De Bubu Srɔ̃ɖeɖe Ŋu—Elabena Mawu Ƒe Nunanae Wònye
‘Eya ŋuti ŋutsu agblẽ fofoa kple dadaa ɖi ahaku ɖe srɔ̃a ŋuti, eye woanye ŋutilã ɖeka.’—1 MOSE 2:24.
1. Nu ka tae Yehowa dze na míaƒe bubu?
YEHOWA MAWU, srɔ̃ɖeɖe Gɔmeɖoanyila la, dze na míaƒe bubu. Esi wònye mía Wɔla, Dziɖulagã, kple mía Fofo si le dziƒo ta la, esɔ nyuie be woɖɔe be eyae nye “nunana nyui ɖe sia ɖe kple nunana blibo ɖe sia ɖe” Nala. (Yak. 1:17; Nyaɖ. 4:11) Esia nye lɔlɔ̃ gã si le esi la ɖeɖe fia. (1 Yoh. 4:8) Nu sia nu si wòfia mí, nu sia nu si wòbia tso mía si, kpakple nu sia nu si wòna mí la katã, míaƒe nyonyo kple viɖe tae.—Yes. 48:17.
2. Mɔfiame kawoe Yehowa na atsu kple asi gbãtɔa?
2 Biblia ɖee fia be srɔ̃ɖeɖe hã nye nunana “nyui” siwo tso Mawu gbɔ la dometɔ ɖeka. (Lod. 19:14) Esime Yehowa wɔ srɔ̃ɖeɖe gbãtɔa la, ena mɔfiame aɖewo koŋ atsu kple asi, Adam kple Xawa, le ale si woawɔ akpɔ dzidzedze ŋu. (Mixlẽ Mateo 19:4-6.) Ne ɖe wowɔ ɖe Mawu ƒe mɔfiafia dzi la, anye ne woanɔ dzidzɔ kpɔm ɖaa tegbee. Ke hã, wogbe Mawu ƒe sededeawo dzi wɔwɔ bometsitsitɔe, eye esia na wokpe fu geɖe ŋutɔ.—1 Mose 3:6-13, 16-19, 23.
3, 4. (a) Alekee ame geɖewo gbe bubudede srɔ̃ɖeɖe kple Yehowa Mawu siaa ŋu egbeae? (b) Kpɔɖeŋu kawo ŋue míalé ŋku ɖo le nyati sia me?
3 Abe atsu kple asi gbãtɔ ma ene la, ame geɖewo wɔa nyametsotsowo egbea le srɔ̃ɖeɖe ŋu esi womebua Yehowa ƒe mɔfiamewo ŋu alo dea bubu wo ŋu kura o. Ŋutsu kple nyɔnu aɖewo nɔa wo nɔewo gbɔ srɔ̃maɖemaɖee alo wodzea ahiã geɖewo, eye ame bubuwo tsoa nya me le ale si wodi be srɔ̃ɖeɖe nanɔ ŋu na wo ɖokuiwo, abe vidzinuɖekatɔwo ƒe srɔ̃ɖeɖe kple nukpɔsusu si nye be woate ŋu agbe srɔ̃ faa la ene. (Rom. 1:24-32; 2 Tim. 3:1-5) Woŋea aɖaba ƒua nyateƒe si nye be Mawu ƒe nunanae srɔ̃ɖeɖe nye, eye be ne wogbe bubudede nunana sia ŋu la, ekema womele bubu dem Yehowa Mawu, si nye Nunalaa, ŋu o, la dzi.
4 Ɣeaɖewoɣi la, Mawu subɔla aɖewo gɔ̃ hã megava bua srɔ̃ɖeɖe abe ale si tututu Yehowa bunɛ ene o. Atsu kple asi Kristotɔ aɖewo tsoa nya me be yewoaklã, alo wogbea wo nɔewo evɔ mesɔ ɖe Ŋɔŋlɔawo ƒe gɔmeɖose aɖeke nu hafi o. Aleke míawɔ aƒo asa na nu siae? Alekee Mawu ƒe mɔfiafia si le 1 Mose 2:24 la ate ŋu akpe ɖe srɔ̃tɔ Kristotɔwo ŋu woado ŋusẽ woƒe srɔ̃ɖeɖea? Eye alekee ame siwo le srɔ̃ɖeɖe ŋu bum la awɔ adzra ɖo ɖe eŋu? Mina míalé ŋku ɖe atsu kple asi etɔ̃ aɖewo, siwo nɔ anyi le Biblia ƒe ɣeyiɣiwo me, siwo kpɔ dzidzedze le woƒe srɔ̃ɖeɖe me eye woɖe ale si bubudede Yehowa ŋu nye nu vevi aɖe si nana srɔ̃ɖeɖe nɔa anyi ɖaa fia la ŋu.
Srɔ̃ Nuteƒewɔwɔ
5, 6. Nɔnɔme kae anya do Zaxariya kple Elisabet ƒe nuteƒewɔwɔ kpɔ, eye alekee woɖo woƒe nuteƒewɔwɔ teƒe na woe?
5 Zaxariya kple Elisabet wɔ nu sia nu si le eteƒe. Wo ame evea siaa nye Yehowa subɔla wɔnuteƒewo hafi woɖe wo nɔewo. Zaxariya wɔa eƒe nunɔladɔa nuteƒewɔwɔtɔe, eye woa kple srɔ̃a siaa wɔa Mawu ƒe Sea dzi kple woƒe ŋutete katã ale si woate ŋui. Kakaɖedzitɔe la, susu geɖe li siwo tae wòle be woada akpe ɖo. Ke hã, ne wòanye be èɖi tsa yi woƒe aƒe me le Yuda la, àde dzesii enumake be nane bu. Vi aɖeke menɔ wo si o. Elisabet tsi ko, eye woa kple srɔ̃a siaa tsi ŋutɔ.—Luka 1:5-7.
6 Le blema Israel la, wodea asixɔxɔ vidzidzi ŋu ŋutɔ, eye zi geɖe la, ƒomewo lolona ŋutɔ. (1 Sam. 1:2, 6, 10; Ps. 128:3, 4) Ɣemaɣi la, etea ŋu dzɔna be Israel ŋutsu nato ayemɔ dzi agbe srɔ̃a le esi medzi vi nɛ o ta. Gake Zaxariya ya wɔ nuteƒe na srɔ̃a Elisabet. Meto mɔ aɖe dzi ɖe ta le srɔ̃ɖeɖea te o, eye srɔ̃a hã mewɔ nenema o. Togbɔ be vimanɔamesi anye nuxaxa na wo hã la, woyi edzi subɔ Yehowa ɖekae nuteƒewɔwɔtɔe. Esi ɣeyiɣiawo va nɔ yiyim la, Yehowa ɖo eteƒe na wo geɖe nukutɔe, esi wòna wodzi vi le woƒe tsitsime.—Luka 1:8-14.
7. Mɔ bubu ka dzie Elisabet gawɔ nuteƒe na srɔ̃a le?
7 Elisabet gawɔ nuteƒe le go bubu aɖe hã me si na wòdze na kafukafu. Esime wòdzi viaŋutsu, Yohanes la, Zaxariya mete ŋu nɔ nu ƒom o, elabena eke ɖi Mawu ƒe dɔla eye wòna wò eƒe aɖe tu. Ke hã, anɔ eme be Zaxariya to mɔ aɖe dzi na srɔ̃a nya be Yehowa ƒe dɔla la gblɔ na ye be yeana ŋkɔ ɖevia be “Yohanes.” Aƒelikawo kple ƒometɔwo di be woatsɔ fofoa ƒe ŋkɔ nɛ. Gake Elisabet wɔ ɖe srɔ̃a ƒe mɔfiame dzi nuteƒewɔwɔtɔe. Egblɔ be: “Gbeɖe! Ke boŋ woayɔe be Yohanes.”—Luka 1:59-63.
8, 9. (a) Aleke nuteƒewɔwɔ doa ŋusẽ srɔ̃ɖeɖee? (b) Mɔ kawo koŋ dzie atsu kple asi ate ŋu ato awɔ nuteƒe na wo nɔewo?
8 Abe ale si wòdzɔ le Zaxariya kple Elisabet gome ene la, etea ŋu dzɔna egbea be nu si atsu kple asi aɖewo kpɔa mɔ na le srɔ̃ɖeɖe me la mevaa eme na wo o, eye wodoa go kuxi bubu geɖewo hã. Nuteƒemawɔmawɔ le srɔ̃ɖeɖe me menaa srɔ̃ɖeɖe kpɔa dzidzedze o. Ahiãmoɖoɖo, amamaɖeɖenuwɔnawo kpɔkpɔ, ahasiwɔwɔ, kple nuwɔna bubuwo siwo gblẽa nu le srɔ̃ɖeɖe ŋu la ate ŋu awɔe be srɔ̃tɔwo maganɔ kakam ɖe wo nɔewo dzi kura o. Eye ne kaka ɖe ame nɔewo dzi megali o la, woƒe lɔlɔ̃ nu va tea tsitsi. Le mɔ aɖewo nu la, nuteƒewɔwɔ le abe aƒe aɖe ƒe kpɔtɔtɔ si kpɔa ƒomea ta tso ame tutɔwo kple ŋɔdzinuwo si me, eye wònana be dedienɔnɔ aɖe si nu sua aƒea me tɔwo si ene. Eya ta ne srɔ̃ŋutsu kple srɔ̃nyɔnu wɔa nuteƒe na wo nɔewo la, woƒe dzi dzea eme eye wotea ŋu ɖea woƒe dzimenyawo gblɔna na wo nɔewo faa, eye esia nana woƒe lɔlɔ̃ na wo nɔewo me gasẽna ɖe edzi. Ɛ̃, nuteƒewɔwɔ le vevie.
9 Yehowa gblɔ na Adam be: ‘Eya ŋuti ŋutsu agblẽ fofoa kple dadaa ɖi ahaku ɖe srɔ̃a ŋuti.’ (1 Mose 2:24) Nu kae nya sia fia? Esia fia be, ele be srɔ̃tɔawo natrɔ asi le ƒomedodo si le woa kple wo xɔlɔ̃wo kpakple ƒometɔwo dome tsã la ŋu. Ele be srɔ̃tɔawo dometɔ ɖe sia ɖe nakpɔ vovo ɖe nɔvia ŋu gbã, eye eyama ŋue wòle be eƒe susu nanɔ wu. Azɔ la, mele be woatsi dzi ɖe xɔlɔ̃wo kple ƒometɔwo ŋu ale gbegbe be woagblẽ wo srɔ̃a ɖi o; nenema kee mele be srɔ̃tɔawo naɖe mɔ wo dzilawo nava nɔ nu dem woƒe nyametsotsowo alo wo dome masɔmasɔwo me o. Ke boŋ ele be atsu kple asi la naku ɖe wo nɔewo ŋu goŋgoŋ. Emae nye Mawu ƒe mɔfiafia.
10. Nu kae akpe ɖe atsu kple asi ŋu woasrɔ̃ nuteƒewɔwɔ?
10 Le ƒome siwo me ma le subɔsubɔnyawo gome gɔ̃ hã me la, nuteƒewɔwɔ ɖea vi ŋutɔ. Nɔvinyɔnu aɖe si srɔ̃ menye haxɔsetɔ o la gblɔ be: “Medaa akpe na Yehowa geɖe ŋutɔ be efiam ale si mabɔbɔ ɖe srɔ̃nyeŋutsua te ahade bubu deto eŋu. Nuteƒewɔwɔ nɛ wɔe be lɔlɔ̃ kple bubu le míaƒe srɔ̃ɖeɖea me ƒe 47 sɔŋ.” (1 Kor. 7:10, 11; 1 Pet. 3:1, 2) Eya ta dze agbagba vevie nàna srɔ̃wòa nase le eɖokui me be yele dedie. To wò nyagbɔgblɔwo kple nuwɔnawo dzi nàna srɔ̃wòa nase le eɖokui me be eyae nye ame vevitɔ kekeake na wò le anyigba dzi. Ne wòanye nu si atso gbɔwò la, mègana ame aɖeke alo naneke nama mia kple srɔ̃wòa dome o. (Mixlẽ Lododowo 5:15-20.) Ron kple Jeannette, siwo le dzidzɔ kpɔm le woƒe srɔ̃ɖeɖe me ƒe 35 kple edzivɔe nye esia la, gblɔ be, “Esi míewɔa nu si Mawu di tso mía si nuteƒewɔwɔtɔe ta la, míewɔa nuteƒe na mía nɔewo hã.”
Ðekawɔwɔ Doa Ŋusẽ Srɔ̃ɖeɖe
11, 12. Alekee Akwila kple Priskila wɔ nu aduadui (a) le aƒe me, (b) le woƒe ŋutilãmedɔ me, kple (d) le Kristotɔwo ƒe subɔsubɔdɔa me?
11 Esime apostolo Paulo ƒo nu tso exɔlɔ̃ vevi siwo nye Akwila kple Priskila ŋu la, meyɔ ame ɖeka hegblẽ evelia ɖi o. Ƒome wɔɖeka sia nye nu si Mawu wɔnɛ esi wògblɔ be srɔ̃ŋutsu kple srɔ̃nyɔnu nanye “ŋutilã ɖeka” la ƒe kpɔɖeŋu nyui aɖe. (1 Mose 2:24) Wowɔa nu aduadu ɣesiaɣi le woƒe aƒe me, le woƒe ŋutilãmedɔ me, kple le Kristotɔwo ƒe subɔsubɔdɔa me. Le kpɔɖeŋu me, esi Paulo va Korinto zi gbãtɔ la, Akwila kple Priskila nyo dɔme nɛ hekpee wòva nɔ woƒe aƒe me, afi si wòdze ƒãa wòva dzena va se ɖe ɣesiaɣi aɖe. Emegbe esi wonɔ Efeso la, woɖe mɔ wowɔa hame ƒe kpekpewo le woƒe aƒe me eye wowɔ dɔ aduadu hena kpekpeɖeŋu ame yeyewo, abe Apolo ene, be woatsi le gbɔgbɔ me. (Dɔw. 18:2, 18-26) Atsu kple asi veviedonula sia va ʋu yi Roma emegbe, eye le afi ma hã, woɖe mɔ wowɔa hame ƒe kpekpewo le woƒe aƒe me. Le esia hã megbe la, wotrɔ yi Efeso ɖanɔ ŋusẽ dom nɔviawo.—Rom. 16:3-5.
12 Akwila kple Priskila wɔ dɔ kple Paulo hã ɣeyiɣi aɖe le asinudɔ, si nye avɔgbadɔwɔwɔ, si wo ame etɔ̃a siaa wɔna la me. Le esia hã me la, míekpɔe be atsu kple asi sia gawɔ nu asi le asi me hoʋiʋli kple dzrewɔwɔ manɔmee. (Dɔw. 18:3) Gake kakaɖedzitɔe la, ale si wozãa ɣeyiɣi geɖe le Kristotɔwo ƒe dɔwɔnawo me ɖekae lae wɔe be wosesẽ le gbɔgbɔ me, si wɔe be woƒe srɔ̃ɖeɖea me sẽ eye dzidzɔ nɔ eme. Le Korinto, Efeso, kple Roma siaa la, wova nya wo nyuie be wonye ‘hadɔwɔlawo le Kristo Yesu me.’ (Rom. 16:3) Afi ka kee woɖale subɔsubɔm le o, wowɔ dɔ aduadui le Fiaɖuƒegbeƒãɖeɖedɔa dodo ɖe ŋgɔ me.
13, 14. (a) Nu kawoe ate ŋu agblẽ srɔ̃ɖeɖe ƒe ɖekawɔwɔ dome? (b) Nu kawoe srɔ̃tɔwo ate ŋu awɔ atsɔ ado ŋusẽ woƒe srɔ̃ɖekadodoa ahanɔ abe “ŋutilã ɖeka” ene?
13 Nyateƒee, taɖodzinu ɖeka yome titi kple dɔ bubuwo wɔwɔ ɖekae doa ŋusẽ srɔ̃ɖeɖe. (Nyagb. 4:9, 10) Gake nublanuitɔe la, ɣeyiɣi vi aɖe koe atsu kple asi geɖe tsɔ nɔa wo nɔewo gbɔ egbea. Wo dometɔ ɖe sia ɖe zãa gaƒoƒo geɖe ɖe ye ŋutɔ ƒe dɔwɔɖui ŋu. Srɔ̃tɔ bubuwo zɔa mɔ enuenu le woƒe dɔwɔɖui ta alo woawo ɖeɖe ʋuna yia duta ɖawɔa dɔ be yewoaɖo ga ɖe aƒe. Le aƒe me gɔ̃ hã la, srɔ̃tɔ aɖewo sena le wo ɖokuiwo me be yewotsi akogo, le ɣeyiɣi si wozãna ɖe television, nu siwo doa dzidzɔ na wo wɔwɔ, kamedefefewo, videofefewo, alo Internet ŋu ta. Ðe esia nye nyateƒe le miaƒe ƒomea gomea? Ne nenemae la, ɖe miate ŋu atrɔ asi le miaƒe nɔnɔmewo ŋu be miakpɔ ɣeyiɣi geɖe wu ɖe mia nɔewo ŋua? Ðe manyo be miakpɔ gome le gbe sia gbe dɔwo, abe nuɖaɖa, agbakɔklɔ, alo aƒemedzadzraɖo ene, me ɖekae oa? Ðe miate ŋu awɔ dɔ aduadu le beléle na mia viwo me alo le kpekpeɖeŋunana mia dzila tsitsiwo mea?
14 Esi le vevie wue nye gomekpɔkpɔ le dɔwɔna siwo do ƒome kple tadedeagu na Yehowa me ɖekae edziedzi. Gbesiagbe mawunyakpukpuia me dzodzro kple gomekpɔkpɔ le ƒometadedeagu me ɖekae ana wò ƒomea ƒe taɖodzinu kple nuŋububu nato mɔ ɖeka. Gakpe ɖe eŋu la, mikpɔ gome le gbeadzisubɔsubɔdɔa me ɖekae. Ne anya wɔ la, midze agbagba miawɔ mɔɖeɖedɔ ɖekae, ne ɣleti ɖeka alo ƒe ɖeka koe miaƒe nɔnɔmeawo aɖe mɔ miate ŋu awɔe gɔ̃ hã. (Mixlẽ 1 Korintotɔwo 15:58.) Nɔvinyɔnu aɖe si kple srɔ̃a wowɔ mɔɖeɖedɔa ɖekae la gblɔ be: “Gomekpɔkpɔ le subɔsubɔdɔa mee nye mɔ siwo dzi míetona wɔa nu ɖekae heɖoa dze ŋutɔŋutɔ la dometɔ ɖeka. Esi wònye be taɖodzinu ɖeka, si nye be míakpe ɖe ame bubuwo ŋu le gbɔgbɔ me, ye le mía si ta la, míesena le mía ɖokui me be míenye zɔhɛ vavãwo. Mese le ɖokuinye me be mete ɖe srɔ̃nye ŋu kplikplikpli, menye abe srɔ̃a ene ko o, ke eva zu xɔ̃nye vevitɔ.” Ne mia kple srɔ̃wò miewɔa dɔ ɖekae le taɖodzinu ɖɔʋuwo gbɔ ɖoɖo me la, nu siwo me nètsɔa ɖe le, nu siwo nɔa vevie na wò wu, kple wò numamewo ava nɔ sɔsɔm kple srɔ̃wòa tɔ vivivi va se ɖe esime miava nɔ nuwo ŋu bum, anɔ nuwo wɔm, ahanɔ sesem le mia ɖokui me abe “ŋutilã ɖeka” ene geɖe wu, abe Akwila kple Priskila ene.
Mina Mawu Nanɔ Nɔƒe Gbãtɔ Le Miaƒe Srɔ̃ɖeɖe Me
15. Nu vevi kae nana srɔ̃ɖeɖe kpɔa dzidzedze? Ðe eme.
15 Yesu nya ale si wòle vevie be woatsɔ Mawu aɖo nɔƒe gbãtɔ le srɔ̃ɖeɖe me. Ekpɔ eteƒe esime Yehowa wɔ srɔ̃ɖeɖe gbãtɔa. Ekpɔ ale si Adam kple Xawa kpɔa dzidzɔ zi ale si wonɔ Mawu ƒe mɔfiame dzi wɔm ko la teƒe, eye eya ŋutɔ kpɔ eteƒe esime kuxiwo te mododoɖa esi wogbe eƒe mɔfiame dzi wɔwɔ. Eya ta esi Yesu nɔ nu fiam amewo la, ehe susu yi Fofoa ƒe mɔfiame si dze le 1 Mose 2:24 la dzi. Eye wògblɔ kpee be: “Nu si Mawu bla ɖekae la, ame aɖeke negama eme o.” (Mat. 19:6) Eya ta bubu deto dede Yehowa ŋu gakpɔtɔ nye nu vevi si nana dzidzɔ nɔa srɔ̃ɖeɖe me eye wòkpɔa dzidzedze. Yosef kple Maria, ame siwo nye Yesu dzilawo le anyigba dzi la ɖo kpɔɖeŋu ɖedzesi aɖe ɖi le go sia me.
16. Alekee Yosef kple Maria lé fɔ ɖe gbɔgbɔmenuwo ŋu le woƒe ƒomea me?
16 Yosef fa tu na Maria eye edea bubu eŋu. Esi wòsee be efɔ fu la, edi be yeakpɔ nublanui nɛ, eye etso nya me alea hafi Mawu ƒe dɔla va ɖe nu si dzɔ ɖe Maria dzi la me nɛ gɔ̃ hã. (Mat. 1:18-20) Wo ame evea siaa ɖo to Kaisaro ƒe sedede eye wowɔ ɖe Mose ƒe Sea hã dzi ale si dze. (Luka 2:1-5, 21, 22) Eye togbɔ be ŋutsuwo si ko wobia tso be woade subɔsubɔŋkekenyui veviwo teƒe le Yerusalem hã la, Yosef kple Maria, kpakple woƒe ƒomea, dea ŋkekenyuiawo ɖuƒe ƒe sia ƒe. (5 Mose 16:16; Luka 2:41) Atsu kple asi mawuvɔ̃la sia to mɔ sia kple bubuwo dzi dze agbagba be yewoadze Yehowa ŋu ahade bubu deto gbɔgbɔmenuwo ŋu. Eya ta mewɔ nuku o be Yehowa tia wo be woakpɔ ye Vi Yesu dzi le eƒe ɖevimenɔɣiwo me le anyigba dzi.
17, 18. (a) Mɔ kawo dzie atsu kple asi ate ŋu ato ana Mawu nanɔ nɔƒe gbãtɔ le woƒe ƒomea me? (b) Alekee esia aɖe vi na woe?
17 Ðe miaƒe ƒomea hã léa fɔ ɖe gbɔgbɔmenuwo ŋu nenema? Le kpɔɖeŋu me, ne miele nyametsotso veviwo wɔm la, ɖe miewɔa numekuku gbã be miakpɔ Biblia me gɔmeɖose siwo ku ɖe wo ŋu, doa gbe ɖa tso nɔnɔmeawo ŋu, eye emegbe miebiaa aɖaŋuɖoɖo tso Kristotɔ tsitsi aɖe gbɔa? Alo ɖe wòdzɔna zi geɖe be mienɔa te ɖe miawo ŋutɔwo miaƒe nukpɔsusu alo ƒometɔwo kple xɔlɔ̃wo tɔ dzi dzea agbagba be yewoakpɔ kuxiawo gbɔa? Ðe miedzea agbagba be yewoawɔ ɖe aɖaŋu gbogbo siwo wɔa dɔ, siwo kluvi nyateƒetɔ la ɖona le míaƒe agbalẽwo me tso srɔ̃ɖeɖe kple ƒomegbenɔnɔ ŋu la dzia? Alo ɖe miede dzesii be kɔnu siwo bɔ ɖe mia gbɔ alo aɖaŋuɖoɖo siwo bɔ ɖe xexemegbalẽwo me dzi koe mienɔa wɔwɔm ɖoa? Ðe miedoa gbe ɖa hesrɔ̃a nu ɖekae edziedzi, ɖoa gbɔgbɔmetaɖodzinuwo, heƒoa nu tso nu siwo miaƒe ƒomea tsɔ ɖo nɔƒe gbãtɔ ŋua?
18 Ray gblɔ tso woƒe srɔ̃ɖeɖe si me wokpɔ dzidzɔ le ƒe 50 sɔŋ ŋu be, “Míedo go kuxi aɖeke kpɔ si gbɔ míete ŋu kpɔ o, elabena míena Yehowa nye ame etɔ̃lia le míaƒe srɔ̃ɖeɖe, si le abe ‘ka ŋukplaba etɔ̃’ ene la, me.” (Mixlẽ Nyagblɔla 4:12.) Danny kple Trina lɔ̃ ɖe nya sia dzi. Wogblɔ be: “Esi míele Mawu subɔm ɖekae la, míaƒe srɔ̃ɖeɖea me va sẽ ɖe edzi.” Wole dzidzɔ kpɔm le woƒe srɔ̃ɖeɖe me ƒe 34 kple edzivɔwoe nye esia. Ne mietsɔa Yehowa ɖoa nɔƒe gbãtɔ le miaƒe srɔ̃ɖeɖe me la, akpe ɖe mia ŋu miakpɔ dzidzedze eye wòayra mi geɖee.—Ps. 127:1.
Yi Edzi Nànɔ Bubu Dem Mawu Ƒe Nunana La Ŋu
19. Nu ka tae Mawu ɖo srɔ̃ɖeɖe anyi ɖo?
19 Egbea la, nu siwo le vevie na srɔ̃tɔ geɖewo koe nye woawo ŋutɔwo ƒe dzidzɔkpɔkpɔ. Gake Yehowa subɔla ya ƒe nuŋububu toa vovo. Enya be, ɖe Mawu ɖo srɔ̃ɖeɖe anyi be wòana yeƒe tameɖoɖo nava eme. (1 Mose 1:26-28) Ne ɖe Adam kple Xawa de bubu nunana ma ŋu la, anye ne ana be anyigba blibo la azu paradiso, eye edzi ayɔ kple Mawu subɔla kpɔdzidzɔ siwo nye ame dzɔdzɔewo.
20, 21. (a) Nu ka tae wòle be míabu srɔ̃ɖeɖe be enye nu kɔkɔe? (b) Nunana ka ŋue míasrɔ̃ nu tso le kwasiɖa si gbɔna me?
20 Ƒo wo katã ta la, Mawu subɔlawo bua srɔ̃ɖeɖe be enye mɔnukpɔkpɔ na yewo be yewoahe ŋutikɔkɔe vae na Yehowa. (Mixlẽ 1 Korintotɔwo 10:31.) Abe ale si míekpɔe ene la, nuteƒewɔwɔ, ɖekawɔwɔ, kple Mawu tsɔtsɔ ɖo nɔƒe gbãtɔ nye mawumenɔnɔme siwo doa ŋusẽ srɔ̃ɖeɖe. Eya ta míeɖale srɔ̃ɖeɖe ŋu bum o, míeɖale agbagba dzem be míado ŋusẽ míaƒe srɔ̃ɖeɖe alo be míakpɔ eta o, ele be nu si tututu srɔ̃ɖeɖe nye nanɔ susu me na mí gbã: enye Mawu ƒe nuɖoanyi si le kɔkɔe. Ne nyateƒenya sia le susu me na mí la, aʋã mí be míawɔ míaƒe ŋutete katã be míatu míaƒe srɔ̃ɖeɖe me nyametsotsowo ɖe Mawu ƒe Nya dzi. Ne míewɔnɛ alea la, menye nunana si nye srɔ̃ɖeɖe ŋu koe míele bubu demee o, ke míele bubu dem Yehowa Mawu, nunana sia Nala hã ŋu.
21 Gake le nyateƒe me la, menye srɔ̃ɖeɖe koe nye nu si Yehowa na mí o; eye menye srɔ̃ɖeɖe dzi koe ame ato akpɔ dzidzɔ le agbe me o. Le nyati si kplɔe ɖo me la, míalé ŋku ɖe Mawu ƒe nunana xɔasi bubu ŋu—eyae nye trenɔnɔ ƒe nunana la.
Aleke Nàɖo Wo Ŋui?
• Alekee nuteƒewɔwɔ akpe ɖe srɔ̃tɔ Kristotɔwo ŋu?
• Nu ka tae nuwɔwɔ aduadu le ɖekawɔwɔ me doa ŋusẽ srɔ̃ɖeɖe?
• Mɔ siwo dzi srɔ̃tɔwo ate ŋu ato ana Mawu nanɔ nɔƒe gbãtɔ le woƒe srɔ̃ɖeɖe me la dometɔ aɖewo ɖe?
• Alekee míate ŋu ade bubu Yehowa, srɔ̃ɖeɖe Gɔmeɖoanyila la ŋu?
[Nɔnɔmetata si le axa 15]
Nuwɔwɔ aduadu nana be atsu kple asi wɔa ɖeka