Nyateƒe si Ku Ðe Dzosasa, Afakaka, Kple Adzewɔwɔ Ŋu

 1. Aleke gbegbee dzosasa, afakaka, kple adzewɔwɔ dzixɔse keke tae?

AGBALẼ si nye African Traditional Religion gblɔ be: “Le Afrika la, biabia gbɔloe wòanye ne èbia be yeanya nenye be adzetɔwo li loo alo womeli o.” Agbalẽa gblɔ kpee be “Afrikatɔ ɖesiaɖe ƒomevi bui be nu ŋutɔŋutɔ si hiãe adzewɔwɔ nye.” Amesiwo xɔ dzosasa, afakaka, kple adzewɔwɔ dzi se dometɔ aɖewo nye agbalẽmanyalawo kple agbalẽnyala deŋgɔwo. Islam kple Kristodukɔa ƒe kplɔlawo hã xɔ wo dzi se.

 2. Afikae ame geɖe xɔ se be dzosasa ƒe ŋusẽ tsona?

² Dzixɔse si bɔ ɖe Afrika enye be gbɔgbɔmeŋusẽ makpɔmakpɔ aɖe li. Mawue kpɔ ŋusẽ ɖe ŋusẽ ma dzi. Gbɔgbɔwo kple tɔgbui kukuwo te ŋu zãnɛ. Eye amegbetɔ aɖewo hã nya alesi woaxɔ eƒe ɖe azã, ɖe mɔ nyui (dzosasa be woatsɔ akpɔ ame ɖokui tae) alo gbegblẽa nu (dzoɖuame).

 3. Nukae nye dzoɖuame, eye nukae amewo xɔ se be ete ŋu wɔna?

³ Ame ƒe futɔwoe woɖua dzoe alo saa gbe donɛ. Woxɔ se be dzotɔwo te ŋu dɔa agutɔwo, xewo, tagbatsuwo, kple lã bubuwo be woagblẽ nu le ame ŋu. Ame geɖe xɔe se be dzoɖuame gbɔe dzrewo, kotsitsi, dɔléle, kple ku gɔ̃ hã tsona.

 4. Nuka dzie ame geɖe xɔ se le adzetɔwo ŋu, eye nya kawo mee ame aɖewo siwo nye adzetɔwo kpɔ la ʋu?

⁴ Nusi do ƒome kple dzoɖuame kplikplikplie nye adzewɔwɔ. Wogblɔna be adzewo te ŋu dona le woƒe ŋutilã me dzona abe xewo ene ɖadoa go adzetɔ bubuwo loo alo be yewoagblẽ agbe dome na amesi wodi be yewoaɖu la vivivi. Esi wònye adzetɔawo ƒe ŋutilã ganɔa woƒe abawo dzi wonɔa alɔ̃ me ta la, amesiwo dzudzɔ adzewɔwɔ koŋ ƒe nyameʋuʋuwoe wote ŋu tsɔ ɖia ɖase le nya siawo ŋui. Le kpɔɖeŋu me, Afrika magazine aɖe gblɔ be ame aɖewo siwo nye adzetɔwo tsã (wo dometɔ akpa gãtɔ nye ɖetugbivi ƒewuiviwo) gblɔ be: “Mewu ame 150 le ʋufɔku me.” “Meno ʋu le lãme na ɖevi atɔ̃ woku.” “Mewu nye ahiãvi etɔ̃ elabena woɖe asi le ŋunye.”

 5. Dzo kawoe wosana be woatsɔ akpɔ ame ɖokui tae, eye nukawoe esalawo wɔna?

⁵ Woxɔe se be dzosasa be woatsɔ akpɔ ame ɖokui tae kpɔa ame ta tso vɔ̃ me. Esalawo sa bokɛ ɖe alɔnu alo doa dzosigɛ. Wonoa dzomatsiwo alo doa woƒe ti. Woɖia nusiwo woxɔ se be woakpɔ yewo ta ɖe woƒe aƒewo me alo ɖe tome. Woɖoa ŋu ɖe atiblɛ siwo me woŋlɔ Koran alo Biblia me nyawo dee ŋu.

 6. Nukae Satana kple eƒe gbɔgbɔ vɔ̃wo wɔ le blema, eye aleke wòle be míabu woƒe ŋusẽe?

⁶ Nyateƒee wònye be Satana kple eƒe gbɔgbɔ vɔ̃wo nye amegbetɔ ƒe futɔ vɔ̃ɖiwo. Wote ŋu kpɔa ŋusẽ ɖe amewo ƒe susu kple agbenɔnɔ dzi, eye le blema la, wogena ɖe amegbetɔwo kple lãwo me gɔ̃ hã ale be nu dzea wo dzi. (Mateo 12:43-45) Togbɔ be mele be míabu be ŋusẽ boo mele wo si o hã la, mele be míasusu hã be ŋusẽ triakɔ le wo si wu alesi dze o.

 7. Nuka dzie Satana di be míaxɔ ase, eye aleke wowɔ esia ƒe kpɔɖeŋu aɖee?

⁷ Satana nye ameflula gã aɖe. Eflua amewo wosusuna be ŋusẽ le esi wu esi le esi ŋutɔŋutɔ. Eƒe kpɔɖeŋu aɖee nye si: Le aʋa si wowɔ ƒe ʋɛ aɖewo siwo va yi me le Afrika-dukɔ aɖe me la, asrafowo zã gbeɖiɖimɔ̃wo tsɔ do vɔvɔ̃ na woƒe futɔwo. Hafi asrafoawo nadze woƒe futɔwo dzi la, woƒoa aʋawɔnu gãwo kple tu gãwo ƒe gbeɖiɖi sesẽwo le mɔ̃ dzi. Ðe wowɔnɛ kple susu be yewoƒe futɔwo nasusu be asrafo siwo si aʋawɔnu sesẽ geɖewo le ye gbɔna yewo dzi dze ge. Nenema ke Satana hã dina be amewo naxɔ se be ŋusẽ si seɖoƒe meli na o ye le ye si. Eƒe taɖodzinue nye be yeado vɔvɔ̃ na amewo woawɔ yeƒe lɔlɔ̃nu ke menye Yehowa ƒe lɔlɔ̃nu o. Azɔ na míade ŋugble le alakpa siwo dzi Satana di be amewo naxɔ ase dometɔ etɔ̃ ŋu.

 8. Alakpa siwo Satana dana dometɔ ɖeka ɖe?

⁸ Alakpa ɖeka aɖe si Satana dana enye si: Naneke mewɔa ame dzodzro o; vɔ̃ ɖesiaɖe si menye ame aɖe gbɔe wòtso tẽ o la, vivimeŋusẽ aɖe gbɔe wòtsona. Le kpɔɖeŋu me, tsɔe be asrã wu ɖevi aɖe. Dadaa ate ŋu anya be muɖuamee na asrã léa ame. Gake agate ŋu axɔe ase be adzetɔ aɖee dɔ mu wòva ɖu ye via.

 9. Aleke Biblia ɖee fia be menye Satana gbɔe fukpekpe ɖesiaɖe tsona o?

⁹ Togbɔ be ŋusẽ le Satana si be wòawɔ fu aɖewo ame hã la, mesɔ be míaxɔe ase be ŋusẽ le esi be wòate ŋu awɔ fu ɖesiaɖe ame o. Biblia gblɔ be: “Duƒuƒu mele afɔ ɖablae me o, aʋawɔwɔ mele kalẽ me o, nuɖuɖukpɔkpɔ mele nunya me o, kesinɔnu mele ayedzedze me o, eye ŋudzedzekpɔkpɔ mele nugɔmesese me o, ke boŋ azãgbe kple nuɖiɖeame li na wo katã.” (Nyagblɔla 9:11) Duƒula ɖeka ƒe afɔ ate ŋu atsɔ wu bubuawo tɔ le duɖimekeke me, gake ɖewohĩ maɖu dzi o. “Nuɖiɖeame” aɖe ate ŋu ana wòaxɔ susɔea. Ate ŋu akli nu adze anyi alo dɔ aɖe nadze edzi alo eƒe afɔ nade ga. Nusiawo ate ŋu adzɔ ɖe amesiame dzi. Menye Satana kokoko alo adzetɔwoe naa wodzɔna ɖe ame dzi o; ɖeko wodzɔna le wo ɖokui si.

10. Nya kae wogblɔna tso adzetɔwo ŋu, eye aleke míewɔ nya be alakpae?

¹⁰ Alakpa bubu si Satana gadanae nye be: Adzetɔwo dona le woƒe ŋutilã me dzona le zã me ɖadoa go adzetɔ bubuwo alo be yewoano amesiwo wodi be yewoaɖu ƒe ʋu alo aɖu ameawo ŋutɔ. Azɔ bia ɖokuiwò se be: ‘Ne adzetɔwo te ŋu wɔa nusiawo la, ke nukae nye nusi doa go le ŋutilã la me?’ Abe alesi míekpɔe ene la, ameae nye luʋɔ la, menye nane si te ŋu doa go le amea mee o. Gakpe ɖe eŋu la, gbɔgbɔ la nye agbeŋusẽ si doa ŋusẽ ametia gake mete ŋu wɔa naneke ametia manɔmee o.

11. Nukatae míenya be adzetɔwo mate ŋu ado le woƒe ŋutilã me o, eye ɖe nèxɔ nya sia dzi sea?

¹¹ Luʋɔ la loo alo gbɔgbɔ la mate ŋu ado le ame ƒe ŋutilã me aɖawɔ nyui alo vɔ̃ o. Eyata adzetɔwo mate ŋu ado le woƒe ŋutilã me o. Le nyateƒe me la, womewɔa nusiwo wobe yewowɔna alo wosusu be yewowɔna la o.

12. Aleke Satana wɔnɛ be amewo xɔnɛ sena be woawoe wɔ nanewo evɔ menye woawoe hafi o?

¹² Numeɖeɖe kae míate ŋu ana le nuvɔ̃meʋuʋu si amesiwo nye adzetɔwo kpɔ la ɖe gblɔ ŋuti? Satana ate ŋu ana amewo naxɔe ase be yewoto nanewo me evɔ mele nenema hafi o. Satana te ŋu toa ŋutegawo dzi naa amewo susuna be yewokpɔ nanewo, se nanewo, hewɔ nanewo siwo womewɔ hafi o. Satana wɔa nusia kple susu be yeatrɔ amewo ɖa tso Yehowa gbɔ bene woasusu be Bibliae le alakpa dam.

13. (a) Ðe wònyo be woasa dzo atsɔ akpɔ ame ɖokui taea? (b) Nukae Ŋɔŋlɔawo gblɔ tso dzosasa ŋu?

¹³ Alakpa etɔ̃liae nye be: Dzosasa be woatsɔ akpɔ ame ɖokui tae—si nye dzosasa si wobu be exɔa ŋusẽ le dzoɖuame si—nye nu nyui. Biblia mede vovototo dzoɖuame kple dzosasa be woatsɔ akpɔ ame ɖokui tae dome o. Etsi tre ɖe dzosasa ɖesiaɖe ƒomevi ŋu. Bu se siwo Yehowa de na Israel-dukɔa tso dzosasa kple amesiwo saa dzo ŋu kpɔ:

• “Migasa dzo o.”—Mose III, 19:26.

• “Ne ŋutsu alo nyɔnu aɖe nye ŋɔliyɔla alo bokɔnɔ la, ekema woawu wo.”—Mose III, 20:27.

• “Bokɔnɔ, goloɖola, zidoedola kple dzotɔ, busudoamela, adzetɔ, nukala, kple ŋɔliyɔla aɖeke meganɔ dowòme o.”—Mose V, 18:10-14.

14. Nukatae Yehowa de se ɖe dzosasa nu ɖo?

¹⁴ Se siawo na eme kɔ ƒã be Mawu medi be yeƒe amewo nasa dzo o. Esi Yehowa lɔ̃ eƒe amewo eye medi be woanɔ vɔvɔ̃m eye woazu kluviwo na aʋatsodzixɔse o tae wòde se siawo na wo ɖo. Medi be gbɔgbɔ vɔ̃wo nawɔ fu wo o.

15. Aleke Biblia ɖee fia be ŋusẽ le Yehowa si wu Satanae?

¹⁵ Togbɔ be Biblia meƒo nu tsitotsito tso nusiwo gbɔgbɔ vɔ̃wo ate ŋu awɔ kple nusiwo womate ŋu awɔ o ŋu o hã la, eɖee fia be ŋusẽ le Yehowa Mawu si wu Satana kple eƒe gbɔgbɔ vɔ̃wo sasasã. Yehowae nya Satana tso dziƒo. (Nyaɖeɖefia 12:9) Gade dzesii hã be ɖe Satana va bia mɔ be yeado Hiob kpɔ eye esi Mawu gblɔ nɛ be wòakpɔ nyuie be wòagawu Hiob o la, ewɔ ɖe edzi.—Hiob 2:4-6.

16. Ameka gbɔe wòle be míadi ametakpɔkpɔ le?

¹⁶ Lododowo 18:10 gblɔ be: “Yehowa ƒe ŋkɔ enye mɔ̃ sesẽ; afima ame dzɔdzɔe la sina yina, eye wònɔa dedie.” Eyata Yehowa sinue wòle be míakpɔ be wòakpɔ mía ta. Mawu subɔlawo meɖoa ŋu ɖe gbesa alo ama ŋu be woakpɔ yewo ta tso Satana kple eƒe gbɔgbɔ vɔ̃wo ƒe nu vɔ̃ɖi wɔwɔwo me o, eye womevɔ̃a dzotɔwo ƒe dzoɖuame hã o. Mawu subɔlawo xɔ Biblia ƒe nya siawo dzi se be: “Yehowa ya la, eƒe ŋku le tsatsam le anyigba blibo la dzi be yeaɖe yeƒe ŋusẽ afia ɖe amesiwo ku ɖe eŋu kple woƒe dzi blibo la nu.”—Kronika II, 16:9, NW.

17. Nya ka dzie Yakobo 4:7 ka ɖo na mí, gake nukae wòle be míawɔ?

¹⁷ Ŋuɖoɖeŋu sia ate ŋu anɔ wò hã asiwò ne èsubɔa Yehowa. Yakobo 4:7 gblɔ be: “Mibɔbɔ mia ɖokui ɖe Mawu te; ke mitsi tre ɖe Abosam ŋu, eye wòasi le mia gbɔ.” Ne èsubɔa Mawu vavã la, hebɔbɔa ɖokuiwò ɖe ete la kakaɖedzi ate ŋu anɔ asiwò be Yehowa akpɔ tawò.