Ale Si Srɔ̃gbegbe Gblẽa Nu Le Ðeviwo Ŋu

Atsu kple asi siwo wòdze abe wo dome mele nyuie o ene la gblɔna na wo ɖokui be ne yewogbe yewo nɔewo la, ade ɖeviawo dzi wu. Wogblɔna be anyo wu be woanɔ dzila siwo nɔa dzre dzi gbe sia gbe la gbɔ. Gake ɖe esia nye nyateƒea?

• Ŋusẽ kae srɔ̃gbegbe kpɔna ɖe ɖeviwo dzi?

• Ne megbe srɔ̃ la, ɖe vinye akpɔ dzidzɔ wua?

• Ne megbe srɔ̃ eye vinye va zu aƒe eve me vi la, nu kae wòagblẽ le eŋu?

• Ðe mɔ bubu aɖe li si nyo wua?

Numekukuwo ɖee fia be srɔ̃gbegbe gblẽa nu le ɖeviwo ŋu ale gbegbe. Zi geɖe la, kuxi siwo ɖevi siwo dzilawo gbe wo nɔewo doa goe la dometɔ aɖewoe nye be:

• wodoa dziku, wotsia dzimaɖi eye woléa blanui

• woƒe agbenɔnɔ medzea ga dzi o

• womedzea agbagba le suku o, alo wova gbea suku gɔ̃ hã

• wodzea dɔ bɔbɔe

Tsɔ kpe ɖe eŋu la, ɖevi geɖe bua fɔ wo ɖokui be yewoe na yewo dzilawo gbe wo nɔewo alo wosusunɛ be yewoate ŋu awɔ nane atsɔ axe mɔ ɖe srɔ̃gbegbea ŋu hafi.

Srɔ̃gbegbe tea ŋu gblẽa nu le ɖeviwo ŋu va se ɖe woƒe tsitsime gɔ̃ hã. Ate ŋu awɔ na wo le woƒe tsitsime be yewomele ɖeke me o, eye ate ŋu asesẽ na wo hã be woaka ɖe amewo dzi. Eye ne woawo hã va ɖe srɔ̃ eye kuxiwo do mo ɖaa, ate ŋu anɔ bɔbɔe be woagbe srɔ̃.

Nya vevitɔ: Togbɔ be srɔ̃tɔ siwo le srɔ̃gbegbe ŋu bum ate ŋu agblɔ na wo ɖokuiwo be srɔ̃gbegbe ade ɖeviawo dzi hã, numekukuwo ɖee fia be menye nyateƒee o. Aƒenɔ Penelope Leach, si nya nu tso beléle na ɖeviwo ŋu la gblɔ be: “Srɔ̃gbegbe nana nuwo tɔtɔna na ɖeviwo le agbe me.”a

Biblia ƒe mɔfiame: “Miaganɔ miawo ŋutɔ miaƒe nyonyo ko dim o, ke miadi ame bubuwo hã ƒe nyonyo.”—Filipitɔwo 2:4.

Ame aɖewo agblɔ be “Ɛ̃.” Gake nenɔ susu me na wò be menye nu si dzilawo di la kee wo viwo hã di o. Ame si le eɖom be yeagbe ye srɔ̃ la di be yeadze agbe yeye gɔme. Ðeviwo ya medi be yewoadze agbe yeye gɔme o, ɖe wodi boŋ be yewoanɔ anyi kple yewo dzila eveawo ɖekae.

Esi ame siwo nye agbalẽ aɖe (The Unexpected Legacy of Divorce) ŋlɔlawo bia gbe ɖevi gbogbo aɖewo siwo dzilawo gbe wo nɔewo la, woŋlɔ bena: “Nya ɖeka koe le ɖeviawo si, womegblɔ be yewole dzidzɔ kpɔm wu o. Ke boŋ wogblɔ kã be, ‘Gbe si gbe dzinyelawo gbe wo nɔewoa, gbe ma gbee nye dzidzɔkpɔkpɔ hã nu tso.’” Agbalẽa gblɔ yi edzi be “wokpɔnɛ be yewomele dedie le xexea me o, elabe ame eve siwo ŋu yewote ɖo wu le xexea me la dome gblẽ.”

Nya vevitɔ: Ne srɔ̃tɔwo gbe wo nɔewoa, esesẽna be ɖeviawo nagakpɔ dzidzɔ.

Biblia ƒe mɔfiame: “Ke gbɔgbɔ si dzi nu te ɖo vevie la nana ŋusẽ vɔna le ame ŋu.”—Lododowo 17:22.

Atsu kple asi siwo gbe wo nɔewo, evɔ vi le wo dome la dzea agbagba be yewoagatsɔ vihehe ƒe agbaa ɖekae, abe ɖe wogakpɔtɔ nye srɔ̃tɔwo ene. Ke hã vihehe alea sesẽna. Numekuku ɖee fia be zi geɖe la, atsu kple asi siwo gbe wo nɔewo la:

• mekpɔa vovo ɖe wo viwo ŋu o

• fiaa nu siwo tsi tre ɖe wo nɔewo ŋu la ɖeviawo

• ɖea mɔ na ɖeviawo be woawɔ nu sia nu si wodi le ɖeɖiteameŋu alo fɔbuameɖokui ta

Ðevi siwo dzilawo gbe wo nɔewo hã ate ŋu adze aglã ɖe wo dzilawo ŋu. Le nya ŋutɔ nua, edzilawo mewɔ ɖe ŋugbe si wodo na wo nɔewo be yewoawɔ nuteƒe na yewo nɔewo, anɔ yewo nɔewo gbɔ ɖaa la dzi o. Eya ta ɖevia ate ŋu agblɔ na eɖokui be, ‘Nu ka tae wòle be maɖo to woawo ya?’

Nya vevitɔ: Ne srɔ̃tɔ aɖewo gbe wo nɔewo, evɔ vi le wo dome eye wodzea agbagba be yewoahe ɖevia ɖekae abe ɖe wogakpɔtɔ nye srɔ̃tɔwo ene la, esia tea ŋu sesẽna na dzilaawo. Gake esesẽna na ɖeviawo gɔ̃ hã wu.

Biblia ƒe mɔfiame: “Miganɔ dziku dom na mia viwo o, ale be dzi nagaɖe le wo ƒo o.”—Kolosetɔwo 3:21.

Ne srɔ̃tɔ aɖe gbe srɔ̃a eye wòdi be yeanɔ agbe yeye la, esia bia agbagbadzedze geɖe. Ðe madze agbagba boŋ be yeaɖɔ nuwo ɖo be yeƒe srɔ̃ɖeɖea nagaka ɖe eme oa? Agbalẽ aɖe (The Case for Marriage) gblɔ be: “Ne nuwo tɔtɔ le srɔ̃ɖeɖe aɖe me eye dzidzɔ megale eme o la, mefia be nuwo magate ŋu aɖɔ ɖo gbeɖe o. Ne ɣeyiɣiawo va yiyima, srɔ̃ɖeɖe siwo me dzidzɔ mele o, evɔ atsu kple asia kpɔtɔ le wo nɔewo gbɔ eye woɖɔ nuwo ɖo la va kpɔa dzidzɔ geɖe ŋutɔ.” Ne míagblɔe ŋutɔŋutɔa, edea ɖeviwo dzi wu ne wo dzilawo le wo nɔewo gbɔ.

Gake esia mefia be srɔ̃tɔ aɖeke mate ŋu agbe srɔ̃ o. Le nyateƒe me la, Biblia ɖe mɔ ɖe srɔ̃gbegbe ŋu ne srɔ̃tɔawo dometɔ ɖeka wɔ ahasi. (Mateo 19:9) Ke hã Biblia gagblɔ be, “aɖaŋudzela léa ŋku ɖe eƒe afɔɖeɖewo katã ŋu.” (Lododowo 14:15) Anyo be srɔ̃tɔ siwo le kuxiwo me tom le woƒe srɔ̃ɖeɖe me eye wole srɔ̃gbegbe ŋu bum la nabu nu geɖewo ŋu nyuie hafi aɖe afɔ ma. Esiawo dometɔ aɖee nye ŋusẽ si srɔ̃gbegbea akpɔ ɖe ɖeviawo dzi.

Gake nyae nye be ebia nu geɖe wu be srɔ̃tɔwo nanɔ anyi ɖekae ko. Biblia ɖo aɖaŋu nyuiwo siwo akpe ɖe srɔ̃ŋutsu kple srɔ̃nyɔnu ŋu be woatu nɔnɔme nyuiwo ɖo, siwo akpe ɖe wo ŋu be dzidzɔ nanɔ woƒe srɔ̃ɖeɖea me eye wòanɔ anyi ɖaa. Esia mewɔ nuku o, elabe Yehowa, ame si tɔe Biblia nye lae nye ame si ɖo srɔ̃ɖeɖe gɔme anyi.—Mateo 19:4-6.

Biblia ƒe mɔfiame: “Nye Yehowae nye wò Mawu, nyee nye ame si fiaa nu wò be wòaɖe vi na wò.”—Yesaya 48:17.