Ale Si Hamemetsitsiwo Akpe Ðe Ame Siwo Woɖe Le Haa Me Ŋu

1-2. (a) Aleke Yehowa bua ame siwo tsɔ nu vɔ̃ wɔwɔ ɖo dɔe? (b) Nu kae Yehowa le mɔ kpɔm be ame siwo wɔ nu vɔ̃ gã nawɔ?

YEHOWA MAWU meda asi ɖe nuwɔna aɖewo dzi o, etsri nu vɔ̃. (Ps. 5:​4-6) Edi be míawɔ ɖe nudidi dzɔdzɔe siwo le yeƒe Nyaa me la dzi. Le nyateƒe me la, Yehowa nya be míede blibo o, eya ta mele mɔ kpɔm be míawɔ nu wòade blibo o. (Ps. 130:​3, 4) Gake medea nu gbegblẽ dzi na ‘ame mavɔ̃mawu siwo trɔa mía Mawu ƒe amenuveve la wòzua mɔɖeɖe ɖe ŋukpenanuwɔwɔ dzimesesẽtɔe ŋu’ o. (Yuda 4) Biblia gblɔ be woatsrɔ̃ “ame mavɔ̃mawuwo” le Armagedon-ʋaa me.—2 Pet. 3:7; Nyaɖ. 16:16.

² Gake Yehowa medi be ame aɖeke natsrɔ̃ o. Abe ale si míekpɔe le nyati siawo ƒe akpa si do ŋgɔ me ene la, Biblia na eme kɔ ƒãa be Mawu ‘di be amewo katã natrɔ dzi me.’ (2 Pet. 3:9) Hamemetsitsiwo hã srɔ̃a Yehowa eye wogbɔa dzi ɖi ne wole kpekpem ɖe ame si wɔ nu vɔ̃ gã ŋu be wòatrɔ dzi me agatrɔ ɖe Yehowa ŋu. Gake menye nu vɔ̃ wɔlawo katãe lɔ̃na trɔa dzi me o. (Yes. 6:9) Wo dometɔ aɖewo kpɔtɔ nɔa nu gbegblẽ wɔwɔ dzi togbɔ be hamemetsitsiwo dze agbagba enuenu be yewoakpe ɖe wo ŋu hã. Ne edzɔ alea la, afɔ kae hamemetsitsiwo aɖe?

“MIÐE AME VƆ̃ÐI LA ÐA”

 3. (a) Nya kae Biblia gblɔ ku ɖe nu vɔ̃ wɔla siwo gbe dzimetɔtrɔ ŋu? (b) Nu ka tae míate ŋu agblɔ be ame si wɔ nu gbegblẽ la ŋutɔe tiae be woaɖe ye le haa me?

³ Ne nu vɔ̃ wɔla aɖe gbe dzimetɔtrɔ la, afɔ si wòle be hamemetsitsiwo naɖe ye nye be woawɔ ɖe mɔfiame si dze le 1 Korintotɔwo 5:13 dzi. Afi ma gblɔ be: “Miɖe ame vɔ̃ɖi la ɖa le miawo ŋutɔwo mia dome.” Le nyaa nu la, nu vɔ̃ wɔlaa ŋutɔe tiae be woaɖe ye le hamea me. Nu si wòƒã lae nye ema wòŋe. (Gal. 6:7) Nu ka tae míegblɔe alea? Nu si tae nye be togbɔ be hamemetsitsiwo dze agbagba enuenu be yewoakpe ɖe eŋu hã la, egbe dzimetɔtrɔ. (2 Fia. 17:​12-15) Eƒe nuwɔnawo fia be etiae be yemawɔ ɖe Yehowa ƒe nudidiwo dzi o.—5 Mose 30:​19, 20.

 4. Nu ka tae woɖea gbeƒã ne woɖe nu vɔ̃ wɔla matrɔdzime aɖe le haa me?

⁴ Ne woɖe nu vɔ̃ wɔla matrɔdzime aɖe le haa me la, woɖea gbeƒãe na hamea be amea meganye Yehowa Ðasefo o.a Menye gbeƒãɖeɖea ƒe taɖodzinue nye be woado ŋukpe amea o. Ke boŋ woɖea gbeƒã sia kple susu be hamea me tɔwo nate ŋu awɔ ɖe Ŋɔŋlɔawo ƒe aɖaŋuɖoɖo sia dzi be “woadzudzɔ hadede” kple amea eye ‘woagaɖu nu kplii o.’ (1 Kor. 5:​9-11) Susu nyui aɖe tae Yehowa na mɔfiame sia ɖo. Apostolo Paulo gblɔ be: “Amɔwɔʋãnu vi aɖee nana amɔwɔ blibo la katã ʋãna.” (1 Kor. 5:6) Nu vɔ̃ wɔla matrɔdzimewo ƒe nuwɔna ate ŋu agblẽ nu le ame siwo le agbagba dzem be yewoawɔ ɖe Yehowa ƒe nudidi dzɔdzɔeawo dzi la ŋu.—Lod. 13:20; 1 Kor. 15:33.

 5. Susu kae wòle be wòanɔ mía si ku ɖe ame si woɖe le haa me ŋu, eye nu ka tae?

⁵ Ke aleke wòle be míabu nɔvi aɖe si woɖe le haa me? Togbɔ be míade ha kplii o hã la, ele be míabui be enye alẽ si tra mɔ, ke menye be evɔ nɛ kura o. Alẽ si tra mɔ la agate ŋu atrɔ ava alẽhaa dome. Ðo ŋku edzi be alẽ ma si tra mɔ la ɖe adzɔgbe na Yehowa. Nublanuitɔe la, mele agbe nɔm ɖe adzɔgbe si wòɖe la nu o, si na wòva le afɔku me fifia. (Eze. 18:31) Gake esi wònye Yehowa ƒe nublanuikpɔkpɔ kpɔtɔ li ta la, mɔkpɔkpɔ li be atrɔ agbɔ. Ke aleke hamemetsitsiwo ate ŋu akpe ɖe ame si woɖe le haa me ŋu?

NU SI HAMEMETSITSIWO AWƆ ATSƆ AKPE ÐE AME SI WOÐE LE HAA ME ŊU

 6. Afɔ kawoe hamemetsitsiwo aɖe atsɔ akpe ɖe ame si woɖe le haa me ŋu?

⁶ Ne woɖe ame aɖe le haa me la, ɖe wòfia be wonyae eye ekpo ɖe eya ŋutɔ gbɔ be wòadze agbagba adi mɔ siwo dzi wòato atrɔ ava Yehowa gbɔa? Ao, mefia nenema o! Ne hamemetsitsiwo ƒe kɔmiti la gblɔe na nu vɔ̃ wɔla matrɔdzime la be woaɖee le haa me la, woana wòanya afɔ siwo wòaɖe be woagagbugbɔ axɔe ɖe hamea me. Gake menye ema koe hamemetsitsi siawo wɔna o. Zi geɖe la, wonana wònyana be yewodi be yewoagakpe kplii le ɣleti ʋɛ aɖewo megbe akpɔe ɖa nenye be ewɔ tɔtrɔwo. Ne amea lɔ̃ be woagado go kpli ye la, ke le kpekpe ma me la, hamemetsitsiawo adze agbagba akpe ɖe eŋu be wòatrɔ dzi me ale be wòatrɔ agbɔ. Ne ɣemaɣi wode dzesii be amea metrɔ dzi me haɖe o gɔ̃ hã la, woadze agbagba be yewoagakpe kplii ake emegbe.

 7. Ne woɖe ame aɖe le haa me la, aleke hamemetsitsiwo ɖenɛ fiana be yewole Yehowa ƒe dɔmetɔtrɔ srɔ̃m? (Yeremiya 3:12)

⁷ Hamemetsitsiawo srɔ̃a Yehowa ƒe dɔmetɔtrɔ ne wole ame si woɖe le haa me ƒe nyawo gbɔ kpɔm. Le kpɔɖeŋu me, esi Israel-viwo dze aglã ɖe Yehowa ŋu le blema la, Yehowa melala be woatrɔ dzi me hafi yeakpe ɖe wo ŋu o. Ke boŋ, edo ŋgɔ ɖe afɔ nɔ eƒe nyagblɔɖilawo dɔm ɖe wo gbɔ be woatrɔ dzi me. Abe ale si míesrɔ̃e le nyati siawo ƒe evelia me ene la, Yehowa gblɔ na eƒe nyagblɔɖila Hosea be wòatsɔe ake srɔ̃a eye wòakplɔe va eɖokui gbɔ togbɔ be ekpɔtɔ nɔ ahasi wɔm hã. Yehowa to esia dzi fia eƒe amewo be yeƒe dɔme trɔna ɖe ame ŋu ŋutɔ. (Hos. 3:1; Mal. 3:7) Hamemetsitsiwo srɔ̃a Yehowa eye wodina vevie be nu vɔ̃ wɔlaa natrɔ dzi me eye wòatrɔ agbɔ. Womewɔa naneke si ana esia wɔwɔ nasesẽ nɛ o.—Xlẽ Yeremiya 3:12.

 8. Aleke Yesu ƒe lododo si ku ɖe vi búbu la ŋu na míekpɔ ale si gbegbe Yehowa ƒe dɔme trɔna ɖe ame ŋu eye wòkpɔa nublanui? (Luka 15:7)

⁸ Ðo ŋku vifofo si le Yesu ƒe lododo si ku ɖe vi búbua ŋu la dzi. Esi wòkpɔ via le adzɔge ɖaa wòtrɔ gbɔna aƒe la, “eƒu du yi ɖawɔ atuu nɛ hegbugbɔ nu nɛ lɔlɔ̃tɔe.” (Luka 15:20) De dzesii be vifofoa melala be ye via nava ɖe kuku na ye o. Ke boŋ eƒu du vae kpee elabe elɔ̃e. Nenema kee hamemetsitsiwo dzea agbagba wɔa nu ɖe ame siwo woɖe le haa me la ŋu. Wodi be ame siwo ‘tra mɔ la natrɔ va aƒe.’ (Luka 15:​22-24, 32) Yehowa kple dziƒodɔlawo kpɔa dzidzɔ ne nu vɔ̃ wɔla aɖe trɔ dzi me, eye míawo hã míekpɔa dzidzɔ le anyigba dzi!—Xlẽ Luka 15:7.

 9. Nu kae Yehowa di be ame siwo wɔ nu vɔ̃ la nawɔ?

⁹ Nu siwo me míedzro va se ɖe fifia na eme kɔ ƒãa be Yehowa meɖe mɔ be nu gbegblẽ wɔla siwo gbe dzimetɔtrɔ la nanɔ hamea me o. Gake meklɔ asi le woƒe nya me keŋkeŋ hã o. Edi be woatrɔ dzi me. De dzesi ale si Yehowa sena le eɖokui me ne ame si wɔ nu vɔ̃ la trɔ dzi me le nya siwo wògblɔ le Hosea 14:4. Egblɔ le afi ma be: “Mayɔ dɔ woƒe nuteƒemawɔmawɔ la. Malɔ̃ wo tso dzi me faa, elabena nye dɔmedzoe nu fa.” Nya siawo nye susu vevi siwo ta wòle be hamemetsitsiwo nanɔ ŋudzɔ ale be woade dzesi agbagba siwo dzem ame si wɔ nu gbegblẽ la le be yeatrɔ dzi me. Ele be nya siawo nana agbe naɖo ame siwo tra hã me woaka ɖe edzi be Yehowa lɔ̃ yewo eye wòdi vevie be woatrɔ agbɔ.

10-11. Aleke hamemetsitsiwo awɔ akpe ɖe ame siwo woɖe le haa me va yi la ŋu?

¹⁰ Ke ame siwo woɖe le haa me, ɖewohĩ ƒe gbogbo aɖewoe nye esia ya ɖe? Wo dometɔ aɖewo anya dzudzɔ nu gbegblẽ si tae woɖe wo le haa me la wɔwɔ. Alo ɖewo hã anya ŋlɔ nu si tae woɖe wo le haa me la gɔ̃ hã be. Aleke kee nyaa le o, hamemetsitsiwo adze agbagba adi ame siawo avae srã wo kpɔ. Le sasrãkpɔa mea, hamemetsitsiawo ate ŋu ado gbe ɖa kpli wo eye woade dzi ƒo na wo lɔlɔ̃tɔe be woatrɔ agbɔ va hamea me. Nya lae nye be ne ame aɖe dzudzɔ hadede kple hamea ƒe geɖe la, agbɔdzɔ le gbɔgbɔ me. Eya ta ne amea na hamemetsitsiwo nya be yedi be yeatrɔ agbɔ va hamea me la, hamemetsitsiwo awɔ ɖoɖo be ame aɖe nanɔ Biblia srɔ̃m kplii hafi woava xɔe ɖe hamea me gɔ̃ hã. Hamemetsitsiwo koe awɔ ɖoɖo be woasrɔ̃ Biblia kple ame si woɖe le haa me.

¹¹ Hamemetsitsiwo dzea agbagba be yewoasrɔ̃ Yehowa ƒe dɔmetɔtrɔ, eya ta woadi ame siwo katã dzo le Yehowa gbɔ eye woade dzi ƒo na wo be woatrɔ agbɔ. Ne ame aɖe si wɔ nu gbegblẽ nya trɔ dzi me eye wòdzudzɔ nu gbegblẽa koa, mele be hamemetsitsiwo nahe ɖe megbe kura o, woawɔ kaba axɔe.—2 Kor. 2:​6-8.

12. (a) Nɔnɔme kawo mee wòle be hamemetsitsiwo nanɔ ŋudzɔ ada nuwo kpɔ nyuie le? (b) Nu ka tae mele be míasusui be Yehowa makpɔ nublanui na ame aɖewo ya o? (Kpɔ etenuŋɔŋlɔa hã.)

¹² Le nɔnɔme aɖewo mea, ele be hamemetsitsiwo nada nuwo kpɔ nyuie hafi agaxɔ ame aɖewo ɖe haa me. Le kpɔɖeŋu me, ne ame aɖe dɔ ɖevi gbɔ alo wɔ ŋutasẽnu ɖe eŋu, ne egbe xɔse, alo eto ayemɔ aɖe dzi gbe srɔ̃a la, ele be hamemetsitsiawo naka ɖe edzi be amea trɔ dzi me ŋutɔŋutɔ hafi woaxɔe ɖe haa me. (Mal. 2:14; 2 Tim. 3:6) Ele be woakpɔ nɔviawo ta. Gake ele be wòanɔ susu me na mí be Yehowa axɔ nu vɔ̃ wɔla si trɔ dzi me ŋutɔŋutɔ eye wòdzudzɔ nu gbegblẽ wɔwɔ. Togbɔ be hamemetsitsiwo alé ŋku ɖe nuwo ŋu nyuie hafi axɔ ame aɖe si wɔ nu tovowo ɖe ame bubuwo ŋu ɖe hamea me hã la, mele be woasusui be nu gbegblẽ wɔla mawo ya la, Yehowa makpɔ nublanui na wo gbeɖe o.b—1 Pet. 2:10.

NU SI HAMEA ATE ŊU AWƆ

13. Aleke wòle be míawɔ nu ɖe ame si wogbe nya na ŋu? Ke aleke wòle be míawɔ nu ɖe ame si woɖe le haa me ŋu?

¹³ Abe ale si míekpɔe le nyati si do ŋgɔ me ene la, ɣeaɖewoɣia woaɖe gbeƒãe be wogbe nya na ame aɖe. Ne edzɔ alea la, míate ŋu ayi edzi anɔ ha dem kplii faa, elabe etrɔ dzi me eye wòdzudzɔ nu gbegblẽa wɔwɔ. (1 Tim. 5:20) Ekpɔtɔ nye hamea me tɔ eye nɔviwo ƒe hadede kplii ade dzi ƒo nɛ be wòayi edzi awɔ nu si sɔ. (Heb. 10:​24, 25) Gake ame siwo woɖe la haa me ya ƒe nya to vovo kura. ‘Míedzudzɔa hadede kpli wo eye míeɖua nu kpli wo gɔ̃ hã o.’—1 Kor. 5:11.

14. Aleke Kristotɔwo ate ŋu awɔ woƒe dzitsinya si wotsɔ Biblia na hehee ŋu dɔ atso nya me le ale si woawɔ nu ɖe ame si woɖe le haa me ŋu? (Kpɔ fotoa hã.)

¹⁴ Ðe nu si me míedzro la fia be ele be míagbe nu le ame si woɖe le haa me gbɔ keŋkeŋua? Ao. Nyateƒee wònye be míade ha kplii o. Gake Kristotɔ ɖe sia ɖe awɔ eƒe dzitsinya si wòtsɔ Biblia na hehee ŋu dɔ atso nya me ne akpe ame siwo woɖe le haa me be wòade kpekpeawo, ɖewohĩ amea nye eƒe ƒometɔ alo exɔlɔ̃ kplikplikpli hafi wova ɖee le haa me. Ke ne amea va kpekpea la, aleke míawɔ nu ɖe eŋu? Ne tsã wònye la, mímado gbe nɛ o. Gake fifia ya Kristotɔ ɖe sia ɖe awɔ eƒe dzitsinya si wòtsɔ Biblia na hehee ŋu dɔ atso nya me le nu si wòawɔ ŋu. Ame aɖewo adi be yewoado gbe nɛ alo ado wòezɔ nɛ. Ke hã mele be míava nɔ dze ɖom kplii alo anɔ ha dem kplii o.

15. Nu vɔ̃ wɔla kawo ŋue nya si dze le 2 Yohanes 9-11 ku ɖo? (Kpɔ aɖaka si nye “Ðe Yohanes Kple Paulo Ƒe Nyawo Ku Ðe Nu Vɔ̃ Ðeka Ƒomevi Ŋua?”)

¹⁵ Ame aɖe abia be, ‘Menye ɖe wogblɔ le Biblia me be Kristotɔ si do gbe na nu gbegblẽ wɔla la kpɔ gome kplii le eƒe dɔwɔwɔ vɔ̃ɖiawo me oa?’ (Xlẽ 2 Yohanes 9-11.) Nya siwo ƒo xlã mawunyakpukpui sia ɖee fia be xɔsegbelawo kple ame siwo doa nu gbegblẽ wɔwɔ ɖe ŋgɔ ƒe nya gblɔm wole. (Nyaɖ. 2:20) Eya ta ne ame aɖe le xɔsegbelawo ƒe nufiafia alo nu gbegblẽ wɔwɔ dom ɖe ŋgɔ la, hamemetsitsiwo mawɔ ɖoɖo avae srãe kpɔ o. Ate ŋu adzɔ be ame sia ƒomevi natrɔ dzi me ya. Gake ne amea metrɔ dzi me o la, mímado gbe nɛ alo akpee be wòade hamea ƒe kpekpewo o.

SRƆ̃ YEHOWA ƑE DƆMETƆTRƆ KPLE NUBLANUIKPƆKPƆ

16-17. (a) Nu kae Yehowa di be nu gbegblẽ wɔlawo nawɔ? (Ezekiel 18:32) (b) Aleke hamemetsitsiwo ate ŋu awɔ dɔ aduadu kple Yehowa akpe ɖe ame siwo wɔ nu vɔ̃ la ŋu?

¹⁶ Nu kae míesrɔ̃ le nyati vovovo atɔ̃ siawo me? Eyae nye be Yehowa medi be ame aɖeke natsrɔ̃ o! (Xlẽ Ezekiel 18:32.) Edi be nu gbegblẽ wɔlawo nadzra wo kple ye dome ɖo. (2 Kor. 5:20) Eya ta tso blema ke la, Yehowa dea dzi ƒo na eƒe dukɔ kple ame ɖekaɖeka siwo tra mɔ be woatrɔ dzi me eye woatrɔ ava ye gbɔ. Mɔnukpɔkpɔ gã aɖee wònye na hamemetsitsiwo be woawɔ dɔ aduadu kple Yehowa ale be woakpe ɖe nu gbegblẽ wɔlawo ŋu be woatrɔ dzi me.—Rom. 2:4; 1 Kor. 3:9.

¹⁷ Dzidzɔ gã wònyena le dziƒo ne nu vɔ̃ wɔlawo trɔ dzi me! Mía Fofo si le dziƒo Yehowa kpɔa dzidzɔ ŋutɔ ne eƒe alẽ si bú trɔ gbɔ va hamea me. Ne míede ŋugble le Yehowa ƒe dɔmetɔtrɔ, nublanuikpɔkpɔ kple dɔmenyonyo ŋu la, míegalɔ̃a eyama ɖe edzi.—Luka 1:78.