔsubɔha ɖeka me tɔ ɖeɖe koe nye havi na wo nɔewo. Yesu di be yeafia nu vevi aɖe ŋutsu sia. Yesu di be ŋutsu sia nase egɔme be menye ame si tso du ɖeka me kplii la ɖeɖe koe nye ‘ehavi’ o. (Luka 10:36, 37) Woŋlɔ ŋutinya sia ɖe Biblia me be ame sia ame si di be yeƒe nu nadze Mawu ŋu la nasrɔ̃ nu vevi aɖe tso eme.—2 Timoteo 3:16, 17.
Nufiame kae le ŋutinya sia me?
Ŋutinya sia fia mí be ame si nye havi nyui la ƒe dɔme trɔna ɖe ame ŋu eye wòwɔa nu ŋutɔŋutɔ tsɔ kpena ɖe eŋu. Ekpena ɖe ame si le fu kpem la ŋu, afi ka kee amea tso alo ame ka ƒomevie wònye o. Ame si nye havi nyui ŋutɔŋutɔ la wɔa nu ɖe amewo ŋu abe ale si ko wòadi be woawɔe ɖe ye ŋu ene.—Mateo 7:12.
Ame kawoe nye Samariatɔwo?
Wonye ame siwo nɔ Yudea nyigbaa ƒe dziehe gome. Wonye ame siwo nye Yuda tɔwo kple ame siwo menye Yudatɔwo o siwo ɖe wo nɔewo la ƒe dzidzimeviwo.
Kaka ƒe alafa gbãtɔ naɖo la, Samariatɔwo ɖo woawo ŋutɔwo ƒe subɔsubɔ anyi. Woxɔ Hebri Ŋɔŋlɔ atɔ̃ gbãtɔawo de eme, gake wogbe mamlɛawo.
Yudatɔ geɖe siwo nɔ anyi le Yesu ƒe ŋkekea me la ɖua fewu le Samariatɔwo ŋu eye womedea ha kple wo o. (Yohanes 4:9) Yudatɔ aɖewo zãa nya “Samariatɔ” gɔ̃ hã wònyea dzugbe.—Yohanes 8:48.
Ðe ŋutinya si ku ɖe “Samariatɔ havilɔ̃la” ŋu dzɔ ŋutɔŋutɔa?
Biblia megblɔe nenye be ŋutinya sia dzɔ ŋutɔŋutɔ o. Ke hã zi geɖe la, Yesu zãa teƒe kple nu siwo eƒe nyaselawo nya nyuie ne ele nu fiam, ale be woate ŋu ase eƒe nyawo gɔme bɔbɔe.
Nu geɖe siwo woyɔ le ŋutinya sia me la nye nu siwo nɔ anyi ŋutɔŋutɔ. Le kpɔɖeŋu me:
Mɔ si tso Yerusalem yi Yeriko ƒe didime wu kilometa 20, eƒe akpa aɖe ɖi abu kilometa 1. Ŋutinya gblɔe nyuie be mɔzɔla siwo tso Yerusalem la “ɖi abu yina Yeriko.”—Luka 10:30.
Nunɔla kple Yuda subɔsubɔhakplɔla bubu siwo le Yeriko la zɔa mɔ sia edziedzi yina Yerusalem.
Adzodalawo dea xa ɖe mɔa ƒe afi siwo tso abo, be yewoadze mɔzɔlawo dzi, vevietɔ ne ame ɖekae le mɔa zɔm.