2 Kronika
7 Esi Salomo nya do gbe ɖa vɔ ko la,+ dzo tso dziƒo+ va fiã numevɔsa la kple vɔsaawo, eye Yehowa ƒe ŋutikɔkɔe yɔ xɔ la taŋ.+ 2 Nunɔlawo mete ŋu ge ɖe Yehowa ƒe xɔ la me o, elabena Yehowa ƒe ŋutikɔkɔe yɔ Yehowa ƒe xɔ la taŋ.+ 3 Esi Israel-viwo katã kpɔ dzo si tso dziƒo, kple Yehowa ƒe ŋutikɔkɔe si nɔ xɔ la tame la, wobɔbɔ tsyɔ mo anyi ɖe kpe siwo woɖo ɖe anyigba la dzi, eye wode ta agu heda akpe na Yehowa, “elabena eya amea nyo; eƒe lɔlɔ̃ si nu metsina o la li tegbee.”
4 Eye fia la kple dukɔ blibo la sa vɔ le Yehowa ŋkume.+ 5 Fia Salomo tsɔ nyi akpe blaeve vɔ eve kple alẽ akpe alafa ɖeka blaeve sa vɔe. Ale fia la kple dukɔ blibo la kɔ Mawu vavã la ƒe xɔ la ŋu.+ 6 Nunɔlawo tɔ ɖe woƒe dɔwo wɔƒe, eye Lewi viwo hã tɔ ɖi helé haƒonu siwo wotsɔ ƒoa ha na Yehowa la ɖe asi.+ (Fia David ye wɔ haƒonu siawo be woatsɔ ada akpe na Yehowa—“elabena eƒe lɔlɔ̃ si nu metsina o la li tegbee”—ɣesiaɣi si David di be yeato wo* dzi akafu Mawu.) Eye nunɔlawo le kpẽawo+ kum sesĩe le wo ŋgɔ, esime Israel-viwo katã le tsitrenu.
7 Eye Salomo kɔ xɔxɔnu si le Yehowa ƒe xɔ la ŋgɔ la ƒe titina ŋu, elabena afi mae wòtsɔ numevɔsalãwo+ kple ŋutifafavɔsalãwo ƒe amiawo sa vɔe le; elabena akɔblivɔsamlekpui+ si Salomo ɖi la mete ŋu xɔ numevɔsalãwo kple nuɖuvɔsalãwo+ kpakple amiawo+ o. 8 Ɣemaɣi la, Salomo kple Israel blibo la ɖu ŋkekenyui* la ŋkeke adre,+ wonye ha gã aɖe, tso Lebo-Hamat* va se ɖe Egipte-tɔʋu* la nu.+ 9 Ke le ŋkeke enyilia gbe la, wowɔ takpekpe tɔxɛ,+ elabena wokɔ vɔsamlekpui la ŋu ŋkeke adre, eye woɖu ŋkekenyui la ŋkeke adre. 10 Eye le ɣleti adrelia ƒe ŋkeke blaeve vɔ etɔ̃lia dzi la, edo mɔ dukɔ la woyi woƒe aƒewo me kple dzidzɔ+ kpakple aseyetsotso le nu nyui siwo Yehowa wɔ na David kple Salomo kpakple eƒe dukɔ Israel la ta.+
11 Ale Salomo wu Yehowa ƒe xɔ kple fia ƒe xɔ* la tutu nu;+ eye nu sia nu si Salomo ɖo ɖe dzi me be yeawɔ le Yehowa ƒe xɔ la kple eya ŋutɔ ƒe xɔ ŋu la, ewɔe de goe.+ 12 Eye Yehowa ɖe eɖokui fia Salomo+ le zã me gblɔ nɛ be: “Mese wò gbedodoɖa la, eye metia teƒe sia na ɖokuinye be wòanye aƒe si me woasa vɔ nam le.+ 13 Ne mexe dziƒowo nu, ale be tsi megale dzadzam o, ne mede se na ʋetsuviwo be woaɖu anyigba la dzi nuwo, eye medɔ dɔvɔ̃ ɖe nye dukɔ la dome, 14 eye nye dukɔ si ŋu woyɔ nye ŋkɔ ɖo+ la bɔbɔ wo ɖokuiwo,+ eye wodo gbe ɖa hedi nye ŋkume, eye wotrɔ tso woƒe mɔ vɔ̃wo dzi la,+ ekema masee le dziƒowo, matsɔ woƒe nu vɔ̃ la ake, eye mayɔ dɔ woƒe anyigba la.+ 15 Azɔ nye ŋkuwo anɔ ʋuʋu, eye nye towo anɔ gbe si woado ɖa le teƒe sia ŋu.+ 16 Azɔ metia xɔ sia, eye mekɔ eŋu, ne nye ŋkɔ nanɔ afi ma tegbee,+ eye nye ŋkuwo kple nye dzi anɔ afi ma ɣeawokatãɣi.+
17 “Ne èzɔ le ŋkunyeme abe ale si fofowò David zɔe ene, eye nèwɔ nu siwo katã ƒe se mede na wò la dzi, eye nèlé nye sewo kple nye ʋɔnudrɔ̃ɖoɖowo me ɖe asi la,+ 18 ekema mali ke wò fiazikpui+ la, abe ale si mebla nu kple fofowò David+ gblɔ be, ‘Wò ƒomea me tɔ siwo aɖu Israel dzi la nu matso o’+ la ene. 19 Gake ne mietrɔ, eye miegblẽ nye ɖoɖo kple nye sedede siwo metsɔ ɖo mia ŋkume la ɖi, eye mieyi ɖasubɔ mawu bubuwo hede ta agu na wo la,+ 20 ekema nye hã maho Israel ɖa le nye anyigba si metsɔ na mi la dzi;+ eye maɖe xɔ sia si ŋu mekɔ na nye ŋkɔ la ɖa le nye ŋkuta, eye mana wòazu vlodonu* kple alɔmeɖenu le dukɔwo katã dome.+ 21 Eye xɔ sia azu glikpo. Ame sia ame si ato eŋu ava yi la ƒe nu aku+ wòagblɔ be, ‘Nu ka tae Yehowa wɔ anyigba sia kple xɔ sia alea?’+ 22 Eye woagblɔ be: ‘Esi wogblẽ Yehowa wo tɔgbuiwo ƒe Mawu,+ ame si kplɔ wo tso Egipte-nyigba+ dzi la ɖi, eye woku ɖe mawu bubuwo ŋu, eye wode ta agu na wo hesubɔ wo la tae+ wòhe vɔ̃ siawo katã va wo dzi ɖo.’”+