Alakpaxɔlɔ̃

Èdze xɔ̃ ame aɖe si nèdo goe le wò sɔhɛmenɔɣi. Enana nèsena le ɖokuiwò me be yetsi, eye edze abe etea ŋu kpena ɖe ŋuwò nèvona le ɖokuiwò me le hawòtiwo dome ene. Ne nu te ɖe dziwòa, ètea ŋu trɔna ɖe eŋu ɣesiaɣi be wòana gbɔdzɔe wò. Etso wò xɔ le nɔnɔme geɖewo me.

Gake vivivia, èva kpɔ eƒe gbegblẽƒewo. Edina be yeanɔ ŋuwò ɣesiaɣi, togbɔ be enana womexɔa wò nyuie le teƒe aɖewo o hã. Eye togbɔ be ena nèse le ɖokuiwò me be yetsi hãa, ede dɔ lãme na wò hafi nèva nya. Esi gavɔ̃ɖi wue nye be, efi fetu si nèxɔna la ƒe akpa gã aɖe.

Fifia èdze agbagba geɖe be ye kplii dome naklã, gake egbe. Le mɔ aɖe nua, eva ɖu aƒetɔ ɖe dziwò. Evea wò ŋutɔ be yedo goe.

NENEMAE atamanola geɖe kple sigarɛt dome le. Esi nyɔnu aɖe si ŋkɔe nye Earline no sigarɛt ƒe 50 kple edzivɔ megbea, egblɔ be: “Sigarɛt kpena ɖe ŋunye wu ale si ame nakpe ɖe ŋunye. Menye ɖeko nye kplii míenye xɔlɔ̃ tso gbe aɖe gbe ke ko evɔ o, magblɔ be eya ɖeka koe nye xɔ̃nye tsã.” Gake Earline va kpɔe dze sii be, alakpaxɔlɔ̃ vɔ̃ɖi aɖee sigarɛt nye. Le nyateƒe mea, woate ŋu agblɔ nya siwo míetsɔ dze nyati sia gɔmea tso Earline ŋu. Nya si woatsɔ akpee koe nye be, esi wòva srɔ̃e be Mawu bua atamanono be enye numame gbegblẽ si ƒoa ɖi míaƒe ŋutilãa, edzudzɔ enono.—2 Korintotɔwo 7:1.

Ŋutsu aɖe si ŋkɔe nye Frank hã ɖoe be yeadzudzɔ sigarɛtnono ale be yeƒe nu nadze Mawu ŋu. Gake esi wòɖe asi le sigarɛtnono ŋu ŋkeke ɖeka eve aɖewo megbea, eyae ma gava le tatam le eƒe xɔ me le sigarɛt xoxoe siwo wòno la ƒe kpɔtɔe siwo anya ge ɖe ʋuƒowo dome le anyigbaa dim. Frank gblɔ be: “Ɣemaɣie menyɔ le ɖokuinye me. Enyɔ ŋu nam ŋutɔ be meva le tatam le ʋuʋudedi me le sigarɛt xoxoewo ƒe kpɔtɔewo dim. Tso ema dzia, nyemegano sigarɛt kpɔ o.”

Nu ka tae atama kpɔa ŋusẽ ɖe ame dzi nenema gbegbe? Numekulawo gblɔ susu aɖewo siwo tae: (1) Atama te ŋu va zua numame na ame bɔbɔe abe atike vɔ̃ɖiwo ke ene. (2) Ne ame gbɔ atike si le atama me ɖe ŋɔti mea, eɖoa ahɔhɔ̃a me le sekɛnd adre pɛ ko me. (3) Atamanono va zua nu vevi na ame le agbe me ne ezãnɛ edziedzi le nu bubuwo me, le kpɔɖeŋu me, ne ele nu ɖum, le nu nom, le dze ɖom, alo le agbagba dzem be yeatsi nuteɖeamedzi nu, kple bubuawo.

Ke hã, abe ale si wòdzɔ le Earline kple Frank gome enea, anya wɔ be woaɖe asi le numame gbegblẽ sia ŋu. Ne ènoa atama gake nèdi be yeadzudzɔa, ke nyati siwo kplɔ esia ɖoa ate ŋu akpe ɖe wò hã ŋuwò nàdze agbe yeye gɔme.

Na Didia Nu Nasẽ Ðe Mewò

“Nu si koŋ kpena ɖe atamanolawo ŋu wodzudzɔnae nye ale si wodi vevie be yewoadzudzɔ atamanono.”—Agbalẽ aɖe si nye “Stop Smoking Now!”

ESIA fia be, ne èdi be yeadzudzɔ atamanonoa, ele be gbã, didia nu nasẽ ɖe mewò be yeadzudzɔ. Nu kawoe ana didia nu nasẽ ɖe mewò? Ðekae nye be nàbu viɖe siwo gbegbe ado tso eme na wò ne èdzudzɔ la ŋu. Viɖeawoe nye kawo?

Wò ga atsi anyi na wò. Ame si noa sigarɛt go ɖeka gbe ɖeka la zãa dɔlar akpe geɖe ƒe sia ƒe ɖe enono ŋu. “Nyemenya gbeɖe be ga gbogbo aɖee megblẽna ɖe atamanono ŋu o.”—Gyanu, Nepal.

Àkpɔ dzidzɔ le agbe me wu. “Esi medzudzɔ atamanono ko hafi medze agbenɔnɔ gɔme ŋutɔŋutɔ, eye mele dzidzɔ kpɔm le agbe me gbe sia gbe.” (Regina, South Africa) Ne amewo dzudzɔ atamanonoa, woƒe aɖe va sea nu ƒe vivi alo veve nyuie wu, eye woƒe ŋɔti hã sea nuwo ƒe ʋeʋẽ nyuie wu. Azɔ hã, ŋusẽ nɔa wo ŋu wu, eye woƒe dzedzeme nyona wu.

Ànɔ lãmesẽ me wu. “Ŋutsuwo, nyɔnuwo, sɔhɛwo kple ame tsitsiwo siaa nɔa lãmesẽ me nyuie wu ne wodzudzɔ atamanono.”—Amerika Ƒe Dɔwɔƒe Si Kpɔa Dɔlélenutsitsi Kple Mɔxexe Ðe Enu Ŋu Nyawo Gbɔ.

Dzi aɖo ƒowò geɖe wu. “Nu si ta medzudzɔ atamanonoe nye be, nyemedi be atama naɖu aƒetɔ ɖe dzinye o. Medi be nye ŋutɔ makpɔ ŋusẽ ɖe nye ŋutilã dzi.”—Henning, Denmark.

Aɖe vi na wò ƒometɔwo kple xɔ̃wòwo. “Atamanono . . . gblẽa nu le ame siwo dome nèle ƒe lãmesẽ ŋu. . . . Numekukuwo ɖee fia be ame siwo gbɔa dzudzɔa ne ame bubuwo le atama nom la dometɔ akpe geɖe kuna ƒe sia ƒe le dzitodzito me kansa kple dzidɔ ta.”—Amerika Ƒe Habɔbɔ Si Kpɔa Kansadɔ Ŋu Nyawo Gbɔ.

Wò nu adze Mawu ŋu. “Lɔlɔ̃tɔwo, mina míakɔ mía ɖokui ŋu tso ŋutilã . . . ƒe ɖiƒoƒo sia ɖiƒoƒo me.” (2 Korintotɔwo 7:1) “Miatsɔ miaƒe ŋutilãwo ana wòanye vɔsa . . . si le kɔkɔe, si dzea Mawu ŋu.”—Romatɔwo 12:1.

“Esi menya va se egɔme be nu siwo ƒoa ɖi ame ƒe ŋutilã medzea Mawu ŋu o koa, meɖoe be madzudzɔ atamanono.”—Sylvia, Spain.

Gake zi geɖea, didi be yeadzudzɔ ɖeɖe mesu o. Ðewohĩ ahiã be ƒometɔwo, xɔlɔ̃wo, kple ame bubuwo nakpe ɖe mía ŋu. Aleke woate ŋu akpe ɖe mía ŋui?

Na Woakpe Ðe Ŋuwò

“Ne ame aɖe ate ŋu aɖu ame ɖeka dzi hã la, ame eve ya ate ŋu anɔ te ɖe enu.”—Nyagblɔla 4:12.

AME ka ke alo nu ka kee ɖanye míaƒe futɔ o, ne amewo li akpe ɖe mía ŋua, ke míate ŋu aɖu edzi. Eya ta ne èdi be yeadzudzɔ atamanonoa, anyo be nàna ƒometɔwo kple xɔlɔ̃wo, alo ame sia ame si adi vavã be yeakpe ɖe ŋuwò ahagbɔ dzi ɖi na wò la, be woakpe ɖe ŋuwò.

Di kpekpeɖeŋu tso ame siwo te ŋu ɖu numame ma dzia gbɔ, elabe woakpe ɖe ŋuwò eye woase nu gɔme na wò hã. Torben, si nye Kristotɔ le Denmark, gblɔ be: “Ame bubuwo kpe ɖe ŋunye ale gbegbe.” Abraham, si le India, gblɔ be: “Lɔlɔ̃ vavã si nye ƒomea kple hati Kristotɔwo ɖe fiam la kpe ɖe ŋunye medzudzɔ.” Gake ɣeaɖewoɣia, ƒometɔwo kple xɔlɔ̃wo ƒe kpekpeɖeŋu ɖeɖe mesuna o.

Ŋutsu aɖe si ŋkɔe nye Bhagwandas gblɔ be: “Meno atama ƒe 27 sɔŋ, gake esi meva srɔ̃ nu si Biblia fia tso numame makɔmakɔwo ŋua, meɖoe be madzudzɔ. Medze agbagba be maɖiɖi agbɔsɔsɔ si menona dzi kpɔtɔ. Medzudzɔ hadede kple xɔ̃nye tsãtɔwo. Eye mevae xɔ aɖaŋuɖoɖo le teƒeteƒewo. Gake gbeɖegbeɖea koe. Mlɔeba gbe ɖeka zã mea, meɖe nye dzimenyawo gblɔ na Yehowa Mawu heɖe kuku nɛ be wòakpe ɖe ŋunye madzudzɔ atamanono. Ema ko hafi mete ŋu va dzudzɔ!”

Nu vevi bubu aɖe si wòle be nàwɔe nye be, nàdzra ɖo ɖe kuxi siwo nàte ŋu ado goe ŋu. Kuxi kawoe? Nyati si kplɔe ɖo aɖe eme.

[Aɖaka]

ÐE WÒLE BE NÀZÃ ATIKEA?

Wowɔ atike aɖewo be woakpe ɖe atamanolawo ŋu woadzudzɔ, eye ame geɖe zãnɛ. Gake hafi nàyi atike ma ƒomevi zã gea, bu biabia siwo gbɔna ŋu:

Vi kawoe woɖena? Wogblɔna tso atikeawo dometɔ geɖe ŋu be wokpena ɖe ame ŋu be woadzudzɔ atamanono, elabe wonana be ale si gbegbe fu awɔ amea ne egbe be yemano atama o la dzi naɖe akpɔtɔ. Gake ame geɖe melɔ̃ ɖe edzi be viɖeawo nɔa anyi eteƒe didina o.

Nu kawoe woate ŋu agblẽ le ame ŋu? Atikeawo dometɔ aɖewo hea kuxi bubu vanɛ, abe dzigbɔtɔame, blanuiléle, kple ameɖokuiwuwu ƒe susuwo ene. Nenɔ susu me na wò hã be, atike siwo wozãna ɖe atama teƒe la hã ganye atike vɔ̃ɖi le wo ɖokui si, eye woate ŋu agblẽ nu le ame ƒe lãmesẽ ŋu. Eya ta ne míagblɔea, wozazã hã gava nye numame gbegblẽ bubu.

Ðe nu bubuwo li woawɔ tsɔ wu be woazã atikea? Le numekuku aɖe mea, ame siwo te ŋu dzudzɔ atamanono la dometɔ akpa gãtɔ (ame 88 le alafa me) gblɔ be ɖeko yewodzudzɔ, eye yewomezã atike aɖeke be wòakpe ɖe yewo ŋu o.

Dzra Ðo Ðe Kuxiawo Ŋu

“Meɖoe be madzudzɔ atamanono le mía vi fẽa ƒe lãmesẽ ta. Eya ta meŋlɔ nu klã ɖe míaƒe xɔ ŋu be: ‘Mègano Atama Le Afi Sia O.’ Gake gaƒoƒo ɖeka pɛ megbea, atama dzrom vevie ale gbegbe be megakpe sigarɛt.”—Yoshimitsu, Japan.

NU SI dzɔ ɖe Yoshimitsu dzi ɖee fia be, kuxiwo vana ne ame le asi ɖem le atamanono ŋu. Azɔ hã, numekukuwo ɖee fia be, ame akpa gãtɔ (90 le alafa me) siwo dzudzɔ la gava te enono. Eya ta ne èle didim be yeadzudzɔa, ekema ne èdzra ɖo ɖe kuxi siwo le eme ŋua, ɖewohĩ àte ŋui. Kuxiawo dometɔ aɖewo ɖe?

Ale si enono aganɔ wò dzrom: Dzodzro sia nu sẽna ŋutɔ le ŋkeke gbãtɔ va se ɖe etɔ̃lia dzi, gake enu yina le kwasiɖa eve aɖewo megbe. Ame aɖe si noa atama tsã gblɔ be le ɣeyiɣi mawo mea, “dzodzroa vana dzona; metoa mɔ ɖeka o.” Le ƒe geɖe megbe gɔ̃ hã, agate ŋu adzro wò. Ne edzɔ nenemaa, mègatsi dzi nàwɔ naneke o. Lala miniti atɔ̃ pɛ ko, eye dzodzroa nu ayi.

Kuxi bubu siwo asiɖeɖe le eŋu hena vanɛ: Le gɔmedzedzea mea, esesẽna na ame aɖewo be woanɔ ŋudzɔ alo woƒe susu nanɔ nu ŋu, eye ame aɖewo kpɔa lãme. Ame aɖewo hã ƒe lãme vea wo, alo ŋuti fiẽa wo, ɖewo tea fifia edziedzi, alo nɔa kpe kpem. Ame aɖewo hã ƒe nɔnɔme trɔna, ale be womegagbɔa dzi ɖi o, wodoa dziku kabakaba, alo léa blanui gɔ̃ hã. Gake le kwasiɖa ene va se ɖe ade megbea, nu siawo dometɔ akpa gãtɔ nu yina.

Le ɣeyiɣi sesẽ ma mea, àte ŋu awɔ nanewo, be wòakpe ɖe ŋuwò. Le kpɔɖeŋu me:

● Di ɣeyiɣi nadɔ alɔ̃ nyuie.

● No tsi alo atikutsetsemetsi sɔ gbɔ. Ðu nu siwo me nunyiame le.

● De kame, gake menye fũu o.

● Gbɔ ya sɔ gbɔ, eye nàkpɔe le susu me ɖaa be ya nyui le gegem ɖe yeƒe dzitodzitowo me.

Nu siwo ate ŋu aganyɔ dzodzroa ɖe mewò: Woate ŋu anye dɔwɔna alo seselelãme aɖewo. Le kpɔɖeŋu me, ɖewohĩ tsãa, ènoa sigarɛt ne èle tii alo kɔfi nom. Ne nenemaea, ke ne ègale kɔfi noma, ahiã be nànoe kaba, ale be madzro wò be yeano sigarɛt akpe ɖe eŋu o. Le ɣeyiɣi aɖe megbea, nɔnɔmea ava ɖɔ ɖo, ale be nàte ŋu aɖe dzi ɖi anoe faa.

Gake nyae be, ne atama me nu vevi si nye nikotin megale lãme na wò o hã, ate ŋu axɔ ɣeyiɣi geɖe hafi wò susu nadzo le atamanono ŋu. Torben, si ƒe nya míegblɔ va yi, lɔ̃ ɖe edzi be: “Togbɔ be ƒe 19 ye nye esia medzudzɔ atamanono hãa, egadzroam be manoe ne mele kɔfi nom.” Gake zi geɖea, ne ɣeyiɣiwo va le yiyima, atamanono magadzro wò kokoko abe tsã ene o.

Gake mele nenema le aha muame ya gome o. Ne èle agbagba dzem be yeadzudzɔ atamanonoa, ke ele be nàtsri aha sesẽ kple teƒe siwo wodzranɛ le, elabe aha sesẽ nonoe na ame akpa gãtɔ siwo dzudzɔ atamanonoa gava te enono ake. Nu ka ta?

● Aha muame vi aɖe gɔ̃ hã nana vivisese si le nikotin mea dzroa ame.

● Zi geɖea, amewo noa atama ne wole aha nom le hadomewɔnawo me.

● Aha muame wɔnɛ be ame mebua nuwo ŋu nyuie o, eye wòɖea ŋu ɖi. Nyateƒee Biblia to esi wògblɔ be: ‘Wain nana ame doa kpo nu nyui wɔwɔ.’—Hosea 4:11.

Hadede: Nɔ ŋudzɔ ɖe hadede ŋu. Le kpɔɖeŋu me, ƒo asa na hadede kple ame siwo noa atama alo ame siwo adi be nànoe. Ƒo asa na ame siwo adi be yewoaɖe dzi le ƒowò, alo anɔ wò kom.

Seselelãmewo: Le numekuku aɖe mea, wokpɔe be ame siwo dzudzɔ atamanono la dometɔ eve le etɔ̃ me gate enono esime nu te ɖe wo dzi alo wodo dziku megbe teti. Ne seselelãme aɖe koŋ nana atamanono dzroa wòa, ke wɔ nane si aɖe wò susu ɖa le edzi. Àte ŋu ano tsi, aɖu chewing gum, alo nàzɔ vie. Dze agbagba nàbu nu nyuiwo ŋu; àte ŋu ado gbe ɖa na Mawu alo axlẽ Biblia.—Psalmo 19:14.

Nuŋububu Siwo Nàƒo Asa Na

● Mano ɖeka pɛ ko.

Nyateƒea: Atamanono zi ɖeka pɛ ko ate ŋu ana wò ahɔhɔ̃menu siwo nana nikotin dzroa wò la dometɔ afã naganyɔ, si ana wòanɔ dzrowòm gaƒoƒo etɔ̃ sɔŋ. Ðeko nàgava te atamanono ake.

● Atamanono kpena ɖe ŋunye ne nu te ɖe dzinye.

Nyateƒea: Numekukuwo ɖee fia be ɖe nikotin nana nu gatena ɖe ame dzi boŋ. Ale si wòwɔna na atamanola be yeƒe kuxiwo nu yi vie ye nana wòsusuna be ele kpekpem ɖe ye ŋu.

● Afi si meɖoa, nyemagate ŋu adzudzɔ o.

Nyateƒea: Nuŋububu nenema awɔe be màgadi be yeadze agbagba aɖeke o. Biblia gblɔ be: “Ne dzi ɖe le ƒowò le xaxagbe la, ekema wò ŋusẽ dzi aɖe kpɔtɔ.” (Lododowo 24:10) Eya ta mèganɔ susum be yedo kpo nu o. Ne ame aɖe di vavã be yeadzudzɔ, eye wòwɔ aɖaŋuɖoɖo nyuiwo, abe esiwo dze le magazine sia me ene dzia, ate ŋui.

● Kuxi siwo asiɖeɖe le eŋu hena vanɛ la manya tsɔ nam o.

Nyateƒea: Ele eme be asiɖeɖe le eŋu ate ŋu ahe kuxi sesẽ aɖewo vɛ, gake wo nu ava yi le kwasiɖa ʋɛ aɖewo megbe. Eya ta ɖoe kplikpaa! Ne atamanono ƒe dzodzroa gava le ɣleti alo ƒe aɖewo megbe gɔ̃ hã, enu ava yi, ɖewohĩ le miniti ʋɛ aɖewo ko megbe—ne èdo dzi, eye mèkpe sigarɛt o.

● Susumedɔ le ŋunye.

Nyateƒea: Ne wole susumedɔ aɖe dam na wòa, ke gblɔe na wò ɖɔktaa be wòakpe ɖe ŋuwò nàdzudzɔ atamanono. Adi godoo be yeakpe ɖe ŋuwò, eye ɖewohĩ atrɔ asi le dɔdamɔnua alo atike siwo wòana wò la ŋu be woakpe ɖe ŋuwò nàhaya.

● Ne megava te enonoa, ana mase le ɖokuinye me be medo kpo nu.

Nyateƒea: Ne èdzudzɔ atamanono hafi, gake = kuxi aɖe na nègava noe akea, mefia be èdo kpo nu o. Edzɔna ɖe ame siwo le agbagba dzem be yewoadzudzɔa dometɔ geɖe dzi. Gake mègatsɔ anyidzeƒe wɔ anyimlɔƒe o. Tso nàwɔ tɔwò sinua. Mlɔeba àva dzudzɔ keŋkeŋ!

Romualdo, si no atama ƒe 26 sɔŋ, gake wòte ŋu dzudzɔ ƒe 30 kple edzivɔe nye esia la gblɔ be: “Ne mebe medzudzɔ hãa, ɖeko megava tea enono. Nyemegaɖo ŋku zi gbɔ zi neni ema dzɔ dzi o, elabe esɔ gbɔ. Etena ɖe dzinye ɣesiaɣi, abe ke ɖe nyemagate ŋu adzudzɔ gbeɖe o ene. Gake esi menya ɖoe kplikpaa be nye kple Yehowa Mawu dome nanyo, eye medoa gbe ɖa nɛ enuenu be wòakpe ɖe ŋunye koa, meva dzudzɔ keŋkeŋ mlɔeba.”

Le nyati siawo ƒe mamlɛtɔ mea, míagadzro aɖaŋuɖoɖo nyui ʋɛ aɖewo me, siwo akpe ɖe ŋuwò be wò hã nàva tsɔ dzidzɔ agblɔ gbe ɖeka be yenoa atama tsã, gake yete ŋu va dzudzɔ.

[Aɖaka/​Nɔnɔmetata]

ÐE SIA ÐE ƑOMEVI ATE ŊU AWU AME

Wozãa atama le mɔ geɖe nu. Wodenɛ nuɖuɖu siwo wogblɔna be wonaa ame nɔa lãmesẽ mea me dzrana, eye wodenɛ gbetikewo hã me dzrana. Gake Xexea Me Lãmesẽ Habɔbɔ gblɔ be “atama ɖe sia ɖe ƒomevi ate ŋu awu ame.” Woate ŋu axɔ dɔ aɖewo tso atamanono me, abe kansa kple gbagbadɔ kple eƒomevi bubu, siwo ate ŋu awu ame ene. Vidada si noa atama hã ate ŋu agblẽ nu le vi si le dɔ me nɛa ŋu. Mɔ vovovo kawo nue wozãa atama le zi geɖe?

Bidis: Wonye sigarɛt suesue siwo bɔ ɖe Asia dukɔwo me. Atamaɖi, nikotin, kple aɖiya wuame (carbon monoxide) bɔ ɖe wo me wu sigarɛt ŋutɔ.

Siga: Enye atamagbe siwo wobla ɖekae alo siwo ŋu wobla pepa si wotsɔ atama wɔe ɖo. Esi akaŋu aɖe ƒomevi le siga me, gake mele nenema le sigarɛt gome o taa, nikotin si le siga me la tea ŋu toa ame ƒe nu me ɖoa eƒe lãme ne mekpɔ kpee o gɔ̃ hã.

Sigarɛt siwo me peprɛ le: Zi geɖea, wotsɔa atama teƒe ade kple peprɛ teƒe ene ƒoa ƒu wɔnɛ. Atamaɖi, nikotin, kple aɖiya wuame bɔ ɖe wo me wu sigarɛt ŋutɔ.

Atamazi: Atamaziyɔyɔ kple atamanono wosɔ, elabe wo ame evea siaa ate ŋu ana kansa kple dɔléle ɖeka mawo ƒomevi.

Atama si me dzudzɔ mele o: Eƒe ɖewoe nye atamaɖuɖu, asrãdodo, kple esi woyɔna be gutkha, si wozãna le Anyieheɣedzeƒe Asia. Nikotin si le wo me la toa ame ƒe nu me gena ɖe eƒe ʋu me. Atama si me dzudzɔ mele o zazã gblẽa nu abe atama bubuawo ke ene.

Zi bubuwo (bong, hookah, narghile, shisha): Zi siawo nana atamaa toa tsi me hafi wogbɔnɛ ɖe ŋɔti me. Gake tsia meɖea aɖi si le wo mea ɖa o, eye wogena ɖe ame ƒe dzitodzito me; aɖi mawo dometɔ aɖewo nana kansa.

[Aɖaka/​Nɔnɔmetata]

NE ÈBE YEAKPE ÐE AME AÐE ŊU WÒADZUDZƆ

● Susu nyui nenɔ asiwò. Ne èkafu amea, akpe ɖe eŋu wu be nànɔ nya gbem nɛ. Mègablɔ be, “Ègado kpo nu ake!” o, ke boŋ gblɔ be: “Ne ègadze agbagba viea, àte ŋui.”

● Lɔ̃ faa nàtsɔ ake. Ne ame si ŋu nèle kpekpem ɖo la do dziku ɖe ŋuwòa, dze agbagba nàŋe aɖaba ƒu edzi. Gblɔ nya siawo tɔgbi nàtsɔ ade dzi ƒo nɛ: “Menya be mele bɔbɔe o, eya ta èdze na kafukafu ŋutɔ.” Mègagblɔ gbeɖe be: “Ne ɖe nèkpɔtɔ le atama nom kura, ne enyo wu!” o.

● Ðee fia be yenye xɔlɔ̃ vavã. Biblia gblɔ be: “Xɔlɔ̃ vavã lɔ̃a ame ɣeawokatãɣi eye ame nɔvi wònye wodzi ɖe xaxagbe ŋu.” (Lododowo 17:17) Eya ta nɔnɔme ka kee ame si ŋu nèle kpekpem ɖo la ɖe fia o, gbɔ dzi ɖi nɛ, eye nàɖee afiae be yelɔ̃e “ɣeawokatãɣi.”

Àte Ŋu Adzudzɔ!

FIFIA, ehiã be ‘nalé dzi ɖe ƒo ahawɔ dɔ’ si dze ŋgɔ wò. (1 Kronika 28:10) Afɔ mamlɛ kawoe wòle be nàɖe be nàdzudzɔ?

Ðo ŋkeke. Amerika Ƒe Amewo Kple Lãmesẽnyawo Ŋu Dɔdzikpɔƒe ɖo aɖaŋu be, ne ènya ɖoe be yeadzudzɔ sigarɛtnono koa, megawu kwasiɖa eve hafi nàdze wò agbe yeyea gɔme o. Esia awɔe be wò tameɖoɖo kplikpaa me magbɔdzɔ o. Ðo gbe si gbe tututu nàdze egɔme, gblɔe na xɔwòwo, eye ne nanewo va trɔ hã, mègatrɔ ŋkekea o.

Ŋlɔ ŋkuɖodzinya aɖewo ɖe pepa dzi. Àte ŋu aŋlɔ nu siwo gbɔna, kpakple nu bubu ɖe sia ɖe si ado ŋusẽ wò be nàdzudzɔ:

● Susu siwo ta nèdi be yeadzudzɔ

● Ame siwo nàyɔ ne atamanono gava le wò dzrom vevie, eye nèsusu be yeana ta, la ƒe telefon xexlẽdzesiwo

● Nu siwo ŋu nàbu, be wòakpe ɖe ŋuwò nàwɔ nu si nèɖo—ate ŋu anye mawunyakpukpuiwo, abe Galatiatɔwo 5:22, 23 ene

Pepaa nenɔ ŋuwò ɣesiaɣi, eye nànɔ exlẽm edziedzi le ŋkekea me. Ne èva dzudzɔ keŋkeŋ hã, dzro wo me ne dzodzroa gava na wò be nàno atama.

Nɔ asi ɖem le nu siwo do ƒome kple atamanono ŋu vivivi. Dze esia wɔwɔ gɔme hafi gbe si gbe nèdi be yeadzudzɔa naɖo. Le kpɔɖeŋu me, ne tsãa, ne ènya fɔ le aba dzi ko èno atamaa, ke fifia, àte ŋu atiae be yealala gaƒoƒo ɖeka teti nava yi. Ne ènoa atama le nuɖuɣi alo emegbe tetia, trɔ asi le eŋu. Ƒo asa na afi si amewo noa atama le yiyi. Eye ne wò ɖeɖe nèlia, srɔ̃ ale si nàkɔ gbe dzi agblɔ be: “Ao, medzudzɔ atamanono.” Menye ɖeko nu siawo wɔwɔ adzra wò ɖo ɖe gbe si gbe nàdzudzɔ ŋu o; woana wòanɔ susu me na wò hã be, madidi o, ye hã yeava gblɔ be yenoa atama tsã.

Nɔ klalo. Ne ŋkeke si dzi nèɖoe be yeadzudzɔ le gogoma, di nu siwo nàtsɔ aɖɔ li atamaa da ɖi; woate ŋu anye karɔt, chewing gum, azi, kple bubuawo. Ðo ŋku ŋkeke si nèɖo la dzi na xɔwòwo kple ƒometɔwo, eye nàɖo ŋku nu si woawɔ atsɔ akpe ɖe ŋuwò la dzi na wo. Do ŋgɔ teti hafi gbe ma gbe naɖoa, ɖe nu siwo me nèkɔa dzofi ɖo, sigarɛt kpenuwo, kple nu bubu ɖe sia ɖe si ate ŋu anye tetekpɔ na wòa ɖa. Woate ŋu anye sigarɛt siwo le xɔ me, le ʋu me alo kotoku me, alo le wò dɔwɔƒe. Nya lae nye be, ne sigarɛt le asitsɔƒe na wòa, enono adzro wò wu be nàbia xɔwò be wòana ye alo nàvae ƒlee! Azɔ hã, nɔ gbe dom ɖa na Mawu be wòakpe ɖe ye ŋu, eye gbedodoɖaa nu nesẽ ɖe edzi tso gbe si gbe nèdzudzɔ.—Luka 11:13.

Ame geɖe siwo sigarɛt nye alakpaxɔlɔ̃ vɔ̃ɖi na tsã la na woa kpli wo dome va klã. Wò hã àte ŋui. Ne èwɔea, ànɔ lãmesẽ me wu, eye àse le ɖokuiwò me be yevo ale gbegbe!

[Nɔnɔmetata]

Pepaa nenɔ ŋuwò ɣesiaɣi, eye nànɔ exlẽm edziedzi le ŋkekea me